೨೦೦. ಪಲಿಬೋಧಾಪಲಿಬೋಧಕಥಾ

೩೨೫. ದ್ವೇಮೇ, ಭಿಕ್ಖವೇ, ಕಥಿನಸ್ಸ ಪಲಿಬೋಧಾ, ದ್ವೇ ಅಪಲಿಬೋಧಾ. ಕತಮೇ ಚ, ಭಿಕ್ಖವೇ, ದ್ವೇ ಕಥಿನಸ್ಸ ಪಲಿಬೋಧಾ? ಆವಾಸಪಲಿಬೋಧೋ ಚ ಚೀವರಪಲಿಬೋಧೋ ಚ. ಕಥಞ್ಚ, ಭಿಕ್ಖವೇ, ಆವಾಸಪಲಿಬೋಧೋ ಹೋತಿ? ಇಧ, ಭಿಕ್ಖವೇ, ಭಿಕ್ಖು ವಸತಿ ವಾ ತಸ್ಮಿಂ ಆವಾಸೇ, ಸಾಪೇಕ್ಖೋ ವಾ ಪಕ್ಕಮತಿ ‘‘ಪಚ್ಚೇಸ್ಸ’’ನ್ತಿ. ಏವಂ ಖೋ, ಭಿಕ್ಖವೇ, ಆವಾಸಪಲಿಬೋಧೋ ಹೋತಿ. ಕಥಞ್ಚ, ಭಿಕ್ಖವೇ, ಚೀವರಪಲಿಬೋಧೋ ಹೋತಿ? ಇಧ, ಭಿಕ್ಖವೇ, ಭಿಕ್ಖುನೋ ಚೀವರಂ ಅಕತಂ ವಾ ಹೋತಿ ವಿಪ್ಪಕತಂ ವಾ, ಚೀವರಾಸಾ ವಾ ಅನುಪಚ್ಛಿನ್ನಾ. ಏವಂ ಖೋ, ಭಿಕ್ಖವೇ, ಚೀವರಪಲಿಬೋಧೋ ಹೋತಿ. ಇಮೇ ಖೋ, ಭಿಕ್ಖವೇ, ದ್ವೇ ಕಥಿನಸ್ಸ ಪಲಿಬೋಧಾ.

ಕತಮೇ ಚ, ಭಿಕ್ಖವೇ, ದ್ವೇ ಕಥಿನಸ್ಸ ಅಪಲಿಬೋಧಾ? ಆವಾಸಅಪಲಿಬೋಧೋ ಚ ಚೀವರಅಪಲಿಬೋಧೋ ಚ. ಕಥಞ್ಚ, ಭಿಕ್ಖವೇ, ಆವಾಸಅಪಲಿಬೋಧೋ ಹೋತಿ? ಇಧ, ಭಿಕ್ಖವೇ, ಭಿಕ್ಖು ಪಕ್ಕಮತಿ ತಮ್ಹಾ ಆವಾಸಾ ಚತ್ತೇನ ವನ್ತೇನ ಮುತ್ತೇನ ಅನಪೇಕ್ಖೋ [ಅನಪೇಕ್ಖೇನ (ಕ.)] ‘‘ನ ಪಚ್ಚೇಸ್ಸ’’ನ್ತಿ. ಏವಂ ಖೋ, ಭಿಕ್ಖವೇ, ಆವಾಸಅಪಲಿಬೋಧೋ ಹೋತಿ. ಕಥಞ್ಚ, ಭಿಕ್ಖವೇ, ಚೀವರಅಪಲಿಬೋಧೋ ಹೋತಿ? ಇಧ, ಭಿಕ್ಖವೇ, ಭಿಕ್ಖುನೋ ಚೀವರಂ ಕತಂ ವಾ ಹೋತಿ, ನಟ್ಠಂ ವಾ ವಿನಟ್ಠಂ ವಾ ದಡ್ಢಂ ವಾ, ಚೀವರಾಸಾ ವಾ ಉಪಚ್ಛಿನ್ನಾ. ಏವಂ ಖೋ, ಭಿಕ್ಖವೇ, ಚೀವರಅಪಲಿಬೋಧೋ ಹೋತಿ. ಇಮೇ ಖೋ, ಭಿಕ್ಖವೇ, ದ್ವೇ ಕಥಿನಸ್ಸ ಅಪಲಿಬೋಧಾತಿ.

ಪಲಿಬೋಧಾಪಲಿಬೋಧಕಥಾ ನಿಟ್ಠಿತಾ.

ಕಥಿನಕ್ಖನ್ಧಕೋ ನಿಟ್ಠಿತೋ ಸತ್ತಮೋ.