೩. ವಸ್ಸೂಪನಾಯಿಕಕ್ಖನ್ಧಕೋ

೧೦೭. ವಸ್ಸೂಪನಾಯಿಕಾನುಜಾನನಾ

೧೮೪. ತೇನ ಸಮಯೇನ ಬುದ್ಧೋ ಭಗವಾ ರಾಜಗಹೇ ವಿಹರತಿ ವೇಳುವನೇ ಕಲನ್ದಕನಿವಾಪೇ. ತೇನ ಖೋ ಪನ ಸಮಯೇನ ಭಗವತಾ ಭಿಕ್ಖೂನಂ ವಸ್ಸಾವಾಸೋ ಅಪಞ್ಞತ್ತೋ ಹೋತಿ. ತೇಇಧ ಭಿಕ್ಖೂ ಹೇಮನ್ತಮ್ಪಿ ಗಿಮ್ಹಮ್ಪಿ ವಸ್ಸಮ್ಪಿ ಚಾರಿಕಂ ಚರನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ಹೇಮನ್ತಮ್ಪಿ ಗಿಮ್ಹಮ್ಪಿ ವಸ್ಸಮ್ಪಿ ಚಾರಿಕಂ ಚರಿಸ್ಸನ್ತಿ, ಹರಿತಾನಿ ತಿಣಾನಿ ಸಮ್ಮದ್ದನ್ತಾ, ಏಕಿನ್ದ್ರಿಯಂ ಜೀವಂ ವಿಹೇಠೇನ್ತಾ, ಬಹೂ ಖುದ್ದಕೇ ಪಾಣೇ ಸಙ್ಘಾತಂ ಆಪಾದೇನ್ತಾ. ಇಮೇ ಹಿ ನಾಮ ಅಞ್ಞತಿತ್ಥಿಯಾ ದುರಕ್ಖಾತಧಮ್ಮಾ ವಸ್ಸಾವಾಸಂ ಅಲ್ಲೀಯಿಸ್ಸನ್ತಿ ಸಙ್ಕಸಾಯಿಸ್ಸನ್ತಿ. ಇಮೇ ಹಿ ನಾಮ ಸಕುನ್ತಕಾ ರುಕ್ಖಗ್ಗೇಸು ಕುಲಾವಕಾನಿ ಕರಿತ್ವಾ ವಸ್ಸಾವಾಸಂ ಅಲ್ಲೀಯಿಸ್ಸನ್ತಿ ಸಙ್ಕಸಾಯಿಸ್ಸನ್ತಿ [ಸಙ್ಕಾಸಯಿಸ್ಸನ್ತಿ (ಸೀ. ಸ್ಯಾ.)]. ಇಮೇ ಪನ ಸಮಣಾ ಸಕ್ಯಪುತ್ತಿಯಾ ಹೇಮನ್ತಮ್ಪಿ ಗಿಮ್ಹಮ್ಪಿ ವಸ್ಸಮ್ಪಿ ಚಾರಿಕಂ ಚರನ್ತಿ, ಹರಿತಾನಿ ತಿಣಾನಿ ಸಮ್ಮದ್ದನ್ತಾ, ಏಕಿನ್ದ್ರಿಯಂ ಜೀವಂ ವಿಹೇಠೇನ್ತಾ, ಬಹೂ ಖುದ್ದಕೇ ಪಾಣೇ ಸಙ್ಘಾತಂ ಆಪಾದೇನ್ತಾ’’ತಿ. ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ವಸ್ಸಂ ಉಪಗನ್ತು’’ನ್ತಿ. ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕದಾ ನು ಖೋ ವಸ್ಸಂ ಉಪಗನ್ತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ವಸ್ಸಾನೇ ವಸ್ಸಂ ಉಪಗನ್ತುನ್ತಿ.

ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕತಿ ನು ಖೋ ವಸ್ಸೂಪನಾಯಿಕಾ’’ತಿ? ಭಗವತೋ ಏತಮತ್ಥಂ

ಆರೋಚೇಸುಂ. ದ್ವೇಮಾ, ಭಿಕ್ಖವೇ, ವಸ್ಸೂಪನಾಯಿಕಾ – ಪುರಿಮಿಕಾ, ಪಚ್ಛಿಮಿಕಾ. ಅಪರಜ್ಜುಗತಾಯ ಆಸಾಳ್ಹಿಯಾ ಪುರಿಮಿಕಾ ಉಪಗನ್ತಬ್ಬಾ, ಮಾಸಗತಾಯ ಆಸಾಳ್ಹಿಯಾ ಪಚ್ಛಿಮಿಕಾ ಉಪಗನ್ತಬ್ಬಾ – ಇಮಾ ಖೋ, ಭಿಕ್ಖವೇ, ದ್ವೇ ವಸ್ಸೂಪನಾಯಿಕಾತಿ.

ವಸ್ಸೂಪನಾಯಿಕಾನುಜಾನನಾ ನಿಟ್ಠಿತಾ.

೧೦೮. ವಸ್ಸಾನೇ ಚಾರಿಕಾಪಟಿಕ್ಖೇಪಾದಿ

೧೮೫. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ವಸ್ಸಂ ಉಪಗನ್ತ್ವಾ ಅನ್ತರಾವಸ್ಸಂ ಚಾರಿಕಂ ಚರನ್ತಿ. ಮನುಸ್ಸಾ ತಥೇವ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ಹೇಮನ್ತಮ್ಪಿ ಗಿಮ್ಹಮ್ಪಿ ವಸ್ಸಮ್ಪಿ ಚಾರಿಕಂ ಚರಿಸ್ಸನ್ತಿ, ಹರಿತಾನಿ ತಿಣಾನಿ ಸಮ್ಮದ್ದನ್ತಾ, ಏಕಿನ್ದ್ರಿಯಂ ಜೀವಂ ವಿಹೇಠೇನ್ತಾ, ಬಹೂ ಖುದ್ದಕೇ ಪಾಣೇ ಸಙ್ಘಾತಂ ಆಪಾದೇನ್ತಾ. ಇಮೇ ಹಿ ನಾಮ ಅಞ್ಞತಿತ್ಥಿಯಾ ದುರಕ್ಖಾತಧಮ್ಮಾ ವಸ್ಸಾವಾಸಂ ಅಲ್ಲೀಯಿಸ್ಸನ್ತಿ ಸಙ್ಕಸಾಯಿಸ್ಸನ್ತಿ. ಇಮೇ ಹಿ ನಾಮ ಸಕುನ್ತಕಾ ರುಕ್ಖಗ್ಗೇಸು ಕುಲಾವಕಾನಿ ಕರಿತ್ವಾ ವಸ್ಸಾವಾಸಂ ಅಲ್ಲೀಯಿಸ್ಸನ್ತಿ ಸಙ್ಕಸಾಯಿಸ್ಸನ್ತಿ. ಇಮೇ ಪನ ಸಮಣಾ ಸಕ್ಯಪುತ್ತಿಯಾ ಹೇಮನ್ತಮ್ಪಿ ಗಿಮ್ಹಮ್ಪಿ ವಸ್ಸಮ್ಪಿ ಚಾರಿಕಂ ಚರನ್ತಿ, ಹರಿತಾನಿ ತಿಣಾನಿ ಸಮ್ಮದ್ದನ್ತಾ, ಏಕಿನ್ದ್ರಿಯಂ ಜೀವಂ ವಿಹೇಠೇನ್ತಾ, ಬಹೂ ಖುದ್ದಕೇ ಪಾಣೇ ಸಙ್ಘಾತಂ ಆಪಾದೇನ್ತಾ’’ತಿ. ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖೂ ವಸ್ಸಂ ಉಪಗನ್ತ್ವಾ ಅನ್ತರಾವಸ್ಸಂ ಚಾರಿಕಂ ಚರಿಸ್ಸನ್ತೀ’’ತಿ? ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ವಸ್ಸಂ ಉಪಗನ್ತ್ವಾ ಪುರಿಮಂ ವಾ ತೇಮಾಸಂ ಪಚ್ಛಿಮಂ ವಾ ತೇಮಾಸಂ ಅವಸಿತ್ವಾ ಚಾರಿಕಾ ಪಕ್ಕಮಿತಬ್ಬಾ. ಯೋ ಪಕ್ಕಮೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೧೮೬. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ನ ಇಚ್ಛನ್ತಿ ವಸ್ಸಂ ಉಪಗನ್ತುಂ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ವಸ್ಸಂ ನ ಉಪಗನ್ತಬ್ಬಂ. ಯೋ ನ ಉಪಗಚ್ಛೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ತದಹು ವಸ್ಸೂಪನಾಯಿಕಾಯ ವಸ್ಸಂ ಅನುಪಗನ್ತುಕಾಮಾ ಸಞ್ಚಿಚ್ಚ ಆವಾಸಂ ಅತಿಕ್ಕಮನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ತದಹು ವಸ್ಸೂಪನಾಯಿಕಾಯ ವಸ್ಸಂ ಅನುಪಗನ್ತುಕಾಮೇನ ಸಞ್ಚಿಚ್ಚ ಆವಾಸೋ ಅತಿಕ್ಕಮಿತಬ್ಬೋ. ಯೋ ಅತಿಕ್ಕಮೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ ವಸ್ಸಂ ಉಕ್ಕಡ್ಢಿತುಕಾಮೋ

ಭಿಕ್ಖೂನಂ ಸನ್ತಿಕೇ ದೂತಂ ಪಾಹೇಸಿ – ಯದಿ ಪನಾಯ್ಯಾ ಆಗಮೇ ಜುಣ್ಹೇ ವಸ್ಸಂ ಉಪಗಚ್ಛೇಯ್ಯುನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ರಾಜೂನಂ ಅನುವತ್ತಿತುನ್ತಿ.

ವಸ್ಸಾನೇ ಚಾರಿಕಾಪಟಿಕ್ಖೇಪಾದಿ ನಿಟ್ಠಿತಾ.

೧೦೯. ಸತ್ತಾಹಕರಣೀಯಾನುಜಾನನಾ

೧೮೭. ಅಥ ಖೋ ಭಗವಾ ರಾಜಗಹೇ ಯಥಾಭಿರನ್ತಂ ವಿಹರಿತ್ವಾ ಯೇನ ಸಾವತ್ಥಿ ತೇನ ಚಾರಿಕಂ ಪಕ್ಕಾಮಿ. ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ಸಾವತ್ಥಿ ತದವಸರಿ. ತತ್ರ ಸುದಂ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ತೇನ ಖೋ ಪನ ಸಮಯೇನ ಕೋಸಲೇಸು ಜನಪದೇ ಉದೇನೇನ ಉಪಾಸಕೇನ ಸಙ್ಘಂ ಉದ್ದಿಸ್ಸ ವಿಹಾರೋ ಕಾರಾಪಿತೋ ಹೋತಿ. ಸೋ ಭಿಕ್ಖೂನಂ ಸನ್ತಿಕೇ ದೂತಂ ಪಾಹೇಸಿ – ‘‘ಆಗಚ್ಛನ್ತು ಭದನ್ತಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ. ಭಿಕ್ಖೂ ಏವಮಾಹಂಸು – ‘‘ಭಗವತಾ, ಆವುಸೋ, ಪಞ್ಞತ್ತಂ ‘ನ ವಸ್ಸಂ ಉಪಗನ್ತ್ವಾ ಪುರಿಮಂ ವಾ ತೇಮಾಸಂ ಪಚ್ಛಿಮಂ ವಾ ತೇಮಾಸಂ ಅವಸಿತ್ವಾ ಚಾರಿಕಾ ಪಕ್ಕಮಿತಬ್ಬಾ’ತಿ. ಆಗಮೇತು ಉದೇನೋ ಉಪಾಸಕೋ, ಯಾವ ಭಿಕ್ಖೂ ವಸ್ಸಂ ವಸನ್ತಿ. ವಸ್ಸಂವುಟ್ಠಾ ಆಗಮಿಸ್ಸನ್ತಿ. ಸಚೇ ಪನಸ್ಸ ಅಚ್ಚಾಯಿಕಂ ಕರಣೀಯಂ, ತತ್ಥೇವ ಆವಾಸಿಕಾನಂ ಭಿಕ್ಖೂನಂ ಸನ್ತಿಕೇ ವಿಹಾರಂ ಪತಿಟ್ಠಾಪೇತೂ’’ತಿ. ಉದೇನೋ ಉಪಾಸಕೋ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಭದನ್ತಾ ಮಯಾ ಪಹಿತೇ ನ ಆಗಚ್ಛಿಸ್ಸನ್ತಿ. ಅಹಞ್ಹಿ ದಾಯಕೋ ಕಾರಕೋ ಸಙ್ಘುಪಟ್ಠಾಕೋ’’ತಿ. ಅಸ್ಸೋಸುಂ ಖೋ ಭಿಕ್ಖೂ ಉದೇನಸ್ಸ ಉಪಾಸಕಸ್ಸ ಉಜ್ಝಾಯನ್ತಸ್ಸ ಖಿಯ್ಯನ್ತಸ್ಸ ವಿಪಾಚೇನ್ತಸ್ಸ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ಸತ್ತನ್ನಂ ಸತ್ತಾಹಕರಣೀಯೇನ ಪಹಿತೇ ಗನ್ತುಂ, ನ ತ್ವೇವ ಅಪ್ಪಹಿತೇ. ಭಿಕ್ಖುಸ್ಸ, ಭಿಕ್ಖುನಿಯಾ, ಸಿಕ್ಖಮಾನಾಯ, ಸಾಮಣೇರಸ್ಸ, ಸಾಮಣೇರಿಯಾ, ಉಪಾಸಕಸ್ಸ, ಉಪಾಸಿಕಾಯ – ಅನುಜಾನಾಮಿ, ಭಿಕ್ಖವೇ, ಇಮೇಸಂ ಸತ್ತನ್ನಂ ಸತ್ತಾಹಕರಣೀಯೇನ ಪಹಿತೇ ಗನ್ತುಂ, ನ ತ್ವೇವ ಅಪ್ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ’’.

