೩. ತತಿಯಭಾಣವಾರೋ

೩೧೯. ತೇನ ಖೋ ಪನ ಸಮಯೇನ ಆಯಸ್ಮಾ ಉಪನನ್ದೋ ಸಕ್ಯಪುತ್ತೋ ಸಾವತ್ಥಿಯಂ ಸೇನಾಸನಂ ಗಹೇತ್ವಾ ಅಞ್ಞತರಂ ಗಾಮಕಾವಾಸಂ ಅಗಮಾಸಿ. ತತ್ಥಪಿ ಸೇನಾಸನಂ ಅಗ್ಗಹೇಸಿ. ಅಥ ಖೋ ತೇಸಂ ಭಿಕ್ಖೂನಂ ಏತದಹೋಸಿ – ‘‘ಅಯಂ, ಆವುಸೋ, ಆಯಸ್ಮಾ ಉಪನನ್ದೋ ಸಕ್ಯಪುತ್ತೋ ಭಣ್ಡನಕಾರಕೋ ಕಲಹಕಾರಕೋ ವಿವಾದಕಾರಕೋ ಭಸ್ಸಕಾರಕೋ ಸಙ್ಘೇ ಅಧಿಕರಣಕಾರಕೋ. ಸಚಾಯಂ ಇಧ ವಸ್ಸಂ ವಸಿಸ್ಸತಿ, ಸಬ್ಬೇವ ಮಯಂ ನ ಫಾಸು ಭವಿಸ್ಸಾಮ. ಹನ್ದ ನಂ ಪುಚ್ಛಾಮಾ’’ತಿ. ಅಥ ಖೋ ತೇ ಭಿಕ್ಖೂ ಆಯಸ್ಮನ್ತಂ ಉಪನನ್ದಂ ಸಕ್ಯಪುತ್ತಂ ಏತದವೋಚುಂ – ‘‘ನನು ತಯಾ, ಆವುಸೋ ಉಪನನ್ದ, ಸಾವತ್ಥಿಯಂ ಸೇನಾಸನಂ ಗಹಿತ’’ನ್ತಿ? ‘‘ಏವಮಾವುಸೋ’’ತಿ. ‘‘ಕಿಂ ಪನ ತ್ವಂ, ಆವುಸೋ ಉಪನನ್ದ, ಏಕೋ ದ್ವೇ ಪಟಿಬಾಹಸೀ’’ತಿ? ‘‘ಇಧದಾನಾಹಂ ಆವುಸೋ, ಮುಞ್ಚಾಮಿ; ತತ್ಥ ಗಣ್ಹಾಮೀ’’ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಯಸ್ಮಾ ಉಪನನ್ದೋ ಸಕ್ಯಪುತ್ತೋ ಏಕೋ ದ್ವೇ ಪಟಿಬಾಹೇಸ್ಸತೀ’’ತಿ! ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಕಿರ ತ್ವಂ, ಉಪನನ್ದ, ಏಕೋ ದ್ವೇ ಪಟಿಬಾಹಸೀ’’ತಿ? ‘‘ಸಚ್ಚಂ ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ‘‘ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ಏಕೋ ದ್ವೇ ಪಟಿಬಾಹಿಸ್ಸಸಿ? ತತ್ಥ ತಯಾ, ಮೋಘಪುರಿಸ, ಗಹಿತಂ ಇಧ ಮುತ್ತಂ, ಇಧ ತಯಾ ಗಹಿತಂ ತತ್ರ ಮುತ್ತಂ. ಏವಂ ಖೋ ತ್ವಂ, ಮೋಘಪುರಿಸ, ಉಭಯತ್ಥ ಪರಿಬಾಹಿರೋ. ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ಏಕೇನ ದ್ವೇ ಪಟಿಬಾಹೇತಬ್ಬಾ. ಯೋ ಪಟಿಬಾಹೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೩೨೦. [ಪಾಚಿ. ೪೩೮] ತೇನ ಖೋ ಪನ ಸಮಯೇನ ಭಗವಾ ಭಿಕ್ಖೂನಂ ಅನೇಕಪರಿಯಾಯೇನ ವಿನಯಕಥಂ ಕಥೇತಿ, ವಿನಯಸ್ಸ ವಣ್ಣಂ ಭಾಸತಿ, ವಿನಯಪರಿಯತ್ತಿಯಾ ವಣ್ಣಂ ಭಾಸತಿ, ಆದಿಸ್ಸ ಆದಿಸ್ಸ ಆಯಸ್ಮತೋ ಉಪಾಲಿಸ್ಸ ವಣ್ಣಂ ಭಾಸತಿ. ಭಿಕ್ಖೂನಂ ಏತದಹೋಸಿ – ‘‘ಭಗವಾ ಖೋ ಅನೇಕಪರಿಯಾಯೇನ ವಿನಯಕಥಂ ಕಥೇತಿ, ವಿನಯಸ್ಸ ವಣ್ಣಂ ಭಾಸತಿ, ವಿನಯಪರಿಯತ್ತಿಯಾ ವಣ್ಣಂ ಭಾಸತಿ, ಆದಿಸ್ಸ ಆದಿಸ್ಸ ಆಯಸ್ಮತೋ ಉಪಾಲಿಸ್ಸ ವಣ್ಣಂ ಭಾಸತಿ. ಹನ್ದ ಮಯಂ, ಆವುಸೋ, ಆಯಸ್ಮತೋ ಉಪಾಲಿಸ್ಸ ಸನ್ತಿಕೇ ವಿನಯಂ ಪರಿಯಾಪುಣಾಮಾ’’ತಿ. ತೇಧ [ತೇ ಚ (ಸ್ಯಾ. ಕ.)] ಬಹೂ ಭಿಕ್ಖೂ ಥೇರಾ ಚ ನವಾ ಚ ಮಜ್ಝಿಮಾ ಚ ಆಯಸ್ಮತೋ ಉಪಾಲಿಸ್ಸ ಸನ್ತಿಕೇ ವಿನಯಂ ಪರಿಯಾಪುಣನ್ತಿ. ಆಯಸ್ಮಾ ಉಪಾಲಿ ಠಿತಕೋವ ಉದ್ದಿಸತಿ ಥೇರಾನಂ ಭಿಕ್ಖೂನಂ ಗಾರವೇನ. ಥೇರಾಪಿ ಭಿಕ್ಖೂ ಠಿತಕಾವ ಉದ್ದಿಸಾಪೇನ್ತಿ ಧಮ್ಮಗಾರವೇನ. ತತ್ಥ ಥೇರಾ ಚೇವ ಭಿಕ್ಖೂ ಕಿಲಮನ್ತಿ, ಆಯಸ್ಮಾ ಚ ಉಪಾಲಿ ಕಿಲಮತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ನವಕೇನ ಭಿಕ್ಖುನಾ ಉದ್ದಿಸನ್ತೇನ ಸಮಕೇ ವಾ ಆಸನೇ ನಿಸೀದಿತುಂ, ಉಚ್ಚತರೇ ವಾ ಧಮ್ಮಗಾರವೇನ; ಥೇರೇನ ಭಿಕ್ಖುನಾ ಉದ್ದಿಸಾಪೇನ್ತೇನ ಸಮಕೇ ವಾ ಆಸನೇ ನಿಸೀದಿತುಂ, ನೀಚತರೇ ವಾ ಧಮ್ಮಗಾರವೇನಾ’’ತಿ.

ತೇನ ಖೋ ಪನ ಸಮಯೇನ ಬಹೂ ಭಿಕ್ಖೂ ಆಯಸ್ಮತೋ ಉಪಾಲಿಸ್ಸ ಸನ್ತಿಕೇ ಠಿತಕಾ ಉದ್ದೇಸಂ ಪಟಿಮಾನೇನ್ತಾ ಕಿಲಮನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸಮಾನಾಸನಿಕೇಹಿ ಸಹ ನಿಸೀದಿತು’’ನ್ತಿ. ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕಿತ್ತಾವತಾ ನು ಖೋ ಸಮಾನಾಸನಿಕೋ ಹೋತೀ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ – ‘‘ಅನುಜಾನಾಮಿ, ಭಿಕ್ಖವೇ, ತಿವಸ್ಸನ್ತರೇನ ಸಹ ನಿಸೀದಿತು’’ನ್ತಿ.

ತೇನ ಖೋ ಪನ ಸಮಯೇನ ಸಮ್ಬಹುಲಾ ಭಿಕ್ಖೂ ಸಮಾನಾಸನಿಕಾ ಮಞ್ಚೇ [ಏಕಮಞ್ಚೇ (ಸ್ಯಾ.)] ನಿಸೀದಿತ್ವಾ ಮಞ್ಚಂ ಭಿನ್ದಿಂಸು, ಪೀಠೇ [ಏಕಪೀಠೇ (ಸ್ಯಾ.)] ನಿಸೀದಿತ್ವಾ ಪೀಠಂ ಭಿನ್ದಿಂಸು. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ತಿವಗ್ಗಸ್ಸ ಮಞ್ಚಂ, ತಿವಗ್ಗಸ್ಸ ಪೀಠ’’ನ್ತಿ. ತಿವಗ್ಗೋಪಿ ಮಞ್ಚೇ ನಿಸೀದಿತ್ವಾ ಮಞ್ಚಂ ಭಿನ್ದಿ, ಪೀಠೇ ನಿಸೀದಿತ್ವಾ ಪೀಠಂ ಭಿನ್ದಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ದುವಗ್ಗಸ್ಸ ಮಞ್ಚಂ, ದುವಗ್ಗಸ್ಸ ಪೀಠ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅಸಮಾನಾಸನಿಕೇಹಿ ಸಹ ದೀಘಾಸನೇ ನಿಸೀದಿತುಂ ಕುಕ್ಕುಚ್ಚಾಯನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಠಪೇತ್ವಾ ಪಣ್ಡಕಂ, ಮಾತುಗಾಮಂ, ಉಭತೋಬ್ಯಞ್ಜನಕಂ, ಅಸಮಾನಾಸನಿಕೇಹಿ ಸಹ ದೀಘಾಸನೇ ನಿಸೀದಿತು’’ನ್ತಿ. ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕಿತ್ತಕಂ ಪಚ್ಛಿಮಂ ನು ಖೋ ದೀಘಾಸನಂ ಹೋತೀ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಯಂ ತಿಣ್ಣಂ ಪಹೋತಿ, ಏತ್ತಕಂ ಪಚ್ಛಿಮಂ ದೀಘಾಸನ’’ನ್ತಿ.

ತೇನ ಖೋ ಪನ ಸಮಯೇನ ವಿಸಾಖಾ ಮಿಗಾರಮಾತಾ ಸಙ್ಘಸ್ಸ ಅತ್ಥಾಯ ಸಾಳಿನ್ದಂ ಪಾಸಾದಂ ಕಾರಾಪೇತುಕಾಮಾ ಹೋತಿ ಹತ್ಥಿನಖಕಂ. ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ಕಿಂ ನು ಖೋ ಭಗವತಾ ಪಾಸಾದಪರಿಭೋಗೋ ಅನುಞ್ಞಾತೋ ಕಿಂ ಅನನುಞ್ಞಾತೋ’’ತಿ? ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸಬ್ಬಂ ಪಾಸಾದಪರಿಭೋಗ’’ನ್ತಿ.

