᪒. ᩋᨵᩥᨠᩁᨱᩅᨣ᩠ᨣᩮᩣ

᪑᪑. ‘‘ᨴ᩠ᩅᩮᨾᩣᨶᩥ, ᨽᩥᨠ᩠ᨡᩅᩮ, ᨻᩃᩣᨶᩥ. ᨠᨲᨾᩣᨶᩥ ᨴ᩠ᩅᩮ? ᨸᨭᩥᩈᨦ᩠ᨡᩣᨶᨻᩃᨬ᩠ᨧ ᨽᩣᩅᨶᩣᨻᩃᨬ᩠ᨧ. ᨠᨲᨾᨬ᩠ᨧ, ᨽᩥᨠ᩠ᨡᩅᩮ, ᨸᨭᩥᩈᨦ᩠ᨡᩣᨶᨻᩃᩴ? ᩍᨵ, ᨽᩥᨠ᩠ᨡᩅᩮ, ᩑᨠᨧ᩠ᨧᩮᩣ ᩍᨲᩥ ᨸᨭᩥᩈᨬ᩠ᨧᩥᨠ᩠ᨡᨲᩥ – ‘ᨠᩣᨿᨴᩩᨧ᩠ᨧᩁᩥᨲᩔ ᨡᩮᩣ ᨸᩣᨸᨠᩮᩣ ᩅᩥᨸᩣᨠᩮᩣ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ, ᩅᨧᩦᨴᩩᨧ᩠ᨧᩁᩥᨲᩔ ᨸᩣᨸᨠᩮᩣ ᩅᩥᨸᩣᨠᩮᩣ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ, ᨾᨶᩮᩣᨴᩩᨧ᩠ᨧᩁᩥᨲᩔ ᨸᩣᨸᨠᩮᩣ ᩅᩥᨸᩣᨠᩮᩣ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧᩣ’ᨲᩥ. ᩈᩮᩣ ᩍᨲᩥ ᨸᨭᩥᩈᨦ᩠ᨡᩣᨿ ᨠᩣᨿᨴᩩᨧ᩠ᨧᩁᩥᨲᩴ ᨸᩉᩣᨿ ᨠᩣᨿᩈᩩᨧᩁᩥᨲᩴ ᨽᩣᩅᩮᨲᩥ, ᩅᨧᩦᨴᩩᨧ᩠ᨧᩁᩥᨲᩴ ᨸᩉᩣᨿ ᩅᨧᩦᩈᩩᨧᩁᩥᨲᩴ ᨽᩣᩅᩮᨲᩥ, ᨾᨶᩮᩣᨴᩩᨧ᩠ᨧᩁᩥᨲᩴ ᨸᩉᩣᨿ ᨾᨶᩮᩣᩈᩩᨧᩁᩥᨲᩴ ᨽᩣᩅᩮᨲᩥ, ᩈᩩᨴ᩠ᨵᩴ ᩋᨲ᩠ᨲᩣᨶᩴ ᨸᩁᩥᩉᩁᨲᩥ. ᩍᨴᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨸᨭᩥᩈᨦ᩠ᨡᩣᨶᨻᩃᩴ.

‘‘ᨠᨲᨾᨬ᩠ᨧ, ᨽᩥᨠ᩠ᨡᩅᩮ, ᨽᩣᩅᨶᩣᨻᩃᩴ. ᨲᨲᩕ, ᨽᩥᨠ᩠ᨡᩅᩮ, ᨿᨾᩥᨴᩴ [ᨿᨴᩥᨴᩴ (ᩈᩦ.)] ᨽᩣᩅᨶᩣᨻᩃᩴ ᩈᩮᨡᩣᨶᨾᩮᨲᩴ [ᩈᩮᨡᨾᩮᨲᩴ (ᩈᩦ. ᩈ᩠ᨿᩣ. ᨠᩴ.)] ᨻᩃᩴ. ᩈᩮᨡᨬ᩠ᩉᩥ ᩈᩮᩣ, ᨽᩥᨠ᩠ᨡᩅᩮ, ᨻᩃᩴ ᩌᨣᨾ᩠ᨾ ᩁᩣᨣᩴ ᨸᨩᩉᨲᩥ, ᨴᩮᩣᩈᩴ ᨸᨩᩉᨲᩥ, ᨾᩮᩣᩉᩴ ᨸᨩᩉᨲᩥ. ᩁᩣᨣᩴ ᨸᩉᩣᨿ, ᨴᩮᩣᩈᩴ ᨸᩉᩣᨿ, ᨾᩮᩣᩉᩴ ᨸᩉᩣᨿ ᨿᩴ ᩋᨠᩩᩈᩃᩴ ᨶ ᨲᩴ ᨠᩁᩮᩣᨲᩥ, ᨿᩴ ᨸᩣᨸᩴ ᨶ ᨲᩴ ᩈᩮᩅᨲᩥ. ᩍᨴᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨽᩣᩅᨶᩣᨻᩃᩴ. ᩍᨾᩣᨶᩥ ᨡᩮᩣ, ᨽᩥᨠ᩠ᨡᩅᩮ, ᨴ᩠ᩅᩮ ᨻᩃᩣᨶᩦ’’ᨲᩥ.

᪑᪒. ‘‘ᨴ᩠ᩅᩮᨾᩣᨶᩥ, ᨽᩥᨠ᩠ᨡᩅᩮ, ᨻᩃᩣᨶᩥ. ᨠᨲᨾᩣᨶᩥ ᨴ᩠ᩅᩮ? ᨸᨭᩥᩈᨦ᩠ᨡᩣᨶᨻᩃᨬ᩠ᨧ ᨽᩣᩅᨶᩣᨻᩃᨬ᩠ᨧ. ᨠᨲᨾᨬ᩠ᨧ, ᨽᩥᨠ᩠ᨡᩅᩮ, ᨸᨭᩥᩈᨦ᩠ᨡᩣᨶᨻᩃᩴ? ᩍᨵ, ᨽᩥᨠ᩠ᨡᩅᩮ, ᩑᨠᨧ᩠ᨧᩮᩣ ᩍᨲᩥ ᨸᨭᩥᩈᨬ᩠ᨧᩥᨠ᩠ᨡᨲᩥ – ‘ᨠᩣᨿᨴᩩᨧ᩠ᨧᩁᩥᨲᩔ ᨡᩮᩣ ᨸᩣᨸᨠᩮᩣ ᩅᩥᨸᩣᨠᩮᩣ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ, ᩅᨧᩦᨴᩩᨧ᩠ᨧᩁᩥᨲᩔ ᨸᩣᨸᨠᩮᩣ ᩅᩥᨸᩣᨠᩮᩣ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ, ᨾᨶᩮᩣᨴᩩᨧ᩠ᨧᩁᩥᨲᩔ ᨸᩣᨸᨠᩮᩣ ᩅᩥᨸᩣᨠᩮᩣ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧᩣ’ᨲᩥ. ᩈᩮᩣ ᩍᨲᩥ ᨸᨭᩥᩈᨦ᩠ᨡᩣᨿ ᨠᩣᨿᨴᩩᨧ᩠ᨧᩁᩥᨲᩴ ᨸᩉᩣᨿ ᨠᩣᨿᩈᩩᨧᩁᩥᨲᩴ ᨽᩣᩅᩮᨲᩥ, ᩅᨧᩦᨴᩩᨧ᩠ᨧᩁᩥᨲᩴ ᨸᩉᩣᨿ ᩅᨧᩦᩈᩩᨧᩁᩥᨲᩴ ᨽᩣᩅᩮᨲᩥ, ᨾᨶᩮᩣᨴᩩᨧ᩠ᨧᩁᩥᨲᩴ ᨸᩉᩣᨿ ᨾᨶᩮᩣᩈᩩᨧᩁᩥᨲᩴ ᨽᩣᩅᩮᨲᩥ, ᩈᩩᨴ᩠ᨵᩴ ᩋᨲ᩠ᨲᩣᨶᩴ ᨸᩁᩥᩉᩁᨲᩥ. ᩍᨴᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨸᨭᩥᩈᨦ᩠ᨡᩣᨶᨻᩃᩴ.

‘‘ᨠᨲᨾᨬ᩠ᨧ, ᨽᩥᨠ᩠ᨡᩅᩮ, ᨽᩣᩅᨶᩣᨻᩃᩴ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩈᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᨲᩥ ᩅᩥᩅᩮᨠᨶᩥᩔᩥᨲᩴ ᩅᩥᩁᩣᨣᨶᩥᩔᩥᨲᩴ ᨶᩥᩁᩮᩣᨵᨶᩥᩔᩥᨲᩴ ᩅᩮᩣᩈᨣ᩠ᨣᨸᩁᩥᨱᩣᨾᩥᩴ, ᨵᨾ᩠ᨾᩅᩥᨧᨿᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᨲᩥ… ᩅᩦᩁᩥᨿᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᨲᩥ… ᨸᩦᨲᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᨲᩥ… ᨸᩔᨴ᩠ᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᨲᩥ… ᩈᨾᩣᨵᩥᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᨲᩥ… ᩏᨸᩮᨠ᩠ᨡᩣᩈᨾ᩠ᨻᩮᩣᨩ᩠ᨫᨦ᩠ᨣᩴ ᨽᩣᩅᩮᨲᩥ ᩅᩥᩅᩮᨠᨶᩥᩔᩥᨲᩴ ᩅᩥᩁᩣᨣᨶᩥᩔᩥᨲᩴ ᨶᩥᩁᩮᩣᨵᨶᩥᩔᩥᨲᩴ ᩅᩮᩣᩈᨣ᩠ᨣᨸᩁᩥᨱᩣᨾᩥᩴ. ᩍᨴᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨽᩣᩅᨶᩣᨻᩃᩴ. ᩍᨾᩣᨶᩥ ᨡᩮᩣ, ᨽᩥᨠ᩠ᨡᩅᩮ, ᨴ᩠ᩅᩮ ᨻᩃᩣᨶᩦ’’ᨲᩥ.

