᪑. ᨻᩣᩃᩅᨣ᩠ᨣᩮᩣ

᪑. ᨽᨿᩈᩩᨲ᩠ᨲᩴ

᪑. ᩑᩅᩴ ᨾᩮ ᩈᩩᨲᩴ – ᩑᨠᩴ ᩈᨾᨿᩴ ᨽᨣᩅᩣ ᩈᩣᩅᨲ᩠ᨳᩥᨿᩴ ᩅᩥᩉᩁᨲᩥ ᨩᩮᨲᩅᨶᩮ ᩋᨶᩣᨳᨸᩥᨱ᩠ᨯᩥᨠᩔ ᩌᩁᩣᨾᩮ. ᨲᨲᩕ ᨡᩮᩣ ᨽᨣᩅᩣ ᨽᩥᨠ᩠ᨡᩪ ᩌᨾᨶ᩠ᨲᩮᩈᩥ – ‘‘ᨽᩥᨠ᩠ᨡᩅᩮᩣ’’ᨲᩥ. ‘‘ᨽᨴᨶ᩠ᨲᩮ [ᨽᨴ᩠ᨴᨶ᩠ᨲᩮ (ᨠ.)]’’ᨲᩥ ᨲᩮ ᨽᩥᨠ᩠ᨡᩪ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩩᩴ. ᨽᨣᩅᩣ ᩑᨲᨴᩅᩮᩣᨧ –

‘‘ᨿᩣᨶᩥ ᨠᩣᨶᩥᨧᩥ, ᨽᩥᨠ᩠ᨡᩅᩮ, ᨽᨿᩣᨶᩥ ᩏᨸ᩠ᨸᨩ᩠ᨩᨶ᩠ᨲᩥ ᩈᨻ᩠ᨻᩣᨶᩥ ᨲᩣᨶᩥ ᨻᩣᩃᨲᩮᩣ ᩏᨸ᩠ᨸᨩ᩠ᨩᨶ᩠ᨲᩥ, ᨶᩮᩣ ᨸᨱ᩠ᨯᩥᨲᨲᩮᩣ. ᨿᩮ ᨠᩮᨧᩥ ᩏᨸᨴ᩠ᨴᩅᩣ ᩏᨸ᩠ᨸᨩ᩠ᨩᨶ᩠ᨲᩥ ᩈᨻ᩠ᨻᩮ ᨲᩮ ᨻᩣᩃᨲᩮᩣ ᩏᨸ᩠ᨸᨩ᩠ᨩᨶ᩠ᨲᩥ, ᨶᩮᩣ ᨸᨱ᩠ᨯᩥᨲᨲᩮᩣ. ᨿᩮ ᨠᩮᨧᩥ ᩏᨸᩈᨣ᩠ᨣᩣ ᩏᨸ᩠ᨸᨩ᩠ᨩᨶ᩠ᨲᩥ ᩈᨻ᩠ᨻᩮ ᨲᩮ ᨻᩣᩃᨲᩮᩣ ᩏᨸ᩠ᨸᨩ᩠ᨩᨶ᩠ᨲᩥ, ᨶᩮᩣ ᨸᨱ᩠ᨯᩥᨲᨲᩮᩣ. ᩈᩮᨿ᩠ᨿᨳᩣᨸᩥ, ᨽᩥᨠ᩠ᨡᩅᩮ, ᨶᩊᩣᨣᩣᩁᩣ ᩅᩣ ᨲᩥᨱᩣᨣᩣᩁᩣ ᩅᩣ [ᨶᩊᩣᨣᩣᩁᩴ ᩅᩣ ᨲᩥᨱᩣᨣᩣᩁᩴ ᩅᩣ (ᩈᩦ.)] ᩋᨣ᩠ᨣᩥ ᨾᩩᨲ᩠ᨲᩮᩣ [ᩋᨣ᩠ᨣᩥᨾᩩᨠ᩠ᨠᩮᩣ (ᩈᩦ.), ᩋᨣ᩠ᨣᩥ ᨾᩩᨠ᩠ᨠᩮᩣ (ᩈ᩠ᨿᩣ. ᨠᩴ. ᨸᩦ.)] ᨠᩪᨭᩣᨣᩣᩁᩣᨶᩥᨸᩥ ᨯᩉᨲᩥ ᩏᩃ᩠ᩃᩥᨲ᩠ᨲᩣᩅᩃᩥᨲ᩠ᨲᩣᨶᩥ ᨶᩥᩅᩣᨲᩣᨶᩥ ᨹᩩᩈᩥᨲᨣ᩠ᨣᩊᩣᨶᩥ ᨸᩥᩉᩥᨲᩅᩣᨲᨸᩣᨶᩣᨶᩥ; ᩑᩅᨾᩮᩅᩴ ᨡᩮᩣ, ᨽᩥᨠ᩠ᨡᩅᩮ, ᨿᩣᨶᩥ ᨠᩣᨶᩥᨧᩥ ᨽᨿᩣᨶᩥ ᩏᨸ᩠ᨸᨩ᩠ᨩᨶ᩠ᨲᩥ ᩈᨻ᩠ᨻᩣᨶᩥ ᨲᩣᨶᩥ ᨻᩣᩃᨲᩮᩣ ᩏᨸ᩠ᨸᨩ᩠ᨩᨶ᩠ᨲᩥ, ᨶᩮᩣ ᨸᨱ᩠ᨯᩥᨲᨲᩮᩣ. ᨿᩮ ᨠᩮᨧᩥ ᩏᨸᨴ᩠ᨴᩅᩣ ᩏᨸ᩠ᨸᨩ᩠ᨩᨶ᩠ᨲᩥ ᩈᨻ᩠ᨻᩮ ᨲᩮ ᨻᩣᩃᨲᩮᩣ ᩏᨸ᩠ᨸᨩ᩠ᨩᨶ᩠ᨲᩥ, ᨶᩮᩣ ᨸᨱ᩠ᨯᩥᨲᨲᩮᩣ. ᨿᩮ ᨠᩮᨧᩥ ᩏᨸᩈᨣ᩠ᨣᩣ ᩏᨸ᩠ᨸᨩ᩠ᨩᨶ᩠ᨲᩥ ᩈᨻ᩠ᨻᩮ ᨲᩮ ᨻᩣᩃᨲᩮᩣ ᩏᨸ᩠ᨸᨩ᩠ᨩᨶ᩠ᨲᩥ, ᨶᩮᩣ ᨸᨱ᩠ᨯᩥᨲᨲᩮᩣ.

