೩೯. ಆಹುನ್ದರಿಕವತ್ಥು

೧೦೨. ತೇನ ಖೋ ಪನ ಸಮಯೇನ ಭಗವಾ ತತ್ಥೇವ ರಾಜಗಹೇ ವಸ್ಸಂ ವಸಿ, ತತ್ಥ ಹೇಮನ್ತಂ, ತತ್ಥ ಗಿಮ್ಹಂ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಆಹುನ್ದರಿಕಾ ಸಮಣಾನಂ ಸಕ್ಯಪುತ್ತಿಯಾನಂ ದಿಸಾ ಅನ್ಧಕಾರಾ, ನ ಇಮೇಸಂ ದಿಸಾ ಪಕ್ಖಾಯನ್ತೀ’’ತಿ. ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಆಯಸ್ಮನ್ತಂ ಆನನ್ದಂ ಆಮನ್ತೇಸಿ – ‘‘ಗಚ್ಛಾನನ್ದ, ಅವಾಪುರಣಂ [ಅಪಾಪುರಣಂ (ಕ.)] ಆದಾಯ ಅನುಪರಿವೇಣಿಯಂ ಭಿಕ್ಖೂನಂ ಆರೋಚೇಹಿ – ‘‘ಇಚ್ಛತಾವುಸೋ ಭಗವಾ ದಕ್ಖಿಣಾಗಿರಿಂ ಚಾರಿಕಂ ಪಕ್ಕಮಿತುಂ. ಯಸ್ಸಾಯಸ್ಮತೋ ಅತ್ಥೋ, ಸೋ ಆಗಚ್ಛತೂ’’ತಿ. ಏವಂ, ಭನ್ತೇ, ತಿ ಖೋ ಆಯಸ್ಮಾ ಆನನ್ದೋ ಭಗವತೋ ಪಟಿಸ್ಸುಣಿತ್ವಾ ಅವಾಪುರಣಂ ಆದಾಯ ಅನುಪರಿವೇಣಿಯಂ ಭಿಕ್ಖೂನಂ ಆರೋಚೇಸಿ – ‘ಇಚ್ಛತಾವುಸೋ ಭಗವಾ ದಕ್ಖಿಣಾಗಿರಿಂ ಚಾರಿಕಂ ಪಕ್ಕಮಿತುಂ. ಯಸ್ಸಾಯಸ್ಮತೋ ಅತ್ಥೋ, ಸೋ ಆಗಚ್ಛತೂ’’’ತಿ. ಭಿಕ್ಖೂ ಏವಮಾಹಂಸು – ‘‘ಭಗವತಾ, ಆವುಸೋ ಆನನ್ದ, ಪಞ್ಞತ್ತಂ ದಸವಸ್ಸಾನಿ ನಿಸ್ಸಾಯ ವತ್ಥುಂ, ದಸವಸ್ಸೇನ ನಿಸ್ಸಯಂ ದಾತುಂ. ತತ್ಥ ಚ ನೋ ಗನ್ತಬ್ಬಂ ಭವಿಸ್ಸತಿ, ನಿಸ್ಸಯೋ ಚ ಗಹೇತಬ್ಬೋ ಭವಿಸ್ಸತಿ, ಇತ್ತರೋ ಚ ವಾಸೋ ಭವಿಸ್ಸತಿ, ಪುನ ಚ ಪಚ್ಚಾಗನ್ತಬ್ಬಂ ಭವಿಸ್ಸತಿ, ಪುನ ಚ ನಿಸ್ಸಯೋ ಗಹೇತಬ್ಬೋ ಭವಿಸ್ಸತಿ. ಸಚೇ ಅಮ್ಹಾಕಂ ಆಚರಿಯುಪಜ್ಝಾಯಾ ಗಮಿಸ್ಸನ್ತಿ, ಮಯಮ್ಪಿ ಗಮಿಸ್ಸಾಮ; ನೋ ಚೇ ಅಮ್ಹಾಕಂ ಆಚರಿಯುಪಜ್ಝಾಯಾ ಗಮಿಸ್ಸನ್ತಿ, ಮಯಮ್ಪಿ ನ ಗಮಿಸ್ಸಾಮ. ಲಹುಚಿತ್ತಕತಾ ನೋ, ಆವುಸೋ ಆನನ್ದ, ಪಞ್ಞಾಯಿಸ್ಸತೀ’’ತಿ. ಅಥ ಖೋ ಭಗವಾ ಓಗಣೇನ ಭಿಕ್ಖುಸಙ್ಘೇನ ದಕ್ಖಿಣಾಗಿರಿಂ ಚಾರಿಕಂ ಪಕ್ಕಾಮಿ.

ಆಹುನ್ದರಿಕವತ್ಥು ನಿಟ್ಠಿತಂ.