೪೨. ಸಿಕ್ಖಾಪದಕಥಾ

೧೦೬. ಅಥ ಖೋ ಸಾಮಣೇರಾನಂ ಏತದಹೋಸಿ – ‘‘ಕತಿ ನು ಖೋ ಅಮ್ಹಾಕಂ ಸಿಕ್ಖಾಪದಾನಿ, ಕತ್ಥ ಚ ಅಮ್ಹೇಹಿ ಸಿಕ್ಖಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ಅನುಜಾನಾಮಿ, ಭಿಕ್ಖವೇ, ಸಾಮಣೇರಾನಂ ದಸ ಸಿಕ್ಖಾಪದಾನಿ, ತೇಸು ಚ ಸಾಮಣೇರೇಹಿ ಸಿಕ್ಖಿತುಂ – ಪಾಣಾತಿಪಾತಾ ವೇರಮಣೀ [ವೇರಮಣಿ, ವೇರಮಣಿಂ (ಕ.)], ಅದಿನ್ನಾದಾನಾ ವೇರಮಣೀ, ಅಬ್ರಹ್ಮಚರಿಯಾ ವೇರಮಣೀ, ಮುಸಾವಾದಾ ವೇರಮಣೀ, ಸುರಾಮೇರಯಮಜ್ಜಪಮಾದಟ್ಠಾನಾ ವೇರಮಣೀ, ವಿಕಾಲಭೋಜನಾ ವೇರಮಣೀ, ನಚ್ಚಗೀತವಾದಿತವಿಸೂಕದಸ್ಸನಾ ವೇರಮಣೀ, ಮಾಲಾಗನ್ಧವಿಲೇಪನಧಾರಣಮಣ್ಡನವಿಭೂಸನಟ್ಠಾನಾ ವೇರಮಣೀ, ಉಚ್ಚಾಸಯನಮಹಾಸಯನಾ ವೇರಮಣೀ, ಜಾತರೂಪರಜತಪಟಿಗ್ಗಹಣಾ ವೇರಮಣೀ. ಅನುಜಾನಾಮಿ, ಭಿಕ್ಖವೇ, ಸಾಮಣೇರಾನಂ ಇಮಾನಿ ದಸ ಸಿಕ್ಖಾಪದಾನಿ, ಇಮೇಸು ಚ ಸಾಮಣೇರೇಹಿ ಸಿಕ್ಖಿತುನ್ತಿ.

ಸಿಕ್ಖಾಪದಕಥಾ ನಿಟ್ಠಿತಾ.