೯. ರಾಜವಗ್ಗೋ

೧೩೬. ಪುಬ್ಬೇ ಅಪ್ಪಟಿಸಂವಿದಿತೇನ ರಞ್ಞೋ ಅನ್ತೇಪುರಂ ಪವಿಸನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಆಯಸ್ಮನ್ತಂ ಆನನ್ದಂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಆಯಸ್ಮಾ ಆನನ್ದೋ ಪುಬ್ಬೇ ಅಪ್ಪಟಿಸಂವಿದಿತೋ ರಞ್ಞೋ ಅನ್ತೇಪುರಂ ಪಾವಿಸಿ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ ಕಥಿನಕೇ…ಪೇ….

೧೩೭. ರತನಂ ಉಗ್ಗಣ್ಹನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಅಞ್ಞತರಂ ಭಿಕ್ಖುಂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಅಞ್ಞತರೋ ಭಿಕ್ಖು ರತನಂ ಉಗ್ಗಹೇಸಿ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ, ದ್ವೇ ಅನುಪಞ್ಞತ್ತಿಯೋ. ಛನ್ನಂ ಆಪತ್ತಿಸಮುಟ್ಠಾನಾನಂ ಛಹಿ ಸಮುಟ್ಠಾನೇಹಿ ಸಮುಟ್ಠಾತಿ…ಪೇ….

೧೩೮. ಸನ್ತಂ ಭಿಕ್ಖುಂ ಅನಾಪುಚ್ಛಾ ವಿಕಾಲೇ ಗಾಮಂ ಪವಿಸನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಛಬ್ಬಗ್ಗಿಯಾ ಭಿಕ್ಖೂ ವಿಕಾಲೇ ಗಾಮಂ ಪವಿಸಿಂಸು, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ, ತಿಸ್ಸೋ ಅನುಪಞ್ಞತ್ತಿಯೋ. ಛನ್ನಂ ಆಪತ್ತಿಸಮುಟ್ಠಾನಾನಂ ದ್ವೀಹಿ ಸಮುಟ್ಠಾನೇಹಿ ಸಮುಟ್ಠಾತಿ ಕಥಿನಕೇ…ಪೇ….

೧೩೯. ಅಟ್ಠಿಮಯಂ ವಾ ದನ್ತಮಯಂ ವಾ ವಿಸಾಣಮಯಂ ವಾ ಸೂಚಿಘರಂ ಕಾರಾಪೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಕ್ಕೇಸು ಪಞ್ಞತ್ತಂ. ಕಂ ಆರಬ್ಭಾತಿ? ಸಮ್ಬಹುಲೇ ಭಿಕ್ಖೂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಸಮ್ಬಹುಲಾ ಭಿಕ್ಖೂ ನ ಮತ್ತಂ ಜಾನಿತ್ವಾ ಬಹೂ ಸೂಚಿಘರೇ ವಿಞ್ಞಾಪೇಸುಂ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ಛಹಿ ಸಮುಟ್ಠಾನೇಹಿ ಸಮುಟ್ಠಾತಿ…ಪೇ….

೧೪೦. ಪಮಾಣಾತಿಕ್ಕನ್ತಂ ಮಞ್ಚಂ ವಾ ಪೀಠಂ ವಾ ಕಾರಾಪೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಆಯಸ್ಮನ್ತಂ ಉಪನನ್ದಂ ಸಕ್ಯಪುತ್ತಂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಆಯಸ್ಮಾ ಉಪನನ್ದೋ ಸಕ್ಯಪುತ್ತೋ ಉಚ್ಚೇ ಮಞ್ಚೇ ಸಯಿ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ಛಹಿ ಸಮುಟ್ಠಾನೇಹಿ ಸಮುಟ್ಠಾತಿ…ಪೇ….

೧೪೧. ಮಞ್ಚಂ ವಾ ಪೀಠಂ ವಾ ತೂಲೋನದ್ಧಂ ಕಾರಾಪೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಛಬ್ಬಗ್ಗಿಯಾ ಭಿಕ್ಖೂ ಮಞ್ಚಂ ವಾ ಪೀಠಂ ವಾ ತೂಲೋನದ್ಧಂ ಕಾರಾಪೇಸುಂ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ಛಹಿ ಸಮುಟ್ಠಾನೇಹಿ ಸಮುಟ್ಠಾತಿ…ಪೇ….

