೨೩೬. ಞತ್ತಿವಿಪನ್ನಕಮ್ಮಾದಿಕಥಾ

೩೮೫. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಏವರೂಪಾನಿ ಕಮ್ಮಾನಿ ಕರೋನ್ತಿ – ಅಧಮ್ಮೇನ ವಗ್ಗಕಮ್ಮಂ ಕರೋನ್ತಿ, ಅಧಮ್ಮೇನ ಸಮಗ್ಗಕಮ್ಮಂ ಕರೋನ್ತಿ; ಧಮ್ಮೇನ ವಗ್ಗಕಮ್ಮಂ ಕರೋನ್ತಿ, ಧಮ್ಮಪತಿರೂಪಕೇನ ವಗ್ಗಕಮ್ಮಂ ಕರೋನ್ತಿ, ಧಮ್ಮಪತಿರೂಪಕೇನ ಸಮಗ್ಗಕಮ್ಮಂ ಕರೋನ್ತಿ; ಞತ್ತಿವಿಪನ್ನಮ್ಪಿ ಕಮ್ಮಂ ಕರೋನ್ತಿ ಅನುಸ್ಸಾವನಸಮ್ಪನ್ನಂ, ಅನುಸ್ಸಾವನವಿಪನ್ನಮ್ಪಿ ಕಮ್ಮಂ ಕರೋನ್ತಿ ಞತ್ತಿಸಮ್ಪನ್ನಂ, ಞತ್ತಿವಿಪನ್ನಮ್ಪಿ ಅನುಸ್ಸಾವನವಿಪನ್ನಮ್ಪಿ ಕಮ್ಮಂ ಕರೋನ್ತಿ; ಅಞ್ಞತ್ರಾಪಿ ಧಮ್ಮಾ ಕಮ್ಮಂ ಕರೋನ್ತಿ, ಅಞ್ಞತ್ರಾಪಿ ವಿನಯಾ ಕಮ್ಮಂ ಕರೋನ್ತಿ, ಅಞ್ಞತ್ರಾಪಿ ಸತ್ಥುಸಾಸನಾ ಕಮ್ಮಂ ಕರೋನ್ತಿ; ಪಟಿಕುಟ್ಠಕತಮ್ಪಿ ಕಮ್ಮಂ ಕರೋನ್ತಿ ಅಧಮ್ಮಿಕಂ ಕುಪ್ಪಂ ಅಟ್ಠಾನಾರಹಂ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖೂ ಏವರೂಪಾನಿ ಕಮ್ಮಾನಿ ಕರಿಸ್ಸನ್ತಿ – ಅಧಮ್ಮೇನ ವಗ್ಗಕಮ್ಮಂ ಕರಿಸ್ಸನ್ತಿ, ಅಧಮ್ಮೇನ ಸಮಗ್ಗಕಮ್ಮಂ ಕರಿಸ್ಸನ್ತಿ; ಧಮ್ಮೇನ ವಗ್ಗಕಮ್ಮಂ ಕರಿಸ್ಸನ್ತಿ, ಧಮ್ಮಪತಿರೂಪಕೇನ ವಗ್ಗಕಮ್ಮಂ ಕರಿಸ್ಸನ್ತಿ, ಧಮ್ಮಪತಿರೂಪಕೇನ ಸಮಗ್ಗಕಮ್ಮಂ ಕರಿಸ್ಸನ್ತಿ; ಞತ್ತಿವಿಪನ್ನಮ್ಪಿ ಕಮ್ಮಂ ಕರಿಸ್ಸನ್ತಿ ಅನುಸ್ಸಾವನಸಮ್ಪನ್ನಂ, ಅನುಸ್ಸಾವನವಿಪನ್ನಮ್ಪಿ ಕಮ್ಮಂ ಕರಿಸ್ಸನ್ತಿ ಞತ್ತಿಸಮ್ಪನ್ನಂ, ಞತ್ತಿವಿಪನ್ನಮ್ಪಿ ಅನುಸ್ಸಾವನವಿಪನ್ನಮ್ಪಿ ಕಮ್ಮಂ ಕರಿಸ್ಸನ್ತಿ; ಅಞ್ಞತ್ರಾಪಿ ಧಮ್ಮಾ ಕಮ್ಮಂ ಕರಿಸ್ಸನ್ತಿ, ಅಞ್ಞತ್ರಾಪಿ ವಿನಯಾ ಕಮ್ಮಂ ಕರಿಸ್ಸನ್ತಿ, ಅಞ್ಞತ್ರಾಪಿ ಸತ್ಥುಸಾಸನಾ ಕಮ್ಮಂ ಕರಿಸ್ಸನ್ತಿ; ಪಟಿಕುಟ್ಠಕತಮ್ಪಿ ಕಮ್ಮಂ ಕರಿಸ್ಸನ್ತಿ ಅಧಮ್ಮಿಕಂ ಕುಪ್ಪಂ ಅಟ್ಠಾನಾರಹ’’ನ್ತಿ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖೂ ಏವರೂಪಾನಿ ಕಮ್ಮಾನಿ ಕರೋನ್ತಿ – ಅಧಮ್ಮೇನ ವಗ್ಗಕಮ್ಮಂ ಕರೋನ್ತಿ…ಪೇ… ಪಟಿಕುಟ್ಠಕತಮ್ಪಿ ಕಮ್ಮಂ ಕರೋನ್ತಿ ಅಧಮ್ಮಿಕಂ ಕುಪ್ಪಂ ಅಟ್ಠಾನಾರಹ’’ನ್ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ವಿಗರಹಿತ್ವಾ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –

೩೮೬. ‘‘ಅಧಮ್ಮೇನ ಚೇ, ಭಿಕ್ಖವೇ, ವಗ್ಗಕಮ್ಮಂ ಅಕಮ್ಮಂ ನ ಚ ಕರಣೀಯಂ; ಅಧಮ್ಮೇನ ಸಮಗ್ಗಕಮ್ಮಂ ಅಕಮ್ಮಂ ನ ಚ ಕರಣೀಯಂ; ಧಮ್ಮೇನ ವಗ್ಗಕಮ್ಮಂ ಅಕಮ್ಮಂ ನ ಚ ಕರಣೀಯಂ; ಧಮ್ಮಪತಿರೂಪಕೇನ ವಗ್ಗಕಮ್ಮಂ ಅಕಮ್ಮಂ ನ ಚ ಕರಣೀಯಂ; ಧಮ್ಮಪತಿರೂಪಕೇನ ಸಮಗ್ಗಕಮ್ಮಂ ಅಕಮ್ಮಂ ನ ಚ ಕರಣೀಯಂ. ಞತ್ತಿವಿಪನ್ನಞ್ಚೇ, ಭಿಕ್ಖವೇ, ಕಮ್ಮಂ ಅನುಸ್ಸಾವನಸಮ್ಪನ್ನಂ ಅಕಮ್ಮಂ ನ ಚ ಕರಣೀಯಂ; ಅನುಸ್ಸಾವನವಿಪನ್ನಞ್ಚೇ, ಭಿಕ್ಖವೇ, ಕಮ್ಮಂ ಞತ್ತಿಸಮ್ಪನ್ನಂ ಅಕಮ್ಮಂ ನ ಚ ಕರಣೀಯಂ; ಞತ್ತಿವಿಪನ್ನಞ್ಚೇ, ಭಿಕ್ಖವೇ, ಕಮ್ಮಂ ಅನುಸ್ಸಾವನವಿಪನ್ನಂ ಅಕಮ್ಮಂ ನ ಚ ಕರಣೀಯಂ; ಅಞ್ಞತ್ರಾಪಿ ಧಮ್ಮಾ ಕಮ್ಮಂ ಅಕಮ್ಮಂ ನ ಚ ಕರಣೀಯಂ; ಅಞ್ಞತ್ರಾಪಿ ವಿನಯಾ ಕಮ್ಮಂ ಅಕಮ್ಮಂ ನ ಚ ಕರಣೀಯಂ; ಅಞ್ಞತ್ರಾಪಿ ಸತ್ಥುಸಾಸನಾ ಕಮ್ಮಂ ಅಕಮ್ಮಂ ನ ಚ ಕರಣೀಯಂ; ಪಟಿಕುಟ್ಠಕತಞ್ಚೇ, ಭಿಕ್ಖವೇ, ಕಮ್ಮಂ ಅಧಮ್ಮಿಕಂ ಕುಪ್ಪಂ ಅಟ್ಠಾನಾರಹಂ ಅಕಮ್ಮಂ ನ ಚ ಕರಣೀಯಂ.