೧೮೮. ಇಧ ಪನ, ಭಿಕ್ಖವೇ, ಉಪಾಸಕೇನ ಸಙ್ಘಂ ಉದ್ದಿಸ್ಸ ವಿಹಾರೋ ಕಾರಾಪಿತೋ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಭದನ್ತಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಉಪಾಸಕೇನ ಸಙ್ಘಂ ಉದ್ದಿಸ್ಸ ಅಡ್ಢಯೋಗೋ ಕಾರಾಪಿತೋ ಹೋತಿ…ಪೇ… ಪಾಸಾದೋ ಕಾರಾಪಿತೋ ಹೋತಿ… ಹಮ್ಮಿಯಂ ಕಾರಾಪಿತಂ ಹೋತಿ… ಗುಹಾ ಕಾರಾಪಿತಾ ಹೋತಿ… ಪರಿವೇಣಂ ಕಾರಾಪಿತಂ ಹೋತಿ… ಕೋಟ್ಠಕೋ ಕಾರಾಪಿತೋ ಹೋತಿ… ಉಪಟ್ಠಾನಸಾಲಾ ಕಾರಾಪಿತಾ ಹೋತಿ… ಅಗ್ಗಿಸಾಲಾ ಕಾರಾಪಿತಾ ಹೋತಿ… ಕಪ್ಪಿಯಕುಟಿ ಕಾರಾಪಿತಾ ಹೋತಿ… ವಚ್ಚಕುಟಿ ಕಾರಾಪಿತಾ ಹೋತಿ… ಚಙ್ಕಮೋ ಕಾರಾಪಿತೋ ಹೋತಿ … ಚಙ್ಕಮನಸಾಲಾ ಕಾರಾಪಿತಾ ಹೋತಿ… ಉದಪಾನೋ ಕಾರಾಪಿತೋ ಹೋತಿ … ಉದಪಾನಸಾಲಾ ಕಾರಾಪಿತಾ ಹೋತಿ… ಜನ್ತಾಘರಂ ಕಾರಾಪಿತಂ ಹೋತಿ… ಜನ್ತಾಘರಸಾಲಾ ಕಾರಾಪಿತಾ ಹೋತಿ… ಪೋಕ್ಖರಣೀ ಕಾರಾಪಿತಾ ಹೋತಿ… ಮಣ್ಡಪೋ ಕಾರಾಪಿತೋ ಹೋತಿ… ಆರಾಮೋ ಕಾರಾಪಿತೋ ಹೋತಿ… ಆರಾಮವತ್ಥು ಕಾರಾಪಿತಂ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಭದನ್ತಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಉಪಾಸಕೇನ ಸಮ್ಬಹುಲೇ ಭಿಕ್ಖೂ ಉದ್ದಿಸ್ಸ…ಪೇ… ಏಕಂ ಭಿಕ್ಖುಂ ಉದ್ದಿಸ್ಸ ವಿಹಾರೋ ಕಾರಾಪಿತೋ ಹೋತಿ… ಅಡ್ಢಯೋಗೋ ಕಾರಾಪಿತೋ ಹೋತಿ… ಪಾಸಾದೋ ಕಾರಾಪಿತೋ ಹೋತಿ … ಹಮ್ಮಿಯಂ ಕಾರಾಪಿತಂ ಹೋತಿ… ಗುಹಾ ಕಾರಾಪಿತಾ ಹೋತಿ… ಪರಿವೇಣಂ ಕಾರಾಪಿತಂ ಹೋತಿ… ಕೋಟ್ಠಕೋ ಕಾರಾಪಿತೋ ಹೋತಿ… ಉಪಟ್ಠಾನಸಾಲಾ ಕಾರಾಪಿತಾ ಹೋತಿ… ಅಗ್ಗಿಸಾಲಾ ಕಾರಾಪಿತಾ ಹೋತಿ… ಕಪ್ಪಿಯಕುಟಿ ಕಾರಾಪಿತಾ ಹೋತಿ… ವಚ್ಚಕುಟಿ ಕಾರಾಪಿತಾ ಹೋತಿ… ಚಙ್ಕಮೋ ಕಾರಾಪಿತೋ ಹೋತಿ… ಚಙ್ಕಮನಸಾಲಾ ಕಾರಾಪಿತಾ ಹೋತಿ… ಉದಪಾನೋ ಕಾರಾಪಿತೋ ಹೋತಿ… ಉದಪಾನಸಾಲಾ ಕಾರಾಪಿತಾ ಹೋತಿ… ಜನ್ತಾಘರಂ ಕಾರಾಪಿತಂ ಹೋತಿ… ಜನ್ತಾಘರಸಾಲಾ ಕಾರಾಪಿತಾ ಹೋತಿ… ಪೋಕ್ಖರಣೀ ಕಾರಾಪಿತಾ ಹೋತಿ… ಮಣ್ಡಪೋ ಕಾರಾಪಿತೋ ಹೋತಿ… ಆರಾಮೋ ಕಾರಾಪಿತೋ ಹೋತಿ… ಆರಾಮವತ್ಥು ಕಾರಾಪಿತಂ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಭದನ್ತಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಉಪಾಸಕೇನ ಭಿಕ್ಖುನಿಸಙ್ಘಂ ಉದ್ದಿಸ್ಸ…ಪೇ… ಸಮ್ಬಹುಲಾ ಭಿಕ್ಖುನಿಯೋ ಉದ್ದಿಸ್ಸ…ಪೇ… ಏಕಂ ಭಿಕ್ಖುನಿಂ ಉದ್ದಿಸ್ಸ…ಪೇ… ಸಮ್ಬಹುಲಾ ಸಿಕ್ಖಮಾನಾಯೋ ಉದ್ದಿಸ್ಸ…ಪೇ… ಏಕಂ ಸಿಕ್ಖಮಾನಂ ಉದ್ದಿಸ್ಸ…ಪೇ… ಸಮ್ಬಹುಲೇ ಸಾಮಣೇರೇ ಉದ್ದಿಸ್ಸ…ಪೇ… ಏಕಂ ಸಾಮಣೇರಂ ಉದ್ದಿಸ್ಸ…ಪೇ… ಸಮ್ಬಹುಲಾ ಸಾಮಣೇರಿಯೋ ಉದ್ದಿಸ್ಸ…ಪೇ… ಏಕಂ ಸಾಮಣೇರಿಂ ಉದ್ದಿಸ್ಸ ವಿಹಾರೋ ಕಾರಾಪಿತೋ ಹೋತಿ…ಪೇ… ಅಡ್ಢಯೋಗೋ ಕಾರಾಪಿತೋ ಹೋತಿ… ಪಾಸಾದೋ ಕಾರಾಪಿತೋ ಹೋತಿ… ಹಮ್ಮಿಯಂ ಕಾರಾಪಿತಂ ಹೋತಿ… ಗುಹಾ ಕಾರಾಪಿತಾ ಹೋತಿ… ಪರಿವೇಣಂ ಕಾರಾಪಿತಂ ಹೋತಿ… ಕೋಟ್ಠಕೋ ಕಾರಾಪಿತೋ ಹೋತಿ… ಉಪಟ್ಠಾನಸಾಲಾ ಕಾರಾಪಿತಾ ಹೋತಿ… ಅಗ್ಗಿಸಾಲಾ ಕಾರಾಪಿತಾ ಹೋತಿ … ಕಪ್ಪಿಯಕುಟಿ ಕಾರಾಪಿತಾ ಹೋತಿ… ಚಙ್ಕಮೋ ಕಾರಾಪಿತೋ ಹೋತಿ… ಚಙ್ಕಮನಸಾಲಾ ಕಾರಾಪಿತಾ ಹೋತಿ… ಉದಪಾನೋ ಕಾರಾಪಿತೋ ಹೋತಿ… ಉದಪಾನಸಾಲಾ ಕಾರಾಪಿತಾ ಹೋತಿ… ಪೋಕ್ಖರಣೀ ಕಾರಾಪಿತಾ ಹೋತಿ… ಮಣ್ಡಪೋ ಕಾರಾಪಿತೋ ಹೋತಿ… ಆರಾಮೋ ಕಾರಾಪಿತೋ ಹೋತಿ… ಆರಾಮವತ್ಥು ಕಾರಾಪಿತಂ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಭದನ್ತಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

೧೮೯. ಇಧ ಪನ, ಭಿಕ್ಖವೇ, ಉಪಾಸಕೇನ ಅತ್ತನೋ ಅತ್ಥಾಯ ನಿವೇಸನಂ ಕಾರಾಪಿತಂ ಹೋತಿ…ಪೇ… ಸಯನಿಘರಂ ಕಾರಾಪಿತಂ ಹೋತಿ… ಉದೋಸಿತೋ ಕಾರಾಪಿತೋ ಹೋತಿ… ಅಟ್ಟೋ ಕಾರಾಪಿತೋ ಹೋತಿ… ಮಾಳೋ ಕಾರಾಪಿತೋ ಹೋತಿ… ಆಪಣೋ ಕಾರಾಪಿತೋ ಹೋತಿ… ಆಪಣಸಾಲಾ ಕಾರಾಪಿತಾ ಹೋತಿ… ಪಾಸಾದೋ ಕಾರಾಪಿತೋ ಹೋತಿ… ಹಮ್ಮಿಯಂ ಕಾರಾಪಿತಂ ಹೋತಿ… ಗುಹಾ ಕಾರಾಪಿತಾ ಹೋತಿ… ಪರಿವೇಣಂ ಕಾರಾಪಿತಂ ಹೋತಿ… ಕೋಟ್ಠಕೋ ಕಾರಾಪಿತೋ ಹೋತಿ… ಉಪಟ್ಠಾನಸಾಲಾ ಕಾರಾಪಿತಾ ಹೋತಿ… ಅಗ್ಗಿಸಾಲಾ ಕಾರಾಪಿತಾ ಹೋತಿ… ರಸವತೀ ಕಾರಾಪಿತಾ ಹೋತಿ… ಚಙ್ಕಮೋ ಕಾರಾಪಿತೋ ಹೋತಿ… ಚಙ್ಕಮನಸಾಲಾ ಕಾರಾಪಿತಾ ಹೋತಿ… ಉದಪಾನೋ ಕಾರಾಪಿತೋ ಹೋತಿ… ಉದಪಾನಸಾಲಾ ಕಾರಾಪಿತಾ ಹೋತಿ… ಪೋಕ್ಖರಣೀ ಕಾರಾಪಿತಾ ಹೋತಿ… ಮಣ್ಡಪೋ ಕಾರಾಪಿತೋ ಹೋತಿ… ಆರಾಮೋ ಕಾರಾಪಿತೋ ಹೋತಿ … ಆರಾಮವತ್ಥು ಕಾರಾಪಿತಂ ಹೋತಿ… ಪುತ್ತಸ್ಸ ವಾ ವಾರೇಯ್ಯಂ ಹೋತಿ… ಧೀತುಯಾ ವಾ ವಾರೇಯ್ಯಂ ಹೋತಿ… ಗಿಲಾನೋ ವಾ ಹೋತಿ… ಅಭಿಞ್ಞಾತಂ ವಾ ಸುತ್ತನ್ತಂ ಭಣತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘ಆಗಚ್ಛನ್ತು ಭದನ್ತಾ, ಇಮಂ ಸುತ್ತನ್ತಂ ಪರಿಯಾಪುಣಿಸ್ಸನ್ತಿ, ಪುರಾಯಂ ಸುತ್ತನ್ತೋ ನ ಪಲುಜ್ಜತೀ’ತಿ. ಅಞ್ಞತರಂ ವಾ ಪನಸ್ಸ ಕಿಚ್ಚಂ ಹೋತಿ – ಕರಣೀಯಂ ವಾ, ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಭದನ್ತಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

೧೯೦. ಇಧ ಪನ, ಭಿಕ್ಖವೇ, ಉಪಾಸಿಕಾಯ ಸಙ್ಘಂ ಉದ್ದಿಸ್ಸ ವಿಹಾರೋ ಕಾರಾಪಿತೋ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಉಪಾಸಿಕಾಯ ಸಙ್ಘಂ ಉದ್ದಿಸ್ಸ ಅಡ್ಢಯೋಗೋ ಕಾರಾಪಿತೋ ಹೋತಿ…ಪೇ… ಪಾಸಾದೋ ಕಾರಾಪಿತೋ ಹೋತಿ… ಹಮ್ಮಿಯಂ ಕಾರಾಪಿತಂ ಹೋತಿ… ಗುಹಾ ಕಾರಾಪಿತಾ ಹೋತಿ… ಪರಿವೇಣಂ ಕಾರಾಪಿತಂ ಹೋತಿ… ಕೋಟ್ಠಕೋ ಕಾರಾಪಿತೋ ಹೋತಿ… ಉಪಟ್ಠಾನಸಾಲಾ ಕಾರಾಪಿತಾ ಹೋತಿ… ಅಗ್ಗಿಸಾಲಾ ಕಾರಾಪಿತಾ ಹೋತಿ… ಕಪ್ಪಿಯಕುಟಿ ಕಾರಾಪಿತಾ ಹೋತಿ… ವಚ್ಚಕುಟಿ ಕಾರಾಪಿತಾ ಹೋತಿ… ಚಙ್ಕಮೋ ಕಾರಾಪಿತೋ ಹೋತಿ… ಚಙ್ಕಮನಸಾಲಾ ಕಾರಾಪಿತಾ ಹೋತಿ… ಉದಪಾನೋ ಕಾರಾಪಿತೋ ಹೋತಿ… ಉದಪಾನಸಾಲಾ ಕಾರಾಪಿತಾ ಹೋತಿ… ಜನ್ತಾಘರಂ ಕಾರಾಪಿತಂ ಹೋತಿ… ಜನ್ತಾಘರಸಾಲಾ ಕಾರಾಪಿತಾ ಹೋತಿ… ಪೋಕ್ಖರಣೀ ಕಾರಾಪಿತಾ ಹೋತಿ… ಮಣ್ಡಪೋ ಕಾರಾಪಿತೋ ಹೋತಿ… ಆರಾಮೋ ಕಾರಾಪಿತೋ ಹೋತಿ… ಆರಾಮವತ್ಥು ಕಾರಾಪಿತಂ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಉಪಾಸಿಕಾಯ ಸಮ್ಬಹುಲೇ ಭಿಕ್ಖೂ ಉದ್ದಿಸ್ಸ…ಪೇ… ಏಕಂ ಭಿಕ್ಖುಂ ಉದ್ದಿಸ್ಸ…ಪೇ… ಭಿಕ್ಖುನಿಸಙ್ಘಂ ಉದ್ದಿಸ್ಸ…ಪೇ… ಸಮ್ಬಹುಲಾ ಭಿಕ್ಖುನಿಯೋ ಉದ್ದಿಸ್ಸ…ಪೇ… ಏಕಂ ಭಿಕ್ಖುನಿಂ ಉದ್ದಿಸ್ಸ…ಪೇ… ಸಮ್ಬಹುಲಾ ಸಿಕ್ಖಮಾನಾಯೋ ಉದ್ದಿಸ್ಸ…ಪೇ… ಏಕಂ ಸಿಕ್ಖಮಾನಂ ಉದ್ದಿಸ್ಸ…ಪೇ… ಸಮ್ಬಹುಲೇ ಸಾಮಣೇರೇ ಉದ್ದಿಸ್ಸ…ಪೇ… ಏಕಂ ಸಾಮಣೇರಂ ಉದ್ದಿಸ್ಸ…ಪೇ… ಸಮ್ಬಹುಲಾ ಸಾಮಣೇರಿಯೋ ಉದ್ದಿಸ್ಸ…ಪೇ… ಏಕಂ ಸಾಮಣೇರಿಂ ಉದ್ದಿಸ್ಸ…ಪೇ….

