೪. ತುವಟ್ಟವಗ್ಗೋ

೨೨೧. ದ್ವಿನ್ನಂ ಭಿಕ್ಖುನೀನಂ ಏಕಮಞ್ಚೇ ತುವಟ್ಟೇನ್ತೀನಂ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಸಮ್ಬಹುಲಾ ಭಿಕ್ಖುನಿಯೋ ದ್ವೇ ಏಕಮಞ್ಚೇ ತುವಟ್ಟೇಸುಂ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ದ್ವಿನ್ನಂ ಭಿಕ್ಖುನೀನಂ ಏಕತ್ಥರಣಪಾವುರಣೇ ತುವಟ್ಟೇನ್ತೀನಂ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಸಮ್ಬಹುಲಾ ಭಿಕ್ಖುನಿಯೋ ದ್ವೇ ಏಕತ್ಥರಣಪಾವುರಣಾ ತುವಟ್ಟೇಸುಂ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ಭಿಕ್ಖುನಿಯಾ ಸಞ್ಚಿಚ್ಚ ಅಫಾಸುಂ ಕರೋನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಥುಲ್ಲನನ್ದಂ ಭಿಕ್ಖುನಿಂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಥುಲ್ಲನನ್ದಾ ಭಿಕ್ಖುನೀ ಭಿಕ್ಖುನಿಯಾ ಸಞ್ಚಿಚ್ಚ ಅಫಾಸುಂ ಅಕಾಸಿ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ತೀಹಿ ಸಮುಟ್ಠಾನೇಹಿ ಸಮುಟ್ಠಾತಿ…ಪೇ….

ದುಕ್ಖಿತಂ ಸಹಜೀವಿನಿಂ ನೇವ ಉಪಟ್ಠೇನ್ತಿಯಾ ನ ಉಪಟ್ಠಾಪನಾಯ ಉಸ್ಸುಕ್ಕಂ ಕರೋನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಥುಲ್ಲನನ್ದಂ ಭಿಕ್ಖುನಿಂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಥುಲ್ಲನನ್ದಾ ಭಿಕ್ಖುನೀ ದುಕ್ಖಿತಂ ಸಹಜೀವಿನಿಂ ನೇವ ಉಪಟ್ಠೇಸಿ ನ ಉಪಟ್ಠಾಪನಾಯ ಉಸ್ಸುಕ್ಕಂ ಅಕಾಸಿ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ಏಕೇನ ಸಮುಟ್ಠಾನೇನ ಸಮುಟ್ಠಾತಿ – ಧುರನಿಕ್ಖೇಪೇ…ಪೇ….

ಭಿಕ್ಖುನಿಯಾ ಉಪಸ್ಸಯಂ ದತ್ವಾ ಕುಪಿತಾಯ ಅನತ್ತಮನಾಯ ನಿಕ್ಕಡ್ಢನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಥುಲ್ಲನನ್ದಂ ಭಿಕ್ಖುನಿಂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಥುಲ್ಲನನ್ದಾ ಭಿಕ್ಖುನೀ ಭಿಕ್ಖುನಿಯಾ ಉಪಸ್ಸಯಂ ದತ್ವಾ ಕುಪಿತಾ ಅನತ್ತಮನಾ ನಿಕ್ಕಡ್ಢಿ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ತೀಹಿ ಸಮುಟ್ಠಾನೇಹಿ ಸಮುಟ್ಠಾತಿ…ಪೇ….

ಸಂಸಟ್ಠಾಯ ಭಿಕ್ಖುನಿಯಾ ಯಾವತತಿಯಂ ಸಮನುಭಾಸನಾಯ ನ ಪಟಿನಿಸ್ಸಜ್ಜನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಚಣ್ಡಕಾಳಿಂ ಭಿಕ್ಖುನಿಂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಚಣ್ಡಕಾಳೀ ಭಿಕ್ಖುನೀ ಸಂಸಟ್ಠಾ ವಿಹರಿ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ಏಕೇನ ಸಮುಟ್ಠಾನೇನ ಸಮುಟ್ಠಾತಿ – ಧುರನಿಕ್ಖೇಪೇ…ಪೇ….

ಅನ್ತೋರಟ್ಠೇ ಸಾಸಙ್ಕಸಮ್ಮತೇ ಸಪ್ಪಟಿಭಯೇ ಅಸತ್ಥಿಕಾಯ ಚಾರಿಕಂ ಚರನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಸಮ್ಬಹುಲಾ ಭಿಕ್ಖುನಿಯೋ ಅನ್ತೋರಟ್ಠೇ ಸಾಸಙ್ಕಸಮ್ಮತೇ ಸಪ್ಪಟಿಭಯೇ ಅಸತ್ಥಿಕಾಯೋ ಚಾರಿಕಂ ಚರಿಂಸು, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ತಿರೋರಟ್ಠೇ ಸಾಸಙ್ಕಸಮ್ಮತೇ ಸಪ್ಪಟಿಭಯೇ ಅಸತ್ಥಿಕಾಯ ಚಾರಿಕಂ ಚರನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಸಮ್ಬಹುಲಾ ಭಿಕ್ಖುನಿಯೋ ತಿರೋರಟ್ಠೇ ಸಾಸಙ್ಕಸಮ್ಮತೇ ಸಪ್ಪಟಿಭಯೇ ಅಸತ್ಥಿಕಾಯೋ ಚಾರಿಕಂ ಚರಿಂಸು, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ಅನ್ತೋವಸ್ಸಂ ಚಾರಿಕಂ ಚರನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ರಾಜಗಹೇ ಪಞ್ಞತ್ತಂ. ಕಂ ಆರಬ್ಭಾತಿ? ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಸಮ್ಬಹುಲಾ ಭಿಕ್ಖುನಿಯೋ ಅನ್ತೋವಸ್ಸಂ ಚಾರಿಕಂ ಚರಿಂಸು, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ವಸ್ಸಂವುಟ್ಠಾಯ [ವಸ್ಸಂವುತ್ಥಾಯ (ಸೀ. ಸ್ಯಾ.)] ಭಿಕ್ಖುನಿಯಾ ಚಾರಿಕಂ ನ ಪಕ್ಕಮನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ರಾಜಗಹೇ ಪಞ್ಞತ್ತಂ. ಕಂ ಆರಬ್ಭಾತಿ? ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಸಮ್ಬಹುಲಾ ಭಿಕ್ಖುನಿಯೋ ವಸ್ಸಂವುಟ್ಠಾ ಚಾರಿಕಂ ನ ಪಕ್ಕಮಿಂಸು, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ಏಕೇನ ಸಮುಟ್ಠಾನೇನ ಸಮುಟ್ಠಾತಿ – ಪಠಮಪಾರಾಜಿಕೇ…ಪೇ….

ತುವಟ್ಟವಗ್ಗೋ ಚತುತ್ಥೋ.