೬. ಪಾಟಿದೇಸನೀಯಕಣ್ಡಂ

೧. ಪಠಮಪಾಟಿದೇಸನೀಯಸಿಕ್ಖಾಪದಂ

ಇಮೇ ಖೋ ಪನಾಯಸ್ಮನ್ತೋ ಚತ್ತಾರೋ ಪಾಟಿದೇಸನೀಯಾ

ಧಮ್ಮಾ ಉದ್ದೇಸಂ ಆಗಚ್ಛನ್ತಿ.

೫೫೨. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಅಞ್ಞತರಾ ಭಿಕ್ಖುನೀ ಸಾವತ್ಥಿಯಂ ಪಿಣ್ಡಾಯ ಚರಿತ್ವಾ ಪಟಿಕ್ಕಮನಕಾಲೇ ಅಞ್ಞತರಂ ಭಿಕ್ಖುಂ ಪಸ್ಸಿತ್ವಾ ಏತದವೋಚ – ‘‘ಹನ್ದಾಯ್ಯ, ಭಿಕ್ಖಂ ಪಟಿಗ್ಗಣ್ಹಾ’’ತಿ. ‘‘ಸುಟ್ಠು, ಭಗಿನೀ’’ತಿ ಸಬ್ಬೇವ ಅಗ್ಗಹೇಸಿ. ಸಾ ಉಪಕಟ್ಠೇ ಕಾಲೇ ನಾಸಕ್ಖಿ ಪಿಣ್ಡಾಯ ಚರಿತುಂ, ಛಿನ್ನಭತ್ತಾ ಅಹೋಸಿ. ಅಥ ಖೋ ಸಾ ಭಿಕ್ಖುನೀ ದುತಿಯಮ್ಪಿ ದಿವಸಂ…ಪೇ… ತತಿಯಮ್ಪಿ ದಿವಸಂ ಸಾವತ್ಥಿಯಂ ಪಿಣ್ಡಾಯ ಚರಿತ್ವಾ ಪಟಿಕ್ಕಮನಕಾಲೇ ತಂ ಭಿಕ್ಖುಂ ಪಸ್ಸಿತ್ವಾ ಏತದವೋಚ – ‘‘ಹನ್ದಾಯ್ಯ, ಭಿಕ್ಖಂ ಪಟಿಗ್ಗಣ್ಹಾ’’ತಿ. ‘‘ಸುಟ್ಠು, ಭಗಿನೀ’’ತಿ ಸಬ್ಬೇವ ಅಗ್ಗಹೇಸಿ. ಸಾ ಉಪಕಟ್ಠೇ ಕಾಲೇ ನಾಸಕ್ಖಿ ಪಿಣ್ಡಾಯ ಚರಿತುಂ, ಛಿನ್ನಭತ್ತಾ ಅಹೋಸಿ. ಅಥ ಖೋ ಸಾ ಭಿಕ್ಖುನೀ ಚತುತ್ಥೇ ದಿವಸೇ ರಥಿಕಾಯ ಪವೇಧೇನ್ತೀ ಗಚ್ಛತಿ. ಸೇಟ್ಠಿ ಗಹಪತಿ ರಥೇನ ಪಟಿಪಥಂ ಆಗಚ್ಛನ್ತೋ ತಂ ಭಿಕ್ಖುನಿಂ ಏತದವೋಚ – ‘‘ಅಪೇಹಾಯ್ಯೇ’’ತಿ. ಸಾ ವೋಕ್ಕಮನ್ತೀ ತತ್ಥೇವ ಪರಿಪತಿ. ಸೇಟ್ಠಿ ಗಹಪತಿ ತಂ ಭಿಕ್ಖುನಿಂ ಖಮಾಪೇಸಿ – ‘‘ಖಮಾಹಾಯ್ಯೇ, ಮಯಾಸಿ ಪಾತಿತಾ’’ತಿ. ‘‘ನಾಹಂ, ಗಹಪತಿ, ತಯಾ ಪಾತಿತಾ. ಅಪಿಚ, ಅಹಮೇವ ದುಬ್ಬಲಾ’’ತಿ. ‘‘ಕಿಸ್ಸ ಪನ ತ್ವಂ, ಅಯ್ಯೇ, ದುಬ್ಬಲಾ’’ತಿ? ಅಥ ಖೋ ಸಾ ಭಿಕ್ಖುನೀ ಸೇಟ್ಠಿಸ್ಸ ಗಹಪತಿಸ್ಸ ಏತಮತ್ಥಂ ಆರೋಚೇಸಿ. ಸೇಟ್ಠಿ ಗಹಪತಿ ತಂ ಭಿಕ್ಖುನಿಂ ಘರಂ ನೇತ್ವಾ ಭೋಜೇತ್ವಾ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಭದನ್ತಾ ಭಿಕ್ಖುನಿಯಾ ಹತ್ಥತೋ ಆಮಿಸಂ ಪಟಿಗ್ಗಹೇಸ್ಸನ್ತಿ! ಕಿಚ್ಛಲಾಭೋ ಮಾತುಗಾಮೋ’’ತಿ!

ಅಸ್ಸೋಸುಂ ಖೋ ಭಿಕ್ಖೂ ತಸ್ಸ ಸೇಟ್ಠಿಸ್ಸ ಗಹಪತಿಸ್ಸ ಉಜ್ಝಾಯನ್ತಸ್ಸ ಖಿಯ್ಯನ್ತಸ್ಸ ವಿಪಾಚೇನ್ತಸ್ಸ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖು ಭಿಕ್ಖುನಿಯಾ ಹತ್ಥತೋ ಆಮಿಸಂ ಪಟಿಗ್ಗಹೇಸ್ಸತೀ’’ತಿ …ಪೇ… ಸಚ್ಚಂ ಕಿರ ತ್ವಂ, ಭಿಕ್ಖು, ಭಿಕ್ಖುನಿಯಾ ಹತ್ಥತೋ ಆಮಿಸಂ ಪಟಿಗ್ಗಹೇಸೀತಿ? ‘‘ಸಚ್ಚಂ, ಭಗವಾ’’ತಿ. ‘‘ಞಾತಿಕಾ ತೇ, ಭಿಕ್ಖು, ಅಞ್ಞಾತಿಕಾ’’ತಿ? ‘‘ಅಞ್ಞಾತಿಕಾ, ಭಗವಾ’’ತಿ. ‘‘ಅಞ್ಞಾತಕೋ, ಮೋಘಪುರಿಸ, ಅಞ್ಞಾತಿಕಾಯ ನ ಜಾನಾತಿ ಪತಿರೂಪಂ ವಾ ಅಪ್ಪತಿರೂಪಂ ವಾ ಸನ್ತಂ ವಾ ಅಸನ್ತಂ ವಾ. ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ಅಞ್ಞಾತಿಕಾಯ ಭಿಕ್ಖುನಿಯಾ ಹತ್ಥತೋ ಆಮಿಸಂ ಪಟಿಗ್ಗಹೇಸ್ಸಸಿ! ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೫೫೩. ‘‘ಯೋ ಪನ ಭಿಕ್ಖು ಅಞ್ಞಾತಿಕಾಯ ಭಿಕ್ಖುನಿಯಾ ಅನ್ತರಘರಂ ಪವಿಟ್ಠಾಯ ಹತ್ಥತೋ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದೇಯ್ಯ ವಾ ಭುಞ್ಜೇಯ್ಯ ವಾ, ಪಟಿದೇಸೇತಬ್ಬಂ ತೇನ ಭಿಕ್ಖುನಾ – ‘ಗಾರಯ್ಹಂ, ಆವುಸೋ, ಧಮ್ಮಂ ಆಪಜ್ಜಿಂ ಅಸಪ್ಪಾಯಂ ಪಾಟಿದೇಸನೀಯಂ, ತಂ ಪಟಿದೇಸೇಮೀ’’’ತಿ.

೫೫೪. ಯೋ ಪನಾತಿ ಯೋ ಯಾದಿಸೋ…ಪೇ… ಭಿಕ್ಖೂತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತೋ ಭಿಕ್ಖೂತಿ.

ಅಞ್ಞಾತಿಕಾ ನಾಮ ಮಾತಿತೋ ವಾ. ಪಿತಿತೋ ವಾ ಯಾವ ಸತ್ತಮಾ ಪಿತಾಮಹಯುಗಾ ಅಸಮ್ಬದ್ಧಾ.

ಭಿಕ್ಖುನೀ ನಾಮ ಉಭತೋಸಙ್ಘೇ ಉಪಸಮ್ಪನ್ನಾ.

ಅನ್ತರಘರಂ ನಾಮ ರಥಿಕಾ ಬ್ಯೂಹಂ ಸಿಙ್ಘಾಟಕಂ ಘರಂ.

ಖಾದನೀಯಂ ನಾಮ ಪಞ್ಚ ಭೋಜನಾನಿ – ಯಾಮಕಾಲಿಕಂ ಸತ್ತಾಹಕಾಲಿಕಂ ಯಾವಜೀವಿಕಂ ಠಪೇತ್ವಾ ಅವಸೇಸಂ ಖಾದನೀಯಂ ನಾಮ.

ಭೋಜನೀಯಂ ನಾಮ ಪಞ್ಚ ಭೋಜನಾನಿ – ಓದನೋ, ಕುಮ್ಮಾಸೋ, ಸತ್ತು, ಮಚ್ಛೋ, ಮಂಸಂ. ‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಪಾಟಿದೇಸನೀಯಸ್ಸ.

೫೫೫. ಅಞ್ಞಾತಿಕಾಯ ಅಞ್ಞಾತಿಕಸಞ್ಞೀ ಅನ್ತರಘರಂ ಪವಿಟ್ಠಾಯ ಹತ್ಥತೋ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದತಿ ವಾ ಭುಞ್ಜತಿ ವಾ, ಆಪತ್ತಿ ಪಾಟಿದೇಸನೀಯಸ್ಸ. ಅಞ್ಞಾತಿಕಾಯ ವೇಮತಿಕೋ ಅನ್ತರಘರಂ ಪವಿಟ್ಠಾಯ ಹತ್ಥತೋ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದತಿ ವಾ ಭುಞ್ಜತಿ ವಾ, ಆಪತ್ತಿ ಪಾಟಿದೇಸನೀಯಸ್ಸ. ಅಞ್ಞಾತಿಕಾಯ ಞಾತಿಕಸಞ್ಞೀ ಅನ್ತರಘರಂ ಪವಿಟ್ಠಾಯ ಹತ್ಥತೋ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದತಿ ವಾ ಭುಞ್ಜತಿ ವಾ, ಆಪತ್ತಿ ಪಾಟಿದೇಸನೀಯಸ್ಸ.

ಯಾಮಕಾಲಿಕಂ ಸತ್ತಾಹಕಾಲಿಕಂ ಯಾವಜೀವಿಕಂ ಆಹಾರತ್ಥಾಯ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ದುಕ್ಕಟಸ್ಸ. ಏಕತೋಉಪಸಮ್ಪನ್ನಾಯ ಹತ್ಥತೋ ಖಾದನೀಯಂ ವಾ ಭೋಜನೀಯಂ ವಾ – ‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ದುಕ್ಕಟಸ್ಸ. ಞಾತಿಕಾಯ ಅಞ್ಞಾತಿಕಸಞ್ಞೀ, ಆಪತ್ತಿ ದುಕ್ಕಟಸ್ಸ. ಞಾತಿಕಾಯ ವೇಮತಿಕೋ, ಆಪತ್ತಿ ದುಕ್ಕಟಸ್ಸ. ಞಾತಿಕಾಯ ಞಾತಿಕಸಞ್ಞೀ, ಅನಾಪತ್ತಿ.

೫೫೬. ಅನಾಪತ್ತಿ ಞಾತಿಕಾಯ, ದಾಪೇತಿ ನ ದೇತಿ, ಉಪನಿಕ್ಖಿಪಿತ್ವಾ ದೇತಿ ಅನ್ತರಾರಾಮೇ, ಭಿಕ್ಖುನುಪಸ್ಸಯೇ, ತಿತ್ಥಿಯಸೇಯ್ಯಾಯ, ಪಟಿಕ್ಕಮನೇ, ಗಾಮತೋ ನೀಹರಿತ್ವಾ ದೇತಿ, ಯಾಮಕಾಲಿಕಂ ಸತ್ತಾಹಕಾಲಿಕಂ ಯಾವಜೀವಿಕಂ ‘‘ಸತಿ ಪಚ್ಚಯೇ ಪರಿಭುಞ್ಜಾ’’ತಿ ದೇತಿ, ಸಿಕ್ಖಮಾನಾಯ, ಸಾಮಣೇರಿಯಾ, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ಪಠಮಪಾಟಿದೇಸನೀಯಸಿಕ್ಖಾಪದಂ ನಿಟ್ಠಿತಂ.