೧೯೧. ಇಧ ಪನ, ಭಿಕ್ಖವೇ, ಉಪಾಸಿಕಾಯ ಅತ್ತನೋ ಅತ್ಥಾಯ ನಿವೇಸನಂ ಕಾರಾಪಿತಂ ಹೋತಿ…ಪೇ… ಸಯನಿಘರಂ ಕಾರಾಪಿತಂ ಹೋತಿ… ಉದೋಸಿತೋ ಕಾರಾಪಿತೋ ಹೋತಿ… ಅಟ್ಟೋ ಕಾರಾಪಿತೋ ಹೋತಿ… ಮಾಳೋ ಕಾರಾಪಿತೋ ಹೋತಿ… ಆಪಣೋ ಕಾರಾಪಿತೋ ಹೋತಿ… ಆಪಣಸಾಲಾ ಕಾರಾಪಿತಾ ಹೋತಿ… ಪಾಸಾದೋ ಕಾರಾಪಿತೋ ಹೋತಿ… ಹಮ್ಮಿಯಂ ಕಾರಾಪಿತಂ ಹೋತಿ… ಗುಹಾ ಕಾರಾಪಿತಾ ಹೋತಿ… ಪರಿವೇಣಂ ಕಾರಾಪಿತಂ ಹೋತಿ… ಕೋಟ್ಠಕೋ ಕಾರಾಪಿತೋ ಹೋತಿ… ಉಪಟ್ಠಾನಸಾಲಾ ಕಾರಾಪಿತಾ ಹೋತಿ… ಅಗ್ಗಿಸಾಲಾ ಕಾರಾಪಿತಾ ಹೋತಿ… ರಸವತೀ ಕಾರಾಪಿತಾ ಹೋತಿ… ಚಙ್ಕಮೋ ಕಾರಾಪಿತೋ ಹೋತಿ… ಚಙ್ಕಮನಸಾಲಾ ಕಾರಾಪಿತಾ ಹೋತಿ… ಉದಪಾನೋ ಕಾರಾಪಿತೋ ಹೋತಿ … ಉದಪಾನಸಾಲಾ ಕಾರಾಪಿತಾ ಹೋತಿ… ಪೋಕ್ಖರಣೀ ಕಾರಾಪಿತಾ ಹೋತಿ… ಮಣ್ಡಪೋ ಕಾರಾಪಿತೋ ಹೋತಿ… ಆರಾಮೋ ಕಾರಾಪಿತೋ ಹೋತಿ… ಆರಾಮವತ್ಥು ಕಾರಾಪಿತಂ ಹೋತಿ… ಪುತ್ತಸ್ಸ ವಾ ವಾರೇಯ್ಯಂ ಹೋತಿ… ಧೀತುಯಾ ವಾ ವಾರೇಯ್ಯಂ ಹೋತಿ… ಗಿಲಾನಾ ವಾ ಹೋತಿ… ಅಭಿಞ್ಞಾತಂ ವಾ ಸುತ್ತನ್ತಂ ಭಣತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಅಯ್ಯಾ, ಇಮಂ ಸುತ್ತನ್ತಂ ಪರಿಯಾಪುಣಿಸ್ಸನ್ತಿ, ಪುರಾಯಂ ಸುತ್ತನ್ತೋ ಪಲುಜ್ಜತೀ’’ತಿ. ಅಞ್ಞತರಂ ವಾ ಪನಸ್ಸಾ ಕಿಚ್ಚಂ ಹೋತಿ ಕರಣೀಯಂ ವಾ, ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

೧೯೨. ಇಧ ಪನ, ಭಿಕ್ಖವೇ, ಭಿಕ್ಖುನಾ ಸಙ್ಘಂ ಉದ್ದಿಸ್ಸ…ಪೇ… ಭಿಕ್ಖುನಿಯಾ ಸಙ್ಘಂ ಉದ್ದಿಸ್ಸ… ಸಿಕ್ಖಮಾನಾಯ ಸಙ್ಘಂ ಉದ್ದಿಸ್ಸ… ಸಾಮಣೇರೇನ ಸಙ್ಘಂ ಉದ್ದಿಸ್ಸ… ಸಾಮಣೇರಿಯಾ ಸಙ್ಘಂ ಉದ್ದಿಸ್ಸ … ಸಮ್ಬಹುಲೇ ಭಿಕ್ಖೂ ಉದ್ದಿಸ್ಸ… ಏಕಂ ಭಿಕ್ಖುಂ ಉದ್ದಿಸ್ಸ… ಭಿಕ್ಖುನಿಸಙ್ಘಂ ಉದ್ದಿಸ್ಸ… ಸಮ್ಬಹುಲಾ ಭಿಕ್ಖುನಿಯೋ ಉದ್ದಿಸ್ಸ… ಏಕಂ ಭಿಕ್ಖುನಿಂ ಉದ್ದಿಸ್ಸ… ಸಮ್ಬಹುಲಾ ಸಿಕ್ಖಮಾನಾಯೋ ಉದ್ದಿಸ್ಸ… ಏಕಂ ಸಿಕ್ಖಮಾನಂ ಉದ್ದಿಸ್ಸ… ಸಮ್ಬಹುಲೇ ಸಾಮಣೇರೇ ಉದ್ದಿಸ್ಸ… ಏಕಂ ಸಾಮಣೇರಂ ಉದ್ದಿಸ್ಸ… ಸಮ್ಬಹುಲಾ ಸಾಮಣೇರಿಯೋ ಉದ್ದಿಸ್ಸ… ಏಕಂ ಸಾಮಣೇರಿಂ ಉದ್ದಿಸ್ಸ… ಅತ್ತನೋ ಅತ್ಥಾಯ ವಿಹಾರೋ ಕಾರಾಪಿತೋ ಹೋತಿ…ಪೇ… ಅಡ್ಢಯೋಗೋ ಕಾರಾಪಿತೋ ಹೋತಿ… ಪಾಸಾದೋ ಕಾರಾಪಿತೋ ಹೋತಿ… ಹಮ್ಮಿಯಂ ಕಾರಾಪಿತಂ ಹೋತಿ… ಗುಹಾ ಕಾರಾಪಿತಾ ಹೋತಿ… ಪರಿವೇಣಂ ಕಾರಾಪಿತಂ ಹೋತಿ … ಕೋಟ್ಠಕೋ ಕಾರಾಪಿತೋ ಹೋತಿ… ಉಪಟ್ಠಾನಸಾಲಾ ಕಾರಾಪಿತಾ ಹೋತಿ… ಅಗ್ಗಿಸಾಲಾ ಕಾರಾಪಿತಾ ಹೋತಿ… ಕಪ್ಪಿಯಕುಟಿ ಕಾರಾಪಿತಾ ಹೋತಿ… ಚಙ್ಕಮೋ ಕಾರಾಪಿತೋ ಹೋತಿ… ಚಙ್ಕಮನಸಾಲಾ ಕಾರಾಪಿತಾ ಹೋತಿ… ಉದಪಾನೋ ಕಾರಾಪಿತೋ ಹೋತಿ… ಉದಪಾನಸಾಲಾ ಕಾರಾಪಿತಾ ಹೋತಿ… ಪೋಕ್ಖರಣೀ ಕಾರಾಪಿತಾ ಹೋತಿ… ಮಣ್ಡಪೋ ಕಾರಾಪಿತೋ ಹೋತಿ… ಆರಾಮೋ ಕಾರಾಪಿತೋ ಹೋತಿ… ಆರಾಮವತ್ಥು ಕಾರಾಪಿತಂ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ… ‘‘ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ದಾನಞ್ಚ ದಾತುಂ, ಧಮ್ಮಞ್ಚ ಸೋತುಂ, ಭಿಕ್ಖೂ ಚ ಪಸ್ಸಿತು’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋತಿ.

ಸತ್ತಾಹಕರಣೀಯಾನುಜಾನತಾ ನಿಟ್ಠಿತಾ.

೧೧೦. ಪಞ್ಚನ್ನಂ ಅಪ್ಪಹಿತೇಪಿ ಅನುಜಾನನಾ

೧೯೩. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಗಿಲಾನೋ ಹೋತಿ. ಸೋ ಭಿಕ್ಖೂನಂ ಸನ್ತಿಕೇ ದೂತಂ ಪಾಹೇಸಿ – ‘‘ಅಹಞ್ಹಿ ಗಿಲಾನೋ, ಆಗಚ್ಛನ್ತು ಭಿಕ್ಖೂ, ಇಚ್ಛಾಮಿ ಭಿಕ್ಖೂನಂ ಆಗತ’’ನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಪಞ್ಚನ್ನಂ ಸತ್ತಾಹಕರಣೀಯೇನ ಅಪ್ಪಹಿತೇಪಿ ಗನ್ತುಂ, ಪಗೇವ ಪಹಿತೇ. ಭಿಕ್ಖುಸ್ಸ, ಭಿಕ್ಖುನಿಯಾ, ಸಿಕ್ಖಮಾನಾಯ, ಸಾಮಣೇರಸ್ಸ, ಸಾಮಣೇರಿಯಾ – ಅನುಜಾನಾಮಿ, ಭಿಕ್ಖವೇ, ಇಮೇಸಂ ಪಞ್ಚನ್ನಂ ಸತ್ತಾಹಕರಣೀಯೇನ ಅಪ್ಪಹಿತೇಪಿ ಗನ್ತುಂ, ಪಗೇವ ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖು ಗಿಲಾನೋ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಗಿಲಾನೋ, ಆಗಚ್ಛನ್ತು ಭಿಕ್ಖೂ, ಇಚ್ಛಾಮಿ ಭಿಕ್ಖೂನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಗಿಲಾನಭತ್ತಂ ವಾ ಪರಿಯೇಸಿಸ್ಸಾಮಿ, ಗಿಲಾನುಪಟ್ಠಾಕಭತ್ತಂ ವಾ ಪರಿಯೇಸಿಸ್ಸಾಮಿ, ಗಿಲಾನಭೇಸಜ್ಜಂ ವಾ ಪರಿಯೇಸಿಸ್ಸಾಮಿ, ಪುಚ್ಛಿಸ್ಸಾಮಿ ವಾ, ಉಪಟ್ಠಹಿಸ್ಸಾಮಿ ವಾ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುಸ್ಸ ಅನಭಿರತಿ ಉಪ್ಪನ್ನಾ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅನಭಿರತಿ ಮೇ ಉಪ್ಪನ್ನಾ, ಆಗಚ್ಛನ್ತು ಭಿಕ್ಖೂ, ಇಚ್ಛಾಮಿ ಭಿಕ್ಖೂನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಅನಭಿರತಂ ವೂಪಕಾಸೇಸ್ಸಾಮಿ ವಾ, ವೂಪಕಾಸಾಪೇಸ್ಸಾಮಿ ವಾ, ಧಮ್ಮಕಥಂ ವಾಸ್ಸ ಕರಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುಸ್ಸ ಕುಕ್ಕುಚ್ಚಂ ಉಪ್ಪನ್ನಂ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಕುಕ್ಕುಚ್ಚಂ ಮೇ ಉಪ್ಪನ್ನಂ, ಆಗಚ್ಛನ್ತು ಭಿಕ್ಖೂ, ಇಚ್ಛಾಮಿ ಭಿಕ್ಖೂನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಕುಕ್ಕುಚ್ಚಂ ವಿನೋದೇಸ್ಸಾಮಿ ವಾ, ವಿನೋದಾಪೇಸ್ಸಾಮಿ ವಾ, ಧಮ್ಮಕಥಂ ವಾಸ್ಸ ಕರಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುಸ್ಸ ದಿಟ್ಠಿಗತಂ ಉಪ್ಪನ್ನಂ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ದಿಟ್ಠಿಗತಂ ಮೇ ಉಪ್ಪನ್ನಂ, ಆಗಚ್ಛನ್ತು ಭಿಕ್ಖೂ, ಇಚ್ಛಾಮಿ ಭಿಕ್ಖೂನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ದಿಟ್ಠಿಗತಂ ವಿವೇಚೇಸ್ಸಾಮಿ ವಾ, ವಿವೇಚಾಪೇಸ್ಸಾಮಿ ವಾ, ಧಮ್ಮಕಥಂ ವಾಸ್ಸ ಕರಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖು ಗರುಧಮ್ಮಂ ಅಜ್ಝಾಪನ್ನೋ ಹೋತಿ ಪರಿವಾಸಾರಹೋ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಗರುಧಮ್ಮಂ ಅಜ್ಝಾಪನ್ನೋ ಪರಿವಾಸಾರಹೋ, ಆಗಚ್ಛನ್ತು ಭಿಕ್ಖೂ, ಇಚ್ಛಾಮಿ ಭಿಕ್ಖೂನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಪರಿವಾಸದಾನಂ ಉಸ್ಸುಕ್ಕಂ ಕರಿಸ್ಸಾಮಿ ವಾ, ಅನುಸ್ಸಾವೇಸ್ಸಾಮಿ ವಾ, ಗಣಪೂರಕೋ ವಾ ಭವಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖು ಮೂಲಾಯ ಪಟಿಕಸ್ಸನಾರಹೋ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಮೂಲಾಯ ಪಟಿಕಸ್ಸನಾರಹೋ, ಆಗಚ್ಛನ್ತು ಭಿಕ್ಖೂ, ಇಚ್ಛಾಮಿ ಭಿಕ್ಖೂನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಮೂಲಾಯ ಪಟಿಕಸ್ಸನಂ ಉಸ್ಸುಕ್ಕಂ ಕರಿಸ್ಸಾಮಿ ವಾ, ಅನುಸ್ಸಾವೇಸ್ಸಾಮಿ ವಾ, ಗಣಪೂರಕೋ ವಾ ಭವಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖು ಮಾನತ್ತಾರಹೋ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಮಾನತ್ತಾರಹೋ, ಆಗಚ್ಛನ್ತು ಭಿಕ್ಖೂ, ಇಚ್ಛಾಮಿ ಭಿಕ್ಖೂನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಮಾನತ್ತದಾನಂ ಉಸ್ಸುಕ್ಕಂ ಕರಿಸ್ಸಾಮಿ ವಾ, ಅನುಸ್ಸಾವೇಸ್ಸಾಮಿ ವಾ, ಗಣಪೂರಕೋ ವಾ ಭವಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖು ಅಬ್ಭಾನಾರಹೋ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಅಬ್ಭಾನಾರಹೋ, ಆಗಚ್ಛನ್ತು ಭಿಕ್ಖೂ, ಇಚ್ಛಾಮಿ ಭಿಕ್ಖೂನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಅಬ್ಭಾನಂ ಉಸ್ಸುಕ್ಕಂ ಕರಿಸ್ಸಾಮಿ ವಾ, ಅನುಸ್ಸಾವೇಸ್ಸಾಮಿ ವಾ, ಗಣಪೂರಕೋ ವಾ ಭವಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುಸ್ಸ ಸಙ್ಘೋ ಕಮ್ಮಂ ಕತ್ತುಕಾಮೋ ಹೋತಿ ತಜ್ಜನೀಯಂ ವಾ, ನಿಯಸ್ಸಂ ವಾ, ಪಬ್ಬಾಜನೀಯಂ ವಾ, ಪಟಿಸಾರಣೀಯಂ ವಾ, ಉಕ್ಖೇಪನೀಯಂ ವಾ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಸಙ್ಘೋ ಮೇ ಕಮ್ಮಂ ಕತ್ತುಕಾಮೋ, ಆಗಚ್ಛನ್ತು ಭಿಕ್ಖೂ, ಇಚ್ಛಾಮಿ ಭಿಕ್ಖೂನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಕಿನ್ತಿ ನು ಖೋ ಸಙ್ಘೋ ಕಮ್ಮಂ ನ ಕರೇಯ್ಯ, ಲಹುಕಾಯ ವಾ ಪರಿಣಾಮೇಯ್ಯಾ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಕತಂ ವಾ ಪನಸ್ಸ ಹೋತಿ ಸಙ್ಘೇನ ಕಮ್ಮಂ ತಜ್ಜನೀಯಂ ವಾ ನಿಯಸ್ಸಂ ವಾ ಪಬ್ಬಾಜನೀಯಂ ವಾ ಪಟಿಸಾರಣೀಯಂ ವಾ ಉಕ್ಖೇಪನೀಯಂ ವಾ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ ‘‘ಸಙ್ಘೋ ಮೇ ಕಮ್ಮಂ ಅಕಾಸಿ, ಆಗಚ್ಛನ್ತು ಭಿಕ್ಖೂ, ಇಚ್ಛಾಮಿ ಭಿಕ್ಖೂನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಕಿನ್ತಿ ನು ಖೋ ಸಮ್ಮಾ ವತ್ತೇಯ್ಯ, ಲೋಮಂ ಪಾತೇಯ್ಯ, ನೇತ್ಥಾರಂ ವತ್ತೇಯ್ಯ, ಸಙ್ಘೋ ತಂ ಕಮ್ಮಂ ಪಟಿಪ್ಪಸ್ಸಮ್ಭೇಯ್ಯಾ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

