᪕. ᨸᨬ᩠ᨧᨾᩅᨣ᩠ᨣᩮᩣ

(᪕᪐) ᪘. ᩋᨶᩣᨣᨲᨬᩣᨱᨠᨳᩣ

᪔᪓᪙. ᩋᨶᩣᨣᨲᩮ ᨬᩣᨱᩴ ᩋᨲ᩠ᨳᩦᨲᩥ? ᩌᨾᨶ᩠ᨲᩣ. ᩋᨶᩣᨣᨲᩴ ᨾᩪᩃᨲᩮᩣ ᨩᩣᨶᩣᨲᩥ, ᩉᩮᨲᩩᨲᩮᩣ ᨩᩣᨶᩣᨲᩥ, ᨶᩥᨴᩣᨶᨲᩮᩣ ᨩᩣᨶᩣᨲᩥ, ᩈᨾ᩠ᨽᩅᨲᩮᩣ ᨩᩣᨶᩣᨲᩥ, ᨸᨽᩅᨲᩮᩣ ᨩᩣᨶᩣᨲᩥ, ᩈᨾᩩᨭ᩠ᨮᩣᨶᨲᩮᩣ ᨩᩣᨶᩣᨲᩥ, ᩌᩉᩣᩁᨲᩮᩣ ᨩᩣᨶᩣᨲᩥ, ᩌᩁᨾ᩠ᨾᨱᨲᩮᩣ ᨩᩣᨶᩣᨲᩥ, ᨸᨧ᩠ᨧᨿᨲᩮᩣ ᨩᩣᨶᩣᨲᩥ, ᩈᨾᩩᨴᨿᨲᩮᩣ ᨩᩣᨶᩣᨲᩦᨲᩥ? ᨶ ᩉᩮᩅᩴ ᩅᨲ᩠ᨲᨻ᩠ᨻᩮ…ᨸᩮ….

ᩋᨶᩣᨣᨲᩮ ᨬᩣᨱᩴ ᩋᨲ᩠ᨳᩦᨲᩥ? ᩌᨾᨶ᩠ᨲᩣ. ᩋᨶᩣᨣᨲᩴ ᩉᩮᨲᩩᨸᨧ᩠ᨧᨿᨲᩴ ᨩᩣᨶᩣᨲᩥ, ᩌᩁᨾ᩠ᨾᨱᨸᨧ᩠ᨧᨿᨲᩴ ᨩᩣᨶᩣᨲᩥ, ᩋᨵᩥᨸᨲᩥᨸᨧ᩠ᨧᨿᨲᩴ ᨩᩣᨶᩣᨲᩥ, ᩋᨶᨶ᩠ᨲᩁᨸᨧ᩠ᨧᨿᨲᩴ ᨩᩣᨶᩣᨲᩥ, ᩈᨾᨶᨶ᩠ᨲᩁᨸᨧ᩠ᨧᨿᨲᩴ ᨩᩣᨶᩣᨲᩦᨲᩥ? ᨶ ᩉᩮᩅᩴ ᩅᨲ᩠ᨲᨻ᩠ᨻᩮ…ᨸᩮ….

ᩋᨶᩣᨣᨲᩮ ᨬᩣᨱᩴ ᩋᨲ᩠ᨳᩦᨲᩥ? ᩌᨾᨶ᩠ᨲᩣ. ᨣᩮᩣᨲᩕᨽᩩᨶᩮᩣ ᨸᩩᨣ᩠ᨣᩃᩔ ᩈᩮᩣᨲᩣᨸᨲ᩠ᨲᩥᨾᨣ᩠ᨣᩮ ᨬᩣᨱᩴ ᩋᨲ᩠ᨳᩦᨲᩥ? ᨶ ᩉᩮᩅᩴ ᩅᨲ᩠ᨲᨻ᩠ᨻᩮ…ᨸᩮ…. ᩈᩮᩣᨲᩣᨸᨲ᩠ᨲᩥᨹᩃᩈᨧ᩠ᨨᩥᨠᩥᩁᩥᨿᩣᨿ ᨸᨭᩥᨸᨶ᩠ᨶᩔ ᨸᩩᨣ᩠ᨣᩃᩔ ᩈᩮᩣᨲᩣᨸᨲ᩠ᨲᩥᨹᩃᩮ ᨬᩣᨱᩴ ᩋᨲ᩠ᨳᩦᨲᩥ? ᨶ ᩉᩮᩅᩴ ᩅᨲ᩠ᨲᨻ᩠ᨻᩮ…ᨸᩮ….

ᩈᨠᨴᩣᨣᩣᨾᩥ…ᨸᩮ… ᩋᨶᩣᨣᩣᨾᩥ …ᨸᩮ… ᩋᩁᩉᨲ᩠ᨲᩈᨧ᩠ᨨᩥᨠᩥᩁᩥᨿᩣᨿ ᨸᨭᩥᨸᨶ᩠ᨶᩔ ᨸᩩᨣ᩠ᨣᩃᩔ ᩋᩁᩉᨲ᩠ᨲᩮ ᨬᩣᨱᩴ ᩋᨲ᩠ᨳᩦᨲᩥ? ᨶ ᩉᩮᩅᩴ ᩅᨲ᩠ᨲᨻ᩠ᨻᩮ…ᨸᩮ….

᪔᪔᪐. ᨶ ᩅᨲ᩠ᨲᨻ᩠ᨻᩴ – ‘‘ᩋᨶᩣᨣᨲᩮ ᨬᩣᨱᩴ ᩋᨲ᩠ᨳᩦ’’ᨲᩥ? ᩌᨾᨶ᩠ᨲᩣ. ᨶᨶᩩ ᩅᩩᨲ᩠ᨲᩴ ᨽᨣᩅᨲᩣ – ‘‘ᨸᩣᨭᩃᩥᨸᩩᨲ᩠ᨲᩔ ᨡᩮᩣ, ᩌᨶᨶ᩠ᨴ, ᨲᨿᩮᩣ ᩋᨶ᩠ᨲᩁᩣᨿᩣ ᨽᩅᩥᩔᨶ᩠ᨲᩥ – ᩋᨣ᩠ᨣᩥᨲᩮᩣ ᩅᩣ ᩏᨴᨠᨲᩮᩣ ᩅᩣ ᨾᩥᨳᩩᨽᩮᨴᩣ ᩅᩣ’’ᨲᩥ [ᨾᩉᩣᩅ. ᪒᪘᪖; ᨴᩦ. ᨶᩥ. ᪒.᪑᪕᪒; ᩏᨴᩣ. ᪗᪖]! ᩋᨲ᩠ᨳᩮᩅ ᩈᩩᨲ᩠ᨲᨶ᩠ᨲᩮᩣᨲᩥ? ᩌᨾᨶ᩠ᨲᩣ. ᨲᩮᨶ ᩉᩥ ᩋᨶᩣᨣᨲᩮ ᨬᩣᨱᩴ ᩋᨲ᩠ᨳᩦᨲᩥ.

ᩋᨶᩣᨣᨲᨬᩣᨱᨠᨳᩣ ᨶᩥᨭ᩠ᨮᩥᨲᩣ.