೯. ಪರಿಪಾಚಿತಸಿಕ್ಖಾಪದಂ

೧೯೨. ತೇನ ಸಮಯೇನ ಬುದ್ಧೋ ಭಗವಾ ರಾಜಗಹೇ ವಿಹರತಿ ವೇಳುವನೇ ಕಲನ್ದಕನಿವಾಪೇ. ತೇನ ಖೋ ಪನ ಸಮಯೇನ ಥುಲ್ಲನನ್ದಾ ಭಿಕ್ಖುನೀ ಅಞ್ಞತರಸ್ಸ ಕುಲಸ್ಸ ಕುಲೂಪಿಕಾ ಹೋತಿ ನಿಚ್ಚಭತ್ತಿಕಾ. ತೇನ ಚ ಗಹಪತಿನಾ ಥೇರಾ ಭಿಕ್ಖೂ ನಿಮನ್ತಿತಾ ಹೋನ್ತಿ. ಅಥ ಖೋ ಥುಲ್ಲನನ್ದಾ ಭಿಕ್ಖುನೀ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಯೇನ ತಂ ಕುಲಂ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಂ ಗಹಪತಿಂ ಏತದವೋಚ – ‘‘ಕಿಮಿದಂ, ಗಹಪತಿ, ಪಹೂತಂ ಖಾದನೀಯಂ ಭೋಜನೀಯಂ ಪಟಿಯತ್ತ’’ನ್ತಿ? ‘‘ಥೇರಾ ಮಯಾ, ಅಯ್ಯೇ, ನಿಮನ್ತಿತಾ’’ತಿ. ‘‘ಕೇ ಪನ ತೇ, ಗಹಪತಿ, ಥೇರಾ’’ತಿ? ‘‘ಅಯ್ಯೋ ಸಾರಿಪುತ್ತೋ ಅಯ್ಯೋ ಮಹಾಮೋಗ್ಗಲ್ಲಾನೋ ಅಯ್ಯೋ ಮಹಾಕಚ್ಚಾನೋ ಅಯ್ಯೋ ಮಹಾಕೋಟ್ಠಿಕೋ ಅಯ್ಯೋ ಮಹಾಕಪ್ಪಿನೋ ಅಯ್ಯೋ ಮಹಾಚುನ್ದೋ ಅಯ್ಯೋ ಅನುರುದ್ಧೋ ಅಯ್ಯೋ ರೇವತೋ ಅಯ್ಯೋ ಉಪಾಲಿ ಅಯ್ಯೋ ಆನನ್ದೋ ಅಯ್ಯೋ ರಾಹುಲೋ’’ತಿ. ‘‘ಕಿಂ ಪನ ತ್ವಂ, ಗಹಪತಿ, ಮಹಾನಾಗೇ ತಿಟ್ಠಮಾನೇ ಚೇಟಕೇ ನಿಮನ್ತೇಸೀ’’ತಿ?

‘‘ಕೇ ಪನ ತೇ, ಅಯ್ಯೇ, ಮಹಾನಾಗಾ’’ತಿ? ‘‘ಅಯ್ಯೋ ದೇವದತ್ತೋ ಅಯ್ಯೋ ಕೋಕಾಲಿಕೋ ಅಯ್ಯೋ ಕಟಮೋದಕತಿಸ್ಸಕೋ [ಕಟಮೋರಕತಿಸ್ಸಕೋ (ಸೀ.) ಕತಮೋರಕತಿಸ್ಸಕೋ (ಸ್ಯಾ.)] ಅಯ್ಯೋ ಖಣ್ಡದೇವಿಯಾ ಪುತ್ತೋ ಅಯ್ಯೋ ಸಮುದ್ದದತ್ತೋ’’ತಿ. ಅಯಂ ಚರಹಿ ಥುಲ್ಲನನ್ದಾಯ ಭಿಕ್ಖುನಿಯಾ ಅನ್ತರಾ ಕಥಾ ವಿಪ್ಪಕತಾ, ಅಥ ತೇ ಥೇರಾ ಭಿಕ್ಖೂ ಪವಿಸಿಂಸು. ‘‘ಸಚ್ಚಂ ಮಹಾನಾಗಾ ಖೋ ತಯಾ, ಗಹಪತಿ, ನಿಮನ್ತಿತಾ’’ತಿ. ‘‘ಇದಾನೇವ ಖೋ ತ್ವಂ, ಅಯ್ಯೇ, ಚೇಟಕೇ ಅಕಾಸಿ; ಇದಾನಿ ಮಹಾನಾಗೇ’’ತಿ. ಘರತೋ ಚ ನಿಕ್ಕಡ್ಢಿ, ನಿಚ್ಚಭತ್ತಞ್ಚ ಪಚ್ಛಿನ್ದಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ದೇವದತ್ತೋ ಜಾನಂ ಭಿಕ್ಖುನಿಪರಿಪಾಚಿತಂ ಪಿಣ್ಡಪಾತಂ ಭುಞ್ಜಿಸ್ಸತೀ’’ತಿ…ಪೇ… ‘‘ಸಚ್ಚಂ ಕಿರ ತ್ವಂ, ದೇವದತ್ತ, ಜಾನಂ ಭಿಕ್ಖುನಿಪರಿಪಾಚಿತಂ ಪಿಣ್ಡಪಾತಂ ಭುಞ್ಜಸೀ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ಜಾನಂ ಭಿಕ್ಖುನಿಪರಿಪಾಚಿತಂ ಪಿಣ್ಡಪಾತಂ ಭುಞ್ಜಿಸ್ಸಸಿ. ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