೩೮೭. ಛಯಿಮಾನಿ, ಭಿಕ್ಖವೇ, ಕಮ್ಮಾನಿ – ಅಧಮ್ಮಕಮ್ಮಂ, ವಗ್ಗಕಮ್ಮಂ, ಸಮಗ್ಗಕಮ್ಮಂ, ಧಮ್ಮಪತಿರೂಪಕೇನ ವಗ್ಗಕಮ್ಮಂ, ಧಮ್ಮಪತಿರೂಪಕೇನ ಸಮಗ್ಗಕಮ್ಮಂ, ಧಮ್ಮೇನ ಸಮಗ್ಗಕಮ್ಮಂ.

ಕತಮಞ್ಚ, ಭಿಕ್ಖವೇ, ಅಧಮ್ಮಕಮ್ಮಂ? ಞತ್ತಿದುತಿಯೇ ಚೇ, ಭಿಕ್ಖವೇ, ಕಮ್ಮೇ ಏಕಾಯ ಞತ್ತಿಯಾ ಕಮ್ಮಂ ಕರೋತಿ, ನ ಚ ಕಮ್ಮವಾಚಂ ಅನುಸ್ಸಾವೇತಿ – ಅಧಮ್ಮಕಮ್ಮಂ. ಞತ್ತಿದುತಿಯೇ ಚೇ, ಭಿಕ್ಖವೇ, ಕಮ್ಮೇ ದ್ವೀಹಿ ಞತ್ತೀಹಿ ಕಮ್ಮಂ ಕರೋತಿ, ನ ಚ ಕಮ್ಮವಾಚಂ ಅನುಸ್ಸಾವೇತಿ – ಅಧಮ್ಮಕಮ್ಮಂ. ಞತ್ತಿದುತಿಯೇ ಚೇ, ಭಿಕ್ಖವೇ, ಕಮ್ಮೇ ಏಕಾಯ ಕಮ್ಮವಾಚಾಯ ಕಮ್ಮಂ ಕರೋತಿ, ನ ಚ ಞತ್ತಿಂ ಠಪೇತಿ – ಅಧಮ್ಮಕಮ್ಮಂ. ಞತ್ತಿದುತಿಯೇ ಚೇ, ಭಿಕ್ಖವೇ, ಕಮ್ಮೇ ದ್ವೀಹಿ ಕಮ್ಮವಾಚಾಹಿ ಕಮ್ಮಂ ಕರೋತಿ, ನ ಚ ಞತ್ತಿಂ ಠಪೇತಿ – ಅಧಮ್ಮಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ಏಕಾಯ ಞತ್ತಿಯಾ ಕಮ್ಮಂ ಕರೋತಿ, ನ ಚ ಕಮ್ಮವಾಚಂ ಅನುಸ್ಸಾವೇತಿ – ಅಧಮ್ಮಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ದ್ವೀಹಿ ಞತ್ತೀಹಿ ಕಮ್ಮಂ ಕರೋತಿ, ನ ಚ ಕಮ್ಮವಾಚಂ ಅನುಸ್ಸಾವೇತಿ – ಅಧಮ್ಮಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ತೀಹಿ ಞತ್ತೀಹಿ ಕಮ್ಮಂ ಕರೋತಿ, ನ ಚ ಕಮ್ಮವಾಚಂ ಅನುಸ್ಸಾವೇತಿ – ಅಧಮ್ಮಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ಚತೂಹಿ ಞತ್ತೀಹಿ ಕಮ್ಮಂ ಕರೋತಿ, ನ ಚ ಕಮ್ಮವಾಚಂ ಅನುಸ್ಸಾವೇತಿ – ಅಧಮ್ಮಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ಏಕಾಯ ಕಮ್ಮವಾಚಾಯ ಕಮ್ಮಂ ಕರೋತಿ, ನ ಚ ಞತ್ತಿಂ ಠಪೇತಿ – ಅಧಮ್ಮಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ದ್ವೀಹಿ ಕಮ್ಮವಾಚಾಹಿ ಕಮ್ಮಂ ಕರೋತಿ, ನ ಚ ಞತ್ತಿಂ ಠಪೇತಿ – ಅಧಮ್ಮಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ತೀಹಿ ಕಮ್ಮವಾಚಾಹಿ ಕಮ್ಮಂ ಕರೋತಿ, ನ ಚ ಞತ್ತಿಂ ಠಪೇತಿ – ಅಧಮ್ಮಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ಚತೂಹಿ ಕಮ್ಮವಾಚಾಹಿ ಕಮ್ಮಂ ಕರೋತಿ, ನ ಚ ಞತ್ತಿಂ ಠಪೇತಿ – ಅಧಮ್ಮಕಮ್ಮಂ. ಇದಂ ವುಚ್ಚತಿ, ಭಿಕ್ಖವೇ, ಅಧಮ್ಮಕಮ್ಮಂ.

