೨. ಸತಿವಿನಯೋ

೧೮೯. [ಇದಂ ವತ್ಥು ಪಾರಾ. ೩೮೦ ಆದಯೋ] ತೇನ ಸಮಯೇನ ಬುದ್ಧೋ ಭಗವಾ ರಾಜಗಹೇ ವಿಹರತಿ ವೇಳುವನೇ ಕಲನ್ದಕನಿವಾಪೇ. ತೇನ ಖೋ ಪನ ಸಮಯೇನ ಆಯಸ್ಮತಾ ದಬ್ಬೇನ ಮಲ್ಲಪುತ್ತೇನ ಜಾತಿಯಾ ಸತ್ತವಸ್ಸೇನ ಅರಹತ್ತಂ ಸಚ್ಛಿಕತಂ ಹೋತಿ. ಯಂ ಕಿಞ್ಚಿ ಸಾವಕೇನ ಪತ್ತಬ್ಬಂ ಸಬ್ಬಂ ತೇನ ಅನುಪ್ಪತ್ತಂ ಹೋತಿ. ನತ್ಥಿ ಚಸ್ಸ ಕಿಞ್ಚಿ ಉತ್ತರಿ [ಉತ್ತರಿಂ (ಸೀ.)] ಕರಣೀಯಂ, ಕತಸ್ಸ ವಾ ಪತಿಚಯೋ. ಅಥ ಖೋ ಆಯಸ್ಮತೋ ದಬ್ಬಸ್ಸ ಮಲ್ಲಪುತ್ತಸ್ಸ ರಹೋಗತಸ್ಸ ಪಟಿಸಲ್ಲೀನಸ್ಸ ಏವಂ ಚೇತಸೋ ಪರಿವಿತಕ್ಕೋ ಉದಪಾದಿ – ‘‘ಮಯಾ ಖೋ ಜಾತಿಯಾ ಸತ್ತವಸ್ಸೇನ ಅರಹತ್ತಂ ಸಚ್ಛಿಕತಂ. ಯಂ ಕಿಞ್ಚಿ ಸಾವಕೇನ ಪತ್ತಬ್ಬಂ ಸಬ್ಬಂ ಮಯಾ ಅನುಪ್ಪತ್ತಂ. ನತ್ಥಿ ಚ ಮೇ ಕಿಞ್ಚಿ ಉತ್ತರಿಕರಣೀಯಂ, ಕತಸ್ಸ ವಾ ಪತಿಚಯೋ. ಕಿಂ ನು ಖೋ ಅಹಂ ಸಙ್ಘಸ್ಸ ವೇಯ್ಯಾವಚ್ಚಂ ಕರೇಯ್ಯ’’ನ್ತಿ?

ಅಥ ಖೋ ಆಯಸ್ಮತೋ ದಬ್ಬಸ್ಸ ಮಲ್ಲಪುತ್ತಸ್ಸ ಏತದಹೋಸಿ – ‘‘ಯಂನೂನಾಹಂ ಸಙ್ಘಸ್ಸ ಸೇನಾಸನಞ್ಚ ಪಞ್ಞಪೇಯ್ಯಂ ಭತ್ತಾನಿ ಚ ಉದ್ದಿಸೇಯ್ಯ’’ನ್ತಿ. ಅಥ ಖೋ ಆಯಸ್ಮಾ ದಬ್ಬೋ ಮಲ್ಲಪುತ್ತೋ ಸಾಯನ್ಹಸಮಯಂ ಪಟಿಸಲ್ಲಾನಾ ವುಟ್ಠಿತೋ ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನೋ ಖೋ ಆಯಸ್ಮಾ ದಬ್ಬೋ ಮಲ್ಲಪುತ್ತೋ ಭಗವನ್ತಂ ಏತದವೋಚ – ‘‘ಇಧ ಮಯ್ಹಂ, ಭನ್ತೇ, ರಹೋಗತಸ್ಸ ಪಟಿಸಲ್ಲೀನಸ್ಸ ಏವಂ ಚೇತಸೋ ಪರಿವಿತಕ್ಕೋ ಉದಪಾದಿ – ‘ಮಯಾ ಖೋ ಜಾತಿಯಾ ಸತ್ತವಸ್ಸೇನ ಅರಹತ್ತಂ ಸಚ್ಛಿಕತಂ. ಯಂ ಕಿಞ್ಚಿ ಸಾವಕೇನ ಪತ್ತಬ್ಬಂ, ಸಬ್ಬಂ ಮಯಾ ಅನುಪ್ಪತ್ತಂ. ನತ್ಥಿ ಚ ಮೇ ಕಿಞ್ಚಿ ಉತ್ತರಿಕರಣೀಯಂ, ಕತಸ್ಸ ವಾ ಪತಿಚಯೋ. ಕಿಂ ನು ಖೋ ಅಹಂ ಸಙ್ಘಸ್ಸ ವೇಯ್ಯಾವಚ್ಚಂ ಕರೇಯ್ಯ’ನ್ತಿ? ತಸ್ಸ ಮಯ್ಹಂ, ಭನ್ತೇ, ಏತದಹೋಸಿ – ‘ಯಂನೂನಾಹಂ ಸಙ್ಘಸ್ಸ ಸೇನಾಸನಞ್ಚ ಪಞ್ಞಪೇಯ್ಯಂ ಭತ್ತಾನಿ ಚ ಉದ್ದಿಸೇಯ್ಯ’ನ್ತಿ. ಇಚ್ಛಾಮಹಂ, ಭನ್ತೇ, ಸಙ್ಘಸ್ಸ ಸೇನಾಸನಞ್ಚ ಪಞ್ಞಾಪೇತುಂ ಭತ್ತಾನಿ ಚ ಉದ್ದಿಸಿತು’’ನ್ತಿ. ‘‘ಸಾಧು ಸಾಧು, ದಬ್ಬ. ತೇನ ಹಿ ತ್ವಂ, ದಬ್ಬ, ಸಙ್ಘಸ್ಸ ಸೇನಾಸನಞ್ಚ ಪಞ್ಞಪೇಹಿ ಭತ್ತಾನಿ ಚ ಉದ್ದಿಸಾಹೀ’’ತಿ [ಉದ್ದಿಸಾತಿ (ಪಾರಾ. ೩೮೦)]. ‘‘ಏವಂ, ಭನ್ತೇ’’ತಿ ಖೋ ಆಯಸ್ಮಾ ದಬ್ಬೋ ಮಲ್ಲಪುತ್ತೋ ಭಗವತೋ ಪಚ್ಚಸ್ಸೋಸಿ. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ತೇನ ಹಿ, ಭಿಕ್ಖವೇ, ಸಙ್ಘೋ ದಬ್ಬಂ ಮಲ್ಲಪುತ್ತಂ ಸೇನಾಸನಪಞ್ಞಾಪಕಞ್ಚ ಭತ್ತುದ್ದೇಸಕಞ್ಚ ಸಮ್ಮನ್ನತು. ಏವಞ್ಚ ಪನ, ಭಿಕ್ಖವೇ, ಸಮ್ಮನ್ನಿತಬ್ಬೋ. ಪಠಮಂ ದಬ್ಬೋ ಮಲ್ಲಪುತ್ತೋ ಯಾಚಿತಬ್ಬೋ [ದಬ್ಬೋ ಯಾಚಿತಬ್ಬೋ (ಸ್ಯಾ. ಕ.)]. ಯಾಚಿತ್ವಾ ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

