೧೪೧. ಪವಾರಣಾಠಪನಂ

೨೩೫. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಸಾಪತ್ತಿಕಾ ಪವಾರೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಸಾಪತ್ತಿಕೇನ ಪವಾರೇತಬ್ಬಂ. ಯೋ ಪವಾರೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಯೋ ಸಾಪತ್ತಿಕೋ ಪವಾರೇತಿ, ತಸ್ಸ ಓಕಾಸಂ ಕಾರಾಪೇತ್ವಾ ಆಪತ್ತಿಯಾ ಚೋದೇತುನ್ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಓಕಾಸಂ ಕಾರಾಪಿಯಮಾನಾ ನ ಇಚ್ಛನ್ತಿ ಓಕಾಸಂ ಕಾತುಂ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಓಕಾಸಂ ಅಕರೋನ್ತಸ್ಸ ಪವಾರಣಂ ಠಪೇತುಂ. ಏವಞ್ಚ ಪನ, ಭಿಕ್ಖವೇ, ಠಪೇತಬ್ಬಾ. ತದಹು ಪವಾರಣಾಯ ಚಾತುದ್ದಸೇ ವಾ ಪನ್ನರಸೇ ವಾ ತಸ್ಮಿಂ ಪುಗ್ಗಲೇ ಸಮ್ಮುಖೀಭೂತೇ ಸಙ್ಘಮಜ್ಝೇ ಉದಾಹರಿತಬ್ಬಂ – ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಇತ್ಥನ್ನಾಮೋ ಪುಗ್ಗಲೋ ಸಾಪತ್ತಿಕೋ. ತಸ್ಸ ಪವಾರಣಂ ಠಪೇಮಿ. ನ ತಸ್ಮಿಂ ಸಮ್ಮುಖೀಭೂತೇ ಪವಾರೇತಬ್ಬ’’ನ್ತಿ. ಠಪಿತಾ ಹೋತಿ ಪವಾರಣಾತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ – ಪುರಮ್ಹಾಕಂ ಪೇಸಲಾ ಭಿಕ್ಖೂ ಪವಾರಣಂ ಠಪೇನ್ತೀತಿ – ಪಟಿಕಚ್ಚೇವ ಸುದ್ಧಾನಂ ಭಿಕ್ಖೂನಂ ಅನಾಪತ್ತಿಕಾನಂ ಅವತ್ಥುಸ್ಮಿಂ ಅಕಾರಣೇ ಪವಾರಣಂ ಠಪೇನ್ತಿ, ಪವಾರಿತಾನಮ್ಪಿ ಪವಾರಣಂ ಠಪೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಸುದ್ಧಾನಂ ಭಿಕ್ಖೂನಂ ಅನಾಪತ್ತಿಕಾನಂ ಅವತ್ಥುಸ್ಮಿಂ ಅಕಾರಣೇ ಪವಾರಣಾ ಠಪೇತಬ್ಬಾ. ಯೋ ಠಪೇಯ್ಯ, ಆಪತ್ತಿ ದುಕ್ಕಟಸ್ಸ. ನ, ಭಿಕ್ಖವೇ, ಪವಾರಿತಾನಮ್ಪಿ ಪವಾರಣಾ ಠಪೇತಬ್ಬಾ. ಯೋ ಠಪೇಯ್ಯ, ಆಪತ್ತಿ ದುಕ್ಕಟಸ್ಸ.

೨೩೬. ಏವಂ ಖೋ, ಭಿಕ್ಖವೇ, ಠಪಿತಾ ಹೋತಿ ಪವಾರಣಾ, ಏವಂ ಅಟ್ಠಪಿತಾ. ಕಥಞ್ಚ, ಭಿಕ್ಖವೇ, ಅಟ್ಠಪಿತಾ ಹೋತಿ ಪವಾರಣಾ? ತೇವಾಚಿಕಾಯ ಚೇ, ಭಿಕ್ಖವೇ, ಪವಾರಣಾಯ ಭಾಸಿತಾಯ ಲಪಿತಾಯ ಪರಿಯೋಸಿತಾಯ ಪವಾರಣಂ ಠಪೇತಿ, ಅಟ್ಠಪಿತಾ ಹೋತಿ ಪವಾರಣಾ. ದ್ವೇವಾಚಿಕಾಯ ಚೇ, ಭಿಕ್ಖವೇ,… ಏಕವಾಚಿಕಾಯ ಚೇ, ಭಿಕ್ಖವೇ,… ಸಮಾನವಸ್ಸಿಕಾಯ ಚೇ, ಭಿಕ್ಖವೇ, ಪವಾರಣಾಯ ಭಾಸಿತಾಯ ಲಪಿತಾಯ ಪರಿಯೋಸಿತಾಯ ಪವಾರಣಂ ಠಪೇತಿ, ಅಟ್ಠಪಿತಾ ಹೋತಿ ಪವಾರಣಾ. ಏವಂ ಖೋ, ಭಿಕ್ಖವೇ, ಅಟ್ಠಪಿತಾ ಹೋತಿ ಪವಾರಣಾ.

