᪑᪗. ᩈᩩᨸᩣᩁᩥᨧᩁᩥᨿᩅᨣ᩠ᨣᩮᩣ

᪑. ᩈᩩᨸᩣᩁᩥᨧᩁᩥᨿᨲ᩠ᨳᩮᩁᩋᨸᨴᩣᨶᩴ

᪑. ‘‘ᨸᨴᩩᨾᩮᩣ ᨶᩣᨾ ᨶᩣᨾᩮᨶ, ᨴ᩠ᩅᩥᨸᨴᩥᨶ᩠ᨴᩮᩣ ᨶᩁᩣᩈᨽᩮᩣ;

ᨸᩅᨶᩣ ᩋᨽᩥᨶᩥᨠ᩠ᨡᨾ᩠ᨾ, ᨵᨾ᩠ᨾᩴ ᨴᩮᩈᩮᨲᩥ ᨧᨠ᩠ᨡᩩᨾᩣ.

᪒. ‘‘ᨿᨠ᩠ᨡᩣᨶᩴ ᩈᨾᨿᩮᩣ ᩌᩈᩥ, ᩋᩅᩥᨴᩪᩁᩮ ᨾᩉᩮᩈᩥᨶᩮᩣ;

ᨿᩮᨶ ᨠᩥᨧ᩠ᨧᩮᨶ ᩈᨾ᩠ᨸᨲ᩠ᨲᩣ, ᩋᨩ᩠ᨫᩣᨸᩮᨠ᩠ᨡᩥᩴᩈᩩ ᨲᩣᩅᨴᩮ.

᪓. ‘‘ᨻᩩᨴ᩠ᨵᩔ ᨣᩥᩁᨾᨬ᩠ᨬᩣᨿ, ᩋᨾᨲᩔ ᨧ ᨴᩮᩈᨶᩴ;

ᨸᩈᨶ᩠ᨶᨧᩥᨲ᩠ᨲᩮᩣ ᩈᩩᨾᨶᩮᩣ, ᩋᨸ᩠ᨹᩮᩣᨭᩮᨲ᩠ᩅᩣ ᩏᨸᨭ᩠ᨮᩉᩥᩴ.

᪔. ‘‘ᩈᩩᨧᩥᨱ᩠ᨱᩔ ᨹᩃᩴ ᨸᩔ, ᩏᨸᨭ᩠ᨮᩣᨶᩔ ᩈᨲ᩠ᨳᩩᨶᩮᩣ;

ᨲᩥᩴᩈᨠᨸ᩠ᨸᩈᩉᩔᩮᩈᩩ, ᨴᩩᨣ᩠ᨣᨲᩥᩴ ᨶᩩᨸᨸᨩ᩠ᨩᩉᩴ.

᪕. ‘‘ᩐᨶᨲᩥᩴᩈᩮ ᨠᨸ᩠ᨸᩈᨲᩮ, ᩈᨾᩃᨦ᩠ᨠᨲᨶᩣᨾᨠᩮᩣ;

ᩈᨲ᩠ᨲᩁᨲᨶᩈᨾ᩠ᨸᨶ᩠ᨶᩮᩣ, ᨧᨠ᩠ᨠᩅᨲ᩠ᨲᩦ ᨾᩉᨻ᩠ᨻᩃᩮᩣ.

᪖. ‘‘ᨸᨭᩥᩈᨾ᩠ᨽᩥᨴᩣ ᨧᨲᩔᩮᩣ, ᩅᩥᨾᩮᩣᨠ᩠ᨡᩣᨸᩥ ᨧ ᩋᨭ᩠ᨮᩥᨾᩮ;

ᨨᩊᨽᩥᨬ᩠ᨬᩣ ᩈᨧ᩠ᨨᩥᨠᨲᩣ, ᨠᨲᩴ ᨻᩩᨴ᩠ᨵᩔ ᩈᩣᩈᨶᩴ’’.

ᩍᨲ᩠ᨳᩴ ᩈᩩᨴᩴ ᩌᨿᩈ᩠ᨾᩣ ᩈᩩᨸᩣᩁᩥᨧᩁᩥᨿᩮᩣ ᨳᩮᩁᩮᩣ ᩍᨾᩣ ᨣᩣᨳᩣᨿᩮᩣ ᩋᨽᩣᩈᩥᨲ᩠ᨳᩣᨲᩥ.

ᩈᩩᨸᩣᩁᩥᨧᩁᩥᨿᨲ᩠ᨳᩮᩁᩔᩣᨸᨴᩣᨶᩴ ᨸᨮᨾᩴ.

᪒. ᨠᨱᩅᩮᩁᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩴ

᪗. ‘‘ᩈᩥᨴ᩠ᨵᨲ᩠ᨳᩮᩣ ᨶᩣᨾ ᨽᨣᩅᩣ, ᩃᩮᩣᨠᨩᩮᨭ᩠ᨮᩮᩣ ᨶᩁᩣᩈᨽᩮᩣ;

ᨸᩩᩁᨠ᩠ᨡᨲᩮᩣ ᩈᩣᩅᨠᩮᩉᩥ, ᨶᨣᩁᩴ ᨸᨭᩥᨸᨩ᩠ᨩᨳ.

