໗. ວີຣິຍາຣມ຺ຠາທິວຄ຺ໂຄ

໖໑. ‘‘ນາຫໍ, ຠິກ຺ຂເວ, ອຎ຺ຎໍ ເອກຘມ຺ມມ຺ປິ ສມນຸປສ຺ສາມິ ເຍນ ອນຸປ຺ປນ຺ນາ ວາ ກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ວາ ອກຸສລາ ຘມ຺ມາ ປຣິຫາຍນ຺ຕິ ຍຖຍິທໍ, ຠິກ຺ຂເວ, ວີຣິຍາຣມ຺ໂຠ [ວິຣິຍາຣມ຺ໂຠ (ສີ. ສ຺ຍາ. ກໍ. ປີ.)]. ອາຣທ຺ຘວີຣິຍສ຺ສ, ຠິກ຺ຂເວ, ອນຸປ຺ປນ຺ນາ ເຈວ ກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ຈ ອກຸສລາ ຘມ຺ມາ ປຣິຫາຍນ຺ຕີ’’ຕິ. ປຐມໍ.

໖໒. ‘‘ນາຫໍ, ຠິກ຺ຂເວ, ອຎ຺ຎໍ ເອກຘມ຺ມມ຺ປິ ສມນຸປສ຺ສາມິ ເຍນ ອນຸປ຺ປນ຺ນາ ວາ ອກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ວາ ກຸສລາ ຘມ຺ມາ ປຣິຫາຍນ຺ຕິ ຍຖຍິທໍ, ຠິກ຺ຂເວ, ມຫິຈ຺ຉຕາ. ມຫິຈ຺ຉສ຺ສ, ຠິກ຺ຂເວ, ອນຸປ຺ປນ຺ນາ ເຈວ ອກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ຈ ກຸສລາ ຘມ຺ມາ ປຣິຫາຍນ຺ຕີ’’ຕິ. ທຸຕິຍໍ.

໖໓. ‘‘ນາຫໍ, ຠິກ຺ຂເວ, ອຎ຺ຎໍ ເອກຘມ຺ມມ຺ປິ ສມນຸປສ຺ສາມິ ເຍນ ອນຸປ຺ປນ຺ນາ ວາ ກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ວາ ອກຸສລາ ຘມ຺ມາ ປຣິຫາຍນ຺ຕິ ຍຖຍິທໍ, ຠິກ຺ຂເວ, ອປ຺ປິຈ຺ຉຕາ. ອປ຺ປິຈ຺ຉສ຺ສ, ຠິກ຺ຂເວ, ອນຸປ຺ປນ຺ນາ ເຈວ ກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ຈ ອກຸສລາ ຘມ຺ມາ ປຣິຫາຍນ຺ຕີ’’ຕິ. ຕຕິຍໍ.

໖໔. ‘‘ນາຫໍ, ຠິກ຺ຂເວ, ອຎ຺ຎໍ ເອກຘມ຺ມມ຺ປິ ສມນຸປສ຺ສາມິ ເຍນ ອນຸປ຺ປນ຺ນາ ວາ ອກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ວາ ກຸສລາ ຘມ຺ມາ ປຣິຫາຍນ຺ຕິ ຍຖຍິທໍ, ຠິກ຺ຂເວ, ອສນ຺ຕຸຏ຺ຐິຕາ. ອສນ຺ຕຸຏ຺ຐສ຺ສ, ຠິກ຺ຂເວ, ອນຸປ຺ປນ຺ນາ ເຈວ ອກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ຈ ກຸສລາ ຘມ຺ມາ ປຣິຫາຍນ຺ຕີ’’ຕິ. ຈຕຸຕ຺ຖໍ.

໖໕. ‘‘ນາຫໍ, ຠິກ຺ຂເວ, ອຎ຺ຎໍ ເອກຘມ຺ມມ຺ປິ ສມນຸປສ຺ສາມິ ເຍນ ອນຸປ຺ປນ຺ນາ ວາ ກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ວາ ອກຸສລາ ຘມ຺ມາ ປຣິຫາຍນ຺ຕິ ຍຖຍິທໍ, ຠິກ຺ຂເວ, ສນ຺ຕຸຏ຺ຐິຕາ. ສນ຺ຕຸຏ຺ຐສ຺ສ, ຠິກ຺ຂເວ, ອນຸປ຺ປນ຺ນາ ເຈວ ກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ຈ ອກຸສລາ ຘມ຺ມາ ປຣິຫາຍນ຺ຕີ’’ຕິ. ປຎ຺ຈມໍ.