ಕಥಞ್ಚ, ಭಿಕ್ಖವೇ, ಠಪಿತಾ ಹೋತಿ ಪವಾರಣಾ? ತೇವಾಚಿಕಾಯ, ಚೇ, ಭಿಕ್ಖವೇ, ಪವಾರಣಾಯ ಭಾಸಿತಾಯ ಲಪಿತಾಯ ಅಪರಿಯೋಸಿತಾಯ ಪವಾರಣಂ ಠಪೇತಿ, ಠಪಿತಾ ಹೋತಿ ಪವಾರಣಾ. ದ್ವೇವಾಚಿಕಾಯ ಚೇ, ಭಿಕ್ಖವೇ,… ಏಕವಾಚಿಕಾಯ ಚೇ, ಭಿಕ್ಖವೇ,… ಸಮಾನವಸ್ಸಿಕಾಯ ಚೇ, ಭಿಕ್ಖವೇ, ಪವಾರಣಾಯ ಭಾಸಿತಾಯ ಲಪಿತಾಯ ಅಪರಿಯೋಸಿತಾಯ ಪವಾರಣಂ ಠಪೇತಿ, ಠಪಿತಾ ಹೋತಿ ಪವಾರಣಾ. ಏವಂ ಖೋ, ಭಿಕ್ಖವೇ, ಠಪಿತಾ ಹೋತಿ ಪವಾರಣಾ.

೨೩೭. ಇಧ ಪನ, ಭಿಕ್ಖವೇ, ತದಹು ಪವಾರಣಾಯ ಭಿಕ್ಖು ಭಿಕ್ಖುಸ್ಸ ಪವಾರಣಂ ಠಪೇತಿ. ತಂ ಚೇ ಭಿಕ್ಖುಂ ಅಞ್ಞೇ ಭಿಕ್ಖೂ ಜಾನನ್ತಿ, ‘‘ಅಯಂ ಖೋ ಆಯಸ್ಮಾ ಅಪರಿಸುದ್ಧಕಾಯಸಮಾಚಾರೋ, ಅಪರಿಸುದ್ಧವಚೀಸಮಾಚಾರೋ, ಅಪರಿಸುದ್ಧಾಜೀವೋ, ಬಾಲೋ, ಅಬ್ಯತ್ತೋ, ನ ಪಟಿಬಲೋ ಅನುಯುಞ್ಜೀಯಮಾನೋ ಅನುಯೋಗಂ ದಾತು’’ನ್ತಿ, ‘ಅಲಂ, ಭಿಕ್ಖು, ಮಾ ಭಣ್ಡನಂ, ಮಾ ಕಲಹಂ, ಮಾ ವಿಗ್ಗಹಂ, ಮಾ ವಿವಾದ’ನ್ತಿ ಓಮದ್ದಿತ್ವಾ ಸಙ್ಘೇನ ಪವಾರೇತಬ್ಬಂ.

ಇಧ ಪನ, ಭಿಕ್ಖವೇ, ತದಹು ಪವಾರಣಾಯ ಭಿಕ್ಖು ಭಿಕ್ಖುಸ್ಸ ಪವಾರಣಂ ಠಪೇತಿ. ತಂ ಚೇ ಭಿಕ್ಖುಂ ಅಞ್ಞೇ ಭಿಕ್ಖೂ ಜಾನನ್ತಿ, ‘‘ಅಯಂ ಖೋ ಆಯಸ್ಮಾ ಪರಿಸುದ್ಧಕಾಯಸಮಾಚಾರೋ, ಅಪರಿಸುದ್ಧವಚೀಸಮಾಚಾರೋ, ಅಪರಿಸುದ್ಧಾಜೀವೋ, ಬಾಲೋ, ಅಬ್ಯತ್ತೋ, ನ ಪಟಿಬಲೋ ಅನುಯುಞ್ಜೀಯಮಾನೋ ಅನುಯೋಗಂ ದಾತು’’ನ್ತಿ, ‘ಅಲಂ, ಭಿಕ್ಖು, ಮಾ ಭಣ್ಡನಂ, ಮಾ ಕಲಹಂ, ಮಾ ವಿಗ್ಗಹಂ, ಮಾ ವಿವಾದ’ನ್ತಿ ಓಮದ್ದಿತ್ವಾ ಸಙ್ಘೇನ ಪವಾರೇತಬ್ಬಂ.

