᪓. ᨧᩥᨲ᩠ᨲᩅᨣ᩠ᨣᩮᩣ

᪓᪓. ᨹᨶ᩠ᨴᨶᩴ ᨧᨸᩃᩴ ᨧᩥᨲ᩠ᨲᩴ, ᨴᩪᩁᨠ᩠ᨡᩴ [ᨴᩩᩁᨠ᩠ᨡᩴ (ᩈᨻ᩠ᨻᨲ᩠ᨳ)] ᨴᩩᨶ᩠ᨶᩥᩅᩣᩁᨿᩴ;

ᩏᨩᩩᩴ ᨠᩁᩮᩣᨲᩥ ᨾᩮᨵᩣᩅᩦ, ᩏᩈᩩᨠᩣᩁᩮᩣᩅ ᨲᩮᨩᨶᩴ.

᪓᪔. ᩅᩣᩁᩥᨩᩮᩣᩅ ᨳᩃᩮ ᨡᩥᨲ᩠ᨲᩮᩣ, ᩒᨠᨾᩮᩣᨠᨲᩏᨻ᩠ᨽᨲᩮᩣ;

ᨸᩁᩥᨹᨶ᩠ᨴᨲᩥᨴᩴ ᨧᩥᨲ᩠ᨲᩴ, ᨾᩣᩁᨵᩮᨿ᩠ᨿᩴ ᨸᩉᩣᨲᩅᩮ.

᪓᪕. ᨴᩩᨶ᩠ᨶᩥᨣ᩠ᨣᩉᩔ ᩃᩉᩩᨶᩮᩣ, ᨿᨲ᩠ᨳᨠᩣᨾᨶᩥᨸᩣᨲᩥᨶᩮᩣ;

ᨧᩥᨲ᩠ᨲᩔ ᨴᨾᨳᩮᩣ ᩈᩣᨵᩩ, ᨧᩥᨲ᩠ᨲᩴ ᨴᨶ᩠ᨲᩴ ᩈᩩᨡᩣᩅᩉᩴ.

᪓᪖. ᩈᩩᨴᩩᨴ᩠ᨴᩈᩴ ᩈᩩᨶᩥᨸᩩᨱᩴ, ᨿᨲ᩠ᨳᨠᩣᨾᨶᩥᨸᩣᨲᩥᨶᩴ;

ᨧᩥᨲ᩠ᨲᩴ ᩁᨠ᩠ᨡᩮᨳ ᨾᩮᨵᩣᩅᩦ, ᨧᩥᨲ᩠ᨲᩴ ᨣᩩᨲ᩠ᨲᩴ ᩈᩩᨡᩣᩅᩉᩴ.

᪓᪗. ᨴᩪᩁᨦ᩠ᨣᨾᩴ ᩑᨠᨧᩁᩴ [ᩑᨠᨧᩣᩁᩴ (ᨠ.)], ᩋᩈᩁᩦᩁᩴ ᨣᩩᩉᩣᩈᨿᩴ;

ᨿᩮ ᨧᩥᨲ᩠ᨲᩴ ᩈᩴᨿᨾᩮᩔᨶ᩠ᨲᩥ, ᨾᩮᩣᨠ᩠ᨡᨶ᩠ᨲᩥ ᨾᩣᩁᨻᨶ᩠ᨵᨶᩣ.

᪓᪘. ᩋᨶᩅᨭ᩠ᨮᩥᨲᨧᩥᨲ᩠ᨲᩔ, ᩈᨴ᩠ᨵᨾ᩠ᨾᩴ ᩋᩅᩥᨩᩣᨶᨲᩮᩣ;

ᨸᩁᩥᨸ᩠ᩃᩅᨸᩈᩣᨴᩔ, ᨸᨬ᩠ᨬᩣ ᨶ ᨸᩁᩥᨸᩪᩁᨲᩥ.

᪓᪙. ᩋᨶᩅᩔᩩᨲᨧᩥᨲ᩠ᨲᩔ, ᩋᨶᨶ᩠ᩅᩣᩉᨲᨧᩮᨲᩈᩮᩣ;

ᨸᩩᨬ᩠ᨬᨸᩣᨸᨸᩉᩦᨶᩔ, ᨶᨲ᩠ᨳᩥ ᨩᩣᨣᩁᨲᩮᩣ ᨽᨿᩴ.

᪔᪐. ᨠᩩᨾ᩠ᨽᩪᨸᨾᩴ ᨠᩣᨿᨾᩥᨾᩴ ᩅᩥᨴᩥᨲ᩠ᩅᩣ, ᨶᨣᩁᩪᨸᨾᩴ ᨧᩥᨲ᩠ᨲᨾᩥᨴᩴ ᨮᨸᩮᨲ᩠ᩅᩣ;

ᨿᩮᩣᨵᩮᨳ ᨾᩣᩁᩴ ᨸᨬ᩠ᨬᩣᩅᩩᨵᩮᨶ, ᨩᩥᨲᨬ᩠ᨧ ᩁᨠ᩠ᨡᩮ ᩋᨶᩥᩅᩮᩈᨶᩮᩣ ᩈᩥᨿᩣ.

᪔᪑. ᩋᨧᩥᩁᩴ ᩅᨲᨿᩴ ᨠᩣᨿᩮᩣ, ᨸᨳᩅᩥᩴ ᩋᨵᩥᩈᩮᩔᨲᩥ;

ᨨᩩᨴ᩠ᨵᩮᩣ ᩋᨸᩮᨲᩅᩥᨬ᩠ᨬᩣᨱᩮᩣ, ᨶᩥᩁᨲ᩠ᨳᩴᩅ ᨠᩃᩥᨦ᩠ᨣᩁᩴ.

᪔᪒. ᨴᩥᩈᩮᩣ ᨴᩥᩈᩴ ᨿᩴ ᨲᩴ ᨠᨿᩥᩁᩣ, ᩅᩮᩁᩦ ᩅᩣ ᨸᨶ ᩅᩮᩁᩥᨶᩴ;

ᨾᩥᨧ᩠ᨨᩣᨸᨱᩥᩉᩥᨲᩴ ᨧᩥᨲ᩠ᨲᩴ, ᨸᩣᨸᩥᨿᩮᩣ [ᨸᩣᨸᩥᨿᩴ (?)] ᨶᩴ ᨲᨲᩮᩣ ᨠᩁᩮ.

᪔᪓. ᨶ ᨲᩴ ᨾᩣᨲᩣ ᨸᩥᨲᩣ ᨠᨿᩥᩁᩣ, ᩋᨬ᩠ᨬᩮ ᩅᩣᨸᩥ ᨧ ᨬᩣᨲᨠᩣ;

ᩈᨾ᩠ᨾᩣᨸᨱᩥᩉᩥᨲᩴ ᨧᩥᨲ᩠ᨲᩴ, ᩈᩮᨿ᩠ᨿᩈᩮᩣ ᨶᩴ ᨲᨲᩮᩣ ᨠᩁᩮ.

ᨧᩥᨲ᩠ᨲᩅᨣ᩠ᨣᩮᩣ ᨲᨲᩥᨿᩮᩣ ᨶᩥᨭ᩠ᨮᩥᨲᩮᩣ.