ತೇನ ಖೋ ಪನ ಸಮಯೇನ ರಞ್ಞೋ ಪಸೇನದಿಸ್ಸ ಕೋಸಲಸ್ಸ ಅಯ್ಯಿಕಾ ಕಾಲಙ್ಕತಾ ಹೋತಿ. ತಸ್ಸ ಕಾಲಙ್ಕಿರಿಯಾಯ ಸಙ್ಘಸ್ಸ ಬಹುಂ ಅಕಪ್ಪಿಯಭಣ್ಡಂ ಉಪ್ಪನ್ನಂ ಹೋತಿ, ಸೇಯ್ಯಥಿದಂ – ಆಸನ್ದಿ, ಪಲ್ಲಙ್ಕೋ, ಗೋನಕೋ, ಚಿತ್ತಕೋ, ಪಟಿಕಾ, ಪಟಲಿಕಾ, ತೂಲಿಕಾ, ವಿಕತಿಕಾ, ಉದ್ದಲೋಮೀ, ಏಕನ್ತಲೋಮೀ, ಕಟ್ಟಿಸ್ಸಂ, ಕೋಸೇಯ್ಯಂ, ಕುತ್ತಕಂ, ಹತ್ಥತ್ಥರಂ, ಅಸ್ಸತ್ಥರಂ, ರಥತ್ಥರಂ, ಅಜಿನಪ್ಪವೇಣಿ, ಕದಲಿಮಿಗಪ್ಪವರಪಚ್ಚತ್ಥರಣಂ, ಸಉತ್ತರಚ್ಛದಂ, ಉಭತೋಲೋಹಿತಕೂಪಧಾನಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಆಸನ್ದಿಯಾ ಪಾದೇ ಛಿನ್ದಿತ್ವಾ ಪರಿಭುಞ್ಜಿತುಂ, ಪಲ್ಲಙ್ಕಸ್ಸ ವಾಳೇ ಭಿನ್ದಿತ್ವಾ ಪರಿಭುಞ್ಜಿತುಂ, ತೂಲಿಕಂ ವಿಜಟೇತ್ವಾ ಬಿಬ್ಬೋಹನಂ ಕಾತುಂ, ಅವಸೇಸಂ ಭೂಮತ್ಥರಣಂ [ಸುಮ್ಮತ್ಥರಣಂ (ಸೀ. ಸ್ಯಾ.)] ಕಾತು’’ನ್ತಿ.

ಅವಿಸ್ಸಜ್ಜಿಯವತ್ಥು

೩೨೧. ತೇನ ಖೋ ಪನ ಸಮಯೇನ ಸಾವತ್ಥಿಯಾ ಅವಿದೂರೇ ಅಞ್ಞತರಸ್ಮಿಂ ಗಾಮಕಾವಾಸೇ ಆವಾಸಿಕಾ ಭಿಕ್ಖೂ ಉಪದ್ದುತಾ ಹೋನ್ತಿ ಆಗನ್ತುಕಗಮಿಕಾನಂ ಭಿಕ್ಖೂನಂ ಸೇನಾಸನಂ ಪಞ್ಞಪೇನ್ತಾ. ಅಥ ಖೋ ತೇಸಂ ಭಿಕ್ಖೂನಂ ಏತದಹೋಸಿ – ‘‘ಏತರಹಿ ಖೋ ಮಯಂ, ಆವುಸೋ, ಉಪದ್ದುತಾ ಆಗನ್ತುಕಗಮಿಕಾನಂ ಭಿಕ್ಖೂನಂ ಸೇನಾಸನಂ ಪಞ್ಞಪೇನ್ತಾ. ಹನ್ದ ಮಯಂ, ಆವುಸೋ, ಸಬ್ಬಂ ಸಙ್ಘಿಕಂ ಸೇನಾಸನಂ ಏಕಸ್ಸ ದೇಮ. ತಸ್ಸ ಸನ್ತಕಂ ಪರಿಭುಞ್ಜಿಸ್ಸಾಮಾ’’ತಿ. ತೇ ಸಬ್ಬಂ ಸಙ್ಘಿಕಂ ಸೇನಾಸನಂ ಏಕಸ್ಸ ಅದಂಸು. ಆಗನ್ತುಕಾ ಭಿಕ್ಖೂ ತೇ ಭಿಕ್ಖೂ ಏತದವೋಚುಂ – ‘‘ಅಮ್ಹಾಕಂ, ಆವುಸೋ, ಸೇನಾಸನಂ ಪಞ್ಞಾಪೇಥಾ’’ತಿ. ‘‘ನತ್ಥಾವುಸೋ, ಸಙ್ಘಿಕಂ ಸೇನಾಸನಂ; ಸಬ್ಬಂ ಅಮ್ಹೇಹಿ ಏಕಸ್ಸ ದಿನ್ನ’’ನ್ತಿ. ‘‘ಕಿಂ ಪನ ತುಮ್ಹೇ, ಆವುಸೋ, ಸಙ್ಘಿಕಂ ಸೇನಾಸನಂ ವಿಸ್ಸಜ್ಜೇಥಾ’’ತಿ? ‘‘ಏವಮಾವುಸೋ’’ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖೂ ಸಙ್ಘಿಕಂ ಸೇನಾಸನಂ ವಿಸ್ಸಜ್ಜೇಸ್ಸನ್ತೀ’’ತಿ [ವಿಸ್ಸಜ್ಜಿಸ್ಸನ್ತೀತಿ (ಕ.)]! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಕಿರ, ಭಿಕ್ಖವೇ, ಭಿಕ್ಖೂ ಸಙ್ಘಿಕಂ ಸೇನಾಸನಂ ವಿಸ್ಸಜ್ಜೇನ್ತೀ’’ತಿ? ‘‘ಸಚ್ಚಂ ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ‘‘ಕಥಞ್ಹಿ ನಾಮ ತೇ, ಭಿಕ್ಖವೇ, ಮೋಘಪುರಿಸಾ ಸಙ್ಘಿಕಂ ಸೇನಾಸನಂ ವಿಸ್ಸಜ್ಜೇಸ್ಸನ್ತಿ? ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –

‘‘ಪಞ್ಚಿಮಾನಿ, ಭಿಕ್ಖವೇ, ಅವಿಸ್ಸಜ್ಜಿಯಾನಿ, ನ ವಿಸ್ಸಜ್ಜೇತಬ್ಬಾನಿ [ನ ವಿಸ್ಸಜ್ಜಿತಬ್ಬಾನಿ (ಕ.)], ಸಙ್ಘೇನ ವಾ ಗಣೇನ ವಾ ಪುಗ್ಗಲೇನ ವಾ. ವಿಸ್ಸಜ್ಜಿತಾನಿಪಿ ಅವಿಸ್ಸಜ್ಜಿತಾನಿ ಹೋನ್ತಿ. ಯೋ ವಿಸ್ಸಜ್ಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸ. ಕತಮಾನಿ ಪಞ್ಚ? ಆರಾಮೋ, ಆರಾಮವತ್ಥು – ಇದಂ ಪಠಮಂ ಅವಿಸ್ಸಜ್ಜಿಯಂ, ನ ವಿಸ್ಸಜ್ಜೇತಬ್ಬಂ, ಸಙ್ಘೇನ ವಾ ಗಣೇನ ವಾ ಪುಗ್ಗಲೇನ ವಾ. ವಿಸ್ಸಜ್ಜಿತಮ್ಪಿ ಅವಿಸ್ಸಜ್ಜಿತಂ ಹೋತಿ. ಯೋ ವಿಸ್ಸಜ್ಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸ.

‘‘ವಿಹಾರೋ, ವಿಹಾರವತ್ಥು – ಇದಂ ದುತಿಯಂ ಅವಿಸ್ಸಜ್ಜಿಯಂ, ನ ವಿಸ್ಸಜ್ಜೇತಬ್ಬಂ, ಸಙ್ಘೇನ ವಾ ಗಣೇನ ವಾ ಪುಗ್ಗಲ್ಲೇನ ವಾ. ವಿಸ್ಸಜ್ಜಿತಮ್ಪಿ ಅವಿಸ್ಸಜ್ಜಿತಂ ಹೋತಿ. ಯೋ ವಿಸ್ಸಜ್ಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸ.

‘‘ಮಞ್ಚೋ, ಪೀಠಂ, ಭಿಸಿ, ಬಿಬ್ಬೋಹನಂ – ಇದಂ ತತಿಯಂ ಅವಿಸ್ಸಜ್ಜಿಯಂ, ನ ವಿಸ್ಸಜ್ಜೇತಬ್ಬಂ, ಸಙ್ಘೇನ ವಾ ಗಣೇನ ವಾ ಪುಗ್ಗಲೇನ ವಾ. ವಿಸ್ಸಜ್ಜಿತಮ್ಪಿ ಅವಿಸ್ಸಜ್ಜಿತಂ ಹೋತಿ. ಯೋ ವಿಸ್ಸಜ್ಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸ.

‘‘ಲೋಹಕುಮ್ಭೀ, ಲೋಹಭಾಣಕಂ, ಲೋಹವಾರಕೋ, ಲೋಹಕಟಾಹಂ, ವಾಸಿ, ಪರಸು [ಫರಸು (ಸೀ. ಸ್ಯಾ. ಕ.)], ಕುಠಾರೀ [ಕುಧಾರೀ (ಕ.)], ಕುದಾಲೋ, ನಿಖಾದನಂ – ಇದಂ ಚತುತ್ಥಂ ಅವಿಸ್ಸಜ್ಜಿಯಂ, ನ ವಿಸ್ಸಜ್ಜೇತಬ್ಬಂ, ಸಙ್ಘೇನ ವಾ ಗಣೇನ ವಾ ಪುಗ್ಗಲೇನ ವಾ. ವಿಸ್ಸಜ್ಜಿತಮ್ಪಿ ಅವಿಸ್ಸಜ್ಜಿತಂ ಹೋತಿ. ಯೋ ವಿಸ್ಸಜ್ಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸ.

‘‘ವಲ್ಲಿ, ವೇಳು, ಮುಞ್ಜಂ, ಪಬ್ಬಜಂ [ಬಬ್ಬಜಂ (ಸೀ.)], ತಿಣಂ, ಮತ್ತಿಕಾ, ದಾರುಭಣ್ಡಂ, ಮತ್ತಿಕಾಭಣ್ಡಂ – ಇದಂ ಪಞ್ಚಮಂ ಅವಿಸ್ಸಜ್ಜಿಯಂ, ನ ವಿಸ್ಸಜ್ಜೇತಬ್ಬಂ, ಸಙ್ಘೇನ ವಾ ಗಣೇನ ವಾ ಪುಗ್ಗಲೇನ ವಾ. ವಿಸ್ಸಜ್ಜಿತಮ್ಪಿ ಅವಿಸ್ಸಜ್ಜಿತಂ ಹೋತಿ. ಯೋ ವಿಸ್ಸಜ್ಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸ. ಇಮಾನಿ ಖೋ, ಭಿಕ್ಖವೇ, ಪಞ್ಚ ಅವಿಸ್ಸಜ್ಜಿಯಾನಿ, ನ ವಿಸ್ಸಜ್ಜೇತಬ್ಬಾನಿ, ಸಙ್ಘೇನ ವಾ ಗಣೇನ ವಾ ಪುಗ್ಗಲೇನ ವಾ. ವಿಸ್ಸಜ್ಜಿತಾನಿಪಿ ಅವಿಸ್ಸಜ್ಜಿತಾನಿ ಹೋನ್ತಿ. ಯೋ ವಿಸ್ಸಜ್ಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ.

ಅವೇಭಙ್ಗಿಯವತ್ಥು

೩೨೨. ಅಥ ಖೋ ಭಗವಾ ಸಾವತ್ಥಿಯಂ ಯಥಾಭಿರನ್ತಂ ವಿಹರಿತ್ವಾ ಯೇನ ಕೀಟಾಗಿರಿ ತೇನ ಚಾರಿಕಂ ಪಕ್ಕಾಮಿ ಮಹತಾ ಭಿಕ್ಖುಸಙ್ಘೇನ ಸದ್ಧಿಂ ಪಞ್ಚಮತ್ತೇಹಿ ಭಿಕ್ಖುಸತೇಹಿ ಸಾರಿಪುತ್ತಮೋಗ್ಗಲ್ಲಾನೇಹಿ ಚ. ಅಸ್ಸೋಸುಂ ಖೋ ಅಸ್ಸಜಿಪುನಬ್ಬಸುಕಾ ಭಿಕ್ಖೂ – ‘‘ಭಗವಾ ಕಿರ ಕೀಟಾಗಿರಿಂ ಆಗಚ್ಛತಿ ಮಹತಾ ಭಿಕ್ಖುಸಙ್ಘೇನ ಸದ್ಧಿಂ ಪಞ್ಚಮತ್ತೇಹಿ ಭಿಕ್ಖುಸತೇಹಿ ಸಾರಿಪುತ್ತಮೋಗ್ಗಲ್ಲಾನೇಹಿ ಚ’’. ‘‘ಹನ್ದ ಮಯಂ, ಆವುಸೋ, ಸಬ್ಬಂ ಸಙ್ಘಿಕಂ ಸೇನಾಸನಂ ಭಾಜೇಮ. ಪಾಪಿಚ್ಛಾ ಸಾರಿಪುತ್ತಮೋಗ್ಗಲ್ಲಾನಾ, ಪಾಪಿಕಾನಂ ಇಚ್ಛಾನಂ ವಸಂ ಗತಾ; ನ ಮಯಂ ತೇಸಂ ಸೇನಾಸನಂ ಪಞ್ಞಪೇಸ್ಸಾಮಾ’’ತಿ, ತೇ ಸಬ್ಬಂ ಸಙ್ಘಿಕಂ ಸೇನಾಸನಂ ಭಾಜೇಸುಂ. ಅಥ ಖೋ ಭಗವಾ ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ಕೀಟಾಗಿರಿ ತದವಸರಿ. ಅಥ ಖೋ ಭಗವಾ ಸಮ್ಬಹುಲೇ ಭಿಕ್ಖೂ ಆಮನ್ತೇಸಿ – ‘‘ಗಚ್ಛಥ ತುಮ್ಹೇ, ಭಿಕ್ಖವೇ; ಅಸ್ಸಜಿಪುನಬ್ಬಸುಕೇ ಭಿಕ್ಖೂ ಉಪಸಙ್ಕಮಿತ್ವಾ ಏವಂ ವದೇಥ – ‘ಭಗವಾ, ಆವುಸೋ, ಆಗಚ್ಛತಿ ಮಹತಾ ಭಿಕ್ಖುಸಙ್ಘೇನ ಸದ್ಧಿಂ ಪಞ್ಚಮತ್ತೇಹಿ ಭಿಕ್ಖುಸತೇಹಿ ಸಾರಿಪುತ್ತಮೋಗ್ಗಲ್ಲಾನೇಹಿ ಚ. ಭಗವತೋ ಚ, ಆವುಸೋ, ಸೇನಾಸನಂ ಪಞ್ಞಪೇಥ, ಭಿಕ್ಖುಸಙ್ಘಸ್ಸ ಚ, ಸಾರಿಪುತ್ತಮೋಗ್ಗಲ್ಲಾನಾನಞ್ಚಾ’’’ತಿ. ‘‘ಏವಂ ಭನ್ತೇ’’ತಿ ಖೋ ತೇ ಭಿಕ್ಖೂ ಭಗವತೋ ಪಟಿಸ್ಸುತ್ವಾ ಯೇನ ಅಸ್ಸಜಿಪುನಬ್ಬಸುಕಾ ಭಿಕ್ಖೂ ತೇನುಪಸಙ್ಕಮಿಂಸು, ಉಪಸಙ್ಕಮಿತ್ವಾ ಅಸ್ಸಜಿಪುನಬ್ಬಸುಕೇ ಭಿಕ್ಖೂ ಏತದವೋಚುಂ – ‘‘ಭಗವಾ, ಆವುಸೋ, ಆಗಚ್ಛತಿ ಮಹತಾ ಭಿಕ್ಖುಸಙ್ಘೇನ ಸದ್ಧಿಂ ಪಞ್ಚಮತ್ತೇಹಿ ಭಿಕ್ಖುಸತೇಹಿ ಸಾರಿಪುತ್ತಮೋಗ್ಗಲ್ಲಾನೇಹಿ ಚ. ಭಗವತೋ ಚ, ಆವುಸೋ, ಸೇನಾಸನಂ ಪಞ್ಞಪೇಥ, ಭಿಕ್ಖುಸಙ್ಘಸ್ಸ ಚ, ಸಾರಿಪುತ್ತಮೋಗ್ಗಲ್ಲಾನಾನಞ್ಚಾ’’ತಿ. ‘‘ನತ್ಥಾವುಸೋ, ಸಙ್ಘಿಕಂ ಸೇನಾಸನಂ. ಸಬ್ಬಂ ಅಮ್ಹೇಹಿ ಭಾಜಿತಂ. ಸ್ವಾಗತಂ, ಆವುಸೋ, ಭಗವತೋ. ಯಸ್ಮಿಂ ವಿಹಾರೇ ಭಗವಾ ಇಚ್ಛಿಸ್ಸತಿ ತಸ್ಮಿಂ ವಿಹಾರೇ ವಸಿಸ್ಸತಿ. ಪಾಪಿಚ್ಛಾ ಸಾರಿಪುತ್ತಮೋಗ್ಗಲ್ಲಾನಾ, ಪಾಪಿಕಾನಂ ಇಚ್ಛಾನಂ ವಸಂ ಗತಾ. ನ ಮಯಂ ತೇಸಂ ಸೇನಾಸನಂ ಪಞ್ಞಪೇಸ್ಸಾಮಾ’’ತಿ. ‘‘ಕಿಂ ಪನ ತುಮ್ಹೇ, ಆವುಸೋ, ಸಙ್ಘಿಕಂ ಸೇನಾಸನಂ ಭಾಜಿತ್ಥಾ’’ತಿ? ‘‘ಏವಮಾವುಸೋ’’ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಅಸ್ಸಜಿಪುನಬ್ಬಸುಕಾ ಭಿಕ್ಖೂ ಸಙ್ಘಿಕಂ ಸೇನಾಸನಂ ಭಾಜೇಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ಸಚ್ಚಂ ಕಿರ, ಭಿಕ್ಖವೇ…ಪೇ… ‘‘ಸಚ್ಚಂ ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ…ಪೇ… ‘‘ಕಥಞ್ಹಿ ನಾಮ ತೇ, ಭಿಕ್ಖವೇ, ಮೋಘಪುರಿಸಾ ಸಙ್ಘಿಕಂ ಸೇನಾಸನಂ ಭಾಜೇಸ್ಸನ್ತಿ? ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –

‘‘ಪಞ್ಚಿಮಾನಿ, ಭಿಕ್ಖವೇ, ಅವೇಭಙ್ಗಿಯಾನಿ [ಅವೇಭಙ್ಗಿಕಾನಿ (ಕ.)], ನ ವಿಭಜಿತಬ್ಬಾನಿ, ಸಙ್ಘೇನ ವಾ ಗಣೇನ ವಾ ಪುಗ್ಗಲೇನ ವಾ. ವಿಭತ್ತಾನಿಪಿ ಅವಿಭತ್ತಾನಿ ಹೋನ್ತಿ. ಯೋ ವಿಭಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸ. ಕತಮಾನಿ ಪಞ್ಚ? ಆರಾಮೋ, ಆರಾಮವತ್ಥು – ಇದಂ ಪಠಮಂ ಅವೇಭಙ್ಗಿಯಂ, ನ ವಿಭಜಿತಬ್ಬಂ, ಸಙ್ಘೇನ ವಾ ಗಣೇನ ವಾ ಪುಗ್ಗಲೇನ ವಾ. ವಿಭತ್ತಮ್ಪಿ ಅವಿಭತ್ತಂ ಹೋತಿ. ಯೋ ವಿಭಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸ.

‘‘ವಿಹಾರೋ, ವಿಹಾರವತ್ಥು – ಇದಂ ದುತಿಯಂ ಅವೇಭಙ್ಗಿಯಂ, ನ ವಿಭಜಿತಬ್ಬಂ, ಸಙ್ಘೇನ ವಾ ಗಣೇನ ವಾ ಪುಗ್ಗಲೇನ ವಾ. ವಿಭತ್ತಮ್ಪಿ ಅವಿಭತ್ತಂ ಹೋತಿ. ಯೋ ವಿಭಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸ.

‘‘ಮಞ್ಚೋ, ಪೀಠಂ, ಭಿಸಿ, ಬಿಬ್ಬೋಹನಂ – ಇದಂ ತತಿಯಂ ಅವೇಭಙ್ಗಿಯಂ, ನ ವಿಭಜಿತಬ್ಬಂ, ಸಙ್ಘೇನ ವಾ ಗಣೇನ ವಾ ಪುಗ್ಗಲೇನ ವಾ. ವಿಭತ್ತಮ್ಪಿ ಅವಿಭತ್ತಂ ಹೋತಿ. ಯೋ ವಿಭಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸ.

‘‘ಲೋಹಕುಮ್ಭೀ, ಲೋಹಭಾಣಕಂ, ಲೋಹವಾರಕೋ, ಲೋಹಕಟಾಹಂ, ವಾಸೀ, ಪರಸು, ಕುಠಾರೀ, ಕುದಾಲೋ, ನಿಖಾದನಂ – ಇದಂ ಚತುತ್ಥಂ ಅವೇಭಙ್ಗಿಯಂ, ನ ವಿಭಜಿತಬ್ಬಂ, ಸಙ್ಘೇನ ವಾ ಗಣೇನ ವಾ ಪುಗ್ಗಲೇನ ವಾ. ವಿಭತ್ತಮ್ಪಿ ಅವಿಭತ್ತಂ ಹೋತಿ. ಯೋ ವಿಭಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸ.