೨. ದುತಿಯಪಾಟಿದೇಸನೀಯಸಿಕ್ಖಾಪದಂ

೫೫೭. ತೇನ ಸಮಯೇನ ಬುದ್ಧೋ ಭಗವಾ ರಾಜಗಹೇ ವಿಹರತಿ ವೇಳುವನೇ ಕಲನ್ದಕನಿವಾಪೇ. ತೇನ ಖೋ ಪನ ಸಮಯೇನ ಭಿಕ್ಖೂ ಕುಲೇಸು ನಿಮನ್ತಿತಾ ಭುಞ್ಜನ್ತಿ. ಛಬ್ಬಗ್ಗಿಯಾ ಭಿಕ್ಖುನಿಯೋ ಛಬ್ಬಗ್ಗಿಯಾನಂ ಭಿಕ್ಖೂನಂ ವೋಸಾಸನ್ತಿಯೋ ಠಿತಾ ಹೋನ್ತಿ – ‘‘ಇಧ ಸೂಪಂ ದೇಥ, ಇಧ ಓದನಂ ದೇಥಾ’’ತಿ. ಛಬ್ಬಗ್ಗಿಯಾ ಭಿಕ್ಖೂ ಯಾವದತ್ಥಂ ಭುಞ್ಜನ್ತಿ. ಅಞ್ಞೇ ಭಿಕ್ಖೂ ನ ಚಿತ್ತರೂಪಂ ಭುಞ್ಜನ್ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖೂ ಭಿಕ್ಖುನಿಯೋ ವೋಸಾಸನ್ತಿಯೋ ನ ನಿವಾರೇಸ್ಸನ್ತೀ’’ತಿ…ಪೇ… ಸಚ್ಚಂ ಕಿರ ತುಮ್ಹೇ, ಭಿಕ್ಖವೇ, ಭಿಕ್ಖುನಿಯೋ ವೋಸಾಸನ್ತಿಯೋ ನ ನಿವಾರೇಥಾತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ …ಪೇ… ಕಥಞ್ಹಿ ನಾಮ ತುಮ್ಹೇ, ಮೋಘಪುರಿಸಾ, ಭಿಕ್ಖುನಿಯೋ ವೋಸಾಸನ್ತಿಯೋ ನ ನಿವಾರೇಸ್ಸಥ! ನೇತಂ, ಮೋಘಪುರಿಸಾ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೫೫೮. ‘‘ಭಿಕ್ಖೂ ಪನೇವ ಕುಲೇಸು ನಿಮನ್ತಿತಾ ಭುಞ್ಜನ್ತಿ, ತತ್ರ ಚೇ ಸಾ [ತತ್ರ ಚೇ (ಸ್ಯಾ.)] ಭಿಕ್ಖುನೀ ವೋಸಾಸಮಾನರೂಪಾ ಠಿತಾ ಹೋತಿ – ‘ಇಧ ಸೂಪಂ ದೇಥ, ಇಧ ಓದನಂ ದೇಥಾ’ತಿ, ತೇಹಿ ಭಿಕ್ಖೂಹಿ ಸಾ ಭಿಕ್ಖುನೀ ಅಪಸಾದೇತಬ್ಬಾ – ‘ಅಪಸಕ್ಕ ತಾವ, ಭಗಿನಿ, ಯಾವ ಭಿಕ್ಖೂ ಭುಞ್ಜನ್ತೀ’ತಿ. ಏಕಸ್ಸ ಚೇಪಿ [ಏಕಸ್ಸಪಿ ಚೇ (ಸೀ. ಸ್ಯಾ.)] ಭಿಕ್ಖುನೋ ನ ಪಟಿಭಾಸೇಯ್ಯ ತಂ ಭಿಕ್ಖುನಿಂ ಅಪಸಾದೇತುಂ – ‘ಅಪಸಕ್ಕ ತಾವ, ಭಗಿನಿ, ಯಾವ ಭಿಕ್ಖೂ ಭುಞ್ಜನ್ತೀ’ತಿ ಪಟಿದೇಸೇತಬ್ಬಂ ತೇಹಿ ಭಿಕ್ಖೂಹಿ – ‘ಗಾರಯ್ಹಂ, ಆವುಸೋ, ಧಮ್ಮಂ ಆಪಜ್ಜಿಮ್ಹಾ ಅಸಪ್ಪಾಯಂ ಪಾಟಿದೇಸನೀಯಂ, ತಂ ಪಟಿದೇಸೇಮಾ’’’ತಿ.

೫೫೯. ಭಿಕ್ಖೂ ಪನೇವ ಕುಲೇಸು ನಿಮನ್ತಿತಾ ಭುಞ್ಜನ್ತೀತಿ ಕುಲಂ ನಾಮ ಚತ್ತಾರಿ ಕುಲಾನಿ – ಖತ್ತಿಯಕುಲಂ, ಬ್ರಾಹ್ಮಣಕುಲಂ, ವೇಸ್ಸಕುಲಂ, ಸುದ್ದಕುಲಂ.

ನಿಮನ್ತಿತಾ ಭುಞ್ಜನ್ತೀತಿ ಪಞ್ಚನ್ನಂ ಭೋಜನಾನಂ ಅಞ್ಞತರೇನ ಭೋಜನೇನ ನಿಮನ್ತಿತಾ ಭುಞ್ಜನ್ತಿ.

ಭಿಕ್ಖುನೀ ನಾಮ ಉಭತೋಸಙ್ಘೇ ಉಪಸಮ್ಪನ್ನಾ.

ವೋಸಾಸನ್ತೀ ನಾಮ ಯಥಾಮಿತ್ತತಾ ಯಥಾಸನ್ದಿಟ್ಠತಾ ಯಥಾಸಮ್ಭತ್ತತಾ ಯಥಾಸಮಾನುಪಜ್ಝಾಯಕತಾ ಯಥಾಸಮಾನಾಚರಿಯಕತಾ – ‘‘ಇಧ ಸೂಪಂ ದೇಥ, ಇಧ ಓದನಂ ದೇಥಾ’’ತಿ. ಏಸಾ ವೋಸಾಸನ್ತೀ ನಾಮ.

ತೇಹಿ ಭಿಕ್ಖೂಹೀತಿ ಭುಞ್ಜಮಾನೇಹಿ ಭಿಕ್ಖೂಹಿ.

ಸಾ ಭಿಕ್ಖುನೀತಿ ಯಾ ಸಾ ವೋಸಾಸನ್ತೀ ಭಿಕ್ಖುನೀ.

ತೇಹಿ ಭಿಕ್ಖೂಹಿ ಸಾ ಭಿಕ್ಖುನೀ ಅಪಸಾದೇತಬ್ಬಾ – ‘‘ಅಪಸಕ್ಕ ತಾವ, ಭಗಿನಿ, ಯಾವ ಭಿಕ್ಖೂ ಭುಞ್ಜನ್ತೀ’’ತಿ. ಏಕಸ್ಸ ಚೇಪಿ [ಏಕಸ್ಸಪಿ ಚೇ (ಸೀ. ಸ್ಯಾ.)] ಭಿಕ್ಖುನೋ ಅನಪಸಾದಿತೋ [ಅನಪಸಾದಿತೇ (ಸೀ. ಸ್ಯಾ.)] – ‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಪಾಟಿದೇಸನೀಯಸ್ಸ.

೫೬೦. ಉಪಸಮ್ಪನ್ನಾಯ ಉಪಸಮ್ಪನ್ನಸಞ್ಞೀ ವೋಸಾಸನ್ತಿಯಾ ನ ನಿವಾರೇತಿ, ಆಪತ್ತಿ ಪಾಟಿದೇಸನೀಯಸ್ಸ. ಉಪಸಮ್ಪನ್ನಾಯ ವೇಮತಿಕೋ ವೋಸಾಸನ್ತಿಯಾ ನ ನಿವಾರೇತಿ, ಆಪತ್ತಿ ಪಾಟಿದೇಸನೀಯಸ್ಸ. ಉಪಸಮ್ಪನ್ನಾಯ ಅನುಪಸಮ್ಪನ್ನಸಞ್ಞೀ ವೋಸಾಸನ್ತಿಯಾ ನ ನಿವಾರೇತಿ, ಆಪತ್ತಿ ಪಾಟಿದೇಸನೀಯಸ್ಸ.

ಏಕತೋಉಪಸಮ್ಪನ್ನಾಯ ವೋಸಾಸನ್ತಿಯಾ ನ ನಿವಾರೇತಿ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ಉಪಸಮ್ಪನ್ನಸಞ್ಞೀ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ವೇಮತಿಕೋ, ಆಪತ್ತಿ ದುಕ್ಕಟಸ್ಸ. ಅನುಪಸಮ್ಪನ್ನಾಯ ಅನುಪಸಮ್ಪನ್ನಸಞ್ಞೀ, ಅನಾಪತ್ತಿ.

೫೬೧. ಅನಾಪತ್ತಿ ಅತ್ತನೋ ಭತ್ತಂ ದಾಪೇತಿ ನ ದೇತಿ, ಅಞ್ಞೇಸಂ ಭತ್ತಂ ದೇತಿ ನ ದಾಪೇತಿ, ಯಂ ನ ದಿನ್ನಂ ತಂ ದಾಪೇತಿ, ಯತ್ಥ ನ ದಿನ್ನಂ ತತ್ಥ ದಾಪೇತಿ, ಸಬ್ಬೇಸಂ ಸಮಕಂ ದಾಪೇತಿ, ಸಿಕ್ಖಮಾನಾ ವೋಸಾಸತಿ, ಸಾಮಣೇರೀ ವೋಸಾಸತಿ, ಪಞ್ಚ ಭೋಜನಾನಿ ಠಪೇತ್ವಾ ಸಬ್ಬತ್ಥ, ಅನಾಪತ್ತಿ, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ದುತಿಯಪಾಟಿದೇಸನೀಯಸಿಕ್ಖಾಪದಂ ನಿಟ್ಠಿತಂ.

