᪕. ᨵᩮᩣᨲᨠᨾᩣᨱᩅᨸᩩᨧ᩠ᨨᩣ

᪘᪖. ‘‘ᨸᩩᨧ᩠ᨨᩣᨾᩥ ᨲᩴ ᨽᨣᩅᩣ ᨻᩕᩪᩉᩥ ᨾᩮᨲᩴ, [ᩍᨧ᩠ᨧᩣᨿᩈ᩠ᨾᩣ ᨵᩮᩣᨲᨠᩮᩣ]

ᩅᩣᨧᩣᨽᩥᨠᨦ᩠ᨡᩣᨾᩥ ᨾᩉᩮᩈᩥ ᨲᩩᨿ᩠ᩉᩴ;

ᨲᩅ ᩈᩩᨲ᩠ᩅᩣᨶ ᨶᩥᨣ᩠ᨥᩮᩣᩈᩴ, ᩈᩥᨠ᩠ᨡᩮ ᨶᩥᨻ᩠ᨻᩣᨶᨾᨲ᩠ᨲᨶᩮᩣ’’.

᪘᪗. ‘‘ᨲᩮᨶᩉᩣᨲᨸ᩠ᨸᩴ ᨠᩁᩮᩣᩉᩥ, [ᨵᩮᩣᨲᨠᩣᨲᩥ ᨽᨣᩅᩣ]

ᩍᨵᩮᩅ ᨶᩥᨸᨠᩮᩣ ᩈᨲᩮᩣ;

ᩍᨲᩮᩣ ᩈᩩᨲ᩠ᩅᩣᨶ ᨶᩥᨣ᩠ᨥᩮᩣᩈᩴ, ᩈᩥᨠ᩠ᨡᩮ ᨶᩥᨻ᩠ᨻᩣᨶᨾᨲ᩠ᨲᨶᩮᩣ’’.

᪘᪘. ‘‘ᨸᩔᩣᨾᩉᩴ ᨴᩮᩅᨾᨶᩩᩔᩃᩮᩣᨠᩮ, ᩋᨠᩥᨬ᩠ᨧᨶᩴ ᨻᩕᩣᩉ᩠ᨾᨱᨾᩥᩁᩥᨿᨾᩣᨶᩴ;

ᨲᩴ ᨲᩴ ᨶᨾᩔᩣᨾᩥ ᩈᨾᨶ᩠ᨲᨧᨠ᩠ᨡᩩ, ᨸᨾᩩᨬ᩠ᨧ ᨾᩴ ᩈᨠ᩠ᨠ ᨠᨳᩴᨠᨳᩣᩉᩥ’’.

᪘᪙. ‘‘ᨶᩣᩉᩴ ᩈᩉᩥᩔᩣᨾᩥ ᨸᨾᩮᩣᨧᨶᩣᨿ, ᨠᨳᩴᨠᨳᩥᩴ ᨵᩮᩣᨲᨠ ᨠᨬ᩠ᨧᩥ ᩃᩮᩣᨠᩮ;

ᨵᨾ᩠ᨾᨬ᩠ᨧ ᩈᩮᨭ᩠ᨮᩴ ᩋᨽᩥᨩᩣᨶᨾᩣᨶᩮᩣ [ᩌᨩᩣᨶᨾᩣᨶᩮᩣ (ᩈᩦ. ᩈ᩠ᨿᩣ. ᨸᩦ.)], ᩑᩅᩴ ᨲᩩᩅᩴ ᩒᨥᨾᩥᨾᩴ ᨲᩁᩮᩈᩥ’’.

᪙᪐. ‘‘ᩋᨶᩩᩈᩣᩈ ᨻᩕᩉ᩠ᨾᩮ ᨠᩁᩩᨱᩣᨿᨾᩣᨶᩮᩣ, ᩅᩥᩅᩮᨠᨵᨾ᩠ᨾᩴ ᨿᨾᩉᩴ ᩅᩥᨩᨬ᩠ᨬᩴ;

ᨿᨳᩣᩉᩴ ᩌᨠᩣᩈᩮᩣᩅ ᩋᨻ᩠ᨿᩣᨸᨩ᩠ᨩᨾᩣᨶᩮᩣ, ᩍᨵᩮᩅ ᩈᨶ᩠ᨲᩮᩣ ᩋᩈᩥᨲᩮᩣ ᨧᩁᩮᨿ᩠ᨿᩴ’’.

᪙᪑. ‘‘ᨠᩥᨲ᩠ᨲᨿᩥᩔᩣᨾᩥ ᨲᩮ ᩈᨶ᩠ᨲᩥᩴ, [ᨵᩮᩣᨲᨠᩣᨲᩥ ᨽᨣᩅᩣ]

ᨴᩥᨭ᩠ᨮᩮ ᨵᨾ᩠ᨾᩮ ᩋᨶᩦᨲᩥᩉᩴ;

ᨿᩴ ᩅᩥᨴᩥᨲ᩠ᩅᩣ ᩈᨲᩮᩣ ᨧᩁᩴ, ᨲᩁᩮ ᩃᩮᩣᨠᩮ ᩅᩥᩈᨲ᩠ᨲᩥᨠᩴ’’.

᪙᪒. ‘‘ᨲᨬ᩠ᨧᩣᩉᩴ ᩋᨽᩥᨶᨶ᩠ᨴᩣᨾᩥ, ᨾᩉᩮᩈᩥ ᩈᨶ᩠ᨲᩥᨾᩩᨲ᩠ᨲᨾᩴ;

ᨿᩴ ᩅᩥᨴᩥᨲ᩠ᩅᩣ ᩈᨲᩮᩣ ᨧᩁᩴ, ᨲᩁᩮ ᩃᩮᩣᨠᩮ ᩅᩥᩈᨲ᩠ᨲᩥᨠᩴ’’.

᪙᪓. ‘‘ᨿᩴ ᨠᩥᨬ᩠ᨧᩥ ᩈᨾ᩠ᨸᨩᩣᨶᩣᩈᩥ, [ᨵᩮᩣᨲᨠᩣᨲᩥ ᨽᨣᩅᩣ]

ᩏᨴ᩠ᨵᩴ ᩋᨵᩮᩣ ᨲᩥᩁᩥᨿᨬ᩠ᨧᩣᨸᩥ ᨾᨩ᩠ᨫᩮ;

ᩑᨲᩴ ᩅᩥᨴᩥᨲ᩠ᩅᩣ ᩈᨦ᩠ᨣᩮᩣᨲᩥ ᩃᩮᩣᨠᩮ, ᨽᩅᩣᨽᩅᩣᨿ ᨾᩣᨠᩣᩈᩥ ᨲᨱ᩠ᩉ’’ᨶ᩠ᨲᩥ.

ᨵᩮᩣᨲᨠᨾᩣᨱᩅᨸᩩᨧ᩠ᨨᩣ ᨸᨬ᩠ᨧᨾᩦ.