೧೯೪. ಇಧ ಪನ, ಭಿಕ್ಖವೇ, ಭಿಕ್ಖುನೀ ಗಿಲಾನಾ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಗಿಲಾನಾ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಗಿಲಾನಭತ್ತಂ ವಾ ಪರಿಯೇಸಿಸ್ಸಾಮಿ, ಗಿಲಾನುಪಟ್ಠಾಕಭತ್ತಂ ವಾ ಪರಿಯೇಸಿಸ್ಸಾಮಿ, ಗಿಲಾನಭೇಸಜ್ಜಂ ವಾ ಪರಿಯೇಸಿಸ್ಸಾಮಿ, ಪುಚ್ಛಿಸ್ಸಾಮಿ ವಾ, ಉಪಟ್ಠಹಿಸ್ಸಾಮಿ ವಾ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುನಿಯಾ ಅನಭಿರತಿ ಉಪ್ಪನ್ನಾ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅನಭಿರತಿ ಮೇ ಉಪ್ಪನ್ನಾ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಅನಭಿರತಂ ವೂಪಕಾಸೇಸ್ಸಾಮಿ ವಾ, ವೂಪಕಾಸಾಪೇಸ್ಸಾಮಿ ವಾ, ಧಮ್ಮಕಥಂ ವಾಸ್ಸಾ ಕರಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುನಿಯಾ ಕುಕ್ಕುಚ್ಚಂ ಉಪ್ಪನ್ನಂ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಕುಕ್ಕುಚ್ಚಂ ಮೇ ಉಪ್ಪನ್ನಂ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಕುಕ್ಕುಚ್ಚಂ ವಿನೋದೇಸ್ಸಾಮಿ ವಾ, ವಿನೋದಾಪೇಸ್ಸಾಮಿ ವಾ, ಧಮ್ಮಕಥಂ ವಾಸ್ಸಾ ಕರಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುನಿಯಾ ದಿಟ್ಠಿಗತಂ ಉಪ್ಪನ್ನಂ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ದಿಟ್ಠಿಗತಂ ಮೇ ಉಪ್ಪನ್ನಂ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ದಿಟ್ಠಿಗತಂ ವಿವೇಚೇಸ್ಸಾಮಿ ವಾ, ವಿವೇಚಾಪೇಸ್ಸಾಮಿ ವಾ, ಧಮ್ಮಕಥಂ ವಾಸ್ಸಾ ಕರಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುನೀ ಗರುಧಮ್ಮಂ ಅಜ್ಝಾಪನ್ನಾ ಹೋತಿ ಮಾನತ್ತಾರಹಾ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಗರುಧಮ್ಮಂ ಅಜ್ಝಾಪನ್ನಾ ಮಾನತ್ತಾರಹಾ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಮಾನತ್ತದಾನಂ ಉಸ್ಸುಕ್ಕಂ ಕರಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುನೀ ಮೂಲಾಯ ಪಟಿಕಸ್ಸನಾರಹಾ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಮೂಲಾಯ ಪಟಿಕಸ್ಸನಾರಹಾ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಮೂಲಾಯ ಪಟಿಕಸ್ಸನಂ ಉಸ್ಸುಕ್ಕಂ ಕರಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುನೀ ಅಬ್ಭಾನಾರಹಾ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಅಬ್ಭಾನಾರಹಾ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಅಬ್ಭಾನಂ ಉಸ್ಸುಕ್ಕಂ ಕರಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುನಿಯಾ ಸಙ್ಘೋ ಕಮ್ಮಂ ಕತ್ತುಕಾಮೋ ಹೋತಿ – ತಜ್ಜನೀಯಂ ವಾ, ನಿಯಸ್ಸಂ ವಾ, ಪಬ್ಬಾಜನೀಯಂ ವಾ, ಪಟಿಸಾರಣೀಯಂ ವಾ, ಉಕ್ಖೇಪನೀಯಂ ವಾ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಸಙ್ಘೋ ಮೇ ಕಮ್ಮಂ ಕತ್ತುಕಾಮೋ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಕಿನ್ತಿ ನು ಖೋ ಸಙ್ಘೋ ಕಮ್ಮಂ ನ ಕರೇಯ್ಯ, ಲಹುಕಾಯ ವಾ ಪರಿಣಾಮೇಯ್ಯಾ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಕತಂ ವಾ ಪನಸ್ಸಾ ಹೋತಿ ಸಙ್ಘೇನ ಕಮ್ಮಂ – ತಜ್ಜನೀಯಂ ವಾ, ನಿಯಸ್ಸಂ ವಾ, ಪಬ್ಬಾಜನೀಯಂ ವಾ, ಪಟಿಸಾರಣೀಯಂ ವಾ, ಉಕ್ಖೇಪನೀಯಂ ವಾ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಸಙ್ಘೋ ಮೇ ಕಮ್ಮಂ ಅಕಾಸಿ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಕಿನ್ತಿ ನು ಖೋ ಸಮ್ಮಾ ವತ್ತೇಯ್ಯ, ಲೋಮಂ ಪಾತೇಯ್ಯ, ನೇತ್ಥಾರಂ ವತ್ತೇಯ್ಯ, ಸಙ್ಘೋ ತಂ ಕಮ್ಮಂ ಪಟಿಪ್ಪಸ್ಸಮ್ಭೇಯ್ಯಾ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

೧೯೫. ಇಧ ಪನ, ಭಿಕ್ಖವೇ, ಸಿಕ್ಖಮಾನಾ ಗಿಲಾನಾ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಗಿಲಾನಾ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ – ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಗಿಲಾನಭತ್ತಂ ವಾ ಪರಿಯೇಸಿಸ್ಸಾಮಿ, ಗಿಲಾನುಪಟ್ಠಾಕಭತ್ತಂ ವಾ ಪರಿಯೇಸಿಸ್ಸಾಮಿ, ಗಿಲಾನಭೇಸಜ್ಜಂ ವಾ ಪರಿಯೇಸಿಸ್ಸಾಮಿ, ಪುಚ್ಛಿಸ್ಸಾಮಿ ವಾ, ಉಪಟ್ಠಹಿಸ್ಸಾಮಿ ವಾ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಸಿಕ್ಖಮಾನಾಯ ಅನಭಿರತಿ ಉಪ್ಪನ್ನಾ ಹೋತಿ…ಪೇ… ಸಿಕ್ಖಮಾನಾಯ ಕುಕ್ಕುಚ್ಚಂ ಉಪ್ಪನ್ನಂ ಹೋತಿ… ಸಿಕ್ಖಮಾನಾಯ ದಿಟ್ಠಿಗತಂ ಉಪ್ಪನ್ನಂ ಹೋತಿ… ಸಿಕ್ಖಮಾನಾಯ ಸಿಕ್ಖಾ ಕುಪಿತಾ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಸಿಕ್ಖಾ ಮೇ ಕುಪಿತಾ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಸಿಕ್ಖಾಸಮಾದಾನಂ ಉಸ್ಸುಕ್ಕಂ ಕರಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಸಿಕ್ಖಮಾನಾ ಉಪಸಮ್ಪಜ್ಜಿತುಕಾಮಾ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಉಪಸಮ್ಪಜ್ಜಿತುಕಾಮಾ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ಉಪಸಮ್ಪದಂ ಉಸ್ಸುಕ್ಕಂ ಕರಿಸ್ಸಾಮಿ ವಾ, ಅನುಸ್ಸಾವೇಸ್ಸಾಮಿ ವಾ, ಗಣಪೂರಕೋ ವಾ ಭವಿಸ್ಸಾಮೀತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

೧೯೬. ಇಧ ಪನ, ಭಿಕ್ಖವೇ, ಸಾಮಣೇರೋ ಗಿಲಾನೋ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಗಿಲಾನೋ, ಆಗಚ್ಛನ್ತು ಭಿಕ್ಖೂ, ಇಚ್ಛಾಮಿ ಭಿಕ್ಖೂನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಗಿಲಾನಭತ್ತಂ ವಾ ಪರಿಯೇಸಿಸ್ಸಾಮಿ, ಗಿಲಾನುಪಟ್ಠಾಕಭತ್ತಂ ವಾ ಪರಿಯೇಸಿಸ್ಸಾಮಿ, ಗಿಲಾನಭೇಸಜ್ಜಂ ವಾ ಪರಿಯೇಸಿಸ್ಸಾಮಿ, ಪುಚ್ಛಿಸ್ಸಾಮಿ ವಾ, ಉಪಟ್ಠಹಿಸ್ಸಾಮಿ ವಾ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಸಾಮಣೇರಸ್ಸ ಅನಭಿರತಿ ಉಪ್ಪನ್ನಾ ಹೋತಿ…ಪೇ… ಸಾಮಣೇರಸ್ಸ ಕುಕ್ಕುಚ್ಚಂ ಉಪ್ಪನ್ನಂ ಹೋತಿ… ಸಾಮಣೇರಸ್ಸ ದಿಟ್ಠಿಗತಂ ಉಪ್ಪನ್ನಂ ಹೋತಿ… ಸಾಮಣೇರೋ ವಸ್ಸಂ ಪುಚ್ಛಿತುಕಾಮೋ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ವಸ್ಸಂ ಪುಚ್ಛಿತುಕಾಮೋ, ಆಗಚ್ಛನ್ತು ಭಿಕ್ಖೂ, ಇಚ್ಛಾಮಿ ಭಿಕ್ಖೂನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಪುಚ್ಛಿಸ್ಸಾಮಿ ವಾ, ಆಚಿಕ್ಖಿಸ್ಸಾಮಿ ವಾ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಸಾಮಣೇರೋ ಉಪಸಮ್ಪಜ್ಜಿತುಕಾಮೋ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಉಪಸಮ್ಪಜ್ಜಿತುಕಾಮೋ, ಆಗಚ್ಛನ್ತು ಭಿಕ್ಖೂ, ಇಚ್ಛಾಮಿ ಭಿಕ್ಖೂನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಉಪಸಮ್ಪದಂ ಉಸ್ಸುಕ್ಕಂ ಕರಿಸ್ಸಾಮಿ ವಾ, ಅನುಸ್ಸಾವೇಸ್ಸಾಮಿ ವಾ, ಗಣಪೂರಕೋ ವಾ ಭವಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

೧೯೭. ಇಧ ಪನ, ಭಿಕ್ಖವೇ, ಸಾಮಣೇರೀ ಗಿಲಾನಾ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಗಿಲಾನಾ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಗಿಲಾನಭತ್ತಂ ವಾ ಪರಿಯೇಸಿಸ್ಸಾಮಿ, ಗಿಲಾನುಪಟ್ಠಾಕಭತ್ತಂ ವಾ ಪರಿಯೇಸಿಸ್ಸಾಮಿ, ಗಿಲಾನಭೇಸಜ್ಜಂ ವಾ ಪರಿಯೇಸಿಸ್ಸಾಮಿ, ಪುಚ್ಛಿಸ್ಸಾಮಿ ವಾ, ಉಪಟ್ಠಹಿಸ್ಸಾಮಿ ವಾ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಸಾಮಣೇರಿಯಾ ಅನಭಿರತಿ ಉಪ್ಪನ್ನಾ ಹೋತಿ…ಪೇ… ಸಾಮಣೇರಿಯಾ ಕುಕ್ಕುಚ್ಚಂ ಉಪ್ಪನ್ನಂ ಹೋತಿ… ಸಾಮಣೇರಿಯಾ ದಿಟ್ಠಿಗತಂ ಉಪ್ಪನ್ನಂ ಹೋತಿ… ಸಾಮಣೇರೀ ವಸ್ಸಂ ಪುಚ್ಛಿತುಕಾಮಾ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ವಸ್ಸಂ ಪುಚ್ಛಿತುಕಾಮಾ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಪುಚ್ಛಿಸ್ಸಾಮಿ ವಾ, ಆಚಿಕ್ಖಿಸ್ಸಾಮಿ ವಾ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಸಾಮಣೇರೀ ಸಿಕ್ಖಂ ಸಮಾದಿಯಿತುಕಾಮಾ ಹೋತಿ. ಸಾ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಸಿಕ್ಖಂ ಸಮಾದಿಯಿತುಕಾಮಾ, ಆಗಚ್ಛನ್ತು ಅಯ್ಯಾ, ಇಚ್ಛಾಮಿ ಅಯ್ಯಾನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಸಿಕ್ಖಾಸಮಾದಾನಂ ಉಸ್ಸುಕ್ಕಂ ಕರಿಸ್ಸಾಮೀ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋತಿ.

ಪಞ್ಚನ್ನಂ ಅಪ್ಪಹಿತೇಪಿ ಅನುಜಾನನಾ ನಿಟ್ಠಿತಾ.