ಇಧ ಪನ, ಭಿಕ್ಖವೇ, ತದಹು ಪವಾರಣಾಯ ಭಿಕ್ಖು ಭಿಕ್ಖುಸ್ಸ ಪವಾರಣಂ ಠಪೇತಿ. ತಂ ಚೇ ಭಿಕ್ಖುಂ ಅಞ್ಞೇ ಭಿಕ್ಖೂ ಜಾನನ್ತಿ, ‘‘ಅಯಂ ಖೋ ಆಯಸ್ಮಾ ಪರಿಸುದ್ಧಕಾಯಸಮಾಚಾರೋ, ಪರಿಸುದ್ಧವಚೀಸಮಾಚಾರೋ, ಅಪರಿಸುದ್ಧಾಜೀವೋ, ಬಾಲೋ, ಅಬ್ಯತ್ತೋ, ನ ಪಟಿಬಲೋ ಅನುಯುಞ್ಜೀಯಮಾನೋ ಅನುಯೋಗಂ ದಾತು’’ನ್ತಿ, ‘ಅಲಂ, ಭಿಕ್ಖು, ಮಾ ಭಣ್ಡನಂ, ಮಾ ಕಲಹಂ, ಮಾ ವಿಗ್ಗಹಂ, ಮಾ ವಿವಾದ’ನ್ತಿ ಓಮದ್ದಿತ್ವಾ ಸಙ್ಘೇನ ಪವಾರೇತಬ್ಬಂ.

ಇಧ ಪನ, ಭಿಕ್ಖವೇ, ತದಹು ಪವಾರಣಾಯ ಭಿಕ್ಖು ಭಿಕ್ಖುಸ್ಸ ಪವಾರಣಂ ಠಪೇತಿ. ತಂ ಚೇ ಭಿಕ್ಖುಂ ಅಞ್ಞೇ ಭಿಕ್ಖೂ ಜಾನನ್ತಿ, ‘‘ಅಯಂ ಖೋ ಆಯಸ್ಮಾ ಪರಿಸುದ್ಧಕಾಯಸಮಾಚಾರೋ, ಪರಿಸುದ್ಧವಚೀಸಮಾಚಾರೋ, ಪರಿಸುದ್ಧಾಜೀವೋ, ಬಾಲೋ, ಅಬ್ಯತ್ತೋ, ನ ಪಟಿಬಲೋ ಅನುಯುಞ್ಜೀಯಮಾನೋ ಅನುಯೋಗಂ ದಾತು’’ನ್ತಿ, ‘ಅಲಂ, ಭಿಕ್ಖು, ಮಾ ಭಣ್ಡನಂ, ಮಾ ಕಲಹಂ, ಮಾ ವಿಗ್ಗಹಂ, ಮಾ ವಿವಾದ’ನ್ತಿ ಓಮದ್ದಿತ್ವಾ ಸಙ್ಘೇನ ಪವಾರೇತಬ್ಬಂ.