೧೪೨. ಪಮಾಣಾತಿಕ್ಕನ್ತಂ ನಿಸೀದನಂ ಕಾರಾಪೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಛಬ್ಬಗ್ಗಿಯಾ ಭಿಕ್ಖೂ ಅಪ್ಪಮಾಣಿಕಾನಿ ನಿಸೀದನಾನಿ ಧಾರೇಸುಂ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ, ಏಕಾ ಅನುಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ಛಹಿ ಸಮುಟ್ಠಾನೇಹಿ ಸಮುಟ್ಠಾತಿ…ಪೇ….

೧೪೩. ಪಮಾಣಾತಿಕ್ಕನ್ತಂ ಕಣ್ಡುಪ್ಪಟಿಚ್ಛಾದಿಂ ಕಾರಾಪೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಛಬ್ಬಗ್ಗಿಯಾ ಭಿಕ್ಖೂ ಅಪ್ಪಮಾಣಿಕಾಯೋ ಕಣ್ಡುಪ್ಪಟಿಚ್ಛಾದಿಯೋ ಧಾರೇಸುಂ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ಛಹಿ ಸಮುಟ್ಠಾನೇಹಿ ಸಮುಟ್ಠಾತಿ…ಪೇ….

೧೪೪. ಪಮಾಣಾತಿಕ್ಕನ್ತಂ ವಸ್ಸಿಕಸಾಟಿಕಂ ಕಾರಾಪೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಛಬ್ಬಗ್ಗಿಯೇ ಭಿಕ್ಖೂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಛಬ್ಬಗ್ಗಿಯಾ ಭಿಕ್ಖೂ ಅಪ್ಪಮಾಣಿಕಾಯೋ ವಸ್ಸಿಕಸಾಟಿಕಾಯೋ ಧಾರೇಸುಂ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ಛಹಿ ಸಮುಟ್ಠಾನೇಹಿ ಸಮುಟ್ಠಾತಿ…ಪೇ….

೧೪೫. ಸುಗತಚೀವರಪ್ಪಮಾಣಂ ಚೀವರಂ ಕಾರಾಪೇನ್ತಸ್ಸ ಪಾಚಿತ್ತಿಯಂ ಕತ್ಥ ಪಞ್ಞತ್ತನ್ತಿ? ಸಾವತ್ಥಿಯಂ ಪಞ್ಞತ್ತಂ. ಕಂ ಆರಬ್ಭಾತಿ? ಆಯಸ್ಮನ್ತಂ ನನ್ದಂ ಆರಬ್ಭ. ಕಿಸ್ಮಿಂ ವತ್ಥುಸ್ಮಿನ್ತಿ? ಆಯಸ್ಮಾ ನನ್ದೋ ಸುಗತಚೀವರಪ್ಪಮಾಣಂ ಚೀವರಂ ಧಾರೇಸಿ, ತಸ್ಮಿಂ ವತ್ಥುಸ್ಮಿಂ. ಏಕಾ ಪಞ್ಞತ್ತಿ. ಛನ್ನಂ ಆಪತ್ತಿಸಮುಟ್ಠಾನಾನಂ ಛಹಿ ಸಮುಟ್ಠಾನೇಹಿ ಸಮುಟ್ಠಾತಿ…ಪೇ….

ರಾಜವಗ್ಗೋ ನವಮೋ.

ದ್ವೇನವುತಿ ಪಾಚಿತ್ತಿಯಾ ನಿಟ್ಠಿತಾ.

ಖುದ್ದಕಂ ಸಮತ್ತಂ.

ತಸ್ಸುದ್ದಾನಂ –

ಮುಸಾ ಓಮಸಪೇಸುಞ್ಞಂ, ಪದಸೇಯ್ಯಾ ಚ ಇತ್ಥಿಯಾ;

ಅಞ್ಞತ್ರ ವಿಞ್ಞುನಾ ಭೂತಾ [ದೇಸನಾರೋಚನಾ ಚೇವ (ಸೀ. ಸ್ಯಾ.)], ದುಟ್ಠುಲ್ಲಾಪತ್ತಿ ಖಣನಾ.