᪘. ‘‘ᩁᨬ᩠ᨬᩮᩣ ᩋᨶ᩠ᨲᩮᨸᩩᩁᩮ ᩌᩈᩥᩴ, ᨣᩮᩣᨸᨠᩮᩣ ᩋᨽᩥᩈᨾ᩠ᨾᨲᩮᩣ;

ᨸᩣᩈᩣᨴᩮ ᩏᨸᩅᩥᨭ᩠ᨮᩮᩣᩉᩴ, ᩋᨴ᩠ᨴᩈᩴ ᩃᩮᩣᨠᨶᩣᨿᨠᩴ.

᪙. ‘‘ᨠᨱᩅᩮᩁᩴ [ᨠᩁᩅᩦᩁᩴ (ᩈᨠ᩠ᨠᨲᩣᨶᩩᩃᩮᩣᨾᩴ), ᨠᨱᩅᩦᩁᩴ (ᨸᩣᨠᨲ)] ᨣᩉᩮᨲ᩠ᩅᩣᨶ, ᨽᩥᨠ᩠ᨡᩩᩈᨦ᩠ᨥᩮ ᩈᨾᩮᩣᨠᩥᩁᩥᩴ;

ᨻᩩᨴ᩠ᨵᩔ ᩅᩥᩈᩩᩴ ᨠᨲ᩠ᩅᩣᨶ, ᨲᨲᩮᩣ ᨽᩥᨿ᩠ᨿᩮᩣ ᩈᨾᩮᩣᨠᩥᩁᩥᩴ.

᪑᪐. ‘‘ᨧᨲᩩᨶ᩠ᨶᩅᩩᨲᩥᨲᩮᩣ ᨠᨸ᩠ᨸᩮ, ᨿᩴ ᨸᩩᨸ᩠ᨹᨾᨽᩥᨸᩪᨩᨿᩥᩴ [ᩁᩮᩣᨸᨿᩥᩴ (ᩈ᩠ᨿᩣ.)];

ᨴᩩᨣ᩠ᨣᨲᩥᩴ ᨶᩣᨽᩥᨩᩣᨶᩣᨾᩥ, ᨻᩩᨴ᩠ᨵᨸᩪᨩᩣᨿᩥᨴᩴ ᨹᩃᩴ.

᪑᪑. ‘‘ᩈᨲ᩠ᨲᩣᩈᩦᨲᩥᨾ᩠ᩉᩥᨲᩮᩣ ᨠᨸ᩠ᨸᩮ, ᨧᨲᩩᩁᩣᩈᩩᩴ ᨾᩉᩥᨴ᩠ᨵᩥᨠᩣ;

ᩈᨲ᩠ᨲᩁᨲᨶᩈᨾ᩠ᨸᨶ᩠ᨶᩣ, ᨧᨠ᩠ᨠᩅᨲ᩠ᨲᩦ ᨾᩉᨻ᩠ᨻᩃᩣ.

᪑᪒. ‘‘ᨸᨭᩥᩈᨾ᩠ᨽᩥᨴᩣ ᨧᨲᩔᩮᩣ…ᨸᩮ… ᨠᨲᩴ ᨻᩩᨴ᩠ᨵᩔ ᩈᩣᩈᨶᩴ’’.

ᩍᨲ᩠ᨳᩴ ᩈᩩᨴᩴ ᩌᨿᩈ᩠ᨾᩣ ᨠᨱᩅᩮᩁᨸᩩᨸ᩠ᨹᩥᨿᩮᩣ ᨳᩮᩁᩮᩣ ᩍᨾᩣ ᨣᩣᨳᩣᨿᩮᩣ ᩋᨽᩣᩈᩥᨲ᩠ᨳᩣᨲᩥ.

ᨠᨱᩅᩮᩁᨸᩩᨸ᩠ᨹᩥᨿᨲ᩠ᨳᩮᩁᩔᩣᨸᨴᩣᨶᩴ ᨴᩩᨲᩥᨿᩴ.

᪓. ᨡᨩ᩠ᨩᨠᨴᩣᨿᨠᨲ᩠ᨳᩮᩁᩋᨸᨴᩣᨶᩴ

᪑᪓. ‘‘ᨲᩥᩔᩔ ᨡᩮᩣ ᨽᨣᩅᨲᩮᩣ, ᨸᩩᨻ᩠ᨻᩮ ᨹᩃᨾᨴᩣᩈᩉᩴ;

ᨶᩣᩊᩥᨠᩮᩁᨬ᩠ᨧ ᨸᩣᨴᩣᩈᩥᩴ, ᨡᨩ᩠ᨩᨠᩴ ᩋᨽᩥᩈᨾ᩠ᨾᨲᩴ.

