೮೯. ಞಾತಕಾದಿಗ್ಗಹಣಕಥಾ

೧೬೬. ತೇನ ಖೋ ಪನ ಸಮಯೇನ ಅಞ್ಞತರಂ ಭಿಕ್ಖುಂ ತದಹುಪೋಸಥೇ ಞಾತಕಾ ಗಣ್ಹಿಂಸುಂ. ಭಗವತೋ ಏತಮತ್ಥಂ ಆರೋಚೇಸುಂ.

ಇಧ ಪನ, ಭಿಕ್ಖವೇ, ಭಿಕ್ಖುಂ ತದಹುಪೋಸಥೇ ಞಾತಕಾ ಗಣ್ಹನ್ತಿ. ತೇ ಞಾತಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಇಮಂ ಭಿಕ್ಖುಂ ಮುಹುತ್ತಂ ಮುಞ್ಚಥ, ಯಾವಾಯಂ ಭಿಕ್ಖು ಉಪೋಸಥಂ ಕರೋತೀ’’ತಿ. ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ. ನೋ ಚೇ ಲಭೇಥ, ತೇ ಞಾತಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಮುಹುತ್ತಂ ಏಕಮನ್ತಂ ಹೋಥ, ಯಾವಾಯಂ ಭಿಕ್ಖು ಪಾರಿಸುದ್ಧಿಂ ದೇತೀ’’ತಿ. ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ. ನೋ ಚೇ ಲಭೇಥ, ತೇ ಞಾತಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಇಮಂ ಭಿಕ್ಖುಂ ಮುಹುತ್ತಂ ನಿಸ್ಸೀಮಂ ನೇಥ, ಯಾವ ಸಙ್ಘೋ ಉಪೋಸಥಂ ಕರೋತೀ’’ತಿ. ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ. ನೋ ಚೇ ಲಭೇಥ, ನ ತ್ವೇವ ವಗ್ಗೇನ ಸಙ್ಘೇನ ಉಪೋಸಥೋ ಕಾತಬ್ಬೋ. ಕರೇಯ್ಯ ಚೇ, ಆಪತ್ತಿ ದುಕ್ಕಟಸ್ಸ.

ಇಧ ಪನ, ಭಿಕ್ಖವೇ, ಭಿಕ್ಖುಂ ತದಹುಪೋಸಥೇ ರಾಜಾನೋ ಗಣ್ಹನ್ತಿ,…ಪೇ… ಚೋರಾ ಗಣ್ಹನ್ತಿ – ಧುತ್ತಾ ಗಣ್ಹನ್ತಿ – ಭಿಕ್ಖುಪಚ್ಚತ್ಥಿಕಾ ಗಣ್ಹನ್ತಿ, ತೇ ಭಿಕ್ಖುಪಚ್ಚತ್ಥಿಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಇಮಂ ಭಿಕ್ಖುಂ ಮುಹುತ್ತಂ ಮುಞ್ಚಥ, ಯಾವಾಯಂ ಭಿಕ್ಖು ಉಪೋಸಥಂ ಕರೋತೀ’’ತಿ. ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ. ನೋ ಚೇ ಲಭೇಥ, ತೇ ಭಿಕ್ಖುಪಚ್ಚತ್ಥಿಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಮುಹುತ್ತಂ ಏಕಮನ್ತಂ ಹೋಥ, ಯಾವಾಯಂ ಭಿಕ್ಖು ಪಾರಿಸುದ್ಧಿಂ ದೇತೀ’’ತಿ. ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ. ನೋ ಚೇ ಲಭೇಥ, ತೇ ಭಿಕ್ಖುಪಚ್ಚತ್ಥಿಕಾ ಭಿಕ್ಖೂಹಿ ಏವಮಸ್ಸು ವಚನೀಯಾ – ‘‘ಇಙ್ಘ, ತುಮ್ಹೇ ಆಯಸ್ಮನ್ತೋ ಇಮಂ ಭಿಕ್ಖುಂ ಮುಹುತ್ತಂ ನಿಸ್ಸೀಮಂ ನೇಥ, ಯಾವ ಸಙ್ಘೋ ಉಪೋಸಥಂ ಕರೋತೀ’’ತಿ. ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ. ನೋ ಚೇ ಲಭೇಥ, ನ ತ್ವೇವ ವಗ್ಗೇನ ಸಙ್ಘೇನ ಉಪೋಸಥೋ ಕಾತಬ್ಬೋ. ಕರೇಯ್ಯ ಚೇ, ಆಪತ್ತಿ ದುಕ್ಕಟಸ್ಸಾತಿ.