‘‘ᩍᨲᩥ ᨡᩮᩣ, ᨽᩥᨠ᩠ᨡᩅᩮ, ᩈᨸ᩠ᨸᨭᩥᨽᨿᩮᩣ ᨻᩣᩃᩮᩣ, ᩋᨸ᩠ᨸᨭᩥᨽᨿᩮᩣ ᨸᨱ᩠ᨯᩥᨲᩮᩣ. ᩈᩏᨸᨴ᩠ᨴᩅᩮᩣ ᨻᩣᩃᩮᩣ, ᩋᨶᩩᨸᨴ᩠ᨴᩅᩮᩣ ᨸᨱ᩠ᨯᩥᨲᩮᩣ. ᩈᩏᨸᩈᨣ᩠ᨣᩮᩣ ᨻᩣᩃᩮᩣ, ᩋᨶᩩᨸᩈᨣ᩠ᨣᩮᩣ ᨸᨱ᩠ᨯᩥᨲᩮᩣ. ᨶᨲ᩠ᨳᩥ, ᨽᩥᨠ᩠ᨡᩅᩮ, ᨸᨱ᩠ᨯᩥᨲᨲᩮᩣ ᨽᨿᩴ, ᨶᨲ᩠ᨳᩥ ᨸᨱ᩠ᨯᩥᨲᨲᩮᩣ ᩏᨸᨴ᩠ᨴᩅᩮᩣ, ᨶᨲ᩠ᨳᩥ ᨸᨱ᩠ᨯᩥᨲᨲᩮᩣ ᩏᨸᩈᨣ᩠ᨣᩮᩣ.

‘‘ᨲᩈ᩠ᨾᩣᨲᩥᩉ, ᨽᩥᨠ᩠ᨡᩅᩮ, ᩑᩅᩴ ᩈᩥᨠ᩠ᨡᩥᨲᨻ᩠ᨻᩴ – ‘ᨿᩮᩉᩥ ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨻᩣᩃᩮᩣ ᩅᩮᨴᩥᨲᨻ᩠ᨻᩮᩣ ᨲᩮ ᨲᨿᩮᩣ ᨵᨾ᩠ᨾᩮ ᩋᨽᩥᨶᩥᩅᨩ᩠ᨩᩮᨲ᩠ᩅᩣ, ᨿᩮᩉᩥ ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨸᨱ᩠ᨯᩥᨲᩮᩣ ᩅᩮᨴᩥᨲᨻ᩠ᨻᩮᩣ ᨲᩮ ᨲᨿᩮᩣ ᨵᨾ᩠ᨾᩮ ᩈᨾᩣᨴᩣᨿ ᩅᨲ᩠ᨲᩥᩔᩣᨾᩣ’ᨲᩥ. ᩑᩅᨬ᩠ᩉᩥ ᩅᩮᩣ, ᨽᩥᨠ᩠ᨡᩅᩮ, ᩈᩥᨠ᩠ᨡᩥᨲᨻ᩠ᨻ’’ᨶ᩠ᨲᩥ. ᨸᨮᨾᩴ.

᪒. ᩃᨠ᩠ᨡᨱᩈᩩᨲ᩠ᨲᩴ

᪒. ‘‘ᨠᨾ᩠ᨾᩃᨠ᩠ᨡᨱᩮᩣ, ᨽᩥᨠ᩠ᨡᩅᩮ, ᨻᩣᩃᩮᩣ, ᨠᨾ᩠ᨾᩃᨠ᩠ᨡᨱᩮᩣ ᨸᨱ᩠ᨯᩥᨲᩮᩣ, ᩋᨸᨴᩣᨶᩈᩮᩣᨽᨶᩦ [ᩋᨸᨴᩣᨶᩮ ᩈᩮᩣᨽᨲᩥ (ᩈ᩠ᨿᩣ. ᨠᩴ. ᨸᩦ.)] ᨸᨬ᩠ᨬᩣᨲᩥ [ᨸᨬ᩠ᨬᨲ᩠ᨲᩥ (?)]. ᨲᩦᩉᩥ, ᨽᩥᨠ᩠ᨡᩅᩮ, ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨻᩣᩃᩮᩣ ᩅᩮᨴᩥᨲᨻ᩠ᨻᩮᩣ. ᨠᨲᨾᩮᩉᩥ ᨲᩦᩉᩥ? ᨠᩣᨿᨴᩩᨧ᩠ᨧᩁᩥᨲᩮᨶ, ᩅᨧᩦᨴᩩᨧ᩠ᨧᩁᩥᨲᩮᨶ, ᨾᨶᩮᩣᨴᩩᨧ᩠ᨧᩁᩥᨲᩮᨶ. ᩍᨾᩮᩉᩥ ᨡᩮᩣ, ᨽᩥᨠ᩠ᨡᩅᩮ, ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨻᩣᩃᩮᩣ ᩅᩮᨴᩥᨲᨻ᩠ᨻᩮᩣ.