‘‘ವಲ್ಲೀ, ವೇಳು, ಮುಞ್ಜಂ, ಪಬ್ಬಜಂ, ತಿಣಂ, ಮತ್ತಿಕಾ, ದಾರುಭಣ್ಡಂ, ಮತ್ತಿಕಾಭಣ್ಡಂ – ಇದಂ ಪಞ್ಚಮಂ ಅವೇಭಙ್ಗಿಯಂ, ನ ವಿಭಜಿತಬ್ಬಂ, ಸಙ್ಘೇನ ವಾ ಗಣೇನ ವಾ ಪುಗ್ಗಲೇನ ವಾ. ವಿಭತ್ತಮ್ಪಿ ಅವಿಭತ್ತಂ ಹೋತಿ. ಯೋ ವಿಭಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸ. ಇಮಾನಿ ಖೋ, ಭಿಕ್ಖವೇ, ಪಞ್ಚ ಅವೇಭಙ್ಗಿಯಾನಿ, ನ ವಿಭಜಿತಬ್ಬಾನಿ, ಸಙ್ಘೇನ ವಾ ಗಣೇನ ವಾ ಪುಗ್ಗಲೇನ ವಾ. ವಿಭತ್ತಾನಿಪಿ ಅವಿಭತ್ತಾನಿ ಹೋನ್ತಿ. ಯೋ ವಿಭಜೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ.

ನವಕಮ್ಮದಾನಕಥಾ

೩೨೩. ಅಥ ಖೋ ಭಗವಾ ಕೀಟಾಗಿರಿಸ್ಮಿಂ ಯಥಾಭಿರನ್ತಂ ವಿಹರಿತ್ವಾ ಯೇನ ಆಳವೀ ತೇನ ಚಾರಿಕಂ ಪಕ್ಕಾಮಿ. ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ಆಳವೀ ತದವಸರಿ. ತತ್ರ ಸುದಂ ಭಗವಾ ಆಳವಿಯಂ ವಿಹರತಿ ಅಗ್ಗಾಳವೇ ಚೇತಿಯೇ. ತೇನ ಖೋ ಪನ ಸಮಯೇನ ಆಳವಕಾ [ಆಳವಿಕಾ (ಸ್ಯಾ. ಕ.)] ಭಿಕ್ಖೂ ಏವರೂಪಾನಿ ನವಕಮ್ಮಾನಿ ದೇನ್ತಿ – ಪಿಣ್ಡನಿಕ್ಖೇಪನಮತ್ತೇನಪಿ ನವಕಮ್ಮಂ ದೇನ್ತಿ; ಕುಟ್ಟಲೇಪನಮತ್ತೇನಪಿ ನವಕಮ್ಮಂ ದೇನ್ತಿ; ದ್ವಾರಟ್ಠಪನಮತ್ತೇನಪಿ ನವಕಮ್ಮಂ ದೇನ್ತಿ; ಅಗ್ಗಳವಟ್ಟಿಕರಣಮತ್ತೇನಪಿ ನವಕಮ್ಮಂ ದೇನ್ತಿ; ಆಲೋಕಸನ್ಧಿಕರಣಮತ್ತೇನಪಿ ನವಕಮ್ಮಂ ದೇನ್ತಿ; ಸೇತವಣ್ಣಕರಣಮತ್ತೇನಪಿ ನವಕಮ್ಮಂ ದೇನ್ತಿ; ಕಾಳವಣ್ಣಕರಣಮತ್ತೇನಪಿ ನವಕಮ್ಮಂ ದೇನ್ತಿ; ಗೇರುಕಪರಿಕಮ್ಮಕರಣಮತ್ತೇನಪಿ ನವಕಮ್ಮಂ ದೇನ್ತಿ; ಛಾದನಮತ್ತೇನಪಿ ನವಕಮ್ಮಂ ದೇನ್ತಿ; ಬನ್ಧನಮತ್ತೇನಪಿ ನವಕಮ್ಮಂ ದೇನ್ತಿ; ಭಣ್ಡಿಕಾಟ್ಠಪನಮತ್ತೇನಪಿ ನವಕಮ್ಮಂ ದೇನ್ತಿ; ಖಣ್ಡಫುಲ್ಲಪಟಿಸಙ್ಖರಣಮತ್ತೇನಪಿ ನವಕಮ್ಮಂ ದೇನ್ತಿ; ಪರಿಭಣ್ಡಕರಣಮತ್ತೇನಪಿ ನವಕಮ್ಮಂ ದೇನ್ತಿ; ವೀಸತಿವಸ್ಸಿಕಮ್ಪಿ ನವಕಮ್ಮಂ ದೇನ್ತಿ; ತಿಂಸವಸ್ಸಿಕಮ್ಪಿ ನವಕಮ್ಮಂ ದೇನ್ತಿ; ಯಾವಜೀವಿಕಮ್ಪಿ ನವಕಮ್ಮಂ ದೇನ್ತಿ; ಧೂಮಕಾಲಿಕಮ್ಪಿ ಪರಿಯೋಸಿತಂ ವಿಹಾರಂ ನವಕಮ್ಮಂ ದೇನ್ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಳವಕಾ ಭಿಕ್ಖೂ ಏವರೂಪಾನಿ ನವಕಮ್ಮಾನಿ ದಸ್ಸನ್ತಿ – ಪಿಣ್ಡನಿಕ್ಖೇಪನಮತ್ತೇನಪಿ ನವಕಮ್ಮಂ ದಸ್ಸನ್ತಿ; ಕುಟ್ಟಲೇಪನಮತ್ತೇನಪಿ… ದ್ವಾರಟ್ಠಪನಮತ್ತೇನಪಿ … ಅಗ್ಗಳವಟ್ಟಿಕರಣಮತ್ತೇನಪಿ… ಆಲೋಕಸನ್ಧಿಕರಣಮತ್ತೇನಪಿ… ಸೇತವಣ್ಣಕರಣಮತ್ತೇನಪಿ… ಕಾಳವಣ್ಣಕರಣಮತ್ತೇನಪಿ… ಗೇರುಕಪರಿಕಮ್ಮಕರಣಮತ್ತೇನಪಿ… ಛಾದೇನಮತ್ತೇನಪಿ… ಬನ್ಧನಮತ್ತೇನಪಿ… ಭಣ್ಡಿಕಾಳಪನಮತ್ತೇನಪಿ… ಖಣ್ಡಫುಲ್ಲಪಟಿಸಙ್ಖರಣಮತ್ತೇನಪಿ… ಪರಿಭಣ್ಡಕರಣಮತ್ತೇನಪಿ… ವಿಸತಿವಸ್ಸಿಕಮ್ಪಿ… ತಿಂಸವಸ್ಸಿಕಮ್ಪಿ… ಯಾವಜೀವಿಕಮ್ಪಿ… ಧೂಮಕಾಲಿಕಮ್ಪಿ ಪರಿಯೋಸಿತಂ ವಿಹಾರಂ ನವಕಮ್ಮಂ ದಸ್ಸನ್ತೀ’’ತಿ! ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ಸಚ್ಚಂ ಕಿರ, ಭಿಕ್ಖವೇ…ಪೇ… ‘‘ಸಚ್ಚಂ ಭಗವಾ’’ತಿ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ಪಿಣ್ಡನಿಕ್ಖೇಪನಮತ್ತೇನ ನವಕಮ್ಮಂ ದಾತಬ್ಬಂ; ನ ಕುಟ್ಟಲೇಪನಮತ್ತೇನ ನವಕಮ್ಮಂ ದಾತಬ್ಬಂ. ನ ದ್ವಾರಟ್ಠಪನಮತ್ತೇನ ನವಕಮ್ಮಂ ದಾತಬ್ಬಂ. ನ ಅಗ್ಗಳವಟ್ಟಿಕರಣಮತ್ತೇನ ನವಕಮ್ಮಂ ದಾತಬ್ಬಂ. ನ ಆಲೋಕಸನ್ಧಿಕರಣಮತ್ತೇನ ನವಕಮ್ಮಂ ದಾತಬ್ಬಂ. ನ ಸೇತವಣ್ಣಕರಣಮತ್ತೇನ ನವಕಮ್ಮಂ ದಾತಬ್ಬಂ. ನ ಕಾಳವಣ್ಣಕರಣಮತ್ತೇನ ನವಕಮ್ಮಂ ದಾತಬ್ಬಂ. ನ ಗೇರುಕಪರಿಕಮ್ಮಕರಣಮತ್ತೇನ ನವಕಮ್ಮಂ ದಾತಬ್ಬಂ. ನ ಛಾದೇನಮತ್ತೇನ ನವಕಮ್ಮಂ ದಾತಬ್ಬಂ. ನ ಬನ್ಧನಮತ್ತೇನ ನವಕಮ್ಮಂ ದಾತಬ್ಬಂ. ನ ಭಣ್ಡಿಕಾಳಪನಮತ್ತೇನ ನವಕಮ್ಮಂ ದಾತಬ್ಬಂ. ನ ಖಣ್ಡಫುಲ್ಲಪಟಿಸಙ್ಖರಣಮತ್ತೇನ ನವಕಮ್ಮಂ ದಾತಬ್ಬಂ. ನ ಪರಿಭಣ್ಡಕರಣಮತ್ತೇನ ನವಕಮ್ಮಂ ದಾತಬ್ಬಂ. ನ ವಿಸತಿವಸ್ಸಿಕಂ ನವಕಮ್ಮಂ ದಾತಬ್ಬಂ. ನ ತಿಂಸವಸ್ಸಿಕಂ ನವಕಮ್ಮಂ ದಾತಬ್ಬಂ. ನ ಯಾವಜೀವಿಕಂ ನವಕಮ್ಮಂ ದಾತಬ್ಬಂ. ನ ಧೂಮಕಾಲಿಕಮ್ಪಿ ಪರಿಯೋಸಿತಂ ವಿಹಾರಂ ನವಕಮ್ಮಂ ದಾತಬ್ಬಂ. ಯೋ ದದೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಅಕತಂ ವಾ ವಿಪ್ಪಕತಂ ವಾ ನವಕಮ್ಮಂ ದಾತುಂ, ಖುದ್ದಕೇ ವಿಹಾರೇ ಕಮ್ಮಂ ಓಲೋಕೇತ್ವಾ ಛಪ್ಪಞ್ಚವಸ್ಸಿಕಂ ನವಕಮ್ಮಂ ದಾತುಂ, ಅಡ್ಢಯೋಗೇ ಕಮ್ಮಂ ಓಲೋಕೇತ್ವಾ ಸತ್ತಟ್ಠವಸ್ಸಿಕಂ ನವಕಮ್ಮಂ ದಾತುಂ, ಮಹಲ್ಲಕೇ ವಿಹಾರೇ ಪಾಸಾದೇ ವಾ ಕಮ್ಮಂ ಓಲೋಕೇತ್ವಾ ದಸದ್ವಾದಸವಸ್ಸಿಕಂ ನವಕಮ್ಮಂ ದಾತು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಸಬ್ಬೇ ವಿಹಾರೇ ನವಕಮ್ಮಂ ದೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಸಬ್ಬೇ ವಿಹಾರೇ ನವಕಮ್ಮಂ ದಾತಬ್ಬಂ. ಯೋ ದದೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಏಕಸ್ಸ ದ್ವೇ ದೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಏಕಸ್ಸ ದ್ವೇ ದಾತಬ್ಬಾ. ಯೋ ದದೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ನವಕಮ್ಮಂ ಗಹೇತ್ವಾ ಅಞ್ಞಂ ವಾಸೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ನವಕಮ್ಮಂ ಗಹೇತ್ವಾ ಅಞ್ಞೋ ವಾಸೇತಬ್ಬೋ. ಯೋ ವಾಸೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ನವಕಮ್ಮಂ ಗಹೇತ್ವಾ ಸಙ್ಘಿಕಂ ಪಟಿಬಾಹೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ನವಕಮ್ಮಂ ಗಹೇತ್ವಾ ಸಙ್ಘಿಕಂ ಪಟಿಬಾಹಿತಬ್ಬಂ. ಯೋ ಪಟಿಬಾಹೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಏಕಂ ವರಸೇಯ್ಯಂ ಗಹೇತು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ನಿಸ್ಸೀಮೇ ಠಿತಸ್ಸ ನವಕಮ್ಮಂ ದೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ನಿಸ್ಸೀಮೇ ಠಿತಸ್ಸ ನವಕಮ್ಮಂ ದಾತಬ್ಬಂ. ಯೋ ದದೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ನವಕಮ್ಮಂ ಗಹೇತ್ವಾ ಸಬ್ಬಕಾಲಂ ಪಟಿಬಾಹನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ನವಕಮ್ಮಂ ಗಹೇತ್ವಾ ಸಬ್ಬಕಾಲಂ ಪಟಿಬಾಹಿತಬ್ಬಂ. ಯೋ ಪಟಿಬಾಹೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ವಸ್ಸಾನಂ ತೇಮಾಸಂ ಪಟಿಬಾಹಿತುಂ, ಉತುಕಾಲಂ ಪನ ನ ಪಟಿಬಾಹಿತು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ನವಕಮ್ಮಂ ಗಹೇತ್ವಾ ಪಕ್ಕಮನ್ತಿಪಿ, ವಿಬ್ಭಮನ್ತಿಪಿ, ಕಾಲಮ್ಪಿ ಕರೋನ್ತಿ; ಸಾಮಣೇರಾಪಿ ಪಟಿಜಾನನ್ತಿ; ಸಿಕ್ಖಂ ಪಚ್ಚಕ್ಖಾತಕಾಪಿ ಪಟಿಜಾನನ್ತಿ; ಅನ್ತಿಮವತ್ಥುಂ ಅಜ್ಝಾಪನ್ನಕಾಪಿ ಪಟಿಜಾನನ್ತಿ; ಉಮ್ಮತ್ತಕಾಪಿ ಪಟಿಜಾನನ್ತಿ; ಖಿತ್ತಚಿತ್ತಾಪಿ ಪಟಿಜಾನನ್ತಿ; ವೇದನಾಟ್ಟಾಪಿ ಪಟಿಜಾನನ್ತಿ; ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕಾಪಿ ಪಟಿಜಾನನ್ತಿ; ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖಿತ್ತಕಾಪಿ ಪಟಿಜಾನನ್ತಿ; ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖಿತ್ತಕಾಪಿ ಪಟಿಜಾನನ್ತಿ; ಪಣ್ಡಕಾಪಿ ಪಟಿಜಾನನ್ತಿ; ಥೇಯ್ಯಸಂವಾಸಕಾಪಿ ಪಟಿಜಾನನ್ತಿ; ತಿತ್ಥಿಯಪಕ್ಕನ್ತಕಾಪಿ