ಭೂತಂ ಅಞ್ಞಾಯ ಉಜ್ಝಾಯಿ [ಭೂತಞ್ಞವಾದಉಜ್ಝಾಯಿ (ಸೀ.)], ಮಞ್ಚೋ ಸೇಯ್ಯೋ ಚ ವುಚ್ಚತಿ;

ಪುಬ್ಬೇ ನಿಕ್ಕಡ್ಢನಾಹಚ್ಚ, ದ್ವಾರಂ ಸಪ್ಪಾಣಕೇನ ಚ.

ಅಸಮ್ಮತಾ ಅತ್ಥಙ್ಗತೇ, ಉಪಸ್ಸಯಾಮಿಸೇನ ಚ;

ದದೇ ಸಿಬ್ಬೇ ವಿಧಾನೇನ, ನಾವಾ ಭುಞ್ಜೇಯ್ಯ ಏಕತೋ.

ಪಿಣ್ಡಂ ಗಣಂ ಪರಂ ಪೂವಂ, ಪವಾರಿತೋ ಪವಾರಿತಂ;

ವಿಕಾಲಂ ಸನ್ನಿಧಿ ಖೀರಂ, ದನ್ತಪೋನೇನ ತೇ ದಸ.

ಅಚೇಲಕಂ ಉಯ್ಯೋಖಜ್ಜ [ಅಚೇಲಕಾನುಪಖಜ್ಜ (ಕ.)], ಪಟಿಚ್ಛನ್ನಂ ರಹೇನ ಚ;

ನಿಮನ್ತಿತೋ ಪಚ್ಚಯೇಹಿ, ಸೇನಾವಸನುಯ್ಯೋಧಿಕಂ.

ಸುರಾ ಅಙ್ಗುಲಿ ಹಾಸೋ ಚ, ಅನಾದರಿಯಞ್ಚ ಭಿಂಸನಂ;

ಜೋತಿ ನಹಾನ ದುಬ್ಬಣ್ಣಂ, ಸಾಮಂ ಅಪನಿಧೇನ ಚ.

ಸಞ್ಚಿಚ್ಚುದಕಕಮ್ಮಾ ಚ, ದುಟ್ಠುಲ್ಲಂ ಊನವೀಸತಿ;

ಥೇಯ್ಯಇತ್ಥಿಅವದೇಸಂ [ಅರಿಟ್ಠಕಂ (ವಿಭಙ್ಗೇ)], ಸಂವಾಸೇ ನಾಸಿತೇನ ಚ.

ಸಹಧಮ್ಮಿಕವಿಲೇಖಾ, ಮೋಹೋ ಪಹಾರೇನುಗ್ಗಿರೇ;

ಅಮೂಲಕಞ್ಚ ಸಞ್ಚಿಚ್ಚ, ಸೋಸ್ಸಾಮಿ ಖಿಯ್ಯಪಕ್ಕಮೇ.

ಸಙ್ಘೇನ ಚೀವರಂ ದತ್ವಾ, ಪರಿಣಾಮೇಯ್ಯ ಪುಗ್ಗಲೇ;

ರಞ್ಞಞ್ಚ ರತನಂ ಸನ್ತಂ, ಸೂಚಿ ಮಞ್ಚೋ ಚ ತೂಲಿಕಾ;

ನಿಸೀದನಂ ಕಣ್ಡುಚ್ಛಾದಿ, ವಸ್ಸಿಕಾ ಸುಗತೇನ ಚಾತಿ.

ತೇಸಂ ವಗ್ಗಾನಂ ಉದ್ದಾನಂ –

ಮುಸಾ ಭೂತಾ ಚ ಓವಾದೋ, ಭೋಜನಾಚೇಲಕೇನ ಚ;

ಸುರಾ ಸಪ್ಪಾಣಕಾ ಧಮ್ಮೋ, ರಾಜವಗ್ಗೇನ ತೇ ನವಾತಿ.