‘‘ᨲᩦᩉᩥ, ᨽᩥᨠ᩠ᨡᩅᩮ, ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨸᨱ᩠ᨯᩥᨲᩮᩣ ᩅᩮᨴᩥᨲᨻ᩠ᨻᩮᩣ. ᨠᨲᨾᩮᩉᩥ ᨲᩦᩉᩥ? ᨠᩣᨿᩈᩩᨧᩁᩥᨲᩮᨶ, ᩅᨧᩦᩈᩩᨧᩁᩥᨲᩮᨶ, ᨾᨶᩮᩣᩈᩩᨧᩁᩥᨲᩮᨶ. ᩍᨾᩮᩉᩥ ᨡᩮᩣ, ᨽᩥᨠ᩠ᨡᩅᩮ, ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨸᨱ᩠ᨯᩥᨲᩮᩣ ᩅᩮᨴᩥᨲᨻ᩠ᨻᩮᩣ.

᪓. ᨧᩥᨶ᩠ᨲᩦᩈᩩᨲ᩠ᨲᩴ

᪓. ‘‘ᨲᩦᨱᩥᨾᩣᨶᩥ, ᨽᩥᨠ᩠ᨡᩅᩮ, ᨻᩣᩃᩔ ᨻᩣᩃᩃᨠ᩠ᨡᨱᩣᨶᩥ ᨻᩣᩃᨶᩥᨾᩥᨲ᩠ᨲᩣᨶᩥ ᨻᩣᩃᩣᨸᨴᩣᨶᩣᨶᩥ. ᨠᨲᨾᩣᨶᩥ ᨲᩦᨱᩥ? ᩍᨵ, ᨽᩥᨠ᩠ᨡᩅᩮ, ᨻᩣᩃᩮᩣ ᨴᩩᨧ᩠ᨧᩥᨶ᩠ᨲᩥᨲᨧᩥᨶ᩠ᨲᩦ ᨧ ᩉᩮᩣᨲᩥ ᨴᩩᨻ᩠ᨽᩣᩈᩥᨲᨽᩣᩈᩦ ᨧ ᨴᩩᨠ᩠ᨠᨭᨠᨾ᩠ᨾᨠᩣᩁᩦ ᨧ. ᨶᩮᩣ ᨧᩮᨴᩴ [ᨶᩮᩣ ᨧᩮᨲᩴ (ᩈ᩠ᨿᩣ. ᨠᩴ. ᨠ.)], ᨽᩥᨠ᩠ᨡᩅᩮ, ᨻᩣᩃᩮᩣ ᨴᩩᨧ᩠ᨧᩥᨶ᩠ᨲᩥᨲᨧᩥᨶ᩠ᨲᩦ ᨧ ᩋᨽᩅᩥᩔ ᨴᩩᨻ᩠ᨽᩣᩈᩥᨲᨽᩣᩈᩦ ᨧ ᨴᩩᨠ᩠ᨠᨭᨠᨾ᩠ᨾᨠᩣᩁᩦ ᨧ, ᨠᩮᨶ ᨶᩴ ᨸᨱ᩠ᨯᩥᨲᩣ ᨩᩣᨶᩮᨿ᩠ᨿᩩᩴ [ᨲᩮᨶ ᨶᩴ ᨸᨱ᩠ᨯᩥᨲᩣ ᨶ ᨩᩣᨶᩮᨿ᩠ᨿᩩᩴ (ᨠ.), ᨶ ᨶᩴ ᨸᨱ᩠ᨯᩥᨲᩣ ᨩᩣᨶᩮᨿ᩠ᨿᩩᩴ (?)] – ‘ᨻᩣᩃᩮᩣ ᩋᨿᩴ ᨽᩅᩴ ᩋᩈᨸ᩠ᨸᩩᩁᩥᩈᩮᩣ’ᨲᩥ? ᨿᩈ᩠ᨾᩣ ᨧ ᨡᩮᩣ, ᨽᩥᨠ᩠ᨡᩅᩮ, ᨻᩣᩃᩮᩣ ᨴᩩᨧ᩠ᨧᩥᨶ᩠ᨲᩥᨲᨧᩥᨶ᩠ᨲᩦ ᨧ ᩉᩮᩣᨲᩥ ᨴᩩᨻ᩠ᨽᩣᩈᩥᨲᨽᩣᩈᩦ ᨧ ᨴᩩᨠ᩠ᨠᨭᨠᨾ᩠ᨾᨠᩣᩁᩦ ᨧ ᨲᩈ᩠ᨾᩣ ᨶᩴ ᨸᨱ᩠ᨯᩥᨲᩣ ᨩᩣᨶᨶ᩠ᨲᩥ – ‘ᨻᩣᩃᩮᩣ ᩋᨿᩴ ᨽᩅᩴ ᩋᩈᨸ᩠ᨸᩩᩁᩥᩈᩮᩣ’ᨲᩥ. ᩍᨾᩣᨶᩥ ᨡᩮᩣ, ᨽᩥᨠ᩠ᨡᩅᩮ, ᨲᩦᨱᩥ ᨻᩣᩃᩔ ᨻᩣᩃᩃᨠ᩠ᨡᨱᩣᨶᩥ ᨻᩣᩃᨶᩥᨾᩥᨲ᩠ᨲᩣᨶᩥ ᨻᩣᩃᩣᨸᨴᩣᨶᩣᨶᩥ.