ಪಟಿಜಾನನ್ತಿ; ತಿರಚ್ಛಾನಗತಾಪಿ ಪಟಿಜಾನನ್ತಿ; ಮಾತುಘಾತಕಾಪಿ ಪಟಿಜಾನನ್ತಿ; ಪಿತುಘಾತಕಾಪಿ ಪಟಿಜಾನನ್ತಿ; ಅರಹನ್ತಘಾತಕಾಪಿ ಪಟಿಜಾನನ್ತಿ; ಭಿಕ್ಖುನಿದೂಸಕಾಪಿ ಪಟಿಜಾನನ್ತಿ; ಸಙ್ಘಭೇದಕಾಪಿ ಪಟಿಜಾನನ್ತಿ; ಲೋಹಿತುಪ್ಪಾದಕಾಪಿ ಪಟಿಜಾನನ್ತಿ; ಉಭತೋಬ್ಯಞ್ಜನಕಾಪಿ ಪಟಿಜಾನನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ನವಕಮ್ಮಂ ಗಹೇತ್ವಾ ಪಕ್ಕಮತಿ – ಮಾ ಸಙ್ಘಸ್ಸ ಹಾಯೀತಿ ಅಞ್ಞಸ್ಸ ದಾತಬ್ಬಂ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ನವಕಮ್ಮಂ ಗಹೇತ್ವಾ ವಿಬ್ಭಮತಿ…ಪೇ… ಕಾಲಙ್ಕರೋತಿ, ಸಾಮಣೇರೋ ಪಟಿಜಾನಾತಿ, ಸಿಕ್ಖಂ ಪಚ್ಚಕ್ಖಾತಕೋ ಪಟಿಜಾನಾತಿ, ಅನ್ತಿಮವತ್ಥುಂ ಅಜ್ಝಾಪನ್ನಕೋ ಪಟಿಜಾನಾತಿ, ಉಮ್ಮತ್ತಕೋ ಪಟಿಜಾನಾತಿ, ಖಿತ್ತಚಿತ್ತೋ ಪಟಿಜಾನಾತಿ, ವೇದನಾಟ್ಟೋ ಪಟಿಜಾನಾತಿ, ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕೋ ಪಟಿಜಾನಾತಿ, ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖಿತ್ತಕೋ ಪಟಿಜಾನಾತಿ, ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖಿತ್ತಕೋ ಪಟಿಜಾನಾತಿ, ಪಣ್ಡಕೋ ಪಟಿಜಾನಾತಿ, ಥೇಯ್ಯಸಂವಾಸಕೋ ಪಟಿಜಾನಾತಿ, ತಿತ್ಥಿಯಪಕ್ಕನ್ತಕೋ ಪಟಿಜಾನಾತಿ, ತಿರಚ್ಛಾನಗತೋ ಪಟಿಜಾನಾತಿ, ಮಾತುಘಾತಕೋ ಪಟಿಜಾನಾತಿ, ಪಿತುಘಾತಕೋ ಪಟಿಜಾನಾತಿ, ಅರಹನ್ತಘಾತಕೋ ಪಟಿಜಾನಾತಿ, ಭಿಕ್ಖುನೀದೂಸಕೋ ಪಟಿಜಾನಾತಿ, ಸಙ್ಘಭೇದಕೋ ಪಟಿಜಾನಾತಿ, ಲೋಹಿತುಪ್ಪಾದಕೋ ಪಟಿಜಾನಾತಿ, ಉಭತೋಬ್ಯಞ್ಜನಕೋ ಪಟಿಜಾನಾತಿ – ಮಾ ಸಙ್ಘಸ್ಸ ಹಾಯೀತಿ ಅಞ್ಞಸ್ಸ ದಾತಬ್ಬಂ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ನವಕಮ್ಮಂ ಗಹೇತ್ವಾ ವಿಪ್ಪಕತೇ ಪಕ್ಕಮತಿ – ಮಾ ಸಙ್ಘಸ್ಸ ಹಾಯೀತಿ ಅಞ್ಞಸ್ಸ ದಾತಬ್ಬಂ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ನವಕಮ್ಮಂ ಗಹೇತ್ವಾ ವಿಪ್ಪಕತೇ ವಿಬ್ಭಮತಿ…ಪೇ… ಉಭತೋಬ್ಯಞ್ಜನಕೋ ಪಟಿಜಾನಾತಿ – ಮಾ ಸಙ್ಘಸ್ಸ ಹಾಯೀತಿ ಅಞ್ಞಸ್ಸ ದಾತಬ್ಬಂ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ನವಕಮ್ಮಂ ಗಹೇತ್ವಾ ಪರಿಯೋಸಿತೇ ಪಕ್ಕಮತಿ – ತಸ್ಸೇವೇತಂ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ನವಕಮ್ಮಂ ಗಹೇತ್ವಾ ಪರಿಯೋಸಿತೇ ವಿಬ್ಭಮತಿ…ಪೇ… ಕಾಲಙ್ಕರೋತಿ, ಸಾಮಣೇರೋ ಪಟಿಜಾನಾತಿ, ಸಿಕ್ಖಂ ಪಚ್ಚಕ್ಖಾತಕೋ ಪಟಿಜಾನಾತಿ, ಅನ್ತಿಮವತ್ಥುಂ ಅಜ್ಝಾಪನ್ನಕೋ ಪಟಿಜಾನಾತಿ – ಸಙ್ಘೋ ಸಾಮೀ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ನವಕಮ್ಮಂ ಗಹೇತ್ವಾ ಪರಿಯೋಸಿತೇ ಉಮ್ಮತ್ತಕೋ ಪಟಿಜಾನಾತಿ, ಖಿತ್ತಚಿತ್ತೋ ಪಟಿಜಾನಾತಿ, ವೇದನಾಟ್ಟೋ ಪಟಿಜಾನಾತಿ, ಆಪತ್ತಿಯಾ ಅದಸ್ಸನೇ ಉಕ್ಖಿತ್ತಕೋ ಪಟಿಜಾನಾತಿ, ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖಿತ್ತಕೋ ಪಟಿಜಾನಾತಿ, ಪಾಪಿಕಾಯ ದಿಟ್ಠಿಯಾ ಅಪ್ಪಟಿನಿಸ್ಸಗ್ಗೇ ಉಕ್ಖಿತ್ತಕೋ ಪಟಿಜಾನಾತಿ – ತಸ್ಸೇವೇತಂ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ನವಕಮ್ಮಂ ಗಹೇತ್ವಾ ಪರಿಯೋಸಿತೇ ಪಣ್ಡಕೋ ಪಟಿಜಾನಾತಿ, ಥೇಯ್ಯಸಂವಾಸಕೋ ಪಟಿಜಾನಾತಿ, ತಿತ್ಥಿಯಪಕ್ಕನ್ತಕೋ ಪಟಿಜಾನಾತಿ, ತಿರಚ್ಛಾನಗತೋ ಪಟಿಜಾನಾತಿ, ಮಾತುಘಾತಕೋ ಪಟಿಜಾನಾತಿ, ಪಿತುಘಾತಕೋ ಪಟಿಜಾನಾತಿ, ಅರಹನ್ತಘಾತಕೋ ಪಟಿಜಾನಾತಿ, ಭಿಕ್ಖುನೀದೂಸಕೋ ಪಟಿಜಾನಾತಿ, ಸಙ್ಘಭೇದಕೋ ಪಟಿಜಾನಾತಿ, ಲೋಹಿತುಪ್ಪಾದಕೋ ಪಟಿಜಾನಾತಿ, ಉಭತೋಬ್ಯಞ್ಜನಕೋ ಪಟಿಜಾನಾತಿ – ಸಙ್ಘೋ ಸಾಮೀ’’ತಿ.

