೧೦೫. ವಜ್ಜನೀಯಪುಗ್ಗಲಸನ್ದಸ್ಸನಾ

೧೮೩. ನ, ಭಿಕ್ಖವೇ, ಭಿಕ್ಖುನಿಯಾ ನಿಸಿನ್ನಪರಿಸಾಯ ಪಾತಿಮೋಕ್ಖಂ ಉದ್ದಿಸಿತಬ್ಬಂ. ಯೋ ಉದ್ದಿಸೇಯ್ಯ, ಆಪತ್ತಿ ದುಕ್ಕಟಸ್ಸ. ನ ಸಿಕ್ಖಮಾನಾಯ…ಪೇ… ನ ಸಾಮಣೇರಸ್ಸ …ಪೇ… ನ ಸಾಮಣೇರಿಯಾ…ಪೇ… ನ ಸಿಕ್ಖಾಪಚ್ಚಕ್ಖಾತಕಸ್ಸ…ಪೇ… ನ ಅನ್ತಿಮವತ್ಥುಂ ಅಜ್ಝಾಪನ್ನಕಸ್ಸ ನಿಸಿನ್ನಪರಿಸಾಯ ಪಾತಿಮೋಕ್ಖಂ ಉದ್ದಿಸಿತಬ್ಬಂ. ಯೋ ಉದ್ದಿಸೇಯ್ಯ, ಆಪತ್ತಿ ದುಕ್ಕಟಸ್ಸ.

ನ ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕಸ್ಸ ನಿಸಿನ್ನಪರಿಸಾಯ ಪಾತಿಮೋಕ್ಖಂ ಉದ್ದಿಸಿತಬ್ಬಂ. ಯೋ ಉದ್ದಿಸೇಯ್ಯ, ಯಥಾಧಮ್ಮೋ ಕಾರೇತಬ್ಬೋ. ನ ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖಿತ್ತಕಸ್ಸ ನಿಸಿನ್ನಪರಿಸಾಯ…ಪೇ… ನ ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖಿತ್ತಕಸ್ಸ ನಿಸಿನ್ನಪರಿಸಾಯ ಪಾತಿಮೋಕ್ಖಂ ಉದ್ದಿಸಿತಬ್ಬಂ. ಯೋ ಉದ್ದಿಸೇಯ್ಯ, ಯಥಾಧಮ್ಮೋ ಕಾರೇತಬ್ಬೋ.

ನ ಪಣ್ಡಕಸ್ಸ ನಿಸಿನ್ನಪರಿಸಾಯ ಪಾತಿಮೋಕ್ಖಂ ಉದ್ದಿಸಿತಬ್ಬಂ. ಯೋ ಉದ್ದಿಸೇಯ್ಯ, ಆಪತ್ತಿ ದುಕ್ಕಟಸ್ಸ. ನ ಥೇಯ್ಯಸಂವಾಸಕಸ್ಸ…ಪೇ… ನ ತಿತ್ಥಿಯಪಕ್ಕನ್ತಕಸ್ಸ…ಪೇ… ನ ತಿರಚ್ಛಾನಗತಸ್ಸ…ಪೇ… ನ ಮಾತುಘಾತಕಸ್ಸ…ಪೇ… ನ ಪಿತುಘಾತಕಸ್ಸ…ಪೇ… ನ ಅರಹನ್ತಘಾತಕಸ್ಸ…ಪೇ… ನ ಭಿಕ್ಖುನಿದೂಸಕಸ್ಸ…ಪೇ… ನ ಸಙ್ಘಭೇದಕಸ್ಸ…ಪೇ… ನ ಲೋಹಿತುಪ್ಪಾದಕಸ್ಸ…ಪೇ… ನ ಉಭತೋಬ್ಯಞ್ಜನಕಸ್ಸ ನಿಸಿನ್ನಪರಿಸಾಯ ಪಾತಿಮೋಕ್ಖಂ ಉದ್ದಿಸಿತಬ್ಬಂ. ಯೋ ಉದ್ದಿಸೇಯ್ಯ, ಆಪತ್ತಿ ದುಕ್ಕಟಸ್ಸ.

ನ, ಭಿಕ್ಖವೇ, ಪಾರಿವಾಸಿಕಪಾರಿಸುದ್ಧಿದಾನೇನ ಉಪೋಸಥೋ ಕಾತಬ್ಬೋ, ಅಞ್ಞತ್ರ ಅವುಟ್ಠಿತಾಯ ಪರಿಸಾಯ. ನ ಚ, ಭಿಕ್ಖವೇ, ಅನುಪೋಸಥೇ ಉಪೋಸಥೋ ಕಾತಬ್ಬೋ, ಅಞ್ಞತ್ರ ಸಙ್ಘಸಾಮಗ್ಗಿಯಾತಿ.

ವಜ್ಜನೀಯಪುಗ್ಗಲಸನ್ದಸ್ಸನಾ ನಿಟ್ಠಿತಾ.

ತತಿಯಭಾಣವಾರೋ ನಿಟ್ಠಿತೋ.

ಉಪೋಸಥಕ್ಖನ್ಧಕೋ ದುತಿಯೋ.