೩. ತತಿಯಪಾಟಿದೇಸನೀಯಸಿಕ್ಖಾಪದಂ

೫೬೨. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಸಾವತ್ಥಿಯಂ ಅಞ್ಞತರಂ ಕುಲಂ ಉಭತೋಪಸನ್ನಂ ಹೋತಿ. ಸದ್ಧಾಯ ವಡ್ಢತಿ, ಭೋಗೇನ ಹಾಯತಿ, ಯಂ ತಸ್ಮಿಂ ಕುಲೇ ಉಪ್ಪಜ್ಜತಿ ಪುರೇಭತ್ತಂ ಖಾದನೀಯಂ ವಾ ಭೋಜನೀಯಂ ವಾ ತಂ ಸಬ್ಬಂ ಭಿಕ್ಖೂನಂ ವಿಸ್ಸಜ್ಜೇತ್ವಾ ಅಪ್ಪೇಕದಾ ಅನಸಿತಾ ಅಚ್ಛನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ನ ಮತ್ತಂ ಜಾನಿತ್ವಾ ಪಟಿಗ್ಗಹೇಸ್ಸನ್ತಿ! ಇಮೇ ಇಮೇಸಂ ದತ್ವಾ ಅಪ್ಪೇಕದಾ ಅನಸಿತಾ ಅಚ್ಛನ್ತೀ’’ತಿ!! ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ಯಂ ಕುಲಂ ಸದ್ಧಾಯ ವಡ್ಢತಿ, ಭೋಗೇನ ಹಾಯತಿ ಏವರೂಪಸ್ಸ ಕುಲಸ್ಸ ಞತ್ತಿದುತಿಯೇನ ಕಮ್ಮೇನ ಸೇಕ್ಖಸಮ್ಮುತಿಂ ದಾತುಂ. ಏವಞ್ಚ ಪನ, ಭಿಕ್ಖವೇ, ದಾತಬ್ಬಾ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

೫೬೩. ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಇತ್ಥನ್ನಾಮಂ ಕುಲಂ ಸದ್ಧಾಯ ವಡ್ಢತಿ, ಭೋಗೇನ ಹಾಯತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಸ್ಸ ಕುಲಸ್ಸ ಸೇಕ್ಖಸಮ್ಮುತಿಂ ದದೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಇತ್ಥನ್ನಾಮಂ ಕುಲಂ ಸದ್ಧಾಯ ವಡ್ಢತಿ, ಭೋಗೇನ ಹಾಯತಿ. ಸಙ್ಘೋ ಇತ್ಥನ್ನಾಮಸ್ಸ ಕುಲಸ್ಸ ಸೇಕ್ಖಸಮ್ಮುತಿಂ ದೇತಿ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಕುಲಸ್ಸ ಸೇಕ್ಖಸಮ್ಮುತಿಯಾ ದಾನಂ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ದಿನ್ನಾ ಸಙ್ಘೇನ ಇತ್ಥನ್ನಾಮಸ್ಸ ಕುಲಸ್ಸ ಸೇಕ್ಖಸಮ್ಮುತಿ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

‘‘ಯಾನಿ ಖೋ ಪನ ತಾನಿ ಸೇಕ್ಖಸಮ್ಮತಾನಿ ಕುಲಾನಿ, ಯೋ ಪನ ಭಿಕ್ಖು ತಥಾರೂಪೇಸು ಸೇಕ್ಖಸಮ್ಮತೇಸು ಕುಲೇಸು ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದೇಯ್ಯ ವಾ ಭುಞ್ಜೇಯ್ಯ ವಾ, ಪಟಿದೇಸೇತಬ್ಬಂ ತೇನ ಭಿಕ್ಖುನಾ – ‘ಗಾರಯ್ಹಂ, ಆವುಸೋ, ಧಮ್ಮಂ ಆಪಜ್ಜಿಂ ಅಸಪ್ಪಾಯಂ ಪಾಟಿದೇಸನೀಯಂ ತಂ ಪಟಿದೇಸೇಮೀ’’’ತಿ.

ಏವಞ್ಚಿದಂ ಭಗವತಾ ಭಿಕ್ಖೂನಂ ಸಿಕ್ಖಾಪದಂ ಪಞ್ಞತ್ತಂ ಹೋತಿ.

೫೬೪. ತೇನ ಖೋ ಪನ ಸಮಯೇನ ಸಾವತ್ಥಿಯಂ ಉಸ್ಸವೋ ಹೋತಿ. ಮನುಸ್ಸಾ ಭಿಕ್ಖೂ ನಿಮನ್ತೇತ್ವಾ ಭೋಜೇನ್ತಿ. ತಮ್ಪಿ ಖೋ ಕುಲಂ ಭಿಕ್ಖೂ ನಿಮನ್ತೇಸಿ. ಭಿಕ್ಖೂ ಕುಕ್ಕುಚ್ಚಾಯನ್ತಾ ನಾಧಿವಾಸೇನ್ತಿ – ‘‘ಪಟಿಕ್ಖಿತ್ತಂ ಭಗವತಾ ಸೇಕ್ಖಸಮ್ಮತೇಸು ಕುಲೇಸು ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದಿತುಂ ಭುಞ್ಜಿತು’’ನ್ತಿ. ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಿಂ ನು ಖೋ ನಾಮ ಅಮ್ಹಾಕಂ ಜೀವಿತೇನ ಯಂ ಅಯ್ಯಾ ಅಮ್ಹಾಕಂ ನ ಪಟಿಗ್ಗಣ್ಹನ್ತೀ’’ತಿ! ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ನಿಮನ್ತಿತೇನ ಸೇಕ್ಖಸಮ್ಮತೇಸು ಕುಲೇಸು ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದಿತುಂ ಭುಞ್ಜಿತುಂ. ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

‘‘ಯಾನಿ ಖೋ ಪನ ತಾನಿ ಸೇಕ್ಖಸಮ್ಮತಾನಿ ಕುಲಾನಿ, ಯೋ ಪನ ಭಿಕ್ಖು ತಥಾರೂಪೇಸು ಸೇಕ್ಖಸಮ್ಮತೇಸು ಕುಲೇಸು ಪುಬ್ಬೇ ಅನಿಮನ್ತಿತೋ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದೇಯ್ಯ ವಾ ಭುಞ್ಜೇಯ್ಯ ವಾ, ಪಟಿದೇಸೇತಬ್ಬಂ ತೇನ ಭಿಕ್ಖುನಾ – ‘ಗಾರಯ್ಹಂ, ಆವುಸೋ, ಧಮ್ಮಂ ಆಪಜ್ಜಿಂ ಅಸಪ್ಪಾಯಂ ಪಾಟಿದೇಸನೀಯಂ, ತಂ ಪಟಿದೇಸೇಮೀ’’’ತಿ.

ಏವಞ್ಚಿದಂ ಭಗವತಾ ಭಿಕ್ಖೂನಂ ಸಿಕ್ಖಾಪದಂ ಪಞ್ಞತ್ತಂ ಹೋತಿ.

