ಖುದ್ದಕವತ್ಥೂನಿ

೨೪೩. ತೇನ ಸಮಯೇನ ಬುದ್ಧೋ ಭಗವಾ ರಾಜಗಹೇ ವಿಹರತಿ ವೇಳುವನೇ ಕಲನ್ದಕನಿವಾಪೇ. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ನಹಾಯಮಾನಾ ರುಕ್ಖೇ ಕಾಯಂ ಉಗ್ಘಂಸೇನ್ತಿ, ಊರುಮ್ಪಿ ಬಾಹುಮ್ಪಿ ಉರಮ್ಪಿ ಪಿಟ್ಠಿಮ್ಪಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ನಹಾಯಮಾನಾ ರುಕ್ಖೇ ಕಾಯಂ ಉಗ್ಘಂಸೇಸ್ಸನ್ತಿ, ಊರುಮ್ಪಿ ಬಾಹುಮ್ಪಿ ಉರಮ್ಪಿ ಪಿಟ್ಠಿಮ್ಪಿ, ಸೇಯ್ಯಥಾಪಿ ಮಲ್ಲಮುಟ್ಠಿಕಾ ಗಾಮಮೋದ್ದವಾ’’ತಿ [ಗಾಮಪೋದ್ದವಾ (ಸೀ.), ಗಾಮಪೂತವಾ (ಸ್ಯಾ.)]! ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಭಿಕ್ಖೂ ಪಟಿಪುಚ್ಛಿ – ‘‘ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖೂ ನಹಾಯಮಾನಾ ರುಕ್ಖೇ ಕಾಯಂ ಉಗ್ಘಂಸೇನ್ತಿ, ಊರುಮ್ಪಿ ಬಾಹುಮ್ಪಿ ಉರಮ್ಪಿ ಪಿಟ್ಠಿಮ್ಪೀ’’ತಿ? ‘‘ಸಚ್ಚಂ ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ, ಭಿಕ್ಖವೇ, ತೇಸಂ ಮೋಘಪುರಿಸಾನಂ ಅನನುಲೋಮಿಕಂ ಅಪ್ಪತಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ. ಕಥಞ್ಹಿ ನಾಮ ತೇ, ಭಿಕ್ಖವೇ, ಮೋಘಪುರಿಸಾ ನಹಾಯಮಾನಾ ರುಕ್ಖೇ ಕಾಯಂ ಉಗ್ಘಂಸೇಸ್ಸನ್ತಿ, ಊರುಮ್ಪಿ ಬಾಹುಮ್ಪಿ ಉರಮ್ಪಿ ಪಿಟ್ಠಿಮ್ಪಿ? ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ನಹಾಯಮಾನೇನ ಭಿಕ್ಖುನಾ ರುಕ್ಖೇ ಕಾಯೋ ಉಗ್ಘಂಸೇತಬ್ಬೋ. ಯೋ ಉಗ್ಘಂಸೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ನಹಾಯಮಾನಾ ಥಮ್ಭೇ ಕಾಯಂ ಉಗ್ಘಂಸೇನ್ತಿ, ಊರುಮ್ಪಿ ಬಾಹುಮ್ಪಿ ಉರಮ್ಪಿ ಪಿಟ್ಠಿಮ್ಪಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ನಹಾಯಮಾನಾ ಥಮ್ಭೇ ಕಾಯಂ ಉಗ್ಘಂಸೇಸ್ಸನ್ತಿ, ಊರುಮ್ಪಿ ಬಾಹುಮ್ಪಿ ಉರಮ್ಪಿ ಪಿಟ್ಠಿಮ್ಪಿ, ಸೇಯ್ಯಥಾಪಿ ಮಲ್ಲಮುಟ್ಠಿಕಾ ಗಾಮಮೋದ್ದವಾ’’ತಿ! ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಭಗವಾ’’ತಿ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ನಹಾಯಮಾನೇನ ಭಿಕ್ಖುನಾ ಥಮ್ಭೇ ಕಾಯೋ ಉಗ್ಘಂಸೇತಬ್ಬೋ. ಯೋ ಉಗ್ಘಂಸೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ನಹಾಯಮಾನಾ ಕುಟ್ಟೇ [ಕುಡ್ಡೇ (ಸೀ. ಸ್ಯಾ.)] ಕಾಯಂ ಉಗ್ಘಂಸೇನ್ತಿ, ಊರುಮ್ಪಿ ಬಾಹುಮ್ಪಿ ಉರಮ್ಪಿ ಪಿಟ್ಠಿಮ್ಪಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ನಹಾಯಮಾನಾ ಕುಟ್ಟೇ ಕಾಯಂ ಉಗ್ಘಂಸೇಸ್ಸನ್ತಿ, ಊರುಮ್ಪಿ ಬಾಹುಮ್ಪಿ ಉರಮ್ಪಿ ಪಿಟ್ಠಿಮ್ಪಿ, ಸೇಯ್ಯಥಾಪಿ ಮಲ್ಲಮುಟ್ಠಿಕಾ ಗಾಮಮೋದ್ದವಾ’’ತಿ…ಪೇ… ‘‘ನ, ಭಿಕ್ಖವೇ, ನಹಾಯಮಾನೇನ ಭಿಕ್ಖುನಾ ಕುಟ್ಟೇ ಕಾಯೋ ಉಗ್ಘಂಸೇತಬ್ಬೋ. ಯೋ ಉಗ್ಘಂಸೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಅಟ್ಟಾನೇ [ಅಟ್ಠಾನೇ (ಸೀ. ಸ್ಯಾ.)] ನಹಾಯನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ! ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯನ್ತಾನಂ ವಿಪಾಚೇನ್ತಾನಂ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಭಗವಾ’’ತಿ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ಅಟ್ಟಾನೇ ನಹಾಯಿತಬ್ಬಂ. ಯೋ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಗನ್ಧಬ್ಬಹತ್ಥಕೇನ ನಹಾಯನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ! ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ನ, ಭಿಕ್ಖವೇ, ಗನ್ಧಬ್ಬಹತ್ಥಕೇನ ನಹಾಯಿತಬ್ಬಂ. ಯೋ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಕುರುವಿನ್ದಕಸುತ್ತಿಯಾ ನಹಾಯನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ! ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಕುರುವಿನ್ದಕಸುತ್ತಿಯಾ ನಹಾಯಿತಬ್ಬಂ. ಯೋ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ವಿಗ್ಗಯ್ಹ ಪರಿಕಮ್ಮಂ ಕಾರಾಪೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ! ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ವಿಗ್ಗಯ್ಹ ಪರಿಕಮ್ಮಂ ಕಾರಾಪೇತಬ್ಬಂ. ಯೋ ಕಾರಾಪೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಮಲ್ಲಕೇನ ನಹಾಯನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ! ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಮಲ್ಲಕೇನ ನಹಾಯಿತಬ್ಬಂ. ಯೋ ನಹಾಯೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೨೪೪. ತೇನ ಖೋ ಪನ ಸಮಯೇನ ಅಞ್ಞತರಸ್ಸ ಭಿಕ್ಖುನೋ ಕಚ್ಛುರೋಗಾಬಾಧೋ ಹೋತಿ. ನ ತಸ್ಸ ವಿನಾ ಮಲ್ಲಕೇನ ಫಾಸು ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಗಿಲಾನಸ್ಸ ಅಕತಮಲ್ಲಕ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಜರಾದುಬ್ಬಲೋ ನಹಾಯಮಾನೋ ನ ಸಕ್ಕೋತಿ ಅತ್ತನೋ ಕಾಯಂ ಉಗ್ಘಂಸೇತುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಉಕ್ಕಾಸಿಕ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಪಿಟ್ಠಿಪರಿಕಮ್ಮಂ ಕಾತುಂ ಕುಕ್ಕುಚ್ಚಾಯನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪುಥುಪಾಣಿಕ’’ನ್ತಿ.

೨೪೫. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ವಲ್ಲಿಕಂ ಧಾರೇನ್ತಿ…ಪೇ… ಪಾಮಙ್ಗಂ ಧಾರೇನ್ತಿ…ಪೇ… ಕಣ್ಠಸುತ್ತಕಂ ಧಾರೇನ್ತಿ…ಪೇ… ಕಟಿಸುತ್ತಕಂ ಧಾರೇನ್ತಿ…ಪೇ… ಓವಟ್ಟಿಕಂ ಧಾರೇನ್ತಿ…ಪೇ… ಕಾಯುರಂ ಧಾರೇನ್ತಿ…ಪೇ… ಹತ್ಥಾಭರಣಂ ಧಾರೇನ್ತಿ…ಪೇ… ಅಙ್ಗುಲಿಮುದ್ದಿಕಂ ಧಾರೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ…ಪೇ… ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ! ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ‘‘ಸಚ್ಚಂ ಕಿರ, ಭಿಕ್ಖವೇ, ಛಬ್ಬಗ್ಗಿಯಾ ಭಿಕ್ಖೂ ವಲ್ಲಿಕಂ ಧಾರೇನ್ತಿ…ಪೇ… ಪಾಮಙ್ಗಂ ಧಾರೇನ್ತಿ, ಕಣ್ಠಸುತ್ತಕಂ ಧಾರೇನ್ತಿ, ಕಟಿಸುತ್ತಕಂ ಧಾರೇನ್ತಿ, ಓವಟ್ಟಿಕಂ ಧಾರೇನ್ತಿ, ಕಾಯುರಂ ಧಾರೇನ್ತಿ, ಹತ್ಥಾಭರಣಂ ಧಾರೇನ್ತಿ, ಅಙ್ಗುಲಿಮುದ್ದಿಕಂ ಧಾರೇನ್ತೀ’’ತಿ? ‘‘ಸಚ್ಚಂ ಭಗವಾ’’ತಿ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ವಲ್ಲಿಕಾ ಧಾರೇತಬ್ಬಾ…ಪೇ… ನ ಪಾಮಙ್ಗೋ ಧಾರೇತಬ್ಬೋ… ನ ಕಣ್ಠಸುತ್ತಕಂ ಧಾರೇತಬ್ಬಂ… ನ ಕಟಿಸುತ್ತಕಂ ಧಾರೇತಬ್ಬಂ… ನ ಓವಟ್ಟಿಕಂ ಧಾರೇತಬ್ಬಂ… ನ ಕಾಯುರಂ ಧಾರೇತಬ್ಬಂ… ನ ಹತ್ಥಾಭರಣಂ ಧಾರೇತಬ್ಬಂ… ನ ಅಙ್ಗುಲಿಮುದ್ದಿಕಾ ಧಾರೇತಬ್ಬಾ. ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೨೪೬. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ದೀಘೇ ಕೇಸೇ ಧಾರೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ದೀಘಾ ಕೇಸಾ ಧಾರೇತಬ್ಬಾ. ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ದುಮಾಸಿಕಂ ವಾ ದುವಙ್ಗುಲಂ ವಾ’’ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಕೋಚ್ಛೇನ ಕೇಸೇ ಓಸಣ್ಠೇನ್ತಿ [ಓಸಣ್ಹೇನ್ತಿ (ಸೀ. ಸ್ಯಾ.)] …ಪೇ… ಫಣಕೇನ ಕೇಸೇ ಓಸಣ್ಠೇನ್ತಿ, ಹತ್ಥಫಣಕೇನ ಕೇಸೇ ಓಸಣ್ಠೇನ್ತಿ, ಸಿತ್ಥತೇಲಕೇನ ಕೇಸೇ ಓಸಣ್ಠೇನ್ತಿ, ಉದಕತೇಲಕೇನ ಕೇಸೇ ಓಸಣ್ಠೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಕೋಚ್ಛೇನ ಕೇಸಾ ಓಸಣ್ಠೇತಬ್ಬಾ…ಪೇ… ನ ಸಿತ್ಥತೇಲಕೇನ ಕೇಸಾ ಓಸಣ್ಠೇತಬ್ಬಾ… ನ ಉದಕತೇಲಕೇನ ಕೇಸಾ ಓಸಣ್ಠೇತಬ್ಬಾ. ಯೋ ಓಸಣ್ಠೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೨೪೭. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಆದಾಸೇಪಿ ಉದಕಪತ್ತೇಪಿ ಮುಖನಿಮಿತ್ತಂ ಓಲೋಕೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಆದಾಸೇ ವಾ ಉದಕಪತ್ತೇ ವಾ ಮುಖನಿಮಿತ್ತಂ ಓಲೋಕೇತಬ್ಬಂ. ಯೋ ಓಲೋಕೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರಸ್ಸ ಭಿಕ್ಖುನೋ ಮುಖೇ ವಣೋ ಹೋತಿ. ಸೋ ಭಿಕ್ಖೂ ಪುಚ್ಛಿ – ‘‘ಕೀದಿಸೋ ಮೇ, ಆವುಸೋ, ವಣೋ’’ತಿ? ಭಿಕ್ಖೂ ಏವಮಾಹಂಸು – ‘‘ಏದಿಸೋ ತೇ, ಆವುಸೋ ವಣೋ’’ತಿ. ಸೋ ನ ಸದ್ದಹತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಆಬಾಧಪ್ಪಚ್ಚಯಾ ಆದಾಸೇ ವಾ ಉದಕಪತ್ತೇ ವಾ ಮುಖನಿಮಿತ್ತಂ ಓಲೋಕೇತು’’ನ್ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಮುಖಂ ಆಲಿಮ್ಪನ್ತಿ…ಪೇ… ಮುಖಂ ಉಮ್ಮದ್ದೇನ್ತಿ, ಮುಖಂ ಚುಣ್ಣೇನ್ತಿ, ಮನೋಸಿಲಿಕಾಯ ಮುಖಂ ಲಞ್ಛೇನ್ತಿ, ಅಙ್ಗರಾಗಂ ಕರೋನ್ತಿ, ಮುಖರಾಗಂ ಕರೋನ್ತಿ, ಅಙ್ಗರಾಗಮುಖರಾಗಂ ಕರೋನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಮುಖಂ ಆಲಿಮ್ಪಿತಬ್ಬಂ…ಪೇ… ನ ಮುಖಂ ಉಮ್ಮದ್ದಿತಬ್ಬಂ, ನ ಮುಖಂ ಚುಣ್ಣೇತಬ್ಬಂ, ನ ಮನೋಸಿಲಿಕಾಯ ಮುಖಂ ಲಞ್ಛೇತಬ್ಬಂ, ನ ಅಙ್ಗರಾಗೋ ಕಾತಬ್ಬೋ, ನ ಮುಖರಾಗೋ ಕಾತಬ್ಬೋ, ನ ಅಙ್ಗರಾಗಮುಖರಾಗೋ ಕಾತಬ್ಬೋ. ಯೋ ಕರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರಸ್ಸ ಭಿಕ್ಖುನೋ ಚಕ್ಖುರೋಗಾಬಾಧೋ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಆಬಾಧಪ್ಪಚ್ಚಯಾ ಮುಖಂ ಆಲಿಮ್ಪಿತು’’ನ್ತಿ.

೨೪೮. ತೇನ ಖೋ ಪನ ಸಮಯೇನ ರಾಜಗಹೇ ಗಿರಗ್ಗಸಮಜ್ಜೋ [ಸಮಜ್ಜಾ (ಅಭಿಧಾನಗನ್ಥೇಸು)] ಹೋತಿ. ಛಬ್ಬಗ್ಗಿಯಾ ಭಿಕ್ಖೂ ಗಿರಗ್ಗಸಮಜ್ಜಂ ದಸ್ಸನಾಯ ಅಗಮಂಸು. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ನಚ್ಚಮ್ಪಿ ಗೀತಮ್ಪಿ ವಾದಿತಮ್ಪಿ ದಸ್ಸನಾಯ ಗಚ್ಛಿಸ್ಸನ್ತಿ, ಸೇಯ್ಯಥಾಪಿ ಗಿಹೀ ಕಾಮಭೋಗಿನೋ’’ತಿ! ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ನಚ್ಚಂ ವಾ ಗೀತಂ ವಾ ವಾದಿತಂ ವಾ ದಸ್ಸನಾಯ ಗನ್ತಬ್ಬಂ. ಯೋ ಗಚ್ಛೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೨೪೯. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಆಯತಕೇನ ಗೀತಸ್ಸರೇನ ಧಮ್ಮಂ ಗಾಯನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಯಥೇವ [ಯಥಾ ಚ (ಕ.)] ಮಯಂ ಗಾಯಾಮ, ಏವಮೇವಿಮೇ ಸಮಣಾ ಸಕ್ಯಪುತ್ತಿಯಾ ಆಯತಕೇನ ಗೀತಸ್ಸರೇನ ಧಮ್ಮಂ ಗಾಯನ್ತೀ’’ತಿ! ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಛಬ್ಬಗ್ಗಿಯಾ ಭಿಕ್ಖೂ ಆಯತಕೇನ ಗೀತಸ್ಸರೇನ ಧಮ್ಮಂ ಗಾಯಿಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ‘‘ಸಚ್ಚಂ ಕಿರ, ಭಿಕ್ಖವೇ…ಪೇ… ‘‘ಸಚ್ಚಂ ಭಗವಾ’’ತಿ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಪಞ್ಚಿಮೇ, ಭಿಕ್ಖವೇ, ಆದೀನವಾ ಆಯತಕೇನ ಗೀತಸ್ಸರೇನ ಧಮ್ಮಂ ಗಾಯನ್ತಸ್ಸ. ಅತ್ತನಾಪಿ ತಸ್ಮಿಂ ಸರೇ ಸಾರಜ್ಜತಿ, ಪರೇಪಿ ತಸ್ಮಿಂ ಸರೇ ಸಾರಜ್ಜನ್ತಿ, ಗಹಪತಿಕಾಪಿ ಉಜ್ಝಾಯನ್ತಿ, ಸರಕುತ್ತಿಮ್ಪಿ ನಿಕಾಮಯಮಾನಸ್ಸ ಸಮಾಧಿಸ್ಸ ಭಙ್ಗೋ ಹೋತಿ, ಪಚ್ಛಿಮಾ ಜನತಾ ದಿಟ್ಠಾನುಗತಿಂ ಆಪಜ್ಜತಿ – ಇಮೇ ಖೋ, ಭಿಕ್ಖವೇ, ಪಞ್ಚ ಆದೀನವಾ ಆಯತಕೇನ ಗೀತಸ್ಸರೇನ ಧಮ್ಮಂ ಗಾಯನ್ತಸ್ಸ. ನ, ಭಿಕ್ಖವೇ, ಆಯತಕೇನ ಗೀತಸ್ಸರೇನ ಧಮ್ಮೋ ಗಾಯಿತಬ್ಬೋ. ಯೋ ಗಾಯೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಸರಭಞ್ಞೇ ಕುಕ್ಕುಚ್ಚಾಯನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸರಭಞ್ಞ’’ನ್ತಿ.

