೯೧. ಸಙ್ಘುಪೋಸಥಾದಿಪ್ಪಭೇದಂ

೧೬೮. ತೇನ ಖೋ ಪನ ಸಮಯೇನ ಅಞ್ಞತರಸ್ಮಿಂ ಆವಾಸೇ ತದಹುಪೋಸಥೇ ಚತ್ತಾರೋ ಭಿಕ್ಖೂ ವಿಹರನ್ತಿ. ಅಥ ಖೋ ತೇಸಂ ಭಿಕ್ಖೂನಂ ಏತದಹೋಸಿ – ‘‘ಭಗವತಾ ಪಞ್ಞತ್ತಂ ‘ಉಪೋಸಥೋ ಕಾತಬ್ಬೋ’ತಿ, ಮಯಞ್ಚಮ್ಹಾ ಚತ್ತಾರೋ ಜನಾ, ಕಥಂ ನು ಖೋ ಅಮ್ಹೇಹಿ ಉಪೋಸಥೋ ಕಾತಬ್ಬೋ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಚತುನ್ನಂ ಪಾತಿಮೋಕ್ಖಂ ಉದ್ದಿಸಿತುನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರಸ್ಮಿಂ ಆವಾಸೇ ತದಹುಪೋಸಥೇ ತಯೋ ಭಿಕ್ಖೂ ವಿಹರನ್ತಿ. ಅಥ ಖೋ ತೇಸಂ ಭಿಕ್ಖೂನಂ ಏತದಹೋಸಿ – ‘‘ಭಗವತಾ ಅನುಞ್ಞಾತಂ ಚತುನ್ನಂ ಪಾತಿಮೋಕ್ಖಂ ಉದ್ದಿಸಿತುಂ, ಮಯಞ್ಚಮ್ಹಾ ತಯೋ ಜನಾ, ಕಥಂ ನು ಖೋ ಅಮ್ಹೇಹಿ ಉಪೋಸಥೋ ಕಾತಬ್ಬೋ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ತಿಣ್ಣಂ ಪಾರಿಸುದ್ಧಿಉಪೋಸಥಂ ಕಾತುಂ. ಏವಞ್ಚ ಪನ, ಭಿಕ್ಖವೇ, ಕಾತಬ್ಬೋ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ತೇ ಭಿಕ್ಖೂ ಞಾಪೇತಬ್ಬಾ –

‘‘ಸುಣನ್ತು ಮೇ ಆಯಸ್ಮನ್ತಾ. ಅಜ್ಜುಪೋಸಥೋ ಪನ್ನರಸೋ. ಯದಾಯಸ್ಮನ್ತಾನಂ ಪತ್ತಕಲ್ಲಂ, ಮಯಂ ಅಞ್ಞಮಞ್ಞಂ ಪಾರಿಸುದ್ಧಿಉಪೋಸಥಂ ಕರೇಯ್ಯಾಮಾ’’ತಿ.

ಥೇರೇನ ಭಿಕ್ಖುನಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ತೇ ಭಿಕ್ಖೂ ಏವಮಸ್ಸು ವಚನೀಯಾ – ‘‘ಪರಿಸುದ್ಧೋ ಅಹಂ, ಆವುಸೋ; ಪರಿಸುದ್ಧೋತಿ ಮಂ ಧಾರೇಥ. ಪರಿಸುದ್ಧೋ ಅಹಂ, ಆವುಸೋ; ಪರಿಸುದ್ಧೋತಿ ಮಂ ಧಾರೇಥ. ಪರಿಸುದ್ಧೋ ಅಹಂ, ಆವುಸೋ; ಪರಿಸುದ್ಧೋತಿ ಮಂ ಧಾರೇಥಾ’’ತಿ.

