೨೭೦. ತಸ್ಸುದ್ದಾನಂ

ಚಮ್ಪಾಯಂ ಭಗವಾ ಆಸಿ, ವತ್ಥು ವಾಸಭಗಾಮಕೇ;

ಆಗನ್ತುಕಾನಮುಸ್ಸುಕ್ಕಂ, ಅಕಾಸಿ ಇಚ್ಛಿತಬ್ಬಕೇ [ಇಚ್ಛಿತಬ್ಬಕೋ (ಕ.)].

ಪಕತಞ್ಞುನೋತಿ ಞತ್ವಾ, ಉಸ್ಸುಕ್ಕಂ ನ ಕರೀ ತದಾ;

ಉಕ್ಖಿತ್ತೋ ನ ಕರೋತೀತಿ, ಸಾಗಮಾ ಜಿನಸನ್ತಿಕೇ.

ಅಧಮ್ಮೇನ ವಗ್ಗಕಮ್ಮಂ, ಸಮಗ್ಗಂ ಅಧಮ್ಮೇನ ಚ;

ಧಮ್ಮೇನ ವಗ್ಗಕಮ್ಮಞ್ಚ, ಪತಿರೂಪಕೇನ ವಗ್ಗಿಕಂ.

ಪತಿರೂಪಕೇನ ಸಮಗ್ಗಂ, ಏಕೋ ಉಕ್ಖಿಪತೇಕಕಂ;

ಏಕೋ ಚ ದ್ವೇ ಸಮ್ಬಹುಲೇ, ಸಙ್ಘಂ ಉಕ್ಖಿಪತೇಕಕೋ.

ದುವೇಪಿ ಸಮ್ಬಹುಲಾಪಿ, ಸಙ್ಘೋ ಸಙ್ಘಞ್ಚ ಉಕ್ಖಿಪಿ;

ಸಬ್ಬಞ್ಞುಪವರೋ ಸುತ್ವಾ, ಅಧಮ್ಮನ್ತಿ ಪಟಿಕ್ಖಿಪಿ.

ಞತ್ತಿವಿಪನ್ನಂ ಯಂ ಕಮ್ಮಂ, ಸಮ್ಪನ್ನಂ ಅನುಸಾವನಂ;

ಅನುಸ್ಸಾವನವಿಪನ್ನಂ, ಸಮ್ಪನ್ನಂ ಞತ್ತಿಯಾ ಚ ಯಂ.

ಉಭಯೇನ ವಿಪನ್ನಞ್ಚ, ಅಞ್ಞತ್ರ ಧಮ್ಮಮೇವ ಚ;

ವಿನಯಾ ಸತ್ಥು ಪಟಿಕುಟ್ಠಂ, ಕುಪ್ಪಂ ಅಟ್ಠಾನಾರಹಿಕಂ.

ಅಧಮ್ಮವಗ್ಗಂ ಸಮಗ್ಗಂ, ಧಮ್ಮ ಪತಿರೂಪಾನಿ ಯೇ ದುವೇ;

ಧಮ್ಮೇನೇವ ಚ ಸಾಮಗ್ಗಿಂ, ಅನುಞ್ಞಾಸಿ ತಥಾಗತೋ.

ಚತುವಗ್ಗೋ ಪಞ್ಚವಗ್ಗೋ, ದಸವಗ್ಗೋ ಚ ವೀಸತಿ;

ಪರೋವೀಸತಿವಗ್ಗೋ ಚ [ಅತಿರೇಕವೀಸತಿವಗ್ಗೋ (ಸ್ಯಾ.)], ಸಙ್ಘೋ ಪಞ್ಚವಿಧೋ ತಥಾ.

ಠಪೇತ್ವಾ ಉಪಸಮ್ಪದಂ, ಯಞ್ಚ ಕಮ್ಮಂ ಪವಾರಣಂ;

ಅಬ್ಭಾನಕಮ್ಮೇನ ಸಹ, ಚತುವಗ್ಗೇಹಿ ಕಮ್ಮಿಕೋ.

ದುವೇ ಕಮ್ಮೇ ಠಪೇತ್ವಾನ, ಮಜ್ಝದೇಸೂಪಸಮ್ಪದಂ;

ಅಬ್ಭಾನಂ ಪಞ್ಚವಗ್ಗಿಕೋ, ಸಬ್ಬಕಮ್ಮೇಸು ಕಮ್ಮಿಕೋ.

