೫೬. ಅಪತ್ತಕಾದಿವತ್ಥು

೧೧೮. ತೇನ ಖೋ ಪನ ಸಮಯೇನ ಭಿಕ್ಖೂ ಅಪತ್ತಕಂ ಉಪಸಮ್ಪಾದೇನ್ತಿ. ಹತ್ಥೇಸು ಪಿಣ್ಡಾಯ ಚರನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ತಿತ್ಥಿಯಾತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಅಪತ್ತಕೋ ಉಪಸಮ್ಪಾದೇತಬ್ಬೋ. ಯೋ ಉಪಸಮ್ಪಾದೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅಚೀವರಕಂ ಉಪಸಮ್ಪಾದೇನ್ತಿ. ನಗ್ಗಾ ಪಿಣ್ಡಾಯ ಚರನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ತಿತ್ಥಿಯಾತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಅಚೀವರಕೋ ಉಪಸಮ್ಪಾದೇತಬ್ಬೋ. ಯೋ ಉಪಸಮ್ಪಾದೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅಪತ್ತಚೀವರಕಂ ಉಪಸಮ್ಪಾದೇನ್ತಿ. ನಗ್ಗಾ ಹತ್ಥೇಸು ಪಿಣ್ಡಾಯ ಚರನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ತಿತ್ಥಿಯಾತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಅಪತ್ತಚೀವರಕೋ ಉಪಸಮ್ಪಾದೇತಬ್ಬೋ. ಯೋ ಉಪಸಮ್ಪಾದೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಯಾಚಿತಕೇನ ಪತ್ತೇನ ಉಪಸಮ್ಪಾದೇನ್ತಿ. ಉಪಸಮ್ಪನ್ನೇ ಪತ್ತಂ ಪಟಿಹರನ್ತಿ. ಹತ್ಥೇಸು ಪಿಣ್ಡಾಯ ಚರನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ತಿತ್ಥಿಯಾತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಯಾಚಿತಕೇನ ಪತ್ತೇನ ಉಪಸಮ್ಪಾದೇತಬ್ಬೋ. ಯೋ ಉಪಸಮ್ಪಾದೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಯಾಚಿತಕೇನ ಚೀವರೇನ ಉಪಸಮ್ಪಾದೇನ್ತಿ. ಉಪಸಮ್ಪನ್ನೇ ಚೀವರಂ ಪಟಿಹರನ್ತಿ. ನಗ್ಗಾ ಪಿಣ್ಡಾಯ ಚರನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ತಿತ್ಥಿಯಾತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಯಾಚಿತಕೇನ ಚೀವರೇನ ಉಪಸಮ್ಪಾದೇತಬ್ಬೋ. ಯೋ ಉಪಸಮ್ಪಾದೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಯಾಚಿತಕೇನ ಪತ್ತಚೀವರೇನ ಉಪಸಮ್ಪಾದೇನ್ತಿ. ಉಪಸಮ್ಪನ್ನೇ ಪತ್ತಚೀವರಂ ಪಟಿಹರನ್ತಿ. ನಗ್ಗಾ ಹತ್ಥೇಸು ಪಿಣ್ಡಾಯ ಚರನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ತಿತ್ಥಿಯಾತಿ. ಭಗವತೋ ಏತಮತ್ಥಂ ಆರೋಚೇಸುಂ. ನ, ಭಿಕ್ಖವೇ, ಯಾಚಿತಕೇನ ಪತ್ತಚೀವರೇನ ಉಪಸಮ್ಪಾದೇತಬ್ಬೋ. ಯೋ ಉಪಸಮ್ಪಾದೇಯ್ಯ, ಆಪತ್ತಿ ದುಕ್ಕಟಸ್ಸಾತಿ.

ನಉಪಸಮ್ಪಾದೇತಬ್ಬೇಕವೀಸತಿವಾರೋ ನಿಟ್ಠಿತೋ.