೮೭. ಪಾರಿಸುದ್ಧಿದಾನಕಥಾ

೧೬೪. ಅಥ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ಸನ್ನಿಪತಥ, ಭಿಕ್ಖವೇ, ಸಙ್ಘೋ ಉಪೋಸಥಂ ಕರಿಸ್ಸತೀ’’ತಿ. ಏವಂ ವುತ್ತೇ ಅಞ್ಞತರೋ ಭಿಕ್ಖು ಭಗವನ್ತಂ ಏತದವೋಚ – ‘‘ಅತ್ಥಿ, ಭನ್ತೇ, ಭಿಕ್ಖು ಗಿಲಾನೋ, ಸೋ ಅನಾಗತೋ’’ತಿ. ಅನುಜಾನಾಮಿ, ಭಿಕ್ಖವೇ, ಗಿಲಾನೇನ ಭಿಕ್ಖುನಾ ಪಾರಿಸುದ್ಧಿಂ ದಾತುಂ. ಏವಞ್ಚ ಪನ, ಭಿಕ್ಖವೇ, ದಾತಬ್ಬಾ – ತೇನ ಗಿಲಾನೇನ ಭಿಕ್ಖುನಾ ಏಕಂ ಭಿಕ್ಖುಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘‘ಪಾರಿಸುದ್ಧಿಂ ದಮ್ಮಿ, ಪಾರಿಸುದ್ಧಿಂ ಮೇ ಹರ, ಪಾರಿಸುದ್ಧಿಂ ಮೇ ಆರೋಚೇಹೀ’’ತಿ. ಕಾಯೇನ ವಿಞ್ಞಾಪೇತಿ, ವಾಚಾಯ ವಿಞ್ಞಾಪೇತಿ, ಕಾಯೇನ ವಾಚಾಯ ವಿಞ್ಞಾಪೇತಿ, ದಿನ್ನಾ ಹೋತಿ ಪಾರಿಸುದ್ಧಿ. ನ ಕಾಯೇನ ವಿಞ್ಞಾಪೇತಿ, ನ ವಾಚಾಯ ವಿಞ್ಞಾಪೇತಿ, ನ ಕಾಯೇನ ವಾಚಾಯ ವಿಞ್ಞಾಪೇತಿ, ನ ದಿನ್ನಾ ಹೋತಿ ಪಾರಿಸುದ್ಧಿ. ಏವಞ್ಚೇತಂ ಲಭೇಥ, ಇಚ್ಚೇತಂ ಕುಸಲಂ. ನೋ ಚೇ ಲಭೇಥ, ಸೋ, ಭಿಕ್ಖವೇ, ಗಿಲಾನೋ ಭಿಕ್ಖು ಮಞ್ಚೇನ ವಾ ಪೀಠೇನ ವಾ ಸಙ್ಘಮಜ್ಝೇ ಆನೇತ್ವಾ ಉಪೋಸಥೋ ಕಾತಬ್ಬೋ. ಸಚೇ, ಭಿಕ್ಖವೇ, ಗಿಲಾನುಪಟ್ಠಾಕಾನಂ ಭಿಕ್ಖೂನಂ ಏವಂ ಹೋತಿ – ‘‘ಸಚೇ ಖೋ ಮಯಂ ಗಿಲಾನಂ ಠಾನಾ ಚಾವೇಸ್ಸಾಮ, ಆಬಾಧೋ ವಾ ಅಭಿವಡ್ಢಿಸ್ಸತಿ ಕಾಲಂಕಿರಿಯಾ ವಾ ಭವಿಸ್ಸತೀ’’ತಿ, ನ, ಭಿಕ್ಖವೇ, ಗಿಲಾನೋ ಭಿಕ್ಖು ಠಾನಾ ಚಾವೇತಬ್ಬೋ. ಸಙ್ಘೇನ ತತ್ಥ ಗನ್ತ್ವಾ ಉಪೋಸಥೋ ಕಾತಬ್ಬೋ. ನ ತ್ವೇವ ವಗ್ಗೇನ ಸಙ್ಘೇನ ಉಪೋಸಥೋ ಕಾತಬ್ಬೋ. ಕರೇಯ್ಯ ಚೇ, ಆಪತ್ತಿ ದುಕ್ಕಟಸ್ಸ.

