೧೮೮. ಆದಾಯಸತ್ತಕಂ

೩೧೧. ಭಿಕ್ಖು ಅತ್ಥತಕಥಿನೋ ಕತಚೀವರಂ ಆದಾಯ ಪಕ್ಕಮತಿ – ‘‘ನ ಪಚ್ಚೇಸ್ಸ’’ನ್ತಿ. ತಸ್ಸ ಭಿಕ್ಖುನೋ ಪಕ್ಕಮನನ್ತಿಕೋ ಕಥಿನುದ್ಧಾರೋ.

ಭಿಕ್ಖು ಅತ್ಥತಕಥಿನೋ ಚೀವರಂ ಆದಾಯ ಪಕ್ಕಮತಿ. ತಸ್ಸ ಬಹಿಸೀಮಗತಸ್ಸ ಏವಂ ಹೋತಿ – ‘‘ಇಧೇವಿಮಂ ಚೀವರಂ ಕಾರೇಸ್ಸಂ, ನ ಪಚ್ಚೇಸ್ಸ’’ನ್ತಿ. ಸೋ ತಂ ಚೀವರಂ ಕಾರೇತಿ. ತಸ್ಸ ಭಿಕ್ಖುನೋ ನಿಟ್ಠಾನನ್ತಿಕೋ ಕಥಿನುದ್ಧಾರೋ.

ಭಿಕ್ಖು ಅತ್ಥತಕಥಿನೋ ಚೀವರಂ ಆದಾಯ ಪಕ್ಕಮತಿ. ತಸ್ಸ ಬಹಿಸೀಮಗತಸ್ಸ ಏವಂ ಹೋತಿ – ‘‘ನೇವಿಮಂ ಚೀವರಂ ಕಾರೇಸ್ಸಂ, ನ ಪಚ್ಚೇಸ್ಸ’’ನ್ತಿ. ತಸ್ಸ ಭಿಕ್ಖುನೋ ಸನ್ನಿಟ್ಠಾನನ್ತಿಕೋ ಕಥಿನುದ್ಧಾರೋ.

ಭಿಕ್ಖು ಅತ್ಥತಕಥಿನೋ ಚೀವರಂ ಆದಾಯ ಪಕ್ಕಮತಿ. ತಸ್ಸ ಬಹಿಸೀಮಗತಸ್ಸ ಏವಂ ಹೋತಿ – ‘‘ಇಧೇವಿಮಂ ಚೀವರಂ ಕಾರೇಸ್ಸಂ, ನ ಪಚ್ಚೇಸ್ಸ’’ನ್ತಿ. ಸೋ ತಂ ಚೀವರಂ ಕಾರೇತಿ. ತಸ್ಸ ತಂ ಚೀವರಂ ಕಯಿರಮಾನಂ ನಸ್ಸತಿ. ತಸ್ಸ ಭಿಕ್ಖುನೋ ನಾಸನನ್ತಿಕೋ ಕಥಿನುದ್ಧಾರೋ.

ಭಿಕ್ಖು ಅತ್ಥತಕಥಿನೋ ಚೀವರಂ ಆದಾಯ ಪಕ್ಕಮತಿ – ‘‘ಪಚ್ಚೇಸ್ಸ’’ನ್ತಿ. ಸೋ ಬಹಿಸೀಮಗತೋ ತಂ ಚೀವರಂ ಕಾರೇತಿ. ಸೋ ಕತಚೀವರೋ ಸುಣಾತಿ ‘‘ಉಬ್ಭತಂ ಕಿರ ತಸ್ಮಿಂ ಆವಾಸೇ ಕಥಿನ’’ನ್ತಿ. ತಸ್ಸ ಭಿಕ್ಖುನೋ ಸವನನ್ತಿಕೋ ಕಥಿನುದ್ಧಾರೋ.

ಭಿಕ್ಖು ಅತ್ಥತಕಥಿನೋ ಚೀವರಂ ಆದಾಯ ಪಕ್ಕಮತಿ – ‘‘ಪಚ್ಚೇಸ್ಸ’’ನ್ತಿ. ಸೋ ಬಹಿಸೀಮಗತೋ ತಂ ಚೀವರಂ ಕಾರೇತಿ. ಸೋ ಕತಚೀವರೋ – ‘‘ಪಚ್ಚೇಸ್ಸಂ ಪಚ್ಚೇಸ್ಸ’’ನ್ತಿ – ಬಹಿದ್ಧಾ ಕಥಿನುದ್ಧಾರಂ ವೀತಿನಾಮೇತಿ. ತಸ್ಸ ಭಿಕ್ಖುನೋ ಸೀಮಾತಿಕ್ಕನ್ತಿಕೋ ಕಥಿನುದ್ಧಾರೋ.

ಭಿಕ್ಖು ಅತ್ಥತಕಥಿನೋ ಚೀವರಂ ಆದಾಯ ಪಕ್ಕಮತಿ – ‘‘ಪಚ್ಚೇಸ್ಸ’’ನ್ತಿ. ಸೋ ಬಹಿಸೀಮಗತೋ ತಂ ಚೀವರಂ ಕಾರೇತಿ. ಸೋ ಕತಚೀವರೋ – ‘‘ಪಚ್ಚೇಸ್ಸಂ ಪಚ್ಚೇಸ್ಸ’’ನ್ತಿ – ಸಮ್ಭುಣಾತಿ ಕಥಿನುದ್ಧಾರಂ. ತಸ್ಸ ಭಿಕ್ಖುನೋ ಸಹ ಭಿಕ್ಖೂಹಿ ಕಥಿನುದ್ಧಾರೋ.

ಆದಾಯಸತ್ತಕಂ ನಿಟ್ಠಿತಂ […ದುತಿಯಂ ನಿಟ್ಠಿತಂ (ಕ.)].