(᪔) ᩏᨸ᩠ᨸᩣᨴᩅᩣᩁᩮᩣ

᪑᪐᪘. (ᨠ) ᨿᩔ ᨿᩴ ᨧᩥᨲ᩠ᨲᩴ ᩏᨸ᩠ᨸᨩ᩠ᨩᨲᩥ ᨲᩔ ᨲᩴ ᨧᩥᨲ᩠ᨲᩴ ᩏᨸ᩠ᨸᨩ᩠ᨩᩥᨲ᩠ᨳᩣᨲᩥ? ᨶᩮᩣ.

(ᨡ) ᨿᩔ ᩅᩣ ᨸᨶ ᨿᩴ ᨧᩥᨲ᩠ᨲᩴ ᩏᨸ᩠ᨸᨩ᩠ᨩᩥᨲ᩠ᨳ ᨲᩔ ᨲᩴ ᨧᩥᨲ᩠ᨲᩴ ᩏᨸ᩠ᨸᨩ᩠ᨩᨲᩦᨲᩥ? ᨶᩮᩣ.

(ᨠ) ᨿᩔ ᨿᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᨲᩥ ᨲᩔ ᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᨲ᩠ᨳᩣᨲᩥ?

ᩋᨲᩦᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᨲᩥ, ᨶᩮᩣ ᨧ ᨲᩔ ᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᨲ᩠ᨳ. ᨽᨦ᩠ᨣᨠ᩠ᨡᨱᩮ ᩋᨶᩣᨣᨲᨬ᩠ᨧ ᨧᩥᨲ᩠ᨲᩴ ᨶ ᨧᩮᩅ ᩏᨸ᩠ᨸᨩ᩠ᨩᨲᩥ ᨶ ᨧ ᩏᨸ᩠ᨸᨩ᩠ᨩᩥᨲ᩠ᨳ.

(ᨡ) ᨿᩔ ᩅᩣ ᨸᨶ ᨿᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᨲ᩠ᨳ ᨲᩔ ᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᨲᩦᨲᩥ?

ᩏᨸ᩠ᨸᩣᨴᨠ᩠ᨡᨱᩮ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᨲ᩠ᨳ, ᨶᩮᩣ ᨧ ᨲᩔ ᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᨲᩥ. ᨽᨦ᩠ᨣᨠ᩠ᨡᨱᩮ ᩋᨶᩣᨣᨲᨬ᩠ᨧ ᨧᩥᨲ᩠ᨲᩴ ᨶ ᨧᩮᩅ ᩏᨸ᩠ᨸᨩ᩠ᨩᩥᨲ᩠ᨳ ᨶ ᨧ ᩏᨸ᩠ᨸᨩ᩠ᨩᨲᩥ.

᪑᪐᪙. (ᨠ) ᨿᩔ ᨿᩴ ᨧᩥᨲ᩠ᨲᩴ ᩏᨸ᩠ᨸᨩ᩠ᨩᨲᩥ ᨲᩔ ᨲᩴ ᨧᩥᨲ᩠ᨲᩴ ᩏᨸ᩠ᨸᨩ᩠ᨩᩥᩔᨲᩦᨲᩥ? ᨶᩮᩣ.

(ᨡ) ᨿᩔ ᩅᩣ ᨸᨶ ᨿᩴ ᨧᩥᨲ᩠ᨲᩴ ᩏᨸ᩠ᨸᨩ᩠ᨩᩥᩔᨲᩥ ᨲᩔ ᨲᩴ ᨧᩥᨲ᩠ᨲᩴ ᩏᨸ᩠ᨸᨩ᩠ᨩᨲᩦᨲᩥ? ᨶᩮᩣ.

(ᨠ) ᨿᩔ ᨿᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᨲᩥ ᨲᩔ ᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᩔᨲᩦᨲᩥ?

ᩋᨶᩣᨣᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᨲᩥ, ᨶᩮᩣ ᨧ ᨲᩔ ᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᩔᨲᩥ. ᨽᨦ᩠ᨣᨠ᩠ᨡᨱᩮ ᩋᨲᩦᨲᨬ᩠ᨧ ᨧᩥᨲ᩠ᨲᩴ ᨶ ᨧᩮᩅ ᩏᨸ᩠ᨸᨩ᩠ᨩᨲᩥ ᨶ ᨧ ᩏᨸ᩠ᨸᨩ᩠ᨩᩥᩔᨲᩥ.

(ᨡ) ᨿᩔ ᩅᩣ ᨸᨶ ᨿᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᩔᨲᩥ ᨲᩔ ᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᨲᩦᨲᩥ?

ᩏᨸ᩠ᨸᩣᨴᨠ᩠ᨡᨱᩮ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᩔᨲᩥ, ᨶᩮᩣ ᨧ ᨲᩔ ᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᨲᩥ. ᨽᨦ᩠ᨣᨠ᩠ᨡᨱᩮ ᩋᨲᩦᨲᨬ᩠ᨧ ᨧᩥᨲ᩠ᨲᩴ ᨶ ᨧᩮᩅ ᩏᨸ᩠ᨸᨩ᩠ᨩᩥᩔᨲᩥ ᨶ ᨧ ᩏᨸ᩠ᨸᨩ᩠ᨩᨲᩥ.

᪑᪑᪐. (ᨠ) ᨿᩔ ᨿᩴ ᨧᩥᨲ᩠ᨲᩴ ᩏᨸ᩠ᨸᨩ᩠ᨩᩥᨲ᩠ᨳ ᨲᩔ ᨲᩴ ᨧᩥᨲ᩠ᨲᩴ ᩏᨸ᩠ᨸᨩ᩠ᨩᩥᩔᨲᩦᨲᩥ? ᨶᩮᩣ.

(ᨡ) ᨿᩔ ᩅᩣ ᨸᨶ ᨿᩴ ᨧᩥᨲ᩠ᨲᩴ ᩏᨸ᩠ᨸᨩ᩠ᨩᩥᩔᨲᩥ ᨲᩔ ᨲᩴ ᨧᩥᨲ᩠ᨲᩴ ᩏᨸ᩠ᨸᨩ᩠ᨩᩥᨲ᩠ᨳᩣᨲᩥ? ᨶᩮᩣ.

(ᨠ) ᨿᩔ ᨿᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᨲ᩠ᨳ ᨲᩔ ᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᩔᨲᩦᨲᩥ?

ᩋᨶᩣᨣᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᨲ᩠ᨳ, ᨶᩮᩣ ᨧ ᨲᩔ ᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᩔᨲᩥ. ᨸᨧ᩠ᨧᩩᨸ᩠ᨸᨶ᩠ᨶᩴ ᨧᩥᨲ᩠ᨲᩴ ᨶ ᨧᩮᩅ ᩏᨸ᩠ᨸᨩ᩠ᨩᩥᨲ᩠ᨳ ᨶ ᨧ ᩏᨸ᩠ᨸᨩ᩠ᨩᩥᩔᨲᩥ.

(ᨡ) ᨿᩔ ᩅᩣ ᨸᨶ ᨿᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᩔᨲᩥ ᨲᩔ ᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᨲ᩠ᨳᩣᨲᩥ?

ᩋᨲᩦᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᩔᨲᩥ, ᨶᩮᩣ ᨧ ᨲᩔ ᨲᩴ ᨧᩥᨲ᩠ᨲᩴ ᨶ ᩏᨸ᩠ᨸᨩ᩠ᨩᩥᨲ᩠ᨳ. ᨸᨧ᩠ᨧᩩᨸ᩠ᨸᨶ᩠ᨶᩴ ᨧᩥᨲ᩠ᨲᩴ ᨶ ᨧᩮᩅ ᩏᨸ᩠ᨸᨩ᩠ᨩᩥᩔᨲᩥ ᨶ ᨧ ᩏᨸ᩠ᨸᨩ᩠ᨩᩥᨲ᩠ᨳ.