ಅಬ್ಭಾನೇಕಂ ಠಪೇತ್ವಾನ, ಯೇ ಭಿಕ್ಖೂ ದಸವಗ್ಗಿಕಾ;

ಸಬ್ಬಕಮ್ಮಕರೋ ಸಙ್ಘೋ, ವೀಸೋ ಸಬ್ಬತ್ಥ ಕಮ್ಮಿಕೋ.

ಭಿಕ್ಖುನೀ ಸಿಕ್ಖಮಾನಾ, ಚ ಸಾಮಣೇರೋ ಸಾಮಣೇರೀ;

ಪಚ್ಚಕ್ಖಾತನ್ತಿಮವತ್ಥೂ, ಉಕ್ಖಿತ್ತಾಪತ್ತಿದಸ್ಸನೇ.

ಅಪ್ಪಟಿಕಮ್ಮೇ ದಿಟ್ಠಿಯಾ, ಪಣ್ಡಕೋ ಥೇಯ್ಯಸಂವಾಸಕಂ;

ತಿತ್ಥಿಯಾ ತಿರಚ್ಛಾನಗತಂ, ಮಾತು ಪಿತು ಚ ಘಾತಕಂ.

ಅರಹಂ ಭಿಕ್ಖುನೀದೂಸಿ, ಭೇದಕಂ ಲೋಹಿತುಪ್ಪಾದಂ;

ಬ್ಯಞ್ಜನಂ ನಾನಾಸಂವಾಸಂ, ನಾನಾಸೀಮಾಯ ಇದ್ಧಿಯಾ.

ಯಸ್ಸ ಸಙ್ಘೋ ಕರೇ ಕಮ್ಮಂ, ಹೋನ್ತೇತೇ ಚತುವೀಸತಿ;

ಸಮ್ಬುದ್ಧೇನ ಪಟಿಕ್ಖಿತ್ತಾ, ನ ಹೇತೇ ಗಣಪೂರಕಾ.

ಪಾರಿವಾಸಿಕಚತುತ್ಥೋ, ಪರಿವಾಸಂ ದದೇಯ್ಯ ವಾ;

ಮೂಲಾ ಮಾನತ್ತಮಬ್ಭೇಯ್ಯ, ಅಕಮ್ಮಂ ನ ಚ ಕರಣಂ.

ಮೂಲಾ ಅರಹಮಾನತ್ತಾ, ಅಬ್ಭಾನಾರಹಮೇವ ಚ;

ನ ಕಮ್ಮಕಾರಕಾ ಪಞ್ಚ, ಸಮ್ಬುದ್ಧೇನ ಪಕಾಸಿತಾ.

ಭಿಕ್ಖುನೀ ಸಿಕ್ಖಮಾನಾ ಚ, ಸಾಮಣೇರೋ ಸಾಮಣೇರಿಕಾ;

ಪಚ್ಚಕ್ಖನ್ತಿಮಉಮ್ಮತ್ತಾ, ಖಿತ್ತಾವೇದನದಸ್ಸನೇ.

ಅಪ್ಪಟಿಕಮ್ಮೇ ದಿಟ್ಠಿಯಾ, ಪಣ್ಡಕಾಪಿ ಚ ಬ್ಯಞ್ಜನಾ [ಇತೋ ಪರಂ ಸ್ಯಾಮಮೂಲೇ ದಿಯಡ್ಢಗಾಥಾಹಿ ಅಭಬ್ಬಪುಗ್ಗಲಾ ಸಮತ್ತಂ ದಸ್ಸಿತಾ];

ನಾನಾಸಂವಾಸಕಾ ಸೀಮಾ, ವೇಹಾಸಂ ಯಸ್ಸ ಕಮ್ಮ ಚ.

ಅಟ್ಠಾರಸನ್ನಮೇತೇಸಂ, ಪಟಿಕ್ಕೋಸಂ ನ ರುಹತಿ;

ಭಿಕ್ಖುಸ್ಸ ಪಕತತ್ತಸ್ಸ, ರುಹತಿ ಪಟಿಕ್ಕೋಸನಾ.

ಸುದ್ಧಸ್ಸ ದುನ್ನಿಸಾರಿತೋ, ಬಾಲೋ ಹಿ ಸುನಿಸ್ಸಾರಿತೋ;

ಪಣ್ಡಕೋ ಥೇಯ್ಯಸಂವಾಸೋ, ಪಕ್ಕನ್ತೋ ತಿರಚ್ಛಾನಗತೋ.