᪑᪔. ‘‘ᨻᩩᨴ᩠ᨵᩔ ᨲᨾᩉᩴ ᨴᨲ᩠ᩅᩣ, ᨲᩥᩔᩔ ᨲᩩ ᨾᩉᩮᩈᩥᨶᩮᩣ;

ᨾᩮᩣᨴᩣᨾᩉᩴ ᨠᩣᨾᨠᩣᨾᩦ, ᩏᨸᨸᨩ᩠ᨩᩥᩴ [ᨠᩣᨾᨠᩣᩁᩦ, ᩏᨸᨸᨩ᩠ᨩᩴ (ᩈᩦ.)] ᨿᨾᩥᨧ᩠ᨨᨠᩴ [ᩈᨻ᩠ᨻᨲ᩠ᨳᨸᩥ ᩑᩅᨾᩮᩅ ᨴᩥᩔᨲᩥ].

᪑᪕. ‘‘ᨴ᩠ᩅᩮᨶᩅᩩᨲᩮ ᩍᨲᩮᩣ ᨠᨸ᩠ᨸᩮ, ᨿᩴ ᨴᩣᨶᨾᨴᨴᩥᩴ ᨲᨴᩣ;

ᨴᩩᨣ᩠ᨣᨲᩥᩴ ᨶᩣᨽᩥᨩᩣᨶᩣᨾᩥ, ᨹᩃᨴᩣᨶᩔᩥᨴᩴ ᨹᩃᩴ.

᪑᪖. ‘‘ᩍᨲᩮᩣ ᨲᩮᩁᩈᨠᨸ᩠ᨸᨾ᩠ᩉᩥ, ᩁᩣᨩᩣ ᩍᨶ᩠ᨴᩈᨾᩮᩣ ᩋᩉᩩ;

ᩈᨲ᩠ᨲᩁᨲᨶᩈᨾ᩠ᨸᨶ᩠ᨶᩮᩣ, ᨧᨠ᩠ᨠᩅᨲ᩠ᨲᩦ ᨾᩉᨻ᩠ᨻᩃᩮᩣ.

᪑᪗. ‘‘ᨸᨭᩥᩈᨾ᩠ᨽᩥᨴᩣ ᨧᨲᩔᩮᩣ…ᨸᩮ… ᨠᨲᩴ ᨻᩩᨴ᩠ᨵᩔ ᩈᩣᩈᨶᩴ’’.

ᩍᨲ᩠ᨳᩴ ᩈᩩᨴᩴ ᩌᨿᩈ᩠ᨾᩣ ᨡᨩ᩠ᨩᨠᨴᩣᨿᨠᩮᩣ ᨳᩮᩁᩮᩣ ᩍᨾᩣ ᨣᩣᨳᩣᨿᩮᩣ ᩋᨽᩣᩈᩥᨲ᩠ᨳᩣᨲᩥ.

ᨡᨩ᩠ᨩᨠᨴᩣᨿᨠᨲ᩠ᨳᩮᩁᩔᩣᨸᨴᩣᨶᩴ ᨲᨲᩥᨿᩴ.

᪔. ᨴᩮᩈᨸᩪᨩᨠᨲ᩠ᨳᩮᩁᩋᨸᨴᩣᨶᩴ

᪑᪘. ‘‘ᩋᨲ᩠ᨳᨴᩔᩦ ᨲᩩ ᨽᨣᩅᩣ, ᩃᩮᩣᨠᨩᩮᨭ᩠ᨮᩮᩣ ᨶᩁᩣᩈᨽᩮᩣ;

ᩋᨻ᩠ᨽᩩᨣ᩠ᨣᨶ᩠ᨲ᩠ᩅᩣᨶ ᩅᩮᩉᩣᩈᩴ, ᨣᨧ᩠ᨨᨲᩮ ᩋᨶᩥᩃᨬ᩠ᨩᩈᩮ.

᪑᪙. ‘‘ᨿᨾ᩠ᩉᩥ ᨴᩮᩈᩮ ᨮᩥᨲᩮᩣ ᩈᨲ᩠ᨳᩣ, ᩋᨻ᩠ᨽᩩᨣ᩠ᨣᨧ᩠ᨨᩥ ᨾᩉᩣᨾᩩᨶᩥ;

ᨲᩣᩉᩴ ᨴᩮᩈᩴ ᩋᨸᩪᨩᩮᩈᩥᩴ, ᨸᩈᨶ᩠ᨶᩮᩣ ᩈᩮᩉᩥ ᨸᩣᨱᩥᨽᩥ.

᪒᪐. ‘‘ᩋᨭ᩠ᨮᩣᩁᩈᩮ ᨠᨸ᩠ᨸᩈᨲᩮ, ᩋᨴ᩠ᨴᩈᩴ ᨿᩴ ᨾᩉᩣᨾᩩᨶᩥᩴ;

ᨴᩩᨣ᩠ᨣᨲᩥᩴ ᨶᩣᨽᩥᨩᩣᨶᩣᨾᩥ, ᨴᩮᩈᨸᩪᨩᩣᨿᩥᨴᩴ ᨹᩃᩴ.