ಕತಮಞ್ಚ, ಭಿಕ್ಖವೇ, ವಗ್ಗಕಮ್ಮಂ? ಞತ್ತಿದುತಿಯೇ ಚೇ, ಭಿಕ್ಖವೇ, ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ ತೇ ಅನಾಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ – ವಗ್ಗಕಮ್ಮಂ. ಞತ್ತಿದುತಿಯೇ ಚೇ, ಭಿಕ್ಖವೇ, ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ – ವಗ್ಗಕಮ್ಮಂ. ಞತ್ತಿದುತಿಯೇ ಚೇ, ಭಿಕ್ಖವೇ, ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಆಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ – ವಗ್ಗಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ ತೇ ಅನಾಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ – ವಗ್ಗಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ – ವಗ್ಗಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಆಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ – ವಗ್ಗಕಮ್ಮಂ. ಇದಂ ವುಚ್ಚತಿ, ಭಿಕ್ಖವೇ, ವಗ್ಗಕಮ್ಮಂ.

ಕತಮಞ್ಚ, ಭಿಕ್ಖವೇ, ಸಮಗ್ಗಕಮ್ಮಂ? ಞತ್ತಿದುತಿಯೇ ಚೇ, ಭಿಕ್ಖವೇ, ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ, ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಆಹಟೋ ಹೋತಿ, ಸಮ್ಮುಖೀಭೂತಾ ನ ಪಟಿಕ್ಕೋಸನ್ತಿ – ಸಮಗ್ಗಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ, ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಆಹಟೋ ಹೋತಿ, ಸಮ್ಮುಖೀಭೂತಾ ನ ಪಟಿಕ್ಕೋಸನ್ತಿ – ಸಮಗ್ಗಕಮ್ಮಂ. ಇದಂ ವುಚ್ಚತಿ, ಭಿಕ್ಖವೇ, ಸಮಗ್ಗಕಮ್ಮಂ.

ಕತಮಞ್ಚ, ಭಿಕ್ಖವೇ, ಧಮ್ಮಪತಿರೂಪಕೇನ ವಗ್ಗಕಮ್ಮಂ? ಞತ್ತಿದುತಿಯೇ ಚೇ, ಭಿಕ್ಖವೇ, ಕಮ್ಮೇ ಪಠಮಂ ಕಮ್ಮವಾಚಂ ಅನುಸ್ಸಾವೇತಿ, ಪಚ್ಛಾ ಞತ್ತಿಂ ಠಪೇತಿ, ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ ತೇ ಅನಾಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ – ಧಮ್ಮಪತಿರೂಪಕೇನ ವಗ್ಗಕಮ್ಮಂ. ಞತ್ತಿದುತಿಯೇ ಚೇ, ಭಿಕ್ಖವೇ, ಕಮ್ಮೇ ಪಠಮಂ ಕಮ್ಮವಾಚಂ ಅನುಸ್ಸಾವೇತಿ, ಪಚ್ಛಾ ಞತ್ತಿಂ ಠಪೇತಿ, ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ – ಧಮ್ಮಪತಿರೂಪಕೇನ ವಗ್ಗಕಮ್ಮಂ. ಞತ್ತಿದುತಿಯೇ ಚೇ, ಭಿಕ್ಖವೇ, ಕಮ್ಮೇ ಪಠಮಂ ಕಮ್ಮವಾಚಂ ಅನುಸ್ಸಾವೇತಿ, ಪಚ್ಛಾ ಞತ್ತಿಂ ಠಪೇತಿ, ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಆಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ – ಧಮ್ಮಪತಿರೂಪಕೇನ ವಗ್ಗಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ಪಠಮಂ ಕಮ್ಮವಾಚಂ ಅನುಸ್ಸಾವೇತಿ, ಪಚ್ಛಾ ಞತ್ತಿಂ ಠಪೇತಿ, ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ ತೇ ಅನಾಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ – ಧಮ್ಮಪತಿರೂಪಕೇನ ವಗ್ಗಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ಪಠಮಂ ಕಮ್ಮವಾಚಂ ಅನುಸ್ಸಾವೇತಿ, ಪಚ್ಛಾ ಞತ್ತಿಂ ಠಪೇತಿ, ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಅನಾಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ – ಧಮ್ಮಪತಿರೂಪಕೇನ ವಗ್ಗಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ಪಠಮಂ ಕಮ್ಮವಾಚಂ ಅನುಸ್ಸಾವೇತಿ, ಪಚ್ಛಾ ಞತ್ತಿಂ ಠಪೇತಿ, ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಆಹಟೋ ಹೋತಿ, ಸಮ್ಮುಖೀಭೂತಾ ಪಟಿಕ್ಕೋಸನ್ತಿ – ಧಮ್ಮಪತಿರೂಪಕೇನ ವಗ್ಗಕಮ್ಮಂ. ಇದಂ ವುಚ್ಚತಿ, ಭಿಕ್ಖವೇ, ಧಮ್ಮಪತಿರೂಪಕೇನ ವಗ್ಗಕಮ್ಮಂ.

