೧೨೧. ಪವಾರಣಾಭೇದಾ

೨೧೨. ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕತಿ ನು ಖೋ ಪವಾರಣಾ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ದ್ವೇಮಾ, ಭಿಕ್ಖವೇ, ಪವಾರಣಾ – ಚಾತುದ್ದಸಿಕಾ ಚ ಪನ್ನರಸಿಕಾ ಚ. ಇಮಾ ಖೋ, ಭಿಕ್ಖವೇ, ದ್ವೇ ಪವಾರಣಾತಿ.

ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕತಿ ನು ಖೋ ಪವಾರಣಕಮ್ಮಾನೀ’’ತಿ? [ಪವಾರಣಾಕಮ್ಮಾನೀತಿ (ಸ್ಯಾ.)] ಭಗವತೋ ಏತಮತ್ಥಂ ಆರೋಚೇಸುಂ. ಚತ್ತಾರಿಮಾನಿ, ಭಿಕ್ಖವೇ, ಪವಾರಣಕಮ್ಮಾನಿ – ಅಧಮ್ಮೇನ ವಗ್ಗಂ ಪವಾರಣಕಮ್ಮಂ, ಅಧಮ್ಮೇನ ಸಮಗ್ಗಂ ಪವಾರಣಕಮ್ಮಂ, ಧಮ್ಮೇನ ವಗ್ಗಂ ಪವಾರಣಕಮ್ಮಂ, ಧಮ್ಮೇನ ಸಮಗ್ಗಂ ಪವಾರಣಕಮ್ಮಂ. ತತ್ರ, ಭಿಕ್ಖವೇ, ಯದಿದಂ ಅಧಮ್ಮೇನ ವಗ್ಗಂ ಪವಾರಣಕಮ್ಮಂ, ನ, ಭಿಕ್ಖವೇ, ಏವರೂಪಂ ಪವಾರಣಕಮ್ಮಂ ಕಾತಬ್ಬಂ; ನ ಚ ಮಯಾ ಏವರೂಪಂ ಪವಾರಣಕಮ್ಮಂ ಅನುಞ್ಞಾತಂ. ತತ್ರ, ಭಿಕ್ಖವೇ, ಯದಿದಂ ಅಧಮ್ಮೇನ ಸಮಗ್ಗಂ ಪವಾರಣಕಮ್ಮಂ, ನ, ಭಿಕ್ಖವೇ, ಏವರೂಪಂ ಪವಾರಣಕಮ್ಮಂ ಕಾತಬ್ಬಂ; ನ ಚ ಮಯಾ ಏವರೂಪಂ ಪವಾರಣಕಮ್ಮಂ ಅನುಞ್ಞಾತಂ. ತತ್ರ, ಭಿಕ್ಖವೇ, ಯದಿದಂ ಧಮ್ಮೇನ ವಗ್ಗಂ ಪವಾರಣಕಮ್ಮಂ, ನ, ಭಿಕ್ಖವೇ, ಏವರೂಪಂ ಪವಾರಣಕಮ್ಮಂ ಕಾತಬ್ಬಂ; ನ ಚ ಮಯಾ ಏವರೂಪಂ ಪವಾರಣಕಮ್ಮಂ ಅನುಞ್ಞಾತಂ. ತತ್ರ, ಭಿಕ್ಖವೇ, ಯದಿದಂ ಧಮ್ಮೇನ ಸಮಗ್ಗಂ ಪವಾರಣಕಮ್ಮಂ, ಏವರೂಪಂ, ಭಿಕ್ಖವೇ, ಪವಾರಣಕಮ್ಮಂ ಕಾತಬ್ಬಂ; ಏವರೂಪಞ್ಚ ಮಯಾ ಪವಾರಣಕಮ್ಮಂ ಅನುಞ್ಞಾತಂ. ತಸ್ಮಾತಿಹ, ಭಿಕ್ಖವೇ, ಏವರೂಪಂ ಪವಾರಣಕಮ್ಮಂ ಕರಿಸ್ಸಾಮ ಯದಿದಂ ಧಮ್ಮೇನ ಸಮಗ್ಗನ್ತಿ, ಏವಞ್ಹಿ ವೋ, ಭಿಕ್ಖವೇ, ಸಿಕ್ಖಿತಬ್ಬನ್ತಿ.

ಪವಾರಣಾಭೇದಾ ನಿಟ್ಠಿತಾ.