೩. ಖಮ್ಭಕತವಗ್ಗೋ

೫೯೬. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಖಮ್ಭಕತಾ ಅನ್ತರಘರೇ ಗಚ್ಛನ್ತಿ…ಪೇ….

‘‘ನ ಖಮ್ಭಕತೋ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ’’ತಿ.

ನ ಖಮ್ಭಕತೇನ ಅನ್ತರಘರೇ ಗನ್ತಬ್ಬಂ. ಯೋ ಅನಾದರಿಯಂ ಪಟಿಚ್ಚ ಏಕತೋ ವಾ ಉಭತೋ ವಾ ಖಮ್ಭಂ ಕತ್ವಾ ಅನ್ತರಘರೇ ಗಚ್ಛತಿ, ಆಪತ್ತಿ ದುಕ್ಕಟಸ್ಸ.

ಅನಾಪತ್ತಿ ಅಸಞ್ಚಿಚ್ಚ…ಪೇ… ಆದಿಕಮ್ಮಿಕಸ್ಸಾತಿ.

ಪಠಮಸಿಕ್ಖಾಪದಂ ನಿಟ್ಠಿತಂ.

೫೯೭. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಖಮ್ಭಕತಾ ಅನ್ತರಘರೇ ನಿಸೀದನ್ತಿ…ಪೇ….

‘‘ನ ಖಮ್ಭಕತೋ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ’’ತಿ.

ನ ಖಮ್ಭಕತೇನ ಅನ್ತರಘರೇ ನಿಸೀದಿತಬ್ಬಂ. ಯೋ ಅನಾದರಿಯಂ ಪಟಿಚ್ಚ ಏಕತೋ ವಾ ಉಭತೋ ವಾ ಖಮ್ಭಂ ಕತ್ವಾ ಅನ್ತರಘರೇ ನಿಸೀದತಿ, ಆಪತ್ತಿ ದುಕ್ಕಟಸ್ಸ.

ಅನಾಪತ್ತಿ ಅಸಞ್ಚಿಚ್ಚ, ಅಸ್ಸತಿಯಾ, ಅಜಾನನ್ತಸ್ಸ, ಗಿಲಾನಸ್ಸ, ವಾಸೂಪಗತಸ್ಸ, ಆಪದಾಸು, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ದುತಿಯಸಿಕ್ಖಾಪದಂ ನಿಟ್ಠಿತಂ.

೫೯೮. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಸಸೀಸಂ ಪಾರುಪಿತ್ವಾ ಅನ್ತರಘರೇ ಗಚ್ಛನ್ತಿ…ಪೇ….

‘‘ನ ಓಗುಣ್ಠಿತೋ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ’’ತಿ.

ನ ಓಗುಣ್ಠಿತೇನ ಅನ್ತರಘರೇ ಗನ್ತಬ್ಬಂ. ಯೋ ಅನಾದರಿಯಂ ಪಟಿಚ್ಚ ಸಸೀಸಂ ಪಾರುಪಿತ್ವಾ ಅನ್ತರಘರೇ ಗಚ್ಛತಿ, ಆಪತ್ತಿ ದುಕ್ಕಟಸ್ಸ.

ಅನಾಪತ್ತಿ ಅಸಞ್ಚಿಚ್ಚ…ಪೇ… ಆದಿಕಮ್ಮಿಕಸ್ಸಾತಿ.

ತತಿಯಸಿಕ್ಖಾಪದಂ ನಿಟ್ಠಿತಂ.

೫೯೯. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಸಸೀಸಂ ಪಾರುಪಿತ್ವಾ ಅನ್ತರಘರೇ ನಿಸೀದನ್ತಿ…ಪೇ….

‘‘ನ ಓಗುಣ್ಠಿತೋ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ’’ತಿ.

ನ ಓಗುಣ್ಠಿತೇನ ಅನ್ತರಘರೇ ನಿಸೀದಿತಬ್ಬಂ. ಯೋ ಅನಾದರಿಯಂ ಪಟಿಚ್ಚ ಸಸೀಸಂ ಪಾರುಪಿತ್ವಾ ಅನ್ತರಘರೇ ನಿಸೀದತಿ, ಆಪತ್ತಿ ದುಕ್ಕಟಸ್ಸ.

ಅನಾಪತ್ತಿ ಅಸಞ್ಚಿಚ್ಚ, ಅಸ್ಸತಿಯಾ, ಅಜಾನನ್ತಸ್ಸ, ಗಿಲಾನಸ್ಸ, ವಾಸೂಪಗತಸ್ಸ, ಆಪದಾಸು, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ಚತುತ್ಥಸಿಕ್ಖಾಪದಂ ನಿಟ್ಠಿತಂ.

