೧. ಕಥಿನಅತ್ಥತಾದಿ

೪೦೩. ಕಸ್ಸ ಕಥಿನಂ [ಕಠಿನಂ (ಸೀ. ಸ್ಯಾ.)] ಅನತ್ಥತಂ? ಕಸ್ಸ ಕಥಿನಂ ಅತ್ಥತಂ? ಕಿನ್ತಿ ಕಥಿನಂ ಅನತ್ಥತಂ? ಕಿನ್ತಿ ಕಥಿನಂ ಅತ್ಥತಂ?

ಕಸ್ಸ ಕಥಿನಂ ಅನತ್ಥತನ್ತಿ? ದ್ವಿನ್ನಂ ಪುಗ್ಗಲಾನಂ ಅನತ್ಥತಂ ಹೋತಿ ಕಥಿನಂ – ಅನತ್ಥಾರಕಸ್ಸ ಚ ಅನನುಮೋದಕಸ್ಸ ಚ. ಇಮೇಸಂ ದ್ವಿನ್ನಂ ಪುಗ್ಗಲಾನಂ ಅನತ್ಥತಂ ಹೋತಿ ಕಥಿನಂ.

ಕಸ್ಸ ಕಥಿನಂ ಅತ್ಥತನ್ತಿ? ದ್ವಿನ್ನಂ ಪುಗ್ಗಲಾನಂ ಅತ್ಥತಂ ಹೋತಿ ಕಥಿನಂ – ಅತ್ಥಾರಕಸ್ಸ ಚ ಅನುಮೋದಕಸ್ಸ ಚ. ಇಮೇಸಂ ದ್ವಿನ್ನಂ ಪುಗ್ಗಲಾನಂ ಅತ್ಥತಂ ಹೋತಿ ಕಥಿನಂ.