ನವಕೇನ ಭಿಕ್ಖುನಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ತೇ ಭಿಕ್ಖೂ ಏವಮಸ್ಸು ವಚನೀಯಾ – ‘‘ಪರಿಸುದ್ಧೋ ಅಹಂ, ಭನ್ತೇ; ಪರಿಸುದ್ಧೋತಿ ಮಂ ಧಾರೇಥ. ಪರಿಸುದ್ಧೋ ಅಹಂ, ಭನ್ತೇ; ಪರಿಸುದ್ಧೋತಿ ಮಂ ಧಾರೇಥ. ಪರಿಸುದ್ಧೋ ಅಹಂ, ಭನ್ತೇ; ಪರಿಸುದ್ಧೋತಿ ಮಂ ಧಾರೇಥಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರಸ್ಮಿಂ ಆವಾಸೇ ತದಹುಪೋಸಥೇ ದ್ವೇ ಭಿಕ್ಖೂ ವಿಹರನ್ತಿ. ಅಥ ಖೋ ತೇಸಂ ಭಿಕ್ಖೂನಂ ಏತದಹೋಸಿ – ‘‘ಭಗವತಾ ಅನುಞ್ಞಾತಂ ಚತುನ್ನಂ ಪಾತಿಮೋಕ್ಖಂ ಉದ್ದಿಸಿತುಂ, ತಿಣ್ಣನ್ನಂ ಪಾರಿಸುದ್ಧಿಉಪೋಸಥಂ ಕಾತುಂ. ಮಯಞ್ಚಮ್ಹಾ ದ್ವೇ ಜನಾ. ಕಥಂ ನು ಖೋ ಅಮ್ಹೇಹಿ ಉಪೋಸಥೋ ಕಾತಬ್ಬೋ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ದ್ವಿನ್ನಂ ಪಾರಿಸುದ್ಧಿಉಪೋಸಥಂ ಕಾತುಂ. ಏವಞ್ಚ ಪನ, ಭಿಕ್ಖವೇ, ಕಾತಬ್ಬೋ. ಥೇರೇನ ಭಿಕ್ಖುನಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ನವೋ ಭಿಕ್ಖು ಏವಮಸ್ಸ ವಚನೀಯೋ – ‘‘ಪರಿಸುದ್ಧೋ ಅಹಂ, ಆವುಸೋ; ಪರಿಸುದ್ಧೋತಿ ಮಂ ಧಾರೇಹಿ. ಪರಿಸುದ್ಧೋ ಅಹಂ, ಆವುಸೋ; ಪರಿಸುದ್ಧೋತಿ ಮಂ ಧಾರೇಹಿ. ಪರಿಸುದ್ಧೋ ಅಹಂ, ಆವುಸೋ; ಪರಿಸುದ್ಧೋತಿ ಮಂ ಧಾರೇಹೀ’’ತಿ.