೬೦೦. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಉಕ್ಕುಟಿಕಾಯ ಅನ್ತರಘರೇ ಗಚ್ಛನ್ತಿ…ಪೇ….

‘‘ನ ಉಕ್ಕುಟಿಕಾಯ ಅನ್ತರಘರೇ ಗಮಿಸ್ಸಾಮೀತಿ ಸಿಕ್ಖಾ ಕರಣೀಯಾ’’ತಿ.

ನ ಉಕ್ಕುಟಿಕಾಯ ಅನ್ತರಘರೇ ಗನ್ತಬ್ಬಂ. ಯೋ ಅನಾದರಿಯಂ ಪಟಿಚ್ಚ ಉಕ್ಕುಟಿಕಾಯ ಅನ್ತರಘರೇ ಗಚ್ಛತಿ, ಆಪತ್ತಿ ದುಕ್ಕಟಸ್ಸ.

ಅನಾಪತ್ತಿ ಅಸಞ್ಚಿಚ್ಚ…ಪೇ… ಆದಿಕಮ್ಮಿಕಸ್ಸಾತಿ.

ಪಞ್ಚಮಸಿಕ್ಖಾಪದಂ ನಿಟ್ಠಿತಂ.

೬೦೧. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಪಲ್ಲತ್ಥಿಕಾಯ [ಪಲ್ಲತ್ತಿಕಾಯ (ಕ.)] ಅನ್ತರಘರೇ ನಿಸೀದನ್ತಿ…ಪೇ….

‘‘ನ ಪಲ್ಲತ್ಥಿಕಾಯ ಅನ್ತರಘರೇ ನಿಸೀದಿಸ್ಸಾಮೀತಿ ಸಿಕ್ಖಾ ಕರಣೀಯಾ’’ತಿ.

ನ ಪಲ್ಲತ್ಥಿಕಾಯ ಅನ್ತರಘರೇ ನಿಸೀದಿತಬ್ಬಂ. ಯೋ ಅನಾದರಿಯಂ ಪಟಿಚ್ಚ ಹತ್ಥಪಲ್ಲತ್ಥಿಕಾಯ ವಾ ದುಸ್ಸಪಲ್ಲತ್ಥಿಕಾಯ ವಾ ಅನ್ತರಘರೇ ನಿಸೀದತಿ, ಆಪತ್ತಿ ದುಕ್ಕಟಸ್ಸ.

ಅನಾಪತ್ತಿ ಅಸಞ್ಚಿಚ್ಚ, ಅಸ್ಸತಿಯಾ, ಅಜಾನನ್ತಸ್ಸ, ಗಿಲಾನಸ್ಸ, ವಾಸೂಪಗತಸ್ಸ, ಆಪದಾಸು,

ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ಛಟ್ಠಸಿಕ್ಖಾಪದಂ ನಿಟ್ಠಿತಂ.

೬೦೨. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಅಸಕ್ಕಚ್ಚಂ ಪಿಣ್ಡಪಾತಂ ಪಟಿಗ್ಗಣ್ಹನ್ತಿ ಛಡ್ಡೇತುಕಾಮಾ ವಿಯ…ಪೇ….

‘‘ಸಕ್ಕಚ್ಚಂ ಪಿಣ್ಡಪಾತಂ ಪಟಿಗ್ಗಹೇಸ್ಸಾಮೀತಿ ಸಿಕ್ಖಾ ಕರಣೀಯಾ’’ತಿ.

ಸಕ್ಕಚ್ಚಂ ಪಿಣ್ಡಪಾತೋ ಪಟಿಗ್ಗಹೇತಬ್ಬೋ. ಯೋ ಅನಾದರಿಯಂ ಪಟಿಚ್ಚ ಅಸಕ್ಕಚ್ಚಂ ಪಿಣ್ಡಪಾತಂ ಪಟಿಗ್ಗಣ್ಹಾತಿ ಛಡ್ಡೇತುಕಾಮೋ ವಿಯ, ಆಪತ್ತಿ ದುಕ್ಕಟಸ್ಸ.

ಅನಾಪತ್ತಿ ಅಸಞ್ಚಿಚ್ಚ…ಪೇ… ಆದಿಕಮ್ಮಿಕಸ್ಸಾತಿ.

ಸತ್ತಮಸಿಕ್ಖಾಪದಂ ನಿಟ್ಠಿತಂ.