᪒᪑. ‘‘ᩑᨠᩣᨴᩈᩮ ᨠᨸ᩠ᨸᩈᨲᩮ, ᨣᩮᩣᩈᩩᨩᩣᨲᩈᨶᩣᨾᨠᩮᩣ;

ᩈᨲ᩠ᨲᩁᨲᨶᩈᨾ᩠ᨸᨶ᩠ᨶᩮᩣ, ᨧᨠ᩠ᨠᩅᨲ᩠ᨲᩦ ᨾᩉᨻ᩠ᨻᩃᩮᩣ.

᪒᪒. ‘‘ᨸᨭᩥᩈᨾ᩠ᨽᩥᨴᩣ ᨧᨲᩔᩮᩣ…ᨸᩮ… ᨠᨲᩴ ᨻᩩᨴ᩠ᨵᩔ ᩈᩣᩈᨶᩴ’’.

ᩍᨲ᩠ᨳᩴ ᩈᩩᨴᩴ ᩌᨿᩈ᩠ᨾᩣ ᨴᩮᩈᨸᩪᨩᨠᩮᩣ ᨳᩮᩁᩮᩣ ᩍᨾᩣ ᨣᩣᨳᩣᨿᩮᩣ ᩋᨽᩣᩈᩥᨲ᩠ᨳᩣᨲᩥ.

ᨴᩮᩈᨸᩪᨩᨠᨲ᩠ᨳᩮᩁᩔᩣᨸᨴᩣᨶᩴ ᨧᨲᩩᨲ᩠ᨳᩴ.

᪕. ᨠᨱᩥᨠᩣᩁᨨᨲ᩠ᨲᩥᨿᨲ᩠ᨳᩮᩁᩋᨸᨴᩣᨶᩴ

᪒᪓. ‘‘ᩅᩮᩔᨽᩪ ᨶᩣᨾ ᩈᨾ᩠ᨻᩩᨴ᩠ᨵᩮᩣ, ᩃᩮᩣᨠᨩᩮᨭ᩠ᨮᩮᩣ ᨶᩁᩣᩈᨽᩮᩣ;

ᨴᩥᩅᩣᩅᩥᩉᩣᩁᩣᨿ ᨾᩩᨶᩥ, ᩒᨣᩣᩉᨿᩥ ᨾᩉᩣᩅᨶᩴ.

᪒᪔. ‘‘ᨠᨱᩥᨠᩣᩁᩴ ᩒᨧᩥᨶᩥᨲ᩠ᩅᩣ, ᨨᨲ᩠ᨲᩴ ᨠᨲ᩠ᩅᩣᨶᩉᩴ ᨲᨴᩣ;

ᨸᩩᨸ᩠ᨹᨧ᩠ᨨᨴᨶᩴ ᨠᨲ᩠ᩅᩣᨶ, ᨻᩩᨴ᩠ᨵᩔ ᩋᨽᩥᩁᩮᩣᨸᨿᩥᩴ.

᪒᪕. ‘‘ᩑᨠᨲ᩠ᨲᩥᩴᩈᩮ ᩍᨲᩮᩣ ᨠᨸ᩠ᨸᩮ, ᨿᩴ ᨸᩩᨸ᩠ᨹᨾᨽᩥᩁᩮᩣᨸᨿᩥᩴ;

ᨴᩩᨣ᩠ᨣᨲᩥᩴ ᨶᩣᨽᩥᨩᩣᨶᩣᨾᩥ, ᨻᩩᨴ᩠ᨵᨸᩪᨩᩣᨿᩥᨴᩴ ᨹᩃᩴ.

᪒᪖. ‘‘ᩍᨲᩮᩣ ᩅᩦᩈᨲᩥᨠᨸ᩠ᨸᨾ᩠ᩉᩥ, ᩈᩮᩣᨱ᩠ᨱᩣᨽᩣ ᩋᨭ᩠ᨮ ᨡᨲ᩠ᨲᩥᨿᩣ;

ᩈᨲ᩠ᨲᩁᨲᨶᩈᨾ᩠ᨸᨶ᩠ᨶᩣ, ᨧᨠ᩠ᨠᩅᨲ᩠ᨲᩦ ᨾᩉᨻ᩠ᨻᩃᩣ.

᪒᪗. ‘‘ᨸᨭᩥᩈᨾ᩠ᨽᩥᨴᩣ ᨧᨲᩔᩮᩣ…ᨸᩮ… ᨠᨲᩴ ᨻᩩᨴ᩠ᨵᩔ ᩈᩣᩈᨶᩴ’’.

ᩍᨲ᩠ᨳᩴ ᩈᩩᨴᩴ ᩌᨿᩈ᩠ᨾᩣ ᨠᨱᩥᨠᩣᩁᨨᨲ᩠ᨲᩥᨿᩮᩣ ᨳᩮᩁᩮᩣ ᩍᨾᩣ ᨣᩣᨳᩣᨿᩮᩣ ᩋᨽᩣᩈᩥᨲ᩠ᨳᩣᨲᩥ.

ᨠᨱᩥᨠᩣᩁᨨᨲ᩠ᨲᩥᨿᨲ᩠ᨳᩮᩁᩔᩣᨸᨴᩣᨶᩴ ᨸᨬ᩠ᨧᨾᩴ.

