೧೦. ದುತಿಯಮಾರಕಥಾ

೩೫. ಅಥ ಖೋ ಭಗವಾ ವಸ್ಸಂವುಟ್ಠೋ [ವಸ್ಸಂವುತ್ಥೋ (ಸೀ.)] ಭಿಕ್ಖೂ ಆಮನ್ತೇಸಿ [ಸಂ. ನಿ. ೧.೧೫೫] – ‘‘ಮಯ್ಹಂ ಖೋ, ಭಿಕ್ಖವೇ, ಯೋನಿಸೋ ಮನಸಿಕಾರಾ ಯೋನಿಸೋ ಸಮ್ಮಪ್ಪಧಾನಾ ಅನುತ್ತರಾ ವಿಮುತ್ತಿ ಅನುಪ್ಪತ್ತಾ, ಅನುತ್ತರಾ ವಿಮುತ್ತಿ ಸಚ್ಛಿಕತಾ. ತುಮ್ಹೇಪಿ, ಭಿಕ್ಖವೇ, ಯೋನಿಸೋ ಮನಸಿಕಾರಾ ಯೋನಿಸೋ ಸಮ್ಮಪ್ಪಧಾನಾ ಅನುತ್ತರಂ ವಿಮುತ್ತಿಂ ಅನುಪಾಪುಣಾಥ, ಅನುತ್ತರಂ ವಿಮುತ್ತಿಂ ಸಚ್ಛಿಕರೋಥಾ’’ತಿ. ಅಥ ಖೋ ಮಾರೋ ಪಾಪಿಮಾ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವನ್ತಂ ಗಾಥಾಯ ಅಜ್ಝಭಾಸಿ –

‘‘ಬದ್ಧೋಸಿ ಮಾರಪಾಸೇಹಿ, ಯೇ ದಿಬ್ಬಾ ಯೇ ಚ ಮಾನುಸಾ;

ಮಹಾಬನ್ಧನಬದ್ಧೋಸಿ [ಮಾರಬನ್ಧನಬದ್ಧೋಸಿ (ಸೀ. ಸ್ಯಾ.)], ನ ಮೇ ಸಮಣ ಮೋಕ್ಖಸೀ’’ತಿ.

‘‘ಮುತ್ತಾಹಂ ಮಾರಪಾಸೇಹಿ, ಯೇ ದಿಬ್ಬಾ ಯೇ ಚ ಮಾನುಸಾ;

ಮಹಾಬನ್ಧನಮುತ್ತೋಮ್ಹಿ [ಮಾರಬನ್ಧನಮುತ್ತೋಮ್ಹಿ (ಸೀ. ಸ್ಯಾ.)], ನಿಹತೋ ತ್ವಮಸಿ ಅನ್ತಕಾ’’ತಿ.

ಅಥ ಖೋ ಮಾರೋ ಪಾಪಿಮಾ – ಜಾನಾತಿ ಮಂ ಭಗವಾ, ಜಾನಾತಿ ಮಂ ಸುಗತೋತಿ ದುಕ್ಖೀ ದುಮ್ಮನೋ

ತತ್ಥೇವನ್ತರಧಾಯಿ.

ದುತಿಯಮಾರಕಥಾ ನಿಟ್ಠಿತಾ.