೭೬. ಗಾಮಸೀಮಾದಿ

೧೪೭. ಅಸಮ್ಮತಾಯ, ಭಿಕ್ಖವೇ, ಸೀಮಾಯ ಅಟ್ಠಪಿತಾಯ, ಯಂ ಗಾಮಂ ವಾ ನಿಗಮಂ ವಾ ಉಪನಿಸ್ಸಾಯ ವಿಹರತಿ, ಯಾ ತಸ್ಸ ವಾ ಗಾಮಸ್ಸ ಗಾಮಸೀಮಾ, ನಿಗಮಸ್ಸ ವಾ ನಿಗಮಸೀಮಾ, ಅಯಂ ತತ್ಥ ಸಮಾನಸಂವಾಸಾ ಏಕುಪೋಸಥಾ. ಅಗಾಮಕೇ ಚೇ, ಭಿಕ್ಖವೇ, ಅರಞ್ಞೇ ಸಮನ್ತಾ ಸತ್ತಬ್ಭನ್ತರಾ, ಅಯಂ ತತ್ಥ ಸಮಾನಸಂವಾಸಾ ಏಕುಪೋಸಥಾ. ಸಬ್ಬಾ, ಭಿಕ್ಖವೇ, ನದೀ ಅಸೀಮಾ; ಸಬ್ಬೋ ಸಮುದ್ದೋ ಅಸೀಮೋ; ಸಬ್ಬೋ ಜಾತಸ್ಸರೋ ಅಸೀಮೋ. ನದಿಯಾ ವಾ, ಭಿಕ್ಖವೇ, ಸಮುದ್ದೇ ವಾ ಜಾತಸ್ಸರೇ ವಾ ಯಂ ಮಜ್ಝಿಮಸ್ಸ ಪುರಿಸಸ್ಸ ಸಮನ್ತಾ ಉದಕುಕ್ಖೇಪಾ, ಅಯಂ ತತ್ಥ ಸಮಾನಸಂವಾಸಾ ಏಕುಪೋಸಥಾತಿ.

೧೪೮. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಸೀಮಾಯ ಸೀಮಂ ಸಮ್ಭಿನ್ದನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ಯೇಸಂ, ಭಿಕ್ಖವೇ, ಸೀಮಾ ಪಠಮಂ ಸಮ್ಮತಾ ತೇಸಂ ತಂ ಕಮ್ಮಂ ಧಮ್ಮಿಕಂ ಅಕುಪ್ಪಂ ಠಾನಾರಹಂ. ಯೇಸಂ, ಭಿಕ್ಖವೇ, ಸೀಮಾ ಪಚ್ಛಾ ಸಮ್ಮತಾ ತೇಸಂ ತಂ ಕಮ್ಮಂ ಅಧಮ್ಮಿಕಂ ಕುಪ್ಪಂ ಅಟ್ಠಾನಾರಹಂ. ನ, ಭಿಕ್ಖವೇ, ಸೀಮಾಯ ಸೀಮಾ ಸಮ್ಭಿನ್ದಿತಬ್ಬಾ. ಯೋ ಸಮ್ಭಿನ್ದೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಸೀಮಾಯ ಸೀಮಂ ಅಜ್ಝೋತ್ಥರನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ಯೇಸಂ, ಭಿಕ್ಖವೇ, ಸೀಮಾ ಪಠಮಂ ಸಮ್ಮತಾ ತೇಸಂ ತಂ ಕಮ್ಮಂ ಧಮ್ಮಿಕಂ ಅಕುಪ್ಪಂ ಠಾನಾರಹಂ. ಯೇಸಂ, ಭಿಕ್ಖವೇ, ಸೀಮಾ ಪಚ್ಛಾ ಸಮ್ಮತಾ ತೇಸಂ ತಂ ಕಮ್ಮಂ ಅಧಮ್ಮಿಕಂ ಕುಪ್ಪಂ ಅಟ್ಠಾನಾರಹಂ. ನ, ಭಿಕ್ಖವೇ, ಸೀಮಾಯ ಸೀಮಾ ಅಜ್ಝೋತ್ಥರಿತಬ್ಬಾ. ಯೋ ಅಜ್ಝೋತ್ಥರೇಯ್ಯ, ಆಪತ್ತಿ ದುಕ್ಕಟಸ್ಸಾತಿ. ಅನುಜಾನಾಮಿ, ಭಿಕ್ಖವೇ, ಸೀಮಂ ಸಮ್ಮನ್ನನ್ತೇನ ಸೀಮನ್ತರಿಕಂ ಠಪೇತ್ವಾ ಸೀಮಂ ಸಮ್ಮನ್ನಿತುನ್ತಿ.