᪖. ᩈᨸ᩠ᨸᩥᨴᩣᨿᨠᨲ᩠ᨳᩮᩁᩋᨸᨴᩣᨶᩴ

᪒᪘. ‘‘ᨹᩩᩔᩮᩣ ᨶᩣᨾᩣᩈᩥ [ᨶᩣᨾᩣᨳ (ᩈᩦ.)] ᨽᨣᩅᩣ, ᩌᩉᩩᨲᩦᨶᩴ ᨸᨭᩥᨣ᩠ᨣᩉᩮᩣ;

ᨣᨧ᩠ᨨᨲᩮ ᩅᩦᨳᩥᨿᩴ ᩅᩦᩁᩮᩣ, ᨶᩥᨻ᩠ᨻᩣᨸᩮᨶ᩠ᨲᩮᩣ ᨾᩉᩣᨩᨶᩴ.

᪒᪙. ‘‘ᩋᨶᩩᨸᩩᨻ᩠ᨻᩮᨶ ᨽᨣᩅᩣ, ᩌᨣᨧ᩠ᨨᩥ ᨾᨾ ᩈᨶ᩠ᨲᩥᨠᩴ;

ᨲᨲᩮᩣ ᨲᩴ [ᨲᨲᩮᩣᩉᩴ (ᩈᩦ. ᩈ᩠ᨿᩣ.)] ᨸᨲ᩠ᨲᩴ ᨸᨣ᩠ᨣᨿ᩠ᩉ, ᩈᨸ᩠ᨸᩥᨲᩮᩃᨾᨴᩣᩈᩉᩴ.

᪓᪐. ‘‘ᨴ᩠ᩅᩮᨶᩅᩩᨲᩮ ᩍᨲᩮᩣ ᨠᨸ᩠ᨸᩮ, ᨿᩴ ᩈᨸ᩠ᨸᩥᨾᨴᨴᩥᩴ ᨲᨴᩣ;

ᨴᩩᨣ᩠ᨣᨲᩥᩴ ᨶᩣᨽᩥᨩᩣᨶᩣᨾᩥ, ᩈᨸ᩠ᨸᩥᨴᩣᨶᩔᩥᨴᩴ ᨹᩃᩴ.

᪓᪑. ‘‘ᨨᨸ᩠ᨸᨬ᩠ᨬᩣᩈᩮ ᩍᨲᩮᩣ ᨠᨸ᩠ᨸᩮ, ᩑᨠᩮᩣ ᩌᩈᩥ ᩈᨾᩮᩣᨴᨠᩮᩣ;

ᩈᨲ᩠ᨲᩁᨲᨶᩈᨾ᩠ᨸᨶ᩠ᨶᩮᩣ, ᨧᨠ᩠ᨠᩅᨲ᩠ᨲᩦ ᨾᩉᨻ᩠ᨻᩃᩮᩣ.

᪓᪒. ‘‘ᨸᨭᩥᩈᨾ᩠ᨽᩥᨴᩣ ᨧᨲᩔᩮᩣ…ᨸᩮ… ᨠᨲᩴ ᨻᩩᨴ᩠ᨵᩔ ᩈᩣᩈᨶᩴ’’.

ᩍᨲ᩠ᨳᩴ ᩈᩩᨴᩴ ᩌᨿᩈ᩠ᨾᩣ ᩈᨸ᩠ᨸᩥᨴᩣᨿᨠᩮᩣ ᨳᩮᩁᩮᩣ ᩍᨾᩣ ᨣᩣᨳᩣᨿᩮᩣ ᩋᨽᩣᩈᩥᨲ᩠ᨳᩣᨲᩥ.

ᩈᨸ᩠ᨸᩥᨴᩣᨿᨠᨲ᩠ᨳᩮᩁᩔᩣᨸᨴᩣᨶᩴ ᨨᨭ᩠ᨮᩴ.

᪗. ᨿᩪᨳᩥᨠᨸᩩᨸ᩠ᨹᩥᨿᨲ᩠ᨳᩮᩁᩋᨸᨴᩣᨶᩴ

᪓᪓. ‘‘ᨧᨶ᩠ᨴᨽᩣᨣᩣᨶᨴᩦᨲᩦᩁᩮ, ᩋᨶᩩᩈᩮᩣᨲᩴ ᩅᨩᩣᨾᩉᩴ;

ᩈᨿᨾ᩠ᨽᩩᩴ ᩋᨴ᩠ᨴᩈᩴ ᨲᨲ᩠ᨳ, ᩈᩣᩃᩁᩣᨩᩴᩅ ᨹᩩᩃ᩠ᩃᩥᨲᩴ.

᪓᪔. ‘‘ᨸᩩᨸ᩠ᨹᩴ ᨿᩪᨳᩥᨠᨾᩣᨴᩣᨿ, ᩏᨸᨣᨧ᩠ᨨᩥᩴ ᨾᩉᩣᨾᩩᨶᩥᩴ;

ᨸᩈᨶ᩠ᨶᨧᩥᨲ᩠ᨲᩮᩣ ᩈᩩᨾᨶᩮᩣ, ᨻᩩᨴ᩠ᨵᩔ ᩋᨽᩥᩁᩮᩣᨸᨿᩥᩴ.