ಅಞ್ಞತ್ರಪರಿಭೋಗಪಟಿಕ್ಖೇಪಾದಿ

೩೨೪. [ಪಾರಾ. ೧೫೭] ತೇನ ಖೋ ಪನ ಸಮಯೇನ ಭಿಕ್ಖೂ ಅಞ್ಞತರಸ್ಸ ಉಪಾಸಕಸ್ಸ ವಿಹಾರಪರಿಭೋಗಂ ಸೇನಾಸನಂ ಅಞ್ಞತ್ರ ಪರಿಭುಞ್ಜನ್ತಿ. ಅಥ ಖೋ ಸೋ ಉಪಾಸಕೋ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಭದನ್ತಾ ಅಞ್ಞತ್ರ ಪರಿಭೋಗಂ ಅಞ್ಞತ್ರ ಪರಿಭುಞ್ಜಿಸ್ಸನ್ತೀ’’ತಿ! ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಅಞ್ಞತ್ರ ಪರಿಭೋಗೋ ಅಞ್ಞತ್ರ ಪರಿಭುಞ್ಜಿತಬ್ಬೋ. ಯೋ ಪರಿಭುಞ್ಜೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

[ಪಾರಾ. ೧೫೭] ತೇನ ಖೋ ಪನ ಸಮಯೇನ ಭಿಕ್ಖೂ ಉಪೋಸಥಗ್ಗಮ್ಪಿ ಸನ್ನಿಸಜ್ಜಮ್ಪಿ ಹರಿತುಂ ಕುಕ್ಕುಚ್ಚಾಯನ್ತಾ ಛಮಾಯ ನಿಸೀದನ್ತಿ. ಗತ್ತಾನಿಪಿ ಚೀವರಾನಿಪಿ ಪಂಸುಕಿತಾನಿ ಹೋನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ತಾವಕಾಲಿಕಂ ಹರಿತು’’ನ್ತಿ.

ತೇನ ಖೋ ಪನ ಸಮಯೇನ ಸಙ್ಘಸ್ಸ ಮಹಾವಿಹಾರೋ ಉನ್ದ್ರಿಯತಿ. ಭಿಕ್ಖೂ ಕುಕ್ಕುಚ್ಚಾಯನ್ತಾ ಸೇನಾಸನಂ ನಾತಿಹರನ್ತಿ [ನಾಭಿಹರನ್ತಿ (ಕ.)]. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಗುತ್ತತ್ಥಾಯ ಹರಿತು’’ನ್ತಿ.

ತೇನ ಖೋ ಪನ ಸಮಯೇನ ಸಙ್ಘಸ್ಸ ಸೇನಾಸನಪರಿಕ್ಖಾರಿಕೋ ಮಹಗ್ಘೋ ಕಮ್ಬಲೋ ಉಪ್ಪನ್ನೋ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಫಾತಿಕಮ್ಮತ್ಥಾಯ ಪರಿವತ್ತೇತು’’ನ್ತಿ.

ತೇನ ಖೋ ಪನ ಸಮಯೇನ ಸಙ್ಘಸ್ಸ ಸೇನಾಸನಪರಿಕ್ಖಾರಿಕಂ ಮಹಗ್ಘಂ ದುಸ್ಸಂ ಉಪ್ಪನ್ನಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಫಾತಿಕಮ್ಮತ್ಥಾಯ ಪರಿವತ್ತೇತು’’ನ್ತಿ.

ತೇನ ಖೋ ಪನ ಸಮಯೇನ ಸಙ್ಘಸ್ಸ ಅಚ್ಛಚಮ್ಮಂ ಉಪ್ಪನ್ನಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪಾದಪುಞ್ಛನಿಂ ಕಾತು’’ನ್ತಿ.

ತೇನ ಖೋ ಪನ ಸಮಯೇನ ಸಙ್ಘಸ್ಸ ಚಕ್ಕಲಿಕಂ ಉಪ್ಪನ್ನಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪಾದಪುಞ್ಛನಿಂ ಕಾತು’’ನ್ತಿ.

ತೇನ ಖೋ ಪನ ಸಮಯೇನ ಸಙ್ಘಸ್ಸ ಚೋಳಕಂ ಉಪ್ಪನ್ನಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪಾದಪುಞ್ಛನಿಂ ಕಾತು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅಧೋತೇಹಿ ಪಾದೇಹಿ ಸೇನಾಸನಂ ಅಕ್ಕಮನ್ತಿ. ಸೇನಾಸನಂ ದುಸ್ಸತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಅಧೋತೇಹಿ ಪಾದೇಹಿ ಸೇನಾಸನಂ ಅಕ್ಕಮಿತಬ್ಬಂ. ಯೋ ಅಕ್ಕಮೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅಲ್ಲೇಹಿ ಪಾದೇಹಿ ಸೇನಾಸನಂ ಅಕ್ಕಮನ್ತಿ. ಸೇನಾಸನಂ ದುಸ್ಸತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಅಲ್ಲೇಹಿ ಪಾದೇಹಿ ಸೇನಾಸನಂ ಅಕ್ಕಮಿತಬ್ಬಂ. ಯೋ ಅಕ್ಕಮೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಸಉಪಾಹನಾ ಸೇನಾಸನಂ ಅಕ್ಕಮನ್ತಿ. ಸೇನಾಸನಂ ದುಸ್ಸತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಸಉಪಾಹನೇನ ಸೇನಾಸನಂ ಅಕ್ಕಮಿತಬ್ಬಂ. ಯೋ ಅಕ್ಕಮೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಪರಿಕಮ್ಮಕತಾಯ ಭೂಮಿಯಾ ನಿಟ್ಠುಭನ್ತಿ. ವಣ್ಣೋ ದುಸ್ಸತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಪರಿಕಮ್ಮಕತಾಯ ಭೂಮಿಯಾ ನಿಟ್ಠುಭಿತಬ್ಬಂ. ಯೋ ನಿಟ್ಠುಭೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಖೇಳಮಲ್ಲಕ’’ನ್ತಿ.

ತೇನ ಖೋ ಪನ ಸಮಯೇನ ಮಞ್ಚಪಾದಾಪಿ ಪೀಠಪಾದಾಪಿ ಪರಿಕಮ್ಮಕತಂ ಭೂಮಿಂ ವಿಲಿಖನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಚೋಳಕೇನ ಪಲಿವೇಠೇತು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಪರಿಕಮ್ಮಕತಂ ಭಿತ್ತಿಂ ಅಪಸ್ಸೇನ್ತಿ. ವಣ್ಣೋ ದುಸ್ಸತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಪರಿಕಮ್ಮಕತಾ ಭಿತ್ತಿ ಅಪಸ್ಸೇತಬ್ಬಾ. ಯೋ ಅಪಸ್ಸೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಅಪಸ್ಸೇನಫಲಕ’’ನ್ತಿ. ಅಪಸ್ಸೇನಫಲಕಂ ಹೇಟ್ಠತೋ ಭೂಮಿಂ ವಿಲಿಖತಿ, ಉಪರಿತೋ ಭಿತ್ತಿಞ್ಚ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಹೇಟ್ಠತೋ ಚ ಉಪರಿತೋ ಚ ಚೋಳಕೇನ ಪಲಿವೇಠೇತು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಧೋತಪಾದಕಾ ನಿಪಜ್ಜಿತುಂ ಕುಕ್ಕುಚ್ಚಾಯನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪಚ್ಚತ್ಥರಿತ್ವಾ ನಿಪಜ್ಜಿತು’’ನ್ತಿ.

ಸಙ್ಘಭತ್ತಾದಿಅನುಜಾನನಂ

೩೨೫. ಅಥ ಖೋ ಭಗವಾ ಆಳವಿಯಂ ಯಥಾಭಿರನ್ತಂ ವಿಹರಿತ್ವಾ ಯೇನ ರಾಜಗಹಂ ತೇನ ಚಾರಿಕಂ ಪಕ್ಕಾಮಿ. ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ರಾಜಗಹಂ ತದವಸರಿ. ತತ್ರ ಸುದಂ ಭಗವಾ ರಾಜಗಹೇ ವಿಹರತಿ ವೇಳುವನೇ ಕಲನ್ದಕನಿವಾಪೇ. ತೇನ ಖೋ ಪನ ಸಮಯೇನ ರಾಜಗಹಂ ದುಬ್ಭಿಕ್ಖಂ ಹೋತಿ. ಮನುಸ್ಸಾ ನ ಸಕ್ಕೋನ್ತಿ ಸಙ್ಘಭತ್ತಂ ಕಾತುಂ; ಇಚ್ಛನ್ತಿ ಉದ್ದೇಸಭತ್ತಂ ನಿಮನ್ತನಂ ಸಲಾಕಭತ್ತಂ ಪಕ್ಖಿಕಂ ಉಪೋಸಥಿಕಂ ಪಾಟಿಪದಿಕಂ ಕಾತುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸಙ್ಘಭತ್ತಂ ಉದ್ದೇಸಭತ್ತಂ ನಿಮನ್ತನಂ ಸಲಾಕಭತ್ತಂ ಪಕ್ಖಿಕಂ ಉಪೋಸಥಿಕಂ ಪಾಟಿಪದಿಕ’’ನ್ತಿ.

ಭತ್ತುದ್ದೇಸಕಸಮ್ಮುತಿ

೩೨೬. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಅತ್ತನೋ ವರಭತ್ತಾನಿ ಗಹೇತ್ವಾ ಲಾಮಕಾನಿ ಭತ್ತಾನಿ ಭಿಕ್ಖೂನಂ ದೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಂ ಭಿಕ್ಖುಂ ಭತ್ತುದ್ದೇಸಕಂ ಸಮ್ಮನ್ನಿತುಂ – ಯೋ ನ ಛನ್ದಾಗತಿಂ ಗಚ್ಛೇಯ್ಯ, ನ ದೋಸಾಗತಿಂ ಗಚ್ಛೇಯ್ಯ, ನ ಮೋಹಾಗತಿಂ ಗಚ್ಛೇಯ್ಯ, ನ ಭಯಾಗತಿಂ ಗಚ್ಛೇಯ್ಯ, ಉದ್ದಿಟ್ಠಾನುದ್ದಿಟ್ಠಞ್ಚ ಜಾನೇಯ್ಯ. ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬೋ. ಪಠಮಂ ಭಿಕ್ಖು ಯಾಚಿತಬ್ಬೋ, ಯಾಚಿತ್ವಾ ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಭಿಕ್ಖುಂ ಭತ್ತುದ್ದೇಸಕಂ ಸಮ್ಮನ್ನೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಸಙ್ಘೋ ಇತ್ಥನ್ನಾಮಂ ಭಿಕ್ಖುಂ ಭತ್ತುದ್ದೇಸಕಂ ಸಮ್ಮನ್ನತಿ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಭಿಕ್ಖುನೋ ಭತ್ತುದ್ದೇಸಕಸ್ಸ ಸಮ್ಮುತಿ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಸಮ್ಮತೋ ಸಙ್ಘೇನ ಇತ್ಥನ್ನಾಮೋ ಭಿಕ್ಖು ಭತ್ತುದ್ದೇಸಕೋ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

ಅಥ ಖೋ ಭತ್ತುದ್ದೇಸಕಾನಂ ಭಿಕ್ಖೂನಂ ಏತದಹೋಸಿ – ‘‘ಕಥಂ ನು ಖೋ ಭತ್ತಂ ಉದ್ದಿಸಿತಬ್ಬ’’ನ್ತಿ? ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸಲಾಕಾಯ ವಾ ಪಟ್ಟಿಕಾಯ ವಾ [ಪಟಿಕಾಯ ವಾ (ಸ್ಯಾ.)] ಉಪನಿಬನ್ಧಿತ್ವಾ ಓಪುಞ್ಜಿತ್ವಾ ಭತ್ತಂ ಉದ್ದಿಸಿತು’’ನ್ತಿ.