‘‘ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಬಾಹಿರಲೋಮಿಂ [ಬಾಹಿಯಲೋಮಿಂ (ಕ.)] ಉಣ್ಣಿಂ ಧಾರೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಬಾಹಿಯಲೋಮಿ ಉಣ್ಣಿ ಧಾರೇತಬ್ಬಾ. ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೨೫೦. ತೇನ ಖೋ ಪನ ಸಮಯೇನ ರಞ್ಞೋ ಮಾಗಧಸ್ಸ ಸೇನಿಯಸ್ಸ ಬಿಮ್ಬಿಸಾರಸ್ಸ ಆರಾಮೇ ಅಮ್ಬಾ ಫಲಿನೋ ಹೋನ್ತಿ. ರಞ್ಞಾ ಮಾಗಧೇನ ಸೇನಿಯೇನ ಬಿಮ್ಬಿಸಾರೇನ ಅನುಞ್ಞಾತಂ ಹೋತಿ – ‘‘ಯಥಾಸುಖಂ ಅಯ್ಯಾ ಅಮ್ಬಂ ಪರಿಭುಞ್ಜನ್ತೂ’’ತಿ. ಛಬ್ಬಗ್ಗಿಯಾ ಭಿಕ್ಖೂ ತರುಣಞ್ಞೇವ ಅಮ್ಬಂ ಪಾತಾಪೇತ್ವಾ ಪರಿಭುಞ್ಜಿಂಸು. ರಞ್ಞೋ ಚ ಮಾಗಧಸ್ಸ ಸೇನಿಯಸ್ಸ ಬಿಮ್ಬಿಸಾರಸ್ಸ ಅಮ್ಬೇನ ಅತ್ಥೋ ಹೋತಿ. ಅಥ ಖೋ ರಾಜಾ ಮಾಗಧೋ ಸೇನಿಯೋ ಬಿಮ್ಬಿಸಾರೋ ಮನುಸ್ಸೇ ಆಣಾಪೇಸಿ – ‘‘ಗಚ್ಛಥ, ಭಣೇ, ಆರಾಮಂ ಗನ್ತ್ವಾ ಅಮ್ಬಂ ಆಹರಥಾ’’ತಿ. ‘‘ಏವಂ ದೇವಾ’’ತಿ ಖೋ ತೇ ಮನುಸ್ಸಾ ರಞ್ಞೋ ಮಾಗಧಸ್ಸ ಸೇನಿಯಸ್ಸ ಬಿಮ್ಬಿಸಾರಸ್ಸ ಪಟಿಸ್ಸುತ್ವಾ ಆರಾಮಂ ಗನ್ತ್ವಾ ಆರಾಮಪಾಲಂ ಏತದವೋಚುಂ – ‘‘ದೇವಸ್ಸ, ಭಣೇ, ಅಮ್ಬೇನ ಅತ್ಥೋ, ಅಮ್ಬಂ ದೇಥಾ’’ತಿ. ‘‘ನತ್ಥಾಯ್ಯಾ ಅಮ್ಬಂ. ತರುಣಞ್ಞೇವ ಅಮ್ಬಂ ಪಾತಾಪೇತ್ವಾ ಭಿಕ್ಖೂ ಪರಿಭುಞ್ಜಿಂಸೂ’’ತಿ. ಅಥ ಖೋ ತೇ ಮನುಸ್ಸಾ ರಞ್ಞೋ ಮಾಗಧಸ್ಸ ಸೇನಿಯಸ್ಸ ಬಿಮ್ಬಿಸಾರಸ್ಸ ಏತಮತ್ಥಂ ಆರೋಚೇಸುಂ. ‘‘ಸುಪರಿಭುತ್ತಂ, ಭಣೇ, ಅಯ್ಯೇಹಿ ಅಮ್ಬಂ, ಅಪಿ ಚ ಭಗವತಾ ಮತ್ತಾ ವಣ್ಣಿತಾ’’ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ನ ಮತ್ತಂ ಜಾನಿತ್ವಾ ರಞ್ಞೋ ಅಮ್ಬಂ ಪರಿಭುಞ್ಜಿಸ್ಸನ್ತೀ’’ತಿ! ಅಸ್ಸೋಸುಂ ಖೋ ಭಿಕ್ಖೂ ತೇಸಂ ಮನುಸ್ಸಾನಂ ಉಜ್ಝಾಯನ್ತಾನಂ ಖಿಯ್ಯನ್ತಾನಂ ವಿಪಾಚೇನ್ತಾನಂ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಅಮ್ಬಂ ಪರಿಭುಞ್ಜಿತಬ್ಬಂ. ಯೋ ಪರಿಭುಞ್ಜೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರಸ್ಸ ಪೂಗಸ್ಸ ಸಙ್ಘಭತ್ತಂ ಹೋತಿ. ಸೂಪೇ ಅಮ್ಬಪೇಸಿಕಾಯೋ ಪಕ್ಖಿತ್ತಾ ಹೋನ್ತಿ. ಭಿಕ್ಖೂ ಕುಕ್ಕುಚ್ಚಾಯನ್ತಾ ನಪ್ಪಟಿಗ್ಗಣ್ಹನ್ತಿ. ‘‘ಪಟಿಗ್ಗಣ್ಹಥ, ಭಿಕ್ಖವೇ, ಪರಿಭುಞ್ಜಥ. ಅನುಜಾನಾಮಿ, ಭಿಕ್ಖವೇ, ಅಮ್ಬಪೇಸಿಕ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರಸ್ಸ ಪೂಗಸ್ಸ ಸಙ್ಘಭತ್ತಂ ಹೋತಿ. ತೇ ನ ಪರಿಯಾಪುಣಿಂಸು ಅಮ್ಬಪೇಸಿಕಂ ಕಾತುಂ, ಭತ್ತಗ್ಗೇ ಸಕಲೇಹೇವ ಅಮ್ಬೇಹಿ ದೇನ್ತಿ. ಭಿಕ್ಖೂ ಕುಕ್ಕುಚ್ಚಾಯನ್ತಾ ನಪ್ಪಟಿಗ್ಗಣ್ಹನ್ತಿ. ‘‘ಪಟಿಗ್ಗಣ್ಹಥ, ಭಿಕ್ಖವೇ, ಪರಿಭುಞ್ಜಥ. ಅನುಜಾನಾಮಿ, ಭಿಕ್ಖವೇ, ಪಞ್ಚಹಿ ಸಮಣಕಪ್ಪೇಹಿ ಫಲಂ ಪರಿಭುಞ್ಜಿತುಂ – ಅಗ್ಗಿಪರಿಚಿತಂ, ಸತ್ಥಪರಿಚಿತಂ, ನಖಪರಿಚಿತಂ, ಅಬೀಜಂ, ನಿಬ್ಬತ್ತಬೀಜಞ್ಞೇವ [ನಿಬ್ಬಟ್ಟಬೀಜಂ (ಸೀ. ಸ್ಯಾ.)] ಪಞ್ಚಮಂ. ಅನುಜಾನಾಮಿ, ಭಿಕ್ಖವೇ, ಇಮೇಹಿ ಪಞ್ಚಹಿ ಸಮಣಕಪ್ಪೇಹಿ ಫಲಂ ಪರಿಭುಞ್ಜಿತು’’ನ್ತಿ.

೨೫೧. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಅಹಿನಾ ದಟ್ಠೋ ಕಾಲಙ್ಕತೋ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ ಹಿ ನೂನ ಸೋ, ಭಿಕ್ಖವೇ, ಭಿಕ್ಖು ಇಮಾನಿ ಚತ್ತಾರಿ ಅಹಿರಾಜಕುಲಾನಿ ಮೇತ್ತೇನ ಚಿತ್ತೇನ ಫರಿ. ಸಚೇ ಹಿ ಸೋ, ಭಿಕ್ಖವೇ, ಭಿಕ್ಖು ಇಮಾನಿ ಚತ್ತಾರಿ ಅಹಿರಾಜಕುಲಾನಿ ಮೇತ್ತೇನ ಚಿತ್ತೇನ ಫರೇಯ್ಯ, ನ ಹಿ ಸೋ, ಭಿಕ್ಖವೇ, ಭಿಕ್ಖು ಅಹಿನಾ ದಟ್ಠೋ ಕಾಲಙ್ಕರೇಯ್ಯ. ಕತಮಾನಿ ಚತ್ತಾರಿ ಅಹಿರಾಜಕುಲಾನಿ? ವಿರೂಪಕ್ಖಂ ಅಹಿರಾಜಕುಲಂ, ಏರಾಪಥಂ ಅಹಿರಾಜಕುಲಂ, ಛಬ್ಯಾಪುತ್ತಂ ಅಹಿರಾಜಕುಲಂ, ಕಣ್ಹಾಗೋತಮಂ ಅಹಿರಾಜಕುಲಂ. ನ ಹಿ ನೂನ ಸೋ, ಭಿಕ್ಖವೇ, ಭಿಕ್ಖು ಇಮಾನಿ ಚತ್ತಾರಿ ಅಹಿರಾಜಕುಲಾನಿ ಮೇತ್ತೇನ ಚಿತ್ತೇನ ಫರಿ. ಸಚೇ ಹಿ ಸೋ, ಭಿಕ್ಖವೇ, ಭಿಕ್ಖು ಇಮಾನಿ ಚತ್ತಾರಿ ಅಹಿರಾಜಕುಲಾನಿ ಮೇತ್ತೇನ ಚಿತ್ತೇನ ಫರೇಯ್ಯ, ನ ಹಿ ಸೋ, ಭಿಕ್ಖವೇ, ಭಿಕ್ಖು ಅಹಿನಾ ದಟ್ಠೋ ಕಾಲಙ್ಕರೇಯ್ಯ. ಅನುಜಾನಾಮಿ, ಭಿಕ್ಖವೇ, ಇಮಾನಿ ಚತ್ತಾರಿ ಅಹಿರಾಜಕುಲಾನಿ ಮೇತ್ತೇನ ಚಿತ್ತೇನ ಫರಿತುಂ, ಅತ್ತಗುತ್ತಿಯಾ ಅತ್ತರಕ್ಖಾಯ ಅತ್ತಪರಿತ್ತಂ ಕಾತುಂ. ಏವಞ್ಚ ಪನ, ಭಿಕ್ಖವೇ, ಕಾತಬ್ಬಂ –

[ಜಾ. ೧.೨.೧೦೫-೧೦೬; ಅ. ನಿ. ೪.೬೭ ಇದಂ ವತ್ಥು ಆಗತಂ] ‘‘ವಿರೂಪಕ್ಖೇಹಿ ಮೇ ಮೇತ್ತಂ, ಮೇತ್ತಂ ಏರಾಪಥೇಹಿ ಮೇ;

ಛಬ್ಯಾಪುತ್ತೇಹಿ ಮೇ ಮೇತ್ತಂ, ಮೇತ್ತಂ ಕಣ್ಹಾಗೋತಮಕೇಹಿ ಚ.

‘‘ಅಪಾದಕೇಹಿ ಮೇ ಮೇತ್ತಂ, ಮೇತ್ತಂ ದ್ವಿಪಾದಕೇಹಿ ಮೇ;

ಚತುಪ್ಪದೇಹಿ ಮೇ ಮೇತ್ತಂ, ಮೇತ್ತಂ ಬಹುಪ್ಪದೇಹಿ ಮೇ.

‘‘ಮಾ ಮಂ ಅಪಾದಕೋ ಹಿಂಸಿ, ಮಾ ಮಂ ಹಿಂಸಿ ದ್ವಿಪಾದಕೋ;

ಮಾ ಮಂ ಚತುಪ್ಪದೋ ಹಿಂಸಿ, ಮಾ ಮಂ ಹಿಂಸಿ ಬಹುಪ್ಪದೋ.

‘‘ಸಬ್ಬೇ ಸತ್ತಾ ಸಬ್ಬೇ ಪಾಣಾ, ಸಬ್ಬೇ ಭೂತಾ ಚ ಕೇವಲಾ;

ಸಬ್ಬೇ ಭದ್ರಾನಿ ಪಸ್ಸನ್ತು, ಮಾ ಕಿಞ್ಚಿ ಪಾಪಮಾಗಮಾ.

‘‘ಅಪ್ಪಮಾಣೋ ಬುದ್ಧೋ, ಅಪ್ಪಮಾಣೋ ಧಮ್ಮೋ,

ಅಪ್ಪಮಾಣೋ ಸಙ್ಘೋ, ಪಮಾಣವನ್ತಾನಿ ಸರೀಸಪಾನಿ [ಸಿರಿಂಸಪಾನಿ (ಸೀ. ಸ್ಯಾ.)].

‘‘ಅಹಿ ವಿಚ್ಛಿಕಾ ಸತಪದೀ, ಉಣ್ಣನಾಭಿ ಸರಬೂ ಮೂಸಿಕಾ;

ಕತಾ ಮೇ ರಕ್ಖಾ ಕತಂ ಮೇ ಪರಿತ್ತಂ, ಪಟಿಕ್ಕಮನ್ತು ಭೂತಾನಿ.

‘‘ಸೋಹಂ ನಮೋ ಭಗವತೋ, ನಮೋ ಸತ್ತನ್ನಂ ಸಮ್ಮಾಸಮ್ಬುದ್ಧಾನ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಅನಭಿರತಿಯಾ ಪೀಳಿತೋ ಅತ್ತನೋ ಅಙ್ಗಜಾತಂ ಛಿನ್ದಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅಞ್ಞಮ್ಹಿ ಸೋ, ಭಿಕ್ಖವೇ, ಮೋಘಪುರಿಸೋ ಛೇತಬ್ಬಮ್ಹಿ, ಅಞ್ಞಂ ಛಿನ್ದಿ. ನ, ಭಿಕ್ಖವೇ, ಅತ್ತನೋ ಅಙ್ಗಜಾತಂ ಛೇತಬ್ಬಂ. ಯೋ ಛಿನ್ದೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ.

೨೫೨. ತೇನ ಖೋ ಪನ ಸಮಯೇನ ರಾಜಗಹಕಸ್ಸ ಸೇಟ್ಠಿಸ್ಸ ಮಹಗ್ಘಸ್ಸ ಚನ್ದನಸ್ಸ [ಚನ್ದನಸಾರಸ್ಸ (ಸೀ. ಸ್ಯಾ.)] ಚನ್ದನಗಣ್ಠಿ ಉಪ್ಪನ್ನಾ ಹೋತಿ. ಅಥ ಖೋ ರಾಜಗಹಕಸ್ಸ ಸೇಟ್ಠಿಸ್ಸ ಏತದಹೋಸಿ – ‘‘ಯಂನೂನಾಹಂ ಇಮಾಯ ಚನ್ದನಗಣ್ಠಿಯಾ ಪತ್ತಂ ಲೇಖಾಪೇಯ್ಯಂ. ಲೇಖಞ್ಚ ಮೇ ಪರಿಭೋಗಂ ಭವಿಸ್ಸತಿ, ಪತ್ತಞ್ಚ ದಾನಂ ದಸ್ಸಾಮೀ’’ತಿ. ಅಥ ಖೋ ರಾಜಗಹಕೋ ಸೇಟ್ಠಿ ತಾಯ ಚನ್ದನಗಣ್ಠಿಯಾ ಪತ್ತಂ ಲೇಖಾಪೇತ್ವಾ ಸಿಕ್ಕಾಯ ಉಡ್ಡಿತ್ವಾ [ವಾಹಿತ್ವಾ (ಸೀ.)] ವೇಳಗ್ಗೇ ಆಲಗ್ಗೇತ್ವಾ ವೇಳುಪರಮ್ಪರಾಯ ಬನ್ಧಿತ್ವಾ [ವಾಹಿತ್ವಾ (ಸ್ಯಾ.)] ಏವಮಾಹ – ‘‘ಯೋ ಸಮಣೋ ವಾ ಬ್ರಾಹ್ಮಣೋ ವಾ ಅರಹಾ ಚೇವ ಇದ್ಧಿಮಾ ಚ ದಿನ್ನಂಯೇವ ಪತ್ತಂ ಓಹರತೂ’’ತಿ. ಅಥ ಖೋ ಪೂರಣೋ ಕಸ್ಸಪೋ ಯೇನ ರಾಜಗಹಕೋ ಸೇಟ್ಠಿ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ರಾಜಗಹಕಂ ಸೇಟ್ಠಿಂ ಏತದವೋಚ – ‘‘ಅಹಞ್ಹಿ, ಗಹಪತಿ, ಅರಹಾ ಚೇವ ಇದ್ಧಿಮಾ ಚ, ದೇಹಿ ಮೇ ಪತ್ತ’’ನ್ತಿ. ‘‘ಸಚೇ, ಭನ್ತೇ, ಆಯಸ್ಮಾ ಅರಹಾ ಚೇವ ಇದ್ಧಿಮಾ ಚ ದಿನ್ನಂಯೇವ ಪತ್ತಂ ಓಹರತೂ’’ತಿ. ಅಥ ಖೋ ಮಕ್ಖಲಿ ಗೋಸಾಲೋ… ಅಜಿತೋ ಕೇಸಕಮ್ಬಲೋ… ಪಕುಧೋ ಕಚ್ಚಾಯನೋ… ಸಞ್ಚಯೋ ಬೇಲಟ್ಠಪುತ್ತೋ [ಸಞ್ಜಯೋ ಬೇಲ್ಲಟ್ಠಿಪುತ್ತೋ (ಸೀ.)] … ನಿಗಣ್ಠೋ ನಾಟಪುತ್ತೋ [ನಾಥಪುತ್ತೋ (ಸೀ.)] ಯೇನ ರಾಜಗಹಕೋ ಸೇಟ್ಠಿ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ರಾಜಗಹಕಂ ಸೇಟ್ಠಿಂ ಏತದವೋಚ – ‘‘ಅಹಞ್ಹಿ, ಗಹಪತಿ, ಅರಹಾ ಚೇವ ಇದ್ಧಿಮಾ ಚ, ದೇಹಿ ಮೇ ಪತ್ತ’’ನ್ತಿ. ‘‘ಸಚೇ, ಭನ್ತೇ, ಆಯಸ್ಮಾ ಅರಹಾ ಚೇವ ಇದ್ಧಿಮಾ ಚ, ದಿನ್ನಂಯೇವ ಪತ್ತಂ ಓಹರತೂ’’ತಿ.

ತೇನ ಖೋ ಪನ ಸಮಯೇನ ಆಯಸ್ಮಾ ಚ ಮಹಾಮೋಗ್ಗಲ್ಲಾನೋ ಆಯಸ್ಮಾ ಚ ಪಿಣ್ಡೋಲಭಾರದ್ವಾಜೋ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ರಾಜಗಹಂ ಪಿಣ್ಡಾಯ ಪವಿಸಿಂಸು. ಅಥ ಖೋ ಆಯಸ್ಮಾ ಪಿಣ್ಡೋಲಭಾರದ್ವಾಜೋ ಆಯಸ್ಮನ್ತಂ ಮಹಾಮೋಗ್ಗಲ್ಲಾನಂ ಏತದವೋಚ – ‘‘ಆಯಸ್ಮಾ ಖೋ ಮಹಾಮೋಗ್ಗಲ್ಲಾನೋ ಅರಹಾ ಚೇವ ಇದ್ಧಿಮಾ ಚ. ಗಚ್ಛಾವುಸೋ, ಮೋಗ್ಗಲ್ಲಾನ, ಏತಂ ಪತ್ತಂ ಓಹರ. ತುಯ್ಹೇಸೋ ಪತ್ತೋ’’ತಿ. ‘‘ಆಯಸ್ಮಾ ಖೋ ಭಾರದ್ವಾಜೋ ಅರಹಾ ಚೇವ ಇದ್ಧಿಮಾ ಚ. ಗಚ್ಛಾವುಸೋ, ಭಾರದ್ವಾಜ, ಏತಂ ಪತ್ತಂ ಓಹರ. ತುಯ್ಹೇಸೋ ಪತ್ತೋ’’ತಿ. ಅಥ ಖೋ ಆಯಸ್ಮಾ ಪಿಣ್ಡೋಲಭಾರದ್ವಾಜೋ ವೇಹಾಸಂ ಅಬ್ಭುಗ್ಗನ್ತ್ವಾ ತಂ ಪತ್ತಂ ಗಹೇತ್ವಾ ತಿಕ್ಖತ್ತುಂ ರಾಜಗಹಂ ಅನುಪರಿಯಾಯಿ.

ತೇನ ಖೋ ಪನ ಸಮಯೇನ ರಾಜಗಹಕೋ ಸೇಟ್ಠಿ ಸಪುತ್ತದಾರೋ ಸಕೇ ನಿವೇಸನೇ ಠಿತೋ ಹೋತಿ ಪಞ್ಜಲಿಕೋ ನಮಸ್ಸಮಾನೋ – ಇಧೇವ, ಭನ್ತೇ, ಅಯ್ಯೋ ಭಾರದ್ವಾಜೋ ಅಮ್ಹಾಕಂ ನಿವೇಸನೇ ಪತಿಟ್ಠಾತೂತಿ. ಅಥ ಖೋ ಆಯಸ್ಮಾ ಪಿಣ್ಡೋಲಭಾರದ್ವಾಜೋ ರಾಜಗಹಕಸ್ಸ ಸೇಟ್ಠಿಸ್ಸ ನಿವೇಸನೇ ಪತಿಟ್ಠಾಸಿ. ಅಥ ಖೋ ರಾಜಗಹಕೋ ಸೇಟ್ಠಿ ಆಯಸ್ಮತೋ ಪಿಣ್ಡೋಲಭಾರದ್ವಾಜಸ್ಸ ಹತ್ಥತೋ ಪತ್ತಂ ಗಹೇತ್ವಾ ಮಹಗ್ಘಸ್ಸ ಖಾದನೀಯಸ್ಸ ಪೂರೇತ್ವಾ ಆಯಸ್ಮತೋ ಪಿಣ್ಡೋಲಭಾರದ್ವಾಜಸ್ಸ ಅದಾಸಿ. ಅಥ ಖೋ ಆಯಸ್ಮಾ ಪಿಣ್ಡೋಲಭಾರದ್ವಾಜೋ ತಂ ಪತ್ತಂ ಗಹೇತ್ವಾ ಆರಾಮಂ ಅಗಮಾಸಿ. ಅಸ್ಸೋಸುಂ ಖೋ ಮನುಸ್ಸಾ – ಅಯ್ಯೇನ ಕಿರ ಪಿಣ್ಡೋಲಭಾರದ್ವಾಜೇನ ರಾಜಗಹಕಸ್ಸ ಸೇಟ್ಠಿಸ್ಸ ಪತ್ತೋ ಓಹಾರಿತೋತಿ. ತೇ ಚ ಮನುಸ್ಸಾ ಉಚ್ಚಾಸದ್ದಾ ಮಹಾಸದ್ದಾ ಆಯಸ್ಮನ್ತಂ ಪಿಣ್ಡೋಲಭಾರದ್ವಾಜಂ ಪಿಟ್ಠಿತೋ ಪಿಟ್ಠಿತೋ ಅನುಬನ್ಧಿಂಸು.