᪑᪓. ‘‘ᨴ᩠ᩅᩮᨾᩣᨶᩥ, ᨽᩥᨠ᩠ᨡᩅᩮ, ᨻᩃᩣᨶᩥ. ᨠᨲᨾᩣᨶᩥ ᨴ᩠ᩅᩮ? ᨸᨭᩥᩈᨦ᩠ᨡᩣᨶᨻᩃᨬ᩠ᨧ ᨽᩣᩅᨶᩣᨻᩃᨬ᩠ᨧ. ᨠᨲᨾᨬ᩠ᨧ, ᨽᩥᨠ᩠ᨡᩅᩮ, ᨸᨭᩥᩈᨦ᩠ᨡᩣᨶᨻᩃᩴ? ᩍᨵ, ᨽᩥᨠ᩠ᨡᩅᩮ, ᩑᨠᨧ᩠ᨧᩮᩣ ᩍᨲᩥ ᨸᨭᩥᩈᨬ᩠ᨧᩥᨠ᩠ᨡᨲᩥ – ‘ᨠᩣᨿᨴᩩᨧ᩠ᨧᩁᩥᨲᩔ ᨡᩮᩣ ᨸᩣᨸᨠᩮᩣ ᩅᩥᨸᩣᨠᩮᩣ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ, ᩅᨧᩦᨴᩩᨧ᩠ᨧᩁᩥᨲᩔ ᨡᩮᩣ ᨸᩣᨸᨠᩮᩣ ᩅᩥᨸᩣᨠᩮᩣ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧ, ᨾᨶᩮᩣᨴᩩᨧ᩠ᨧᩁᩥᨲᩔ ᨡᩮᩣ ᨸᩣᨸᨠᩮᩣ ᩅᩥᨸᩣᨠᩮᩣ ᨴᩥᨭ᩠ᨮᩮ ᨧᩮᩅ ᨵᨾ᩠ᨾᩮ ᩋᨽᩥᩈᨾ᩠ᨸᩁᩣᨿᨬ᩠ᨧᩣ’ᨲᩥ. ᩈᩮᩣ ᩍᨲᩥ ᨸᨭᩥᩈᨦ᩠ᨡᩣᨿ ᨠᩣᨿᨴᩩᨧ᩠ᨧᩁᩥᨲᩴ ᨸᩉᩣᨿ ᨠᩣᨿᩈᩩᨧᩁᩥᨲᩴ ᨽᩣᩅᩮᨲᩥ, ᩅᨧᩦᨴᩩᨧ᩠ᨧᩁᩥᨲᩴ ᨸᩉᩣᨿ ᩅᨧᩦᩈᩩᨧᩁᩥᨲᩴ ᨽᩣᩅᩮᨲᩥ, ᨾᨶᩮᩣᨴᩩᨧ᩠ᨧᩁᩥᨲᩴ ᨸᩉᩣᨿ ᨾᨶᩮᩣᩈᩩᨧᩁᩥᨲᩴ ᨽᩣᩅᩮᨲᩥ, ᩈᩩᨴ᩠ᨵᩴ ᩋᨲ᩠ᨲᩣᨶᩴ ᨸᩁᩥᩉᩁᨲᩥ. ᩍᨴᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨸᨭᩥᩈᨦ᩠ᨡᩣᨶᨻᩃᩴ.

‘‘ᨠᨲᨾᨬ᩠ᨧ, ᨽᩥᨠ᩠ᨡᩅᩮ, ᨽᩣᩅᨶᩣᨻᩃᩴ? ᩍᨵ, ᨽᩥᨠ᩠ᨡᩅᩮ, ᨽᩥᨠ᩠ᨡᩩ ᩅᩥᩅᩥᨧ᩠ᨧᩮᩅ ᨠᩣᨾᩮᩉᩥ, ᩅᩥᩅᩥᨧ᩠ᨧ ᩋᨠᩩᩈᩃᩮᩉᩥ ᨵᨾ᩠ᨾᩮᩉᩥ ᩈᩅᩥᨲᨠ᩠ᨠᩴ ᩈᩅᩥᨧᩣᩁᩴ ᩅᩥᩅᩮᨠᨩᩴ ᨸᩦᨲᩥᩈᩩᨡᩴ ᨸᨮᨾᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩅᩥᨲᨠ᩠ᨠᩅᩥᨧᩣᩁᩣᨶᩴ ᩅᩪᨸᩈᨾᩣ ᩋᨩ᩠ᨫᨲ᩠ᨲᩴ ᩈᨾ᩠ᨸᩈᩣᨴᨶᩴ ᨧᩮᨲᩈᩮᩣ ᩑᨠᩮᩣᨴᩥᨽᩣᩅᩴ ᩋᩅᩥᨲᨠ᩠ᨠᩴ ᩋᩅᩥᨧᩣᩁᩴ ᩈᨾᩣᨵᩥᨩᩴ ᨸᩦᨲᩥᩈᩩᨡᩴ ᨴᩩᨲᩥᨿᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᨸᩦᨲᩥᨿᩣ ᨧ ᩅᩥᩁᩣᨣᩣ ᩏᨸᩮᨠ᩠ᨡᨠᩮᩣ ᨧ ᩅᩥᩉᩁᨲᩥ ᩈᨲᩮᩣ ᨧ ᩈᨾ᩠ᨸᨩᩣᨶᩮᩣ, ᩈᩩᨡᨬ᩠ᨧ ᨠᩣᨿᩮᨶ ᨸᨭᩥᩈᩴᩅᩮᨴᩮᨲᩥ, ᨿᩴ ᨲᩴ ᩋᩁᩥᨿᩣ ᩌᨧᩥᨠ᩠ᨡᨶ᩠ᨲᩥ – ‘ᩏᨸᩮᨠ᩠ᨡᨠᩮᩣ ᩈᨲᩥᨾᩣ ᩈᩩᨡᩅᩥᩉᩣᩁᩦ’ᨲᩥ ᨲᨲᩥᨿᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩈᩩᨡᩔ ᨧ ᨸᩉᩣᨶᩣ ᨴᩩᨠ᩠ᨡᩔ ᨧ ᨸᩉᩣᨶᩣ ᨸᩩᨻ᩠ᨻᩮᩅ ᩈᩮᩣᨾᨶᩔᨴᩮᩣᨾᨶᩔᩣᨶᩴ ᩋᨲ᩠ᨳᨦ᩠ᨣᨾᩣ ᩋᨴᩩᨠ᩠ᨡᨾᩈᩩᨡᩴ ᩏᨸᩮᨠ᩠ᨡᩣᩈᨲᩥᨸᩣᩁᩥᩈᩩᨴ᩠ᨵᩥᩴ ᨧᨲᩩᨲ᩠ᨳᩴ ᨫᩣᨶᩴ ᩏᨸᩈᨾ᩠ᨸᨩ᩠ᨩ ᩅᩥᩉᩁᨲᩥ. ᩍᨴᩴ ᩅᩩᨧ᩠ᨧᨲᩥ, ᨽᩥᨠ᩠ᨡᩅᩮ, ᨽᩣᩅᨶᩣᨻᩃᩴ. ᩍᨾᩣᨶᩥ ᨡᩮᩣ, ᨽᩥᨠ᩠ᨡᩅᩮ, ᨴ᩠ᩅᩮ ᨻᩃᩣᨶᩦ’’ᨲᩥ.

᪑᪔. ‘‘ᨴ᩠ᩅᩮᨾᩣ, ᨽᩥᨠ᩠ᨡᩅᩮ, ᨲᨳᩣᨣᨲᩔ ᨵᨾ᩠ᨾᨴᩮᩈᨶᩣ. ᨠᨲᨾᩣ ᨴ᩠ᩅᩮ? ᩈᩴᨡᩥᨲ᩠ᨲᩮᨶ ᨧ ᩅᩥᨲ᩠ᨳᩣᩁᩮᨶ ᨧ. ᩍᨾᩣ ᨡᩮᩣ, ᨽᩥᨠ᩠ᨡᩅᩮ, ᨴ᩠ᩅᩮ ᨲᨳᩣᨣᨲᩔ ᨵᨾ᩠ᨾᨴᩮᩈᨶᩣ’’ᨲᩥ.