‘‘ಯೋ ಪನ ಭಿಕ್ಖು ಜಾನಂ ಭಿಕ್ಖುನಿಪರಿಪಾಚಿತಂ ಪಿಣ್ಡಪಾತಂ ಭುಞ್ಜೇಯ್ಯ, ಪಾಚಿತ್ತಿಯ’’ನ್ತಿ.

ಏವಞ್ಚಿದಂ ಭಗವತಾ ಭಿಕ್ಖೂನಂ ಸಿಕ್ಖಾಪದಂ ಪಞ್ಞತ್ತಂ ಹೋತಿ.

೧೯೩. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ರಾಜಗಹಾ ಪಬ್ಬಜಿತೋ ಞಾತಿಕುಲಂ ಅಗಮಾಸಿ. ಮನುಸ್ಸಾ – ‘‘ಚಿರಸ್ಸಮ್ಪಿ ಭದನ್ತೋ ಆಗತೋ’’ತಿ ಸಕ್ಕಚ್ಚಂ ಭತ್ತಂ ಅಕಂಸು. ತಸ್ಸ ಕುಲಸ್ಸ ಕುಲೂಪಿಕಾ ಭಿಕ್ಖುನೀ ತೇ ಮನುಸ್ಸೇ ಏತದವೋಚ – ‘‘ದೇಥಯ್ಯಸ್ಸ, ಆವುಸೋ, ಭತ್ತ’’ನ್ತಿ. ಅಥ ಖೋ ಸೋ ಭಿಕ್ಖು – ‘‘ಭಗವತಾ ಪಟಿಕ್ಖಿತ್ತಂ ಜಾನಂ ಭಿಕ್ಖುನಿಪರಿಪಾಚಿತಂ ಪಿಣ್ಡಪಾತಂ ಭುಞ್ಜಿತು’’ನ್ತಿ ಕುಕ್ಕುಚ್ಚಾಯನ್ತೋ ನ ಪಟಿಗ್ಗಹೇಸಿ. ನಾಸಕ್ಖಿ ಪಿಣ್ಡಾಯ ಚರಿತುಂ, ಛಿನ್ನಭತ್ತೋ ಅಹೋಸಿ. ಅಥ ಖೋ ಸೋ ಭಿಕ್ಖು ಆರಾಮಂ ಗನ್ತ್ವಾ ಭಿಕ್ಖೂನಂ ಏತಮತ್ಥಂ ಆರೋಚೇಸಿ. ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ಪುಬ್ಬೇ ಗಿಹಿಸಮಾರಮ್ಭೇ ಜಾನಂ ಭಿಕ್ಖುನಿಪರಿಪಾಚಿತಂ ಪಿಣ್ಡಪಾತಂ ಭುಞ್ಜಿತುಂ. ಏವಞ್ಚ ಪನ, ಭಿಕ್ಖವೇ, ಇಮಂ ಸಿಕ್ಖಾಪದಂ ಉದ್ದಿಸೇಯ್ಯಾಥ –

೧೯೪. ‘‘ಯೋ ಪನ ಭಿಕ್ಖು ಜಾನಂ ಭಿಕ್ಖುನಿಪರಿಪಾಚಿತಂ ಪಿಣ್ಡಪಾತಂ ಭುಞ್ಜೇಯ್ಯ, ಅಞ್ಞತ್ರ ಪುಬ್ಬೇ ಗಿಹಿಸಮಾರಮ್ಭಾ, ಪಾಚಿತ್ತಿಯ’’ನ್ತಿ.

೧೯೫. ಯೋ ಪನಾತಿ ಯೋ ಯಾದಿಸೋ…ಪೇ… ಭಿಕ್ಖೂತಿ…ಪೇ… ಅಯಂ ಇಮಸ್ಮಿಂ ಅತ್ಥೇ ಅಧಿಪ್ಪೇತೋ ಭಿಕ್ಖೂತಿ.

ಜಾನಾತಿ ನಾಮ ಸಾಮಂ ವಾ ಜಾನಾತಿ ಅಞ್ಞೇ ವಾ ತಸ್ಸ ಆರೋಚೇನ್ತಿ ಸಾ ವಾ ಆರೋಚೇತಿ.

ಭಿಕ್ಖುನೀ ನಾಮ ಉಭತೋಸಙ್ಘೇ ಉಪಸಮ್ಪನ್ನಾ.