ನವಕೇನ ಭಿಕ್ಖುನಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಥೇರೋ ಭಿಕ್ಖು ಏವಮಸ್ಸ ವಚನೀಯೋ – ‘‘ಪರಿಸುದ್ಧೋ ಅಹಂ, ಭನ್ತೇ; ಪರಿಸುದ್ಧೋತಿ ಮಂ ಧಾರೇಥ. ಪರಿಸುದ್ಧೋ ಅಹಂ, ಭನ್ತೇ; ಪರಿಸುದ್ಧೋತಿ ಮಂ ಧಾರೇಥ. ಪರಿಸುದ್ಧೋ ಅಹಂ, ಭನ್ತೇ; ಪರಿಸುದ್ಧೋತಿ ಮಂ ಧಾರೇಥಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರಸ್ಮಿಂ ಆವಾಸೇ ತದಹುಪೋಸಥೇ ಏಕೋ ಭಿಕ್ಖು ವಿಹರತಿ. ಅಥ ಖೋ ತಸ್ಸ ಭಿಕ್ಖುನೋ ಏತದಹೋಸಿ – ‘‘ಭಗವತಾ ಅನುಞ್ಞಾತಂ ಚತುನ್ನಂ ಪಾತಿಮೋಕ್ಖಂ ಉದ್ದಿಸಿತುಂ, ತಿಣ್ಣನ್ನಂ ಪಾರಿಸುದ್ಧಿಉಪೋಸಥಂ ಕಾತುಂ, ದ್ವಿನ್ನಂ ಪಾರಿಸುದ್ಧಿಉಪೋಸಥಂ ಕಾತುಂ. ಅಹಞ್ಚಮ್ಹಿ ಏಕಕೋ. ಕಥಂ ನು ಖೋ ಮಯಾ ಉಪೋಸಥೋ ಕಾತಬ್ಬೋ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ಇಧ ಪನ, ಭಿಕ್ಖವೇ, ಅಞ್ಞತರಸ್ಮಿಂ ಆವಾಸೇ ತದಹುಪೋಸಥೇ ಏಕೋ ಭಿಕ್ಖು ವಿಹರತಿ. ತೇನ, ಭಿಕ್ಖವೇ, ಭಿಕ್ಖುನಾ ಯತ್ಥ ಭಿಕ್ಖೂ ಪಟಿಕ್ಕಮನ್ತಿ ಉಪಟ್ಠಾನಸಾಲಾಯ ವಾ, ಮಣ್ಡಪೇ ವಾ, ರುಕ್ಖಮೂಲೇ ವಾ, ಸೋ ದೇಸೋ ಸಮ್ಮಜ್ಜಿತ್ವಾ ಪಾನೀಯಂ ಪರಿಭೋಜನೀಯಂ ಉಪಟ್ಠಾಪೇತ್ವಾ ಆಸನಂ ಪಞ್ಞಪೇತ್ವಾ ಪದೀಪಂ ಕತ್ವಾ ನಿಸೀದಿತಬ್ಬಂ. ಸಚೇ ಅಞ್ಞೇ ಭಿಕ್ಖೂ ಆಗಚ್ಛನ್ತಿ, ತೇಹಿ ಸದ್ಧಿಂ ಉಪೋಸಥೋ ಕಾತಬ್ಬೋ. ನೋ ಚೇ ಆಗಚ್ಛನ್ತಿ, ಅಜ್ಜ ಮೇ ಉಪೋಸಥೋತಿ ಅಧಿಟ್ಠಾತಬ್ಬೋ. ನೋ ಚೇ ಅಧಿಟ್ಠಹೇಯ್ಯ, ಆಪತ್ತಿ ದುಕ್ಕಟಸ್ಸ.

ತತ್ರ, ಭಿಕ್ಖವೇ, ಯತ್ಥ ಚತ್ತಾರೋ ಭಿಕ್ಖೂ ವಿಹರನ್ತಿ, ನ ಏಕಸ್ಸ ಪಾರಿಸುದ್ಧಿಂ ಆಹರಿತ್ವಾ ತೀಹಿ ಪಾತಿಮೋಕ್ಖಂ ಉದ್ದಿಸಿತಬ್ಬಂ. ಉದ್ದಿಸೇಯ್ಯುಂ ಚೇ, ಆಪತ್ತಿ ದುಕ್ಕಟಸ್ಸ. ತತ್ರ, ಭಿಕ್ಖವೇ, ಯತ್ಥ ತಯೋ ಭಿಕ್ಖೂ ವಿಹರನ್ತಿ, ನ ಏಕಸ್ಸ ಪಾರಿಸುದ್ಧಿಂ ಆಹರಿತ್ವಾ ದ್ವೀಹಿ ಪಾರಿಸುದ್ಧಿಉಪೋಸಥೋ ಕಾತಬ್ಬೋ. ಕರೇಯ್ಯುಂ ಚೇ, ಆಪತ್ತಿ ದುಕ್ಕಟಸ್ಸ. ತತ್ರ, ಭಿಕ್ಖವೇ, ಯತ್ಥ ದ್ವೇ ಭಿಕ್ಖೂ ವಿಹರನ್ತಿ, ನ ಏಕಸ್ಸ ಪಾರಿಸುದ್ಧಿಂ ಆಹರಿತ್ವಾ ಏಕೇನ ಅಧಿಟ್ಠಾತಬ್ಬೋ. ಅಧಿಟ್ಠಹೇಯ್ಯ ಚೇ, ಆಪತ್ತಿ ದುಕ್ಕಟಸ್ಸಾತಿ.