᪑᪕. ‘‘ᨿᩈ᩠ᨾᩥᩴ, ᨽᩥᨠ᩠ᨡᩅᩮ, ᩋᨵᩥᨠᩁᨱᩮ ᩌᨸᨶ᩠ᨶᩮᩣ [ᩌᨸᨲ᩠ᨲᩣᨸᨶ᩠ᨶᩮᩣ (ᨠ.)] ᨧ ᨽᩥᨠ᩠ᨡᩩ ᨧᩮᩣᨴᨠᩮᩣ ᨧ ᨽᩥᨠ᩠ᨡᩩ ᨶ ᩈᩣᨵᩩᨠᩴ ᩋᨲ᩠ᨲᨶᩣᩅ ᩋᨲ᩠ᨲᩣᨶᩴ ᨸᨧ᩠ᨧᩅᩮᨠ᩠ᨡᨲᩥ ᨲᩈ᩠ᨾᩮᨲᩴ, ᨽᩥᨠ᩠ᨡᩅᩮ, ᩋᨵᩥᨠᩁᨱᩮ ᨸᩣᨭᩥᨠᨦ᩠ᨡᩴ ᨴᩦᨥᨲ᩠ᨲᩣᨿ ᨡᩁᨲ᩠ᨲᩣᨿ ᩅᩣᩊᨲ᩠ᨲᩣᨿ ᩈᩴᩅᨲ᩠ᨲᩥᩔᨲᩥ, ᨽᩥᨠ᩠ᨡᩪ ᨧ ᨶ ᨹᩣᩈᩩᩴ [ᨶ ᨹᩣᩈᩩ (ᨠ.)] ᩅᩥᩉᩁᩥᩔᨶ᩠ᨲᩦᨲᩥ [ᩅᩥᩉᩁᩥᩔᨶ᩠ᨲᩥ (ᩈᩦ. ᩈ᩠ᨿᩣ. ᨠᩴ. ᨠ.)]. ᨿᩈ᩠ᨾᩥᨬ᩠ᨧ ᨡᩮᩣ, ᨽᩥᨠ᩠ᨡᩅᩮ, ᩋᨵᩥᨠᩁᨱᩮ ᩌᨸᨶ᩠ᨶᩮᩣ ᨧ ᨽᩥᨠ᩠ᨡᩩ ᨧᩮᩣᨴᨠᩮᩣ ᨧ ᨽᩥᨠ᩠ᨡᩩ ᩈᩣᨵᩩᨠᩴ ᩋᨲ᩠ᨲᨶᩣᩅ ᩋᨲ᩠ᨲᩣᨶᩴ ᨸᨧ᩠ᨧᩅᩮᨠ᩠ᨡᨲᩥ ᨲᩈ᩠ᨾᩮᨲᩴ, ᨽᩥᨠ᩠ᨡᩅᩮ, ᩋᨵᩥᨠᩁᨱᩮ ᨸᩣᨭᩥᨠᨦ᩠ᨡᩴ ᨶ ᨴᩦᨥᨲ᩠ᨲᩣᨿ ᨡᩁᨲ᩠ᨲᩣᨿ ᩅᩣᩊᨲ᩠ᨲᩣᨿ ᩈᩴᩅᨲ᩠ᨲᩥᩔᨲᩥ, ᨽᩥᨠ᩠ᨡᩪ ᨧ ᨹᩣᩈᩩᩴ ᩅᩥᩉᩁᩥᩔᨶ᩠ᨲᩦᨲᩥ.

‘‘ᨠᨳᨬ᩠ᨧ, ᨽᩥᨠ᩠ᨡᩅᩮ, ᩌᨸᨶ᩠ᨶᩮᩣ ᨽᩥᨠ᩠ᨡᩩ ᩈᩣᨵᩩᨠᩴ ᩋᨲ᩠ᨲᨶᩣᩅ ᩋᨲ᩠ᨲᩣᨶᩴ ᨸᨧ᩠ᨧᩅᩮᨠ᩠ᨡᨲᩥ? ᩍᨵ, ᨽᩥᨠ᩠ᨡᩅᩮ, ᩌᨸᨶ᩠ᨶᩮᩣ ᨽᩥᨠ᩠ᨡᩩ ᩍᨲᩥ ᨸᨭᩥᩈᨬ᩠ᨧᩥᨠ᩠ᨡᨲᩥ – ‘ᩋᩉᩴ ᨡᩮᩣ ᩋᨠᩩᩈᩃᩴ ᩌᨸᨶ᩠ᨶᩮᩣ ᨠᨬ᩠ᨧᩥᨴᩮᩅ [ᨠᩥᨬ᩠ᨧᩥᨴᩮᩅ (ᨠ.)] ᨴᩮᩈᩴ ᨠᩣᨿᩮᨶ. ᨾᩴ ᩈᩮᩣ [ᨲᩈ᩠ᨾᩣ ᨾᩴ ᩈᩮᩣ (ᩈᩦ. ᩈ᩠ᨿᩣ.)] ᨽᩥᨠ᩠ᨡᩩ ᩋᨴ᩠ᨴᩈ ᩋᨠᩩᩈᩃᩴ ᩌᨸᨩ᩠ᨩᨾᩣᨶᩴ ᨠᩥᨬ᩠ᨧᩥᨴᩮᩅ ᨴᩮᩈᩴ ᨠᩣᨿᩮᨶ. ᨶᩮᩣ ᨧᩮ ᩋᩉᩴ ᩋᨠᩩᩈᩃᩴ ᩌᨸᨩ᩠ᨩᩮᨿ᩠ᨿᩴ ᨠᩥᨬ᩠ᨧᩥᨴᩮᩅ ᨴᩮᩈᩴ ᨠᩣᨿᩮᨶ, ᨶ ᨾᩴ ᩈᩮᩣ ᨽᩥᨠ᩠ᨡᩩ ᨸᩔᩮᨿ᩠ᨿ ᩋᨠᩩᩈᩃᩴ ᩌᨸᨩ᩠ᨩᨾᩣᨶᩴ ᨠᩥᨬ᩠ᨧᩥᨴᩮᩅ ᨴᩮᩈᩴ ᨠᩣᨿᩮᨶ. ᨿᩈ᩠ᨾᩣ ᨧ ᨡᩮᩣ, ᩋᩉᩴ ᩋᨠᩩᩈᩃᩴ ᩌᨸᨶ᩠ᨶᩮᩣ ᨠᩥᨬ᩠ᨧᩥᨴᩮᩅ ᨴᩮᩈᩴ ᨠᩣᨿᩮᨶ, ᨲᩈ᩠ᨾᩣ ᨾᩴ ᩈᩮᩣ ᨽᩥᨠ᩠ᨡᩩ ᩋᨴ᩠ᨴᩈ ᩋᨠᩩᩈᩃᩴ ᩌᨸᨩ᩠ᨩᨾᩣᨶᩴ ᨠᩥᨬ᩠ᨧᩥᨴᩮᩅ ᨴᩮᩈᩴ ᨠᩣᨿᩮᨶ. ᨴᩥᩈ᩠ᩅᩣ ᨧ ᨸᨶ ᨾᩴ ᩈᩮᩣ ᨽᩥᨠ᩠ᨡᩩ ᩋᨠᩩᩈᩃᩴ ᩌᨸᨩ᩠ᨩᨾᩣᨶᩴ ᨠᩥᨬ᩠ᨧᩥᨴᩮᩅ ᨴᩮᩈᩴ ᨠᩣᨿᩮᨶ ᩋᨶᨲ᩠ᨲᨾᨶᩮᩣ ᩋᩉᩮᩣᩈᩥ. ᩋᨶᨲ᩠ᨲᨾᨶᩮᩣ ᩈᨾᩣᨶᩮᩣ ᩋᨶᨲ᩠ᨲᨾᨶᩅᨧᨶᩴ [ᩋᨶᨲ᩠ᨲᨾᨶᩅᩣᨧᩴ (ᨠ.)] ᨾᩴ ᩈᩮᩣ ᨽᩥᨠ᩠ᨡᩩ ᩋᩅᨧ. ᩋᨶᨲ᩠ᨲᨾᨶᩅᨧᨶᩣᩉᩴ [ᩋᨶᨲ᩠ᨲᨾᨶᩅᩣᨧᩴ ᨶᩣᩉᩴ (ᨠ.)] ᨲᩮᨶ ᨽᩥᨠ᩠ᨡᩩᨶᩣ ᩅᩩᨲ᩠ᨲᩮᩣ ᩈᨾᩣᨶᩮᩣ ᩋᨶᨲ᩠ᨲᨾᨶᩮᩣ [ᩋᨲ᩠ᨲᨾᨶᩮᩣ (ᨠ.)] ᩋᩉᩮᩣᩈᩥᩴ. ᩋᨶᨲ᩠ᨲᨾᨶᩮᩣ ᩈᨾᩣᨶᩮᩣ ᨸᩁᩮᩈᩴ ᩌᩁᩮᩣᨧᩮᩈᩥᩴ. ᩍᨲᩥ ᨾᨾᩮᩅ ᨲᨲ᩠ᨳ ᩋᨧ᩠ᨧᨿᩮᩣ ᩋᨧ᩠ᨧᨣᨾᩣ ᩈᩩᨦ᩠ᨠᨴᩣᨿᨠᩴᩅ ᨽᨱ᩠ᨯᩈ᩠ᨾᩥᨶ᩠ᨲᩥ. ᩑᩅᩴ ᨡᩮᩣ, ᨽᩥᨠ᩠ᨡᩅᩮ, ᩌᨸᨶ᩠ᨶᩮᩣ ᨽᩥᨠ᩠ᨡᩩ ᩈᩣᨵᩩᨠᩴ ᩋᨲ᩠ᨲᨶᩣᩅ ᩋᨲ᩠ᨲᩣᨶᩴ ᨸᨧ᩠ᨧᩅᩮᨠ᩠ᨡᨲᩥ.