‘‘ᨲᩦᨱᩥᨾᩣᨶᩥ, ᨽᩥᨠ᩠ᨡᩅᩮ, ᨸᨱ᩠ᨯᩥᨲᩔ ᨸᨱ᩠ᨯᩥᨲᩃᨠ᩠ᨡᨱᩣᨶᩥ ᨸᨱ᩠ᨯᩥᨲᨶᩥᨾᩥᨲ᩠ᨲᩣᨶᩥ ᨸᨱ᩠ᨯᩥᨲᩣᨸᨴᩣᨶᩣᨶᩥ. ᨠᨲᨾᩣᨶᩥ ᨲᩦᨱᩥ? ᩍᨵ, ᨽᩥᨠ᩠ᨡᩅᩮ, ᨸᨱ᩠ᨯᩥᨲᩮᩣ ᩈᩩᨧᩥᨶ᩠ᨲᩥᨲᨧᩥᨶ᩠ᨲᩦ ᨧ ᩉᩮᩣᨲᩥ ᩈᩩᨽᩣᩈᩥᨲᨽᩣᩈᩦ ᨧ ᩈᩩᨠᨲᨠᨾ᩠ᨾᨠᩣᩁᩦ ᨧ. ᨶᩮᩣ ᨧᩮᨴᩴ, ᨽᩥᨠ᩠ᨡᩅᩮ, ᨸᨱ᩠ᨯᩥᨲᩮᩣ ᩈᩩᨧᩥᨶ᩠ᨲᩥᨲᨧᩥᨶ᩠ᨲᩦ ᨧ ᩋᨽᩅᩥᩔ ᩈᩩᨽᩣᩈᩥᨲᨽᩣᩈᩦ ᨧ ᩈᩩᨠᨲᨠᨾ᩠ᨾᨠᩣᩁᩦ ᨧ, ᨠᩮᨶ ᨶᩴ ᨸᨱ᩠ᨯᩥᨲᩣ ᨩᩣᨶᩮᨿ᩠ᨿᩩᩴ – ‘ᨸᨱ᩠ᨯᩥᨲᩮᩣ ᩋᨿᩴ ᨽᩅᩴ ᩈᨸ᩠ᨸᩩᩁᩥᩈᩮᩣ’ᨲᩥ? ᨿᩈ᩠ᨾᩣ ᨧ ᨡᩮᩣ, ᨽᩥᨠ᩠ᨡᩅᩮ, ᨸᨱ᩠ᨯᩥᨲᩮᩣ ᩈᩩᨧᩥᨶ᩠ᨲᩥᨲᨧᩥᨶ᩠ᨲᩦ ᨧ ᩉᩮᩣᨲᩥ ᩈᩩᨽᩣᩈᩥᨲᨽᩣᩈᩦ ᨧ ᩈᩩᨠᨲᨠᨾ᩠ᨾᨠᩣᩁᩦ ᨧ ᨲᩈ᩠ᨾᩣ ᨶᩴ ᨸᨱ᩠ᨯᩥᨲᩣ ᨩᩣᨶᨶ᩠ᨲᩥ – ‘ᨸᨱ᩠ᨯᩥᨲᩮᩣ ᩋᨿᩴ ᨽᩅᩴ ᩈᨸ᩠ᨸᩩᩁᩥᩈᩮᩣ’ᨲᩥ. ᩍᨾᩣᨶᩥ ᨡᩮᩣ, ᨽᩥᨠ᩠ᨡᩅᩮ, ᨲᩦᨱᩥ ᨸᨱ᩠ᨯᩥᨲᩔ ᨸᨱ᩠ᨯᩥᨲᩃᨠ᩠ᨡᨱᩣᨶᩥ ᨸᨱ᩠ᨯᩥᨲᨶᩥᨾᩥᨲ᩠ᨲᩣᨶᩥ ᨸᨱ᩠ᨯᩥᨲᩣᨸᨴᩣᨶᩣᨶᩥ. ᨲᩈ᩠ᨾᩣᨲᩥᩉ…. ᨲᨲᩥᨿᩴ.