೧೧೧. ಸತ್ತನ್ನಂ ಅಪ್ಪಹಿತೇಪಿ ಅನುಜಾನನಾ

೧೯೮. ತೇನ ಖೋ ಪನ ಸಮಯೇನ ಅಞ್ಞತರಸ್ಸ ಭಿಕ್ಖುನೋ ಮಾತಾ ಗಿಲಾನಾ ಹೋತಿ. ಸಾ ಪುತ್ತಸ್ಸ ಸನ್ತಿಕೇ ದೂತಂ ಪಾಹೇಸಿ – ‘‘ಅಹಞ್ಹಿ ಗಿಲಾನಾ, ಆಗಚ್ಛತು ಮೇ ಪುತ್ತೋ, ಇಚ್ಛಾಮಿ ಪುತ್ತಸ್ಸ ಆಗತ’’ನ್ತಿ. ಅಥ ಖೋ ತಸ್ಸ ಭಿಕ್ಖುನೋ ಏತದಹೋಸಿ – ‘‘ಭಗವತಾ ಪಞ್ಞತ್ತಂ ಸತ್ತನ್ನಂ ಸತ್ತಾಹಕರಣೀಯೇನ ಪಹಿತೇ ಗನ್ತುಂ, ನ ತ್ವೇವ ಅಪ್ಪಹಿತೇ; ಪಞ್ಚನ್ನಂ ಸತ್ತಾಹಕರಣೀಯೇನ ಅಪ್ಪಹಿತೇಪಿ ಗನ್ತುಂ, ಪಗೇವ ಪಹಿತೇತಿ. ಅಯಞ್ಚ ಮೇ ಮಾತಾ ಗಿಲಾನಾ, ಸಾ ಚ ಅನುಪಾಸಿಕಾ, ಕಥಂ ನು ಖೋ ಮಯಾ ಪಟಿಪಜ್ಜಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಸತ್ತನ್ನಂ ಸತ್ತಾಹಕರಣೀಯೇನ ಅಪ್ಪಹಿತೇಪಿ ಗನ್ತುಂ, ಪಗೇವ ಪಹಿತೇ. ಭಿಕ್ಖುಸ್ಸ, ಭಿಕ್ಖುನಿಯಾ, ಸಿಕ್ಖಮಾನಾಯ, ಸಾಮಣೇರಸ್ಸ, ಸಾಮಣೇರಿಯಾ, ಮಾತುಯಾ ಚ ಪಿತುಸ್ಸ ಚ – ಅನುಜಾನಾಮಿ, ಭಿಕ್ಖವೇ, ಇಮೇಸಂ ಸತ್ತನ್ನಂ ಸತ್ತಾಹಕರಣೀಯೇನ ಅಪ್ಪಹಿತೇಪಿ ಗನ್ತುಂ, ಪಗೇವ ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುಸ್ಸ ಮಾತಾ ಗಿಲಾನಾ ಹೋತಿ. ಸಾ ಚೇ ಪುತ್ತಸ್ಸ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಗಿಲಾನಾ, ಆಗಚ್ಛತು ಮೇ ಪುತ್ತೋ, ಇಚ್ಛಾಮಿ ಪುತ್ತಸ್ಸ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಗಿಲಾನಭತ್ತಂ ವಾ ಪರಿಯೇಸಿಸ್ಸಾಮಿ, ಗಿಲಾನುಪಟ್ಠಾಕಭತ್ತಂ ವಾ ಪರಿಯೇಸಿಸ್ಸಾಮಿ, ಗಿಲಾನಭೇಸಜ್ಜಂ ವಾ ಪರಿಯೇಸಿಸ್ಸಾಮಿ, ಪುಚ್ಛಿಸ್ಸಾಮಿ ವಾ, ಉಪಟ್ಠಹಿಸ್ಸಾಮಿ ವಾ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುಸ್ಸ ಪಿತಾ ಗಿಲಾನೋ ಹೋತಿ. ಸೋ ಚೇ ಪುತ್ತಸ್ಸ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಗಿಲಾನೋ, ಆಗಚ್ಛತು ಮೇ ಪುತ್ತೋ, ಇಚ್ಛಾಮಿ ಪುತ್ತಸ್ಸ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಅಪ್ಪಹಿತೇಪಿ, ಪಗೇವ ಪಹಿತೇ – ‘‘ಗಿಲಾನಭತ್ತಂ ವಾ ಪರಿಯೇಸಿಸ್ಸಾಮಿ, ಗಿಲಾನುಪಟ್ಠಾಕಭತ್ತಂ ವಾ ಪರಿಯೇಸಿಸ್ಸಾಮಿ, ಗಿಲಾನಭೇಸಜ್ಜಂ ವಾ ಪರಿಯೇಸಿಸ್ಸಾಮಿ, ಪುಚ್ಛಿಸ್ಸಾಮಿ ವಾ, ಉಪಟ್ಠಹಿಸ್ಸಾಮಿ ವಾ’’ತಿ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಸತ್ತನ್ನಂ ಅಪ್ಪಹಿತೇಪಿ ಅನುಜಾನನಾ ನಿಟ್ಠಿತಾ.

೧೧೨. ಪಹಿತೇಯೇವ ಅನುಜಾನನಾ

೧೯೯. ಇಧ ಪನ, ಭಿಕ್ಖವೇ, ಭಿಕ್ಖುಸ್ಸ ಭಾತಾ ಗಿಲಾನೋ ಹೋತಿ. ಸೋ ಚೇ ಭಾತುನೋ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಗಿಲಾನೋ, ಆಗಚ್ಛತು ಮೇ ಭಾತಾ, ಇಚ್ಛಾಮಿ ಭಾತುನೋ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುಸ್ಸ ಭಗಿನೀ ಗಿಲಾನಾ ಹೋತಿ. ಸಾ ಚೇ ಭಾತುನೋ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಗಿಲಾನಾ, ಆಗಚ್ಛತು ಮೇ ಭಾತಾ, ಇಚ್ಛಾಮಿ ಭಾತುನೋ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುಸ್ಸ ಞಾತಕೋ ಗಿಲಾನೋ ಹೋತಿ. ಸೋ ಚೇ ಭಿಕ್ಖುಸ್ಸ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಗಿಲಾನೋ, ಆಗಚ್ಛತು ಭದನ್ತೋ, ಇಚ್ಛಾಮಿ ಭದನ್ತಸ್ಸ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ಇಧ ಪನ, ಭಿಕ್ಖವೇ, ಭಿಕ್ಖುಗತಿಕೋ ಗಿಲಾನೋ ಹೋತಿ. ಸೋ ಚೇ ಭಿಕ್ಖೂನಂ ಸನ್ತಿಕೇ ದೂತಂ ಪಹಿಣೇಯ್ಯ – ‘‘ಅಹಞ್ಹಿ ಗಿಲಾನೋ, ಆಗಚ್ಛನ್ತು ಭದನ್ತಾ, ಇಚ್ಛಾಮಿ ಭದನ್ತಾನಂ ಆಗತ’’ನ್ತಿ, ಗನ್ತಬ್ಬಂ, ಭಿಕ್ಖವೇ, ಸತ್ತಾಹಕರಣೀಯೇನ, ಪಹಿತೇ, ನ ತ್ವೇವ ಅಪ್ಪಹಿತೇ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋ.

ತೇನ ಖೋ ಪನ ಸಮಯೇನ ಸಙ್ಘಸ್ಸ ವಿಹಾರೋ ಉನ್ದ್ರಿಯತಿ. ಅಞ್ಞತರೇನ ಉಪಾಸಕೇನ ಅರಞ್ಞೇ ಭಣ್ಡಂ ಛೇದಾಪಿತಂ ಹೋತಿ. ಸೋ ಭಿಕ್ಖೂನಂ ಸನ್ತಿಕೇ ದೂತಂ ಪಾಹೇಸಿ – ‘‘ಸಚೇ ಭದನ್ತಾ ತಂ ಭಣ್ಡಂ ಆವಹಾಪೇಯ್ಯುಂ, ದಜ್ಜಾಹಂ ತಂ ಭಣ್ಡ’’ನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಸಙ್ಘಕರಣೀಯೇನ ಗನ್ತುಂ. ಸತ್ತಾಹಂ ಸನ್ನಿವತ್ತೋ ಕಾತಬ್ಬೋತಿ.

ಪಹಿತೇಯೇವ ಅನುಜಾನನಾ ನಿಟ್ಠಿತಾ.

ವಸ್ಸಾವಾಸಭಾಣವಾರೋ ನಿಟ್ಠಿತೋ.

೧೧೩. ಅನ್ತರಾಯೇ ಅನಾಪತ್ತಿವಸ್ಸಚ್ಛೇದವಾರೋ

೨೦೦. ತೇನ ಖೋ ಪನ ಸಮಯೇನ ಕೋಸಲೇಸು ಜನಪದೇ ಅಞ್ಞತರಸ್ಮಿಂ ಆವಾಸೇ ವಸ್ಸೂಪಗತಾ ಭಿಕ್ಖೂ ವಾಳೇಹಿ ಉಬ್ಬಾಳ್ಹಾ ಹೋನ್ತಿ. ಗಣ್ಹಿಂಸುಪಿ ಪರಿಪಾತಿಂಸುಪಿ. ಭಗವತೋ ಏತಮತ್ಥಂ ಆರೋಚೇಸುಂ.

ಇಧ ಪನ, ಭಿಕ್ಖವೇ, ವಸ್ಸೂಪಗತಾ ಭಿಕ್ಖೂ ವಾಳೇಹಿ ಉಬ್ಬಾಳ್ಹಾ ಹೋನ್ತಿ. ಗಣ್ಹನ್ತಿಪಿ ಪರಿಪಾತೇನ್ತಿಪಿ. ಏಸೇವ ಅನ್ತರಾಯೋತಿ ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತಾ ಭಿಕ್ಖೂ ಸರೀಸಪೇಹಿ ಉಬ್ಬಾಳ್ಹಾ ಹೋನ್ತಿ. ಡಂಸನ್ತಿಪಿ ಪರಿಪಾತೇನ್ತಿಪಿ. ಏಸೇವ ಅನ್ತರಾಯೋತಿ ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತಾ ಭಿಕ್ಖೂ ಚೋರೇಹಿ ಉಬ್ಬಾಳ್ಹಾ ಹೋನ್ತಿ. ವಿಲುಮ್ಪನ್ತಿಪಿ ಆಕೋಟೇನ್ತಿಪಿ. ಏಸೇವ ಅನ್ತರಾಯೋತಿ ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತಾ ಭಿಕ್ಖೂ ಪಿಸಾಚೇಹಿ ಉಬ್ಬಾಳ್ಹಾ ಹೋನ್ತಿ. ಆವಿಸನ್ತಿಪಿ ಹನನ್ತಿಪಿ [ಓಜಮ್ಪಿ ಹರನ್ತಿ (ಸೀ.), ಹರನ್ತಿಪಿ (ಸ್ಯಾ.)]. ಏಸೇವ ಅನ್ತರಾಯೋತಿ ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತಾನಂ ಭಿಕ್ಖೂನಂ ಗಾಮೋ ಅಗ್ಗಿನಾ ದಡ್ಢೋ ಹೋತಿ. ಭಿಕ್ಖೂ ಪಿಣ್ಡಕೇನ ಕಿಲಮನ್ತಿ. ಏಸೇವ ಅನ್ತರಾಯೋತಿ ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತಾನಂ ಭಿಕ್ಖೂನಂ ಸೇನಾಸನಂ ಅಗ್ಗಿನಾ ದಡ್ಢಂ ಹೋತಿ. ಭಿಕ್ಖೂ ಸೇನಾಸನೇನ ಕಿಲಮನ್ತಿ. ಏಸೇವ ಅನ್ತರಾಯೋತಿ ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತಾನಂ ಭಿಕ್ಖೂನಂ ಗಾಮೋ ಉದಕೇನ ವೂಳ್ಹೋ ಹೋತಿ. ಭಿಕ್ಖೂ ಪಿಣ್ಡಕೇನ ಕಿಲಮನ್ತಿ. ಏಸೇವ ಅನ್ತರಾಯೋತಿ ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತಾನಂ ಭಿಕ್ಖೂನಂ ಸೇನಾಸನಂ ಉದಕೇನ ವೂಳ್ಹಂ ಹೋತಿ. ಭಿಕ್ಖೂ ಸೇನಾಸನೇನ ಕಿಲಮನ್ತಿ. ಏಸೇವ ಅನ್ತರಾಯೋತಿ ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸಾತಿ.

೨೦೧. ತೇನ ಖೋ ಪನ ಸಮಯೇನ ಅಞ್ಞತರಸ್ಮಿಂ ಆವಾಸೇ ವಸ್ಸೂಪಗತಾನಂ ಭಿಕ್ಖೂನಂ ಗಾಮೋ ಚೋರೇಹಿ ವುಟ್ಠಾಸಿ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಯೇನ ಗಾಮೋ ತೇನ ಗನ್ತುನ್ತಿ.

ಗಾಮೋ ದ್ವೇಧಾ ಭಿಜ್ಜಿತ್ಥ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಯೇನ ಬಹುತರಾ ತೇನ ಗನ್ತುನ್ತಿ.

ಬಹುತರಾ ಅಸ್ಸದ್ಧಾ ಹೋನ್ತಿ ಅಪ್ಪಸನ್ನಾ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಯೇನ ಸದ್ಧಾ ಪಸನ್ನಾ ತೇನ ಗನ್ತುನ್ತಿ.

ತೇನ ಖೋ ಪನ ಸಮಯೇನ ಕೋಸಲೇಸು ಜನಪದೇ ಅಞ್ಞತರಸ್ಮಿಂ ಆವಾಸೇ ವಸ್ಸೂಪಗತಾ ಭಿಕ್ಖೂ ನ ಲಭಿಂಸು ಲೂಖಸ್ಸ ವಾ ಪಣೀತಸ್ಸ ವಾ ಭೋಜನಸ್ಸ ಯಾವದತ್ಥಂ ಪಾರಿಪೂರಿಂ. ಭಗವತೋ ಏತಮತ್ಥಂ ಆರೋಚೇಸುಂ.

ಇಧ ಪನ, ಭಿಕ್ಖವೇ, ವಸ್ಸೂಪಗತಾ ಭಿಕ್ಖೂ ನ ಲಭನ್ತಿ ಲೂಖಸ್ಸ ವಾ ಪಣೀತಸ್ಸ ವಾ ಭೋಜನಸ್ಸ ಯಾವದತ್ಥಂ ಪಾರಿಪೂರಿಂ. ಏಸೇವ ಅನ್ತರಾಯೋತಿ ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತಾ ಭಿಕ್ಖೂ ಲಭನ್ತಿ ಲೂಖಸ್ಸ ವಾ ಪಣೀತಸ್ಸ ವಾ ಭೋಜನಸ್ಸ ಯಾವದತ್ಥಂ ಪಾರಿಪೂರಿಂ, ನ ಲಭನ್ತಿ ಸಪ್ಪಾಯಾನಿ ಭೋಜನಾನಿ. ಏಸೇವ ಅನ್ತರಾಯೋತಿ ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತಾ ಭಿಕ್ಖೂ ಲಭನ್ತಿ ಲೂಖಸ್ಸ ವಾ ಪಣೀತಸ್ಸ ವಾ ಭೋಜನಸ್ಸ ಯಾವದತ್ಥಂ ಪಾರಿಪೂರಿಂ, ಲಭನ್ತಿ ಸಪ್ಪಾಯಾನಿ ಭೋಜನಾನಿ, ನ ಲಭನ್ತಿ ಸಪ್ಪಾಯಾನಿ ಭೇಸಜ್ಜಾನಿ. ಏಸೇವ ಅನ್ತರಾಯೋತಿ ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತಾ ಭಿಕ್ಖೂ ಲಭನ್ತಿ ಲೂಖಸ್ಸ ವಾ ಪಣೀತಸ್ಸ ವಾ ಭೋಜನಸ್ಸ ಯಾವದತ್ಥಂ ಪಾರಿಪೂರಿಂ, ಲಭನ್ತಿ ಸಪ್ಪಾಯಾನಿ ಭೋಜನಾನಿ, ಲಭನ್ತಿ ಸಪ್ಪಾಯಾನಿ ಭೇಸಜ್ಜಾನಿ, ನ ಲಭನ್ತಿ ಪತಿರೂಪಂ ಉಪಟ್ಠಾಕಂ. ಏಸೇವ ಅನ್ತರಾಯೋತಿ ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತಂ ಭಿಕ್ಖುಂ ಇತ್ಥೀ ನಿಮನ್ತೇತಿ – ‘‘ಏಹಿ, ಭನ್ತೇ, ಹಿರಞ್ಞಂ ವಾ ತೇ ದೇಮಿ, ಸುವಣ್ಣಂ ವಾ ತೇ ದೇಮಿ, ಖೇತ್ತಂ ವಾ ತೇ ದೇಮಿ, ವತ್ಥುಂ ವಾ ತೇ ದೇಮಿ, ಗಾವುಂ ವಾ ತೇ ದೇಮಿ, ಗಾವಿಂ ವಾ ತೇ ದೇಮಿ, ದಾಸಂ ವಾ ತೇ ದೇಮಿ, ದಾಸಿಂ ವಾ ತೇ ದೇಮಿ, ಧೀತರಂ ವಾ ತೇ ದೇಮಿ ಭರಿಯತ್ಥಾಯ, ಅಹಂ ವಾ ತೇ ಭರಿಯಾ ಹೋಮಿ, ಅಞ್ಞಂ ವಾ ತೇ ಭರಿಯಂ ಆನೇಮೀ’’ತಿ. ತತ್ರ ಚೇ ಭಿಕ್ಖುನೋ ಏವಂ ಹೋತಿ, ‘ಲಹುಪರಿವತ್ತಂ ಖೋ ಚಿತ್ತಂ ವುತ್ತಂ ಭಗವತಾ, ಸಿಯಾಪಿ ಮೇ ಬ್ರಹ್ಮಚರಿಯಸ್ಸ ಅನ್ತರಾಯೋ’ತಿ, ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತಂ ಭಿಕ್ಖುಂ ವೇಸೀ ನಿಮನ್ತೇತಿ…ಪೇ… ಥುಲ್ಲಕುಮಾರೀ ನಿಮನ್ತೇತಿ… ಪಣ್ಡಕೋ ನಿಮನ್ತೇತಿ… ಞಾತಕಾ ನಿಮನ್ತೇನ್ತಿ… ರಾಜಾನೋ ನಿಮನ್ತೇನ್ತಿ… ಚೋರಾ ನಿಮನ್ತೇನ್ತಿ… ಧುತ್ತಾ ನಿಮನ್ತೇನ್ತಿ – ‘‘ಏಹಿ, ಭನ್ತೇ, ಹಿರಞ್ಞಂ ವಾ ತೇ ದೇಮ, ಸುವಣ್ಣಂ ವಾ ತೇ ದೇಮ, ಖೇತ್ತಂ ವಾ ತೇ ದೇಮ, ವತ್ಥುಂ ವಾ ತೇ ದೇಮ, ಗಾವುಂ ವಾ ತೇ ದೇಮ, ಗಾವಿಂ ವಾ ತೇ ದೇಮ, ದಾಸಂ ವಾ ತೇ ದೇಮ, ದಾಸಿಂ ವಾ ತೇ ದೇಮ, ಧೀತರಂ ವಾ ತೇ ದೇಮ ಭರಿಯತ್ಥಾಯ, ಅಞ್ಞಂ ವಾ ತೇ ಭರಿಯಂ ಆನೇಮಾ’’ತಿ. ತತ್ರ ಚೇ ಭಿಕ್ಖುನೋ ಏವಂ ಹೋತಿ, ‘ಲಹುಪರಿವತ್ತಂ ಖೋ ಚಿತ್ತಂ ವುತ್ತಂ ಭಗವತಾ, ಸಿಯಾಪಿ ಮೇ ಬ್ರಹ್ಮಚರಿಯಸ್ಸ ಅನ್ತರಾಯೋ’ತಿ, ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತೋ ಭಿಕ್ಖು ಅಸ್ಸಾಮಿಕಂ ನಿಧಿಂ ಪಸ್ಸತಿ. ತತ್ರ ಚೇ ಭಿಕ್ಖುನೋ ಏವಂ ಹೋತಿ, ‘ಲಹುಪರಿವತ್ತಂ ಖೋ ಚಿತ್ತಂ ವುತ್ತಂ ಭಗವತಾ, ಸಿಯಾಪಿ ಮೇ ಬ್ರಹ್ಮಚರಿಯಸ್ಸ ಅನ್ತರಾಯೋ’ತಿ, ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಅನ್ತರಾಯೇ ಅನಾಪತ್ತಿವಸ್ಸಚ್ಛೇದವಾರೋ ನಿಟ್ಠಿತೋ.