‘‘ᨠᨳᨬ᩠ᨧ, ᨽᩥᨠ᩠ᨡᩅᩮ, ᨧᩮᩣᨴᨠᩮᩣ ᨽᩥᨠ᩠ᨡᩩ ᩈᩣᨵᩩᨠᩴ ᩋᨲ᩠ᨲᨶᩣᩅ ᩋᨲ᩠ᨲᩣᨶᩴ ᨸᨧ᩠ᨧᩅᩮᨠ᩠ᨡᨲᩥ? ᩍᨵ, ᨽᩥᨠ᩠ᨡᩅᩮ, ᨧᩮᩣᨴᨠᩮᩣ ᨽᩥᨠ᩠ᨡᩩ ᩍᨲᩥ ᨸᨭᩥᩈᨬ᩠ᨧᩥᨠ᩠ᨡᨲᩥ – ‘ᩋᨿᩴ ᨡᩮᩣ ᨽᩥᨠ᩠ᨡᩩ ᩋᨠᩩᩈᩃᩴ ᩌᨸᨶ᩠ᨶᩮᩣ ᨠᩥᨬ᩠ᨧᩥᨴᩮᩅ ᨴᩮᩈᩴ ᨠᩣᨿᩮᨶ. ᩋᩉᩴ ᩍᨾᩴ ᨽᩥᨠ᩠ᨡᩩᩴ ᩋᨴ᩠ᨴᩈᩴ ᩋᨠᩩᩈᩃᩴ ᩌᨸᨩ᩠ᨩᨾᩣᨶᩴ ᨠᩥᨬ᩠ᨧᩥᨴᩮᩅ ᨴᩮᩈᩴ ᨠᩣᨿᩮᨶ. ᨶᩮᩣ ᨧᩮ ᩋᨿᩴ ᨽᩥᨠ᩠ᨡᩩ ᩋᨠᩩᩈᩃᩴ ᩌᨸᨩ᩠ᨩᩮᨿ᩠ᨿ ᨠᩥᨬ᩠ᨧᩥᨴᩮᩅ ᨴᩮᩈᩴ ᨠᩣᨿᩮᨶ, ᨶᩣᩉᩴ ᩍᨾᩴ ᨽᩥᨠ᩠ᨡᩩᩴ ᨸᩔᩮᨿ᩠ᨿᩴ ᩋᨠᩩᩈᩃᩴ ᩌᨸᨩ᩠ᨩᨾᩣᨶᩴ ᨠᩥᨬ᩠ᨧᩥᨴᩮᩅ ᨴᩮᩈᩴ ᨠᩣᨿᩮᨶ. ᨿᩈ᩠ᨾᩣ ᨧ ᨡᩮᩣ, ᩋᨿᩴ ᨽᩥᨠ᩠ᨡᩩ ᩋᨠᩩᩈᩃᩴ ᩌᨸᨶ᩠ᨶᩮᩣ ᨠᩥᨬ᩠ᨧᩥᨴᩮᩅ ᨴᩮᩈᩴ ᨠᩣᨿᩮᨶ, ᨲᩈ᩠ᨾᩣ ᩋᩉᩴ ᩍᨾᩴ ᨽᩥᨠ᩠ᨡᩩᩴ ᩋᨴ᩠ᨴᩈᩴ ᩋᨠᩩᩈᩃᩴ ᩌᨸᨩ᩠ᨩᨾᩣᨶᩴ ᨠᩥᨬ᩠ᨧᩥᨴᩮᩅ ᨴᩮᩈᩴ ᨠᩣᨿᩮᨶ. ᨴᩥᩈ᩠ᩅᩣ ᨧ ᨸᨶᩣᩉᩴ ᩍᨾᩴ ᨽᩥᨠ᩠ᨡᩩᩴ ᩋᨠᩩᩈᩃᩴ ᩌᨸᨩ᩠ᨩᨾᩣᨶᩴ ᨠᩥᨬ᩠ᨧᩥᨴᩮᩅ ᨴᩮᩈᩴ ᨠᩣᨿᩮᨶ ᩋᨶᨲ᩠ᨲᨾᨶᩮᩣ ᩋᩉᩮᩣᩈᩥᩴ. ᩋᨶᨲ᩠ᨲᨾᨶᩮᩣ ᩈᨾᩣᨶᩮᩣ ᩋᨶᨲ᩠ᨲᨾᨶᩅᨧᨶᩣᩉᩴ ᩍᨾᩴ ᨽᩥᨠ᩠ᨡᩩᩴ ᩋᩅᨧᩴ. ᩋᨶᨲ᩠ᨲᨾᨶᩅᨧᨶᩣᨿᩴ ᨽᩥᨠ᩠ᨡᩩ ᨾᨿᩣ ᩅᩩᨲ᩠ᨲᩮᩣ ᩈᨾᩣᨶᩮᩣ ᩋᨶᨲ᩠ᨲᨾᨶᩮᩣ ᩋᩉᩮᩣᩈᩥ. ᩋᨶᨲ᩠ᨲᨾᨶᩮᩣ ᩈᨾᩣᨶᩮᩣ ᨸᩁᩮᩈᩴ ᩌᩁᩮᩣᨧᩮᩈᩥ. ᩍᨲᩥ ᨾᨾᩮᩅ ᨲᨲ᩠ᨳ ᩋᨧ᩠ᨧᨿᩮᩣ ᩋᨧ᩠ᨧᨣᨾᩣ ᩈᩩᨦ᩠ᨠᨴᩣᨿᨠᩴᩅ ᨽᨱ᩠ᨯᩈ᩠ᨾᩥᨶ᩠ᨲᩥ. ᩑᩅᩴ ᨡᩮᩣ, ᨽᩥᨠ᩠ᨡᩅᩮ, ᨧᩮᩣᨴᨠᩮᩣ ᨽᩥᨠ᩠ᨡᩩ ᩈᩣᨵᩩᨠᩴ ᩋᨲ᩠ᨲᨶᩣᩅ ᩋᨲ᩠ᨲᩣᨶᩴ ᨸᨧ᩠ᨧᩅᩮᨠ᩠ᨡᨲᩥ.

‘‘ᨿᩈ᩠ᨾᩥᩴ, ᨽᩥᨠ᩠ᨡᩅᩮ, ᩋᨵᩥᨠᩁᨱᩮ ᩌᨸᨶ᩠ᨶᩮᩣ ᨧ ᨽᩥᨠ᩠ᨡᩩ ᨧᩮᩣᨴᨠᩮᩣ ᨧ ᨽᩥᨠ᩠ᨡᩩ ᨶ ᩈᩣᨵᩩᨠᩴ ᩋᨲ᩠ᨲᨶᩣᩅ ᩋᨲ᩠ᨲᩣᨶᩴ ᨸᨧ᩠ᨧᩅᩮᨠ᩠ᨡᨲᩥ ᨲᩈ᩠ᨾᩮᨲᩴ, ᨽᩥᨠ᩠ᨡᩅᩮ, ᩋᨵᩥᨠᩁᨱᩮ ᨸᩣᨭᩥᨠᨦ᩠ᨡᩴ ᨴᩦᨥᨲ᩠ᨲᩣᨿ ᨡᩁᨲ᩠ᨲᩣᨿ ᩅᩣᩊᨲ᩠ᨲᩣᨿ ᩈᩴᩅᨲ᩠ᨲᩥᩔᨲᩥ, ᨽᩥᨠ᩠ᨡᩪ ᨧ ᨶ ᨹᩣᩈᩩᩴ ᩅᩥᩉᩁᩥᩔᨶ᩠ᨲᩦᨲᩥ. ᨿᩈ᩠ᨾᩥᨬ᩠ᨧ ᨡᩮᩣ, ᨽᩥᨠ᩠ᨡᩅᩮ, ᩋᨵᩥᨠᩁᨱᩮ ᩌᨸᨶ᩠ᨶᩮᩣ ᨧ ᨽᩥᨠ᩠ᨡᩩ ᨧᩮᩣᨴᨠᩮᩣ ᨧ ᨽᩥᨠ᩠ᨡᩩ ᩈᩣᨵᩩᨠᩴ ᩋᨲ᩠ᨲᨶᩣᩅ ᩋᨲ᩠ᨲᩣᨶᩴ ᨸᨧ᩠ᨧᩅᩮᨠ᩠ᨡᨲᩥ ᨲᩈ᩠ᨾᩮᨲᩴ, ᨽᩥᨠ᩠ᨡᩅᩮ, ᩋᨵᩥᨠᩁᨱᩮ ᨸᩣᨭᩥᨠᨦ᩠ᨡᩴ ᨶ ᨴᩦᨥᨲ᩠ᨲᩣᨿ ᨡᩁᨲ᩠ᨲᩣᨿ ᩅᩣᩊᨲ᩠ᨲᩣᨿ ᩈᩴᩅᨲ᩠ᨲᩥᩔᨲᩥ, ᨽᩥᨠ᩠ᨡᩪ ᨧ ᨹᩣᩈᩩ ᩅᩥᩉᩁᩥᩔᨶ᩠ᨲᩦ’’ᨲᩥ.

