೧೯೮. ಅಪವಿಲಾಯನನವಕಂ

೩೨೧. ಭಿಕ್ಖು ಅತ್ಥತಕಥಿನೋ ದಿಸಂಗಮಿಕೋ ಪಕ್ಕಮತಿ ಚೀವರಪಟಿವೀಸಂ ಅಪವಿಲಾಯಮಾನೋ [ಅಪವಿನಯಮಾನೋ (ಸೀ.), ಅಪಚಿನಯಮಾನೋ (ಕ.)]. ತಮೇನಂ ದಿಸಙ್ಗತಂ ಭಿಕ್ಖೂ ಪುಚ್ಛನ್ತಿ – ‘‘ಕಹಂ ತ್ವಂ, ಆವುಸೋ, ವಸ್ಸಂವುಟ್ಠೋ, ಕತ್ಥ ಚ ತೇ ಚೀವರಪಟಿವೀಸೋ’’ತಿ? ಸೋ ಏವಂ ವದೇತಿ – ‘‘ಅಮುಕಸ್ಮಿಂ ಆವಾಸೇ ವಸ್ಸಂವುಟ್ಠೋಮ್ಹಿ. ತತ್ಥ ಚ ಮೇ ಚೀವರಪಟಿವೀಸೋ’’ತಿ. ತೇ ಏವಂ ವದನ್ತಿ – ‘‘ಗಚ್ಛಾವುಸೋ, ತಂ ಚೀವರಂ ಆಹರ, ಮಯಂ ತೇ ಇಧ ಚೀವರಂ ಕರಿಸ್ಸಾಮಾ’’ತಿ. ಸೋ ತಂ ಆವಾಸಂ ಗನ್ತ್ವಾ ಭಿಕ್ಖೂ ಪುಚ್ಛತಿ – ‘‘ಕಹಂ ಮೇ, ಆವುಸೋ, ಚೀವರಪಟಿವೀಸೋ’’ತಿ? ತೇ ಏವಂ ವದನ್ತಿ – ‘‘ಅಯಂ ತೇ, ಆವುಸೋ, ಚೀವರಪಟಿವೀಸೋ; ಕಹಂ ಗಮಿಸ್ಸಸೀ’’ತಿ? ಸೋ ಏವಂ ವದೇತಿ – ‘‘ಅಮುಕಂ ನಾಮ [ಅಮುಕಞ್ಚ (ಕ.)] ಆವಾಸಂ ಗಮಿಸ್ಸಾಮಿ, ತತ್ಥ ಮೇ ಭಿಕ್ಖೂ ಚೀವರಂ ಕರಿಸ್ಸನ್ತೀ’’ತಿ. ತೇ ಏವಂ ವದನ್ತಿ – ‘‘ಅಲಂ, ಆವುಸೋ, ಮಾ ಅಗಮಾಸಿ. ಮಯಂ ತೇ ಇಧ ಚೀವರಂ ಕರಿಸ್ಸಾಮಾ’’ತಿ. ತಸ್ಸ ಏವಂ ಹೋತಿ – ‘‘ಇಧೇವಿಮಂ ಚೀವರಂ ಕಾರೇಸ್ಸಂ, ನ ಪಚ್ಚೇಸ್ಸ’’ನ್ತಿ. ಸೋ ತಂ ಚೀವರಂ ಕಾರೇತಿ. ತಸ್ಸ ಭಿಕ್ಖುನೋ ನಿಟ್ಠಾನನ್ತಿಕೋ ಕಥಿನುದ್ಧಾರೋ.

ಭಿಕ್ಖು ಅತ್ಥತಕಥಿನೋ ದಿಸಂಗಮಿಕೋ ಪಕ್ಕಮತಿ…ಪೇ… ‘‘ನೇವಿಮಂ ಚೀವರಂ ಕಾರೇಸ್ಸಂ, ನ ಪಚ್ಚೇಸ್ಸ’’ನ್ತಿ. ತಸ್ಸ ಭಿಕ್ಖುನೋ ಸನ್ನಿಟ್ಠಾನನ್ತಿಕೋ ಕಥಿನುದ್ಧಾರೋ.

ಭಿಕ್ಖು ಅತ್ಥತಕಥಿನೋ ದಿಸಂಗಮಿಕೋ ಪಕ್ಕಮತಿ…ಪೇ… ‘‘ಇಧೇವಿಮಂ ಚೀವರಂ ಕಾರೇಸ್ಸಂ, ನ ಪಚ್ಚೇಸ್ಸ’’ನ್ತಿ. ಸೋ ತಂ ಚೀವರಂ ಕಾರೇತಿ. ತಸ್ಸ ತಂ ಚೀವರಂ ಕಯಿರಮಾನಂ ನಸ್ಸತಿ. ತಸ್ಸ ಭಿಕ್ಖುನೋ ನಾಸನನ್ತಿಕೋ ಕಥಿನುದ್ಧಾರೋ.