ಸೇನಾಸನಪಞ್ಞಾಪಕಾದಿಸಮ್ಮುತಿ

೩೨೭. ತೇನ ಖೋ ಪನ ಸಮಯೇನ ಸಙ್ಘಸ್ಸ ಸೇನಾಸನಪಞ್ಞಾಪಕೋ ನ ಹೋತಿ…ಪೇ… ಭಣ್ಡಾಗಾರಿಕೋ ನ ಹೋತಿ…ಪೇ… ಚೀವರಪ್ಪಟಿಗ್ಗಾಹಕೋ ನ ಹೋತಿ…ಪೇ… ಚೀವರಭಾಜಕೋ ನ ಹೋತಿ…ಪೇ… ಯಾಗುಭಾಜಕೋ ನ ಹೋತಿ…ಪೇ… ಫಲಭಾಜಕೋ ನ ಹೋತಿ…ಪೇ… ಖಜ್ಜಕಭಾಜಕೋ ನ ಹೋತಿ. ಖಜ್ಜಕಂ ಅಭಾಜಿಯಮಾನಂ ನಸ್ಸತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಂ ಭಿಕ್ಖುಂ ಖಜ್ಜಕಭಾಜಕಂ ಸಮ್ಮನ್ನಿತುಂ – ಯೋ ನ ಛನ್ದಾಗತಿಂ ಗಚ್ಛೇಯ್ಯ, ನ ದೋಸಾಗತಿಂ ಗಚ್ಛೇಯ್ಯ, ನ ಮೋಹಾಗತಿಂ ಗಚ್ಛೇಯ್ಯ, ನ ಭಯಾಗತಿಂ ಗಚ್ಛೇಯ್ಯ, ಭಾಜಿತಾಭಾಜಿತಞ್ಚ ಜಾನೇಯ್ಯ. ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬೋ. ಪಠಮಂ ಭಿಕ್ಖು ಯಾಚಿತಬ್ಬೋ, ಯಾಚಿತ್ವಾ ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಭಿಕ್ಖುಂ ಖಜ್ಜಕಭಾಜಕಂ ಸಮ್ಮನ್ನೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಸಙ್ಘೋ ಇತ್ಥನ್ನಾಮಂ ಭಿಕ್ಖುಂ ಖಜ್ಜಕಭಾಜಕಂ ಸಮ್ಮನ್ನತಿ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಭಿಕ್ಖುನೋ ಖಜ್ಜಕಭಾಜಕಸ್ಸ ಸಮ್ಮುತಿ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಸಮ್ಮತೋ ಸಙ್ಘೇನ ಇತ್ಥನ್ನಾಮೋ ಭಿಕ್ಖು ಖಜ್ಜಕಭಾಜಕೋ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

ಅಪ್ಪಮತ್ತಕವಿಸ್ಸಜ್ಜಕಸಮ್ಮುತಿ

೩೨೮. ತೇನ ಖೋ ಪನ ಸಮಯೇನ ಸಙ್ಘಸ್ಸ ಭಣ್ಡಾಗಾರೇ ಅಪ್ಪಮತ್ತಕೋ ಪರಿಕ್ಖಾರೋ ಉಪ್ಪನ್ನೋ [ಉಸ್ಸನ್ನೋ (ಸ್ಯಾ.)] ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಂ ಭಿಕ್ಖುಂ ಅಪ್ಪಮತ್ತಕವಿಸ್ಸಜ್ಜಕಂ ಸಮ್ಮನ್ನಿತುಂ – ಯೋ ನ ಛನ್ದಾಗತಿಂ ಗಚ್ಛೇಯ್ಯ, ನ ದೋಸಾಗತಿಂ ಗಚ್ಛೇಯ್ಯ, ನ ಮೋಹಾಗತಿಂ ಗಚ್ಛೇಯ್ಯ, ನ ಭಯಾಗತಿಂ ಗಚ್ಛೇಯ್ಯ, ವಿಸ್ಸಜ್ಜಿತಾವಿಸ್ಸಜ್ಜಿತಞ್ಚ ಜಾನೇಯ್ಯ. ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬೋ. ಪಠಮಂ ಭಿಕ್ಖು ಯಾಚಿತಬ್ಬೋ, ಯಾಚಿತ್ವಾ ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಭಿಕ್ಖುಂ ಅಪ್ಪಮತ್ತಕವಿಸ್ಸಜ್ಜಕಂ ಸಮ್ಮನ್ನೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಸಙ್ಘೋ ಇತ್ಥನ್ನಾಮಂ ಭಿಕ್ಖುಂ ಅಪ್ಪಮತ್ತಕವಿಸ್ಸಜ್ಜಕಂ ಸಮ್ಮನ್ನತಿ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಭಿಕ್ಖುನೋ ಅಪ್ಪಮತ್ತಕವಿಸ್ಸಜ್ಜಕಸ್ಸ ಸಮ್ಮುತಿ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಸಮ್ಮತೋ ಸಙ್ಘೇನ ಇತ್ಥನ್ನಾಮೋ ಭಿಕ್ಖು ಅಪ್ಪಮತ್ತಕವಿಸ್ಸಜ್ಜಕೋ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

ತೇನ ಅಪ್ಪಮತ್ತಕವಿಸ್ಸಜ್ಜಕೇನ ಭಿಕ್ಖುನಾ ಏಕಾ [ಏಕೇಕಾ (ಸೀ.)] ಸೂಚಿ ದಾತಬ್ಬಾ, ಸತ್ಥಕಂ ದಾತಬ್ಬಂ, ಉಪಾಹನಾ ದಾತಬ್ಬಾ, ಕಾಯಬನ್ಧನಂ ದಾತಬ್ಬಂ, ಅಂಸಬನ್ಧಕೋ ದಾತಬ್ಬೋ, ಪರಿಸ್ಸಾವನಂ ದಾತಬ್ಬಂ, ಧಮ್ಮಕರಣೋ ದಾತಬ್ಬೋ, ಕುಸಿ ದಾತಬ್ಬಾ, ಅಡ್ಢಕುಸಿ ದಾತಬ್ಬಾ, ಮಣ್ಡಲಂ ದಾತಬ್ಬಂ, ಅಡ್ಢಮಣ್ಡಲಂ ದಾತಬ್ಬಂ, ಅನುವಾತೋ ದಾತಬ್ಬೋ, ಪರಿಭಣ್ಡಂ ದಾತಬ್ಬಂ. ಸಚೇ ಹೋತಿ ಸಙ್ಘಸ್ಸ ಸಪ್ಪಿ ವಾ ತೇಲಂ ವಾ ಮಧು ವಾ ಫಾಣಿತಂ ವಾ, ಸಕಿಂ ಪಟಿಸಾಯಿತುಂ ದಾತಬ್ಬಂ. ಸಚೇ ಪುನಪಿ ಅತ್ಥೋ ಹೋತಿ, ಪುನಪಿ ದಾತಬ್ಬಂ.

ಸಾಟಿಯಗ್ಗಾಹಾಪಕಾದಿಸಮ್ಮುತಿ

೩೨೯. ತೇನ ಖೋ ಪನ ಸಮಯೇನ ಸಙ್ಘಸ್ಸ ಸಾಟಿಯಗ್ಗಾಹಾಪಕೋ ನ ಹೋತಿ…ಪೇ… ಪತ್ತಗ್ಗಾಹಾಪಕೋ ನ ಹೋತಿ…ಪೇ… ಆರಾಮಿಕಪೇಸಕೋ ನ ಹೋತಿ…ಪೇ… ಸಾಮಣೇರಪೇಸಕೋ ನ ಹೋತಿ. ಸಾಮಣೇರಾ ಅಪೇಸಿಯಮಾನಾ ಕಮ್ಮಂ ನ ಕರೋನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಂ ಭಿಕ್ಖುಂ ಸಾಮಣೇರಪೇಸಕಂ ಸಮ್ಮನ್ನಿತುಂ – ಯೋ ನ ಛನ್ದಾಗತಿಂ ಗಚ್ಛೇಯ್ಯ, ನ ದೋಸಾಗತಿಂ ಗಚ್ಛೇಯ್ಯ, ನ ಮೋಹಾಗತಿಂ ಗಚ್ಛೇಯ್ಯ, ನ ಭಯಾಗತಿಂ ಗಚ್ಛೇಯ್ಯ, ಪೇಸಿತಾಪೇಸಿತಞ್ಚ ಜಾನೇಯ್ಯ. ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬೋ. ಪಠಮಂ ಭಿಕ್ಖು ಯಾಚಿತಬ್ಬೋ, ಯಾಚಿತ್ವಾ ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಂ ಭಿಕ್ಖುಂ ಸಾಮಣೇರಪೇಸಕಂ ಸಮ್ಮನ್ನೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಸಙ್ಘೋ ಇತ್ಥನ್ನಾಮಂ ಭಿಕ್ಖುಂ ಸಾಮಣೇರಪೇಸಕಂ ಸಮ್ಮನ್ನತಿ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಭಿಕ್ಖುನೋ ಸಾಮಣೇರಪೇಸಕಸ್ಸ ಸಮ್ಮುತಿ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಸಮ್ಮತೋ ಸಙ್ಘೇನ ಇತ್ಥನ್ನಾಮೋ ಭಿಕ್ಖು ಸಾಮಣೇರಪೇಸಕೋ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

ತತಿಯಭಾಣವಾರೋ ನಿಟ್ಠಿತೋ.

ಸೇನಾಸನಕ್ಖನ್ಧಕೋ ಛಟ್ಠೋ.

ತಸ್ಸುದ್ದಾನಂ –

ವಿಹಾರಂ ಬುದ್ಧಸೇಟ್ಠೇನ, ಅಪಞ್ಞತ್ತಂ ತದಾ ಅಹು;

ತಹಂ ತಹಂ ನಿಕ್ಖಮನ್ತಿ, ವಾಸಾ ತೇ ಜಿನಸಾವಕಾ.

ಸೇಟ್ಠೀ ಗಹಪತಿ ದಿಸ್ವಾ, ಭಿಕ್ಖೂನಂ ಇದಮಬ್ರವಿ;

ಕಾರಾಪೇಯ್ಯಂ ವಸೇಯ್ಯಾಥ, ಪಟಿಪುಚ್ಛಿಂಸು ನಾಯಕಂ.

ವಿಹಾರಂ ಅಡ್ಢಯೋಗಞ್ಚ, ಪಾಸಾದಂ ಹಮ್ಮಿಯಂ ಗುಹಂ;

ಪಞ್ಚಲೇಣಂ ಅನುಞ್ಞಾಸಿ, ವಿಹಾರೇ ಸೇಟ್ಠಿ ಕಾರಯಿ.