᪑᪖. ᩋᨳ ᨡᩮᩣ ᩋᨬ᩠ᨬᨲᩁᩮᩣ ᨻᩕᩣᩉ᩠ᨾᨱᩮᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨲᩣ ᩈᨴ᩠ᨵᩥᩴ ᩈᨾ᩠ᨾᩮᩣᨴᩥ. ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᩈᩮᩣ ᨻᩕᩣᩉ᩠ᨾᨱᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᨠᩮᩣ ᨶᩩ ᨡᩮᩣ, ᨽᩮᩣ ᨣᩮᩣᨲᨾ, ᩉᩮᨲᩩ ᨠᩮᩣ ᨸᨧ᩠ᨧᨿᩮᩣ ᨿᩮᨶ ᨾᩥᨵᩮᨠᨧ᩠ᨧᩮ ᩈᨲ᩠ᨲᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᨶ᩠ᨲᩦ’’ᨲᩥ? ‘‘ᩋᨵᨾ᩠ᨾᨧᩁᩥᨿᩣᩅᩥᩈᨾᨧᩁᩥᨿᩣᩉᩮᨲᩩ ᨡᩮᩣ, ᨻᩕᩣᩉ᩠ᨾᨱ, ᩑᩅᨾᩥᨵᩮᨠᨧ᩠ᨧᩮ ᩈᨲ᩠ᨲᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᨶ᩠ᨲᩦ’’ᨲᩥ.

‘‘ᨠᩮᩣ ᨶᩩ ᨡᩮᩣ, ᨽᩮᩣ ᨣᩮᩣᨲᨾ, ᩉᩮᨲᩩ ᨠᩮᩣ ᨸᨧ᩠ᨧᨿᩮᩣ ᨿᩮᨶ ᨾᩥᨵᩮᨠᨧ᩠ᨧᩮ ᩈᨲ᩠ᨲᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨶ᩠ᨲᩦ’’ᨲᩥ? ‘‘ᨵᨾ᩠ᨾᨧᩁᩥᨿᩣᩈᨾᨧᩁᩥᨿᩣᩉᩮᨲᩩ ᨡᩮᩣ, ᨻᩕᩣᩉ᩠ᨾᨱ, ᩑᩅᨾᩥᨵᩮᨠᨧ᩠ᨧᩮ ᩈᨲ᩠ᨲᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨶ᩠ᨲᩦ’’ᨲᩥ.

‘‘ᩋᨽᩥᨠ᩠ᨠᨶ᩠ᨲᩴ, ᨽᩮᩣ ᨣᩮᩣᨲᨾ! ᩋᨽᩥᨠ᩠ᨠᨶ᩠ᨲᩴ, ᨽᩮᩣ ᨣᩮᩣᨲᨾ! ᩈᩮᨿ᩠ᨿᨳᩣᨸᩥ, ᨽᩮᩣ ᨣᩮᩣᨲᨾ, ᨶᩥᨠ᩠ᨠᩩᨩ᩠ᨩᩥᨲᩴ [ᨶᩥᨠᩩᨩ᩠ᨩᩥᨲᩴ (ᨠ.)] ᩅᩣ ᩏᨠ᩠ᨠᩩᨩ᩠ᨩᩮᨿ᩠ᨿ, ᨸᨭᩥᨧ᩠ᨨᨶ᩠ᨶᩴ ᩅᩣ ᩅᩥᩅᩁᩮᨿ᩠ᨿ, ᨾᩪᩊ᩠ᩉᩔ ᩅᩣ ᨾᨣ᩠ᨣᩴ ᩌᨧᩥᨠ᩠ᨡᩮᨿ᩠ᨿ, ᩋᨶ᩠ᨵᨠᩣᩁᩮ ᩅᩣ ᨲᩮᩃᨸᨩ᩠ᨩᩮᩣᨲᩴ ᨵᩣᩁᩮᨿ᩠ᨿ – ‘ᨧᨠ᩠ᨡᩩᨾᨶ᩠ᨲᩮᩣ ᩁᩪᨸᩣᨶᩥ ᨴᨠ᩠ᨡᨶ᩠ᨲᩦ’ᨲᩥ, ᩑᩅᨾᩮᩅᩴ ᨽᩮᩣᨲᩣ ᨣᩮᩣᨲᨾᩮᨶ ᩋᨶᩮᨠᨸᩁᩥᨿᩣᨿᩮᨶ ᨵᨾ᩠ᨾᩮᩣ ᨸᨠᩣᩈᩥᨲᩮᩣ. ᩑᩈᩣᩉᩴ ᨽᩅᨶ᩠ᨲᩴ ᨣᩮᩣᨲᨾᩴ ᩈᩁᨱᩴ ᨣᨧ᩠ᨨᩣᨾᩥ ᨵᨾ᩠ᨾᨬ᩠ᨧ ᨽᩥᨠ᩠ᨡᩩᩈᨦ᩠ᨥᨬ᩠ᨧ. ᩏᨸᩣᩈᨠᩴ ᨾᩴ ᨽᩅᩴ ᨣᩮᩣᨲᨾᩮᩣ ᨵᩣᩁᩮᨲᩩ ᩋᨩ᩠ᨩᨲᨣ᩠ᨣᩮ ᨸᩣᨱᩩᨸᩮᨲᩴ ᩈᩁᨱᩴ ᨣᨲ’’ᨶ᩠ᨲᩥ.

᪑᪗. ᩋᨳ ᨡᩮᩣ ᨩᩣᨱᩩᩔᩮᩣᨱᩥ [ᨩᩣᨱᩩᩈᩮᩣᨱᩥ (ᨠ.)] ᨻᩕᩣᩉ᩠ᨾᨱᩮᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨲᩣ ᩈᨴ᩠ᨵᩥᩴ ᩈᨾ᩠ᨾᩮᩣᨴᩥ. ᩈᨾ᩠ᨾᩮᩣᨴᨶᩦᨿᩴ ᨠᨳᩴ ᩈᩣᩁᨱᩦᨿᩴ ᩅᩦᨲᩥᩈᩣᩁᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩮᩣ ᨡᩮᩣ ᨩᩣᨱᩩᩔᩮᩣᨱᩥ ᨻᩕᩣᩉ᩠ᨾᨱᩮᩣ ᨽᨣᩅᨶ᩠ᨲᩴ ᩑᨲᨴᩅᩮᩣᨧ – ‘‘ᨠᩮᩣ ᨶᩩ ᨡᩮᩣ, ᨽᩮᩣ ᨣᩮᩣᨲᨾ, ᩉᩮᨲᩩ ᨠᩮᩣ ᨸᨧ᩠ᨧᨿᩮᩣ ᨿᩮᨶ ᨾᩥᨵᩮᨠᨧ᩠ᨧᩮ ᩈᨲ᩠ᨲᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᨶ᩠ᨲᩦ’’ᨲᩥ? ‘‘ᨠᨲᨲ᩠ᨲᩣ ᨧ, ᨻᩕᩣᩉ᩠ᨾᨱ, ᩋᨠᨲᨲ᩠ᨲᩣ ᨧ. ᩑᩅᨾᩥᨵᩮᨠᨧ᩠ᨧᩮ ᩈᨲ᩠ᨲᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᨶ᩠ᨲᩦ’’ᨲᩥ. ‘‘ᨠᩮᩣ ᨸᨶ, ᨽᩮᩣ ᨣᩮᩣᨲᨾ, ᩉᩮᨲᩩ ᨠᩮᩣ ᨸᨧ᩠ᨧᨿᩮᩣ ᨿᩮᨶ ᨾᩥᨵᩮᨠᨧ᩠ᨧᩮ ᩈᨲ᩠ᨲᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨶ᩠ᨲᩦ’’ᨲᩥ? ‘‘ᨠᨲᨲ᩠ᨲᩣ ᨧ, ᨻᩕᩣᩉ᩠ᨾᨱ, ᩋᨠᨲᨲ᩠ᨲᩣ ᨧ. ᩑᩅᨾᩥᨵᩮᨠᨧ᩠ᨧᩮ ᩈᨲ᩠ᨲᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨶ᩠ᨲᩦ’’ᨲᩥ. ‘‘ᨶ ᨡᩮᩣ ᩋᩉᩴ ᩍᨾᩔ ᨽᩮᩣᨲᩮᩣ ᨣᩮᩣᨲᨾᩔ ᩈᩴᨡᩥᨲ᩠ᨲᩮᨶ ᨽᩣᩈᩥᨲᩔ ᩅᩥᨲ᩠ᨳᩣᩁᩮᨶ ᩋᨲ᩠ᨳᩴ ᩋᩅᩥᨽᨲ᩠ᨲᩔ ᩅᩥᨲ᩠ᨳᩣᩁᩮᨶ ᩋᨲ᩠ᨳᩴ ᩌᨩᩣᨶᩣᨾᩥ. ᩈᩣᨵᩩ ᨾᩮ ᨽᩅᩴ ᨣᩮᩣᨲᨾᩮᩣ ᨲᨳᩣ ᨵᨾ᩠ᨾᩴ ᨴᩮᩈᩮᨲᩩ ᨿᨳᩣ ᩋᩉᩴ ᩍᨾᩔ ᨽᩮᩣᨲᩮᩣ ᨣᩮᩣᨲᨾᩔ ᩈᩴᨡᩥᨲ᩠ᨲᩮᨶ ᨽᩣᩈᩥᨲᩔ ᩅᩥᨲ᩠ᨳᩣᩁᩮᨶ ᩋᨲ᩠ᨳᩴ ᩋᩅᩥᨽᨲ᩠ᨲᩔ ᩅᩥᨲ᩠ᨳᩣᩁᩮᨶ ᩋᨲ᩠ᨳᩴ ᩌᨩᩣᨶᩮᨿ᩠ᨿ’’ᨶ᩠ᨲᩥ. ‘‘ᨲᩮᨶ ᩉᩥ, ᨻᩕᩣᩉ᩠ᨾᨱ, ᩈᩩᨱᩣᩉᩥ, ᩈᩣᨵᩩᨠᩴ ᨾᨶᩈᩥ ᨠᩁᩮᩣᩉᩥ; ᨽᩣᩈᩥᩔᩣᨾᩦ’’ᨲᩥ. ‘‘ᩑᩅᩴ ᨽᩮᩣ’’ᨲᩥ ᨡᩮᩣ ᨩᩣᨱᩩᩔᩮᩣᨱᩥ ᨻᩕᩣᩉ᩠ᨾᨱᩮᩣ ᨽᨣᩅᨲᩮᩣ ᨸᨧ᩠ᨧᩔᩮᩣᩈᩥ. ᨽᨣᩅᩣ ᩑᨲᨴᩅᩮᩣᨧ –

