೨೬೫. ಪಬ್ಬಾಜನೀಯಕಮ್ಮಪಟಿಪ್ಪಸ್ಸದ್ಧಿಕಥಾ

೪೪೬. ಇಧ ಪನ, ಭಿಕ್ಖವೇ, ಭಿಕ್ಖು ಸಙ್ಘೇನ ಪಬ್ಬಾಜನೀಯಕಮ್ಮಕತೋ ಸಮ್ಮಾ ವತ್ತತಿ, ಲೋಮಂ ಪಾತೇತಿ, ನೇತ್ಥಾರಂ ವತ್ತತಿ, ಪಬ್ಬಾಜನೀಯಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿಂ ಯಾಚತಿ. ತತ್ರ ಚೇ ಭಿಕ್ಖೂನಂ ಏವಂ ಹೋತಿ – ‘‘ಅಯಂ ಖೋ, ಆವುಸೋ, ಭಿಕ್ಖು ಸಙ್ಘೇನ ಪಬ್ಬಾಜನೀಯಕಮ್ಮಕತೋ ಸಮ್ಮಾ ವತ್ತತಿ, ಲೋಮಂ ಪಾತೇತಿ, ನೇತ್ಥಾರಂ ವತ್ತತಿ, ಪಬ್ಬಾಜನೀಯಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿಂ ಯಾಚತಿ. ಹನ್ದಸ್ಸ ಮಯಂ ಪಬ್ಬಾಜನೀಯಕಮ್ಮಂ ಪಟಿಪ್ಪಸ್ಸಮ್ಭೇಮಾ’’ತಿ. ತೇ ತಸ್ಸ ಪಬ್ಬಾಜನೀಯಕಮ್ಮಂ ಪಟಿಪ್ಪಸ್ಸಮ್ಭೇನ್ತಿ – ಅಧಮ್ಮೇನ ವಗ್ಗಾ…ಪೇ… ಅಧಮ್ಮೇನ ಸಮಗ್ಗಾ… ಧಮ್ಮೇನ ವಗ್ಗಾ… ಧಮ್ಮಪತಿರೂಪಕೇನ ವಗ್ಗಾ… ಧಮ್ಮಪತಿರೂಪಕೇನ ಸಮಗ್ಗಾ. ತತ್ರಟ್ಠೋ ಸಙ್ಘೋ ವಿವದತಿ – ‘‘ಅಧಮ್ಮೇನ ವಗ್ಗಕಮ್ಮಂ, ಅಧಮ್ಮೇನ ಸಮಗ್ಗಕಮ್ಮಂ, ಧಮ್ಮೇನ ವಗ್ಗಕಮ್ಮಂ, ಧಮ್ಮಪತಿರೂಪಕೇನ ವಗ್ಗಕಮ್ಮಂ, ಧಮ್ಮಪತಿರೂಪಕೇನ ಸಮಗ್ಗಕಮ್ಮಂ, ಅಕತಂ ಕಮ್ಮಂ ದುಕ್ಕಟಂ ಕಮ್ಮಂ ಪುನ ಕಾತಬ್ಬಂ ಕಮ್ಮ’’ನ್ತಿ. ತತ್ರ, ಭಿಕ್ಖವೇ, ಯೇ ತೇ ಭಿಕ್ಖೂ ಏವಮಾಹಂಸು – ‘‘ಧಮ್ಮಪತಿರೂಪಕೇನ ಸಮಗ್ಗಕಮ್ಮ’’ನ್ತಿ, ಯೇ ಚ ತೇ ಭಿಕ್ಖೂ ಏವಮಾಹಂಸು – ‘‘ಅಕತಂ ಕಮ್ಮಂ ದುಕ್ಕಟಂ ಕಮ್ಮಂ ಪುನ ಕಾತಬ್ಬಂ ಕಮ್ಮ’’ನ್ತಿ, ಇಮೇ ತತ್ಥ ಭಿಕ್ಖೂ ಧಮ್ಮವಾದಿನೋ. ಇಮೇಪಿ ಪಞ್ಚ ವಾರಾ ಸಂಖಿತ್ತಾ.

ಪಬ್ಬಾಜನೀಯಕಮ್ಮಪಟಿಪ್ಪಸ್ಸದ್ಧಿಕಥಾ ನಿಟ್ಠಿತಾ.