೩೨೨. ಭಿಕ್ಖು ಅತ್ಥತಕಥಿನೋ ದಿಸಂಗಮಿಕೋ ಪಕ್ಕಮತಿ ಚೀವರಪಟಿವೀಸಂ ಅಪವಿಲಾಯಮಾನೋ. ತಮೇನಂ ದಿಸಂಗತಂ ಭಿಕ್ಖೂ ಪುಚ್ಛನ್ತಿ – ‘‘ಕಹಂ ತ್ವಂ, ಆವುಸೋ, ವಸ್ಸಂವುಟ್ಠೋ, ಕತ್ಥ ಚ ತೇ ಚೀವರಪಟಿವೀಸೋ’’ತಿ? ಸೋ ಏವಂ ವದೇತಿ – ‘‘ಅಮುಕಸ್ಮಿಂ ಆವಾಸೇ ವಸ್ಸಂವುಟ್ಠೋಮ್ಹಿ, ತತ್ಥ ಚ ಮೇ ಚೀವರಪಟಿವೀಸೋ’’ತಿ. ತೇ ಏವಂ ವದನ್ತಿ – ‘‘ಗಚ್ಛಾವುಸೋ, ತಂ ಚೀವರಂ ಆಹರ, ಮಯಂ ತೇ ಇಧ ಚೀವರಂ ಕರಿಸ್ಸಾಮಾ’’ತಿ. ಸೋ ತಂ ಆವಾಸಂ ಗನ್ತ್ವಾ ಭಿಕ್ಖೂ ಪುಚ್ಛತಿ – ‘‘ಕಹಂ ಮೇ, ಆವುಸೋ, ಚೀವರಪಟಿವೀಸೋ’’ತಿ? ತೇ ಏವಂ ವದನ್ತಿ – ‘‘ಅಯಂ ತೇ, ಆವುಸೋ, ಚೀವರಪಟಿವೀಸೋ’’ತಿ. ಸೋ ತಂ ಚೀವರಂ ಆದಾಯ ತಂ ಆವಾಸಂ ಗಚ್ಛತಿ. ತಮೇನಂ ಅನ್ತರಾಮಗ್ಗೇ ಭಿಕ್ಖೂ ಪುಚ್ಛನ್ತಿ – ‘‘ಆವುಸೋ, ಕಹಂ ಗಮಿಸ್ಸಸೀ’’ತಿ? ಸೋ ಏವಂ ವದೇತಿ – ‘‘ಅಮುಕಂ ನಾಮ ಆವಾಸಂ ಗಮಿಸ್ಸಾಮಿ, ತತ್ಥ ಮೇ ಭಿಕ್ಖೂ ಚೀವರಂ ಕರಿಸ್ಸನ್ತೀ’’ತಿ. ತೇ ಏವಂ ವದನ್ತಿ – ‘‘ಅಲಂ, ಆವುಸೋ, ಮಾ ಅಗಮಾಸಿ, ಮಯಂ ತೇ ಇಧ ಚೀವರಂ ಕರಿಸ್ಸಾಮಾ’’ತಿ. ತಸ್ಸ ಏವಂ ಹೋತಿ – ‘‘ಇಧೇವಿಮಂ ಚೀವರಂ ಕಾರೇಸ್ಸಂ ನ ಪಚ್ಚೇಸ್ಸ’’ನ್ತಿ. ಸೋ ತಂ ಚೀವರಂ ಕಾರೇತಿ. ತಸ್ಸ ಭಿಕ್ಖುನೋ ನಿಟ್ಠಾನನ್ತಿಕೋ ಕಥಿನುದ್ಧಾರೋ.