‘‘ᩍᨵ, ᨻᩕᩣᩉ᩠ᨾᨱ, ᩑᨠᨧ᩠ᨧᩔ ᨠᩣᨿᨴᩩᨧ᩠ᨧᩁᩥᨲᩴ ᨠᨲᩴ ᩉᩮᩣᨲᩥ, ᩋᨠᨲᩴ ᩉᩮᩣᨲᩥ ᨠᩣᨿᩈᩩᨧᩁᩥᨲᩴ; ᩅᨧᩦᨴᩩᨧ᩠ᨧᩁᩥᨲᩴ ᨠᨲᩴ ᩉᩮᩣᨲᩥ, ᩋᨠᨲᩴ ᩉᩮᩣᨲᩥ ᩅᨧᩦᩈᩩᨧᩁᩥᨲᩴ; ᨾᨶᩮᩣᨴᩩᨧ᩠ᨧᩁᩥᨲᩴ ᨠᨲᩴ ᩉᩮᩣᨲᩥ, ᩋᨠᨲᩴ ᩉᩮᩣᨲᩥ ᨾᨶᩮᩣᩈᩩᨧᩁᩥᨲᩴ. ᩑᩅᩴ ᨡᩮᩣ, ᨻᩕᩣᩉ᩠ᨾᨱ, ᨠᨲᨲ᩠ᨲᩣ ᨧ ᩋᨠᨲᨲ᩠ᨲᩣ ᨧ ᩑᩅᨾᩥᨵᩮᨠᨧ᩠ᨧᩮ ᩈᨲ᩠ᨲᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᨶ᩠ᨲᩥ. ᩍᨵ ᨸᨶ, ᨻᩕᩣᩉ᩠ᨾᨱ, ᩑᨠᨧ᩠ᨧᩔ ᨠᩣᨿᩈᩩᨧᩁᩥᨲᩴ ᨠᨲᩴ ᩉᩮᩣᨲᩥ, ᩋᨠᨲᩴ ᩉᩮᩣᨲᩥ ᨠᩣᨿᨴᩩᨧ᩠ᨧᩁᩥᨲᩴ; ᩅᨧᩦᩈᩩᨧᩁᩥᨲᩴ ᨠᨲᩴ ᩉᩮᩣᨲᩥ, ᩋᨠᨲᩴ ᩉᩮᩣᨲᩥ ᩅᨧᩦᨴᩩᨧ᩠ᨧᩁᩥᨲᩴ; ᨾᨶᩮᩣᩈᩩᨧᩁᩥᨲᩴ ᨠᨲᩴ ᩉᩮᩣᨲᩥ, ᩋᨠᨲᩴ ᩉᩮᩣᨲᩥ ᨾᨶᩮᩣᨴᩩᨧ᩠ᨧᩁᩥᨲᩴ. ᩑᩅᩴ ᨡᩮᩣ, ᨻᩕᩣᩉ᩠ᨾᨱ, ᨠᨲᨲ᩠ᨲᩣ ᨧ ᩋᨠᨲᨲ᩠ᨲᩣ ᨧ ᩑᩅᨾᩥᨵᩮᨠᨧ᩠ᨧᩮ ᩈᨲ᩠ᨲᩣ ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨶ᩠ᨲᩦ’’ᨲᩥ.

‘‘ᩋᨽᩥᨠ᩠ᨠᨶ᩠ᨲᩴ, ᨽᩮᩣ ᨣᩮᩣᨲᨾ…ᨸᩮ… ᩏᨸᩣᩈᨠᩴ ᨾᩴ ᨽᩅᩴ ᨣᩮᩣᨲᨾᩮᩣ ᨵᩣᩁᩮᨲᩩ ᩋᨩ᩠ᨩᨲᨣ᩠ᨣᩮ ᨸᩣᨱᩩᨸᩮᨲᩴ ᩈᩁᨱᩴ ᨣᨲ’’ᨶ᩠ᨲᩥ.