ಪರಿಪಾಚೇತಿ ನಾಮ ಪುಬ್ಬೇ ಅದಾತುಕಾಮಾನಂ ಅಕತ್ತುಕಾಮಾನಂ – ‘‘ಅಯ್ಯೋ ಭಾಣಕೋ, ಅಯ್ಯೋ ಬಹುಸ್ಸುತೋ, ಅಯ್ಯೋ ಸುತ್ತನ್ತಿಕೋ, ಅಯ್ಯೋ ವಿನಯಧರೋ, ಅಯ್ಯೋ ಧಮ್ಮಕಥಿಕೋ, ದೇಥ ಅಯ್ಯಸ್ಸ, ಕರೋಥ ಅಯ್ಯಸ್ಸಾ’’ತಿ ಏಸಾ ಪರಿಪಾಚೇತಿ ನಾಮ.

ಪಿಣ್ಡಪಾತೋ ನಾಮ ಪಞ್ಚನ್ನಂ ಭೋಜನಾನಂ ಅಞ್ಞತರಂ ಭೋಜನಂ.

ಅಞ್ಞತ್ರ ಪುಬ್ಬೇ ಗಿಹಿಸಮಾರಮ್ಭಾತಿ ಠಪೇತ್ವಾ ಗಿಹಿಸಮಾರಮ್ಭಂ.

ಗಿಹಿಸಮಾರಮ್ಭೋ ನಾಮ ಞಾತಕಾ ವಾ ಹೋನ್ತಿ ಪವಾರಿತಾ ವಾ ಪಕತಿಪಟಿಯತ್ತಂ ವಾ.

ಅಞ್ಞತ್ರ ಪುಬ್ಬೇ ಗಿಹಿಸಮಾರಮ್ಭಾ ಭುಞ್ಜಿಸ್ಸಾಮೀತಿ ಪಟಿಗ್ಗಣ್ಹಾತಿ, ಆಪತ್ತಿ ದುಕ್ಕಟಸ್ಸ. ಅಜ್ಝೋಹಾರೇ ಅಜ್ಝೋಹಾರೇ, ಆಪತ್ತಿ ಪಾಚಿತ್ತಿಯಸ್ಸ.

೧೯೬. ಪರಿಪಾಚಿತೇ ಪರಿಪಾಚಿತಸಞ್ಞೀ ಭುಞ್ಜತಿ, ಅಞ್ಞತ್ರ ಪುಬ್ಬೇ ಗಿಹಿಸಮಾರಮ್ಭಾ, ಆಪತ್ತಿ ಪಾಚಿತ್ತಿಯಸ್ಸ. ಪರಿಪಾಚಿತೇ ವೇಮತಿಕೋ ಭುಞ್ಜತಿ, ಅಞ್ಞತ್ರ ಪುಬ್ಬೇ ಗಿಹಿಸಮಾರಮ್ಭಾ, ಆಪತ್ತಿ ದುಕ್ಕಟಸ್ಸ. ಪರಿಪಾಚಿತೇ ಅಪರಿಪಾಚಿತಸಞ್ಞೀ ಭುಞ್ಜತಿ, ಅಞ್ಞತ್ರ ಪುಬ್ಬೇ ಗಿಹಿಸಮಾರಮ್ಭಾ, ಅನಾಪತ್ತಿ. ಏಕತೋಉಪಸಮ್ಪನ್ನಾಯ ಪರಿಪಾಚಿತಂ ಭುಞ್ಜತಿ, ಅಞ್ಞತ್ರ ಪುಬ್ಬೇ ಗಿಹಿಸಮಾರಮ್ಭಾ, ಆಪತ್ತಿ ದುಕ್ಕಟಸ್ಸ. ಅಪರಿಪಾಚಿತೇ ಪರಿಪಾಚಿತಸಞ್ಞೀ, ಆಪತ್ತಿ ದುಕ್ಕಟಸ್ಸ. ಅಪರಿಪಾಚಿತ್ತೇ ವೇಮತಿಕೋ, ಆಪತ್ತಿ ದುಕ್ಕಟಸ್ಸ. ಅಪರಿಪಾಚಿತೇ ಅಪರಿಪಾಚಿತಸಞ್ಞೀ, ಅನಾಪತ್ತಿ.

೧೯೭. ಅನಾಪತ್ತಿ ಪುಬ್ಬೇ ಗಿಹಿಸಮಾರಮ್ಭೇ, ಸಿಕ್ಖಮಾನಾ ಪರಿಪಾಚೇತಿ, ಸಾಮಣೇರೀ ಪರಿಪಾಚೇತಿ, ಪಞ್ಚ ಭೋಜನಾನಿ ಠಪೇತ್ವಾ ಸಬ್ಬತ್ಥ ಅನಾಪತ್ತಿ, ಉಮ್ಮತ್ತಕಸ್ಸ, ಆದಿಕಮ್ಮಿಕಸ್ಸಾತಿ.

ಪರಿಪಾಚಿತಸಿಕ್ಖಾಪದಂ ನಿಟ್ಠಿತಂ ನವಮಂ.