೫೬೫. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ತಸ್ಸ ಕುಲಸ್ಸ ಕುಲೂಪಕೋ ಹೋತಿ. ಅಥ ಖೋ ಸೋ ಭಿಕ್ಖು ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಯೇನ ತಂ ಕುಲಂ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಪಞ್ಞತ್ತೇ ಆಸನೇ ನಿಸೀದಿ. ತೇನ ಖೋ ಪನ ಸಮಯೇನ ಸೋ ಭಿಕ್ಖು ಗಿಲಾನೋ ಹೋತಿ. ಅಥ ಖೋ ತೇ ಮನುಸ್ಸಾ ತಂ ಭಿಕ್ಖುಂ ಏತದವೋಚುಂ – ‘‘ಭುಞ್ಜಥ, ಭನ್ತೇ’’ತಿ. ಅಥ ಖೋ ಸೋ ಭಿಕ್ಖು – ‘‘ಭಗವತಾ ಪಟಿಕ್ಖಿತ್ತಂ ಅನಿಮನ್ತಿತೇನ ಸೇಕ್ಖಸಮ್ಮತೇಸು ಕುಲೇಸು ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದಿತುಂ ಭುಞ್ಜಿತು’’ನ್ತಿ ಕುಕ್ಕುಚ್ಚಾಯನ್ತೋ ನ ಪಟಿಗ್ಗಹೇಸಿ; ನಾಸಕ್ಖಿ ಪಿಣ್ಡಾಯ ಚರಿತುಂ; ಛಿನ್ನಭತ್ತೋ ಅಹೋಸಿ. ಅಥ ಖೋ ಸೋ ಭಿಕ್ಖು ಆರಾಮಂ ಗನ್ತ್ವಾ ಭಿಕ್ಖೂನಂ ಏತಮತ್ಥಂ ಆರೋಚೇಸಿ. ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ಗಿಲಾನೇನ ಭಿಕ್ಖುನಾ ಸೇಕ್ಖಸಮ್ಮತೇಸು ಕುಲೇಸು ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದಿತುಂ ಭುಞ್ಜಿತುಂ. ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೫೬೬. ‘‘ಯಾನಿ ಖೋ ಪನ ತಾನಿ ಸೇಕ್ಖಸಮ್ಮತಾನಿ ಕುಲಾನಿ, ಯೋ ಪನ ಭಿಕ್ಖು ತಥಾರೂಪೇಸು ಸೇಕ್ಖಸಮ್ಮತೇಸು ಕುಲೇಸು ಪುಬ್ಬೇ ಅನಿಮನ್ತಿತೋ ಅಗಿಲಾನೋ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದೇಯ್ಯ ವಾ ಭುಞ್ಜೇಯ್ಯ ವಾ, ಪಟಿದೇಸೇತಬ್ಬಂ ತೇನ ಭಿಕ್ಖುನಾ – ‘ಗಾರಯ್ಹಂ, ಆವುಸೋ, ಧಮ್ಮಂ ಆಪಜ್ಜಿಂ ಅಸಪ್ಪಾಯಂ ಪಾಟಿದೇಸನೀಯಂ, ತಂ ಪಟಿದೇಸೇಮೀ’’ತಿ.

೫೬೭. ಯಾನಿ ಖೋ ಪನ ತಾನಿ ಸೇಕ್ಖಸಮ್ಮತಾನಿ ಕುಲಾನೀತಿ ಸೇಕ್ಖಸಮ್ಮತಂ ನಾಮ ಕುಲಂ ಯಂ ಕುಲಂ ಸದ್ಧಾಯ ವಡ್ಢತಿ, ಭೋಗೇನ ಹಾಯತಿ. ಏವರೂಪಸ್ಸ ಕುಲಸ್ಸ ಞತ್ತಿದುತಿಯೇನ ಕಮ್ಮೇನ ಸೇಕ್ಖಸಮ್ಮುತಿ ದಿನ್ನಾ ಹೋತಿ.

ಯೋ ಪನಾತಿ ಯೋ ಯಾದಿಸೋ…ಪೇ… ಭಿಕ್ಖೂತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತೋ ಭಿಕ್ಖೂತಿ.

ತಥಾರೂಪೇಸು ಸೇಕ್ಖಸಮ್ಮತೇಸು ಕುಲೇಸೂತಿ ಏವರೂಪೇಸು ಸೇಕ್ಖಸಮ್ಮತೇಸು ಕುಲೇಸು.

ಅನಿಮನ್ತಿತೋ ನಾಮ ಅಜ್ಜತನಾಯ ವಾ ಸ್ವಾತನಾಯ ವಾ ಅನಿಮನ್ತಿತೋ, ಘರೂಪಚಾರಂ ಓಕ್ಕಮನ್ತೇ ನಿಮನ್ತೇತಿ, ಏಸೋ ಅನಿಮನ್ತಿತೋ ನಾಮ.

ನಿಮನ್ತಿತೋ ನಾಮ ಅಜ್ಜತನಾಯ ವಾ ಸ್ವಾತನಾಯ ವಾ ನಿಮನ್ತಿತೋ, ಘರೂಪಚಾರಂ ಅನೋಕ್ಕಮನ್ತೇ ನಿಮನ್ತೇತಿ, ಏಸೋ ನಿಮನ್ತಿತೋ ನಾಮ.

ಅಗಿಲಾನೋ ನಾಮ ಸಕ್ಕೋತಿ ಪಿಣ್ಡಾಯ ಚರಿತುಂ.

ಗಿಲಾನೋ ನಾಮ ನ ಸಕ್ಕೋತಿ ಪಿಣ್ಡಾಯ ಚರಿತುಂ.

ಭೋಜನೀಯಂ ನಾಮ ಪಞ್ಚ ಭೋಜನಾನಿ – ಓದನೋ, ಕುಮ್ಮಾಸೋ, ಸತ್ತು, ಮಚ್ಛೋ, ಮಂಸಂ.

ಅನಿಮನ್ತಿತೋ ಅಗಿಲಾನೋ ‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಪಾಟಿದೇಸನೀಯಸ್ಸ.

೫೬೮. ಸೇಕ್ಖಸಮ್ಮತೇ ಸೇಕ್ಖಸಮ್ಮತಸಞ್ಞೀ ಅನಿಮನ್ತಿತೋ ಅಗಿಲಾನೋ ಖಾದನೀಯಂ ವಾ ಭೋಜನೀಯಂವ ಸಹತ್ಥಾ ಪಟಿಗ್ಗಹೇತ್ವಾ ಖಾದತಿ ವಾ ಭುಞ್ಜತಿ ವಾ, ಆಪತ್ತಿ ಪಾಟಿದೇಸನೀಯಸ್ಸ. ಸೇಕ್ಖಸಮ್ಮತೇ ವೇಮತಿಕೋ…ಪೇ… ಸೇಕ್ಖಸಮ್ಮತೇ ಅಸೇಕ್ಖಸಮ್ಮತಸಞ್ಞೀ ಅನಿಮನ್ತಿತೋ ಅಗಿಲಾನೋ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದತಿ ವಾ ಭುಞ್ಜತಿ ವಾ, ಆಪತ್ತಿ ಪಾಟಿದೇಸನೀಯಸ್ಸ.