ಇಧ ಪನ, ಭಿಕ್ಖವೇ, ತದಹು ಪವಾರಣಾಯ ಭಿಕ್ಖು ಭಿಕ್ಖುಸ್ಸ ಪವಾರಣಂ ಠಪೇತಿ. ತಂ ಚೇ ಭಿಕ್ಖುಂ ಅಞ್ಞೇ ಭಿಕ್ಖೂ ಜಾನನ್ತಿ, ‘‘ಅಯಂ ಖೋ ಆಯಸ್ಮಾ ಪರಿಸುದ್ಧಕಾಯಸಮಾಚಾರೋ, ಪರಿಸುದ್ಧವಚೀಸಮಾಚಾರೋ, ಪರಿಸುದ್ಧಾಜೀವೋ, ಪಣ್ಡಿತೋ, ಬ್ಯತ್ತೋ, ಪಟಿಬಲೋ ಅನುಯುಞ್ಜೀಯಮಾನೋ ಅನುಯೋಗಂ ದಾತು’’ನ್ತಿ, ಸೋ ಏವಮಸ್ಸ ವಚನೀಯೋ, ‘‘ಯಂ ಖೋ ತ್ವಂ, ಆವುಸೋ, ಇಮಸ್ಸ ಭಿಕ್ಖುನೋ ಪವಾರಣಂ ಠಪೇಸಿ, ಕಿಮ್ಹಿ ನಂ ಠಪೇಸಿ, ಸೀಲವಿಪತ್ತಿಯಾ ವಾ ಠಪೇಸಿ, ಆಚಾರವಿಪತ್ತಿಯಾ ವಾ ಠಪೇಸಿ, ದಿಟ್ಠಿವಿಪತ್ತಿಯಾ ವಾ ಠಪೇಸೀ’’ತಿ? ಸೋ ಚೇ ಏವಂ ವದೇಯ್ಯ – ‘‘ಸೀಲವಿಪತ್ತಿಯಾ ವಾ ಠಪೇಮಿ, ಆಚಾರವಿಪತ್ತಿಯಾ ವಾ ಠಪೇಮಿ, ದಿಟ್ಠಿವಿಪತ್ತಿಯಾ ವಾ ಠಪೇಮೀ’’ತಿ, ಸೋ ಏವಮಸ್ಸ ವಚನೀಯೋ – ‘‘ಜಾನಾಸಿ ಪನಾಯಸ್ಮಾ ಸೀಲವಿಪತ್ತಿಂ, ಜಾನಾಸಿ ಆಚಾರವಿಪತ್ತಿಂ, ಜಾನಾಸಿ ದಿಟ್ಠಿವಿಪತ್ತಿ’’ನ್ತಿ? ಸೋ ಚೇ ಏವಂ ವದೇಯ್ಯ – ‘‘ಜಾನಾಮಿ ಖೋ ಅಹಂ, ಆವುಸೋ, ಸೀಲವಿಪತ್ತಿಂ, ಜಾನಾಮಿ ಆಚಾರವಿಪತ್ತಿಂ, ಜಾನಾಮಿ ದಿಟ್ಠಿವಿಪತ್ತಿ’’ನ್ತಿ, ಸೋ ಏವಮಸ್ಸ ವಚನೀಯೋ – ‘‘ಕತಮಾ ಪನಾವುಸೋ, ಸೀಲವಿಪತ್ತಿ, ಕತಮಾ ಆಚಾರವಿಪತ್ತಿ, ಕತಮಾ ದಿಟ್ಠಿವಿಪತ್ತೀ’’ತಿ? ಸೋ ಚೇ ಏವಂ ವದೇಯ್ಯ – ‘‘ಚತ್ತಾರಿ ಪಾರಾಜಿಕಾನಿ, ತೇರಸ ಸಙ್ಘಾದಿಸೇಸಾ, ಅಯಂ ಸೀಲವಿಪತ್ತಿ; ಥುಲ್ಲಚ್ಚಯಂ, ಪಾಚಿತ್ತಿಯಂ, ಪಾಟಿದೇಸನೀಯಂ, ದುಕ್ಕಟಂ, ದುಬ್ಭಾಸಿತಂ, ಅಯಂ ಆಚಾರವಿಪತ್ತಿ; ಮಿಚ್ಛಾದಿಟ್ಠಿ, ಅನ್ತಗ್ಗಾಹಿಕಾದಿಟ್ಠಿ, ಅಯಂ ದಿಟ್ಠಿವಿಪತ್ತೀ’’ತಿ, ಸೋ ಏವಮಸ್ಸ ವಚನೀಯೋ – ‘‘ಯಂ ಖೋ ತ್ವಂ, ಆವುಸೋ, ಇಮಸ್ಸ ಭಿಕ್ಖುನೋ ಪವಾರಣಂ ಠಪೇಸಿ, ದಿಟ್ಠೇನ ವಾ ಠಪೇಸಿ, ಸುತೇನ ವಾ ಠಪೇಸಿ, ಪರಿಸಙ್ಕಾಯ ವಾ ಠಪೇಸೀ’’ತಿ? ಸೋ ಚೇ ಏವಂ ವದೇಯ್ಯ – ‘‘ದಿಟ್ಠೇನ ವಾ ಠಪೇಮಿ, ಸುತೇನ ವಾ ಠಪೇಮಿ, ಪರಿಸಙ್ಕಾಯ ವಾ ಠಪೇಮೀ’’ತಿ, ಸೋ ಏವಮಸ್ಸ ವಚನೀಯೋ – ‘‘ಯಂ ಖೋ ತ್ವಂ, ಆವುಸೋ, ಇಮಸ್ಸ ಭಿಕ್ಖುನೋ ದಿಟ್ಠೇನ ಪವಾರಣಂ ಠಪೇಸಿ, ಕಿಂ ತೇ ದಿಟ್ಠಂ, ಕಿನ್ತಿ ತೇ ದಿಟ್ಠಂ, ಕದಾ ತೇ ದಿಟ್ಠಂ, ಕತ್ಥ ತೇ ದಿಟ್ಠಂ, ಪಾರಾಜಿಕಂ ಅಜ್ಝಾಪಜ್ಜನ್ತೋ ದಿಟ್ಠೋ, ಸಙ್ಘಾದಿಸೇಸಂ ಅಜ್ಝಾಪಜ್ಜನ್ತೋ ದಿಟ್ಠೋ, ಥುಲ್ಲಚ್ಚಯಂ… ಪಾಚಿತ್ತಿಯಂ… ಪಾಟಿದೇಸನೀಯಂ… ದುಕ್ಕಟಂ… ದುಬ್ಭಾಸಿತಂ ಅಜ್ಝಾಪಜ್ಜನ್ತೋ ದಿಟ್ಠೋ, ಕತ್ಥ ಚ ತ್ವಂ ಅಹೋಸಿ, ಕತ್ಥ ಚಾಯಂ ಭಿಕ್ಖು ಅಹೋಸಿ, ಕಿಞ್ಚ ತ್ವಂ ಕರೋಸಿ, ಕಿಞ್ಚಾಯಂ ಭಿಕ್ಖು ಕರೋತೀ’’ತಿ? ಸೋ ಚೇ ಏವಂ ವದೇಯ್ಯ – ‘‘ನ ಖೋ ಅಹಂ, ಆವುಸೋ, ಇಮಸ್ಸ ಭಿಕ್ಖುನೋ ದಿಟ್ಠೇನ ಪವಾರಣಂ ಠಪೇಮಿ, ಅಪಿಚ ಸುತೇನ ಪವಾರಣಂ ಠಪೇಮೀ’’ತಿ, ಸೋ ಏವಮಸ್ಸ ವಚನೀಯೋ – ‘‘ಯಂ ಖೋ ತ್ವಂ, ಆವುಸೋ, ಇಮಸ್ಸ ಭಿಕ್ಖುನೋ ಸುತೇನ ಪವಾರಣಂ ಠಪೇಸಿ, ಕಿಂ ತೇ ಸುತಂ, ಕಿನ್ತಿ ತೇ ಸುತಂ, ಕದಾ ತೇ ಸುತಂ, ಕತ್ಥ ತೇ ಸುತಂ, ಪಾರಾಜಿಕಂ ಅಜ್ಝಾಪನ್ನೋತಿ ಸುತಂ, ಸಙ್ಘಾದಿಸೇಸಂ ಅಜ್ಝಾಪನ್ನೋತಿ ಸುತಂ, ಥುಲ್ಲಚ್ಚಯಂ… ಪಾಚಿತ್ತಿಯಂ… ಪಾಟಿದೇಸನೀಯಂ… ದುಕ್ಕಟಂ… ದುಬ್ಭಾಸಿತಂ ಅಜ್ಝಾಪನ್ನೋತಿ ಸುತಂ, ಭಿಕ್ಖುಸ್ಸ ಸುತಂ, ಭಿಕ್ಖುನಿಯಾ ಸುತಂ, ಸಿಕ್ಖಮಾನಾಯ ಸುತಂ, ಸಾಮಣೇರಸ್ಸ ಸುತಂ, ಸಾಮಣೇರಿಯಾ ಸುತಂ, ಉಪಾಸಕಸ್ಸ ಸುತಂ, ಉಪಾಸಿಕಾಯ ಸುತಂ, ರಾಜೂನಂ ಸುತಂ, ರಾಜಮಹಾಮತ್ತಾನಂ ಸುತಂ, ತಿತ್ಥಿಯಾನಂ ಸುತಂ, ತಿತ್ಥಿಯಸಾವಕಾನಂ ಸುತ’’ನ್ತಿ? ಸೋ ಚೇ ಏವಂ ವದೇಯ್ಯ – ‘‘ನ ಖೋ ಅಹಂ, ಆವುಸೋ, ಇಮಸ್ಸ ಭಿಕ್ಖುನೋ ಸುತೇನ ಪವಾರಣಂ ಠಪೇಮಿ, ಅಪಿಚ ಪರಿಸಙ್ಕಾಯ ಪವಾರಣಂ ಠಪೇಮೀ’’ತಿ, ಸೋ ಏವಮಸ್ಸ ವಚನೀಯೋ – ‘‘ಯಂ ಖೋ ತ್ವಂ, ಆವುಸೋ, ಇಮಸ್ಸ ಭಿಕ್ಖುನೋ ಪರಿಸಙ್ಕಾಯ ಪವಾರಣಂ ಠಪೇಸಿ, ಕಿಂ ಪರಿಸಙ್ಕಸಿ, ಕಿನ್ತಿ ಪರಿಸಙ್ಕಸಿ, ಕದಾ ಪರಿಸಙ್ಕಸಿ, ಕತ್ಥ ಪರಿಸಙ್ಕಸಿ, ಪಾರಾಜಿಕಂ ಅಜ್ಝಾಪನ್ನೋತಿ ಪರಿಸಙ್ಕಸಿ, ಸಙ್ಘಾದಿಸೇಸಂ ಅಜ್ಝಾಪನ್ನೋತಿ ಪರಿಸಙ್ಕಸಿ, ಥುಲ್ಲಚ್ಚಯಂ… ಪಾಚಿತ್ತಿಯಂ… ಪಾಟಿದೇಸನೀಯಂ… ದುಕ್ಕಟಂ… ದುಬ್ಭಾಸಿತಂ ಅಜ್ಝಾಪನ್ನೋತಿ ಪರಿಸಙ್ಕಸಿ, ಭಿಕ್ಖುಸ್ಸ ಸುತ್ವಾ ಪರಿಸಙ್ಕಸಿ, ಭಿಕ್ಖುನಿಯಾ ಸುತ್ವಾ ಪರಿಸಙ್ಕಸಿ, ಸಿಕ್ಖಮಾನಾಯ ಸುತ್ವಾ ಪರಿಸಙ್ಕಸಿ, ಸಾಮಣೇರಸ್ಸ ಸುತ್ವಾ ಪರಿಸಙ್ಕಸಿ, ಸಾಮಣೇರಿಯಾ ಸುತ್ವಾ ಪರಿಸಙ್ಕಸಿ, ಉಪಾಸಕಸ್ಸ ಸುತ್ವಾ ಪರಿಸಙ್ಕಸಿ, ಉಪಾಸಿಕಾಯ ಸುತ್ವಾ ಪರಿಸಙ್ಕಸಿ, ರಾಜೂನಂ ಸುತ್ವಾ ಪರಿಸಙ್ಕಸಿ, ರಾಜಮಹಾಮತ್ತಾನಂ ಸುತ್ವಾ ಪರಿಸಙ್ಕಸಿ, ತಿತ್ಥಿಯಾನಂ ಸುತ್ವಾ ಪರಿಸಙ್ಕಸಿ, ತಿತ್ಥಿಯಸಾವಕಾನಂ ಸುತ್ವಾ ಪರಿಸಙ್ಕಸೀ’’ತಿ? ಸೋ ಚೇ ಏವಂ ವದೇಯ್ಯ – ‘‘ನ ಖೋ ಅಹಂ, ಆವುಸೋ, ಇಮಸ್ಸ ಭಿಕ್ಖುನೋ ಪರಿಸಙ್ಕಾಯ ಪವಾರಣಂ ಠಪೇಮಿ, ಅಪಿ ಚ ಅಹಮ್ಪಿ ನ ಜಾನಾಮಿ ಕೇನ ಪನಾಹಂ ಇಮಸ್ಸ ಭಿಕ್ಖುನೋ ಪವಾರಣಂ ಠಪೇಮೀ’’ತಿ. ಸೋ ಚೇ, ಭಿಕ್ಖವೇ, ಚೋದಕೋ ಭಿಕ್ಖು ಅನುಯೋಗೇನ ವಿಞ್ಞೂನಂ ಸಬ್ರಹ್ಮಚಾರೀನಂ ಚಿತ್ತಂ ನ ಆರಾಧೇತಿ, ಅನನುವಾದೋ ಚುದಿತೋ ಭಿಕ್ಖೂತಿ ಅಲಂ ವಚನಾಯ. ಸೋ ಚೇ, ಭಿಕ್ಖವೇ, ಚೋದಕೋ ಭಿಕ್ಖು ಅನುಯೋಗೇನ ವಿಞ್ಞೂನಂ ಸಬ್ರಹ್ಮಚಾರೀನಂ ಚಿತ್ತಂ ಆರಾಧೇತಿ, ಸಾನುವಾದೋ ಚುದಿತೋ ಭಿಕ್ಖೂತಿ ಅಲಂ ವಚನಾಯ. ಸೋ ಚೇ, ಭಿಕ್ಖವೇ, ಚೋದಕೋ ಭಿಕ್ಖು ಅಮೂಲಕೇನ ಪಾರಾಜಿಕೇನ ಅನುದ್ಧಂಸಿತಂ ಪಟಿಜಾನಾತಿ, ಸಙ್ಘಾದಿಸೇಸಂ ಆರೋಪೇತ್ವಾ ಸಙ್ಘೇನ ಪವಾರೇತಬ್ಬಂ. ಸೋ ಚೇ, ಭಿಕ್ಖವೇ, ಚೋದಕೋ ಭಿಕ್ಖು ಅಮೂಲಕೇನ ಸಙ್ಘಾದಿಸೇಸೇನ ಅನುದ್ಧಂಸಿತಂ ಪಟಿಜಾನಾತಿ, ಯಥಾಧಮ್ಮಂ ಕಾರಾಪೇತ್ವಾ ಸಙ್ಘೇನ ಪವಾರೇತಬ್ಬಂ. ಸೋ ಚೇ, ಭಿಕ್ಖವೇ, ಚೋದಕೋ, ಭಿಕ್ಖು ಅಮೂಲಕೇನ ಥುಲ್ಲಚ್ಚಯೇನ… ಪಾಚಿತ್ತಿಯೇನ… ಪಾಟಿದೇಸನೀಯೇನ… ದುಕ್ಕಟೇನ… ದುಬ್ಭಾಸಿತೇನ ಅನುದ್ಧಂಸಿತಂ ಪಟಿಜಾನಾತಿ, ಯಥಾಧಮ್ಮಂ ಕಾರಾಪೇತ್ವಾ ಸಙ್ಘೇನ ಪವಾರೇತಬ್ಬಂ. ಸೋ ಚೇ, ಭಿಕ್ಖವೇ, ಚುದಿತೋ ಭಿಕ್ಖು ಪಾರಾಜಿಕಂ ಅಜ್ಝಾಪನ್ನೋತಿ ಪಟಿಜಾನಾತಿ, ನಾಸೇತ್ವಾ ಸಙ್ಘೇನ ಪವಾರೇತಬ್ಬಂ. ಸೋ ಚೇ, ಭಿಕ್ಖವೇ, ಚುದಿತೋ ಭಿಕ್ಖು ಸಙ್ಘಾದಿಸೇಸಂ ಅಜ್ಝಾಪನ್ನೋತಿ ಪಟಿಜಾನಾತಿ, ಸಙ್ಘಾದಿಸೇಸಂ ಆರೋಪೇತ್ವಾ ಸಙ್ಘೇನ ಪವಾರೇತಬ್ಬಂ. ಸೋ ಚೇ, ಭಿಕ್ಖವೇ, ಚುದಿತೋ ಭಿಕ್ಖು ಥುಲ್ಲಚ್ಚಯಂ… ಪಾಚಿತ್ತಿಯಂ… ಪಾಟಿದೇಸನೀಯಂ… ದುಕ್ಕಟಂ… ದುಬ್ಭಾಸಿತಂ ಅಜ್ಝಾಪನ್ನೋತಿ ಪಟಿಜಾನಾತಿ, ಯಥಾಧಮ್ಮಂ ಕಾರಾಪೇತ್ವಾ ಸಙ್ಘೇನ ಪವಾರೇತಬ್ಬಂ.

ಪವಾರಣಾಠಪನಂ ನಿಟ್ಠಿತಂ.