೬೦೩. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ತಹಂ ತಹಂ ಓಲೋಕೇನ್ತಾ ಪಿಣ್ಡಪಾತಂ ಪಟಿಗ್ಗಣ್ಹನ್ತಿ, ಆಕಿರನ್ತೇಪಿ ಅತಿಕ್ಕನ್ತೇಪಿ [ಅತಿಕ್ಕಮನ್ತೇಪಿ (ಸೀ.)] ನ ಜಾನನ್ತಿ…ಪೇ….

‘‘ಪತ್ತಸಞ್ಞೀ ಪಿಣ್ಡಪಾತಂ ಪಟಿಗ್ಗಹೇಸ್ಸಾಮೀತಿ ಸಿಕ್ಖಾ ಕರಣೀಯಾ’’ತಿ.

ಪತ್ತಸಞ್ಞಿನಾ ಪಿಣ್ಡಪಾತೋ ಪಟಿಗ್ಗಹೇತಬ್ಬೋ. ಯೋ ಅನಾದರಿಯಂ ಪಟಿಚ್ಚ ತಹಂ ತಹಂ ಓಲೋಕೇನ್ತೋ ಪಿಣ್ಡಪಾತಂ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ.

ಅನಾಪತ್ತಿ ಅಸಞ್ಚಿಚ್ಚ…ಪೇ… ಆದಿಕಮ್ಮಿಕಸ್ಸಾತಿ.

ಅಟ್ಠಮಸಿಕ್ಖಾಪದಂ ನಿಟ್ಠಿತಂ.

೬೦೪. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಪಿಣ್ಡಪಾತಂ ಪಟಿಗ್ಗಣ್ಹನ್ತಾ ಸೂಪಞ್ಞೇವ ಬಹುಂ ಪಟಿಗ್ಗಣ್ಹನ್ತಿ…ಪೇ….

‘‘ಸಮಸೂಪಕಂ ಪಿಣ್ಡಪಾತಂ ಪಟಿಗ್ಗಹೇಸ್ಸಾಮೀತಿ ಸಿಕ್ಖಾ ಕರಣೀಯಾ’’ತಿ.

ಸೂಪೋ ನಾಮ ದ್ವೇ ಸೂಪಾ – ಮುಗ್ಗಸೂಪೋ, ಮಾಸಸೂಪೋ. ಹತ್ಥಹಾರಿಯೋ ಸಮಸೂಪಕೋ ಪಿಣ್ಡಪಾತೋ ಪಟಿಗ್ಗಹೇತಬ್ಬೋ. ಯೋ ಅನಾದರಿಯಂ ಪಟಿಚ್ಚ ಸೂಪಞ್ಞೇವ ಬಹುಂ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ.

ಅನಾಪತ್ತಿ ಅಸಞ್ಚಿಚ್ಚ, ಅಸ್ಸತಿಯಾ, ಅಜಾನನ್ತಸ್ಸ, ಗಿಲಾನಸ್ಸ, ರಸರಸೇ, ಞಾತಕಾನಂ ಪವಾರಿತಾನಂ, ಅಞ್ಞಸ್ಸತ್ಥಾಯ, ಅತ್ತನೋ ಧನೇನ, ಆಪದಾಸು, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ನವಮಸಿಕ್ಖಾಪದಂ ನಿಟ್ಠಿತಂ.

೬೦೫. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಥೂಪೀಕತಂ ಪಿಣ್ಡಪಾತಂ ಪಟಿಗ್ಗಣ್ಹನ್ತಿ…ಪೇ….

‘‘ಸಮತಿತ್ತಿಕಂ [ಸಮತಿತ್ಥಿಕಂ (ಕ.)] ಪಿಣ್ಡಪಾತಂ ಪಟಿಗ್ಗಹೇಸ್ಸಾಮೀತಿ ಸಿಕ್ಖಾ ಕರಣೀಯಾ’’ತಿ.

ಸಮತಿತ್ತಿಕೋ [ಸಮತಿತ್ಥಿಕಂ (ಕ.)] ಪಿಣ್ಡಪಾತೋ ಪಟಿಗ್ಗಹೇತಬ್ಬೋ. ಯೋ ಅನಾದರಿಯಂ ಪಟಿಚ್ಚ ಥೂಪೀಕತಂ ಪಿಣ್ಡಪಾತಂ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ.

ಅನಾಪತ್ತಿ ಅಸಞ್ಚಿಚ್ಚ, ಅಸ್ಸತಿಯಾ, ಅಜಾನನ್ತಸ್ಸ, ಆಪದಾಸು, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ದಸಮಸಿಕ್ಖಾಪದಂ ನಿಟ್ಠಿತಂ.

ಖಮ್ಭಕತವಗ್ಗೋ ತತಿಯೋ.