ಅಸ್ಸೇಸಿ ಖೋ ಭಗವಾ ಉಚ್ಚಾಸದ್ದಂ ಮಹಾಸದ್ದಂ; ಸುತ್ವಾನ ಆಯಸ್ಮನ್ತಂ ಆನನ್ದಂ ಆಮನ್ತೇಸಿ – ‘‘ಕಿಂ ನು ಖೋ ಸೋ, ಆನನ್ದ, ಉಚ್ಚಾಸದ್ದೋ ಮಹಾಸದ್ದೋ’’ತಿ? ‘‘ಆಯಸ್ಮತಾ, ಭನ್ತೇ, ಪಿಣ್ಡೋಲಭಾರದ್ವಾಜೇನ ರಾಜಗಹಕಸ್ಸ ಸೇಟ್ಠಿಸ್ಸ ಪತ್ತೋ ಓಹಾರಿತೋ. ಅಸ್ಸೋಸುಂ ಖೋ, ಭನ್ತೇ, ಮನುಸ್ಸಾ – ಅಯ್ಯೇನ ಕಿರ ಪಿಣ್ಡೋಲಭಾರದ್ವಾಜೇನ ರಾಜಗಹಕಸ್ಸ ಸೇಟ್ಠಿಸ್ಸ ಪತ್ತೋ ಓಹಾರಿತೋತಿ. ತೇ ಚ, ಭನ್ತೇ, ಮನುಸ್ಸಾ ಉಚ್ಚಾಸದ್ದಾ ಮಹಾಸದ್ದಾ ಆಯಸ್ಮನ್ತಂ ಪಿಣ್ಡೋಲಭಾರದ್ವಾಜಂ ಪಿಟ್ಠಿತೋ ಪಿಟ್ಠಿತೋ ಅನುಬನ್ಧಾ. ಸೋ ಏಸೋ, ಭನ್ತೇ, ಭಗವಾ ಉಚ್ಚಾಸದ್ದೋ ಮಹಾಸದ್ದೋ’’ತಿ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಆಯಸ್ಮನ್ತಂ ಪಿಣ್ಡೋಲಭಾರದ್ವಾಜಂ ಪಟಿಪುಚ್ಛಿ – ‘‘ಸಚ್ಚಂ ಕಿರ ತಯಾ, ಭಾರದ್ವಾಜ, ರಾಜಗಹಕಸ್ಸ ಸೇಟ್ಠಿಸ್ಸ ಪತ್ತೋ ಓಹಾರಿತೋ’’ತಿ? ‘‘ಸಚ್ಚಂ ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ, ಭಾರದ್ವಾಜ, ಅನನುಲೋಮಿಕಂ ಅಪ್ಪತಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ. ಕಥಞ್ಹಿ ನಾಮ ತ್ವಂ, ಭಾರದ್ವಾಜ, ಛವಸ್ಸ ದಾರುಪತ್ತಸ್ಸ ಕಾರಣಾ ಗಿಹೀನಂ ಉತ್ತರಿಮನುಸ್ಸಧಮ್ಮಂ ಇದ್ಧಿಪಾಟಿಹಾರಿಯಂ ದಸ್ಸೇಸ್ಸಸಿ! ಸೇಯ್ಯಥಾಪಿ, ಭಾರದ್ವಾಜ, ಮಾತುಗಾಮೋ ಛವಸ್ಸ ಮಾಸಕರೂಪಸ್ಸ ಕಾರಣಾ ಕೋಪಿನಂ ದಸ್ಸೇತಿ, ಏವಮೇವ ಖೋ ತಯಾ, ಭಾರದ್ವಾಜ, ಛವಸ್ಸ ದಾರುಪತ್ತಸ್ಸ ಕಾರಣಾ ಗಿಹೀನಂ ಉತ್ತರಿಮನುಸ್ಸಧಮ್ಮಂ ಇದ್ಧಿಪಾಟಿಹಾರಿಯಂ ದಸ್ಸಿತಂ. ನೇತಂ, ಭಾರದ್ವಾಜ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ಗಿಹೀನಂ ಉತ್ತರಿಮನುಸ್ಸಧಮ್ಮಂ ಇದ್ಧಿಪಾಟಿಹಾರಿಯಂ ದಸ್ಸೇತಬ್ಬಂ. ಯೋ ದಸ್ಸೇಯ್ಯ, ಆಪತ್ತಿ ದುಕ್ಕಟಸ್ಸ. ಭಿನ್ದಥೇತಂ, ಭಿಕ್ಖವೇ, ದಾರುಪತ್ತಂ ಸಕಲಿಕಂ ಸಕಲಿಕಂ ಕತ್ವಾ, ಭಿಕ್ಖೂನಂ ಅಞ್ಜನುಪಪಿಸನಂ ದೇಥ. ನ ಚ, ಭಿಕ್ಖವೇ, ದಾರುಪತ್ತೋ ಧಾರೇತಬ್ಬೋ. ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಉಚ್ಚಾವಚೇ ಪತ್ತೇ ಧಾರೇನ್ತಿ ಸೋವಣ್ಣಮಯಂ ರೂಪಿಯಮಯಂ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಸೋವಣ್ಣಮಯೋ ಪತ್ತೋ ಧಾರೇತಬ್ಬೋ…ಪೇ… ನ ರೂಪಿಯಮಯೋ ಪತ್ತೋ ಧಾರೇತಬ್ಬೋ… ನ ಮಣಿಮಯೋ ಪತ್ತೋ ಧಾರೇತಬ್ಬೋ… ನ ವೇಳುರಿಯಮಯೋ ಪತ್ತೋ ಧಾರೇತಬ್ಬೋ… ನ ಫಲಿಕಮಯೋ ಪತ್ತೋ ಧಾರೇತಬ್ಬೋ… ನ ಕಂಸಮಯೋ ಪತ್ತೋ ಧಾರೇತಬ್ಬೋ… ನ ಕಾಚಮಯೋ ಪತ್ತೋ ಧಾರೇತಬ್ಬೋ… ನ ತಿಪುಮಯೋ ಪತ್ತೋ ಧಾರೇತಬ್ಬೋ… ನ ಸೀಸಮಯೋ ಪತ್ತೋ ಧಾರೇತಬ್ಬೋ… ನ ತಮ್ಬಲೋಹಮಯೋ ಪತ್ತೋ ಧಾರೇತಬ್ಬೋ. ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ದ್ವೇ ಪತ್ತೇ – ಅಯೋಪತ್ತಂ, ಮತ್ತಿಕಾಪತ್ತ’’ನ್ತಿ.

೨೫೩. ತೇನ ಖೋ ಪನ ಸಮಯೇನ ಪತ್ತಮೂಲಂ ಘಂಸಿಯತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪತ್ತಮಣ್ಡಲ’’ನ್ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಉಚ್ಚಾವಚಾನಿ ಪತ್ತಮಣ್ಡಲಾನಿ ಧಾರೇನ್ತಿ ಸೋವಣ್ಣಮಯಂ ರೂಪಿಯಮಯಂ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಉಚ್ಚಾವಚಾನಿ ಪತ್ತಮಣ್ಡಲಾನಿ ಧಾರೇತಬ್ಬಾನಿ. ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ದ್ವೇ ಪತ್ತಮಣ್ಡಲಾನಿ – ತಿಪುಮಯಂ, ಸೀಸಮಯ’’ನ್ತಿ. ಬಹಲಾನಿ ಮಣ್ಡಲಾನಿ ನ ಅಚ್ಛುಪಿಯನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಲಿಖಿತು’’ನ್ತಿ. ವಲೀ [ಚಲೀ (ಕ.)] ಹೋನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಮಕರದನ್ತಕಂ ಛಿನ್ದಿತು’’ನ್ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಚಿತ್ರಾನಿ ಪತ್ತಮಣ್ಡಲಾನಿ ಧಾರೇನ್ತಿ ರೂಪಕಾಕಿಣ್ಣಾನಿ ಭಿತ್ತಿಕಮ್ಮಕತಾನಿ. ತಾನಿ ರಥಿಕಾಯಪಿ ದಸ್ಸೇನ್ತಾ ಆಹಿಣ್ಡನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಚಿತ್ರಾನಿ ಪತ್ತಮಣ್ಡಲಾನಿ ಧಾರೇತಬ್ಬಾನಿ ರೂಪಕಾಕಿಣ್ಣಾನಿ ಭಿತ್ತಿಕಮ್ಮಕತಾನಿ. ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸ. ‘‘ಅನುಜಾನಾಮಿ, ಭಿಕ್ಖವೇ, ಪಕತಿಮಣ್ಡಲ’’ನ್ತಿ.

೨೫೪. ತೇನ ಖೋ ಪನ ಸಮಯೇನ ಭಿಕ್ಖೂ ಸೋದಕಂ ಪತ್ತಂ ಪಟಿಸಾಮೇನ್ತಿ. ಪತ್ತೋ ದುಸ್ಸತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಸೋದಕೋ ಪತ್ತೋ ಪಟಿಸಾಮೇತಬ್ಬೋ. ಯೋ ಪಟಿಸಾಮೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಓತಾಪೇತ್ವಾ ಪತ್ತಂ ಪಟಿಸಾಮೇತು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಸೋದಕಂ [ಸಉದಕಂ (ಕ.)] ಪತ್ತಂ ಓತಾಪೇನ್ತಿ. ಪತ್ತೋ ದುಗ್ಗನ್ಧೋ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಸೋದಕೋ ಪತ್ತೋ ಓತಾಪೇತಬ್ಬೋ. ಯೋ ಓತಾಪೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ವೋದಕಂ ಕತ್ವಾ ಓತಾಪೇತ್ವಾ ಪತ್ತಂ ಪಟಿಸಾಮೇತು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಉಣ್ಹೇ ಪತ್ತಂ ನಿದಹನ್ತಿ. ಪತ್ತಸ್ಸ ವಣ್ಣೋ ದುಸ್ಸತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಉಣ್ಹೇ ಪತ್ತೋ ನಿದಹಿತಬ್ಬೋ. ಯೋ ನಿದಹೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಮುಹುತ್ತಂ ಉಣ್ಹೇ ಓತಾಪೇತ್ವಾ ಪತ್ತಂ ಪಟಿಸಾಮೇತು’’ನ್ತಿ.

ತೇನ ಖೋ ಪನ ಸಮಯೇನ ಸಮ್ಬಹುಲಾ ಪತ್ತಾ ಅಜ್ಝೋಕಾಸೇ ಅನಾಧಾರಾ ನಿಕ್ಖಿತ್ತಾ ಹೋನ್ತಿ. ವಾತಮಣ್ಡಲಿಕಾಯ ಆವಟ್ಟೇತ್ವಾ ಪತ್ತಾ ಭಿಜ್ಜಿಂಸು. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪತ್ತಾಧಾರಕ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಮಿಡ್ಢನ್ತೇ ಪತ್ತಂ ನಿಕ್ಖಿಪನ್ತಿ. ಪರಿಪತಿತ್ವಾ [ಪರಿವಟ್ಟಿತ್ವಾ (ಸ್ಯಾ.)] ಪತ್ತೋ ಭಿಜ್ಜತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಮಿಡ್ಢನ್ತೇ ಪತ್ತೋ ನಿಕ್ಖಿಪಿತಬ್ಬೋ. ಯೋ ನಿಕ್ಖಿಪೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಪರಿಭಣ್ಡನ್ತೇ ಪತ್ತಂ ನಿಕ್ಖಿಪನ್ತಿ. ಪರಿಪತಿತ್ವಾ ಪತ್ತೋ ಭಿಜ್ಜತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಪರಿಭಣ್ಡನ್ತೇ ಪತ್ತೋ ನಿಕ್ಖಿಪಿತಬ್ಬೋ. ಯೋ ನಿಕ್ಖಿಪೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಛಮಾಯ ಪತ್ತಂ ನಿಕ್ಕುಜ್ಜನ್ತಿ. ಓಟ್ಠೋ ಘಂಸಿಯತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ತಿಣಸನ್ಥಾರಕ’’ನ್ತಿ. ತಿಣಸನ್ಥಾರಕೋ ಉಪಚಿಕಾಹಿ ಖಜ್ಜತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಚೋಳಕ’’ನ್ತಿ. ಚೋಳಕಂ ಉಪಚಿಕಾಹಿ ಖಜ್ಜತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪತ್ತಮಾಳಕ’’ನ್ತಿ. ಪತ್ತಮಾಳಕೋ ಪರಿಪತಿತ್ವಾ ಪತ್ತೋ ಭಿಜ್ಜತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪತ್ತಕುಣ್ಡೋಲಿಕ’’ನ್ತಿ. ಪತ್ತಕುಣ್ಡೋಲಿಕಾಯ ಪತ್ತೋ ಘಂಸಿಯತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪತ್ತಥವಿಕ’’ನ್ತಿ. ಅಂಸಬದ್ಧಕೋ ನ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಅಂಸಬದ್ಧಕಂ ಬನ್ಧನಸುತ್ತಕ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಭಿತ್ತಿಖಿಲೇಪಿ ನಾಗದನ್ತಕೇಪಿ ಪತ್ತಂ ಲಗ್ಗೇನ್ತಿ. ಪರಿಪತಿತ್ವಾ ಪತ್ತೋ ಭಿಜ್ಜತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಪತ್ತೋ ಲಗ್ಗೇತಬ್ಬೋ. ಯೋ ಲಗ್ಗೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಮಞ್ಚೇ ಪತ್ತಂ ನಿಕ್ಖಿಪನ್ತಿ, ಸತಿಸಮ್ಮೋಸಾ ನಿಸೀದನ್ತಾ ಓತ್ಥರಿತ್ವಾ ಪತ್ತಂ ಭಿನ್ದೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಮಞ್ಚೇ ಪತ್ತೋ ನಿಕ್ಖಿಪಿತಬ್ಬೋ. ಯೋ ನಿಕ್ಖಿಪೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಪೀಠೇ ಪತ್ತಂ ನಿಕ್ಖಿಪನ್ತಿ, ಸತಿಸಮ್ಮೋಸಾ ನಿಸೀದನ್ತಾ ಓತ್ಥರಿತ್ವಾ ಪತ್ತಂ ಭಿನ್ದೇನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಪೀಠೇ ಪತ್ತೋ ನಿಕ್ಖಿಪಿತಬ್ಬೋ. ಯೋ ನಿಕ್ಖಿಪೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅಙ್ಕೇ ಪತ್ತಂ ನಿಕ್ಖಿಪನ್ತಿ, ಸತಿಸಮ್ಮೋಸಾ ಉಟ್ಠಹನ್ತಿ. ಪರಿಪತಿತ್ವಾ ಪತ್ತೋ ಭಿಜ್ಜತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಅಙ್ಕೇ ಪತ್ತೋ ನಿಕ್ಖಿಪಿತಬ್ಬೋ. ಯೋ ನಿಕ್ಖಿಪೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಛತ್ತೇ ಪತ್ತಂ ನಿಕ್ಖಿಪನ್ತಿ. ವಾತಮಣ್ಡಲಿಕಾಯ ಛತ್ತಂ ಉಕ್ಖಿಪಿಯತಿ ಪರಿಪತಿತ್ವಾ ಪತ್ತೋ ಭಿಜ್ಜತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಛತ್ತೇ ಪತ್ತೋ ನಿಕ್ಖಿಪಿತಬ್ಬೋ. ಯೋ ನಿಕ್ಖಿಪೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೨೫೫. ತೇನ ಖೋ ಪನ ಸಮಯೇನ ಭಿಕ್ಖೂ ಪತ್ತಹತ್ಥಾ ಕವಾಟಂ ಪಣಾಮೇನ್ತಿ. ಕವಾಟೋ ಆವಟ್ಟಿತ್ವಾ ಪತ್ತೋ ಭಿಜ್ಜತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಪತ್ತಹತ್ಥೇನ ಕವಾಟಂ ಪಣಾಮೇತಬ್ಬಂ [ಕವಾಟೋ ಪಣಾಮೇತಬ್ಬೋ (ಕ.)]. ಯೋ ಪಣಾಮೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ತುಮ್ಬಕಟಾಹೇ ಪಿಣ್ಡಾಯ ಚರನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ತಿತ್ಥಿಯಾತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ತುಮ್ಬಕಟಾಹೇ ಪಿಣ್ಡಾಯ ಚರಿತಬ್ಬಂ. ಯೋ ಚರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಘಟಿಕಟಾಹೇ [ಘಟಿಕಟಾಹೇನ (ಸ್ಯಾ.)] ಪಿಣ್ಡಾಯ ಚರನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ತಿತ್ಥಿಯಾತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಘಟಿಕಟಾಹೇ ಪಿಣ್ಡಾಯ ಚರಿತಬ್ಬಂ. ಯೋ ಚರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸಬ್ಬಪಂಸುಕೂಲಿಕೋ ಹೋತಿ. ಸೋ ಛವಸೀಸಸ್ಸ ಪತ್ತಂ ಧಾರೇತಿ. ಅಞ್ಞತರಾ ಇತ್ಥೀ ಪಸ್ಸಿತ್ವಾ ಭೀತಾ ವಿಸ್ಸರಮಕಾಸಿ – ‘‘ಅಭುಂ ಮೇ ಪಿಸಾಚೋ ವತಾಯ’’ನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಸಮಣಾ ಸಕ್ಯಪುತ್ತಿಯಾ ಛವಸೀಸಸ್ಸ ಪತ್ತಂ ಧಾರೇಸ್ಸನ್ತಿ, ಸೇಯ್ಯಥಾಪಿ ಪಿಸಾಚಿಲ್ಲಿಕಾ’’ತಿ! ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಛವಸೀಸಸ್ಸ ಪತ್ತೋ ಧಾರೇತಬ್ಬೋ. ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸ. ನ ಚ, ಭಿಕ್ಖವೇ, ಸಬ್ಬಪಂಸುಕೂಲಿಕೇನ ಭವಿತಬ್ಬಂ. ಯೋ ಭವೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಚಲಕಾನಿಪಿ ಅಟ್ಠಿಕಾನಿಪಿ ಉಚ್ಛಿಟ್ಠೋದಕಮ್ಪಿ ಪತ್ತೇನ ನೀಹರನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಯಸ್ಮಿಂ ಯೇವಿಮೇ ಸಮಣಾ ಸಕ್ಯಪುತ್ತಿಯಾ ಭುಞ್ಜನ್ತಿ ಸೋವ ನೇಸಂ ಪಟಿಗ್ಗಹೋ’’ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ ಭಿಕ್ಖವೇ, ಚಲಕಾನಿ ವಾ ಅಟ್ಠಿಕಾನಿ ವಾ ಉಚ್ಛಿಟ್ಠೋದಕಂ ವಾ ಪತ್ತೇನ ನೀಹರಿತಬ್ಬಂ. ಯೋ ನೀಹರೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಪಟಿಗ್ಗಹ’’ನ್ತಿ.

೨೫೬. ತೇನ ಖೋ ಪನ ಸಮಯೇನ ಭಿಕ್ಖೂ ಹತ್ಥೇನ ವಿಪ್ಫಾಳೇತ್ವಾ ಚೀವರಂ ಸಿಬ್ಬೇನ್ತಿ. ಚೀವರಂ ವಿಲೋಮಿಕಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸತ್ಥಕಂ ನಮತಕ’’ನ್ತಿ.

ತೇನ ಖೋ ಪನ ಸಮಯೇನ ಸಙ್ಘಸ್ಸ ದಣ್ಡಸತ್ಥಕಂ ಉಪ್ಪನ್ನಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ದಣ್ಡಸತ್ಥಕ’’ನ್ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಉಚ್ಚಾವಚೇ ಸತ್ಥಕದಣ್ಡೇ ಧಾರೇನ್ತಿ ಸೋವಣ್ಣಮಯಂ ರೂಪಿಯಮಯಂ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಉಚ್ಚಾವಚಾ ಸತ್ಥಕದಣ್ಡಾ ಧಾರೇತಬ್ಬಾ. ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಅಟ್ಠಿಮಯಂ ದನ್ತಮಯಂ ವಿಸಾಣಮಯಂ ನಳಮಯಂ ವೇಳುಮಯಂ ಕಟ್ಠಮಯಂ ಜತುಮಯಂ ಫಲಮಯಂ ಲೋಹಮಯಂ ಸಙ್ಖನಾಭಿಮಯ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಕುಕ್ಕುಟಪತ್ತೇನಪಿ ವೇಳುಪೇಸಿಕಾಯಪಿ ಚೀವರಂ ಸಿಬ್ಬೇನ್ತಿ. ಚೀವರಂ ದುಸ್ಸಿಬ್ಬಿತಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸೂಚಿ’’ನ್ತಿ. ಸೂಚಿಯೋ ಕಣ್ಣಕಿತಾಯೋ ಹೋನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಸೂಚಿನಾಳಿಕ’’ನ್ತಿ. ಸೂಚಿನಾಳಿಕಾಯಪಿ ಕಣ್ಣಕಿತಾಯೋ ಹೋನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಕಿಣ್ಣೇನ ಪೂರೇತು’’ನ್ತಿ. ಕಿಣ್ಣೇಪಿ ಕಣ್ಣಕಿತಾಯೋ ಹೋನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಸತ್ತುಯಾ ಪೂರೇತು’’ನ್ತಿ. ಸತ್ತುಯಾಪಿ ಕಣ್ಣಕಿತಾಯೋ ಹೋನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಸರಿತಕ’’ನ್ತಿ. ಸರಿತಕೇಪಿ ಕಣ್ಣಕಿತಾಯೋ ಹೋನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಮಧುಸಿತ್ಥಕೇನ ಸಾರೇತು’’ನ್ತಿ. ಸರಿತಕಂ ಪರಿಭಿಜ್ಜತಿ. ‘‘ಅನುಜಾನಾಮಿ, ಭಿಕ್ಖವೇ, ಸರಿತಕಸಿಪಾಟಿಕ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ತತ್ಥ ತತ್ಥ ಖಿಲಂ ನಿಕ್ಖಣಿತ್ವಾ ಸಮ್ಬನ್ಧಿತ್ವಾ ಚೀವರಂ ಸಿಬ್ಬೇನ್ತಿ. ಚೀವರಂ ವಿಕಣ್ಣಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಕಥಿನಂ ಕಥಿನರಜ್ಜುಂ [ಕಠಿನಂ ಕಠಿನರಜ್ಜುಂ (ಸೀ. ಸ್ಯಾ.)] ತತ್ಥ ತತ್ಥ ಓಬನ್ಧಿತ್ವಾ ಚೀವರಂ ಸಿಬ್ಬೇತು’’ನ್ತಿ. ವಿಸಮೇ ಕಥಿನಂ ಪತ್ಥರನ್ತಿ. ಕಥಿನಂ ಪರಿಭಿಜ್ಜತಿ…ಪೇ… ‘‘ನ, ಭಿಕ್ಖವೇ, ವಿಸಮೇ ಕಥಿನಂ ಪತ್ಥರಿತಬ್ಬಂ. ಯೋ ಪತ್ಥರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ಛಮಾಯ ಕಥಿನಂ ಪತ್ಥರನ್ತಿ. ಕಥಿನಂ ಪಂಸುಕಿತಂ ಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ತಿಣಸನ್ಥಾರಕ’’ನ್ತಿ. ಕಥಿನಸ್ಸ ಅನ್ತೋ ಜೀರತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಅನುವಾತಂ ಪರಿಭಣ್ಡಂ ಆರೋಪೇತು’’ನ್ತಿ. ಕಥಿನಂ ನಪ್ಪಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ದಣ್ಡಕಥಿನಂ ಬಿದಲಕಂ ಸಲಾಕಂ ವಿನನ್ಧನರಜ್ಜುಂ ವಿನನ್ಧನಸುತ್ತಂ ವಿನನ್ಧಿತ್ವಾ ಚೀವರಂ ಸಿಬ್ಬೇತು’’ನ್ತಿ. ಸುತ್ತನ್ತರಿಕಾಯೋ ವಿಸಮಾ ಹೋನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಕಳಿಮ್ಭಕ’’ನ್ತಿ. ಸುತ್ತಾ ವಙ್ಕಾ ಹೋನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಮೋಘಸುತ್ತಕ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅಧೋತೇಹಿ ಪಾದೇಹಿ ಕಥಿನಂ ಅಕ್ಕಮನ್ತಿ. ಕಥಿನಂ ದುಸ್ಸತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಅಧೋತೇಹಿ ಪಾದೇಹಿ ಕಥಿನಂ ಅಕ್ಕಮಿತಬ್ಬಂ. ಯೋ ಅಕ್ಕಮೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅಲ್ಲೇಹಿ ಪಾದೇಹಿ ಕಥಿನಂ ಅಕ್ಕಮನ್ತಿ. ಕಥಿನಂ ದುಸ್ಸತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಅಲ್ಲೇಹಿ ಪಾದೇಹಿ ಕಥಿನಂ ಅಕ್ಕಮಿತಬ್ಬಂ. ಯೋ ಅಕ್ಕಮೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಸಉಪಾಹನಾ ಕಥಿನಂ ಅಕ್ಕಮನ್ತಿ. ಕಥಿನಂ ದುಸ್ಸತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಸಉಪಾಹನೇನ ಕಥಿನಂ ಅಕ್ಕಮಿತಬ್ಬಂ. ಯೋ ಅಕ್ಕಮೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಚೀವರಂ ಸಿಬ್ಬನ್ತಾ ಅಙ್ಗುಲಿಯಾ ಪಟಿಗ್ಗಣ್ಹನ್ತಿ. ಅಙ್ಗುಲಿಯೋ ದುಕ್ಖಾ ಹೋನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪಟಿಗ್ಗಹ’’ನ್ತಿ.

