೪. ಸಙ್ಗಹಿತವಾರೋ

೧೯೬. ಮೇಥುನಂ ಧಮ್ಮಂ ಪಟಿಸೇವನಪಚ್ಚಯಾ ಆಪತ್ತಿಯೋ ಸತ್ತನ್ನಂ ಆಪತ್ತಿಕ್ಖನ್ಧಾನಂ ಕತಿಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ? ಮೇಥುನಂ ಧಮ್ಮಂ ಪಟಿಸೇವನಪಚ್ಚಯಾ ಆಪತ್ತಿಯೋ ಸತ್ತನ್ನಂ ಆಪತ್ತಿಕ್ಖನ್ಧಾನಂ ಚತೂಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ – ಸಿಯಾ ಪಾರಾಜಿಕಾಪತ್ತಿಕ್ಖನ್ಧೇನ, ಸಿಯಾ ಥುಲ್ಲಚ್ಚಯಾಪತ್ತಿಕ್ಖನ್ಧೇನ, ಸಿಯಾ ಪಾಚಿತ್ತಿಯಾಪತ್ತಿಕ್ಖನ್ಧೇನ, ಸಿಯಾ ದುಕ್ಕಟಾಪತ್ತಿಕ್ಖನ್ಧೇನ…ಪೇ….

ಅನಾದರಿಯಂ ಪಟಿಚ್ಚ ಉದಕೇ ಉಚ್ಚಾರಂ ವಾ ಪಸ್ಸಾವಂ ವಾ ಖೇಳಂ ವಾ ಕರಣಪಚ್ಚಯಾ ಆಪತ್ತಿ ಸತ್ತನ್ನಂ ಆಪತ್ತಿಕ್ಖನ್ಧಾನಂ ಕತಿಹಿ ಆಪತ್ತಿಕ್ಖನ್ಧೇಹಿ ಸಙ್ಗಹಿತಾ? ಅನಾದರಿಯಂ ಪಟಿಚ್ಚ ಉದಕೇ ಉಚ್ಚಾರಂ ವಾ ಪಸ್ಸಾವಂ ವಾ ಖೇಳಂ ವಾ ಕರಣಪಚ್ಚಯಾ ಆಪತ್ತಿ ಸತ್ತನ್ನಂ ಆಪತ್ತಿಕ್ಖನ್ಧಾನಂ ಏಕೇನ ಆಪತ್ತಿಕ್ಖನ್ಧೇನ ಸಙ್ಗಹಿತಾ – ದುಕ್ಕಟಾಪತ್ತಿಕ್ಖನ್ಧೇನ.

ಸಙ್ಗಹಿತವಾರೋ ನಿಟ್ಠಿತೋ ಚತುತ್ಥೋ.