᪑᪘. ᩋᨳ ᨡᩮᩣ ᩌᨿᩈ᩠ᨾᩣ ᩌᨶᨶ᩠ᨴᩮᩣ ᨿᩮᨶ ᨽᨣᩅᩣ ᨲᩮᨶᩩᨸᩈᨦ᩠ᨠᨾᩥ; ᩏᨸᩈᨦ᩠ᨠᨾᩥᨲ᩠ᩅᩣ ᨽᨣᩅᨶ᩠ᨲᩴ ᩋᨽᩥᩅᩣᨴᩮᨲ᩠ᩅᩣ ᩑᨠᨾᨶ᩠ᨲᩴ ᨶᩥᩈᩦᨴᩥ. ᩑᨠᨾᨶ᩠ᨲᩴ ᨶᩥᩈᩥᨶ᩠ᨶᩴ ᨡᩮᩣ ᩌᨿᩈ᩠ᨾᨶ᩠ᨲᩴ ᩌᨶᨶ᩠ᨴᩴ ᨽᨣᩅᩣ ᩑᨲᨴᩅᩮᩣᨧ – ‘‘ᩑᨠᩴᩈᩮᨶᩣᩉᩴ, ᩌᨶᨶ᩠ᨴ, ᩋᨠᩁᨱᩦᨿᩴ ᩅᨴᩣᨾᩥ ᨠᩣᨿᨴᩩᨧ᩠ᨧᩁᩥᨲᩴ ᩅᨧᩦᨴᩩᨧ᩠ᨧᩁᩥᨲᩴ ᨾᨶᩮᩣᨴᩩᨧ᩠ᨧᩁᩥᨲ’’ᨶ᩠ᨲᩥ. ‘‘ᨿᨾᩥᨴᩴ, ᨽᨶ᩠ᨲᩮ, ᨽᨣᩅᨲᩣ ᩑᨠᩴᩈᩮᨶ ᩋᨠᩁᨱᩦᨿᩴ ᩋᨠ᩠ᨡᩣᨲᩴ ᨠᩣᨿᨴᩩᨧ᩠ᨧᩁᩥᨲᩴ ᩅᨧᩦᨴᩩᨧ᩠ᨧᩁᩥᨲᩴ ᨾᨶᩮᩣᨴᩩᨧ᩠ᨧᩁᩥᨲᩴ ᨲᩈ᩠ᨾᩥᩴ ᩋᨠᩁᨱᩦᨿᩮ ᨠᨿᩥᩁᨾᩣᨶᩮ ᨠᩮᩣ ᩌᨴᩦᨶᩅᩮᩣ ᨸᩣᨭᩥᨠᨦ᩠ᨡᩮᩣ’’ᨲᩥ? ‘‘ᨿᨾᩥᨴᩴ, ᩌᨶᨶ᩠ᨴ, ᨾᨿᩣ ᩑᨠᩴᩈᩮᨶ ᩋᨠᩁᨱᩦᨿᩴ ᩋᨠ᩠ᨡᩣᨲᩴ ᨠᩣᨿᨴᩩᨧ᩠ᨧᩁᩥᨲᩴ ᩅᨧᩦᨴᩩᨧ᩠ᨧᩁᩥᨲᩴ ᨾᨶᩮᩣᨴᩩᨧ᩠ᨧᩁᩥᨲᩴ ᨲᩈ᩠ᨾᩥᩴ ᩋᨠᩁᨱᩦᨿᩮ ᨠᨿᩥᩁᨾᩣᨶᩮ ᩋᨿᩴ ᩌᨴᩦᨶᩅᩮᩣ ᨸᩣᨭᩥᨠᨦ᩠ᨡᩮᩣ – ᩋᨲ᩠ᨲᩣᨸᩥ ᩋᨲ᩠ᨲᩣᨶᩴ ᩏᨸᩅᨴᨲᩥ, ᩋᨶᩩᩅᩥᨧ᩠ᨧ ᩅᩥᨬ᩠ᨬᩪ ᨣᩁᩉᨶ᩠ᨲᩥ, ᨸᩣᨸᨠᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨧ᩠ᨨᨲᩥ, ᩈᨾ᩠ᨾᩪᩊ᩠ᩉᩮᩣ ᨠᩣᩃᩴ ᨠᩁᩮᩣᨲᩥ, ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩋᨸᩣᨿᩴ ᨴᩩᨣ᩠ᨣᨲᩥᩴ ᩅᩥᨶᩥᨸᩣᨲᩴ ᨶᩥᩁᨿᩴ ᩏᨸᨸᨩ᩠ᨩᨲᩥ. ᨿᨾᩥᨴᩴ, ᩌᨶᨶ᩠ᨴ, ᨾᨿᩣ ᩑᨠᩴᩈᩮᨶ ᩋᨠᩁᨱᩦᨿᩴ ᩋᨠ᩠ᨡᩣᨲᩴ ᨠᩣᨿᨴᩩᨧ᩠ᨧᩁᩥᨲᩴ ᩅᨧᩦᨴᩩᨧ᩠ᨧᩁᩥᨲᩴ ᨾᨶᩮᩣᨴᩩᨧ᩠ᨧᩁᩥᨲᩴ ᨲᩈ᩠ᨾᩥᩴ ᩋᨠᩁᨱᩦᨿᩮ ᨠᨿᩥᩁᨾᩣᨶᩮ ᩋᨿᩴ ᩌᨴᩦᨶᩅᩮᩣ ᨸᩣᨭᩥᨠᨦ᩠ᨡᩮᩣ’’ᨲᩥ.

‘‘ᩑᨠᩴᩈᩮᨶᩣᩉᩴ, ᩌᨶᨶ᩠ᨴ, ᨠᩁᨱᩦᨿᩴ ᩅᨴᩣᨾᩥ ᨠᩣᨿᩈᩩᨧᩁᩥᨲᩴ ᩅᨧᩦᩈᩩᨧᩁᩥᨲᩴ ᨾᨶᩮᩣᩈᩩᨧᩁᩥᨲ’’ᨶ᩠ᨲᩥ. ‘‘ᨿᨾᩥᨴᩴ, ᨽᨶ᩠ᨲᩮ, ᨽᨣᩅᨲᩣ ᩑᨠᩴᩈᩮᨶ ᨠᩁᨱᩦᨿᩴ ᩋᨠ᩠ᨡᩣᨲᩴ ᨠᩣᨿᩈᩩᨧᩁᩥᨲᩴ ᩅᨧᩦᩈᩩᨧᩁᩥᨲᩴ ᨾᨶᩮᩣᩈᩩᨧᩁᩥᨲᩴ ᨲᩈ᩠ᨾᩥᩴ ᨠᩁᨱᩦᨿᩮ ᨠᨿᩥᩁᨾᩣᨶᩮ ᨠᩮᩣ ᩌᨶᩥᩈᩴᩈᩮᩣ ᨸᩣᨭᩥᨠᨦ᩠ᨡᩮᩣ’’ᨲᩥ? ‘‘ᨿᨾᩥᨴᩴ, ᩌᨶᨶ᩠ᨴ, ᨾᨿᩣ ᩑᨠᩴᩈᩮᨶ ᨠᩁᨱᩦᨿᩴ ᩋᨠ᩠ᨡᩣᨲᩴ ᨠᩣᨿᩈᩩᨧᩁᩥᨲᩴ ᩅᨧᩦᩈᩩᨧᩁᩥᨲᩴ ᨾᨶᩮᩣᩈᩩᨧᩁᩥᨲᩴ ᨲᩈ᩠ᨾᩥᩴ ᨠᩁᨱᩦᨿᩮ ᨠᨿᩥᩁᨾᩣᨶᩮ ᩋᨿᩴ ᩌᨶᩥᩈᩴᩈᩮᩣ ᨸᩣᨭᩥᨠᨦ᩠ᨡᩮᩣ – ᩋᨲ᩠ᨲᩣᨸᩥ ᩋᨲ᩠ᨲᩣᨶᩴ ᨶ ᩏᨸᩅᨴᨲᩥ, ᩋᨶᩩᩅᩥᨧ᩠ᨧ ᩅᩥᨬ᩠ᨬᩪ ᨸᩈᩴᩈᨶ᩠ᨲᩥ, ᨠᩃ᩠ᨿᩣᨱᩮᩣ ᨠᩥᨲ᩠ᨲᩥᩈᨴ᩠ᨴᩮᩣ ᩋᨻ᩠ᨽᩩᨣ᩠ᨣᨧ᩠ᨨᨲᩥ, ᩋᩈᨾ᩠ᨾᩪᩊ᩠ᩉᩮᩣ ᨠᩣᩃᩴ ᨠᩁᩮᩣᨲᩥ, ᨠᩣᨿᩔ ᨽᩮᨴᩣ ᨸᩁᩴ ᨾᩁᨱᩣ ᩈᩩᨣᨲᩥᩴ ᩈᨣ᩠ᨣᩴ ᩃᩮᩣᨠᩴ ᩏᨸᨸᨩ᩠ᨩᨲᩥ. ᨿᨾᩥᨴᩴ, ᩌᨶᨶ᩠ᨴ, ᨾᨿᩣ ᩑᨠᩴᩈᩮᨶ ᨠᩁᨱᩦᨿᩴ ᩋᨠ᩠ᨡᩣᨲᩴ ᨠᩣᨿᩈᩩᨧᩁᩥᨲᩴ ᩅᨧᩦᩈᩩᨧᩁᩥᨲᩴ ᨾᨶᩮᩣᩈᩩᨧᩁᩥᨲᩴ ᨲᩈ᩠ᨾᩥᩴ ᨠᩁᨱᩦᨿᩮ ᨠᨿᩥᩁᨾᩣᨶᩮ ᩋᨿᩴ ᩌᨶᩥᩈᩴᩈᩮᩣ ᨸᩣᨭᩥᨠᨦ᩠ᨡᩮᩣ’’ᨲᩥ.

᪑᪙. ‘‘ᩋᨠᩩᩈᩃᩴ, ᨽᩥᨠ᩠ᨡᩅᩮ, ᨸᨩᩉᨳ. ᩈᨠ᩠ᨠᩣ, ᨽᩥᨠ᩠ᨡᩅᩮ, ᩋᨠᩩᩈᩃᩴ ᨸᨩᩉᩥᨲᩩᩴ. ᨶᩮᩣ ᨧᩮᨴᩴ [ᨶᩮᩣ ᨧᩮᨲᩴ (ᩈ᩠ᨿᩣ. ᨠᩴ. ᨸᩦ. ᨠ.) ᩈᩴ. ᨶᩥ. ᪓.᪒᪘ ᨸᩔᩥᨲᨻ᩠ᨻᩴ], ᨽᩥᨠ᩠ᨡᩅᩮ, ᩈᨠ᩠ᨠᩣ ᩋᨽᩅᩥᩔ ᩋᨠᩩᩈᩃᩴ ᨸᨩᩉᩥᨲᩩᩴ, ᨶᩣᩉᩴ ᩑᩅᩴ ᩅᨴᩮᨿ᩠ᨿᩴ – ‘ᩋᨠᩩᩈᩃᩴ, ᨽᩥᨠ᩠ᨡᩅᩮ, ᨸᨩᩉᨳᩣ’ᨲᩥ. ᨿᩈ᩠ᨾᩣ ᨧ ᨡᩮᩣ, ᨽᩥᨠ᩠ᨡᩅᩮ, ᩈᨠ᩠ᨠᩣ ᩋᨠᩩᩈᩃᩴ ᨸᨩᩉᩥᨲᩩᩴ ᨲᩈ᩠ᨾᩣᩉᩴ ᩑᩅᩴ ᩅᨴᩣᨾᩥ – ‘ᩋᨠᩩᩈᩃᩴ, ᨽᩥᨠ᩠ᨡᩅᩮ, ᨸᨩᩉᨳᩣ’ᨲᩥ. ᩋᨠᩩᩈᩃᨬ᩠ᨧ ᩉᩥᨴᩴ, ᨽᩥᨠ᩠ᨡᩅᩮ [ᩋᨠᩩᩈᩃᩴ ᨽᩥᨠ᩠ᨡᩅᩮ (ᨠ.)], ᨸᩉᩦᨶᩴ ᩋᩉᩥᨲᩣᨿ ᨴᩩᨠ᩠ᨡᩣᨿ ᩈᩴᩅᨲ᩠ᨲᩮᨿ᩠ᨿ ᨶᩣᩉᩴ ᩑᩅᩴ ᩅᨴᩮᨿ᩠ᨿᩴ – ‘ᩋᨠᩩᩈᩃᩴ, ᨽᩥᨠ᩠ᨡᩅᩮ, ᨸᨩᩉᨳᩣ’ᨲᩥ. ᨿᩈ᩠ᨾᩣ ᨧ ᨡᩮᩣ, ᨽᩥᨠ᩠ᨡᩅᩮ, ᩋᨠᩩᩈᩃᩴ ᨸᩉᩦᨶᩴ ᩉᩥᨲᩣᨿ ᩈᩩᨡᩣᨿ ᩈᩴᩅᨲ᩠ᨲᨲᩥ ᨲᩈ᩠ᨾᩣᩉᩴ ᩑᩅᩴ ᩅᨴᩣᨾᩥ – ‘ᩋᨠᩩᩈᩃᩴ, ᨽᩥᨠ᩠ᨡᩅᩮ, ᨸᨩᩉᨳᩣ’’’ᨲᩥ.

