೯. ಛತ್ತುಪಾಹನವಗ್ಗೋ

೨೨೬. ಛತ್ತುಪಾಹನಂ ಧಾರೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಛಬ್ಬಗ್ಗಿಯಾ ಭಿಕ್ಖುನಿಯೋ ಛತ್ತುಪಾಹನಂ ಧಾರೇಸುಂ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ, ಏಕಾ ಅನುಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ಯಾನೇನ ಯಾಯನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಛಬ್ಬಗ್ಗಿಯಾ ಭಿಕ್ಖುನಿಯೋ ಯಾನೇನ ಯಾಯಿಂಸು, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ, ಏಕಾ ಅನುಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ಸಙ್ಘಾಣಿಂ ಧಾರೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಅಞ್ಞತರಂ ಭಿಕ್ಖುನಿಂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಅಞ್ಞತರಾ ಭಿಕ್ಖುನೀ ಸಙ್ಘಾಣಿಂ ಧಾರೇಸಿ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ಇತ್ಥಾಲಙ್ಕಾರಂ ಧಾರೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಛಬ್ಬಗ್ಗಿಯಾ ಭಿಕ್ಖುನಿಯೋ ಇತ್ಥಾಲಙ್ಕಾರಂ ಧಾರೇಸುಂ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ಗನ್ಧವಣ್ಣಕೇನ ನಹಾಯನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಛಬ್ಬಗ್ಗಿಯಾ ಭಿಕ್ಖುನಿಯೋ ಗನ್ಧವಣ್ಣಕೇನ ನಹಾಯಿಂಸು, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ವಾಸಿತಕೇನ ಪಿಞ್ಞಾಕೇನ ನಹಾಯನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಛಬ್ಬಗ್ಗಿಯಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಛಬ್ಬಗ್ಗಿಯಾ ಭಿಕ್ಖುನಿಯೋ ವಾಸಿತಕೇನ ಪಿಞ್ಞಾಕೇನ ನಹಾಯಿಂಸು, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ಭಿಕ್ಖುನಿಯಾ ಉಮ್ಮದ್ದಾಪೇನ್ತಿಯಾ ಪರಿಮದ್ದಾಪೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಸಮ್ಬಹುಲಾ ಭಿಕ್ಖುನಿಯೋ ಭಿಕ್ಖುನಿಯಾ ಉಮ್ಮದ್ದಾಪೇಸುಂ ಪರಿಮದ್ದಾಪೇಸುಂ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ಸಿಕ್ಖಮಾನಾ ಉಮ್ಮದ್ದಾಪೇನ್ತಿಯಾ ಪರಿಮದ್ದಾಪೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಸಮ್ಬಹುಲಾ ಭಿಕ್ಖುನಿಯೋ ಸಿಕ್ಖಮಾನಾಯ ಉಮ್ಮದ್ದಾಪೇಸುಂ ಪರಿಮದ್ದಾಪೇಸುಂ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ಸಾಮಣೇರಿಯಾ ಉಮ್ಮದ್ದಾಪೇನ್ತಿಯಾ ಪರಿಮದ್ದಾಪೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಸಮ್ಬಹುಲಾ ಭಿಕ್ಖುನಿಯೋ ಸಾಮಣೇರಿಯಾ ಉಮ್ಮದ್ದಾಪೇಸುಂ ಪರಿಮದ್ದಾಪೇಸುಂ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ಗಿಹಿನಿಯಾ ಉಮ್ಮದ್ದಾಪೇನ್ತಿಯಾ ಪರಿಮದ್ದಾಪೇನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಸಮ್ಬಹುಲಾ ಭಿಕ್ಖುನಿಯೋ ಗಿಹಿನಿಯಾ ಉಮ್ಮದ್ದಾಪೇಸುಂ ಪರಿಮದ್ದಾಪೇಸುಂ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಏಳಕಲೋಮಕೇ…ಪೇ….

ಭಿಕ್ಖುಸ್ಸ ಪುರತೋ ಅನಾಪುಚ್ಛಾ ಆಸನೇ ನಿಸೀದನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಸಮ್ಬಹುಲಾ ಭಿಕ್ಖುನಿಯೋ ಭಿಕ್ಖುಸ್ಸ ಪುರತೋ ಅನಾಪುಚ್ಛಾ ಆಸನೇ ನಿಸೀದಿಂಸು, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಕಥಿನಕೇ…ಪೇ….

ಅನೋಕಾಸಕತಂ ಭಿಕ್ಖುಂ ಪಞ್ಹಂ ಪುಚ್ಛನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಸಮ್ಬಹುಲಾ ಭಿಕ್ಖುನಿಯೋ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಸಮ್ಬಹುಲಾ ಭಿಕ್ಖುನಿಯೋ ಅನೋಕಾಸಕತಂ ಭಿಕ್ಖುಂ ಪಞ್ಹಂ ಪುಚ್ಛಿಂಸು, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಪದಸೋಧಮ್ಮೇ…ಪೇ….