ಮಾತು ಪಿತು ಅರಹನ್ತ, ದೂಸಕೋ ಸಙ್ಘಭೇದಕೋ;

ಲೋಹಿತುಪ್ಪಾದಕೋ ಚೇವ, ಉಭತೋಬ್ಯಞ್ಜನೋ ಚ ಯೋ.

ಏಕಾದಸನ್ನಂ ಏತೇಸಂ, ಓಸಾರಣಂ ನ ಯುಜ್ಜತಿ;

ಹತ್ಥಪಾದಂ ತದುಭಯಂ, ಕಣ್ಣನಾಸಂ ತದೂಭಯಂ.

ಅಙ್ಗುಲಿ ಅಳಕಣ್ಡರಂ, ಫಣಂ ಖುಜ್ಜೋ ಚ ವಾಮನೋ;

ಗಣ್ಡೀ ಲಕ್ಖಣಕಸಾ, ಚ ಲಿಖಿತಕೋ ಚ ಸೀಪದೀ.

ಪಾಪಾ ಪರಿಸಕಾಣೋ ಚ, ಕುಣೀ ಖಞ್ಜೋ ಹತೋಪಿ ಚ;

ಇರಿಯಾಪಥದುಬ್ಬಲೋ, ಅನ್ಧೋ ಮೂಗೋ ಚ ಬಧಿರೋ.

ಅನ್ಧಮೂಗನ್ಧಬಧಿರೋ ಮೂಗಬಧಿರಮೇವ ಚ;

ಅನ್ಧಮೂಗಬಧಿರೋ ಚ, ದ್ವತ್ತಿಂಸೇತೇ ಅನೂನಕಾ.

ತೇಸಂ ಓಸಾರಣಂ ಹೋತಿ, ಸಮ್ಬುದ್ಧೇನ ಪಕಾಸಿತಂ;

ದಟ್ಠಬ್ಬಾ ಪಟಿಕಾತಬ್ಬಾ, ನಿಸ್ಸಜ್ಜೇತಾ ನ ವಿಜ್ಜತಿ.

ತಸ್ಸ ಉಕ್ಖೇಪನಾ ಕಮ್ಮಾ, ಸತ್ತ ಹೋನ್ತಿ ಅಧಮ್ಮಿಕಾ;

ಆಪನ್ನಂ ಅನುವತ್ತನ್ತಂ, ಸತ್ತ ತೇಪಿ ಅಧಮ್ಮಿಕಾ.

ಆಪನ್ನಂ ನಾನುವತ್ತನ್ತಂ, ಸತ್ತ ಕಮ್ಮಾ ಸುಧಮ್ಮಿಕಾ;

ಸಮ್ಮುಖಾ ಪಟಿಪುಚ್ಛಾ ಚ, ಪಟಿಞ್ಞಾಯ ಚ ಕಾರಣಾ.

ಸತಿ ಅಮೂಳ್ಹಪಾಪಿಕಾ, ತಜ್ಜನೀನಿಯಸ್ಸೇನ ಚ;

ಪಬ್ಬಾಜನೀಯ ಪಟಿಸಾರೋ, ಉಕ್ಖೇಪಪರಿವಾಸ ಚ.

ಮೂಲಾ ಮಾನತ್ತಅಬ್ಭಾನಾ, ತಥೇವ ಉಪಸಮ್ಪದಾ;

ಅಞ್ಞಂ ಕರೇಯ್ಯ ಅಞ್ಞಸ್ಸ, ಸೋಳಸೇತೇ ಅಧಮ್ಮಿಕಾ.

ತಂ ತಂ ಕರೇಯ್ಯ ತಂ ತಸ್ಸ, ಸೋಳಸೇತೇ ಸುಧಮ್ಮಿಕಾ;

ಪಚ್ಚಾರೋಪೇಯ್ಯ ಅಞ್ಞಞ್ಞಂ, ಸೋಳಸೇತೇ ಅಧಮ್ಮಿಕಾ.

ದ್ವೇ ದ್ವೇ ತಮ್ಮೂಲಕಂ ತಸ್ಸ [ದ್ವೇ ದ್ವೇ ಮೂಲಾ ಕತಾ ಕಸ್ಸ (ಸ್ಯಾ.), ದೋದೋತಮೂಲಕನ್ತಸ್ಸ (ಕ.)], ತೇಪಿ ಸೋಳಸ ಧಮ್ಮಿಕಾ;

ಏಕೇಕಮೂಲಕಂ ಚಕ್ಕಂ, ‘‘ಅಧಮ್ಮ’’ನ್ತಿ ಜಿನೋಬ್ರವಿ.

