೮೦. ವಿನಯವಿಸ್ಸಜ್ಜನಕಥಾ

೧೫೨. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಸಙ್ಘಮಜ್ಝೇ ಅಸಮ್ಮತಾ ವಿನಯಂ ವಿಸ್ಸಜ್ಜೇನ್ತಿ [ವಿಸ್ಸಜ್ಜನ್ತಿ (ಕ.)]. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಸಙ್ಘಮಜ್ಝೇ ಅಸಮ್ಮತೇನ ವಿನಯೋ ವಿಸ್ಸಜ್ಜೇತಬ್ಬೋ. ಯೋ ವಿಸ್ಸಜ್ಜೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಸಙ್ಘಮಜ್ಝೇ ಸಮ್ಮತೇನ ವಿನಯಂ ವಿಸ್ಸಜ್ಜೇತುಂ. ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬಂ. ಅತ್ತನಾ ವಾ [ಅತ್ತನಾವ (ಸ್ಯಾ.)] ಅತ್ತಾನಂ ಸಮ್ಮನ್ನಿತಬ್ಬಂ, ಪರೇನ ವಾ ಪರೋ ಸಮ್ಮನ್ನಿತಬ್ಬೋ. ಕಥಞ್ಚ ಅತ್ತನಾವ ಅತ್ತಾನಂ ಸಮ್ಮನ್ನಿತಬ್ಬಂ? ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಅಹಂ ಇತ್ಥನ್ನಾಮೇನ ವಿನಯಂ ಪುಟ್ಠೋ ವಿಸ್ಸಜ್ಜೇಯ್ಯ’’ನ್ತಿ. ಏವಂ ಅತ್ತನಾವ ಅತ್ತಾನಂ ಸಮ್ಮನ್ನಿತಬ್ಬಂ.

ಕಥಞ್ಚ ಪರೇನ ಪರೋ ಸಮ್ಮನ್ನಿತಬ್ಬೋ? ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಇತ್ಥನ್ನಾಮೋ ಇತ್ಥನ್ನಾಮೇನ ವಿನಯಂ ಪುಟ್ಠೋ ವಿಸ್ಸಜ್ಜೇಯ್ಯಾ’’ತಿ. ಏವಂ ಪರೇನ ಪರೋ ಸಮ್ಮನ್ನಿತಬ್ಬೋತಿ.

ತೇನ ಖೋ ಪನ ಸಮಯೇನ ಪೇಸಲಾ ಭಿಕ್ಖೂ ಸಙ್ಘಮಜ್ಝೇ ಸಮ್ಮತಾ ವಿನಯಂ ವಿಸ್ಸಜ್ಜೇನ್ತಿ. ಛಬ್ಬಗ್ಗಿಯಾ ಭಿಕ್ಖೂ ಲಭನ್ತಿ ಆಘಾತಂ, ಲಭನ್ತಿ ಅಪ್ಪಚ್ಚಯಂ, ವಧೇನ ತಜ್ಜೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ಅನುಜಾನಾಮಿ, ಭಿಕ್ಖವೇ, ಸಙ್ಘಮಜ್ಝೇ ಸಮ್ಮತೇನಪಿ ಪರಿಸಂ ಓಲೋಕೇತ್ವಾ ಪುಗ್ಗಲಂ ತುಲಯಿತ್ವಾ ವಿನಯಂ ವಿಸ್ಸಜ್ಜೇತುನ್ತಿ.