೧೨೬. ಆಪತ್ತಿಆವಿಕರಣವಿಧಿ

೨೨೦. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಪವಾರಯಮಾನೋ ಆಪತ್ತಿಂ ಸರತಿ. ಅಥ ಖೋ ತಸ್ಸ ಭಿಕ್ಖುನೋ ಏತದಹೋಸಿ – ‘‘ಭಗವತಾ ಪಞ್ಞತ್ತಂ ‘ನ ಸಾಪತ್ತಿಕೇನ ಪವಾರೇತಬ್ಬ’ನ್ತಿ. ಅಹಞ್ಚಮ್ಹಿ ಆಪತ್ತಿಂ ಆಪನ್ನೋ. ಕಥಂ ನು ಖೋ ಮಯಾ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ.

ಇಧ ಪನ, ಭಿಕ್ಖವೇ, ಭಿಕ್ಖು ಪವಾರಯಮಾನೋ ಆಪತ್ತಿಂ ಸರತಿ. ತೇನ, ಭಿಕ್ಖವೇ, ಭಿಕ್ಖುನಾ ಸಾಮನ್ತೋ ಭಿಕ್ಖು ಏವಮಸ್ಸ ವಚನೀಯೋ – ‘‘ಅಹಂ, ಆವುಸೋ, ಇತ್ಥನ್ನಾಮಂ ಆಪತ್ತಿಂ ಆಪನ್ನೋ. ಇತೋ ವುಟ್ಠಹಿತ್ವಾ ತಂ ಆಪತ್ತಿಂ ಪಟಿಕರಿಸ್ಸಾಮೀ’’ತಿ ವತ್ವಾ ಪವಾರೇತಬ್ಬಂ; ನ ತ್ವೇವ ತಪ್ಪಚ್ಚಯಾ ಪವಾರಣಾಯ ಅನ್ತರಾಯೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖು ಪವಾರಯಮಾನೋ ಆಪತ್ತಿಯಾ ವೇಮತಿಕೋ ಹೋತಿ. ತೇನ, ಭಿಕ್ಖವೇ,

ಭಿಕ್ಖುನಾ ಸಾಮನ್ತೋ ಭಿಕ್ಖು ಏವಮಸ್ಸ ವಚನೀಯೋ – ‘‘ಅಹಂ, ಆವುಸೋ, ಇತ್ಥನ್ನಾಮಾಯ ಆಪತ್ತಿಯಾ ವೇಮತಿಕೋ; ಯದಾ ನಿಬ್ಬೇಮತಿಕೋ ಭವಿಸ್ಸಾಮಿ ತದಾ ತಂ ಆಪತ್ತಿಂ ಪಟಿಕರಿಸ್ಸಾಮೀ’’ತಿ ವತ್ವಾ ಪವಾರೇತಬ್ಬಂ; ನ ತ್ವೇವ ತಪ್ಪಚ್ಚಯಾ ಪವಾರಣಾಯ ಅನ್ತರಾಯೋ ಕಾತಬ್ಬೋತಿ.

ಆಪತ್ತಿ ಆವಿಕರಣವಿಧಿ ನಿಟ್ಠಿತಾ.