᪓᪕. ‘‘ᨧᨲᩩᨶ᩠ᨶᩅᩩᨲᩥᨲᩮᩣ ᨠᨸ᩠ᨸᩮ, ᨿᩴ ᨸᩩᨸ᩠ᨹᨾᨽᩥᩁᩮᩣᨸᨿᩥᩴ;

ᨴᩩᨣ᩠ᨣᨲᩥᩴ ᨶᩣᨽᩥᨩᩣᨶᩣᨾᩥ, ᨻᩩᨴ᩠ᨵᨸᩪᨩᩣᨿᩥᨴᩴ ᨹᩃᩴ.

᪓᪖. ‘‘ᩈᨲ᩠ᨲᩈᨭ᩠ᨮᩥᨾ᩠ᩉᩥᨲᩮᩣ ᨠᨸ᩠ᨸᩮ, ᩑᨠᩮᩣ ᩈᩣᨾᩩᨴ᩠ᨵᩁᩮᩣ ᩋᩉᩩ;

ᩈᨲ᩠ᨲᩁᨲᨶᩈᨾ᩠ᨸᨶ᩠ᨶᩮᩣ, ᨧᨠ᩠ᨠᩅᨲ᩠ᨲᩦ ᨾᩉᨻ᩠ᨻᩃᩮᩣ.

᪓᪗. ‘‘ᨸᨭᩥᩈᨾ᩠ᨽᩥᨴᩣ ᨧᨲᩔᩮᩣ…ᨸᩮ… ᨠᨲᩴ ᨻᩩᨴ᩠ᨵᩔ ᩈᩣᩈᨶᩴ’’.

ᩍᨲ᩠ᨳᩴ ᩈᩩᨴᩴ ᩌᨿᩈ᩠ᨾᩣ ᨿᩪᨳᩥᨠᨸᩩᨸ᩠ᨹᩥᨿᩮᩣ ᨳᩮᩁᩮᩣ ᩍᨾᩣ ᨣᩣᨳᩣᨿᩮᩣ ᩋᨽᩣᩈᩥᨲ᩠ᨳᩣᨲᩥ.

ᨿᩪᨳᩥᨠᨸᩩᨸ᩠ᨹᩥᨿᨲ᩠ᨳᩮᩁᩔᩣᨸᨴᩣᨶᩴ ᩈᨲ᩠ᨲᨾᩴ.

᪘. ᨴᩩᩔᨴᩣᨿᨠᨲ᩠ᨳᩮᩁᩋᨸᨴᩣᨶᩴ

᪓᪘. ‘‘ᨲᩥᩅᩁᩣᨿᩴ ᨸᩩᩁᩮ ᩁᨾ᩠ᨾᩮ, ᩁᩣᨩᨸᩩᨲ᩠ᨲᩮᩣᩈᩉᩴ [ᩁᩣᨩᨸᩩᨲ᩠ᨲᩮᩣ ᩋᩉᩴ (ᩈᩦ. ᩈ᩠ᨿᩣ.)] ᨲᨴᩣ;

ᨸᨱ᩠ᨱᩣᨠᩣᩁᩴ ᩃᨽᩥᨲ᩠ᩅᩣᨶ, ᩏᨸᩈᨶ᩠ᨲᩔᨴᩣᩈᩉᩴ.

᪓᪙. ‘‘ᩋᨵᩥᩅᩣᩈᩮᩈᩥ ᨽᨣᩅᩣ, ᩅᨲ᩠ᨳᩴ [ᨶᩅᩴ (ᨠ.)] ᩉᨲ᩠ᨳᩮᨶ ᩌᨾᩈᩥ;

ᩈᩥᨴ᩠ᨵᨲ᩠ᨳᩮᩣ ᩋᨵᩥᩅᩣᩈᩮᨲ᩠ᩅᩣ, ᩅᩮᩉᩣᩈᩴ ᨶᨽᨾᩩᨣ᩠ᨣᨾᩥ.

᪔᪐. ‘‘ᨻᩩᨴ᩠ᨵᩔ ᨣᨧ᩠ᨨᨾᩣᨶᩔ, ᨴᩩᩔᩣ ᨵᩣᩅᨶ᩠ᨲᩥ ᨸᨧ᩠ᨨᨲᩮᩣ;

ᨲᨲ᩠ᨳ ᨧᩥᨲ᩠ᨲᩴ ᨸᩈᩣᨴᩮᩈᩥᩴ, ᨻᩩᨴ᩠ᨵᩮᩣ ᨶᩮᩣ ᩋᨣ᩠ᨣᨸᩩᨣ᩠ᨣᩃᩮᩣ.

᪔᪑. ‘‘ᨧᨲᩩᨶ᩠ᨶᩅᩩᨲᩥᨲᩮᩣ ᨠᨸ᩠ᨸᩮ, ᨿᩴ ᨴᩩᩔᨾᨴᨴᩥᩴ ᨲᨴᩣ;

ᨴᩩᨣ᩠ᨣᨲᩥᩴ ᨶᩣᨽᩥᨩᩣᨶᩣᨾᩥ, ᨴᩩᩔᨴᩣᨶᩔᩥᨴᩴ ᨹᩃᩴ.

᪔᪒. ‘‘ᩈᨲ᩠ᨲᩈᨭ᩠ᨮᩥᨾ᩠ᩉᩥᨲᩮᩣ ᨠᨸ᩠ᨸᩮ, ᨧᨠ᩠ᨠᩅᨲ᩠ᨲᩦ ᨲᨴᩣ ᩋᩉᩩ;

ᨸᩁᩥᩈᩩᨴ᩠ᨵᩮᩣᨲᩥ ᨶᩣᨾᩮᨶ, ᨾᨶᩩᨩᩥᨶ᩠ᨴᩮᩣ ᨾᩉᨻ᩠ᨻᩃᩮᩣ.

᪔᪓. ‘‘ᨸᨭᩥᩈᨾ᩠ᨽᩥᨴᩣ ᨧᨲᩔᩮᩣ…ᨸᩮ… ᨠᨲᩴ ᨻᩩᨴ᩠ᨵᩔ ᩈᩣᩈᨶᩴ’’.

ᩍᨲ᩠ᨳᩴ ᩈᩩᨴᩴ ᩌᨿᩈ᩠ᨾᩣ ᨴᩩᩔᨴᩣᨿᨠᩮᩣ ᨳᩮᩁᩮᩣ ᩍᨾᩣ ᨣᩣᨳᩣᨿᩮᩣ ᩋᨽᩣᩈᩥᨲ᩠ᨳᩣᨲᩥ.

ᨴᩩᩔᨴᩣᨿᨠᨲ᩠ᨳᩮᩁᩔᩣᨸᨴᩣᨶᩴ ᩋᨭ᩠ᨮᨾᩴ.

᪙. ᩈᨾᩣᨴᨸᨠᨲ᩠ᨳᩮᩁᩋᨸᨴᩣᨶᩴ

᪔᪔. ‘‘ᨶᨣᩁᩮ ᨻᨶ᩠ᨵᩩᨾᨲᩥᨿᩣ, ᨾᩉᩣᨸᩪᨣᨣᨱᩮᩣ ᩋᩉᩩ;

ᨲᩮᩈᩣᩉᩴ ᨸᩅᩁᩮᩣ ᩌᩈᩥᩴ, ᨾᨾ ᨻᨴ᩠ᨵᨧᩁᩣ [ᨸᨭ᩠ᨮᨧᩁᩣ (ᩈ᩠ᨿᩣ.)] ᨧ ᨲᩮ.

᪔᪕. ‘‘ᩈᨻ᩠ᨻᩮ ᨲᩮ ᩈᨶ᩠ᨶᩥᨸᩣᨲᩮᨲ᩠ᩅᩣ, ᨸᩩᨬ᩠ᨬᨠᨾ᩠ᨾᩮ ᩈᨾᩣᨴᨿᩥᩴ;

ᨾᩣᩊᩴ ᨠᩔᩣᨾ ᩈᨦ᩠ᨥᩔ, ᨸᩩᨬ᩠ᨬᨠ᩠ᨡᩮᨲ᩠ᨲᩴ ᩋᨶᩩᨲ᩠ᨲᩁᩴ.

᪔᪖. ‘‘ᩈᩣᨵᩪᨲᩥ ᨲᩮ ᨸᨭᩥᩔᩩᨲ᩠ᩅᩣ, ᨾᨾ ᨨᨶ᩠ᨴᩅᩈᩣᨶᩩᨣᩣ;

ᨶᩥᨭ᩠ᨮᩣᨸᩮᨲ᩠ᩅᩣ ᨧ ᨲᩴ ᨾᩣᩊᩴ, ᩅᩥᨸᩔᩥᩔ ᩋᨴᨾ᩠ᩉᩈᩮ.

᪔᪗. ‘‘ᩑᨠᨶᩅᩩᨲᩥᨲᩮᩣ ᨠᨸ᩠ᨸᩮ, ᨿᩴ ᨾᩣᩊᨾᨴᨴᩥᩴ ᨲᨴᩣ;

ᨴᩩᨣ᩠ᨣᨲᩥᩴ ᨶᩣᨽᩥᨩᩣᨶᩣᨾᩥ, ᨾᩣᩊᨴᩣᨶᩔᩥᨴᩴ ᨹᩃᩴ.

᪔᪘. ‘‘ᩑᨠᩪᨶᩈᨲ᩠ᨲᨲᩥᨠᨸ᩠ᨸᩮ [ᩑᨠᩪᨶᩈᨭ᩠ᨮᩥᨠᨸ᩠ᨸᨾ᩠ᩉᩥ (ᩈᩦ. ᩈ᩠ᨿᩣ.)],

ᩑᨠᩮᩣ ᩌᩈᩥ ᨩᨶᩣᨵᩥᨸᩮᩣ.

ᩌᨴᩮᨿ᩠ᨿᩮᩣ ᨶᩣᨾ ᨶᩣᨾᩮᨶ, ᨧᨠ᩠ᨠᩅᨲ᩠ᨲᩦ ᨾᩉᨻ᩠ᨻᩃᩮᩣ.