‘‘ᨠᩩᩈᩃᩴ, ᨽᩥᨠ᩠ᨡᩅᩮ, ᨽᩣᩅᩮᨳ. ᩈᨠ᩠ᨠᩣ, ᨽᩥᨠ᩠ᨡᩅᩮ, ᨠᩩᩈᩃᩴ ᨽᩣᩅᩮᨲᩩᩴ. ᨶᩮᩣ ᨧᩮᨴᩴ, ᨽᩥᨠ᩠ᨡᩅᩮ, ᩈᨠ᩠ᨠᩣ ᩋᨽᩅᩥᩔ ᨠᩩᩈᩃᩴ ᨽᩣᩅᩮᨲᩩᩴ, ᨶᩣᩉᩴ ᩑᩅᩴ ᩅᨴᩮᨿ᩠ᨿᩴ – ‘ᨠᩩᩈᩃᩴ, ᨽᩥᨠ᩠ᨡᩅᩮ, ᨽᩣᩅᩮᨳᩣ’ᨲᩥ. ᨿᩈ᩠ᨾᩣ ᨧ ᨡᩮᩣ, ᨽᩥᨠ᩠ᨡᩅᩮ, ᩈᨠ᩠ᨠᩣ ᨠᩩᩈᩃᩴ ᨽᩣᩅᩮᨲᩩᩴ ᨲᩈ᩠ᨾᩣᩉᩴ ᩑᩅᩴ ᩅᨴᩣᨾᩥ – ‘ᨠᩩᩈᩃᩴ, ᨽᩥᨠ᩠ᨡᩅᩮ, ᨽᩣᩅᩮᨳᩣ’ᨲᩥ. ᨠᩩᩈᩃᨬ᩠ᨧ ᩉᩥᨴᩴ, ᨽᩥᨠ᩠ᨡᩅᩮ, ᨽᩣᩅᩥᨲᩴ ᩋᩉᩥᨲᩣᨿ ᨴᩩᨠ᩠ᨡᩣᨿ ᩈᩴᩅᨲ᩠ᨲᩮᨿ᩠ᨿ, ᨶᩣᩉᩴ ᩑᩅᩴ ᩅᨴᩮᨿ᩠ᨿᩴ – ‘ᨠᩩᩈᩃᩴ, ᨽᩥᨠ᩠ᨡᩅᩮ, ᨽᩣᩅᩮᨳᩣ’ᨲᩥ. ᨿᩈ᩠ᨾᩣ ᨧ ᨡᩮᩣ, ᨽᩥᨠ᩠ᨡᩅᩮ, ᨠᩩᩈᩃᩴ ᨽᩣᩅᩥᨲᩴ ᩉᩥᨲᩣᨿ ᩈᩩᨡᩣᨿ ᩈᩴᩅᨲ᩠ᨲᨲᩥ ᨲᩈ᩠ᨾᩣᩉᩴ ᩑᩅᩴ ᩅᨴᩣᨾᩥ – ‘ᨠᩩᩈᩃᩴ, ᨽᩥᨠ᩠ᨡᩅᩮ, ᨽᩣᩅᩮᨳᩣ’’’ᨲᩥ.

᪒᪐. ‘‘ᨴ᩠ᩅᩮᨾᩮ, ᨽᩥᨠ᩠ᨡᩅᩮ, ᨵᨾ᩠ᨾᩣ ᩈᨴ᩠ᨵᨾ᩠ᨾᩔ ᩈᨾ᩠ᨾᩮᩣᩈᩣᨿ ᩋᨶ᩠ᨲᩁᨵᩣᨶᩣᨿ ᩈᩴᩅᨲ᩠ᨲᨶ᩠ᨲᩥ. ᨠᨲᨾᩮ ᨴ᩠ᩅᩮ? ᨴᩩᨶ᩠ᨶᩥᨠ᩠ᨡᩥᨲ᩠ᨲᨬ᩠ᨧ ᨸᨴᨻ᩠ᨿᨬ᩠ᨩᨶᩴ ᩋᨲ᩠ᨳᩮᩣ ᨧ ᨴᩩᨶ᩠ᨶᩦᨲᩮᩣ. ᨴᩩᨶ᩠ᨶᩥᨠ᩠ᨡᩥᨲ᩠ᨲᩔ, ᨽᩥᨠ᩠ᨡᩅᩮ, ᨸᨴᨻ᩠ᨿᨬ᩠ᨩᨶᩔ ᩋᨲ᩠ᨳᩮᩣᨸᩥ ᨴᩩᨶ᩠ᨶᨿᩮᩣ ᩉᩮᩣᨲᩥ. ᩍᨾᩮ ᨡᩮᩣ, ᨽᩥᨠ᩠ᨡᩅᩮ, ᨴ᩠ᩅᩮ ᨵᨾ᩠ᨾᩣ ᩈᨴ᩠ᨵᨾ᩠ᨾᩔ ᩈᨾ᩠ᨾᩮᩣᩈᩣᨿ ᩋᨶ᩠ᨲᩁᨵᩣᨶᩣᨿ ᩈᩴᩅᨲ᩠ᨲᨶ᩠ᨲᩦ’’ᨲᩥ.

᪒᪑. ‘‘ᨴ᩠ᩅᩮᨾᩮ, ᨽᩥᨠ᩠ᨡᩅᩮ, ᨵᨾ᩠ᨾᩣ ᩈᨴ᩠ᨵᨾ᩠ᨾᩔ ᨮᩥᨲᩥᨿᩣ ᩋᩈᨾ᩠ᨾᩮᩣᩈᩣᨿ ᩋᨶᨶ᩠ᨲᩁᨵᩣᨶᩣᨿ ᩈᩴᩅᨲ᩠ᨲᨶ᩠ᨲᩥ. ᨠᨲᨾᩮ ᨴ᩠ᩅᩮ? ᩈᩩᨶᩥᨠ᩠ᨡᩥᨲ᩠ᨲᨬ᩠ᨧ ᨸᨴᨻ᩠ᨿᨬ᩠ᨩᨶᩴ ᩋᨲ᩠ᨳᩮᩣ ᨧ ᩈᩩᨶᩦᨲᩮᩣ. ᩈᩩᨶᩥᨠ᩠ᨡᩥᨲ᩠ᨲᩔ, ᨽᩥᨠ᩠ᨡᩅᩮ, ᨸᨴᨻ᩠ᨿᨬ᩠ᨩᨶᩔ ᩋᨲ᩠ᨳᩮᩣᨸᩥ ᩈᩩᨶᨿᩮᩣ ᩉᩮᩣᨲᩥ. ᩍᨾᩮ ᨡᩮᩣ, ᨽᩥᨠ᩠ᨡᩅᩮ, ᨴ᩠ᩅᩮ ᨵᨾ᩠ᨾᩣ ᩈᨴ᩠ᨵᨾ᩠ᨾᩔ ᨮᩥᨲᩥᨿᩣ ᩋᩈᨾ᩠ᨾᩮᩣᩈᩣᨿ ᩋᨶᨶ᩠ᨲᩁᨵᩣᨶᩣᨿ ᩈᩴᩅᨲ᩠ᨲᨶ᩠ᨲᩦ’’ᨲᩥ.

ᩋᨵᩥᨠᩁᨱᩅᨣ᩠ᨣᩮᩣ ᨴᩩᨲᩥᨿᩮᩣ.