ಅಸಙ್ಕಚ್ಚಿಕಾಯ [ಅಸಙ್ಕಚ್ಛಿಕಾಯ (ಸ್ಯಾ.)] ಗಾಮಂ ಪವಿಸನ್ತಿಯಾ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಅಞ್ಞತರಂ ಭಿಕ್ಖುನಿಂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಅಞ್ಞತರಾ ಭಿಕ್ಖುನೀ ಅಸಙ್ಕಚ್ಚಿಕಾ ಗಾಮಂ ಪಾವಿಸಿ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ – ಸಿಯಾ ಕಾಯತೋ ಸಮುಟ್ಠಾತಿ, ನ ವಾಚತೋ ನ ಚಿತ್ತತೋ; ಸಿಯಾ ಕಾಯತೋ ಚ ಚಿತ್ತತೋ ಚ ಸಮುಟ್ಠಾತಿ, ನ ವಾಚತೋ…ಪೇ….

ಛತ್ತುಪಾಹನವಗ್ಗೋ ನವಮೋ.

ನವವಗ್ಗಖುದ್ದಕಾ ನಿಟ್ಠಿತಾ.

ತಸ್ಸುದ್ದಾನಂ –

ಲಸುಣಂ ಸಂಹರೇ ಲೋಮಂ, ತಲಮಟ್ಠಞ್ಚ ಸುದ್ಧಿಕಂ;

ಭುಞ್ಜನ್ತಾಮಕಧಞ್ಞಾನಂ, ದ್ವೇ ವಿಘಾಸೇನ ದಸ್ಸನಾ.

ಅನ್ಧಕಾರೇ ಪಟಿಚ್ಛನ್ನೇ, ಅಜ್ಝೋಕಾಸೇ ರಥಿಕಾಯ ಚ;

ಪುರೇ ಪಚ್ಛಾ ವಿಕಾಲೇ ಚ, ದುಗ್ಗಹಿ ನಿರಯೇ ವಧಿ.

ನಗ್ಗೋದಕಾ ವಿಸಿಬ್ಬೇತ್ವಾ, ಪಞ್ಚಾಹಿಕಂ ಸಙ್ಕಮನೀಯಂ;

ಗಣಂ ವಿಭಙ್ಗಸಮಣಂ, ದುಬ್ಬಲಂ ಕಥಿನೇನ ಚ.

ಏಕಮಞ್ಚತ್ಥರಣೇನ, ಸಞ್ಚಿಚ್ಚ ಸಹಜೀವಿನೀ;

ದತ್ವಾ ಸಂಸಟ್ಠಅನ್ತೋ ಚ, ತಿರೋವಸ್ಸಂ ನ ಪಕ್ಕಮೇ.

ರಾಜಾ ಆಸನ್ದಿ ಸುತ್ತಞ್ಚ, ಗಿಹಿ ವೂಪಸಮೇನ ಚ;

ದದೇ ಚೀವರಾವಸಥಂ, ಪರಿಯಾಪುಣಞ್ಚ ವಾಚಯೇ.

ಆರಾಮಕ್ಕೋಸಚಣ್ಡೀ ಚ, ಭುಞ್ಜೇಯ್ಯ ಕುಲಮಚ್ಛರೀ;

ವಾಸೇ ಪವಾರಣೋವಾದಂ, ದ್ವೇ ಧಮ್ಮಾ ಪಸಾಖೇನ ಚ.

ಗಬ್ಭೀ ಪಾಯನ್ತೀ ಛ ಧಮ್ಮೇ, ಅಸಮ್ಮತೂನದ್ವಾದಸ;

ಪರಿಪುಣ್ಣಞ್ಚ ಸಙ್ಘೇನ, ಸಹ ವುಟ್ಠಾ ಛ ಪಞ್ಚ ಚ.

ಕುಮಾರೀ ದ್ವೇ ಚ ಸಙ್ಘೇನ, ದ್ವಾದಸ ಸಮ್ಮತೇನ ಚ;

ಅಲಂ ಸಚೇ ಚ ದ್ವೇವಸ್ಸಂ, ಸಂಸಟ್ಠಾ ಸಾಮಿಕೇನ ಚ.

ಪಾರಿವಾಸಿಕಾನುವಸ್ಸಂ, ದುವೇ ವುಟ್ಠಾಪನೇನ ಚ;

ಛತ್ತಯಾನೇನ ಸಙ್ಘಾಣಿ, ಇತ್ಥಾಲಙ್ಕಾರವಣ್ಣಕೇ.

ಪಿಞ್ಞಾಕಭಿಕ್ಖುನೀ ಚೇವ, ಸಿಕ್ಖಾ ಚ ಸಾಮಣೇರಿಕಾ;

ಗಿಹಿ ಭಿಕ್ಖುಸ್ಸ ಪುರತೋ, ಅನೋಕಾಸಂ ಸಙ್ಕಚ್ಚಿಕಾತಿ.

ತೇಸಂ ವಗ್ಗಾನಂ ಉದ್ದಾನಂ –

ಲಸುಣನ್ಧಕಾರಾ ನ್ಹಾನಾ, ತುವಟ್ಟಾ ಚಿತ್ತಗಾರಕಾ;

ಆರಾಮಂ ಗಬ್ಭಿನೀ ಚೇವ, ಕುಮಾರೀ ಛತ್ತುಪಾಹನಾತಿ.