೨೫೭. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಉಚ್ಚಾವಚೇ ಪಟಿಗ್ಗಹೇ ಧಾರೇನ್ತಿ ಸೋವಣ್ಣಮಯಂ ರೂಪಿಯಮಯಂ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಉಚ್ಚಾವಚಾ ಪಟಿಗ್ಗಹಾ ಧಾರೇತಬ್ಬಾ. ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ಅಟ್ಠಿಮಯಂ…ಪೇ… ಸಙ್ಖನಾಭಿಮಯ’’ನ್ತಿ.

ತೇನ ಖೋ ಪನ ಸಮಯೇನ ಸೂಚಿಯೋಪಿ ಸತ್ಥಕಾಪಿ ಪಟಿಗ್ಗಹಾಪಿ ನಸ್ಸನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಆವೇಸನವಿತ್ಥಕ’’ನ್ತಿ. ಆವೇಸನವಿತ್ಥಕೇ ಸಮಾಕುಲಾ ಹೋನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪಟಿಗ್ಗಹಥವಿಕ’’ನ್ತಿ. ಅಂಸಬದ್ಧಕೋ ನ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಅಂಸಬದ್ಧಕಂ ಬನ್ಧನಸುತ್ತಕ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅಬ್ಭೋಕಾಸೇ ಚೀವರಂ ಸಿಬ್ಬನ್ತಾ ಸೀತೇನಪಿ ಉಣ್ಹೇನಪಿ ಕಿಲಮನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಕಥಿನಸಾಲಂ ಕಥಿನಮಣ್ಡಪ’’ನ್ತಿ. ಕಥಿನಸಾಲಾ ನೀಚವತ್ಥುಕಾ ಹೋತಿ, ಉದಕೇನ ಓತ್ಥರಿಯ್ಯತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ ಉಚ್ಚವತ್ಥುಕಂ ಕಾತು’’ನ್ತಿ. ಚಯೋ ಪರಿಪತತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಚಿನಿತುಂ ತಯೋ ಚಯೇ – ಇಟ್ಠಕಾಚಯಂ, ಸಿಲಾಚಯಂ, ದಾರುಚಯ’’ನ್ತಿ. ಆರೋಹನ್ತಾ ವಿಹಞ್ಞನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ತಯೋ ಸೋಪಾನೇ – ಇಟ್ಠಕಾಸೋಪಾನಂ, ಸಿಲಾಸೋಪಾನಂ, ದಾರುಸೋಪಾನ’’ನ್ತಿ. ಆರೋಹನ್ತಾ ಪರಿಪತನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಆಲಮ್ಬನಬಾಹ’’ನ್ತಿ. ಕಥಿನಸಾಲಾಯ ತಿಣಚುಣ್ಣಂ ಪರಿಪತತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಓಗುಮ್ಫೇತ್ವಾ [ಓಗುಮ್ಬೇತ್ವಾ (ಸೀ. ಸ್ಯಾ.)] ಉಲ್ಲಿತ್ತಾವಲಿತ್ತಂ ಕಾತುಂ – ಸೇತವಣ್ಣಂ ಕಾಳವಣ್ಣಂ ಗೇರುಕಪರಿಕಮ್ಮಂ ಮಾಲಾಕಮ್ಮಂ ಲತಾಕಮ್ಮಂ ಮಕರದನ್ತಕಂ ಪಞ್ಚಪಟಿಕಂ ಚೀವರವಂಸಂ ಚೀವರರಜ್ಜುಕ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಚೀವರಂ ಸಿಬ್ಬೇತ್ವಾ ತತ್ಥೇವ ಕಥಿನಂ ಉಜ್ಝಿತ್ವಾ ಪಕ್ಕಮನ್ತಿ, ಉನ್ದೂರೇಹಿಪಿ ಉಪಚಿಕಾಹಿಪಿ ಖಜ್ಜತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಕಥಿನಂ ಸಙ್ಘರಿತು’’ನ್ತಿ. ಕಥಿನಂ ಪರಿಭಿಜ್ಜತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಗೋಘಂಸಿಕಾಯ ಕಥಿನಂ ಸಙ್ಘರಿತು’’ನ್ತಿ. ಕಥಿನಂ ವಿನಿವೇಠಿಯತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಬನ್ಧನರಜ್ಜು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಕುಟ್ಟೇಪಿ ಥಮ್ಭೇಪಿ ಕಥಿನಂ ಉಸ್ಸಾಪೇತ್ವಾ ಪಕ್ಕಮನ್ತಿ. ಪರಿಪತಿತ್ವಾ ಕಥಿನಂ ಭಿಜ್ಜತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಭಿತ್ತಿಖಿಲೇ ವಾ ನಾಗದನ್ತೇ ವಾ ಲಗ್ಗೇತು’’ನ್ತಿ.

೨೫೮. ಅಥ ಖೋ ಭಗವಾ ರಾಜಗಹೇ ಯಥಾಭಿರನ್ತಂ ವಿಹರಿತ್ವಾ ಯೇನ ವೇಸಾಲೀ ತೇನ ಚಾರಿಕಂ ಪಕ್ಕಾಮಿ. ತೇನ ಖೋ ಪನ ಸಮಯೇನ ಭಿಕ್ಖೂ ಸೂಚಿಕಮ್ಪಿ ಸತ್ಥಕಮ್ಪಿ ಭೇಸಜ್ಜಮ್ಪಿ ಪತ್ತೇನ ಆದಾಯ ಗಚ್ಛನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಭೇಸಜ್ಜತ್ಥವಿಕ’’ನ್ತಿ. ಅಂಸಬದ್ಧಕೋ ನ ಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಅಂಸಬದ್ಧಕಂ ಬನ್ಧನಸುತ್ತಕ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಉಪಾಹನಾಯೋ ಕಾಯಬನ್ಧನೇನ ಬನ್ಧಿತ್ವಾ ಗಾಮಂ ಪಿಣ್ಡಾಯ ಪಾವಿಸಿ. ಅಞ್ಞತರೋ ಉಪಾಸಕೋ ತಂ ಭಿಕ್ಖುಂ ಅಭಿವಾದೇನ್ತೋ ಉಪಾಹನಾಯೋ ಸೀಸೇನ ಘಟ್ಟೇತಿ. ಸೋ ಭಿಕ್ಖು ಮಙ್ಕು ಅಹೋಸಿ. ಅಥ ಖೋ ಸೋ ಭಿಕ್ಖು ಆರಾಮಂ ಗನ್ತ್ವಾ ಭಿಕ್ಖೂನಂ ಏತಮತ್ಥಂ ಆರೋಚೇಸಿ. ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಉಪಾಹನತ್ಥವಿಕ’’ನ್ತಿ. ಅಂಸಬದ್ಧಕೋ ನ ಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಅಂಸಬದ್ಧಕಂ ಬನ್ಧನಸುತ್ತಕ’’ನ್ತಿ.

ತೇನ ಖೋ ಪನ ಸಮಯೇನ ಅನ್ತರಾಮಗ್ಗೇ ಉದಕಂ ಅಕಪ್ಪಿಯಂ ಹೋತಿ. ಪರಿಸ್ಸಾವನಂ ನ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಪರಿಸ್ಸಾವನ’’ನ್ತಿ. ಚೋಳಕಂ ನಪ್ಪಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಕಟಚ್ಛುಪರಿಸ್ಸಾವನ’’ನ್ತಿ. ಚೋಳಕಂ ನಪ್ಪಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಧಮ್ಮಕರಣ’’ನ್ತಿ [ಧಮ್ಮಕರಣಂ (ಸೀ. ಸ್ಯಾ.), ಧಮಕರಣಂ (ಕ.)].

೨೫೯. ತೇನ ಖೋ ಪನ ಸಮಯೇನ ದ್ವೇ ಭಿಕ್ಖೂ ಕೋಸಲೇಸು ಜನಪದೇ ಅದ್ಧಾನಮಗ್ಗಪ್ಪಟಿಪನ್ನಾ ಹೋನ್ತಿ. ಏಕೋ ಭಿಕ್ಖು ಅನಾಚಾರಂ ಆಚರತಿ. ದುತಿಯೋ ಭಿಕ್ಖು ತಂ ಭಿಕ್ಖುಂ ಏತದವೋಚ – ‘‘ಮಾ, ಆವುಸೋ, ಏವರೂಪಂ ಅಕಾಸಿ. ನೇತಂ ಕಪ್ಪತೀ’’ತಿ. ಸೋ ತಸ್ಮಿಂ ಉಪನನ್ಧಿ. ಅಥ ಖೋ ಸೋ ಭಿಕ್ಖು ಪಿಪಾಸಾಯ ಪೀಳಿತೋ ಉಪನದ್ಧಂ ಭಿಕ್ಖುಂ ಏತದವೋಚ – ‘‘ದೇಹಿ ಮೇ, ಆವುಸೋ, ಪರಿಸ್ಸಾವನಂ, ಪಾನೀಯಂ ಪಿವಿಸ್ಸಾಮೀ’’ತಿ. ಉಪನದ್ಧೋ ಭಿಕ್ಖು ನ ಅದಾಸಿ. ಸೋ ಭಿಕ್ಖು ಪಿಪಾಸಾಯ ಪೀಳಿತೋ ಕಾಲಮಕಾಸಿ. ಅಥ ಖೋ ಸೋ ಭಿಕ್ಖು ಆರಾಮಂ ಗನ್ತ್ವಾ ಭಿಕ್ಖೂನಂ ಏತಮತ್ಥಂ ಆರೋಚೇಸಿ. ‘‘ಕಿಂ ಪನ ತ್ವಂ, ಆವುಸೋ, ಪರಿಸ್ಸಾವನಂ ಯಾಚಿಯಮಾನೋ ನ ಅದಾಸೀ’’ತಿ? ‘‘ಏವಮಾವುಸೋ’’ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖು ಪರಿಸ್ಸಾವನಂ ಯಾಚಿಯಮಾನೋ ನ ದಸ್ಸತೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ತಂ ಭಿಕ್ಖುಂ ಪಟಿಪುಚ್ಛಿ – ‘‘ಸಚ್ಚಂ ಕಿರ ತ್ವಂ, ಭಿಕ್ಖು, ಪರಿಸ್ಸಾವನಂ ಯಾಚಿಯಮಾನೋ ನ ಅದಾಸೀ’’ತಿ? ‘‘ಸಚ್ಚಂ ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ, ಮೋಘಪುರಿಸ, ಅನನುಲೋಮಿಕಂ ಅಪ್ಪತಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ. ಕಥಞ್ಹಿ ನಾಮ ತ್ವಂ, ಮೋಘಪುರಿಸ, ಪರಿಸ್ಸಾವನಂ ಯಾಚಿಯಮಾನೋ ನ ದಸ್ಸಸಿ. ನೇತಂ, ಮೋಘಪುರಿಸ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ ಭಿಕ್ಖವೇ, ಅದ್ಧಾನಮಗ್ಗಪ್ಪಟಿಪನ್ನೇನ ಭಿಕ್ಖುನಾ ಪರಿಸ್ಸಾವನಂ ಯಾಚಿಯಮಾನೇನ ನ ದಾತಬ್ಬಂ. ಯೋ ನ ದದೇಯ್ಯ, ಆಪತ್ತಿ ದುಕ್ಕಟಸ್ಸ. ನ ಚ, ಭಿಕ್ಖವೇ, ಅಪರಿಸ್ಸಾವನಕೇನ ಅದ್ಧಾನೋ ಪಟಿಪಜ್ಜಿತಬ್ಬೋ. ಯೋ ಪಟಿಪಜ್ಜೇಯ್ಯ, ಆಪತ್ತಿ ದುಕ್ಕಟಸ್ಸ. ಸಚೇ ನ ಹೋತಿ ಪರಿಸ್ಸಾವನಂ ವಾ ಧಮ್ಮಕರಣೋ ವಾ, ಸಙ್ಘಾಟಿಕಣ್ಣೋಪಿ ಅಧಿಟ್ಠಾತಬ್ಬೋ – ಇಮಿನಾ ಪರಿಸ್ಸಾವೇತ್ವಾ ಪಿವಿಸ್ಸಾಮೀ’’ತಿ. ಅಥ ಖೋ ಭಗವಾ ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ವೇಸಾಲೀ ತದವಸರಿ. ತತ್ರ ಸುದಂ ಭಗವಾ ವೇಸಾಲಿಯಂ ವಿಹರತಿ ಮಹಾವನೇ ಕೂಟಾಗಾರಸಾಲಾಯಂ. ತೇನ ಖೋ ಪನ ಸಮಯೇನ ಭಿಕ್ಖೂ ನವಕಮ್ಮಂ ಕರೋನ್ತಿ. ಪರಿಸ್ಸಾವನಂ ನ ಸಮ್ಮತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ದಣ್ಡಪರಿಸ್ಸಾವನ’’ನ್ತಿ. ದಣ್ಡಪರಿಸ್ಸಾವನಂ ನ ಸಮ್ಮತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಓತ್ಥರಕ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಮಕಸೇಹಿ ಉಬ್ಬಾಳ್ಹಾ ಹೋನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಮಕಸಕುಟಿಕ’’ನ್ತಿ.