೧೧೪. ಸಙ್ಘಭೇದೇ ಅನಾಪತ್ತಿವಸ್ಸಚ್ಛೇದವಾರೋ

೨೦೨. ಇಧ ಪನ, ಭಿಕ್ಖವೇ, ವಸ್ಸೂಪಗತೋ ಭಿಕ್ಖು ಪಸ್ಸತಿ ಸಮ್ಬಹುಲೇ ಭಿಕ್ಖೂ ಸಙ್ಘಭೇದಾಯ ಪರಕ್ಕಮನ್ತೇ. ತತ್ರ ಚೇ ಭಿಕ್ಖುನೋ ಏವಂ ಹೋತಿ, ‘ಗರುಕೋ ಖೋ ಸಙ್ಘಭೇದೋ ವುತ್ತೋ ಭಗವತಾ; ಮಾ ಮಯಿ ಸಮ್ಮುಖೀಭೂತೇ ಸಙ್ಘೋ ಭಿಜ್ಜೀ’ತಿ, ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತೋ ಭಿಕ್ಖು ಸುಣಾತಿ – ‘‘ಅಸುಕಸ್ಮಿಂ ಕಿರ ಆವಾಸೇ ಸಮ್ಬಹುಲಾ ಭಿಕ್ಖೂ ಸಙ್ಘಭೇದಾಯ ಪರಕ್ಕಮನ್ತೀ’’ತಿ. ತತ್ರ ಚೇ ಭಿಕ್ಖುನೋ ಏವಂ ಹೋತಿ, ‘ಗರುಕೋ ಖೋ ಸಙ್ಘಭೇದೋ ವುತ್ತೋ ಭಗವತಾ; ಮಾ ಮಯಿ ಸಮ್ಮುಖೀಭೂತೇ ಸಙ್ಘೋ ಭಿಜ್ಜೀ’ತಿ, ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತೋ ಭಿಕ್ಖು ಸುಣಾತಿ – ‘‘ಅಸುಕಸ್ಮಿಂ ಕಿರ ಆವಾಸೇ ಸಮ್ಬಹುಲಾ ಭಿಕ್ಖೂ ಸಙ್ಘಭೇದಾಯ ಪರಕ್ಕಮನ್ತೀ’’ತಿ. ತತ್ರ ಚೇ ಭಿಕ್ಖುನೋ ಏವಂ ಹೋತಿ – ‘‘ತೇ ಖೋ ಮೇ ಭಿಕ್ಖೂ ಮಿತ್ತಾ. ತ್ಯಾಹಂ ವಕ್ಖಾಮಿ ‘ಗರುಕೋ ಖೋ, ಆವುಸೋ, ಸಙ್ಘಭೇದೋ ವುತ್ತೋ ಭಗವತಾ; ಮಾಯಸ್ಮನ್ತಾನಂ ಸಙ್ಘಭೇದೋ ರುಚ್ಚಿತ್ಥಾ’ತಿ. ಕರಿಸ್ಸನ್ತಿ ಮೇ ವಚನಂ, ಸುಸ್ಸೂಸಿಸ್ಸನ್ತಿ, ಸೋತಂ ಓದಹಿಸ್ಸನ್ತೀ’’ತಿ, ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತೋ ಭಿಕ್ಖು ಸುಣಾತಿ – ‘‘ಅಸುಕಸ್ಮಿಂ ಕಿರ ಆವಾಸೇ ಸಮ್ಬಹುಲಾ ಭಿಕ್ಖೂ ಸಙ್ಘಭೇದಾಯ ಪರಕ್ಕಮನ್ತೀ’’ತಿ. ತತ್ರ ಚೇ ಭಿಕ್ಖುನೋ ಏವಂ ಹೋತಿ – ‘‘ತೇ ಖೋ ಮೇ ಭಿಕ್ಖೂ ನ ಮಿತ್ತಾ; ಅಪಿ ಚ ಯೇ ತೇಸಂ ಮಿತ್ತಾ, ತೇ ಮೇ ಮಿತ್ತಾ. ತ್ಯಾಹಂ ವಕ್ಖಾಮಿ. ತೇ ವುತ್ತಾ ತೇ ವಕ್ಖನ್ತಿ ‘ಗರುಕೋ ಖೋ, ಆವುಸೋ, ಸಙ್ಘಭೇದೋ ವುತ್ತೋ ಭಗವತಾ; ಮಾಯಸ್ಮನ್ತಾನಂ ಸಙ್ಘಭೇದೋ ರುಚ್ಚಿತ್ಥಾ’ತಿ. ಕರಿಸ್ಸನ್ತಿ ತೇಸಂ ವಚನಂ, ಸುಸ್ಸೂಸಿಸ್ಸನ್ತಿ, ಸೋತಂ ಓದಹಿಸ್ಸನ್ತೀ’’ತಿ, ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತೋ ಭಿಕ್ಖು ಸುಣಾತಿ – ‘‘ಅಸುಕಸ್ಮಿಂ ಕಿರ ಆವಾಸೇ ಸಮ್ಬಹುಲೇಹಿ ಭಿಕ್ಖೂಹಿ ಸಙ್ಘೋ ಭಿನ್ನೋ’’ತಿ. ತತ್ರ ಚೇ ಭಿಕ್ಖುನೋ ಏವಂ ಹೋತಿ – ‘‘ತೇ ಖೋ ಮೇ ಭಿಕ್ಖೂ ಮಿತ್ತಾ. ತ್ಯಾಹಂ ವಕ್ಖಾಮಿ ‘ಗರುಕೋ ಖೋ, ಆವುಸೋ, ಸಙ್ಘಭೇದೋ ವುತ್ತೋ ಭಗವತಾ; ಮಾಯಸ್ಮನ್ತಾನಂ ಸಙ್ಘಭೇದೋ ರುಚ್ಚಿತ್ಥಾ’ತಿ. ಕರಿಸ್ಸನ್ತಿ ಮೇ ವಚನಂ, ಸುಸ್ಸೂಸಿಸ್ಸನ್ತಿ, ಸೋತಂ ಓದಹಿಸ್ಸನ್ತೀ’’ತಿ, ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತೋ ಭಿಕ್ಖು ಸುಣಾತಿ – ‘‘ಅಸುಕಸ್ಮಿಂ ಕಿರ ಆವಾಸೇ ಸಮ್ಬಹುಲೇಹಿ ಭಿಕ್ಖೂಹಿ ಸಙ್ಘೋ ಭಿನ್ನೋ’’ತಿ. ತತ್ರ ಚೇ ಭಿಕ್ಖುನೋ ಏವಂ ಹೋತಿ – ‘‘ತೇ ಖೋ ಮೇ ಭಿಕ್ಖೂ ನ ಮಿತ್ತಾ; ಅಪಿ ಚ, ಯೇ ತೇಸಂ ಮಿತ್ತಾ ತೇ ಮೇ ಮಿತ್ತಾ. ತ್ಯಾಹಂ ವಕ್ಖಾಮಿ. ತೇ ವುತ್ತಾ ತೇ ವಕ್ಖನ್ತಿ ‘ಗರುಕೋ ಖೋ, ಆವುಸೋ, ಸಙ್ಘಭೇದೋ ವುತ್ತೋ ಭಗವತಾ; ಮಾಯಸ್ಮನ್ತಾನಂ ಸಙ್ಘಭೇದೋ ರುಚ್ಚಿತ್ಥಾ’ತಿ. ಕರಿಸ್ಸನ್ತಿ ತೇಸಂ ವಚನಂ, ಸುಸ್ಸೂಸಿಸ್ಸನ್ತಿ, ಸೋತಂ ಓದಹಿಸ್ಸನ್ತೀ’’ತಿ, ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತೋ ಭಿಕ್ಖು ಸುಣಾತಿ – ‘‘ಅಮುಕಸ್ಮಿಂ ಕಿರ ಆವಾಸೇ ಸಮ್ಬಹುಲಾ ಭಿಕ್ಖುನಿಯೋ ಸಙ್ಘಭೇದಾಯ ಪರಕ್ಕಮನ್ತೀ’’ತಿ. ತತ್ರ ಚೇ ಭಿಕ್ಖುನೋ ಏವಂ ಹೋತಿ – ‘‘ತಾ ಖೋ ಮೇ ಭಿಕ್ಖುನಿಯೋ ಮಿತ್ತಾ. ತಾಹಂ ವಕ್ಖಾಮಿ ‘ಗರುಕೋ ಖೋ, ಭಗಿನಿಯೋ, ಸಙ್ಘಭೇದೋ ವುತ್ತೋ ಭಗವತಾ; ಮಾ ಭಗಿನೀನಂ ಸಙ್ಘಭೇದೋ ರುಚ್ಚಿತ್ಥಾ’ತಿ. ಕರಿಸ್ಸನ್ತಿ ಮೇ ವಚನಂ, ಸುಸ್ಸೂಸಿಸ್ಸನ್ತಿ, ಸೋತಂ ಓದಹಿಸ್ಸನ್ತೀ’’ತಿ, ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸ.

ಇಧ ಪನ, ಭಿಕ್ಖವೇ, ವಸ್ಸೂಪಗತೋ ಭಿಕ್ಖು ಸುಣಾತಿ – ‘‘ಅಮುಕಸ್ಮಿಂ ಕಿರ ಆವಾಸೇ ಸಮ್ಬಹುಲಾ ಭಿಕ್ಖುನಿಯೋ ಸಙ್ಘಭೇದಾಯ ಪರಕ್ಕಮನ್ತೀ’’ತಿ. ತತ್ರ ಚೇ ಭಿಕ್ಖುನೋ ಏವಂ ಹೋತಿ – ‘‘ತಾ ಖೋ ಮೇ ಭಿಕ್ಖುನಿಯೋ ನ ಮಿತ್ತಾ. ಅಪಿ ಚ, ಯಾ ತಾಸಂ ಮಿತ್ತಾ, ತಾ ಮೇ ಮಿತ್ತಾ. ತಾಹಂ ವಕ್ಖಾಮಿ. ತಾ ವುತ್ತಾ ತಾ ವಕ್ಖನ್ತಿ ‘ಗರುಕೋ ಖೋ, ಭಗಿನಿಯೋ, ಸಙ್ಘಭೇದೋ ವುತ್ತೋ ಭಗವತಾ. ಮಾ ಭಗಿನೀನಂ ಸಙ್ಘಭೇದೋ ರುಚ್ಚಿತ್ಥಾ’ತಿ. ಕರಿಸ್ಸನ್ತಿ ತಾಸಂ ವಚನಂ, ಸುಸ್ಸೂಸಿಸ್ಸನ್ತಿ, ಸೋತಂ ಓದಹಿಸ್ಸನ್ತೀ’’ತಿ, ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸತಿ.

ಇಧ ಪನ, ಭಿಕ್ಖವೇ, ವಸ್ಸೂಪಗತೋ ಭಿಕ್ಖು ಸುಣಾತಿ – ‘‘ಅಮುಕಸ್ಮಿಂ ಕಿರ ಆವಾಸೇ ಸಮ್ಬಹುಲಾಹಿ ಭಿಕ್ಖುನೀಹಿ ಸಙ್ಘೋ ಭಿನ್ನೋ’’ತಿ. ತತ್ರ ಚೇ ಭಿಕ್ಖುನೋ ಏವಂ ಹೋತಿ – ‘‘ತಾ ಖೋ ಮೇ ಭಿಕ್ಖುನಿಯೋ ಮಿತ್ತಾ. ತಾಹಂ ವಕ್ಖಾಮಿ ‘ಗರುಕೋ ಖೋ, ಭಗಿನಿಯೋ, ಸಙ್ಘಭೇದೋ ವುತ್ತೋ ಭಗವತಾ. ಮಾ ಭಗಿನೀನಂ ಸಙ್ಘಭೇದೋ ರುಚ್ಚಿತ್ಥಾ’ತಿ. ಕರಿಸ್ಸನ್ತಿ ಮೇ ವಚನಂ, ಸುಸ್ಸೂಸಿಸ್ಸನ್ತಿ, ಸೋತಂ ಓದಹಿಸ್ಸನ್ತೀ’’ತಿ, ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸತಿ.