ಪಾರಿಸುದ್ಧಿಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪಾರಿಸುದ್ಧಿಯಾ ತತ್ಥೇವ ಪಕ್ಕಮತಿ, ಅಞ್ಞಸ್ಸ ದಾತಬ್ಬಾ ಪಾರಿಸುದ್ಧಿ. ಪಾರಿಸುದ್ಧಿಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪಾರಿಸುದ್ಧಿಯಾ ತತ್ಥೇವ ವಿಬ್ಭಮತಿ,…ಪೇ… ಕಾಲಂ ಕರೋತಿ – ಸಾಮಣೇರೋ ಪಟಿಜಾನಾತಿ – ಸಿಕ್ಖಂ ಪಚ್ಚಕ್ಖಾತಕೋ ಪಟಿಜಾನಾತಿ – ಅನ್ತಿಮವತ್ಥುಂ ಅಜ್ಝಾಪನ್ನಕೋ ಪಟಿಜಾನಾತಿ – ಉಮ್ಮತ್ತಕೋ ಪಟಿಜಾನಾತಿ – ಖಿತ್ತಚಿತ್ತೋ ಪಟಿಜಾನಾತಿ – ವೇದನಾಟ್ಟೋ ಪಟಿಜಾನಾತಿ – ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕೋ ಪಟಿಜಾನಾತಿ – ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖಿತ್ತಕೋ ಪಟಿಜಾನಾತಿ – ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖಿತ್ತಕೋ ಪಟಿಜಾನಾತಿ – ಪಣ್ಡಕೋ ಪಟಿಜಾನಾತಿ – ಥೇಯ್ಯಸಂವಾಸಕೋ ಪಟಿಜಾನಾತಿ – ತಿತ್ಥಿಯಪಕ್ಕನ್ತಕೋ ಪಟಿಜಾನಾತಿ – ತಿರಚ್ಛಾನಗತೋ ಪಟಿಜಾನಾತಿ – ಮಾತುಘಾತಕೋ ಪಟಿಜಾನಾತಿ – ಪಿತುಘಾತಕೋ ಪಟಿಜಾನಾತಿ – ಅರಹನ್ತಘಾತಕೋ ಪಟಿಜಾನಾತಿ – ಭಿಕ್ಖುನಿದೂಸಕೋ ಪಟಿಜಾನಾತಿ – ಸಙ್ಘಭೇದಕೋ ಪಟಿಜಾನಾತಿ – ಲೋಹಿತುಪ್ಪಾದಕೋ ಪಟಿಜಾನಾತಿ – ಉಭತೋಬ್ಯಞ್ಜನಕೋ ಪಟಿಜಾನಾತಿ, ಅಞ್ಞಸ್ಸ ದಾತಬ್ಬಾ ಪಾರಿಸುದ್ಧಿ.

ಪಾರಿಸುದ್ಧಿಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪಾರಿಸುದ್ಧಿಯಾ ಅನ್ತರಾಮಗ್ಗೇ ಪಕ್ಕಮತಿ, ಅನಾಹಟಾ ಹೋತಿ ಪಾರಿಸುದ್ಧಿ. ಪಾರಿಸುದ್ಧಿಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪಾರಿಸುದ್ಧಿಯಾ ಅನ್ತರಾಮಗ್ಗೇ ವಿಬ್ಭಮತಿ,…ಪೇ… ಉಭತೋಬ್ಯಞ್ಜನಕೋ ಪಟಿಜಾನಾತಿ, ಅನಾಹಟಾ ಹೋತಿ ಪಾರಿಸುದ್ಧಿ.

ಪಾರಿಸುದ್ಧಿಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪಾರಿಸುದ್ಧಿಯಾ ಸಙ್ಘಪ್ಪತ್ತೋ ಪಕ್ಕಮತಿ, ಆಹಟಾ ಹೋತಿ ಪಾರಿಸುದ್ಧಿ. ಪಾರಿಸುದ್ಧಿಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪಾರಿಸುದ್ಧಿಯಾ ಸಙ್ಘಪ್ಪತ್ತೋ ವಿಬ್ಭಮತಿ,…ಪೇ… ಉಭತೋಬ್ಯಞ್ಜನಕೋ ಪಟಿಜಾನಾತಿ, ಆಹಟಾ ಹೋತಿ ಪಾರಿಸುದ್ಧಿ.

ಪಾರಿಸುದ್ಧಿಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪಾರಿಸುದ್ಧಿಯಾ ಸಙ್ಘಪ್ಪತ್ತೋ ಸುತ್ತೋ ನ ಆರೋಚೇತಿ, ಪಮತ್ತೋ ನ ಆರೋಚೇತಿ, ಸಮಾಪನ್ನೋ ನ ಆರೋಚೇತಿ, ಆಹಟಾ ಹೋತಿ ಪಾರಿಸುದ್ಧಿ. ಪಾರಿಸುದ್ಧಿಹಾರಕಸ್ಸ ಅನಾಪತ್ತಿ.

ಪಾರಿಸುದ್ಧಿಹಾರಕೋ ಚೇ, ಭಿಕ್ಖವೇ, ದಿನ್ನಾಯ ಪಾರಿಸುದ್ಧಿಯಾ ಸಙ್ಘಪ್ಪತ್ತೋ ಸಞ್ಚಿಚ್ಚ ನ ಆರೋಚೇತಿ, ಆಹಟಾ ಹೋತಿ ಪಾರಿಸುದ್ಧಿ. ಪಾರಿಸುದ್ಧಿಹಾರಕಸ್ಸ ಆಪತ್ತಿ ದುಕ್ಕಟಸ್ಸಾತಿ.