೨೬೦. ತೇನ ಖೋ ಪನ ಸಮಯೇನ ವೇಸಾಲಿಯಂ ಪಣೀತಾನಂ ಭತ್ತಾನಂ ಭತ್ತಪಟಿಪಾಟಿ ಅಟ್ಠಿತಾ ಹೋತಿ. ಭಿಕ್ಖೂ ಪಣೀತಾನಿ ಭೋಜನಾನಿ ಭುಞ್ಜಿತ್ವಾ ಅಭಿಸನ್ನಕಾಯಾ ಹೋನ್ತಿ ಬಹ್ವಾಬಾಧಾ [ಬವ್ಹಾಬಾಧಾ (ಸೀ.)]. ಅಥ ಖೋ ಜೀವಕೋ ಕೋಮಾರಭಚ್ಚೋ ವೇಸಾಲಿಂ ಅಗಮಾಸಿ ಕೇನಚಿದೇವ ಕರಣೀಯೇನ. ಅದ್ದಸಾ ಖೋ ಜೀವಕೋ ಕೋಮಾರಭಚ್ಚೋ ಭಿಕ್ಖೂ ಅಭಿಸನ್ನಕಾಯೇ ಬಹ್ವಾಬಾಧೇ. ದಿಸ್ವಾನ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಜೀವಕೋ ಕೋಮಾರಭಚ್ಚೋ ಭಗವನ್ತಂ ಏತದವೋಚ – ‘‘ಏತರಹಿ, ಭನ್ತೇ, ಭಿಕ್ಖೂ ಅಭಿಸನ್ನಕಾಯಾ ಬಹ್ವಾಬಾಧಾ. ಸಾಧು, ಭನ್ತೇ, ಭಗವಾ ಭಿಕ್ಖೂನಂ ಚಙ್ಕಮಞ್ಚ ಜನ್ತಾಘರಞ್ಚ ಅನುಜಾನಾತು. ಏವಂ ಭಿಕ್ಖೂ ಅಪ್ಪಾಬಾಧಾ ಭವಿಸ್ಸನ್ತೀ’’ತಿ. ಅಥ ಖೋ ಭಗವಾ ಜೀವಕಂ ಕೋಮಾರಭಚ್ಚಂ ಧಮ್ಮಿಯಾ ಕಥಾಯ ಸನ್ದಸ್ಸೇಸಿ ಸಮಾದಪೇಸಿ ಸಮುತ್ತೇಜೇಸಿ ಸಮ್ಪಹಂಸೇಸಿ. ಅಥ ಖೋ ಜೀವಕೋ ಕೋಮಾರಭಚ್ಚೋ ಭಗವತಾ ಧಮ್ಮಿಯಾ ಕಥಾಯ ಸನ್ದಸ್ಸಿತೋ ಸಮಾದಪಿತೋ ಸಮುತ್ತೇಜಿತೋ ಸಮ್ಪಹಂಸಿತೋ ಉಟ್ಠಾಯಾಸನಾ ಭಗವನ್ತಂ ಅಭಿವಾದೇತ್ವಾ ಪದಕ್ಖಿಣಂ ಕತ್ವಾ ಪಕ್ಕಾಮಿ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ಚಙ್ಕಮಞ್ಚ ಜನ್ತಾಘರಞ್ಚಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ವಿಸಮೇ ಚಙ್ಕಮೇ ಚಙ್ಕಮನ್ತಿ. ಪಾದಾ ದುಕ್ಖಾ ಹೋನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಸಮಂ ಕಾತು’’ನ್ತಿ. ಚಙ್ಕಮೋ ನೀಚವತ್ಥುಕೋ ಹೋತಿ. ಉದಕೇನ ಓತ್ಥರಿಯ್ಯತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಉಚ್ಚವತ್ಥುಕಂ ಕಾತು’’ನ್ತಿ. ಚಯೋ ಪರಿಪತತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಚಿನಿತುಂ ತಯೋ ಚಯೇ – ಇಟ್ಠಕಾಚಯಂ, ಸಿಲಾಚಯಂ, ದಾರುಚಯ’’ನ್ತಿ. ಆರೋಹನ್ತಾ ವಿಹಞ್ಞನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ತಯೋ ಸೋಪಾನೇ – ಇಟ್ಠಕಾಸೋಪಾನಂ, ಸಿಲಾಸೋಪಾನಂ, ದಾರುಸೋಪಾನ’’ನ್ತಿ. ಆರೋಹನ್ತಾ ಪರಿಪತನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಆಲಮ್ಬನಬಾಹ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಚಙ್ಕಮೇ ಚಙ್ಕಮನ್ತಾ ಪರಿಪತನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಚಙ್ಕಮನವೇದಿಕ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅಜ್ಝೋಕಾಸೇ ಚಙ್ಕಮನ್ತಾ ಸೀತೇನಪಿ ಉಣ್ಹೇನಪಿ ಕಿಲಮನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಚಙ್ಕಮನಸಾಲ’’ನ್ತಿ. ಚಙ್ಕಮನಸಾಲಾಯಂ ತಿಣಚುಣ್ಣಂ ಪರಿಪತತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಓಗುಮ್ಫೇತ್ವಾ ಉಲ್ಲಿತ್ತಾವಲಿತ್ತಂ ಕಾತುಂ – ಸೇತವಣ್ಣಂ ಕಾಳವಣ್ಣಂ ಗೇರುಕಪರಿಕಮ್ಮಂ ಮಾಲಾಕಮ್ಮಂ ಲತಾಕಮ್ಮಂ ಮಕರದನ್ತಕಂ ಪಞ್ಚಪಟಿಕಂ ಚೀವರವಂಸಂ ಚೀವರರಜ್ಜು’’ನ್ತಿ. ಜನ್ತಾಘರಂ ನೀಚವತ್ಥುಕಂ ಹೋತಿ, ಉದಕೇನ ಓತ್ಥರಿಯ್ಯತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಉಚ್ಚವತ್ಥುಕಂ ಕಾತು’’ನ್ತಿ. ಚಯೋ ಪರಿಪತತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಚಿನಿತುಂ ತಯೋ ಚಯೇ – ಇಟ್ಠಕಾಚಯಂ, ಸಿಲಾಚಯಂ, ದಾರುಚಯ’’ನ್ತಿ. ಆರೋಹನ್ತಾ ವಿಹಞ್ಞನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ತಯೋ ಸೋಪಾನೇ – ಇಟ್ಠಕಾಸೋಪಾನಂ, ಸಿಲಾಸೋಪಾನಂ, ದಾರುಸೋಪಾನ’’ನ್ತಿ. ಆರೋಹನ್ತಾ ಪರಿಪತನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಆಲಮ್ಬನಬಾಹ’’ನ್ತಿ. ಜನ್ತಾಘರಸ್ಸ ಕವಾಟಂ ನ ಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಕವಾಟಂ ಪಿಟ್ಠಸಙ್ಘಾಟಂ [ಪೀಠಸಂಘಾಟಂ (ಕ.)] ಉದುಕ್ಖಲಿಕಂ ಉತ್ತರಪಾಸಕಂ ಅಗ್ಗಳವಟ್ಟಿಕಂ ಕಪಿಸೀಸಕಂ ಸೂಚಿಕಂ ಘಟಿಕಂ ತಾಳಚ್ಛಿದ್ದಂ ಆವಿಞ್ಛನಛಿದ್ದಂ ಆವಿಞ್ಛನರಜ್ಜು’’ನ್ತಿ. ಜನ್ತಾಘರಸ್ಸ ಕುಟ್ಟಪಾದೋ ಜೀರತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಮಣ್ಡಲಿಕಂ ಕಾತು’’ನ್ತಿ. ಜನ್ತಾಘರಸ್ಸ ಧೂಮನೇತ್ತಂ ನ ಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಧೂಮನೇತ್ತ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಖುದ್ದಕೇ ಜನ್ತಾಘರೇ ಮಜ್ಝೇ ಅಗ್ಗಿಟ್ಠಾನಂ ಕರೋನ್ತಿ. ಉಪಚಾರೋ ನ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಖುದ್ದಕೇ ಜನ್ತಾಘರೇ ಏಕಮನ್ತಂ ಅಗ್ಗಿಟ್ಠಾನಂ ಕಾತುಂ, ಮಹಲ್ಲಕೇ ಮಜ್ಝೇ’’ತಿ. ಜನ್ತಾಘರೇ ಅಗ್ಗಿ ಮುಖಂ ಡಹತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಮುಖಮತ್ತಿಕ’’ನ್ತಿ. ಹತ್ಥೇ ಮತ್ತಿಕಂ ತೇಮೇನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಮತ್ತಿಕಾದೋಣಿಕ’’ನ್ತಿ. ಮತ್ತಿಕಾ ದುಗ್ಗನ್ಧಾ ಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ವಾಸೇತು’’ನ್ತಿ. ಜನ್ತಾಘರೇ ಅಗ್ಗಿ ಕಾಯಂ ಡಹತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಉದಕಂ ಅತಿಹರಿತು’’ನ್ತಿ. ಪಾತಿಯಾಪಿ ಪತ್ತೇನಪಿ ಉದಕಂ ಅತಿಹರನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಉದಕಟ್ಠಾನಂ, ಉದಕಸರಾವಕ’’ನ್ತಿ. ಜನ್ತಾಘರಂ ತಿಣಚ್ಛದನಂ ನ ಸೇದೇತಿ [ತಿಣಚ್ಛಾದನೇನ ಛಾದೇತಿ (ಕ.)] …ಪೇ… ‘‘ಅನುಜಾನಾಮಿ, ಭಿಕ್ಖವೇ, ಓಗುಮ್ಫೇತ್ವಾ ಉಲ್ಲಿತ್ತಾವಲಿತ್ತಂ ಕಾತು’’ನ್ತಿ. ಜನ್ತಾಘರಂ ಚಿಕ್ಖಲ್ಲಂ ಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಸನ್ಥರಿತುಂ ತಯೋ ಸನ್ಥರೇ – ಇಟ್ಠಕಾಸನ್ಥರಂ, ಸಿಲಾಸನ್ಥರಂ, ದಾರುಸನ್ಥರ’’ನ್ತಿ. ಚಿಕ್ಖಲ್ಲಂಯೇವ ಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಧೋವಿತು’’ನ್ತಿ. ಉದಕಂ ಸನ್ತಿಟ್ಠತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಉದಕನಿದ್ಧಮನ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಜನ್ತಾಘರೇ ಛಮಾಯ ನಿಸೀದನ್ತಿ, ಗತ್ತಾನಿ ಕಣ್ಡೂವನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಜನ್ತಾಘರಪೀಠ’’ನ್ತಿ. ತೇನ ಖೋ ಪನ ಸಮಯೇನ ಜನ್ತಾಘರಂ ಅಪರಿಕ್ಖಿತ್ತಂ ಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಪರಿಕ್ಖಿಪಿತುಂ ತಯೋ ಪಾಕಾರೇ – ಇಟ್ಠಕಾಪಾಕಾರಂ, ಸಿಲಾಪಾಕಾರಂ, ದಾರುಪಾಕಾರ’’ನ್ತಿ. ಕೋಟ್ಠಕೋ ನ ಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಕೋಟ್ಠಕ’’ನ್ತಿ. ಕೋಟ್ಠಕೋ ನೀಚವತ್ಥುಕೋ ಹೋತಿ, ಉದಕೇನ ಓತ್ಥರಿಯ್ಯತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಉಚ್ಚವತ್ಥುಕಂ ಕಾತು’’ನ್ತಿ. ಚಯೋ ಪರಿಪತತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಚಿನಿತುಂ ತಯೋ ಚಯೇ – ಇಟ್ಠಕಾಚಯಂ, ಸಿಲಾಚಯಂ, ದಾರುಚಯ’’ನ್ತಿ. ಆರೋಹನ್ತಾ ವಿಹಞ್ಞನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ತಯೋ ಸೋಪಾನೇ – ಇಟ್ಠಕಾಸೋಪಾನಂ, ಸಿಲಾಸೋಪಾನಂ, ದಾರುಸೋಪಾನ’’ನ್ತಿ. ಆರೋಹನ್ತಾ ಪರಿಪತನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಆಲಮ್ಬನಬಾಹ’’ನ್ತಿ. ಕೋಟ್ಠಕಸ್ಸ ಕವಾಟಂ ನ ಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಕವಾಟಂ ಪಿಟ್ಠಸಙ್ಘಾಟಂ ಉದುಕ್ಖಲಿಕಂ ಉತ್ತರಪಾಸಕಂ ಅಗ್ಗಳವಟ್ಟಿಂ ಕಪಿಸೀಸಕಂ ಸೂಚಿಕಂ ಘಟಿಕಂ ತಾಳಚ್ಛಿದ್ದಂ ಆವಿಞ್ಛನಛಿದ್ದಂ ಆವಿಞ್ಛನರಜ್ಜು’’ನ್ತಿ. ಕೋಟ್ಠಕೇ ತಿಣಚುಣ್ಣಂ ಪರಿಪತತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಓಗುಮ್ಫೇತ್ವಾ ಉಲ್ಲಿತ್ತಾವಲಿತ್ತಂ ಕಾತುಂ – ಸೇತವಣ್ಣಂ ಕಾಳವಣ್ಣಂ ಗೇರುಕಪರಿಕಮ್ಮಂ ಮಾಲಾಕಮ್ಮಂ ಲತಾಕಮ್ಮಂ ಮಕರದನ್ತಕಂ ಪಞ್ಚಪಟಿಕನ್ತಿ. ಪರಿವೇಣಂ ಚಿಕ್ಖಲ್ಲಂ ಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಮರುಮ್ಬಂ ಉಪಕಿರಿತು’’ನ್ತಿ. ನ ಪರಿಯಾಪುಣನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಪದರಸಿಲಂ ನಿಕ್ಖಿಪಿತು’’ನ್ತಿ. ಉದಕಂ ಸನ್ತಿಟ್ಠತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಉದಕನಿದ್ಧಮನ’’ನ್ತಿ.

೨೬೧. ತೇನ ಖೋ ಪನ ಸಮಯೇನ ಭಿಕ್ಖೂ ನಗ್ಗಾ ನಗ್ಗಂ ಅಭಿವಾದೇನ್ತಿ…ಪೇ… ನಗ್ಗಾ ನಗ್ಗಂ ಅಭಿವಾದಾಪೇನ್ತಿ, ನಗ್ಗಾ ನಗ್ಗಸ್ಸ ಪರಿಕಮ್ಮಂ ಕರೋನ್ತಿ, ನಗ್ಗಾ ನಗ್ಗಸ್ಸ ಪರಿಕಮ್ಮಂ ಕಾರಾಪೇನ್ತಿ, ನಗ್ಗಾ ನಗ್ಗಸ್ಸ ದೇನ್ತಿ, ನಗ್ಗಾ ಪಟಿಗ್ಗಣ್ಹನ್ತಿ, ನಗ್ಗಾ ಖಾದನ್ತಿ, ನಗ್ಗಾ ಭುಞ್ಜನ್ತಿ, ನಗ್ಗಾ ಸಾಯನ್ತಿ, ನಗ್ಗಾ ಪಿವನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ನಗ್ಗೇನ [ಇದಂ ಪದಂ ಕತ್ಥಚಿ ನತ್ಥಿ] ನಗ್ಗೋ ಅಭಿವಾದೇತಬ್ಬೋ…ಪೇ… ನ ನಗ್ಗೇನ ಅಭಿವಾದೇತಬ್ಬಂ… ನ ನಗ್ಗೇನ [ಇದಂ ಪದಂ ಕತ್ಥಚಿ ನತ್ಥಿ] ನಗ್ಗೋ ಅಭಿವಾದಾಪೇತಬ್ಬೋ… ನ ನಗ್ಗೇನ ಅಭಿವಾದಾಪೇತಬ್ಬಂ… ನ ನಗ್ಗೇನ ನಗ್ಗಸ್ಸ ಪರಿಕಮ್ಮಂ ಕಾತಬ್ಬಂ… ನ ನಗ್ಗೇನ ನಗ್ಗಸ್ಸ ಪರಿಕಮ್ಮಂ ಕಾರಾಪೇತಬ್ಬಂ… ನ ನಗ್ಗೇನ ನಗ್ಗಸ್ಸ ದಾತಬ್ಬಂ… ನ ನಗ್ಗೇನ ಪಟಿಗ್ಗಹೇತಬ್ಬಂ… ನ ನಗ್ಗೇನ ಖಾದಿತಬ್ಬಂ… ನ ನಗ್ಗೇನ ಭುಞ್ಜಿತಬ್ಬಂ… ನ ನಗ್ಗೇನ ಸಾಯಿತಬ್ಬಂ… ನ ನಗ್ಗೇನ ಪಾತಬ್ಬಂ. ಯೋ ಪಿವೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಜನ್ತಾಘರೇ ಛಮಾಯ ಚೀವರಂ ನಿಕ್ಖಿಪನ್ತಿ. ಚೀವರಂ ಪಂಸುಕಿತಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಚೀವರವಂಸಂ ಚೀವರರಜ್ಜು’’ನ್ತಿ. ದೇವೇ ವಸ್ಸನ್ತೇ ಚೀವರಂ ಓವಸ್ಸತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಜನ್ತಾಘರಸಾಲ’’ನ್ತಿ. ಜನ್ತಾಘರಸಾಲಾ ನೀಚವತ್ಥುಕಾ ಹೋತಿ, ಉದಕೇನ ಓತ್ಥರಿಯ್ಯತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಉಚ್ಚವತ್ಥುಕಂ ಕಾತು’’ನ್ತಿ. ಚಯೋ ಪರಿಪತತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಚಿನಿತುಂ…ಪೇ… ಆರೋಹನ್ತಾ ವಿಹಞ್ಞನ್ತಿ…ಪೇ… ಆರೋಹನ್ತಾ ಪರಿಪತನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಆಲಮ್ಬನಬಾಹ’’ನ್ತಿ. ಜನ್ತಾಘರಸಾಲಾಯ ತಿಣಚುಣ್ಣಂ ಪರಿಪತತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಓಗುಮ್ಫೇತ್ವಾ ಉಲ್ಲಿತ್ತಾವಲಿತ್ತಂ ಕಾತುಂ…ಪೇ… ಚೀವರವಂಸಂ ಚೀವರರಜ್ಜು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಜನ್ತಾಘರೇಪಿ ಉದಕೇಪಿ ಪರಿಕಮ್ಮಂ ಕಾತುಂ ಕುಕ್ಕುಚ್ಚಾಯನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ತಿಸ್ಸೋ ಪಟಿಚ್ಛಾದಿಯೋ – ಜನ್ತಾಘರಪಟಿಚ್ಛಾದಿಂ, ಉದಕಪಟಿಚ್ಛಾದಿಂ, ವತ್ಥಪಟಿಚ್ಛಾದಿ’’ನ್ತಿ.

ತೇನ ಖೋ ಪನ ಸಮಯೇನ ಜನ್ತಾಘರೇ ಉದಕಂ ನ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಉದಪಾನ’’ನ್ತಿ. ಉದಪಾನಸ್ಸ ಕೂಲಂ ಲುಜ್ಜತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಚಿನಿತುಂ ತಯೋ ಚಯೇ – ಇಟ್ಠಕಾಚಯಂ, ಸಿಲಾಚಯಂ, ದಾರುಚಯ’’ನ್ತಿ. ಉದಪಾನೋ ನೀಚವತ್ಥುಕೋ ಹೋತಿ, ಉದಕೇನ ಓತ್ಥರಿಯ್ಯತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಉಚ್ಚವತ್ಥುಕಂ ಕಾತು’’ನ್ತಿ. ಚಯೋ ಪರಿಪತತಿ…ಪೇ… ಆರೋಹನ್ತಾ ವಿಹಞ್ಞನ್ತಿ…ಪೇ… ಆರೋಹನ್ತಾ ಪರಿಪತನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಆಲಮ್ಬನಬಾಹ’’ನ್ತಿ.

೨೬೨. ತೇನ ಖೋ ಪನ ಸಮಯೇನ ಭಿಕ್ಖೂ ವಲ್ಲಿಕಾಯಪಿ ಕಾಯಬನ್ಧನೇನಪಿ ಉದಕಂ ವಾಹೇನ್ತಿ [ವಾಹನ್ತಿ (ಕ.)]. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಉದಕವಾಹನರಜ್ಜು’’ನ್ತಿ. ಹತ್ಥಾ ದುಕ್ಖಾ ಹೋನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ತುಲಂ ಕರಕಟಕಂ ಚಕ್ಕವಟ್ಟಕ’’ನ್ತಿ. ಭಾಜನಾ ಬಹೂ ಭಿಜ್ಜನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ತಯೋ ವಾರಕೇ – ಲೋಹವಾರಕಂ, ದಾರುವಾರಕಂ, ಚಮ್ಮಕ್ಖಣ್ಡ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಅಜ್ಝೋಕಾಸೇ ಉದಕಂ ವಾಹೇನ್ತಾ ಸೀತೇನಪಿ ಉಣ್ಹೇನಪಿ ಕಿಲಮನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಉದಪಾನಸಾಲ’’ನ್ತಿ. ಉದಪಾನಸಾಲಾಯ ತಿಣಚುಣ್ಣಂ ಪರಿಪತತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಓಗುಮ್ಫೇತ್ವಾ ಉಲ್ಲಿತ್ತಾವಲಿತ್ತಂ ಕಾತುಂ – ಸೇತವಣ್ಣಂ ಕಾಳವಣ್ಣಂ ಗೇರುಕಪರಿಕಮ್ಮಂ ಮಾಲಾಕಮ್ಮಂ ಲತಾಕಮ್ಮಂ ಮಕರದನ್ತಕಂ ಪಞ್ಚಪಟಿಕಂ ಚೀವರವಂಸಂ ಚೀವರರಜ್ಜು’’ನ್ತಿ. ಉದಪಾನೋ ಅಪಾರುತೋ ಹೋತಿ, ತಿಣಚುಣ್ಣೇಹಿಪಿ ಪಂಸುಕೇಹಿಪಿ ಓಕಿರಿಯ್ಯತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಅಪಿಧಾನ’’ನ್ತಿ. ಉದಕಭಾಜನಂ ನ ಸಂವಿಜ್ಜತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಉದಕದೋಣಿಂ ಉದಕಕಟಾಹ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಆರಾಮೇ ತಹಂ ತಹಂ ನಹಾಯನ್ತಿ. ಆರಾಮೋ ಚಿಕ್ಖಲ್ಲೋ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಚನ್ದನಿಕ’’ನ್ತಿ. ಚನ್ದನಿಕಾ ಪಾಕಟಾ ಹೋತಿ. ಭಿಕ್ಖೂ ಹಿರಿಯನ್ತಿ ನಹಾಯಿತುಂ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಪರಿಕ್ಖಿಪಿತುಂ ತಯೋ ಪಾಕಾರೇ – ಇಟ್ಠಕಾಪಾಕಾರಂ, ಸಿಲಾಪಾಕಾರಂ, ದಾರುಪಾಕಾರ’’ನ್ತಿ. ಚನ್ದನಿಕಾ ಚಿಕ್ಖಲ್ಲಾ ಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಸನ್ಥರಿತುಂ ತಯೋ ಸನ್ಥರೇ – ಇಟ್ಠಕಾಸನ್ಥರಂ, ಸಿಲಾಸನ್ಥರಂ, ದಾರುಸನ್ಥರ’’ನ್ತಿ. ಉದಕಂ ಸನ್ತಿಟ್ಠತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಉದಕನಿದ್ಧಮನ’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂನಂ ಗತ್ತಾನಿ ಸೀತಿಗತಾನಿ ಹೋನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಉದಕಪುಞ್ಛನಿಂ ಚೋಳಕೇನಪಿ ಪಚ್ಚುದ್ಧರಿತು’’ನ್ತಿ.

೨೬೩. ತೇನ ಖೋ ಪನ ಸಮಯೇನ ಅಞ್ಞತರೋ ಉಪಾಸಕೋ ಸಙ್ಘಸ್ಸ ಅತ್ಥಾಯ ಪೋಕ್ಖರಣಿಂ ಕಾರೇತುಕಾಮೋ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಪೋಕ್ಖರಣಿ’’ನ್ತಿ. ಪೋಕ್ಖರಣಿಯಾ ಕೂಲಂ ಲುಜ್ಜತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಚಿನಿತುಂ ತಯೋ ಚಯೇ – ಇಟ್ಠಕಾಚಯಂ, ಸಿಲಾಚಯಂ, ದಾರುಚಯ’’ನ್ತಿ. ಆರೋಹನ್ತಾ ವಿಹಞ್ಞನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ತಯೋ ಸೋಪಾನೇ – ಇಟ್ಠಕಾಸೋಪಾನಂ, ಸಿಲಾಸೋಪಾನಂ, ದಾರುಸೋಪಾನ’’ನ್ತಿ. ಆರೋಹನ್ತಾ ಪರಿಪತನ್ತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಆಲಮ್ಬನಬಾಹ’’ನ್ತಿ. ಪೋಕ್ಖರಣಿಯಾ ಉದಕಂ ಪುರಾಣಂ ಹೋತಿ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ಉದಕಮಾತಿಕಂ ಉದಕನಿದ್ಧಮನ’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸಙ್ಘಸ್ಸ ಅತ್ಥಾಯ ನಿಲ್ಲೇಖಂ ಜನ್ತಾಘರಂ ಕತ್ತುಕಾಮೋ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಅನುಜಾನಾಮಿ, ಭಿಕ್ಖವೇ, ನಿಲ್ಲೇಖಂ ಜನ್ತಾಘರ’’ನ್ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಚಾತುಮಾಸಂ ನಿಸೀದನೇನ ವಿಪ್ಪವಸನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ನ, ಭಿಕ್ಖವೇ, ಚಾತುಮಾಸಂ ನಿಸೀದನೇನ ವಿಪ್ಪವಸಿತಬ್ಬಂ. ಯೋ ವಿಪ್ಪವಸೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೨೬೪. ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಪುಪ್ಫಾಭಿಕಿಣ್ಣೇಸು ಸಯನೇಸು ಸಯನ್ತಿ. ಮನುಸ್ಸಾ ವಿಹಾರಚಾರಿಕಂ ಆಹಿಣ್ಡನ್ತಾ ಪಸ್ಸಿತ್ವಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಪುಪ್ಫಾಭಿಕಿಣ್ಣೇಸು ಸಯನೇಸು ಸಯಿತಬ್ಬಂ. ಯೋ ಸಯೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಮನುಸ್ಸಾ ಗನ್ಧಮ್ಪಿ ಮಾಲಮ್ಪಿ ಆದಾಯ ಆರಾಮಂ ಆಗಚ್ಛನ್ತಿ. ಭಿಕ್ಖೂ ಕುಕ್ಕುಚ್ಚಾಯನ್ತಾ ನ ಪಟಿಗ್ಗಣ್ಹನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಗನ್ಧಂ ಗಹೇತ್ವಾ ಕವಾಟೇ ಪಞ್ಚಙ್ಗುಲಿಕಂ ದಾತುಂ, ಪುಪ್ಫಂ ಗಹೇತ್ವಾ ವಿಹಾರೇ ಏಕಮನ್ತಂ ನಿಕ್ಖಿಪಿತು’’ನ್ತಿ.