᪔. ᩋᨧ᩠ᨧᨿᩈᩩᨲ᩠ᨲᩴ

᪔. ‘‘ᨲᩦᩉᩥ, ᨽᩥᨠ᩠ᨡᩅᩮ, ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨻᩣᩃᩮᩣ ᩅᩮᨴᩥᨲᨻ᩠ᨻᩮᩣ. ᨠᨲᨾᩮᩉᩥ ᨲᩦᩉᩥ? ᩋᨧ᩠ᨧᨿᩴ ᩋᨧ᩠ᨧᨿᨲᩮᩣ ᨶ ᨸᩔᨲᩥ, ᩋᨧ᩠ᨧᨿᩴ ᩋᨧ᩠ᨧᨿᨲᩮᩣ ᨴᩥᩈ᩠ᩅᩣ ᨿᨳᩣᨵᨾ᩠ᨾᩴ ᨶᨸ᩠ᨸᨭᩥᨠᩁᩮᩣᨲᩥ, ᨸᩁᩔ ᨡᩮᩣ ᨸᨶ ᩋᨧ᩠ᨧᨿᩴ ᨴᩮᩈᩮᨶ᩠ᨲᩔ ᨿᨳᩣᨵᨾ᩠ᨾᩴ ᨶᨸ᩠ᨸᨭᩥᨣ᩠ᨣᨱ᩠ᩉᩣᨲᩥ. ᩍᨾᩮᩉᩥ ᨡᩮᩣ, ᨽᩥᨠ᩠ᨡᩅᩮ, ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨻᩣᩃᩮᩣ ᩅᩮᨴᩥᨲᨻ᩠ᨻᩮᩣ.

‘‘ᨲᩦᩉᩥ, ᨽᩥᨠ᩠ᨡᩅᩮ, ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨸᨱ᩠ᨯᩥᨲᩮᩣ ᩅᩮᨴᩥᨲᨻ᩠ᨻᩮᩣ. ᨠᨲᨾᩮᩉᩥ ᨲᩦᩉᩥ? ᩋᨧ᩠ᨧᨿᩴ ᩋᨧ᩠ᨧᨿᨲᩮᩣ ᨸᩔᨲᩥ, ᩋᨧ᩠ᨧᨿᩴ ᩋᨧ᩠ᨧᨿᨲᩮᩣ ᨴᩥᩈ᩠ᩅᩣ ᨿᨳᩣᨵᨾ᩠ᨾᩴ ᨸᨭᩥᨠᩁᩮᩣᨲᩥ, ᨸᩁᩔ ᨡᩮᩣ ᨸᨶ ᩋᨧ᩠ᨧᨿᩴ ᨴᩮᩈᩮᨶ᩠ᨲᩔ ᨿᨳᩣᨵᨾ᩠ᨾᩴ ᨸᨭᩥᨣ᩠ᨣᨱ᩠ᩉᩣᨲᩥ. ᩍᨾᩮᩉᩥ ᨡᩮᩣ, ᨽᩥᨠ᩠ᨡᩅᩮ, ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨸᨱ᩠ᨯᩥᨲᩮᩣ ᩅᩮᨴᩥᨲᨻ᩠ᨻᩮᩣ. ᨲᩈ᩠ᨾᩣᨲᩥᩉ…. ᨧᨲᩩᨲ᩠ᨳᩴ.

᪕. ᩋᨿᩮᩣᨶᩥᩈᩮᩣᩈᩩᨲ᩠ᨲᩴ

᪕. ‘‘ᨲᩦᩉᩥ, ᨽᩥᨠ᩠ᨡᩅᩮ, ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨻᩣᩃᩮᩣ ᩅᩮᨴᩥᨲᨻ᩠ᨻᩮᩣ. ᨠᨲᨾᩮᩉᩥ ᨲᩦᩉᩥ? ᩋᨿᩮᩣᨶᩥᩈᩮᩣ ᨸᨬ᩠ᩉᩴ ᨠᨲ᩠ᨲᩣ ᩉᩮᩣᨲᩥ, ᩋᨿᩮᩣᨶᩥᩈᩮᩣ ᨸᨬ᩠ᩉᩴ ᩅᩥᩔᨩ᩠ᨩᩮᨲᩣ ᩉᩮᩣᨲᩥ, ᨸᩁᩔ ᨡᩮᩣ ᨸᨶ ᨿᩮᩣᨶᩥᩈᩮᩣ ᨸᨬ᩠ᩉᩴ ᩅᩥᩔᨩ᩠ᨩᩥᨲᩴ ᨸᩁᩥᨾᨱ᩠ᨯᩃᩮᩉᩥ ᨸᨴᨻ᩠ᨿᨬ᩠ᨩᨶᩮᩉᩥ ᩈᩥᩃᩥᨭ᩠ᨮᩮᩉᩥ ᩏᨸᨣᨲᩮᩉᩥ ᨶᩣᨻ᩠ᨽᨶᩩᨾᩮᩣᨴᩥᨲᩣ ᩉᩮᩣᨲᩥ. ᩍᨾᩮᩉᩥ ᨡᩮᩣ, ᨽᩥᨠ᩠ᨡᩅᩮ, ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨻᩣᩃᩮᩣ ᩅᩮᨴᩥᨲᨻ᩠ᨻᩮᩣ.