ಕಿನ್ತಿ ಕಥಿನಂ ಅನತ್ಥತನ್ತಿ? ಚತುವೀಸತಿಯಾ ಆಕಾರೇಹಿ ಅನತ್ಥತಂ ಹೋತಿ ಕಥಿನಂ, ನ ಉಲ್ಲಿಖಿತಮತ್ತೇನ ಅತ್ಥತಂ ಹೋತಿ ಕಥಿನಂ, ನ ಧೋವನಮತ್ತೇನ ಅತ್ಥತಂ ಹೋತಿ ಕಥಿನಂ, ನ ಚೀವರವಿಚಾರಣಮತ್ತೇನ ಅತ್ಥತಂ ಹೋತಿ ಕಥಿನಂ, ನ ಛೇದನಮತ್ತೇನ ಅತ್ಥತಂ ಹೋತಿ ಕಥಿನಂ, ನ ಬನ್ಧನಮತ್ತೇನ ಅತ್ಥತಂ ಹೋತಿ ಕಥಿನಂ, ನ ಓವಟ್ಟಿಯಕರಣಮತ್ತೇನ ಅತ್ಥತಂ ಹೋತಿ ಕಥಿನಂ, ನ ಕಣ್ಡುಸಕರಣಮತ್ತೇನ [ನ ಗಣ್ಡುಸಕರಣಮತ್ತೇನ (ಕ.)] ಅತ್ಥತಂ ಹೋತಿ ಕಥಿನಂ, ನ ದಳ್ಹೀಕಮ್ಮಕರಣಮತ್ತೇನ ಅತ್ಥತಂ ಹೋತಿ ಕಥಿನಂ, ನ ಅನುವಾತಕರಣಮತ್ತೇನ ಅತ್ಥತಂ ಹೋತಿ ಕಥಿನಂ, ನ ಪರಿಭಣ್ಡಕರಣಮತ್ತೇನ ಅತ್ಥತಂ ಹೋತಿ ಕಥಿನಂ, ನ ಓವದ್ಧೇಯ್ಯಕರಣಮತ್ತೇನ [ನ ಓವಟ್ಟೇಯ್ಯಕರಣಮತ್ತೇನ (ಸೀ. ಸ್ಯಾ.), ನ ಓವದೇಯ್ಯಕರಣಮತ್ತೇನ (ಕ.)] ಅತ್ಥತಂ ಹೋತಿ ಕಥಿನಂ, ನ ಕಮ್ಬಲಮದ್ದನಮತ್ತೇನ ಅತ್ಥತಂ ಹೋತಿ ಕಥಿನಂ, ನ ನಿಮಿತ್ತಕತೇನ ಅತ್ಥತಂ ಹೋತಿ ಕಥಿನಂ, ನ ಪರಿಕಥಾಕತೇನ ಅತ್ಥತಂ ಹೋತಿ ಕಥಿನಂ, ನ ಕುಕ್ಕುಕತೇನ ಅತ್ಥತಂ ಹೋತಿ ಕಥಿನಂ, ನ ಸನ್ನಿಧಿಕತೇನ ಅತ್ಥತಂ ಹೋತಿ ಕಥಿನಂ, ನ ನಿಸ್ಸಗ್ಗಿಯೇನ ಅತ್ಥತಂ ಹೋತಿ ಕಥಿನಂ, ನ ಅಕಪ್ಪಕತೇನ ಅತ್ಥತಂ ಹೋತಿ ಕಥಿನಂ, ನ ಅಞ್ಞತ್ರ ಸಙ್ಘಾಟಿಯಾ ಅತ್ಥತಂ ಹೋತಿ ಕಥಿನಂ, ನ ಅಞ್ಞತ್ರ ಉತ್ತರಾಸಙ್ಗೇನ ಅತ್ಥತಂ ಹೋತಿ ಕಥಿನಂ, ನ ಅಞ್ಞತ್ರ ಅನ್ತರವಾಸಕೇನ ಅತ್ಥತಂ ಹೋತಿ ಕಥಿನಂ, ನ ಅಞ್ಞತ್ರ ಪಞ್ಚಕೇನ ವಾ ಅತಿರೇಕಪಞ್ಚಕೇನ ವಾ ತದಹೇವ ಸಞ್ಛಿನ್ನೇನ ಸಮಣ್ಡಲೀಕತೇನ ಅತ್ಥತಂ ಹೋತಿ ಕಥಿನಂ, ನ ಅಞ್ಞತ್ರ ಪುಗ್ಗಲಸ್ಸ ಅತ್ಥಾರಾ ಅತ್ಥತಂ ಹೋತಿ ಕಥಿನಂ, ಸಮ್ಮಾ ಚೇ ಅತ್ಥತಂ ಹೋತಿ ಕಥಿನಂ ತಂ ಚೇ ನಿಸ್ಸೀಮಟ್ಠೋ ಅನುಮೋದತಿ. ಏವಮ್ಪಿ ಅನತ್ಥತಂ ಹೋತಿ ಕಥಿನಂ.

ನಿಮಿತ್ತಕಮ್ಮಂ ನಾಮ ನಿಮಿತ್ತಂ ಕರೋತಿ – ‘‘ಇಮಿನಾ ದುಸ್ಸೇನ ಕಥಿನಂ ಅತ್ಥರಿಸ್ಸಾಮೀ’’ತಿ. ಪರಿಕಥಾ ನಾಮ ಪರಿಕಥಂ ಕರೋತಿ – ‘‘ಇಮಾಯ ಪರಿಕಥಾಯ ಕಥಿನದುಸ್ಸಂ ನಿಬ್ಬತ್ತೇಸ್ಸಾಮೀ’’ತಿ. ಕುಕ್ಕುಕತಂ ನಾಮ ಅನಾದಿಯದಾನಂ ವುಚ್ಚತಿ. ಸನ್ನಿಧಿ ನಾಮ ದ್ವೇ ಸನ್ನಿಧಿಯೋ – ಕರಣಸನ್ನಿಧಿ ವಾ ನಿಚಯಸನ್ನಿಧಿ ವಾ. ನಿಸ್ಸಗ್ಗಿಯಂ ನಾಮ ಕಯಿರಮಾನೇ ಅರುಣಂ ಉಟ್ಠಹತಿ [ಉದ್ರಿಯತಿ (ಸೀ. ಸ್ಯಾ.)]. ಇಮೇಹಿ ಚತುವೀಸತಿಯಾ ಆಕಾರೇಹಿ ಅನತ್ಥತಂ ಹೋತಿ ಕಥಿನಂ.