ಅಕಾಸಿ ತಜ್ಜನೀಯಂ ಕಮ್ಮಂ, ಸಙ್ಘೋ ಭಣ್ಡನಕಾರಕೋ;

ಅಧಮ್ಮೇನ ವಗ್ಗಕಮ್ಮಂ, ಅಞ್ಞಂ ಆವಾಸಂ ಗಚ್ಛಿ ಸೋ.

ತತ್ಥಾಧಮ್ಮೇನ ಸಮಗ್ಗಾ, ತಸ್ಸ ತಜ್ಜನೀಯಂ ಕರುಂ;

ಅಞ್ಞತ್ಥ ವಗ್ಗಾಧಮ್ಮೇನ, ತಸ್ಸ ತಜ್ಜನೀಯಂ ಕರುಂ.

ಪತಿರೂಪೇನ ವಗ್ಗಾಪಿ, ಸಮಗ್ಗಾಪಿ ತಥಾ ಕರುಂ;

ಅಧಮ್ಮೇನ ಸಮಗ್ಗಾ ಚ, ಧಮ್ಮೇನ ವಗ್ಗಮೇವ ಚ.

ಪತಿರೂಪಕೇನ ವಗ್ಗಾ ಚ, ಸಮಗ್ಗಾ ಚ ಇಮೇ ಪದಾ;

ಏಕೇಕಮೂಲಕಂ ಕತ್ವಾ, ಚಕ್ಕಂ ಬನ್ಧೇ ವಿಚಕ್ಖಣೋ.

ಬಾಲಾ ಬ್ಯತ್ತಸ್ಸ ನಿಯಸ್ಸಂ, ಪಬ್ಬಾಜೇ ಕುಲದೂಸಕಂ;

ಪಟಿಸಾರಣೀಯಂ ಕಮ್ಮಂ, ಕರೇ ಅಕ್ಕೋಸಕಸ್ಸ ಚ.

ಅದಸ್ಸನಾಪ್ಪಟಿಕಮ್ಮೇ, ಯೋ ಚ ದಿಟ್ಠಿಂ ನ ನಿಸ್ಸಜ್ಜೇ;

ತೇಸಂ ಉಕ್ಖೇಪನೀಯಕಮ್ಮಂ, ಸತ್ಥವಾಹೇನ ಭಾಸಿತಂ.

ಉಪರಿ ನಯಕಮ್ಮಾನಂ [ಉಪವಿನಯಕಮ್ಮಾನಂ (ಸ್ಯಾ.), ಉಕ್ಖೇಪನೀಯಕಮ್ಮಾನಂ (ಕ.)] ಪಞ್ಞೋ ತಜ್ಜನೀಯಂ ನಯೇ;

ತೇಸಂಯೇವ ಅನುಲೋಮಂ, ಸಮ್ಮಾ ವತ್ತತಿ ಯಾಚಿತೇ [ಯಾಚತಿ (ಸ್ಯಾ.), ಯಾಚಿತೋ (ಸೀ.)].

ಪಸ್ಸದ್ಧಿ ತೇಸಂ ಕಮ್ಮಾನಂ, ಹೇಟ್ಠಾ ಕಮ್ಮನಯೇನ ಚ;

ತಸ್ಮಿಂ ತಸ್ಮಿಂ ತು ಕಮ್ಮೇಸು, ತತ್ರಟ್ಠೋ ಚ ವಿವದತಿ.

ಅಕತಂ ದುಕ್ಕಟಞ್ಚೇವ, ಪುನಕಾತಬ್ಬಕನ್ತಿ ಚ;

ಕಮ್ಮೇ ಪಸ್ಸದ್ಧಿಯಾ ಚಾಪಿ, ತೇ ಭಿಕ್ಖೂ ಧಮ್ಮವಾದಿನೋ.

ವಿಪತ್ತಿಬ್ಯಾಧಿತೇ ದಿಸ್ವಾ, ಕಮ್ಮಪ್ಪತ್ತೇ ಮಹಾಮುನಿ;

ಪಟಿಪ್ಪಸ್ಸದ್ಧಿಮಕ್ಖಾಸಿ, ಸಲ್ಲಕತ್ತೋವ ಓಸಧನ್ತಿ.

ಇಮಮ್ಹಿ ಖನ್ಧಕೇ ವತ್ಥೂನಿ ಛತ್ತಿಂಸಾತಿ.

ಚಮ್ಪೇಯ್ಯಕ್ಖನ್ಧಕೋ ನಿಟ್ಠಿತೋ.