ತೇನ ಖೋ ಪನ ಸಮಯೇನ ಸಙ್ಘಸ್ಸ ನಮತಕಂ ಉಪ್ಪನ್ನಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ನಮತಕ’’ನ್ತಿ. ಅಥ ಖೋ ಭಿಕ್ಖೂನಂ ಏತದಹೋಸಿ – ‘‘ನಮತಕಂ ಅಧಿಟ್ಠಾತಬ್ಬಂ ನು ಖೋ ಉದಾಹು ವಿಕಪ್ಪೇತಬ್ಬ’’ನ್ತಿ…ಪೇ… ‘‘ನ, ಭಿಕ್ಖವೇ, ನಮತಕಂ ಅಧಿಟ್ಠಾತಬ್ಬಂ, ನ ವಿಕಪ್ಪೇತಬ್ಬ’’ನ್ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಆಸಿತ್ತಕೂಪಧಾನೇ ಭುಞ್ಜನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ. ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ನ, ಭಿಕ್ಖವೇ, ಆಸಿತ್ತಕೂಪಧಾನೇ ಭುಞ್ಜಿತಬ್ಬಂ. ಯೋ ಭುಞ್ಜೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಗಿಲಾನೋ ಹೋತಿ. ಸೋ ಭುಞ್ಜಮಾನೋ ನ ಸಕ್ಕೋತಿ ಹತ್ಥೇನ ಪತ್ತಂ ಸನ್ಧಾರೇತುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಮಳೋರಿಕ’’ನ್ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಏಕಭಾಜನೇಪಿ ಭುಞ್ಜನ್ತಿ…ಪೇ… ಏಕಥಾಲಕೇಪಿ ಪಿವನ್ತಿ, ಏಕಮಞ್ಚೇಪಿ ತುವಟ್ಟೇನ್ತಿ, ಏಕತ್ಥರಣಾಪಿ ತುವಟ್ಟೇನ್ತಿ, ಏಕಪಾವುರಣಾಪಿ ತುವಟ್ಟೇನ್ತಿ, ಏಕತ್ಥರಣಪಾವುರಣಾಪಿ ತುವಟ್ಟೇನ್ತಿ. ಮನುಸ್ಸಾ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ಸೇಯ್ಯಥಾಪಿ ಗಿಹೀ ಕಾಮಭೋಗಿನೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಏಕಭಾಜನೇ ಭುಞ್ಜಿತಬ್ಬಂ…ಪೇ… ನ ಏಕಥಾಲಕೇ ಪಾತಬ್ಬಂ… ನ ಏಕಮಞ್ಚೇ ತುವಟ್ಟಿತಬ್ಬಂ… ನ ಏಕತ್ಥರಣಾ [ನ ಏಕತ್ಥರಣೇ] ತುವಟ್ಟಿತಬ್ಬಂ… ನ ಏಕಪಾವುರಣಾ [ನ ಏಕಪಾವುರಣೇ] ತುವಟ್ಟಿತಬ್ಬಂ… ನ ಏಕತ್ಥರಣಪಾವುರಣಾ [ನ ಏಕತ್ಥರಣಪಾವುರಣೇ (ಸ್ಯಾ.)] ತುವಟ್ಟಿತಬ್ಬಂ. ಯೋ ತುವಟ್ಟೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

೨೬೫. ತೇನ ಖೋ ಪನ ಸಮಯೇನ ವಡ್ಢೋ ಲಿಚ್ಛವೀ ಮೇತ್ತಿಯಭೂಮಜಕಾನಂ ಭಿಕ್ಖೂನಂ ಸಹಾಯೋ ಹೋತಿ. ಅಥ ಖೋ ವಡ್ಢೋ ಲಿಚ್ಛವೀ ಯೇನ ಮೇತ್ತಿಯಭೂಮಜಕಾ ಭಿಕ್ಖೂ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಮೇತ್ತಿಯಭೂಮಜಕೇ ಭಿಕ್ಖೂ ಏತದವೋಚ – ‘‘ವನ್ದಾಮಿ ಅಯ್ಯಾ’’ತಿ. ಏವಂ ವುತ್ತೇ ಮೇತ್ತಿಯಭೂಮಜಕಾ ಭಿಕ್ಖೂ ನಾಲಪಿಂಸು. ದುತಿಯಮ್ಪಿ ಖೋ ವಡ್ಢೋ ಲಿಚ್ಛವೀ ಮೇತ್ತಿಯಭೂಮಜಕೇ ಭಿಕ್ಖೂ ಏತದವೋಚ – ‘‘ವನ್ದಾಮಿ ಅಯ್ಯಾ’’ತಿ. ದುತಿಯಮ್ಪಿ ಖೋ ಮೇತ್ತಿಯಭೂಮಜಕಾ ಭಿಕ್ಖೂ ನಾಲಪಿಂಸು. ತತಿಯಮ್ಪಿ ಖೋ ವಡ್ಢೋ ಲಿಚ್ಛವೀ ಮೇತ್ತಿಯಭೂಮಜಕೇ ಭಿಕ್ಖೂ ಏತದವೋಚ – ‘‘ವನ್ದಾಮಿ ಅಯ್ಯಾ’’ತಿ. ತತಿಯಮ್ಪಿ ಖೋ ಮೇತ್ತಿಯಭೂಮಜಕಾ ಭಿಕ್ಖೂ ನಾಲಪಿಂಸು. ‘‘ಕ್ಯಾಹಂ ಅಯ್ಯಾನಂ ಅಪರಜ್ಝಾಮಿ, ಕಿಸ್ಸ ಮಂ ಅಯ್ಯಾ ನಾಲಪನ್ತೀ’’ತಿ? ‘‘ತಥಾ ಹಿ ಪನ ತ್ವಂ, ಆವುಸೋ ವಡ್ಢ, ಅಮ್ಹೇ ದಬ್ಬೇನ ಮಲ್ಲಪುತ್ತೇನ ವಿಹೇಠಿಯಮಾನೇ ಅಜ್ಝುಪೇಕ್ಖಸೀ’’ತಿ. ‘‘ಕ್ಯಾಹಂ ಅಯ್ಯಾ ಕರೋಮೀ’’ತಿ? ‘‘ಸಚೇ ಖೋ ತ್ವಂ, ಆವುಸೋ ವಡ್ಢ, ಇಚ್ಛೇಯ್ಯಾಸಿ, ಅಜ್ಜೇವ ಭಗವಾ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ನಾಸಾಪೇಯ್ಯಾ’’ತಿ. ‘‘ಕ್ಯಾಹಂ ಅಯ್ಯಾ ಕರೋಮಿ, ಕಿಂ ಮಯಾ ಸಕ್ಕಾ ಕಾತು’’ನ್ತಿ? ‘‘ಏಹಿ ತ್ವಂ, ಆವುಸೋ ವಡ್ಢ, ಯೇನ ಭಗವಾ ತೇನುಪಸಙ್ಕಮ, ಉಪಸಙ್ಕಮಿತ್ವಾ ಭಗವನ್ತಂ ಏವಂ ವದೇಹಿ – ‘ಇದಂ, ಭನ್ತೇ, ನಚ್ಛನ್ನಂ ನಪ್ಪತಿರೂಪಂ. ಯಾಯಂ, ಭನ್ತೇ, ದಿಸಾ ಅಭಯಾ ಅನೀತಿಕಾ ಅನುಪದ್ದವಾ ಸಾಯಂ ದಿಸಾ ಸಭಯಾ ಸಈತಿಕಾ ಸಉಪದ್ದವಾ; ಯತೋ ನಿವಾತಂ ತತೋ ಸವಾತಂ; ಉದಕಂ ಮಞ್ಞೇ ಆದಿತ್ತಂ; ಅಯ್ಯೇನ ಮೇ ದಬ್ಬೇನ ಮಲ್ಲಪುತ್ತೇನ ಪಜಾಪತಿ ದೂಸಿತಾ’’’ತಿ. ‘‘ಏವಂ ಅಯ್ಯಾ’’ತಿ ಖೋ ವಡ್ಢೋ ಲಿಚ್ಛವೀ ಮೇತ್ತಿಯಭೂಮಜಕಾನಂ ಭಿಕ್ಖೂನಂ ಪಟಿಸ್ಸುತ್ವಾ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ವಡ್ಢೋ ಲಿಚ್ಛವೀ ಭಗವನ್ತಂ ಏತದವೋಚ – ‘‘ಇದಂ, ಭನ್ತೇ, ನಚ್ಛನ್ನಂ ನಪ್ಪತಿರೂಪಂ. ಯಾಯಂ, ಭನ್ತೇ, ದಿಸಾ ಅಭಯಾ ಅನೀತಿಕಾ ಅನುಪದ್ದವಾ ಸಾಯಂ ದಿಸಾ ಸಭಯಾ ಸಈತಿಕಾ ಸಉಪದ್ದವಾ; ಯತೋ ನಿವಾತಂ ತತೋ ಸವಾತಂ; ಉದಕಂ ಮಞ್ಞೇ ಆದಿತ್ತಂ; ಅಯ್ಯೇನ ಮೇ ದಬ್ಬೇನ ಮಲ್ಲಪುತ್ತೇನ ಪಜಾಪತಿ ದೂಸಿತಾ’’ತಿ.

ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಪಟಿಪುಚ್ಛಿ – ‘‘ಸರಸಿ ತ್ವಂ, ದಬ್ಬ, ಏವರೂಪಂ ಕತ್ತಾ ಯಥಾಯಂ ವಡ್ಢೋ ಆಹಾ’’ತಿ? ‘‘ಯಥಾ ಮಂ, ಭನ್ತೇ, ಭಗವಾ ಜಾನಾತೀ’’ತಿ. ದುತಿಯಮ್ಪಿ ಖೋ ಭಗವಾ…ಪೇ… ತತಿಯಮ್ಪಿ ಖೋ ಭಗವಾ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಏತದವೋಚ – ‘‘ಸರಸಿ ತ್ವಂ, ದಬ್ಬ, ಏವರೂಪಂ ಕತ್ತಾ ಯಥಾಯಂ ವಡ್ಢೋ ಆಹಾ’’ತಿ? ‘‘ಯಥಾ ಮಂ, ಭನ್ತೇ, ಭಗವಾ ಜಾನಾತೀ’’ತಿ. ‘‘ನ ಖೋ, ದಬ್ಬ, ದಬ್ಬಾ ಏವಂ ನಿಬ್ಬೇಠೇನ್ತಿ. ಸಚೇ ತಯಾ ಕತಂ, ಕತನ್ತಿ ವದೇಹಿ; ಸಚೇ ಅಕತಂ, ಅಕತನ್ತಿ ವದೇಹೀ’’ತಿ. ‘‘ಯತೋ ಅಹಂ, ಭನ್ತೇ, ಜಾತೋ ನಾಭಿಜಾನಾಮಿ ಸುಪಿನನ್ತೇನಪಿ ಮೇಥುನಂ ಧಮ್ಮಂ ಪಟಿಸೇವಿತಾ, ಪಗೇವ ಜಾಗರೋ’’ತಿ. ಅಥ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ತೇನ ಹಿ, ಭಿಕ್ಖವೇ, ಸಙ್ಘೋ ವಡ್ಢಸ್ಸ ಲಿಚ್ಛವಿಸ್ಸ ಪತ್ತಂ ನಿಕ್ಕುಜ್ಜತು, ಅಸಮ್ಭೋಗಂ ಸಙ್ಘೇನ ಕರೋತು.

‘‘ಅಟ್ಠಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಸ್ಸ ಉಪಾಸಕಸ್ಸ ಪತ್ತೋ ನಿಕ್ಕುಜ್ಜಿತಬ್ಬೋ – ಭಿಕ್ಖೂನಂ ಅಲಾಭಾಯ ಪರಿಸಕ್ಕತಿ, ಭಿಕ್ಖೂನಂ ಅನತ್ಥಾಯ ಪರಿಸಕ್ಕತಿ, ಭಿಕ್ಖೂನಂ ಅವಾಸಾಯ [ಅನಾವಾಸಾಯ (ಸ್ಯಾ.)] ಪರಿಸಕ್ಕತಿ, ಭಿಕ್ಖೂ ಅಕ್ಕೋಸತಿ ಪರಿಭಾಸತಿ, ಭಿಕ್ಖೂ ಭಿಕ್ಖೂಹಿ ಭೇದೇತಿ, ಬುದ್ಧಸ್ಸ ಅವಣ್ಣಂ ಭಾಸತಿ, ಧಮ್ಮಸ್ಸ ಅವಣ್ಣಂ ಭಾಸತಿ, ಸಙ್ಘಸ್ಸ ಅವಣ್ಣಂ ಭಾಸತಿ. ಅನುಜಾನಾಮಿ, ಭಿಕ್ಖವೇ, ಇಮೇಹಿ ಅಟ್ಠಹಙ್ಗೇಹಿ ಸಮನ್ನಾಗತಸ್ಸ ಉಪಾಸಕಸ್ಸ ಪತ್ತಂ ನಿಕ್ಕುಜ್ಜಿತುಂ. ಏವಞ್ಚ ಪನ, ಭಿಕ್ಖವೇ, ನಿಕ್ಕುಜ್ಜಿತಬ್ಬೋ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

೨೬೬. ‘‘ಸುಣಾತು ಮೇ, ಭನ್ತೇ, ಸಙ್ಘೋ. ವಡ್ಢೋ ಲಿಚ್ಛವೀ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಮೂಲಿಕಾಯ ಸೀಲವಿಪತ್ತಿಯಾ ಅನುದ್ಧಂಸೇತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ವಡ್ಢಸ್ಸ ಲಿಚ್ಛವಿಸ್ಸ ಪತ್ತಂ ನಿಕ್ಕುಜ್ಜೇಯ್ಯ, ಅಸಮ್ಭೋಗಂ ಸಙ್ಘೇನ ಕರೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ವಡ್ಢೋ ಲಿಚ್ಛವೀ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಮೂಲಿಕಾಯ ಸೀಲವಿಪತ್ತಿಯಾ ಅನುದ್ಧಂಸೇತಿ. ಸಙ್ಘೋ ವಡ್ಢಸ್ಸ ಲಿಚ್ಛವಿಸ್ಸ ಪತ್ತಂ ನಿಕ್ಕುಜ್ಜತಿ, ಅಸಮ್ಭೋಗಂ ಸಙ್ಘೇನ ಕರೋತಿ. ಯಸ್ಸಾಯಸ್ಮತೋ ಖಮತಿ ವಡ್ಢಸ್ಸ ಲಿಚ್ಛವಿಸ್ಸ ಪತ್ತಸ್ಸ ನಿಕ್ಕುಜ್ಜನಾ, ಅಸಮ್ಭೋಗಂ ಸಙ್ಘೇನ ಕರಣಂ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ನಿಕ್ಕುಜ್ಜಿತೋ ಸಙ್ಘೇನ ವಡ್ಢಸ್ಸ ಲಿಚ್ಛವಿಸ್ಸ ಪತ್ತೋ, ಅಸಮ್ಭೋಗೋ ಸಙ್ಘೇನ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

ಅಥ ಖೋ ಆಯಸ್ಮಾ ಆನನ್ದೋ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಯೇನ ವಡ್ಢಸ್ಸ ಲಿಚ್ಛವಿಸ್ಸ ನಿವೇಸನಂ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ವಡ್ಢಂ ಲಿಚ್ಛವಿಂ ಏತದವೋಚ – ‘‘ಸಙ್ಘೇನ ತೇ, ಆವುಸೋ ವಡ್ಢ, ಪತ್ತೋ ನಿಕ್ಕುಜ್ಜಿತೋ. ಅಸಮ್ಭೋಗೋಸಿ ಸಙ್ಘೇನಾ’’ತಿ. ಅಥ ಖೋ ವಡ್ಢೋ ಲಿಚ್ಛವೀ – ಸಙ್ಘೇನ ಕಿರ ಮೇ ಪತ್ತೋ ನಿಕ್ಕುಜ್ಜಿತೋ, ಅಸಮ್ಭೋಗೋಮ್ಹಿ ಕಿರ ಸಙ್ಘೇನಾತಿ – ತತ್ಥೇವ ಮುಚ್ಛಿತೋ ಪಪತೋ. ಅಥ ಖೋ ವಡ್ಢಸ್ಸ ಲಿಚ್ಛವಿಸ್ಸ ಮಿತ್ತಾಮಚ್ಚಾ ಞಾತಿಸಾಲೋಹಿತಾ ವಡ್ಢಂ ಲಿಚ್ಛವಿಂ ಏತದವೋಚುಂ – ‘‘ಅಲಂ, ಆವುಸೋ ವಡ್ಢ, ಮಾ ಸೋಚಿ, ಮಾ ಪರಿದೇವಿ. ಮಯಂ ಭಗವನ್ತಂ ಪಸಾದೇಸ್ಸಾಮ ಭಿಕ್ಖುಸಙ್ಘಞ್ಚಾ’’ತಿ.

ಅಥ ಖೋ ವಡ್ಢೋ ಲಿಚ್ಛವೀ ಸಪುತ್ತದಾರೋ ಸಮಿತ್ತಾಮಚ್ಚೋ ಸಞಾತಿಸಾಲೋಹಿತೋ ಅಲ್ಲವತ್ಥೋ ಅಲ್ಲಕೇಸೋ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವತೋ ಪಾದೇಸು ಸಿರಸಾ ನಿಪತಿತ್ವಾ ಭಗವನ್ತಂ ಏತದವೋಚ – ‘‘ಅಚ್ಚಯೋ ಮಂ, ಭನ್ತೇ, ಅಚ್ಚಗಮಾ ಯಥಾಬಾಲಂ ಯಥಾಮೂಳ್ಹಂ ಯಥಾಅಕುಸಲಂ, ಯೋಹಂ ಅಯ್ಯಂ ದಬ್ಬಂ ಮಲ್ಲಪುತ್ತಂ ಅಮೂಲಿಕಾಯ ಸೀಲವಿಪತ್ತಿಯಾ ಅನುದ್ಧಂಸೇಸಿಂ. ತಸ್ಸ ಮೇ, ಭನ್ತೇ, ಭಗವಾ ಅಚ್ಚಯಂ ಅಚ್ಚಯತೋ ಪಟಿಗ್ಗಣ್ಹಾತು ಆಯತಿಂ ಸಂವರಾಯಾ’’ತಿ. ‘‘ತಗ್ಘ ತ್ವಂ, ಆವುಸೋ ವಡ್ಢ, ಅಚ್ಚಯೋ ಅಚ್ಚಗಮಾ ಯಥಾಬಾಲಂ ಯಥಾಮೂಳ್ಹಂ ಯಥಾಅಕುಸಲಂ, ಯಂ ತ್ವಂ ದಬ್ಬಂ ಮಲ್ಲಪುತ್ತಂ ಅಮೂಲಿಕಾಯ ಸೀಲವಿಪತ್ತಿಯಾ ಅನುದ್ಧಂಸೇಸಿ. ಯತೋ ಚ ಖೋ ತ್ವಂ, ಆವುಸೋ ವಡ್ಢ, ಅಚ್ಚಯಂ ಅಚ್ಚಯತೋ ದಿಸ್ವಾ ಯಥಾಧಮ್ಮಂ ಪಟಿಕರೋಸಿ, ತಂ ತೇ ಮಯಂ ಪಟಿಗ್ಗಣ್ಹಾಮ. ವುಡ್ಢಿಹೇಸಾ, ಆವುಸೋ ವಡ್ಢ, ಅರಿಯಸ್ಸ ವಿನಯೇ ಯೋ ಅಚ್ಚಯಂ ಅಚ್ಚಯತೋ ದಿಸ್ವಾ ಯಥಾಧಮ್ಮಂ ಪಟಿಕರೋತಿ, ಆಯತಿಂ ಸಂವರಂ ಆಪಜ್ಜತೀ’’ತಿ. ಅಥ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ತೇನ ಹಿ, ಭಿಕ್ಖವೇ, ಸಙ್ಘೋ ವಡ್ಢಸ್ಸ ಲಿಚ್ಛವಿಸ್ಸ ಪತ್ತಂ ಉಕ್ಕುಜ್ಜತು, ಸಮ್ಭೋಗಂ ಸಙ್ಘೇನ ಕರೋತು.