ಕತಮಞ್ಚ, ಭಿಕ್ಖವೇ, ಧಮ್ಮಪತಿರೂಪಕೇನ ಸಮಗ್ಗಕಮ್ಮಂ? ಞತ್ತಿದುತಿಯೇ ಚೇ, ಭಿಕ್ಖವೇ, ಕಮ್ಮೇ ಪಠಮಂ ಕಮ್ಮವಾಚಂ ಅನುಸ್ಸಾವೇತಿ, ಪಚ್ಛಾ ಞತ್ತಿಂ ಠಪೇತಿ, ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ, ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಆಹಟೋ ಹೋತಿ, ಸಮ್ಮುಖೀಭೂತಾ ನ ಪಟಿಕ್ಕೋಸನ್ತಿ – ಧಮ್ಮಪತಿರೂಪಕೇನ ಸಮಗ್ಗಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ಪಠಮಂ ಕಮ್ಮವಾಚಂ ಅನುಸ್ಸಾವೇತಿ, ಪಚ್ಛಾ ಞತ್ತಿಂ ಠಪೇತಿ, ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಆಹಟೋ ಹೋತಿ, ಸಮ್ಮುಖೀಭೂತಾ ನ ಪಟಿಕ್ಕೋಸನ್ತಿ – ಧಮ್ಮಪತಿರೂಪಕೇನ ಸಮಗ್ಗಕಮ್ಮಂ. ಇದಂ ವುಚ್ಚತಿ, ಭಿಕ್ಖವೇ, ಧಮ್ಮಪತಿರೂಪಕೇನ ಸಮಗ್ಗಕಮ್ಮಂ.

ಕತಮಞ್ಚ, ಭಿಕ್ಖವೇ, ಧಮ್ಮೇನ ಸಮಗ್ಗಕಮ್ಮಂ? ಞತ್ತಿದುತಿಯೇ ಚೇ, ಭಿಕ್ಖವೇ, ಕಮ್ಮೇ ಪಠಮಂ ಞತ್ತಿಂ ಠಪೇತಿ, ಪಚ್ಛಾ ಏಕಾಯ ಕಮ್ಮವಾಚಾಯ ಕಮ್ಮಂ ಕರೋತಿ, ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಆಹಟೋ ಹೋತಿ, ಸಮ್ಮುಖೀಭೂತಾ ನ ಪಟಿಕ್ಕೋಸನ್ತಿ – ಧಮ್ಮೇನ ಸಮಗ್ಗಕಮ್ಮಂ. ಞತ್ತಿಚತುತ್ಥೇ ಚೇ, ಭಿಕ್ಖವೇ, ಕಮ್ಮೇ ಪಠಮಂ ಞತ್ತಿಂ ಠಪೇತಿ, ಪಚ್ಛಾ ತೀಹಿ ಕಮ್ಮವಾಚಾಹಿ ಕಮ್ಮಂ ಕರೋತಿ, ಯಾವತಿಕಾ ಭಿಕ್ಖೂ ಕಮ್ಮಪ್ಪತ್ತಾ, ತೇ ಆಗತಾ ಹೋನ್ತಿ, ಛನ್ದಾರಹಾನಂ ಛನ್ದೋ ಆಹಟೋ ಹೋತಿ, ಸಮ್ಮುಖೀಭೂತಾ ನ ಪಟಿಕ್ಕೋಸನ್ತಿ, ಧಮ್ಮೇನ ಸಮಗ್ಗಕಮ್ಮಂ. ಇದಂ ವುಚ್ಚತಿ, ಭಿಕ್ಖವೇ, ಧಮ್ಮೇನ ಸಮಗ್ಗಕಮ್ಮಂ.

ಞತ್ತಿವಿಪನ್ನಕಮ್ಮಾದಿಕಥಾ ನಿಟ್ಠಿತಾ.