ಯಾಮಕಾಲಿಕಂ ಸತ್ತಾಹಕಾಲಿಕಂ ಯಾವಜೀವಿಕಂ ಆಹಾರತ್ಥಾಯ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ದುಕ್ಕಟಸ್ಸ. ಅಸೇಕ್ಖಸಮ್ಮತೇ ಸೇಕ್ಖಸಮ್ಮತಸಞ್ಞೀ, ಆಪತ್ತಿ ದುಕ್ಕಟಸ್ಸ. ಅಸೇಕ್ಖಸಮ್ಮತೇ ವೇಮತಿಕೋ, ಆಪತ್ತಿ ದುಕ್ಕಟಸ್ಸ. ಅಸೇಕ್ಖಸಮ್ಮತೇ ಅಸೇಕ್ಖಸಮ್ಮತಸಞ್ಞೀ, ಅನಾಪತ್ತಿ.

೫೬೯. ಅನಾಪತ್ತಿ ನಿಮನ್ತಿತಸ್ಸ, ಗಿಲಾನಸ್ಸ, ನಿಮನ್ತಿತಸ್ಸ ವಾ ಗಿಲಾನಸ್ಸ ವಾ ಸೇಸಕಂ ಭುಞ್ಜತಿ, ಅಞ್ಞೇಸಂ ಭಿಕ್ಖಾ ತತ್ಥ ಪಞ್ಞತ್ತಾ ಹೋತಿ, ಘರತೋ ನೀಹರಿತ್ವಾ ದೇನ್ತಿ, ನಿಚ್ಚಭತ್ತೇ, ಸಲಾಕಭತ್ತೇ, ಪಕ್ಖಿಕೇ, ಉಪೋಸಥಿಕೇ, ಪಾಟಿಪದಿಕೇ, ಯಾಮಕಾಲಿಕಂ ಸತ್ತಾಹಕಾಲಿಕಂ ಯಾವಜೀವಿಕಂ – ‘‘ಸತಿ ಪಚ್ಚಯೇ ಪರಿಭುಞ್ಜಾ’’ತಿ ದೇತಿ, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ತತಿಯಪಾಟಿದೇಸನೀಯಸಿಕ್ಖಾಪದಂ ನಿಟ್ಠಿತಂ.

೪. ಚತುತ್ಥಪಾಟಿದೇಸನೀಯಸಿಕ್ಖಾಪದಂ

೫೭೦. ತೇನ ಸಮಯೇನ ಬುದ್ಧೋ ಭಗವಾ ಸಕ್ಕೇಸು ವಿಹರತಿ ಕಪಿಲವತ್ಥುಸ್ಮಿಂ ನಿಗ್ರೋಧಾರಾಮೇ. ತೇನ ಖೋ ಪನ ಸಮಯೇನ ಸಾಕಿಯದಾಸಕಾ ಅವರುದ್ಧಾ ಹೋನ್ತಿ. ಸಾಕಿಯಾನಿಯೋ ಇಚ್ಛನ್ತಿ ಆರಞ್ಞಕೇಸು ಸೇನಾಸನೇಸು ಭತ್ತಂ ಕಾತುಂ. ಅಸ್ಸೋಸುಂ ಖೋ ಸಾಕಿಯದಾಸಕಾ – ‘‘ಸಾಕಿಯಾನಿಯೋ ಕಿರ ಆರಞ್ಞಕೇಸು ಸೇನಾಸನೇಸು ಭತ್ತಂ ಕತ್ತುಕಾಮಾ’’ತಿ. ತೇ ಮಗ್ಗೇ ಪರಿಯುಟ್ಠಿಂಸು. ಸಾಕಿಯಾನಿಯೋ ಪಣೀತಂ ಖಾದನೀಯಂ ಭೋಜನೀಯಂ ಆದಾಯ ಆರಞ್ಞಕಂ ಸೇನಾಸನಂ ಅಗಮಂಸು. ಸಾಕಿಯದಾಸಕಾ ನಿಕ್ಖಮಿತ್ವಾ ಸಾಕಿಯಾನಿಯೋ ಅಚ್ಛಿನ್ದಿಂಸು ಚ ದೂಸೇಸುಞ್ಚ. ಸಾಕಿಯಾ ನಿಕ್ಖಮಿತ್ವಾ ತೇ ಚೋರೇ ಸಭಣ್ಡೇ [ಸಹ ಭಣ್ಡೇನ (ಕ.)] ಗಹೇತ್ವಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭದನ್ತಾ ಆರಾಮೇ ಚೋರೇ ಪಟಿವಸನ್ತೇ ನಾರೋಚೇಸ್ಸನ್ತೀ’’ತಿ! ಅಸ್ಸೋಸುಂ ಖೋ ಭಿಕ್ಖೂ ಸಾಕಿಯಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ತೇನ ಹಿ, ಭಿಕ್ಖವೇ, ಭಿಕ್ಖೂನಂ ಸಿಕ್ಖಾಪದಂ ಪಞ್ಞಪೇಸ್ಸಾಮಿ ದಸ ಅತ್ಥವಸೇ ಪಟಿಚ್ಚ – ಸಙ್ಘಸುಟ್ಠುತಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

‘‘ಯಾನಿ ಖೋ ಪನ ತಾನಿ ಆರಞ್ಞಕಾನಿ ಸೇನಾಸನಾನಿ ಸಾಸಙ್ಕಸಮ್ಮತಾನಿ ಸಪ್ಪಟಿಭಯಾನಿ, ಯೋ ಪನ ಭಿಕ್ಖು ತಥಾರೂಪೇಸು ಸೇನಾಸನೇಸು [ಸೇನಾಸನೇಸು ವಿಹರನ್ತೋ (ಸೀ. ಸ್ಯಾ.)] ಪುಬ್ಬೇ ಅಪ್ಪಟಿಸಂವಿದಿತಂ ಖಾದನೀಯಂ ವಾ ಭೋಜನೀಯಂ ವಾ ಅಜ್ಝಾರಾಮೇ ಸಹತ್ಥಾ ಪಟಿಗ್ಗಹೇತ್ವಾ ಖಾದೇಯ್ಯ ವಾ ಭುಞ್ಜೇಯ್ಯ ವಾ, ಪಟಿದೇಸೇತಬ್ಬಂ ತೇನ ಭಿಕ್ಖುನಾ – ‘ಗಾರಯ್ಹಂ, ಆವುಸೋ, ಧಮ್ಮಂ ಆಪಜ್ಜಿಂ ಅಸಪ್ಪಾಯಂ ಪಾಟಿದೇಸನೀಯಂ ತಂ ಪಟಿದೇಸೇಮೀ’’’ತಿ.

ಏವಞ್ಚಿದಂ ಭಗವತಾ ಭಿಕ್ಖೂನಂ ಸಿಕ್ಖಾಪದಂ ಪಞ್ಞತ್ತಂ ಹೋತಿ.