‘‘ᨲᩦᩉᩥ, ᨽᩥᨠ᩠ᨡᩅᩮ, ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨸᨱ᩠ᨯᩥᨲᩮᩣ ᩅᩮᨴᩥᨲᨻ᩠ᨻᩮᩣ. ᨠᨲᨾᩮᩉᩥ ᨲᩦᩉᩥ? ᨿᩮᩣᨶᩥᩈᩮᩣ ᨸᨬ᩠ᩉᩴ ᨠᨲ᩠ᨲᩣ ᩉᩮᩣᨲᩥ, ᨿᩮᩣᨶᩥᩈᩮᩣ ᨸᨬ᩠ᩉᩴ ᩅᩥᩔᨩ᩠ᨩᩮᨲᩣ ᩉᩮᩣᨲᩥ, ᨸᩁᩔ ᨡᩮᩣ ᨸᨶ ᨿᩮᩣᨶᩥᩈᩮᩣ ᨸᨬ᩠ᩉᩴ ᩅᩥᩔᨩ᩠ᨩᩥᨲᩴ ᨸᩁᩥᨾᨱ᩠ᨯᩃᩮᩉᩥ ᨸᨴᨻ᩠ᨿᨬ᩠ᨩᨶᩮᩉᩥ ᩈᩥᩃᩥᨭ᩠ᨮᩮᩉᩥ ᩏᨸᨣᨲᩮᩉᩥ ᩋᨻ᩠ᨽᨶᩩᨾᩮᩣᨴᩥᨲᩣ ᩉᩮᩣᨲᩥ. ᩍᨾᩮᩉᩥ ᨡᩮᩣ, ᨽᩥᨠ᩠ᨡᩅᩮ, ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨸᨱ᩠ᨯᩥᨲᩮᩣ ᩅᩮᨴᩥᨲᨻ᩠ᨻᩮᩣ. ᨲᩈ᩠ᨾᩣᨲᩥᩉ…. ᨸᨬ᩠ᨧᨾᩴ.

᪖. ᩋᨠᩩᩈᩃᩈᩩᨲ᩠ᨲᩴ

᪖. ‘‘ᨲᩦᩉᩥ, ᨽᩥᨠ᩠ᨡᩅᩮ, ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨻᩣᩃᩮᩣ ᩅᩮᨴᩥᨲᨻ᩠ᨻᩮᩣ. ᨠᨲᨾᩮᩉᩥ ᨲᩦᩉᩥ? ᩋᨠᩩᩈᩃᩮᨶ ᨠᩣᨿᨠᨾ᩠ᨾᩮᨶ, ᩋᨠᩩᩈᩃᩮᨶ ᩅᨧᩦᨠᨾ᩠ᨾᩮᨶ, ᩋᨠᩩᩈᩃᩮᨶ ᨾᨶᩮᩣᨠᨾ᩠ᨾᩮᨶ. ᩍᨾᩮᩉᩥ ᨡᩮᩣ, ᨽᩥᨠ᩠ᨡᩅᩮ, ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨻᩣᩃᩮᩣ ᩅᩮᨴᩥᨲᨻ᩠ᨻᩮᩣ.

‘‘ᨲᩦᩉᩥ, ᨽᩥᨠ᩠ᨡᩅᩮ, ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨸᨱ᩠ᨯᩥᨲᩮᩣ ᩅᩮᨴᩥᨲᨻ᩠ᨻᩮᩣ. ᨠᨲᨾᩮᩉᩥ ᨲᩦᩉᩥ? ᨠᩩᩈᩃᩮᨶ ᨠᩣᨿᨠᨾ᩠ᨾᩮᨶ, ᨠᩩᩈᩃᩮᨶ ᩅᨧᩦᨠᨾ᩠ᨾᩮᨶ, ᨠᩩᩈᩃᩮᨶ ᨾᨶᩮᩣᨠᨾ᩠ᨾᩮᨶ. ᩍᨾᩮᩉᩥ ᨡᩮᩣ, ᨽᩥᨠ᩠ᨡᩅᩮ, ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨸᨱ᩠ᨯᩥᨲᩮᩣ ᩅᩮᨴᩥᨲᨻ᩠ᨻᩮᩣ. ᨲᩈ᩠ᨾᩣᨲᩥᩉ…. ᨨᨭ᩠ᨮᩴ.

᪗. ᩈᩣᩅᨩ᩠ᨩᩈᩩᨲ᩠ᨲᩴ

᪗. ‘‘ᨲᩦᩉᩥ, ᨽᩥᨠ᩠ᨡᩅᩮ, ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨻᩣᩃᩮᩣ ᩅᩮᨴᩥᨲᨻ᩠ᨻᩮᩣ. ᨠᨲᨾᩮᩉᩥ ᨲᩦᩉᩥ? ᩈᩣᩅᨩ᩠ᨩᩮᨶ ᨠᩣᨿᨠᨾ᩠ᨾᩮᨶ, ᩈᩣᩅᨩ᩠ᨩᩮᨶ ᩅᨧᩦᨠᨾ᩠ᨾᩮᨶ, ᩈᩣᩅᨩ᩠ᨩᩮᨶ ᨾᨶᩮᩣᨠᨾ᩠ᨾᩮᨶ…ᨸᩮ… ᩋᨶᩅᨩ᩠ᨩᩮᨶ ᨠᩣᨿᨠᨾ᩠ᨾᩮᨶ, ᩋᨶᩅᨩ᩠ᨩᩮᨶ ᩅᨧᩦᨠᨾ᩠ᨾᩮᨶ, ᩋᨶᩅᨩ᩠ᨩᩮᨶ ᨾᨶᩮᩣᨠᨾ᩠ᨾᩮᨶ…ᨸᩮ…. ᩈᨲ᩠ᨲᨾᩴ.