‘‘ಅಟ್ಠಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಸ್ಸ ಉಪಾಸಕಸ್ಸ ಪತ್ತೋ ಉಕ್ಕುಜ್ಜಿತಬ್ಬೋ – ನ ಭಿಕ್ಖೂನಂ ಅಲಾಭಾಯ ಪರಿಸಕ್ಕತಿ, ನ ಭಿಕ್ಖೂನಂ ಅನತ್ಥಾಯ ಪರಿಸಕ್ಕತಿ, ನ ಭಿಕ್ಖೂನಂ ಅವಾಸಾಯ ಪರಿಸಕ್ಕತಿ, ನ ಭಿಕ್ಖೂ ಅಕ್ಕೋಸತಿ ಪರಿಭಾಸತಿ, ನ ಭಿಕ್ಖೂ ಭಿಕ್ಖೂಹಿ ಭೇದೇತಿ, ನ ಬುದ್ಧಸ್ಸ ಅವಣ್ಣಂ ಭಾಸತಿ, ನ ಧಮ್ಮಸ್ಸ ಅವಣ್ಣಂ ಭಾಸತಿ, ನ ಸಙ್ಘಸ್ಸ ಅವಣ್ಣಂ ಭಾಸತಿ. ಅನುಜಾನಾಮಿ, ಭಿಕ್ಖವೇ, ಇಮೇಹಿ ಅಟ್ಠಹಙ್ಗೇಹಿ ಸಮನ್ನಾಗತಸ್ಸ ಉಪಾಸಕಸ್ಸ ಪತ್ತಂ ಉಕ್ಕುಜ್ಜಿತುಂ. ಏವಞ್ಚ ಪನ, ಭಿಕ್ಖವೇ, ಉಕ್ಕುಜ್ಜಿತಬ್ಬೋ. ತೇನ, ಭಿಕ್ಖವೇ, ವಡ್ಢೇನ ಲಿಚ್ಛವಿನಾ ಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘ಸಙ್ಘೇನ ಮೇ, ಭನ್ತೇ, ಪತ್ತೋ ನಿಕ್ಕುಜ್ಜಿತೋ, ಅಸಮ್ಭೋಗೋಮ್ಹಿ ಸಙ್ಘೇನ. ಸೋಹಂ, ಭನ್ತೇ, ಸಮ್ಮಾ ವತ್ತಾಮಿ, ಲೋಮಂ ಪಾತೇಮಿ, ನೇತ್ಥಾರಂ ವತ್ತಾಮಿ, ಸಙ್ಘಂ ಪತ್ತುಕ್ಕುಜ್ಜನಂ ಯಾಚಾಮೀ’ತಿ. ದುತಿಯಮ್ಪಿ ಯಾಚಿತಬ್ಬೋ. ತತಿಯಮ್ಪಿ ಯಾಚಿತಬ್ಬೋ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

೨೬೭. ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಸಙ್ಘೇನ ವಡ್ಢಸ್ಸ ಲಿಚ್ಛವಿಸ್ಸ ಪತ್ತೋ ನಿಕ್ಕುಜ್ಜಿತೋ, ಅಸಮ್ಭೋಗೋ ಸಙ್ಘೇನ. ಸೋ ಸಮ್ಮಾ ವತ್ತತಿ, ಲೋಮಂ ಪಾತೇತಿ, ನೇತ್ಥಾರಂ ವತ್ತತಿ, ಸಙ್ಘಂ ಪತ್ತುಕ್ಕುಜ್ಜನಂ ಯಾಚತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ವಡ್ಢಸ್ಸ ಲಿಚ್ಛವಿಸ್ಸ ಪತ್ತಂ ಉಕ್ಕುಜ್ಜೇಯ್ಯ, ಸಮ್ಭೋಗಂ ಸಙ್ಘೇನ ಕರೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಸಙ್ಘೇನ ವಡ್ಢಸ್ಸ ಲಿಚ್ಛವಿಸ್ಸ ಪತ್ತೋ ನಿಕ್ಕುಜ್ಜಿತೋ, ಅಸಮ್ಭೋಗೋ ಸಙ್ಘೇನ. ಸೋ ಸಮ್ಮಾ ವತ್ತತಿ, ಲೋಮಂ ಪಾತೇತಿ, ನೇತ್ಥಾರಂ ವತ್ತತಿ, ಸಙ್ಘಂ ಪತ್ತುಕ್ಕುಜ್ಜನಂ ಯಾಚತಿ. ಸಙ್ಘೋ ವಡ್ಢಸ್ಸ ಲಿಚ್ಛವಿಸ್ಸ ಪತ್ತಂ ಉಕ್ಕುಜ್ಜತಿ, ಸಮ್ಭೋಗಂ ಸಙ್ಘೇನ ಕರೋತಿ. ಯಸ್ಸಾಯಸ್ಮತೋ ಖಮತಿ ವಡ್ಢಸ್ಸ ಲಿಚ್ಛವಿಸ್ಸ ಪತ್ತಸ್ಸ ಉಕ್ಕುಜ್ಜನಾ, ಸಮ್ಭೋಗಂ ಸಙ್ಘೇನ ಕರಣಂ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಉಕ್ಕುಜ್ಜಿತೋ ಸಙ್ಘೇನ ವಡ್ಢಸ್ಸ ಲಿಚ್ಛವಿಸ್ಸ ಪತ್ತೋ, ಸಮ್ಭೋಗೋ ಸಙ್ಘೇನ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

೨೬೮. ಅಥ ಖೋ ಭಗವಾ ವೇಸಾಲಿಯಂ ಯಥಾಭಿರನ್ತಂ ವಿಹರಿತ್ವಾ ಯೇನ ಭಗ್ಗಾ ತೇನ ಚಾರಿಕಂ ಪಕ್ಕಾಮಿ. ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ಭಗ್ಗಾ ತದವಸರಿ. ತತ್ರ ಸುದಂ ಭಗವಾ ಭಗ್ಗೇಸು ವಿಹರತಿ ಸುಸುಮಾರಗಿರೇ [ಸುಂಸುಮಾರಗಿರೇ (ಸೀ. ಸ್ಯಾ.), ಸಂಸುಮಾರಗಿರೇ (ಕ.)] ಭೇಸಕಳಾವನೇ ಮಿಗದಾಯೇ. ತೇನ ಖೋ ಪನ ಸಮಯೇನ ಬೋಧಿಸ್ಸ ರಾಜಕುಮಾರಸ್ಸ ಕೋಕನದೋ [ಕೋಕನುದೋ (ಕ.)] ನಾಮ ಪಾಸಾದೋ ಅಚಿರಕಾರಿತೋ ಹೋತಿ, ಅನಜ್ಝಾವುತ್ಥೋ ಸಮಣೇನ ವಾ ಬ್ರಾಹ್ಮಣೇನ ವಾ ಕೇನಚಿ ವಾ ಮನುಸ್ಸಭೂತೇನ. ಅಥ ಖೋ ಬೋಧಿ ರಾಜಕುಮಾರೋ ಸಞ್ಜಿಕಾಪುತ್ತಂ ಮಾಣವಂ ಆಮನ್ತೇಸಿ – ‘‘ಏಹಿ ತ್ವಂ, ಸಮ್ಮ ಸಞ್ಚಿಕಾಪುತ್ತ, ಯೇನ ಭಗವಾ ತೇನುಪಸಙ್ಕಮ, ಉಪಸಙ್ಕಮಿತ್ವಾ ಮಮ ವಚನೇನ ಭಗವತೋ ಪಾದೇ ಸಿರಸಾ ವನ್ದ; ಅಪ್ಪಾಬಾಧಂ ಅಪ್ಪಾತಙ್ಕಂ ಲಹುಟ್ಠಾನಂ ಬಲಂ ಫಾಸುವಿಹಾರಂ ಪುಚ್ಛ – ‘ಬೋಧಿ, ಭನ್ತೇ, ರಾಜಕುಮಾರೋ ಭಗವತೋ ಪಾದೇ ಸಿರಸಾ ವನ್ದತಿ, ಅಪ್ಪಾಬಾಧಂ ಅಪ್ಪಾತಙ್ಕಂ ಲಹುಟ್ಠಾನಂ ಬಲಂ ಫಾಸುವಿಹಾರಂ ಪುಚ್ಛತೀ’ತಿ. ಏವಞ್ಚ ವದೇಹಿ – ‘ಅಧಿವಾಸೇತು ಕಿರ, ಭನ್ತೇ, ಭಗವಾ ಬೋಧಿಸ್ಸ ರಾಜಕುಮಾರಸ್ಸ ಸ್ವಾತನಾಯ ಭತ್ತಂ ಸದ್ಧಿಂ ಭಿಕ್ಖುಸಙ್ಘೇನಾ’’’ತಿ. ‘‘ಏವಂ ಭೋ’’ತಿ ಖೋ ಸಞ್ಚಿಕಾಪುತ್ತೋ ಮಾಣವೋ ಬೋಧಿಸ್ಸ ರಾಜಕುಮಾರಸ್ಸ ಪಟಿಸ್ಸುತ್ವಾ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವತಾ ಸದ್ಧಿಂ ಸಮ್ಮೋದಿ, ಸಮ್ಮೋದನೀಯಂ ಕಥಂ ಸಾರಣೀಯಂ ವೀತಿಸಾರೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಸಞ್ಚಿಕಾಪುತ್ತೋ ಮಾಣವೋ ಭಗವನ್ತಂ ಏತದವೋಚ – ‘‘ಬೋಧಿ ಖೋ ರಾಜಕುಮಾರೋ ಭೋತೋ ಗೋತಮಸ್ಸ ಪಾದೇ ಸಿರಸಾ ವನ್ದತಿ, ಅಪ್ಪಾಬಾಧಂ ಅಪ್ಪಾತಙ್ಕಂ ಲಹುಟ್ಠಾನಂ ಬಲಂ ಫಾಸುವಿಹಾರಂ ಪುಚ್ಛತಿ. ಏವಞ್ಚ ವದೇತಿ – ‘ಅಧಿವಾಸೇತು ಕಿರ ಭವಂ ಗೋತಮೋ ಬೋಧಿಸ್ಸ ರಾಜಕುಮಾರಸ್ಸ ಸ್ವಾತನಾಯ ಭತ್ತಂ ಸದ್ಧಿಂ ಭಿಕ್ಖುಸಙ್ಘೇನಾ’’’ತಿ. ಅಧಿವಾಸೇಸಿ ಭಗವಾ ತುಣ್ಹೀಭಾವೇನ. ಅಥ ಖೋ ಸಞ್ಚಿಕಾಪುತ್ತೋ ಮಾಣವೋ ಭಗವತೋ ಅಧಿವಾಸನಂ ವಿದಿತ್ವಾ ಉಟ್ಠಾಯಾಸನಾ ಯೇನ ಬೋಧಿ ರಾಜಕುಮಾರೋ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಬೋಧಿಂ ರಾಜಕುಮಾರಂ ಏತದವೋಚ – ‘‘ಅವೋಚುಮ್ಹ ಖೋ ಮಯಂ ಭೋತೋ ವಚನೇನ ತಂ ಭವನ್ತಂ ಗೋತಮಂ – ‘ಬೋಧಿ ಖೋ ರಾಜಕುಮಾರೋ ಭೋತೋ ಗೋತಮಸ್ಸ ಪಾದೇ ಸಿರಸಾ ವನ್ದತಿ, ಅಪ್ಪಾಬಾಧಂ ಅಪ್ಪಾತಙ್ಕಂ ಲಹುಟ್ಠಾನಂ ಬಲಂ ಫಾಸುವಿಹಾರಂ ಪುಚ್ಛತಿ. ಏವಞ್ಚ ವದೇತಿ – ಅಧಿವಾಸೇತು ಕಿರ ಭವಂ ಗೋತಮೋ ಬೋಧಿಸ್ಸ ರಾಜಕುಮಾರಸ್ಸ ಸ್ವಾತನಾಯ ಭತ್ತಂ ಸದ್ಧಿಂ ಭಿಕ್ಖುಸಙ್ಘೇನಾ’ತಿ. ಅಧಿವುತ್ಥಞ್ಚ ಪನ ಸಮಣೇನ ಗೋತಮೇನಾ’’ತಿ.

ಅಥ ಖೋ ಬೋಧಿ ರಾಜಕುಮಾರೋ ತಸ್ಸಾ ರತ್ತಿಯಾ ಅಚ್ಚಯೇನ ಪಣೀತಂ ಖಾದನೀಯಂ ಭೋಜನೀಯಂ ಪಟಿಯಾದಾಪೇತ್ವಾ, ಕೋಕನದಞ್ಚ ಪಾಸಾದಂ ಓದಾತೇಹಿ ದುಸ್ಸೇಹಿ ಸನ್ಥರಾಪೇತ್ವಾ ಯಾವ ಪಚ್ಛಿಮಸೋಪಾನಕಳೇವರಾ, ಸಞ್ಚಿಕಾಪುತ್ತಂ ಮಾಣವಂ ಆಮನ್ತೇಸಿ – ‘‘ಏಹಿ ತ್ವಂ, ಸಮ್ಮ ಸಞ್ಚಿಕಾಪುತ್ತ, ಯೇನ ಭಗವಾ ತೇನುಪಸಙ್ಕಮ, ಉಪಸಙ್ಕಮಿತ್ವಾ ಭಗವತೋ ಕಾಲಂ ಆರೋಚೇಹಿ – ‘ಕಾಲೋ, ಭನ್ತೇ ನಿಟ್ಠಿತಂ ಭತ್ತ’’’ನ್ತಿ. ‘‘ಏವಂ ಭೋ’’ತಿ ಖೋ ಸಞ್ಚಿಕಾಪುತ್ತೋ ಮಾಣವೋ ಬೋಧಿಸ್ಸ ರಾಜಕುಮಾರಸ್ಸ ಪಟಿಸ್ಸುತ್ವಾ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವತೋ ಕಾಲಂ ಆರೋಚೇಸಿ – ‘‘ಕಾಲೋ, ಭೋ ಗೋತಮ, ನಿಟ್ಠಿತಂ ಭತ್ತ’’ನ್ತಿ.

ಅಥ ಖೋ ಭಗವಾ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಯೇನ ಬೋಧಿಸ್ಸ ರಾಜಕುಮಾರಸ್ಸ ನಿವೇಸನಂ ತೇನುಪಸಙ್ಕಮಿ. ತೇನ ಖೋ ಪನ ಸಮಯೇನ ಬೋಧಿ ರಾಜಕುಮಾರೋ ಬಹಿದ್ವಾರಕೋಟ್ಠಕೇ ಠಿತೋ ಹೋತಿ, ಭಗವನ್ತಂ ಆಗಮಯಮಾನೋ. ಅದ್ದಸಾ ಖೋ ಬೋಧಿ ರಾಜಕುಮಾರೋ ಭಗವನ್ತಂ ದೂರತೋವ ಆಗಚ್ಛನ್ತಂ. ದಿಸ್ವಾನ ತತೋ ಪಚ್ಚುಗ್ಗನ್ತ್ವಾ ಭಗವನ್ತಂ ಅಭಿವಾದೇತ್ವಾ ಪುರೇಕ್ಖತ್ವಾ ಯೇನ ಕೋಕನದೋ ಪಾಸಾದೋ ತೇನುಪಸಙ್ಕಮಿ. ಅಥ ಖೋ ಭಗವಾ ಪಚ್ಛಿಮಸೋಪಾನಕಳೇವರಂ ನಿಸ್ಸಾಯ ಅಟ್ಠಾಸಿ. ಅಥ ಖೋ ಬೋಧಿ ರಾಜಕುಮಾರೋ ಭಗವನ್ತಂ ಏತದವೋಚ – ‘‘ಅಕ್ಕಮತು, ಭನ್ತೇ, ಭಗವಾ ದುಸ್ಸಾನಿ, ಅಕ್ಕಮತು ಸುಗತೋ ದುಸ್ಸಾನಿ, ಯಂ ಮಮ ಅಸ್ಸ ದೀಘರತ್ತಂ ಹಿತಾಯ ಸುಖಾಯಾ’’ತಿ. ಏವಂ ವುತ್ತೇ ಭಗವಾ ತುಣ್ಹೀ ಅಹೋಸಿ. ದುತಿಯಮ್ಪಿ ಖೋ…ಪೇ… ತತಿಯಮ್ಪಿ ಖೋ ಬೋಧಿ ರಾಜಕುಮಾರೋ ಭಗವನ್ತಂ ಏತದವೋಚ – ‘‘ಅಕ್ಕಮತು, ಭನ್ತೇ, ಭಗವಾ ದುಸ್ಸಾನಿ, ಅಕ್ಕಮತು ಸುಗತೋ ದುಸ್ಸಾನಿ, ಯಂ ಮಮ ಅಸ್ಸ ದೀಘರತ್ತಂ ಹಿತಾಯ ಸುಖಾಯಾ’’ತಿ. ಅಥ ಖೋ ಭಗವಾ ಆಯಸ್ಮನ್ತಂ ಆನನ್ದಂ ಅಪಲೋಕೇಸಿ. ಅಥ ಖೋ ಆಯಸ್ಮಾ ಆನನ್ದೋ ಬೋಧಿಂ ರಾಜಕುಮಾರಂ ಏತದವೋಚ – ‘‘ಸಂಹರನ್ತು, ರಾಜಕುಮಾರ, ದುಸ್ಸಾನಿ. ನ ಭಗವಾ ಚೇಲಪಟಿಕಂ [ಚೇಲಪತ್ತಿಕಂ (ಸೀ.)] ಅಕ್ಕಮಿಸ್ಸತಿ ಪಚ್ಛಿಮಂ ಜನತಂ ತಥಾಗತೋ ಅನುಕಮ್ಪತೀ’’ತಿ.

ಅಥ ಖೋ ಬೋಧಿ ರಾಜಕುಮಾರೋ ದುಸ್ಸಾನಿ ಸಂಹರಾಪೇತ್ವಾ ಉಪರಿಕೋಕನದೇ ಪಾಸಾದೇ ಆಸನಂ ಪಞ್ಞಪೇಸಿ. ಅಥ ಖೋ ಭಗವಾ ಕೋಕನದಂ ಪಾಸಾದಂ ಅಭಿರುಹಿತ್ವಾ ಪಞ್ಞತ್ತೇ ಆಸನೇ ನಿಸೀದಿ ಸದ್ಧಿಂ ಭಿಕ್ಖುಸಙ್ಘೇನ. ಅಥ ಖೋ ಬೋಧಿ ರಾಜಕುಮಾರೋ ಬುದ್ಧಪ್ಪಮುಖಂ ಭಿಕ್ಖುಸಙ್ಘಂ ಪಣೀತೇನ ಖಾದನೀಯೇನ ಭೋಜನೀಯೇನ ಸಹತ್ಥಾ ಸನ್ತಪ್ಪೇತ್ವಾ ಸಮ್ಪವಾರೇತ್ವಾ, ಭಗವನ್ತಂ ಭುತ್ತಾವಿಂ ಓನೀತಪತ್ತಪಾಣಿಂ, ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನಂ ಖೋ ಬೋಧಿಂ ರಾಜಕುಮಾರಂ ಭಗವಾ ಧಮ್ಮಿಯಾ ಕಥಾಯ ಸನ್ದಸ್ಸೇತ್ವಾ ಸಮಾದಪೇತ್ವಾ ಸಮುತ್ತೇಜೇತ್ವಾ ಸಮ್ಪಹಂಸೇತ್ವಾ ಉಟ್ಠಾಯಾಸನಾ ಪಕ್ಕಾಮಿ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ಚೇಲಪಟಿಕಾ ಅಕ್ಕಮಿತಬ್ಬಾ. ಯೋ ಅಕ್ಕಮೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರಾ ಇತ್ಥೀ ಅಪಗತಗಬ್ಭಾ ಭಿಕ್ಖೂ ನಿಮನ್ತೇತ್ವಾ ದುಸ್ಸಂ ಪಞ್ಞಪೇತ್ವಾ ಏತದವೋಚ – ‘‘ಅಕ್ಕಮಥ, ಭನ್ತೇ, ದುಸ್ಸ’’ನ್ತಿ. ಭಿಕ್ಖೂ ಕುಕ್ಕುಚ್ಚಾಯನ್ತಾ ನ ಅಕ್ಕಮನ್ತಿ. ‘‘ಅಕ್ಕಮಥ, ಭನ್ತೇ, ದುಸ್ಸಂ ಮಙ್ಗಲತ್ಥಾಯಾ’’ತಿ. ಭಿಕ್ಖೂ ಕುಕ್ಕುಚ್ಚಾಯನ್ತಾ ನ ಅಕ್ಕಮಿಂಸು. ಅಥ ಖೋ ಸಾ ಇತ್ಥೀ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಅಯ್ಯಾ ಮಙ್ಗಲತ್ಥಾಯ ಯಾಚಿಯಮಾನಾ ಚೇಲಪ್ಪಟಿಕಂ ನ ಅಕ್ಕಮಿಸ್ಸನ್ತೀ’’ತಿ! ಅಸ್ಸೋಸುಂ ಖೋ ಭಿಕ್ಖೂ ತಸ್ಸಾ ಇತ್ಥಿಯಾ ಉಜ್ಝಾಯನ್ತಿಯಾ ಖಿಯ್ಯನ್ತಿಯಾ ವಿಪಾಚೇನ್ತಿಯಾ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ‘‘ಗಿಹೀ, ಭಿಕ್ಖವೇ, ಮಙ್ಗಲಿಕಾ. ಅನುಜಾನಾಮಿ, ಭಿಕ್ಖವೇ, ಗಿಹೀನಂ ಮಙ್ಗಲತ್ಥಾಯ ಯಾಚಿಯಮಾನೇನ ಚೇಲಪ್ಪಟಿಕಂ ಅಕ್ಕಮಿತು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ ಧೋತಪಾದಕಂ ಅಕ್ಕಮಿತುಂ ಕುಕ್ಕುಚ್ಚಾಯನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಧೋತಪಾದಕಂ ಅಕ್ಕಮಿತು’’ನ್ತಿ.

ದುತಿಯಭಾಣವಾರೋ ನಿಟ್ಠಿತೋ.