᪔᪙. ‘‘ᨸᨭᩥᩈᨾ᩠ᨽᩥᨴᩣ ᨧᨲᩔᩮᩣ…ᨸᩮ… ᨠᨲᩴ ᨻᩩᨴ᩠ᨵᩔ ᩈᩣᩈᨶᩴ’’.

ᩍᨲ᩠ᨳᩴ ᩈᩩᨴᩴ ᩌᨿᩈ᩠ᨾᩣ ᩈᨾᩣᨴᨸᨠᩮᩣ ᨳᩮᩁᩮᩣ ᩍᨾᩣ ᨣᩣᨳᩣᨿᩮᩣ ᩋᨽᩣᩈᩥᨲ᩠ᨳᩣᨲᩥ.

ᩈᨾᩣᨴᨸᨠᨲ᩠ᨳᩮᩁᩔᩣᨸᨴᩣᨶᩴ ᨶᩅᨾᩴ.

᪑᪐. ᨸᨬ᩠ᨧᨦ᩠ᨣᩩᩃᩥᨿᨲ᩠ᨳᩮᩁᩋᨸᨴᩣᨶᩴ

᪕᪐. ‘‘ᨲᩥᩔᩮᩣ ᨶᩣᨾᩣᩈᩥ ᨽᨣᩅᩣ, ᩃᩮᩣᨠᨩᩮᨭ᩠ᨮᩮᩣ ᨶᩁᩣᩈᨽᩮᩣ;

ᨸᩅᩥᩈᨲᩥ ᨣᨶ᩠ᨵᨠᩩᨭᩥᩴ, ᩅᩥᩉᩣᩁᨠᩩᩈᩃᩮᩣ ᨾᩩᨶᩥ.

᪕᪑. ‘‘ᩈᩩᨣᨶ᩠ᨵᨾᩣᩃᨾᩣᨴᩣᨿ, ᩋᨣᨾᩣᩈᩥᩴ ᨩᩥᨶᨶ᩠ᨲᩥᨠᩴ;

ᩋᨸᩈᨴ᩠ᨴᩮᩣ ᨧ ᩈᨾ᩠ᨻᩩᨴ᩠ᨵᩮ, ᨸᨬ᩠ᨧᨦ᩠ᨣᩩᩃᩥᨾᨴᩣᩈᩉᩴ.

᪕᪒. ‘‘ᨴ᩠ᩅᩮᨶᩅᩩᨲᩮ ᩍᨲᩮᩣ ᨠᨸ᩠ᨸᩮ, ᨿᩴ ᨣᨶ᩠ᨵᨾᨽᩥᩁᩮᩣᨸᨿᩥᩴ;

ᨴᩩᨣ᩠ᨣᨲᩥᩴ ᨶᩣᨽᩥᨩᩣᨶᩣᨾᩥ, ᨸᨬ᩠ᨧᨦ᩠ᨣᩩᩃᩥᩔᩥᨴᩴ [ᨸᨬ᩠ᨧᨦ᩠ᨣᩩᩃᩥᨿᩥᨴᩴ (ᩈᩦ.)] ᨹᩃᩴ.

᪕᪓. ‘‘ᨴ᩠ᩅᩮᩈᨲ᩠ᨲᨲᩥᨾ᩠ᩉᩥᨲᩮᩣ ᨠᨸ᩠ᨸᩮ, ᩁᩣᨩᩣ ᩌᩈᩥᩴ ᩈᨿᨾ᩠ᨸᨽᩮᩣ;

ᩈᨲ᩠ᨲᩁᨲᨶᩈᨾ᩠ᨸᨶ᩠ᨶᩮᩣ, ᨧᨠ᩠ᨠᩅᨲ᩠ᨲᩦ ᨾᩉᨻ᩠ᨻᩃᩮᩣ.

᪕᪔. ‘‘ᨸᨭᩥᩈᨾ᩠ᨽᩥᨴᩣ ᨧᨲᩔᩮᩣ…ᨸᩮ… ᨠᨲᩴ ᨻᩩᨴ᩠ᨵᩔ ᩈᩣᩈᨶᩴ’’.

ᩍᨲ᩠ᨳᩴ ᩈᩩᨴᩴ ᩌᨿᩈ᩠ᨾᩣ ᨸᨬ᩠ᨧᨦ᩠ᨣᩩᩃᩥᨿᩮᩣ ᨳᩮᩁᩮᩣ ᩍᨾᩣ ᨣᩣᨳᩣᨿᩮᩣ ᩋᨽᩣᩈᩥᨲ᩠ᨳᩣᨲᩥ;

ᨸᨬ᩠ᨧᨦ᩠ᨣᩩᩃᩥᨿᨲ᩠ᨳᩮᩁᩔᩣᨸᨴᩣᨶᩴ ᨴᩈᨾᩴ.

ᩈᩩᨸᩣᩁᩥᨧᩁᩥᨿᩅᨣ᩠ᨣᩮᩣ ᩈᨲ᩠ᨲᩁᩈᨾᩮᩣ.