᪘. ᩈᨻ᩠ᨿᩣᨻᨩ᩠ᨫᩈᩩᨲ᩠ᨲᩴ

᪘. ‘‘ᨲᩦᩉᩥ, ᨽᩥᨠ᩠ᨡᩅᩮ, ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨻᩣᩃᩮᩣ ᩅᩮᨴᩥᨲᨻ᩠ᨻᩮᩣ. ᨠᨲᨾᩮᩉᩥ ᨲᩦᩉᩥ? ᩈᨻ᩠ᨿᩣᨻᨩ᩠ᨫᩮᨶ ᨠᩣᨿᨠᨾ᩠ᨾᩮᨶ, ᩈᨻ᩠ᨿᩣᨻᨩ᩠ᨫᩮᨶ ᩅᨧᩦᨠᨾ᩠ᨾᩮᨶ, ᩈᨻ᩠ᨿᩣᨻᨩ᩠ᨫᩮᨶ ᨾᨶᩮᩣᨠᨾ᩠ᨾᩮᨶ…ᨸᩮ… ᩋᨻ᩠ᨿᩣᨻᨩ᩠ᨫᩮᨶ ᨠᩣᨿᨠᨾ᩠ᨾᩮᨶ, ᩋᨻ᩠ᨿᩣᨻᨩ᩠ᨫᩮᨶ ᩅᨧᩦᨠᨾ᩠ᨾᩮᨶ, ᩋᨻ᩠ᨿᩣᨻᨩ᩠ᨫᩮᨶ ᨾᨶᩮᩣᨠᨾ᩠ᨾᩮᨶ. ᩍᨾᩮᩉᩥ, ᨡᩮᩣ, ᨽᩥᨠ᩠ᨡᩅᩮ, ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨸᨱ᩠ᨯᩥᨲᩮᩣ ᩅᩮᨴᩥᨲᨻ᩠ᨻᩮᩣ.

᪙. ᨡᨲᩈᩩᨲ᩠ᨲᩴ

᪙. ‘‘ᨲᩦᩉᩥ, ᨽᩥᨠ᩠ᨡᩅᩮ, ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨻᩣᩃᩮᩣ ᩋᨻ᩠ᨿᨲ᩠ᨲᩮᩣ ᩋᩈᨸ᩠ᨸᩩᩁᩥᩈᩮᩣ ᨡᨲᩴ ᩏᨸᩉᨲᩴ ᩋᨲ᩠ᨲᩣᨶᩴ ᨸᩁᩥᩉᩁᨲᩥ, ᩈᩣᩅᨩ᩠ᨩᩮᩣ ᨧ ᩉᩮᩣᨲᩥ ᩈᩣᨶᩩᩅᨩ᩠ᨩᩮᩣ ᨧ ᩅᩥᨬ᩠ᨬᩪᨶᩴ, ᨻᩉᩩᨬ᩠ᨧ ᩋᨸᩩᨬ᩠ᨬᩴ ᨸᩈᩅᨲᩥ. ᨠᨲᨾᩮᩉᩥ ᨲᩦᩉᩥ? ᨠᩣᨿᨴᩩᨧ᩠ᨧᩁᩥᨲᩮᨶ, ᩅᨧᩦᨴᩩᨧ᩠ᨧᩁᩥᨲᩮᨶ, ᨾᨶᩮᩣᨴᩩᨧ᩠ᨧᩁᩥᨲᩮᨶ. ᩍᨾᩮᩉᩥ ᨡᩮᩣ, ᨽᩥᨠ᩠ᨡᩅᩮ, ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨻᩣᩃᩮᩣ ᩋᨻ᩠ᨿᨲ᩠ᨲᩮᩣ ᩋᩈᨸ᩠ᨸᩩᩁᩥᩈᩮᩣ ᨡᨲᩴ ᩏᨸᩉᨲᩴ ᩋᨲ᩠ᨲᩣᨶᩴ ᨸᩁᩥᩉᩁᨲᩥ, ᩈᩣᩅᨩ᩠ᨩᩮᩣ ᨧ ᩉᩮᩣᨲᩥ ᩈᩣᨶᩩᩅᨩ᩠ᨩᩮᩣ ᨧ ᩅᩥᨬ᩠ᨬᩪᨶᩴ, ᨻᩉᩩᨬ᩠ᨧ ᩋᨸᩩᨬ᩠ᨬᩴ ᨸᩈᩅᨲᩥ.

‘‘ᨲᩦᩉᩥ, ᨽᩥᨠ᩠ᨡᩅᩮ, ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨸᨱ᩠ᨯᩥᨲᩮᩣ ᩅᩥᨿᨲ᩠ᨲᩮᩣ ᩈᨸ᩠ᨸᩩᩁᩥᩈᩮᩣ ᩋᨠ᩠ᨡᨲᩴ ᩋᨶᩩᨸᩉᨲᩴ ᩋᨲ᩠ᨲᩣᨶᩴ ᨸᩁᩥᩉᩁᨲᩥ, ᩋᨶᩅᨩ᩠ᨩᩮᩣ ᨧ ᩉᩮᩣᨲᩥ ᩋᨶᨶᩩᩅᨩ᩠ᨩᩮᩣ ᨧ ᩅᩥᨬ᩠ᨬᩪᨶᩴ, ᨻᩉᩩᨬ᩠ᨧ ᨸᩩᨬ᩠ᨬᩴ ᨸᩈᩅᨲᩥ. ᨠᨲᨾᩮᩉᩥ ᨲᩦᩉᩥ? ᨠᩣᨿᩈᩩᨧᩁᩥᨲᩮᨶ, ᩅᨧᩦᩈᩩᨧᩁᩥᨲᩮᨶ, ᨾᨶᩮᩣᩈᩩᨧᩁᩥᨲᩮᨶ. ᩍᨾᩮᩉᩥ ᨡᩮᩣ, ᨽᩥᨠ᩠ᨡᩅᩮ, ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨸᨱ᩠ᨯᩥᨲᩮᩣ ᩅᩥᨿᨲ᩠ᨲᩮᩣ ᩈᨸ᩠ᨸᩩᩁᩥᩈᩮᩣ ᩋᨠ᩠ᨡᨲᩴ ᩋᨶᩩᨸᩉᨲᩴ ᩋᨲ᩠ᨲᩣᨶᩴ ᨸᩁᩥᩉᩁᨲᩥ, ᩋᨶᩅᨩ᩠ᨩᩮᩣ ᨧ ᩉᩮᩣᨲᩥ ᩋᨶᨶᩩᩅᨩ᩠ᨩᩮᩣ ᨧ ᩅᩥᨬ᩠ᨬᩪᨶᩴ, ᨻᩉᩩᨬ᩠ᨧ ᨸᩩᨬ᩠ᨬᩴ ᨸᩈᩅᨲᩦ’’ᨲᩥ. ᨶᩅᨾᩴ.