೨೬೯. ಅಥ ಖೋ ಭಗವಾ ಭಗ್ಗೇಸು ಯಥಾಭಿರನ್ತಂ ವಿಹರಿತ್ವಾ ಯೇನ ಸಾವತ್ಥಿ ತೇನ ಚಾರಿಕಂ ಪಕ್ಕಾಮಿ. ಅನುಪುಬ್ಬೇನ ಚಾರಿಕಂ ಚರಮಾನೋ ಯೇನ ಸಾವತ್ಥಿ ತದವಸರಿ. ತತ್ರ ಸುದಂ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ. ಅಥ ಖೋ ವಿಸಾಖಾ ಮಿಗಾರಮಾತಾ ಘಟಕಞ್ಚ ಕತಕಞ್ಚ ಸಮ್ಮಜ್ಜನಿಞ್ಚ ಆದಾಯ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನಾ ಖೋ ವಿಸಾಖಾ ಮಿಗಾರಮಾತಾ ಭಗವನ್ತಂ ಏತದವೋಚ – ‘‘ಪಟಿಗ್ಗಣ್ಹಾತು ಮೇ, ಭನ್ತೇ, ಭಗವಾ ಘಟಕಞ್ಚ ಕತಕಞ್ಚ ಸಮ್ಮಜ್ಜನಿಞ್ಚ, ಯಂ ಮಮ ಅಸ್ಸ ದೀಘರತ್ತಂ ಹಿತಾಯ ಸುಖಾಯಾ’’ತಿ. ಪಟಿಗ್ಗಹೇಸಿ ಭಗವಾ ಘಟಕಞ್ಚ ಸಮ್ಮಜ್ಜನಿಞ್ಚ. ನ ಭಗವಾ ಕತಕಂ ಪಟಿಗ್ಗಹೇಸಿ. ಅಥ ಖೋ ಭಗವಾ ವಿಸಾಖಂ ಮಿಗಾರಮಾತರಂ ಧಮ್ಮಿಯಾ ಕಥಾಯ ಸನ್ದಸ್ಸೇಸಿ ಸಮಾದಪೇಸಿ ಸಮುತ್ತೇಜೇಸಿ ಸಮ್ಪಹಂಸೇಸಿ. ಅಥ ಖೋ ವಿಸಾಖಾ ಮಿಗಾರಮಾತಾ ಭಗವತಾ ಧಮ್ಮಿಯಾ ಕಥಾಯ ಸನ್ದಸ್ಸಿತಾ ಸಮಾದಪಿತಾ ಸಮುತ್ತೇಜಿತಾ ಸಮ್ಪಹಂಸಿತಾ ಉಟ್ಠಾಯಾಸನಾ ಭಗವನ್ತಂ ಅಭಿವಾದೇತ್ವಾ ಪದಕ್ಖಿಣಂ ಕತ್ವಾ ಪಕ್ಕಾಮಿ.

ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ಘಟಕಞ್ಚ ಸಮ್ಮಜ್ಜನಿಞ್ಚ. ನ, ಭಿಕ್ಖವೇ, ಕತಕಂ ಪರಿಭುಞ್ಜಿತಬ್ಬಂ. ಯೋ ಪರಿಭುಞ್ಜೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ತಿಸ್ಸೋ ಪಾದಘಂಸನಿಯೋ – ಸಕ್ಖರಂ, ಕಥಲಂ, ಸಮುದ್ದಫೇಣಕ’’ನ್ತಿ.

ಅಥ ಖೋ ವಿಸಾಖಾ ಮಿಗಾರಮಾತಾ ವಿಧೂಪನಞ್ಚ ತಾಲವಣ್ಟಞ್ಚ [ತಾಲವಣ್ಡಞ್ಚ (ಕ.)] ಆದಾಯ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನಾ ಖೋ ವಿಸಾಖಾ ಮಿಗಾರಮಾತಾ ಭಗವನ್ತಂ ಏತದವೋಚ – ‘‘ಪಟಿಗ್ಗಣ್ಹಾತು ಮೇ, ಭನ್ತೇ, ಭಗವಾ ವಿಧೂಪನಞ್ಚ ತಾಲವಣ್ಟಞ್ಚ, ಯಂ ಮಮ ಅಸ್ಸ ದೀಘರತ್ತಂ ಹಿತಾಯ ಸುಖಾಯಾ’’ತಿ. ಪಟಿಗ್ಗಹೇಸಿ ಭಗವಾ ವಿಧೂಪನಞ್ಚ ತಾಲವಣ್ಟಞ್ಚ.

ಅಥ ಖೋ ಭಗವಾ ವಿಸಾಖಂ ಮಿಗಾರಮಾತರಂ ಧಮ್ಮಿಯಾ ಕಥಾಯ ಸನ್ದಸ್ಸೇಸಿ ಸಮಾದಪೇಸಿ ಸಮುತ್ತೇಜೇಸಿ ಸಮ್ಪಹಂಸೇಸಿ…ಪೇ… ಪದಕ್ಖಿಣಂ ಕತ್ವಾ ಪಕ್ಕಾಮಿ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ಅನುಜಾನಾಮಿ, ಭಿಕ್ಖವೇ, ವಿಧೂಪನಞ್ಚ ತಾಲವಣ್ಟಞ್ಚಾ’’ತಿ.

ತೇನ ಖೋ ಪನ ಸಮಯೇನ ಸಙ್ಘಸ್ಸ ಮಕಸಬೀಜನೀ ಉಪ್ಪನ್ನಾ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಮಕಸಬೀಜನಿ’’ನ್ತಿ. ಚಾಮರಿಬೀಜನೀ ಉಪ್ಪನ್ನಾ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ನ, ಭಿಕ್ಖವೇ, ಚಾಮರಿಬೀಜನೀ ಧಾರೇತಬ್ಬಾ. ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸ. ಅನುಜಾನಾಮಿ, ಭಿಕ್ಖವೇ, ತಿಸ್ಸೋ ಬೀಜನಿಯೋ – ವಾಕಮಯಂ, ಉಸೀರಮಯಂ, ಮೋರಪಿಞ್ಛಮಯ’’ನ್ತಿ.

೨೭೦. ತೇನ ಖೋ ಪನ ಸಮಯೇನ ಸಙ್ಘಸ್ಸ ಛತ್ತಂ ಉಪ್ಪನ್ನಂ ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಛತ್ತ’’ನ್ತಿ.

ತೇನ ಖೋ ಪನ ಸಮಯೇನ ಛಬ್ಬಗ್ಗಿಯಾ ಭಿಕ್ಖೂ ಛತ್ತಪ್ಪಗ್ಗಹಿತಾ [ಛತ್ತಂ ಪಗ್ಗಹೇತ್ವಾ (ಕ.)] ಆಹಿಣ್ಡನ್ತಿ. ತೇನ ಖೋ ಪನ ಸಮಯೇನ ಅಞ್ಞತರೋ ಉಪಾಸಕೋ ಸಮ್ಬಹುಲೇಹಿ ಆಜೀವಕಸಾವಕೇಹಿ ಸದ್ಧಿಂ ಉಯ್ಯಾನಂ ಅಗಮಾಸಿ. ಅದ್ದಸಾಸುಂ ಖೋ ತೇ ಆಜೀವಕಸಾವಕಾ ಛಬ್ಬಗ್ಗಿಯೇ ಭಿಕ್ಖೂ ದೂರತೋವ ಛತ್ತಪ್ಪಗ್ಗಹಿತೇ ಆಗಚ್ಛನ್ತೇ. ದಿಸ್ವಾನ ತಂ ಉಪಾಸಕಂ ಏತದವೋಚುಂ – ‘‘ಏತೇ ಖೋ, ಅಯ್ಯಾ [ಅಯ್ಯೋ (ಕ.)], ತುಮ್ಹಾಕಂ ಭದನ್ತಾ ಛತ್ತಪ್ಪಗ್ಗಹಿತಾ ಆಗಚ್ಛನ್ತಿ, ಸೇಯ್ಯಥಾಪಿ ಗಣಕಮಹಾಮತ್ತಾ’’ತಿ. ‘‘ನಾಯ್ಯಾ ಏತೇ ಭಿಕ್ಖೂ, ಪರಿಬ್ಬಾಜಕಾ’’ತಿ. ‘ಭಿಕ್ಖೂ ನ ಭಿಕ್ಖೂ’ತಿ ಅಬ್ಭುತಂ ಅಕಂಸು. ಅಥ ಖೋ ಸೋ ಉಪಾಸಕೋ ಉಪಗತೇ ಸಞ್ಜಾನಿತ್ವಾ ಉಜ್ಝಾಯತಿ ಖಿಯ್ಯತಿ ವಿಪಾಚೇತಿ – ‘‘ಕಥಞ್ಹಿ ನಾಮ ಭದನ್ತಾ ಛತ್ತಪ್ಪಗ್ಗಹಿತಾ ಆಹಿಣ್ಡಿಸ್ಸನ್ತೀ’’ತಿ! ಅಸ್ಸೋಸುಂ ಖೋ ಭಿಕ್ಖೂ ತಸ್ಸ ಉಪಾಸಕಸ್ಸ ಉಜ್ಝಾಯನ್ತಸ್ಸ ಖಿಯ್ಯನ್ತಸ್ಸ ವಿಪಾಚೇನ್ತಸ್ಸ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ. ‘‘ಸಚ್ಚಂ ಕಿರ, ಭಿಕ್ಖವೇ…ಪೇ… ‘‘ಸಚ್ಚಂ ಭಗವಾ’’ತಿ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ಛತ್ತಂ ಧಾರೇತಬ್ಬಂ. ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಗಿಲಾನೋ ಹೋತಿ. ತಸ್ಸ ಭಿಕ್ಖುನೋ ವಿನಾ ಛತ್ತಂ ನ ಫಾಸು ಹೋತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಗಿಲಾನಸ್ಸ ಛತ್ತಂ ಧಾರೇತು’’ನ್ತಿ.

ತೇನ ಖೋ ಪನ ಸಮಯೇನ ಭಿಕ್ಖೂ – ಗಿಲಾನಸ್ಸೇವ ಭಗವತಾ ಛತ್ತಂ ಅನುಞ್ಞಾತಂ ನೋ ಅಗಿಲಾನಸ್ಸಾತಿ – ಆರಾಮೇ ಆರಾಮೂಪಚಾರೇ ಛತ್ತಂ ಧಾರೇತುಂ ಕುಕ್ಕುಚ್ಚಾಯನ್ತಿ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಅಗಿಲಾನೇನಪಿ ಆರಾಮೇ ಆರಾಮೂಪಚಾರೇ ಛತ್ತಂ ಧಾರೇತು’’ನ್ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಸಿಕ್ಕಾಯ ಪತ್ತಂ ಉಟ್ಟಿತ್ವಾ ದಣ್ಡೇ ಆಲಗ್ಗಿತ್ವಾ ವಿಕಾಲೇ ಅಞ್ಞತರೇನ ಗಾಮದ್ವಾರೇನ ಅತಿಕ್ಕಮತಿ. ಮನುಸ್ಸಾ – ‘ಏಸಯ್ಯೋ ಚೋರೋ ಗಚ್ಛತಿ, ಅಸಿಸ್ಸ ವಿಜ್ಜೋತಲತೀ’ತಿ ಅನುಪತಿತ್ವಾ ಗಹೇತ್ವಾ ಸಞ್ಜಾನಿತ್ವಾ ಮುಞ್ಚಿಂಸು. ಅಥ ಖೋ ಸೋ ಭಿಕ್ಖು ಆರಾಮಂ ಗನ್ತ್ವಾ ಭಿಕ್ಖೂನಂ ಏತಮತ್ಥಂ ಆರೋಚೇಸಿ. ‘‘ಕಿಂ ಪನ ತ್ವಂ, ಆವುಸೋ, ದಣ್ಡಸಿಕ್ಕಂ ಧಾರೇಸೀ’’ತಿ? ‘‘ಏವಮಾವುಸೋ’’ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಭಿಕ್ಖು ದಣ್ಡಸಿಕ್ಕಂ ಧಾರೇಸ್ಸಸೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ… ‘‘ಸಚ್ಚಂ ಭಗವಾ’’ತಿ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ನ, ಭಿಕ್ಖವೇ, ದಣ್ಡಸಿಕ್ಕಾ ಧಾರೇತಬ್ಬಾ. ಯೋ ಧಾರೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿ.

ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಗಿಲಾನೋ ಹೋತಿ, ನ ಸಕ್ಕೋತಿ ವಿನಾ ದಣ್ಡೇನ ಆಹಿಣ್ಡಿತುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಗಿಲಾನಸ್ಸ ಭಿಕ್ಖುನೋ ದಣ್ಡಸಮ್ಮುತಿಂ ದಾತುಂ. ಏವಞ್ಚ ಪನ, ಭಿಕ್ಖವೇ, ದಾತಬ್ಬಾ. ತೇನ ಗಿಲಾನೇನ ಭಿಕ್ಖುನಾ ಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ವುಡ್ಢಾನಂ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘ಅಹಂ, ಭನ್ತೇ, ಗಿಲಾನೋ; ನ ಸಕ್ಕೋಮಿ ವಿನಾ ದಣ್ಡೇನ ಆಹಿಣ್ಡಿತುಂ. ಸೋಹಂ, ಭನ್ತೇ, ಸಙ್ಘಂ ದಣ್ಡಸಮ್ಮುತಿಂ ಯಾಚಾಮೀ’ತಿ. ದುತಿಯಮ್ಪಿ ಯಾಚಿತಬ್ಬಾ. ತತಿಯಮ್ಪಿ ಯಾಚಿತಬ್ಬಾ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಗಿಲಾನೋ, ನ ಸಕ್ಕೋತಿ ವಿನಾ ದಣ್ಡೇನ ಆಹಿಣ್ಡಿತುಂ. ಸೋ ಸಙ್ಘಂ ದಣ್ಡಸಮ್ಮುತಿಂ ಯಾಚತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಸ್ಸ ಭಿಕ್ಖುನೋ ದಣ್ಡಸಮ್ಮುತಿಂ ದದೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಗಿಲಾನೋ, ನ ಸಕ್ಕೋತಿ ವಿನಾ ದಣ್ಡೇನ ಆಹಿಣ್ಡಿತುಂ. ಸೋ ಸಙ್ಘಂ ದಣ್ಡಸಮ್ಮುತಿಂ ಯಾಚತಿ. ಸಙ್ಘೋ ಇತ್ಥನ್ನಾಮಸ್ಸ ಭಿಕ್ಖುನೋ ದಣ್ಡಸಮ್ಮುತಿಂ ದೇತಿ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಭಿಕ್ಖುನೋ ದಣ್ಡಸಮ್ಮುತಿಯಾ ದಾನಂ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ದಿನ್ನಾ ಸಙ್ಘೇನ ಇತ್ಥನ್ನಾಮಸ್ಸ ಭಿಕ್ಖುನೋ ದಣ್ಡಸಮ್ಮುತಿ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

೨೭೧. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಗಿಲಾನೋ ಹೋತಿ, ನ ಸಕ್ಕೋತಿ ವಿನಾ ಸಿಕ್ಕಾಯ ಪತ್ತಂ ಪರಿಹರಿತುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಗಿಲಾನಸ್ಸ ಭಿಕ್ಖುನೋ ಸಿಕ್ಕಾಸಮ್ಮುತಿಂ ದಾತುಂ. ಏವಞ್ಚ ಪನ, ಭಿಕ್ಖವೇ, ದಾತಬ್ಬಾ. ತೇನ ಗಿಲಾನೇನ ಭಿಕ್ಖುನಾ ಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ವುಡ್ಢಾನಂ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘ಅಹಂ, ಭನ್ತೇ, ಗಿಲಾನೋ; ನ ಸಕ್ಕೋಮಿ ವಿನಾ ಸಿಕ್ಕಾಯ ಪತ್ತಂ ಪರಿಹರಿತುಂ. ಸೋಹಂ, ಭನ್ತೇ, ಸಙ್ಘಂ ಸಿಕ್ಕಾಸಮ್ಮುತಿಂ ಯಾಚಾಮೀ’ತಿ. ದುತಿಯಮ್ಪಿ ಯಾಚಿತಬ್ಬಾ. ತತಿಯಮ್ಪಿ ಯಾಚಿತಬ್ಬಾ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಗಿಲಾನೋ, ನ ಸಕ್ಕೋತಿ ವಿನಾ ಸಿಕ್ಕಾಯ ಪತ್ತಂ ಪರಿಹರಿತುಂ. ಸೋ ಸಙ್ಘಂ ಸಿಕ್ಕಾಸಮ್ಮುತಿಂ ಯಾಚತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಸ್ಸ ಭಿಕ್ಖುನೋ ಸಿಕ್ಕಾಸಮ್ಮುತಿಂ ದದೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಗಿಲಾನೋ, ನ ಸಕ್ಕೋತಿ ವಿನಾ ಸಿಕ್ಕಾಯ ಪತ್ತಂ ಪರಿಹರಿತುಂ. ಸೋ ಸಙ್ಘಂ ಸಿಕ್ಕಾಸಮ್ಮುತಿಂ ಯಾಚತಿ. ಸಙ್ಘೋ ಇತ್ಥನ್ನಾಮಸ್ಸ ಭಿಕ್ಖುನೋ ಸಿಕ್ಕಾಸಮ್ಮುತಿಂ ದೇತಿ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಭಿಕ್ಖುನೋ ಸಿಕ್ಕಾಸಮ್ಮುತಿಯಾ ದಾನಂ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ದಿನ್ನಾ ಸಙ್ಘೇನ ಇತ್ಥನ್ನಾಮಸ್ಸ ಭಿಕ್ಖುನೋ ಸಿಕ್ಕಾಸಮ್ಮುತಿ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

೨೭೨. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಗಿಲಾನೋ ಹೋತಿ, ನ ಸಕ್ಕೋತಿ ವಿನಾ ದಣ್ಡೇನ ಆಹಿಣ್ಡಿತುಂ, ನ ಸಕ್ಕೋತಿ ವಿನಾ ಸಿಕ್ಕಾಯ ಪತ್ತಂ ಪರಿಹರಿತುಂ. ಭಗವತೋ ಏತಮತ್ಥಂ ಆರೋಚೇಸುಂ. ‘‘ಅನುಜಾನಾಮಿ, ಭಿಕ್ಖವೇ, ಗಿಲಾನಸ್ಸ ಭಿಕ್ಖುನೋ ದಣ್ಡಸಿಕ್ಕಾಸಮ್ಮುತಿಂ ದಾತುಂ. ಏವಞ್ಚ ಪನ, ಭಿಕ್ಖವೇ, ದಾತಬ್ಬಾ. ತೇನ ಗಿಲಾನೇನ ಭಿಕ್ಖುನಾ ಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ವುಡ್ಢಾನಂ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘ಅಹಂ, ಭನ್ತೇ, ಗಿಲಾನೋ; ನ ಸಕ್ಕೋಮಿ ವಿನಾ ದಣ್ಡೇನ ಆಹಿಣ್ಡಿತುಂ; ನ ಸಕ್ಕೋಮಿ ವಿನಾ ಸಿಕ್ಕಾಯ ಪತ್ತಂ ಪರಿಹರಿತುಂ. ಸೋಹಂ, ಭನ್ತೇ, ಸಙ್ಘಂ ದಣ್ಡಸಿಕ್ಕಾಸಮ್ಮುತಿಂ ಯಾಚಾಮೀ’ತಿ. ದುತಿಯಮ್ಪಿ ಯಾಚಿತಬ್ಬಾ. ತತಿಯಮ್ಪಿ ಯಾಚಿತಬ್ಬಾ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಗಿಲಾನೋ, ನ ಸಕ್ಕೋತಿ ವಿನಾ ದಣ್ಡೇನ ಆಹಿಣ್ಡಿತುಂ, ನ ಸಕ್ಕೋತಿ ವಿನಾ ಸಿಕ್ಕಾಯ ಪತ್ತಂ ಪರಿಹರಿತುಂ. ಸೋ ಸಙ್ಘಂ ದಣ್ಡಸಿಕ್ಕಾಸಮ್ಮುತಿಂ ಯಾಚತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಇತ್ಥನ್ನಾಮಸ್ಸ ಭಿಕ್ಖುನೋ ದಣ್ಡಸಿಕ್ಕಾಸಮ್ಮುತಿಂ ದದೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಇತ್ಥನ್ನಾಮೋ ಭಿಕ್ಖು ಗಿಲಾನೋ ನ ಸಕ್ಕೋತಿ ವಿನಾ ದಣ್ಡೇನ ಆಹಿಣ್ಡಿತುಂ, ನ ಸಕ್ಕೋತಿ ವಿನಾ ಸಿಕ್ಕಾಯ ಪತ್ತಂ ಪರಿಹರಿತುಂ. ಸೋ ಸಙ್ಘಂ ದಣ್ಡಸಿಕ್ಕಾಸಮ್ಮುತಿಂ ಯಾಚತಿ. ಸಙ್ಘೋ ಇತ್ಥನ್ನಾಮಸ್ಸ ಭಿಕ್ಖುನೋ ದಣ್ಡಸಿಕ್ಕಾಸಮ್ಮುತಿಂ ದೇತಿ. ಯಸ್ಸಾಯಸ್ಮತೋ ಖಮತಿ ಇತ್ಥನ್ನಾಮಸ್ಸ ಭಿಕ್ಖುನೋ ದಣ್ಡಸಿಕ್ಕಾಸಮ್ಮುತಿಯಾ ದಾನಂ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ದಿನ್ನಾ ಸಙ್ಘೇನ ಇತ್ಥನ್ನಾಮಸ್ಸ ಭಿಕ್ಖುನೋ ದಣ್ಡಸಿಕ್ಕಾಸಮ್ಮುತಿ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.