ಇಧ ಪನ, ಭಿಕ್ಖವೇ, ವಸ್ಸೂಪಗತೋ ಭಿಕ್ಖು ಸುಣಾತಿ – ‘‘ಅಮುಕಸ್ಮಿಂ ಕಿರ ಆವಾಸೇ ಸಮ್ಬಹುಲಾಹಿ ಭಿಕ್ಖುನೀಹಿ ಸಙ್ಘೋ ಭಿನ್ನೋ’’ತಿ. ತತ್ರ ಚೇ ಭಿಕ್ಖುನೋ ಏವಂ ಹೋತಿ – ‘‘ತಾ ಖೋ ಮೇ ಭಿಕ್ಖುನಿಯೋ ನ ಮಿತ್ತಾ. ಅಪಿ ಚ, ಯಾ ತಾಸಂ ಮಿತ್ತಾ ತಾ ಮೇ ಮಿತ್ತಾ. ತಾಹಂ ವಕ್ಖಾಮಿ. ತಾ ವುತ್ತಾ ತಾ ವಕ್ಖನ್ತಿ ‘ಗರುಕೋ ಖೋ, ಭಗಿನಿಯೋ [ಅಯ್ಯಾಯೋ (ಸೀ.)], ಸಙ್ಘಭೇದೋ ವುತ್ತೋ ಭಗವತಾ; ಮಾ ಭಗಿನೀನಂ [ಅಯ್ಯಾನಂ (ಸೀ.)] ಸಙ್ಘಭೇದೋ ರುಚ್ಚಿತ್ಥಾ’ತಿ. ಕರಿಸ್ಸನ್ತಿ ತಾಸಂ ವಚನಂ, ಸುಸ್ಸೂಸಿಸ್ಸನ್ತಿ, ಸೋತಂ ಓದಹಿಸ್ಸನ್ತೀ’’ತಿ, ಪಕ್ಕಮಿತಬ್ಬಂ. ಅನಾಪತ್ತಿ ವಸ್ಸಚ್ಛೇದಸ್ಸಾತಿ.

ಸಙ್ಘಭೇದೇ ಅನಾಪತ್ತಿವಸ್ಸಚ್ಛೇದವಾರೋ ನಿಟ್ಠಿತೋ.

೧೧೫. ವಜಾದೀಸು ವಸ್ಸೂಪಗಮನಂ

೨೦೩. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ವಜೇ ವಸ್ಸಂ ಉಪಗನ್ತುಕಾಮೋ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ವಜೇ ವಸ್ಸಂ ಉಪಗನ್ತುನ್ತಿ. ವಜೋ ವುಟ್ಠಾಸಿ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಯೇನ ವಜೋ ತೇನ ಗನ್ತುನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಉಪಕಟ್ಠಾಯ ವಸ್ಸೂಪನಾಯಿಕಾಯ ಸತ್ಥೇನ ಗನ್ತುಕಾಮೋ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಸತ್ಥೇ ವಸ್ಸಂ ಉಪಗನ್ತುನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಉಪಕಟ್ಠಾಯ ವಸ್ಸೂಪನಾಯಿಕಾಯ ನಾವಾಯ ಗನ್ತುಕಾಮೋ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ನಾವಾಯ ವಸ್ಸಂ ಉಪಗನ್ತುನ್ತಿ.

ವಜಾದೀಸು ವಸ್ಸೂಪಗಮನಂ ನಿಟ್ಠಿತಂ.

೧೧೬. ವಸ್ಸಂ ಅನುಪಗನ್ತಬ್ಬಟ್ಠಾನಾನಿ

೨೦೪. ತೇನ ಖೋ ಪನ ಸಮಯೇನ ಭಿಕ್ಖೂ ರುಕ್ಖಸುಸಿರೇ ವಸ್ಸಂ ಉಪಗಚ್ಛನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಸೇಯ್ಯಥಾಪಿ ಪಿಸಾಚಿಲ್ಲಿಕಾ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ರುಕ್ಖಸುಸಿರೇ ವಸ್ಸಂ ಉಪಗನ್ತಬ್ಬಂ. ಯೋ ಉಪಗಚ್ಛೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ರುಕ್ಖವಿಟಭಿಯಾ ವಸ್ಸಂ ಉಪಗಚ್ಛನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಸೇಯ್ಯಥಾಪಿ ಮಿಗಲುದ್ದಕಾ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ರುಕ್ಖವಿಟಭಿಯಾ ವಸ್ಸಂ ಉಪಗನ್ತಬ್ಬಂ. ಯೋ ಉಪಗಚ್ಛೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅಜ್ಝೋಕಾಸೇ ವಸ್ಸಂ ಉಪಗಚ್ಛನ್ತಿ. ದೇವೇ ವಸ್ಸನ್ತೇ ರುಕ್ಖಮೂಲಮ್ಪಿ ನಿಬ್ಬಕೋಸಮ್ಪಿ ಉಪಧಾವನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಅಜ್ಝೋಕಾಸೇ ವಸ್ಸಂ ಉಪಗನ್ತಬ್ಬಂ. ಯೋ ಉಪಗಚ್ಛೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅಸೇನಾಸನಿಕಾ ವಸ್ಸಂ ಉಪಗಚ್ಛನ್ತಿ. ಸೀತೇನಪಿ ಕಿಲಮನ್ತಿ, ಉಣ್ಹೇನಪಿ ಕಿಲಮನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಅಸೇನಾಸನಿಕೇನ ವಸ್ಸಂ ಉಪಗನ್ತಬ್ಬಂ. ಯೋ ಉಪಗಚ್ಛೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಛವಕುಟಿಕಾಯ ವಸ್ಸಂ ಉಪಗಚ್ಛನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಸೇಯ್ಯಥಾಪಿ ಛವಡಾಹಕಾ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಛವಕುಟಿಕಾಯ ವಸ್ಸಂ ಉಪಗನ್ತಬ್ಬಂ. ಯೋ ಉಪಗಚ್ಛೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಛತ್ತೇ ವಸ್ಸಂ ಉಪಗಚ್ಛನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಸೇಯ್ಯಥಾಪಿ ಗೋಪಾಲಕಾ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಛತ್ತೇ ವಸ್ಸಂ ಉಪಗನ್ತಬ್ಬಂ. ಯೋ ಉಪಗಚ್ಛೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಚಾಟಿಯಾ ವಸ್ಸಂ ಉಪಗಚ್ಛನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಸೇಯ್ಯಥಾಪಿ ತಿತ್ಥಿಯಾ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಚಾಟಿಯಾ ವಸ್ಸಂ ಉಪಗನ್ತಬ್ಬಂ. ಯೋ ಉಪಗಚ್ಛೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ವಸ್ಸಂ ಅನುಪಗನ್ತಬ್ಬಟ್ಠಾನಾನಿ ನಿಟ್ಠಿತಾ.

೧೧೭. ಅಧಮ್ಮಿಕಕತಿಕಾ

೨೦೫. ತೇನ ಖೋ ಪನ ಸಮಯೇನ ಸಾವತ್ಥಿಯಾ ಸಙ್ಘೇನ ಏವರೂಪಾ ಕತಿಕಾ ಕತಾ ಹೋತಿ – ಅನ್ತರಾವಸ್ಸಂ ನ ಪಬ್ಬಾಜೇತಬ್ಬನ್ತಿ. ವಿಸಾಖಾಯ ಮಿಗಾರಮಾತುಯಾ ನತ್ತಾ ಭಿಕ್ಖೂ ಉಪಸಙ್ಕಮಿತ್ವಾ ಪಬ್ಬಜ್ಜಂ ಯಾಚಿ. ಭಿಕ್ಖೂ ಏವಮಾಹಂಸು – ‘‘ಸಙ್ಘೇನ ಖೋ, ಆವುಸೋ, ಏವರೂಪಾ ಕತಿಕಾ ಕತಾ ‘ಅನ್ತರಾವಸ್ಸಂ ನ ಪಬ್ಬಾಜೇತಬ್ಬ’ನ್ತಿ. ಆಗಮೇಹಿ, ಆವುಸೋ, ಯಾವ ಭಿಕ್ಖೂ ವಸ್ಸಂ ವಸನ್ತಿ. ವಸ್ಸಂವುಟ್ಠಾ ಪಬ್ಬಾಜೇಸ್ಸನ್ತೀ’’ತಿ. ಅಥ ಖೋ ತೇ ಭಿಕ್ಖೂ ವಸ್ಸಂವುಟ್ಠಾ ವಿಸಾಖಾಯ ಮಿಗಾರಮಾತುಯಾ ನತ್ತಾರಂ ಏತದವೋಚುಂ – ‘‘ಏಹಿ, ದಾನಿ, ಆವುಸೋ, ಪಬ್ಬಜಾಹೀ’’ತಿ. ಸೋ ಏವಮಾಹ – ‘‘ಸಚಾಹಂ, ಭನ್ತೇ, ಪಬ್ಬಜಿತೋ ಅಸ್ಸಂ, ಅಭಿರಮೇಯ್ಯಾಮಹಂ [ಅಭಿರಮೇಯ್ಯಂ ಚಾಹಂ (ಸೀ.)]. ನ ದಾನಾಹಂ, ಭನ್ತೇ, ಪಬ್ಬಜಿಸ್ಸಾಮೀ’’ತಿ. ವಿಸಾಖಾ ಮಿಗಾರಮಾತಾ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಅಯ್ಯಾ ಏವರೂಪಂ ಕತಿಕಂ ಕರಿಸ್ಸನ್ತಿ ‘ನ ಅನ್ತರಾವಸ್ಸಂ ಪಬ್ಬಾಜೇತಬ್ಬ’ನ್ತಿ. ಕಂ ಕಾಲಂ ಧಮ್ಮೋ ನ ಚರಿತಬ್ಬೋ’’ತಿ? ಅಸ್ಸೋಸುಂ ಖೋ ಭಿಕ್ಖೂ ವಿಸಾಖಾಯ ಮಿಗಾರಮಾತುಯಾ ಉಜ್ಝಾಯನ್ತಿಯಾ ಖಿಯ್ಯನ್ತಿಯಾ ವಿಪಾಚೇನ್ತಿಯಾ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಏವರೂಪಾ ಕತಿಕಾ ಕಾತಬ್ಬಾ – ‘ನ ಅನ್ತರಾವಸ್ಸಂ ಪಬ್ಬಾಜೇತಬ್ಬ’ನ್ತಿ. ಯೋ ಕರೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ಅಧಮ್ಮಿಕಕತಿಕಾ ನಿಟ್ಠಿತಾ.

೧೧೮. ಪಟಿಸ್ಸವದುಕ್ಕಟಾಪತ್ತಿ

೨೦೬. ತೇನ ಖೋ ಪನ ಸಮಯೇನ ಆಯಸ್ಮತಾ ಉಪನನ್ದೇನ ಸಕ್ಯಪುತ್ತೇನ ರಞ್ಞೋ ಪಸೇನದಿಸ್ಸ ಕೋಸಲಸ್ಸ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪುರಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಅದ್ದಸ ಅನ್ತರಾಮಗ್ಗೇ ದ್ವೇ ಆವಾಸೇ ಬಹುಚೀವರಕೇ. ತಸ್ಸ ಏತದಹೋಸಿ – ‘‘ಯಂನೂನಾಹಂ ಇಮೇಸು ದ್ವೀಸು ಆವಾಸೇಸು ವಸ್ಸಂ ವಸೇಯ್ಯಂ. ಏವಂ ಮೇ ಬಹುಂ ಚೀವರಂ [ಬಹುಚೀವರಂ (ಕ.)] ಉಪ್ಪಜ್ಜಿಸ್ಸತೀ’’ತಿ. ಸೋ ತೇಸು ದ್ವೀಸು ಆವಾಸೇಸು ವಸ್ಸಂ ವಸಿ. ರಾಜಾ ಪಸೇನದಿ ಕೋಸಲೋ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಅಯ್ಯೋ ಉಪನನ್ದೋ ಸಕ್ಯಪುತ್ತೋ ಅಮ್ಹಾಕಂ ವಸ್ಸಾವಾಸಂ ಪಟಿಸ್ಸುಣಿತ್ವಾ ವಿಸಂವಾದೇಸ್ಸತಿ. ನನು ಭಗವತಾ ಅನೇಕಪರಿಯಾಯೇನ ಮುಸಾವಾದೋ ಗರಹಿತೋ, ಮುಸಾವಾದಾ ವೇರಮಣೀ ಪಸತ್ಥಾ’’ತಿ. ಅಸ್ಸೋಸುಂ ಖೋ ಭಿಕ್ಖೂ ರಞ್ಞೋ ಪಸೇನದಿಸ್ಸ ಕೋಸಲಸ್ಸ ಉಜ್ಝಾಯನ್ತಸ್ಸ ಖಿಯ್ಯನ್ತಸ್ಸ ವಿಪಾಚೇನ್ತಸ್ಸ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಯಸ್ಮಾ ಉಪನನ್ದೋ ಸಕ್ಯಪುತ್ತೋ ರಞ್ಞೋ ಪಸೇನದಿಸ್ಸ ಕೋಸಲಸ್ಸ ವಸ್ಸಾವಾಸಂ ಪಟಿಸ್ಸುಣಿತ್ವಾ ವಿಸಂವಾದೇಸ್ಸತಿ. ನನು ಭಗವತಾ ಅನೇಕಪರಿಯಾಯೇನ ಮುಸಾವಾದೋ ಗರಹಿತೋ, ಮುಸಾವಾದಾ ವೇರಮಣೀ ಪಸತ್ಥಾ’’ತಿ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಆಯಸ್ಮನ್ತಂ ಉಪನನ್ದಂ ಸಕ್ಯಪುತ್ತಂ ಪಟಿಪುಚ್ಛಿ – ‘‘ಸಚ್ಚಂ ಕಿರ ತ್ವಂ, ಉಪನನ್ದ, ರಞ್ಞೋ ಪಸೇನದಿಸ್ಸ ಕೋಸಲಸ್ಸ ವಸ್ಸಾವಾಸಂ ಪಟಿಸ್ಸುಣಿತ್ವಾ ವಿಸಂವಾದೇಸೀ’’ತಿ? ‘‘ಸಚ್ಚಂ, ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ರಞ್ಞೋ ಪಸೇನದಿಸ್ಸ ಕೋಸಲಸ್ಸ ವಸ್ಸಾವಾಸಂ ಪಟಿಸ್ಸುಣಿತ್ವಾ ವಿಸಂವಾದೇಸ್ಸಸಿ. ನನು ಮಯಾ, ಮೋಘಪುರಿಸ, ಅನೇಕಪರಿಯಾಯೇನ ಮುಸಾವಾದೋ ಗರಹಿತೋ, ಮುಸಾವಾದಾ ವೇರಮಣೀ ಪಸತ್ಥಾ. ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –

೨೦೭. ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪುರಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಪಸ್ಸತಿ ಅನ್ತರಾಮಗ್ಗೇ ದ್ವೇ ಆವಾಸೇ ಬಹುಚೀವರಕೇ. ತಸ್ಸ ಏವಂ ಹೋತಿ – ‘‘ಯಂನೂನಾಹಂ ಇಮೇಸು ದ್ವೀಸು ಆವಾಸೇಸು ವಸ್ಸಂ ವಸೇಯ್ಯಂ. ಏವಂ ಮೇ ಬಹುಂ ಚೀವರಂ ಉಪ್ಪಜ್ಜಿಸ್ಸತೀ’’ತಿ. ಸೋ ತೇಸು ದ್ವೀಸು ಆವಾಸೇಸು ವಸ್ಸಂ ವಸತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪುರಿಮಿಕಾ ಚ ನ ಪಞ್ಞಾಯತಿ, ಪಟಿಸ್ಸವೇ ಚ ಆಪತ್ತಿ ದುಕ್ಕಟಸ್ಸ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪುರಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಬಹಿದ್ಧಾ ಉಪೋಸಥಂ ಕರೋತಿ, ಪಾಟಿಪದೇ [ಪಾಟಿಪದೇನ (ಕ.)] ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ತದಹೇವ ಅಕರಣೀಯೋ ಪಕ್ಕಮತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪುರಿಮಿಕಾ ಚ ನ ಪಞ್ಞಾಯತಿ, ಪಟಿಸ್ಸವೇ ಚ ಆಪತ್ತಿ ದುಕ್ಕಟಸ್ಸ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪುರಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಬಹಿದ್ಧಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ತದಹೇವ ಸಕರಣೀಯೋ ಪಕ್ಕಮತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪುರಿಮಿಕಾ ಚ ನ ಪಞ್ಞಾಯತಿ, ಪಟಿಸ್ಸವೇ ಚ ಆಪತ್ತಿ ದುಕ್ಕಟಸ್ಸ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪುರಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಬಹಿದ್ಧಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ದ್ವೀಹತೀಹಂ ವಸಿತ್ವಾ ಅಕರಣೀಯೋ ಪಕ್ಕಮತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪುರಿಮಿಕಾ ಚ ನ ಪಞ್ಞಾಯತಿ, ಪಟಿಸ್ಸವೇ ಚ ಆಪತ್ತಿ ದುಕ್ಕಟಸ್ಸ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪುರಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಬಹಿದ್ಧಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ದ್ವೀಹತೀಹಂ ವಸಿತ್ವಾ ಸಕರಣೀಯೋ ಪಕ್ಕಮತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪುರಿಮಿಕಾ ಚ ನ ಪಞ್ಞಾಯತಿ, ಪಟಿಸ್ಸವೇ ಚ ಆಪತ್ತಿ ದುಕ್ಕಟಸ್ಸ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪುರಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಬಹಿದ್ಧಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ದ್ವೀಹತೀಹಂ ವಸಿತ್ವಾ ಸತ್ತಾಹಕರಣೀಯೇನ ಪಕ್ಕಮತಿ. ಸೋ ತಂ ಸತ್ತಾಹಂ ಬಹಿದ್ಧಾ ವೀತಿನಾಮೇತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪುರಿಮಿಕಾ ಚ ನ ಪಞ್ಞಾಯತಿ, ಪಟಿಸ್ಸವೇ ಚ ಆಪತ್ತಿ ದುಕ್ಕಟಸ್ಸ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪುರಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಬಹಿದ್ಧಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ದ್ವೀಹತೀಹಂ ವಸಿತ್ವಾ ಸತ್ತಾಹಕರಣೀಯೇನ ಪಕ್ಕಮತಿ. ಸೋ ತಂ ಸತ್ತಾಹಂ ಅನ್ತೋ ಸನ್ನಿವತ್ತಂ ಕರೋತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪುರಿಮಿಕಾ ಚ ಪಞ್ಞಾಯತಿ, ಪಟಿಸ್ಸವೇ ಚ ಅನಾಪತ್ತಿ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪುರಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಬಹಿದ್ಧಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ಸತ್ತಾಹಂ ಅನಾಗತಾಯ ಪವಾರಣಾಯ ಸಕರಣೀಯೋ ಪಕ್ಕಮತಿ. ಆಗಚ್ಛೇಯ್ಯ ವಾ ಸೋ, ಭಿಕ್ಖವೇ, ಭಿಕ್ಖು ತಂ ಆವಾಸಂ ನ ವಾ ಆಗಚ್ಛೇಯ್ಯ, ತಸ್ಸ, ಭಿಕ್ಖವೇ, ಭಿಕ್ಖುನೋ ಪುರಿಮಿಕಾ ಚ ಪಞ್ಞಾಯತಿ, ಪಟಿಸ್ಸವೇ ಚ ಅನಾಪತ್ತಿ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪುರಿಮಿಕಾಯ. ಸೋ ತಂ ಆವಾಸಂ ಗನ್ತ್ವಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ತದಹೇವ ಸಕರಣೀಯೋ ಪಕ್ಕಮತಿ…ಪೇ… ಸೋ ದ್ವೀಹತೀಹಂ ವಸಿತ್ವಾ ಅಕರಣೀಯೋ ಪಕ್ಕಮತಿ…ಪೇ… ಸೋ ದ್ವೀಹತೀಹಂ ವಸಿತ್ವಾ ಸಕರಣೀಯೋ ಪಕ್ಕಮತಿ…ಪೇ… ಸೋ ದ್ವೀಹತೀಹಂ ವಸಿತ್ವಾ ಸತ್ತಾಹಕರಣೀಯೇನ ಪಕ್ಕಮತಿ. ಸೋ ತಂ ಸತ್ತಾಹಂ ಬಹಿದ್ಧಾ ವೀತಿನಾಮೇತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪುರಿಮಿಕಾ ಚ ನ ಪಞ್ಞಾಯತಿ, ಪಟಿಸ್ಸವೇ ಚ ಆಪತ್ತಿ ದುಕ್ಕಟಸ್ಸ…ಪೇ… ಸೋ ದ್ವೀಹತೀಹಂ ವಸಿತ್ವಾ ಸತ್ತಾಹಕರಣೀಯೇನ ಪಕ್ಕಮತಿ. ಸೋ ತಂ ಸತ್ತಾಹಂ ಅನ್ತೋ ಸನ್ನಿವತ್ತಂ ಕರೋತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪುರಿಮಿಕಾ ಚ ಪಞ್ಞಾಯತಿ, ಪಟಿಸ್ಸವೇ ಚ ಅನಾಪತ್ತಿ…ಪೇ… ಸೋ ಸತ್ತಾಹಂ ಅನಾಗತಾಯ ಪವಾರಣಾಯ ಸಕರಣೀಯೋ ಪಕ್ಕಮತಿ. ಆಗಚ್ಛೇಯ್ಯ ವಾ ಸೋ, ಭಿಕ್ಖವೇ, ಭಿಕ್ಖು ತಂ ಆವಾಸಂ ನ ವಾ ಆಗಚ್ಛೇಯ್ಯ, ತಸ್ಸ, ಭಿಕ್ಖವೇ, ಭಿಕ್ಖುನೋ ಪುರಿಮಿಕಾ ಚ ಪಞ್ಞಾಯತಿ, ಪಟಿಸ್ಸವೇ ಚ ಅನಾಪತ್ತಿ.

೨೦೮. ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪಚ್ಛಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಬಹಿದ್ಧಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ತದಹೇವ ಅಕರಣೀಯೋ ಪಕ್ಕಮತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪಚ್ಛಿಮಿಕಾ ಚ ನ ಪಞ್ಞಾಯತಿ, ಪಟಿಸ್ಸವೇ ಚ ಆಪತ್ತಿ ದುಕ್ಕಟಸ್ಸ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪಚ್ಛಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಬಹಿದ್ಧಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ತದಹೇವ ಸಕರಣೀಯೋ ಪಕ್ಕಮತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪಚ್ಛಿಮಿಕಾ ಚ ನ ಪಞ್ಞಾಯತಿ, ಪಟಿಸ್ಸವೇ ಚ ಆಪತ್ತಿ ದುಕ್ಕಟಸ್ಸ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪಚ್ಛಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಬಹಿದ್ಧಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ದ್ವೀಹತೀಹಂ ವಸಿತ್ವಾ ಅಕರಣೀಯೋ ಪಕ್ಕಮತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪಚ್ಛಿಮಿಕಾ ಚ ನ ಪಞ್ಞಾಯತಿ, ಪಟಿಸ್ಸವೇ ಚ ಆಪತ್ತಿ ದುಕ್ಕಟಸ್ಸ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪಚ್ಛಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಬಹಿದ್ಧಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ದ್ವೀಹತೀಹಂ ವಸಿತ್ವಾ ಸಕರಣೀಯೋ ಪಕ್ಕಮತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪಚ್ಛಿಮಿಕಾ ಚ ನ ಪಞ್ಞಾಯತಿ, ಪಟಿಸ್ಸವೇ ಚ ಆಪತ್ತಿ ದುಕ್ಕಟಸ್ಸ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪಚ್ಛಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಬಹಿದ್ಧಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ದ್ವೀಹತೀಹಂ ವಸಿತ್ವಾ ಸತ್ತಾಹಕರಣೀಯೇನ ಪಕ್ಕಮತಿ. ಸೋ ತಂ ಸತ್ತಾಹಂ ಬಹಿದ್ಧಾ ವೀತಿನಾಮೇತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪಚ್ಛಿಮಿಕಾ ಚ ನ ಪಞ್ಞಾಯತಿ, ಪಟಿಸ್ಸವೇ ಚ ಆಪತ್ತಿ ದುಕ್ಕಟಸ್ಸ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪಚ್ಛಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಬಹಿದ್ಧಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ದ್ವೀಹತೀಹಂ ವಸಿತ್ವಾ ಸತ್ತಾಹಕರಣೀಯೇನ ಪಕ್ಕಮತಿ. ಸೋ ತಂ ಸತ್ತಾಹಂ ಅನ್ತೋ ಸನ್ನಿವತ್ತಂ ಕರೋತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪಚ್ಛಿಮಿಕಾ ಚ ಪಞ್ಞಾಯತಿ, ಪಟಿಸ್ಸವೇ ಚ ಅನಾಪತ್ತಿ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪಚ್ಛಿಮಿಕಾಯ. ಸೋ ತಂ ಆವಾಸಂ ಗಚ್ಛನ್ತೋ ಬಹಿದ್ಧಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ಸತ್ತಾಹಂ ಅನಾಗತಾಯ ಕೋಮುದಿಯಾ ಚಾತುಮಾಸಿನಿಯಾ ಸಕರಣೀಯೋ ಪಕ್ಕಮತಿ. ಆಗಚ್ಛೇಯ್ಯ ವಾ ಸೋ, ಭಿಕ್ಖವೇ, ಭಿಕ್ಖು ತಂ ಆವಾಸಂ ನ ವಾ ಆಗಚ್ಛೇಯ್ಯ, ತಸ್ಸ, ಭಿಕ್ಖವೇ, ಭಿಕ್ಖುನೋ ಪಚ್ಛಿಮಿಕಾ ಚ ಪಞ್ಞಾಯತಿ, ಪಟಿಸ್ಸವೇ ಚ ಅನಾಪತ್ತಿ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪಚ್ಛಿಮಿಕಾಯ. ಸೋ ತಂ ಆವಾಸಂ ಗನ್ತ್ವಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ತದಹೇವ ಸಕರಣೀಯೋ ಪಕ್ಕಮತಿ…ಪೇ… ಸೋ ದ್ವೀಹತೀಹಂ ವಸಿತ್ವಾ ಅಕರಣೀಯೋ ಪಕ್ಕಮತಿ …ಪೇ… ಸೋ ದ್ವೀಹತೀಹಂ ವಸಿತ್ವಾ ಸಕರಣೀಯೋ ಪಕ್ಕಮತಿ…ಪೇ… ಸೋ ದ್ವೀಹತೀಹಂ ವಸಿತ್ವಾ ಸತ್ತಾಹಕರಣೀಯೇನ ಪಕ್ಕಮತಿ. ಸೋ ತಂ ಸತ್ತಾಹಂ ಬಹಿದ್ಧಾ ವೀತಿನಾಮೇತಿ. ತಸ್ಸ, ಭಿಕ್ಖವೇ, ಭಿಕ್ಖುನೋ ಪಚ್ಛಿಮಿಕಾ ಚ ನ ಪಞ್ಞಾಯತಿ, ಪಟಿಸ್ಸವೇ ಚ ಆಪತ್ತಿ ದುಕ್ಕಟಸ್ಸ…ಪೇ… ಸೋ ದ್ವೀಹತೀಹಂ ವಸಿತ್ವಾ ಸತ್ತಾಹಕರಣೀಯೇನ ಪಕ್ಕಮತಿ. ಸೋ ತಂ ಸತ್ತಾಹಂ ಅನ್ತೋ ಸನ್ನಿವತ್ತಂ ಕರೋತಿ. ತಸ್ಸ ಭಿಕ್ಖವೇ, ಭಿಕ್ಖುನೋ ಪಚ್ಛಿಮಿಕಾ ಚ ಪಞ್ಞಾಯತಿ, ಪಟಿಸ್ಸವೇ ಚ ಅನಾಪತ್ತಿ.

ಇಧ ಪನ, ಭಿಕ್ಖವೇ, ಭಿಕ್ಖುನಾ ವಸ್ಸಾವಾಸೋ ಪಟಿಸ್ಸುತೋ ಹೋತಿ ಪಚ್ಛಿಮಿಕಾಯ. ಸೋ ತಂ ಆವಾಸಂ ಗನ್ತ್ವಾ ಉಪೋಸಥಂ ಕರೋತಿ, ಪಾಟಿಪದೇ ವಿಹಾರಂ ಉಪೇತಿ, ಸೇನಾಸನಂ ಪಞ್ಞಪೇತಿ, ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತಿ, ಪರಿವೇಣಂ ಸಮ್ಮಜ್ಜತಿ. ಸೋ ಸತ್ತಾಹಂ ಅನಾಗತಾಯ ಕೋಮುದಿಯಾ ಚಾತುಮಾಸಿನಿಯಾ ಸಕರಣೀಯೋ ಪಕ್ಕಮತಿ. ಆಗಚ್ಛೇಯ್ಯ ವಾ ಸೋ, ಭಿಕ್ಖವೇ, ಭಿಕ್ಖು ತಂ ಆವಾಸಂ ನ ವಾ ಆಗಚ್ಛೇಯ್ಯ, ತಸ್ಸ, ಭಿಕ್ಖವೇ, ಭಿಕ್ಖುನೋ ಪಚ್ಛಿಮಿಕಾ ಚ ಪಞ್ಞಾಯತಿ, ಪಟಿಸ್ಸವೇ ಚ ಅನಾಪತ್ತೀತಿ.

ಪಟಿಸ್ಸವದುಕ್ಕಟಾಪತ್ತಿ ನಿಟ್ಠಿತಾ.

ವಸ್ಸೂಪನಾಯಿಕಕ್ಖನ್ಧಕೋ ತತಿಯೋ.

೧೧೯. ತಸ್ಸುದ್ದಾನಂ

ಉಪಗನ್ತುಂ ಕದಾ ಚೇವ, ಕತಿ ಅನ್ತರಾವಸ್ಸ ಚ;

ನ ಇಚ್ಛನ್ತಿ ಚ ಸಞ್ಚಿಚ್ಚ, ಉಕ್ಕಡ್ಢಿತುಂ ಉಪಾಸಕೋ.

ಗಿಲಾನೋ ಮಾತಾ ಚ ಪಿತಾ, ಭಾತಾ ಚ ಅಥ ಞಾತಕೋ;

ಭಿಕ್ಖುಗತಿಕೋ ವಿಹಾರೋ, ವಾಳಾ ಚಾಪಿ ಸರೀಸಪಾ.