ಭಿಕ್ಖು ಅತ್ಥತಕಥಿನೋ ದಿಸಂಗಮಿಕೋ ಪಕ್ಕಮತಿ ಚೀವರಪಟಿವೀಸಂ ಅಪವಿಲಾಯಮಾನೋ. ತಮೇನಂ ದಿಸಂಗತಂ ಭಿಕ್ಖೂ ಪುಚ್ಛನ್ತಿ – ‘‘ಕಹಂ ತ್ವಂ, ಆವುಸೋ, ವಸ್ಸಂವುಟ್ಠೋ, ಕತ್ಥ ಚ ತೇ ಚೀವರಪಟಿವೀಸೋ’’ತಿ? ಸೋ ಏವಂ ವದೇತಿ – ‘‘ಅಮುಕಸ್ಮಿಂ ಆವಾಸೇ ವಸ್ಸಂವುಟ್ಠೋಮ್ಹಿ, ತತ್ಥ ಚ ಮೇ ಚೀವರಪಟಿವೀಸೋ’’ತಿ. ತೇ ಏವಂ ವದನ್ತಿ – ‘‘ಗಚ್ಛಾವುಸೋ, ತಂ ಚೀವರಂ ಆಹರ, ಮಯಂ ತೇ ಇಧ ಚೀವರಂ ಕರಿಸ್ಸಾಮಾ’’ತಿ. ಸೋ ತಂ ಆವಾಸಂ ಗನ್ತ್ವಾ ಭಿಕ್ಖೂ ಪುಚ್ಛತಿ – ‘‘ಕಹಂ ಮೇ, ಆವುಸೋ, ಚೀವರಪಟಿವೀಸೋ’’ತಿ? ತೇ ಏವಂ ವದನ್ತಿ – ‘‘ಅಯಂ ತೇ, ಆವುಸೋ, ಚೀವರಪಟಿವೀಸೋ’’ತಿ. ಸೋ ತಂ ಚೀವರಂ ಆದಾಯ ತಂ ಆವಾಸಂ ಗಚ್ಛತಿ. ತಮೇನಂ ಅನ್ತರಾಮಗ್ಗೇ ಭಿಕ್ಖೂ ಪುಚ್ಛನ್ತಿ – ‘‘ಆವುಸೋ, ಕಹಂ ಗಮಿಸ್ಸಸೀ’’ತಿ? ಸೋ ಏವಂ ವದೇತಿ – ‘‘ಅಮುಕಂ ನಾಮ ಆವಾಸಂ ಗಮಿಸ್ಸಾಮಿ, ತತ್ಥ ಮೇ ಭಿಕ್ಖೂ ಚೀವರಂ ಕರಿಸ್ಸನ್ತೀ’’ತಿ. ತೇ ಏವಂ ವದನ್ತಿ – ‘‘ಅಲಂ, ಆವುಸೋ, ಮಾ ಅಗಮಾಸಿ, ಮಯಂ ತೇ ಇಧ ಚೀವರಂ ಕರಿಸ್ಸಾಮಾ’’ತಿ. ತಸ್ಸ ಏವಂ ಹೋತಿ – ‘‘ನೇವಿಮಂ ಚೀವರಂ ಕಾರೇಸ್ಸಂ, ನ ಪಚ್ಚೇಸ್ಸ’’ನ್ತಿ. ತಸ್ಸ ಭಿಕ್ಖುನೋ ಸನ್ನಿಟ್ಠಾನನ್ತಿಕೋ ಕಥಿನುದ್ಧಾರೋ.

೩೨೩. ಭಿಕ್ಖು ಅತ್ಥತಕಥಿನೋ ದಿಸಂಗಮಿಕೋ ಪಕ್ಕಮತಿ ಚೀವರಪಟಿವೀಸಂ ಅಪವಿಲಾಯಮಾನೋ. ತಮೇನಂ ದಿಸಂಗತಂ ಭಿಕ್ಖೂ ಪುಚ್ಛನ್ತಿ – ‘‘ಕಹಂ ತ್ವಂ, ಆವುಸೋ, ವಸ್ಸಂವುಟ್ಠೋ, ಕತ್ಥ ಚ ತೇ ಚೀವರಪಟಿವೀಸೋ’’ತಿ? ಸೋ ಏವಂ ವದೇತಿ – ‘‘ಅಮುಕಸ್ಮಿಂ ಆವಾಸೇ ವಸ್ಸಂವುಟ್ಠೋಮ್ಹಿ, ತತ್ಥ ಚ ಮೇ ಚೀವರಪಟಿವೀಸೋ’’ತಿ. ತೇ ಏವಂ ವದನ್ತಿ – ‘‘ಗಚ್ಛಾವುಸೋ, ತಂ ಚೀವರಂ ಆಹರ, ಮಯಂ ತೇ ಇಧ ಚೀವರಂ ಕರಿಸ್ಸಾಮಾ’’ತಿ. ಸೋ ತಂ ಆವಾಸಂ ಗನ್ತ್ವಾ ಭಿಕ್ಖೂ ಪುಚ್ಛತಿ – ‘‘ಕಹಂ ಮೇ, ಆವುಸೋ, ಚೀವರಪಟಿವೀಸೋ’’ತಿ? ತೇ ಏವಂ ವದನ್ತಿ – ‘‘ಅಯಂ ತೇ, ಆವುಸೋ, ಚೀವರಪಟಿವೀಸೋ’’ತಿ. ಸೋ ತಂ ಚೀವರಂ ಆದಾಯ ತಂ ಆವಾಸಂ ಗಚ್ಛತಿ. ತಸ್ಸ ತಂ ಆವಾಸಂ ಗತಸ್ಸ ಏವಂ ಹೋತಿ – ‘‘ಇಧೇವಿಮಂ ಚೀವರಂ ಕಾರೇಸ್ಸಂ, ನ ಪಚ್ಚೇಸ್ಸ’’ನ್ತಿ. ಸೋ ತಂ ಚೀವರಂ ಕಾರೇತಿ. ತಸ್ಸ ಭಿಕ್ಖುನೋ ನಿಟ್ಠಾನನ್ತಿಕೋ ಕಥಿನುದ್ಧಾರೋ.

ಅಪವಿಲಾಯನನವಕಂ ನಿಟ್ಠಿತಂ.