໖໖. ‘‘ນາຫໍ, ຠິກ຺ຂເວ, ອຎ຺ຎໍ ເອກຘມ຺ມມ຺ປິ ສມນຸປສ຺ສາມິ ເຍນ ອນຸປ຺ປນ຺ນາ ວາ ອກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ວາ ກຸສລາ ຘມ຺ມາ ປຣິຫາຍນ຺ຕິ ຍຖຍິທໍ, ຠິກ຺ຂເວ, ອໂຍນິໂສມນສິກາໂຣ. ອໂຍນິໂສ, ຠິກ຺ຂເວ, ມນສິ ກໂຣໂຕ ອນຸປ຺ປນ຺ນາ ເຈວ ອກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ຈ ກຸສລາ ຘມ຺ມາ ປຣິຫາຍນ຺ຕີ’’ຕິ. ຉຏ຺ຐໍ.

໖໗. ‘‘ນາຫໍ, ຠິກ຺ຂເວ, ອຎ຺ຎໍ ເອກຘມ຺ມມ຺ປິ ສມນຸປສ຺ສາມິ ເຍນ ອນຸປ຺ປນ຺ນາ ວາ ກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ວາ ອກຸສລາ ຘມ຺ມາ ປຣິຫາຍນ຺ຕິ ຍຖຍິທໍ, ຠິກ຺ຂເວ, ໂຍນິໂສມນສິກາໂຣ. ໂຍນິໂສ, ຠິກ຺ຂເວ, ມນສິ ກໂຣໂຕ ອນຸປ຺ປນ຺ນາ ເຈວ ກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ຈ ອກຸສລາ ຘມ຺ມາ ປຣິຫາຍນ຺ຕີ’’ຕິ. ສຕ຺ຕມໍ.

໖໘. ‘‘ນາຫໍ, ຠິກ຺ຂເວ, ອຎ຺ຎໍ ເອກຘມ຺ມມ຺ປິ ສມນຸປສ຺ສາມິ ເຍນ ອນຸປ຺ປນ຺ນາ ວາ ອກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ວາ ກຸສລາ ຘມ຺ມາ ປຣິຫາຍນ຺ຕິ ຍຖຍິທໍ, ຠິກ຺ຂເວ, ອສມ຺ປຊຎ຺ຎໍ. ອສມ຺ປຊານສ຺ສ, ຠິກ຺ຂເວ, ອນຸປ຺ປນ຺ນາ ເຈວ ອກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ຈ ກຸສລາ ຘມ຺ມາ ປຣິຫາຍນ຺ຕີ’’ຕິ. ອຏ຺ຐມໍ.

໖໙. ‘‘ນາຫໍ, ຠິກ຺ຂເວ, ອຎ຺ຎໍ ເອກຘມ຺ມມ຺ປິ ສມນຸປສ຺ສາມິ ເຍນ ອນຸປ຺ປນ຺ນາ ວາ ກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ວາ ອກຸສລາ ຘມ຺ມາ ປຣິຫາຍນ຺ຕິ ຍຖຍິທໍ, ຠິກ຺ຂເວ, ສມ຺ປຊຎ຺ຎໍ. ສມ຺ປຊານສ຺ສ, ຠິກ຺ຂເວ, ອນຸປ຺ປນ຺ນາ ເຈວ ກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ຈ ອກຸສລາ ຘມ຺ມາ ປຣິຫາຍນ຺ຕີ’’ຕິ. ນວມໍ.

໗໐. ‘‘ນາຫໍ, ຠິກ຺ຂເວ, ອຎ຺ຎໍ ເອກຘມ຺ມມ຺ປິ ສມນຸປສ຺ສາມິ ເຍນ ອນຸປ຺ປນ຺ນາ ວາ ອກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ວາ ກຸສລາ ຘມ຺ມາ ປຣິຫາຍນ຺ຕິ ຍຖຍິທໍ, ຠິກ຺ຂເວ, ປາປມິຕ຺ຕຕາ. ປາປມິຕ຺ຕສ຺ສ, ຠິກ຺ຂເວ, ອນຸປ຺ປນ຺ນາ ເຈວ ອກຸສລາ ຘມ຺ມາ ອຸປ຺ປຊ຺ຊນ຺ຕິ ອຸປ຺ປນ຺ນາ ຈ ກຸສລາ ຘມ຺ມາ ປຣິຫາຍນ຺ຕີ’’ຕິ. ທສມໍ.

ວີຣິຍາຣມ຺ຠາທິວຄ຺ໂຄ ສຕ຺ຕໂມ.