೫೭೧. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಆರಞ್ಞಕೇಸು ಸೇನಾಸನೇಸು ಗಿಲಾನೋ ಹೋತಿ. ಮನುಸ್ಸಾ ಖಾದನೀಯಂ ವಾ ಭೋಜನೀಯಂ ವಾ ಆದಾಯ ಆರಞ್ಞಕಂ ಸೇನಾಸನಂ ಅಗಮಂಸು. ಅಥ ಖೋ ತೇ ಮನುಸ್ಸಾ ತಂ ಭಿಕ್ಖುಂ ಏತದವೋಚುಂ – ‘‘ಭುಞ್ಜಥ, ಭನ್ತೇ’’ತಿ. ಅಥ ಖೋ ಸೋ ಭಿಕ್ಖು – ‘‘ಭಗವತಾ ಪಟಿಕ್ಖಿತ್ತಂ ಆರಞ್ಞಕೇಸು ಸೇನಾಸನೇಸು ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದಿತುಂ ಭುಞ್ಜಿತು’’ನ್ತಿ ಕುಕ್ಕುಚ್ಚಾಯನ್ತೋ ನ ಪಟಿಗ್ಗಹೇಸಿ, ನಾಸಕ್ಖಿ ಪಿಣ್ಡಾಯ ಚರಿತುಂ [ಪವಿಸಿತುಂ (ಕ.)], ಛಿನ್ನಭತ್ತೋ ಅಹೋಸಿ. ಅಥ ಖೋ ಸೋ ಭಿಕ್ಖು ಭಿಕ್ಖೂನಂ ಏತಮತ್ಥಂ ಆರೋಚೇಸಿ. ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ಗಿಲಾನೇನ ಭಿಕ್ಖುನಾ ಆರಞ್ಞಕೇಸು ಸೇನಾಸನೇಸು ಪುಬ್ಬೇ ಅಪ್ಪಟಿಸಂವಿದಿತಂ ಖಾದನೀಯಂ ವಾ ಭೋಜನೀಯಂ ವಾ ಸಹತ್ಥಾ ಪಟಿಗ್ಗಹೇತ್ವಾ ಖಾದಿತುಂ ಭುಞ್ಜಿತುಂ. ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೫೭೨. ‘‘ಯಾನಿ ಖೋ ಪನ ತಾನಿ ಆರಞ್ಞಕಾನಿ ಸೇನಾಸನಾನಿ ಸಾಸಙ್ಕಸಮ್ಮತಾನಿ ಸಪ್ಪಟಿಭಯಾನಿ, ಯೋ ಪನ ಭಿಕ್ಖು ತಥಾರೂಪೇಸು ಸೇನಾಸನೇಸು ಪುಬ್ಬೇ ಅಪ್ಪಟಿಸಂವಿದಿತಂ ಖಾದನೀಯಂ ವಾ ಭೋಜನೀಯಂ ವಾ ಅಜ್ಝಾರಾಮೇ ಸಹತ್ಥಾ ಪಟಿಗ್ಗಹೇತ್ವಾ ಅಗಿಲಾನೋ ಖಾದೇಯ್ಯ ವಾ ಭುಞ್ಜೇಯ್ಯ ವಾ, ಪಟಿದೇಸೇತಬ್ಬಂ ತೇನ ಭಿಕ್ಖುನಾ – ‘ಗಾರಯ್ಹಂ, ಆವುಸೋ, ಧಮ್ಮಂ ಆಪಜ್ಜಿಂ ಅಸಪ್ಪಾಯಂ ಪಾಟಿದೇಸನೀಯಂ, ತಂ ಪಟಿದೇಸೇಮೀ’’’ತಿ.

೫೭೩. ಯಾನಿ ಖೋ ಪನ ತಾನಿ ಆರಞ್ಞಕಾನಿ ಸೇನಾಸನಾನೀತಿ ಆರಞ್ಞಕಂ ನಾಮ ಸೇನಾಸನಂ ಪಞ್ಚಧನುಸತಿಕಂ ಪಚ್ಛಿಮಂ.

ಸಾಸಙ್ಕಂ ನಾಮ ಆರಾಮೇ ಆರಾಮೂಪಚಾರೇ ಚೋರಾನಂ ನಿವಿಟ್ಠೋಕಾಸೋ ದಿಸ್ಸತಿ, ಭುತ್ತೋಕಾಸೋ ದಿಸ್ಸತಿ, ಠಿತೋಕಾಸೋ ದಿಸ್ಸತಿ, ನಿಸಿನ್ನೋಕಾಸೋ ದಿಸ್ಸತಿ, ನಿಪನ್ನೋಕಾಸೋ ದಿಸ್ಸತಿ.

ಸಪ್ಪಟಿಭಯಂ ನಾಮ ಆರಾಮೇ ಆರಾಮೂಪಚಾರೇ ಚೋರೇಹಿ ಮನುಸ್ಸಾ ಹತಾ ದಿಸ್ಸನ್ತಿ, ವಿಲುತ್ತಾ ದಿಸ್ಸನ್ತಿ, ಆಕೋಟಿತಾ ದಿಸ್ಸನ್ತಿ.

ತಥಾರೂಪೇಸು ಸೇನಾಸನೇಸೂತಿ ಏವರೂಪೇಸು ಸೇನಾಸನೇಸು.

ಅಪ್ಪಟಿಸಂವಿದಿತಂ ನಾಮ ಪಞ್ಚನ್ನಂ ಪಟಿಸಂವಿದಿತಂ, ಏತಂ ಅಪ್ಪಟಿಸಂವಿದಿತಂ ನಾಮ. ಆರಾಮಂ ಆರಾಮೂಪಚಾರಂ ಠಪೇತ್ವಾ ಪಟಿಸಂವಿದಿತಂ, ಏತಂ [ಏತಮ್ಪಿ (ಸೀ.)] ಅಪ್ಪಟಿಸಂವಿದಿತಂ ನಾಮ.

ಪಟಿಸಂವಿದಿತಂ ನಾಮ ಯೋ ಕೋಚಿ ಇತ್ಥೀ ವಾ ಪುರಿಸೋ ವಾ ಆರಾಮಂ ಆರಾಮೂಪಚಾರಂ ಆಗನ್ತ್ವಾ ಆರೋಚೇತಿ – ‘‘ಇತ್ಥನ್ನಾಮಸ್ಸ, ಭನ್ತೇ, ಖಾದನೀಯಂ ವಾ ಭೋಜನೀಯಂ ವಾ ಆಹರಿಸ್ಸನ್ತೀ’’ತಿ. ಸಚೇ ಸಾಸಙ್ಕಂ ಹೋತಿ, ಸಾಸಙ್ಕನ್ತಿ ಆಚಿಕ್ಖಿತಬ್ಬಂ; ಸಚೇ ಸಪ್ಪಟಿಭಯಂ ಹೋತಿ, ಸಪ್ಪಟಿಭಯನ್ತಿ ಆಚಿಕ್ಖಿತಬ್ಬಂ; ಸಚೇ – ‘‘ಹೋತು, ಭನ್ತೇ, ಆಹರಿಯಿಸ್ಸತೀ’’ತಿ ಭಣತಿ, ಚೋರಾ ವತ್ತಬ್ಬಾ – ‘‘ಮನುಸ್ಸಾ ಇಧೂಪಚರನ್ತಿ ಅಪಸಕ್ಕಥಾ’’ತಿ. ಯಾಗುಯಾ ಪಟಿಸಂವಿದಿತೇ ತಸ್ಸಾ ಪರಿವಾರೋ ಆಹರಿಯ್ಯತಿ, ಏತಂ ಪಟಿಸಂವಿದಿತಂ ನಾಮ. ಭತ್ತೇನ ಪಟಿಸಂವಿದಿತೇ ತಸ್ಸ ಪರಿವಾರೋ ಆಹರಿಯ್ಯತಿ, ಏತಂ ಪಟಿಸಂವಿದಿತಂ ನಾಮ. ಖಾದನೀಯೇನ ಪಟಿಸಂವಿದಿತೇ ತಸ್ಸ ಪರಿವಾರೋ ಆಹರಿಯ್ಯತಿ, ಏತಂ ಪಟಿಸಂವಿದಿತಂ ನಾಮ. ಕುಲೇನ ಪಟಿಸಂವಿದಿತೇ ಯೋ ತಸ್ಮಿಂ ಕುಲೇ ಮನುಸ್ಸೋ ಖಾದನೀಯಂ ವಾ ಭೋಜನೀಯಂ ವಾ ಆಹರತಿ, ಏತಂ ಪಟಿಸಂವಿದಿತಂ ನಾಮ. ಗಾಮೇನ ಪಟಿಸಂವಿದಿತೇ ಯೋ ತಸ್ಮಿಂ ಗಾಮೇ ಮನುಸ್ಸೋ ಖಾದನೀಯಂ ವಾ ಭೋಜನೀಯಂ ವಾ ಆಹರತಿ, ಏತಂ ಪಟಿಸಂವಿದಿತಂ ನಾಮ. ಪೂಗೇನ ಪಟಿಸಂವಿದಿತೇ ಯೋ ತಸ್ಮಿಂ ಪೂಗೇ ಮನುಸ್ಸೋ ಖಾದನೀಯಂ ವಾ ಭೋಜನೀಯಂ ವಾ ಆಹರತಿ, ಏತಂ ಪಟಿಸಂವಿದಿತಂ ನಾಮ.