᪑᪐. ᨾᩃᩈᩩᨲ᩠ᨲᩴ

᪑᪐. ‘‘ᨲᩦᩉᩥ, ᨽᩥᨠ᩠ᨡᩅᩮ, ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨲᨿᩮᩣ ᨾᩃᩮ ᩋᨸ᩠ᨸᩉᩣᨿ ᨿᨳᩣᨽᨲᩴ ᨶᩥᨠ᩠ᨡᩥᨲ᩠ᨲᩮᩣ ᩑᩅᩴ ᨶᩥᩁᨿᩮ. ᨠᨲᨾᩮᩉᩥ ᨲᩦᩉᩥ? ᨴᩩᩔᩦᩃᩮᩣ ᨧ ᩉᩮᩣᨲᩥ, ᨴᩩᩔᩦᩃ᩠ᨿᨾᩃᨬ᩠ᨧᩔ ᩋᨸ᩠ᨸᩉᩦᨶᩴ ᩉᩮᩣᨲᩥ; ᩍᩔᩩᨠᩦ ᨧ ᩉᩮᩣᨲᩥ, ᩍᩔᩣᨾᩃᨬ᩠ᨧᩔ ᩋᨸ᩠ᨸᩉᩦᨶᩴ ᩉᩮᩣᨲᩥ; ᨾᨧ᩠ᨨᩁᩦ ᨧ ᩉᩮᩣᨲᩥ, ᨾᨧ᩠ᨨᩮᩁᨾᩃᨬ᩠ᨧᩔ ᩋᨸ᩠ᨸᩉᩦᨶᩴ ᩉᩮᩣᨲᩥ. ᩍᨾᩮᩉᩥ ᨡᩮᩣ, ᨽᩥᨠ᩠ᨡᩅᩮ, ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᩍᨾᩮ ᨲᨿᩮᩣ ᨾᩃᩮ ᩋᨸ᩠ᨸᩉᩣᨿ ᨿᨳᩣᨽᨲᩴ ᨶᩥᨠ᩠ᨡᩥᨲ᩠ᨲᩮᩣ ᩑᩅᩴ ᨶᩥᩁᨿᩮ.

‘‘ᨲᩦᩉᩥ, ᨽᩥᨠ᩠ᨡᩅᩮ, ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᨲᨿᩮᩣ ᨾᩃᩮ ᨸᩉᩣᨿ ᨿᨳᩣᨽᨲᩴ ᨶᩥᨠ᩠ᨡᩥᨲ᩠ᨲᩮᩣ ᩑᩅᩴ ᩈᨣ᩠ᨣᩮ. ᨠᨲᨾᩮᩉᩥ ᨲᩦᩉᩥ? ᩈᩦᩃᩅᩣ ᨧ ᩉᩮᩣᨲᩥ, ᨴᩩᩔᩦᩃ᩠ᨿᨾᩃᨬ᩠ᨧᩔ ᨸᩉᩦᨶᩴ ᩉᩮᩣᨲᩥ; ᩋᨶᩥᩔᩩᨠᩦ ᨧ ᩉᩮᩣᨲᩥ, ᩍᩔᩣᨾᩃᨬ᩠ᨧᩔ ᨸᩉᩦᨶᩴ ᩉᩮᩣᨲᩥ; ᩋᨾᨧ᩠ᨨᩁᩦ ᨧ ᩉᩮᩣᨲᩥ, ᨾᨧ᩠ᨨᩮᩁᨾᩃᨬ᩠ᨧᩔ ᨸᩉᩦᨶᩴ ᩉᩮᩣᨲᩥ. ᩍᨾᩮᩉᩥ ᨡᩮᩣ, ᨽᩥᨠ᩠ᨡᩅᩮ, ᨲᩦᩉᩥ ᨵᨾ᩠ᨾᩮᩉᩥ ᩈᨾᨶ᩠ᨶᩣᨣᨲᩮᩣ ᩍᨾᩮ ᨲᨿᩮᩣ ᨾᩃᩮ ᨸᩉᩣᨿ ᨿᨳᩣᨽᨲᩴ ᨶᩥᨠ᩠ᨡᩥᨲ᩠ᨲᩮᩣ ᩑᩅᩴ ᩈᨣ᩠ᨣᩮ’’ᨲᩥ. ᨴᩈᨾᩴ.

ᨻᩣᩃᩅᨣ᩠ᨣᩮᩣ ᨸᨮᨾᩮᩣ.