ಜನೋ ವಿಹಾರಂ ಕಾರೇತಿ, ಅಕವಾಟಂ ಅಸಂವುತಂ;

ಕವಾಟಂ ಪಿಟ್ಠಸಙ್ಘಾಟಂ, ಉದುಕ್ಖಲಞ್ಚ ಉತ್ತರಿ.

ಆವಿಞ್ಛನಚ್ಛಿದ್ದಂ ರಜ್ಜುಂ, ವಟ್ಟಿಞ್ಚ ಕಪಿಸೀಸಕಂ;

ಸೂಚಿಘಟಿತಾಳಚ್ಛಿದ್ದಂ, ಲೋಹಕಟ್ಠವಿಸಾಣಕಂ.

ಯನ್ತಕಂ ಸೂಚಿಕಞ್ಚೇವ, ಛದನಂ ಉಲ್ಲಿತ್ತಾವಲಿತ್ತಂ;

ವೇದಿಜಾಲಸಲಾಕಞ್ಚ, ಚಕ್ಕಲಿ ಸನ್ಥರೇನ ಚ.

ಮಿಡ್ಢಿ ಬಿದಲಮಞ್ಚಞ್ಚ, ಸೋಸಾನಿಕಮಸಾರಕೋ;

ಬುನ್ದಿಕುಳಿರಪಾದಞ್ಚ, ಆಹಚ್ಚಾಸನ್ದಿ ಉಚ್ಚಕೇ.

ಸತ್ತಙ್ಗೋ ಚ ಭದ್ದಪೀಠಂ, ಪೀಠಕೇಳಕಪಾದಕಂ;

ಆಮಲಾಫಲಕಾ ಕೋಚ್ಛಾ, ಪಲಾಲಪೀಠಮೇವ ಚ.

ಉಚ್ಚಾಹಿಪಟಿಪಾದಕಾ, ಅಟ್ಠಙ್ಗುಲಿ ಚ ಪಾದಕಾ;

ಸುತ್ತಂ ಅಟ್ಠಪದಂ ಚೋಳಂ, ತೂಲಿಕಂ ಅಡ್ಢಕಾಯಿಕಂ.

ಗಿರಗ್ಗೋ ಭಿಸಿಯೋ ಚಾಪಿ, ದುಸ್ಸಂ ಸೇನಾಸನಮ್ಪಿ ಚ;

ಓನದ್ಧಂ ಹೇಟ್ಠಾ ಪತತಿ, ಉಪ್ಪಾಟೇತ್ವಾ ಹರನ್ತಿ ಚ.

ಭತ್ತಿಞ್ಚ ಹತ್ಥಭತ್ತಿಞ್ಚ, ಅನುಞ್ಞಾಸಿ ತಥಾಗತೋ;

ತಿತ್ಥಿಯಾ ವಿಹಾರೇ ಚಾಪಿ, ಥುಸಂ ಸಣ್ಹಞ್ಚ ಮತ್ತಿಕಾ.

ಇಕ್ಕಾಸಂ ಪಾಣಿಕಂ ಕುಣ್ಡಂ, ಸಾಸಪಂ ಸಿತ್ಥತೇಲಕಂ;

ಉಸ್ಸನ್ನೇ ಪಚ್ಚುದ್ಧರಿತುಂ, ಫರುಸಂ ಗಣ್ಡುಮತ್ತಿಕಂ.

ಇಕ್ಕಾಸಂ ಪಟಿಭಾನಞ್ಚ, ನೀಚಾ ಚಯೋ ಚ ಆರುಹಂ;

ಪರಿಪತನ್ತಿ ಆಳಕಾ, ಅಡ್ಢಕುಟ್ಟಂ ತಯೋ ಪುನ.

ಖುದ್ದಕೇ ಕುಟ್ಟಪಾದೋ ಚ, ಓವಸ್ಸತಿ ಸರಂ ಖಿಲಂ;

ಚೀವರವಂಸಂ ರಜ್ಜುಞ್ಚ, ಆಳಿನ್ದಂ ಕಿಟಿಕೇನ ಚ.

ಆಲಮ್ಬನಂ ತಿಣಚುಣ್ಣಂ, ಹೇಟ್ಠಾಮಗ್ಗೇ ನಯಂ ಕರೇ;

ಅಜ್ಝೋಕಾಸೇ ಓತಪ್ಪತಿ, ಸಾಲಂ ಹೇಟ್ಠಾ ಚ ಭಾಜನಂ.

ವಿಹಾರೋ ಕೋಟ್ಠಕೋ ಚೇವ, ಪರಿವೇಣಗ್ಗಿಸಾಲಕಂ;

ಆರಾಮೇ ಚ ಪುನ ಕೋಟ್ಠೇ, ಹೇಟ್ಠಞ್ಞೇವ ನಯಂ ಕರೇ.

ಸುಧಂ ಅನಾಥಪಿಣ್ಡಿ ಚ, ಸದ್ಧೋ ಸೀತವನಂ ಅಗಾ;

ದಿಟ್ಠಧಮ್ಮೋ ನಿಮನ್ತೇಸಿ, ಸಹ ಸಙ್ಘೇನ ನಾಯಕಂ.

ಆಣಾಪೇಸನ್ತರಾಮಗ್ಗೇ, ಆರಾಮಂ ಕಾರಯೀ ಗಣೋ;

ವೇಸಾಲಿಯಂ ನವಕಮ್ಮಂ, ಪುರತೋ ಚ ಪರಿಗ್ಗಹಿ.

ಕೋ ಅರಹತಿ ಭತ್ತಗ್ಗೇ, ತಿತ್ತಿರಞ್ಚ ಅವನ್ದಿಯಾ;

ಪರಿಗ್ಗಹಿತನ್ತರಘರಾ, ತೂಲೋ ಸಾವತ್ಥಿ ಓಸರಿ.

ಪತಿಟ್ಠಾಪೇಸಿ ಆರಾಮಂ, ಭತ್ತಗ್ಗೇ ಚ ಕೋಲಾಹಲಂ;

ಗಿಲಾನಾ ವರಸೇಯ್ಯಾ ಚ, ಲೇಸಾ ಸತ್ತರಸಾ ತಹಿಂ.

ಕೇನ ನು ಖೋ ಕಥಂ ನು ಖೋ, ವಿಹಾರಗ್ಗೇನ ಭಾಜಯಿ;

ಪರಿವೇಣಂ ಅನುಭಾಗಞ್ಚ, ಅಕಾಮಾ ಭಾಗಂ ನೋ ದದೇ.

ನಿಸ್ಸೀಮಂ ಸಬ್ಬಕಾಲಞ್ಚ, ಗಾಹಾ ಸೇನಾಸನೇ ತಯೋ;

ಉಪನನ್ದೋ ಚ ವಣ್ಣೇಸಿ, ಠಿತಕಾ ಸಮಕಾಸನಾ.

ಸಮಾನಾಸನಿಕಾ ಭಿನ್ದಿಂಸು, ತಿವಗ್ಗಾ ಚ ದುವಗ್ಗಿಕಂ;

ಅಸಮಾನಾಸನಿಕಾ ದೀಘಂ, ಸಾಳಿನ್ದಂ ಪರಿಭುಞ್ಜಿತುಂ.

ಅಯ್ಯಿಕಾ ಚ ಅವಿದೂರೇ, ಭಾಜಿತಞ್ಚ ಕೀಟಾಗಿರೇ;

ಆಳವೀ ಪಿಣ್ಡಕಕುಟ್ಟೇಹಿ, ದ್ವಾರಅಗ್ಗಳವಟ್ಟಿಕಾ.

ಆಲೋಕಸೇತಕಾಳಞ್ಚ, ಗೇರುಛಾದನಬನ್ಧನಾ;

ಭಣ್ಡಿಖಣ್ಡಪರಿಭಣ್ಡಂ, ವೀಸ ತಿಂಸಾ ಚ ಕಾಲಿಕಾ.

ಓಸಿತೇ ಅಕತಂ ವಿಪ್ಪಂ, ಖುದ್ದೇ ಛಪ್ಪಞ್ಚವಸ್ಸಿಕಂ;

ಅಡ್ಢಯೋಗೇ ಚ ಸತ್ತಟ್ಠ, ಮಹಲ್ಲೇ ದಸ ದ್ವಾದಸ.

ಸಬ್ಬಂ ವಿಹಾರಂ ಏಕಸ್ಸ, ಅಞ್ಞಂ ವಾಸೇನ್ತಿ ಸಙ್ಘಿಕಂ;

ನಿಸ್ಸೀಮಂ ಸಬ್ಬಕಾಲಞ್ಚ, ಪಕ್ಕಮಿ ವಿಬ್ಭಮನ್ತಿ ಚ.

ಕಾಲಞ್ಚ ಸಾಮಣೇರಞ್ಚ, ಸಿಕ್ಖಾಪಚ್ಚಕ್ಖಅನ್ತಿಮಂ;

ಉಮ್ಮತ್ತಖಿತ್ತಚಿತ್ತಾ ಚ, ವೇದನಾಪತ್ತಿದಸ್ಸನಾ.

ಅಪ್ಪಟಿಕಮ್ಮದಿಟ್ಠಿಯಾ, ಪಣ್ಡಕಾ ಥೇಯ್ಯತಿತ್ಥಿಯಾ;

ತಿರಚ್ಛಾನಮಾತುಪಿತು, ಅರಹನ್ತಾ ಚ ದೂಸಕಾ.

ಭೇದಕಾ ಲೋಹಿತುಪ್ಪಾದಾ, ಉಭತೋ ಚಾಪಿ ಬ್ಯಞ್ಜನಕಾ;

ಮಾ ಸಙ್ಘಸ್ಸ ಪರಿಹಾಯಿ, ಕಮ್ಮಂ ಅಞ್ಞಸ್ಸ ದಾತವೇ.

ವಿಪ್ಪಕತೇ ಚ ಅಞ್ಞಸ್ಸ, ಕತೇ ತಸ್ಸೇವ ಪಕ್ಕಮೇ;

ವಿಬ್ಭಮತಿ ಕಾಲಙ್ಕತೋ, ಸಾಮಣೇರೋ ಚ ಜಾಯತಿ.

ಪಚ್ಚಕ್ಖಾತೋ ಚ ಸಿಕ್ಖಾಯ, ಅನ್ತಿಮಜ್ಝಾಪನ್ನಕೋ ಯದಿ;

ಸಙ್ಘೋವ ಸಾಮಿಕೋ ಹೋತಿ, ಉಮ್ಮತ್ತಖಿತ್ತವೇದನಾ.

ಅದಸ್ಸನಾಪ್ಪಟಿಕಮ್ಮೇ, ದಿಟ್ಠಿ ತಸ್ಸೇವ ಹೋತಿ ತಂ;

ಪಣ್ಡಕೋ ಥೇಯ್ಯತಿತ್ಥೀ ಚ, ತಿರಚ್ಛಾನಮಾತುಪೇತ್ತಿಕಂ.

ಘಾತಕೋ ದೂಸಕೋ ಚಾಪಿ, ಭೇದಲೋಹಿತಬ್ಯಞ್ಜನಾ;