ಭೋಜನೀಯಂ ನಾಮ ಪಞ್ಚ ಭೋಜನಾನಿ – ಓದನೋ, ಕುಮ್ಮಾಸೋ, ಸತ್ತು, ಮಚ್ಛೋ, ಮಂಸಂ.

ಅಜ್ಝಾರಾಮೋ ನಾಮ ಪರಿಕ್ಖಿತ್ತಸ್ಸ ಆರಾಮಸ್ಸ ಅನ್ತೋಆರಾಮೋ. ಅಪರಿಕ್ಖಿತ್ತಸ್ಸ ಉಪಚಾರೋ.

ಅಗಿಲಾನೋ ನಾಮ ಸಕ್ಕೋತಿ ಪಿಣ್ಡಾಯ ಚರಿತುಂ [ಗನ್ತುಂ (ಕ.)].

ಗಿಲಾನೋ ನಾಮ ನ ಸಕ್ಕೋತಿ ಪಿಣ್ಡಾಯ ಚರಿತುಂ [ಗನ್ತುಂ (ಕ.)].

ಅಪ್ಪಟಿಸಂವಿದಿತಂ ಅಗಿಲಾನೋ ‘‘ಖಾದಿಸ್ಸಾಮಿ ಭುಞ್ಜಿಸ್ಸಾಮೀ’’ತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ಪಾಟಿದೇಸನೀಯಸ್ಸ.

೫೭೪. ಅಪ್ಪಟಿಸಂವಿದಿತೇ ಅಪ್ಪಟಿಸಂವಿದಿತಸಞ್ಞೀ ಖಾದನೀಯಂ ವಾ ಭೋಜನೀಯಂ ವಾ ಅಜ್ಝಾರಾಮೇ ಸಹತ್ಥಾ ಪಟಿಗ್ಗಹೇತ್ವಾ ಅಗಿಲಾನೋ ಖಾದತಿ ವಾ ಭುಞ್ಜತಿ ವಾ, ಆಪತ್ತಿ ಪಾಟಿದೇಸನೀಯಸ್ಸ. ಅಪ್ಪಟಿಸಂವಿದಿತೇ ವೇಮತಿಕೋ ಖಾದನೀಯಂ ವಾ ಭೋಜನೀಯಂ ವಾ ಅಜ್ಝಾರಾಮೇ ಸಹತ್ಥಾ ಪಟಿಗ್ಗಹೇತ್ವಾ ಅಗಿಲಾನೋ ಖಾದತಿ ವಾ ಭುಞ್ಜತಿ ವಾ, ಆಪತ್ತಿ ಪಾಟಿದೇಸನೀಯಸ್ಸ. ಅಪ್ಪಟಿಸಂವಿದಿತೇ ಪಟಿಸಂವಿದಿತಸಞ್ಞೀ ಖಾದನೀಯಂ ವಾ ಭೋಜನೀಯಂ ವಾ ಅಜ್ಝಾರಾಮೇ ಸಹತ್ಥಾ ಪಟಿಗ್ಗಹೇತ್ವಾ ಅಗಿಲಾನೋ ಖಾದತಿ ವಾ ಭುಞ್ಜತಿ ವಾ, ಆಪತ್ತಿ ಪಾಟಿದೇಸನೀಯಸ್ಸ.

ಯಾಮಕಾಲಿಕಂ ಸತ್ತಾಹಕಾಲಿಕಂ ಯಾವಜೀವಿಕಂ ಆಹಾರತ್ಥಾಯ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ ಆಪತ್ತಿ ದುಕ್ಕಟಸ್ಸ. ಪಟಿಸಂವಿದಿತೇ ಅಪ್ಪಟಿಸಂವಿದಿತಸಞ್ಞೀ, ಆಪತ್ತಿ ದುಕ್ಕಟಸ್ಸ. ಪಟಿಸಂವಿದಿತೇ ವೇಮತಿಕೋ, ಆಪತ್ತಿ ದುಕ್ಕಟಸ್ಸ. ಪಟಿಸಂವಿದಿತೇ ಪಟಿಸಂವಿದಿತಸಞ್ಞೀ, ಅನಾಪತ್ತಿ.

೫೭೫. ಅನಾಪತ್ತಿ ಪಟಿಸಂವಿದಿತೇ, ಗಿಲಾನಸ್ಸ, ಪಟಿಸಂವಿದಿತೇ ವಾ ಗಿಲಾನಸ್ಸ ವಾ ಸೇಸಕಂ ಭುಞ್ಜತಿ, ಬಹಾರಾಮೇ ಪಟಿಗ್ಗಹೇತ್ವಾ ಅನ್ತೋಆರಾಮೇ ಭುಞ್ಜತಿ, ತತ್ಥ ಜಾತಕಂ ಮೂಲಂ ವಾ ತಚಂ ವಾ ಪತ್ತಂ ವಾ ಪುಪ್ಫಂ ವಾ ಫಲಂ ವಾ ಭುಞ್ಜತಿ, ಯಾಮಕಾಲಿಕಂ ಸತ್ತಾಹಕಾಲಿಕಂ ಯಾವಜೀವಿಕಂ ಸತಿ ಪಚ್ಚಯೇ ಪರಿಭುಞ್ಜತಿ, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ಚತುತ್ಥಪಾಟಿದೇಸನೀಯಸಿಕ್ಖಾಪದಂ ನಿಟ್ಠಿತಂ.

ಉದ್ದಿಟ್ಠಾ ಖೋ, ಆಯಸ್ಮನ್ತೋ, ಚತ್ತಾರೋ ಪಾಟಿದೇಸನೀಯಾ ಧಮ್ಮಾ. ತತ್ಥಾಯಸ್ಮನ್ತೇ ಪುಚ್ಛಾಮಿ – ‘‘ಕಚ್ಚಿತ್ಥ ಪರಿಸುದ್ಧಾ’’? ದುತಿಯಮ್ಪಿ ಪುಚ್ಛಾಮಿ – ‘‘ಕಚ್ಚಿತ್ಥ ಪರಿಸುದ್ಧಾ’’? ತತಿಯಮ್ಪಿ ಪುಚ್ಛಾಮಿ – ‘‘ಕಚ್ಚಿತ್ಥ ಪರಿಸುದ್ಧಾ’’? ಪರಿಸುದ್ಧೇತ್ಥಾಯಸ್ಮನ್ತೋ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ.

ಪಾಟಿದೇಸನೀಯಕಣ್ಡಂ ನಿಟ್ಠಿತಂ.