ಕಿನ್ತಿ ಕಥಿನಂ ಅತ್ಥತನ್ತಿ? ಸತ್ತರಸಹಿ ಆಕಾರೇಹಿ ಅತ್ಥತಂ ಹೋತಿ ಕಥಿನಂ. ಅಹತೇನ ಅತ್ಥತಂ ಹೋತಿ ಕಥಿನಂ, ಅಹತಕಪ್ಪೇನ ಅತ್ಥತಂ ಹೋತಿ ಕಥಿನಂ, ಪಿಲೋತಿಕಾಯ ಅತ್ಥತಂ ಹೋತಿ ಕಥಿನಂ, ಪಂಸುಕೂಲೇನ ಅತ್ಥತಂ ಹೋತಿ ಕಥಿನಂ, ಪಾಪಣಿಕೇನ ಅತ್ಥತಂ ಹೋತಿ ಕಥಿನಂ, ಅನಿಮಿತ್ತಕತೇನ ಅತ್ಥತಂ ಹೋತಿ ಕಥಿನಂ, ಅಪರಿಕಥಾಕತೇನ ಅತ್ಥತಂ ಹೋತಿ ಕಥಿನಂ, ಅಕುಕ್ಕುಕತೇನ ಅತ್ಥತಂ ಹೋತಿ ಕಥಿನಂ, ಅಸನ್ನಿಧಿಕತೇನ ಅತ್ಥತಂ ಹೋತಿ ಕಥಿನಂ, ಅನಿಸ್ಸಗ್ಗಿಯೇನ ಅತ್ಥತಂ ಹೋತಿ ಕಥಿನಂ, ಕಪ್ಪಕತೇನ ಅತ್ಥತಂ ಹೋತಿ ಕಥಿನಂ, ಸಙ್ಘಾಟಿಯಾ ಅತ್ಥತಂ ಹೋತಿ ಕಥಿನಂ, ಉತ್ತರಾಸಙ್ಗೇನ ಅತ್ಥತಂ ಹೋತಿ ಕಥಿನಂ, ಅನ್ತರವಾಸಕೇನ ಅತ್ಥತಂ ಹೋತಿ ಕಥಿನಂ, ಪಞ್ಚಕೇನ ವಾ ಅತಿರೇಕಪಞ್ಚಕೇನ ವಾ ತದಹೇವ ಸಞ್ಛಿನ್ನೇನ ಸಮಣ್ಡಲೀಕತೇನ ಅತ್ಥತಂ ಹೋತಿ ಕಥಿನಂ, ಪುಗ್ಗಲಸ್ಸ ಅತ್ಥಾರಾ ಅತ್ಥತಂ ಹೋತಿ ಕಥಿನಂ, ಸಮ್ಮಾ ಚೇ ಅತ್ಥತಂ ಹೋತಿ ಕಥಿನಂ, ತಂ ಚೇ ಸೀಮಟ್ಠೋ ಅನುಮೋದತಿ, ಏವಮ್ಪಿ ಅತ್ಥತಂ ಹೋತಿ ಕಥಿನಂ. ಇಮೇಹಿ ಸತ್ತರಸಹಿ ಆಕಾರೇಹಿ ಅತ್ಥತಂ ಹೋತಿ ಕಥಿನಂ.

ಸಹ ಕಥಿನಸ್ಸ ಅತ್ಥಾರಾ ಕತಿ ಧಮ್ಮಾ ಜಾಯನ್ತಿ? ಸಹ ಕಥಿನಸ್ಸ ಅತ್ಥಾರಾ ಪನ್ನರಸ ಧಮ್ಮಾ ಜಾಯನ್ತಿ – ಅಟ್ಠ ಮಾತಿಕಾ, ದ್ವೇ ಪಲಿಬೋಧಾ, ಪಞ್ಚಾನಿಸಂಸಾ. ಸಹ ಕಥಿನಸ್ಸ ಅತ್ಥಾರಾ ಇಮೇ ಪನ್ನರಸ ಧಮ್ಮಾ ಜಾಯನ್ತಿ.