೯. ರಾಜವಗ್ಗೋ

೧೭೩. ಪುಬ್ಬೇ ಅಪ್ಪಟಿಸಂವಿದಿತೋ ರಞ್ಞೋ ಅನ್ತೇಪುರಂ ಪವಿಸನ್ತೋ ದ್ವೇ ಆಪತ್ತಿಯೋ ಆಪಜ್ಜತಿ. ಪಠಮಂ ಪಾದಂ ಉಮ್ಮಾರಂ ಅತಿಕ್ಕಾಮೇತಿ, ಆಪತ್ತಿ ದುಕ್ಕಟಸ್ಸ; ದುತಿಯಂ ಪಾದಂ ಅತಿಕ್ಕಾಮೇತಿ, ಆಪತ್ತಿ ಪಾಚಿತ್ತಿಯಸ್ಸ.

ರತನಂ ಉಗ್ಗಣ್ಹನ್ತೋ ದ್ವೇ ಆಪತ್ತಿಯೋ ಆಪಜ್ಜತಿ. ಗಣ್ಹಾತಿ, ಪಯೋಗೇ ದುಕ್ಕಟಂ; ಗಹಿತೇ ಆಪತ್ತಿ ಪಾಚಿತ್ತಿಯಸ್ಸ.

ಸನ್ತಂ ಭಿಕ್ಖುಂ ಅನಾಪುಚ್ಛಾ ವಿಕಾಲೇ ಗಾಮಂ ಪವಿಸನ್ತೋ ದ್ವೇ ಆಪತ್ತಿಯೋ ಆಪಜ್ಜತಿ. ಪಠಮಂ ಪಾದಂ ಪರಿಕ್ಖೇಪಂ ಅತಿಕ್ಕಾಮೇತಿ, ಆಪತ್ತಿ ದುಕ್ಕಟಸ್ಸ; ದುತಿಯಂ ಪಾದಂ ಅತಿಕ್ಕಾಮೇತಿ, ಆಪತ್ತಿ ಪಾಚಿತ್ತಿಯಸ್ಸ.

ಅಟ್ಠಿಮಯಂ ವಾ ದನ್ತಮಯಂ ವಾ ವಿಸಾಣಮಯಂ ವಾ ಸೂಚಿಘರಂ ಕಾರಾಪೇನ್ತೋ ದ್ವೇ ಆಪತ್ತಿಯೋ ಆಪಜ್ಜತಿ. ಕಾರಾಪೇತಿ, ಪಯೋಗೇ ದುಕ್ಕಟಂ; ಕಾರಾಪಿತೇ ಆಪತ್ತಿ ಪಾಚಿತ್ತಿಯಸ್ಸ.

ಪಮಾಣಾತಿಕ್ಕನ್ತಂ ಮಞ್ಚಂ ವಾ ಪೀಠಂ ವಾ ಕಾರಾಪೇನ್ತೋ ದ್ವೇ ಆಪತ್ತಿಯೋ ಆಪಜ್ಜತಿ. ಕಾರಾಪೇತಿ, ಪಯೋಗೇ ದುಕ್ಕಟಂ; ಕಾರಾಪಿತೇ ಆಪತ್ತಿ ಪಾಚಿತ್ತಿಯಸ್ಸ.

ಮಞ್ಚಂ ವಾ ಪೀಠಂ ವಾ ತೂಲೋನದ್ಧಂ ಕಾರಾಪೇನ್ತೋ ದ್ವೇ ಆಪತ್ತಿಯೋ ಆಪಜ್ಜತಿ. ಕಾರಾಪೇತಿ, ಪಯೋಗೇ ದುಕ್ಕಟಂ; ಕಾರಾಪಿತೇ ಆಪತ್ತಿ ಪಾಚಿತ್ತಿಯಸ್ಸ.

ಪಮಾಣಾತಿಕ್ಕನ್ತಂ ನಿಸೀದನಂ ಕಾರಾಪೇನ್ತೋ ದ್ವೇ ಆಪತ್ತಿಯೋ ಆಪಜ್ಜತಿ. ಕಾರಾಪೇತಿ, ಪಯೋಗೇ ದುಕ್ಕಟಂ; ಕಾರಾಪಿತೇ ಆಪತ್ತಿ ಪಾಚಿತ್ತಿಯಸ್ಸ.

ಪಮಾಣಾತಿಕ್ಕನ್ತಂ ಕಣ್ಡುಪ್ಪಟಿಚ್ಛಾದಿಂ ಕಾರಾಪೇನ್ತೋ ದ್ವೇ ಆಪತ್ತಿಯೋ ಆಪಜ್ಜತಿ. ಕಾರಾಪೇತಿ, ಪಯೋಗೇ ದುಕ್ಕಟಂ; ಕಾರಾಪಿತೇ ಆಪತ್ತಿ ಪಾಚಿತ್ತಿಯಸ್ಸ.

ಪಮಾಣಾತಿಕ್ಕನ್ತಂ ವಸ್ಸಿಕಸಾಟಿಕಂ ಕಾರಾಪೇನ್ತೋ ದ್ವೇ ಆಪತ್ತಿಯೋ ಆಪಜ್ಜತಿ. ಕಾರಾಪೇತಿ, ಪಯೋಗೇ ದುಕ್ಕಟಂ; ಕಾರಾಪಿತೇ ಆಪತ್ತಿ ಪಾಚಿತ್ತಿಯಸ್ಸ.

ಚೀವರಂ ಕಾರಾಪೇನ್ತೋ ಕತಿ ಆಪತ್ತಿಯೋ ಆಪಜ್ಜತಿ? ಸುಗತಚೀವರಪ್ಪಮಾಣಂ ಚೀವರಂ ಕಾರಾಪೇನ್ತೋ ದ್ವೇ ಆಪತ್ತಿಯೋ ಆಪಜ್ಜತಿ. ಕಾರಾಪೇತಿ, ಪಯೋಗೇ ದುಕ್ಕಟಂ; ಕಾರಾಪಿತೇ ಆಪತ್ತಿ ಪಾಚಿತ್ತಿಯಸ್ಸ – ಸುಗತಚೀವರಪ್ಪಮಾಣಂ ಚೀವರಂ ಕಾರಾಪೇನ್ತೋ ಇಮಾ ದ್ವೇ ಆಪತ್ತಿಯೋ ಆಪಜ್ಜತಿ.

ರಾಜವಗ್ಗೋ ನವಮೋ. ಖುದ್ದಕಾ ನಿಟ್ಠಿತಾ.