೧೯೦. ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಸೇನಾಸನಪಞ್ಞಾಪಕಞ್ಚ ಭತ್ತುದ್ದೇಸಕಞ್ಚ ಸಮ್ಮನ್ನೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಸಙ್ಘೋ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಸೇನಾಸನಪಞ್ಞಾಪಕಞ್ಚ ಭತ್ತುದ್ದೇಸಕಞ್ಚ ಸಮ್ಮನ್ನತಿ. ಯಸ್ಸಾಯಸ್ಮತೋ ಖಮತಿ ಆಯಸ್ಮತೋ ದಬ್ಬಸ್ಸ ಮಲ್ಲಪುತ್ತಸ್ಸ ಸೇನಾಸನಪಞ್ಞಾಪಕಸ್ಸ ಚ ಭತ್ತುದ್ದೇಸಕಸ್ಸ ಚ ಸಮ್ಮುತಿ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಸಮ್ಮತೋ ಸಙ್ಘೇನ ಆಯಸ್ಮಾ ದಬ್ಬೋ ಮಲ್ಲಪುತ್ತೋ ಸೇನಾಸನಪಞ್ಞಾಪಕೋ ಚ ಭತ್ತುದ್ದೇಸಕೋ ಚ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

೧೯೧. ಸಮ್ಮತೋ ಚ ಪನಾಯಸ್ಮಾ ದಬ್ಬೋ ಮಲ್ಲಪುತ್ತೋ ಸಭಾಗಾನಂ ಭಿಕ್ಖೂನಂ ಏಕಜ್ಝಂ ಸೇನಾಸನಂ ಪಞ್ಞಪೇತಿ. ಯೇ ತೇ ಭಿಕ್ಖೂ ಸುತ್ತನ್ತಿಕಾ ತೇಸಂ ಏಕಜ್ಝಂ ಸೇನಾಸನಂ ಪಞ್ಞಪೇತಿ – ತೇ ಅಞ್ಞಮಞ್ಞಂ ಸುತ್ತನ್ತಂ ಸಙ್ಗಾಯಿಸ್ಸನ್ತೀತಿ. ಯೇ ತೇ ಭಿಕ್ಖೂ ವಿನಯಧರಾ ತೇಸಂ ಏಕಜ್ಝಂ ಸೇನಾಸನಂ ಪಞ್ಞಪೇತಿ – ತೇ ಅಞ್ಞಮಞ್ಞಂ ವಿನಯಂ ವಿನಿಚ್ಛಿನಿಸ್ಸನ್ತೀತಿ. ಯೇ ತೇ ಭಿಕ್ಖೂ ಧಮ್ಮಕಥಿಕಾ ತೇಸಂ ಏಕಜ್ಝಂ ಸೇನಾಸನಂ ಪಞ್ಞಪೇತಿ – ತೇ ಅಞ್ಞಮಞ್ಞಂ ಧಮ್ಮಂ ಸಾಕಚ್ಛಿಸ್ಸನ್ತೀತಿ. ಯೇ ತೇ ಭಿಕ್ಖೂ ಝಾಯಿನೋ ತೇಸಂ ಏಕಜ್ಝಂ ಸೇನಾಸನಂ ಪಞ್ಞಪೇತಿ – ತೇ ಅಞ್ಞಮಞ್ಞಂ ನ ಬ್ಯಾಬಾಧಿಸ್ಸನ್ತೀತಿ. ಯೇ ತೇ ಭಿಕ್ಖೂ ತಿರಚ್ಛಾನಕಥಿಕಾ ಕಾಯದಳ್ಹಿಬಹುಲಾ [ಕಾಯದಡ್ಢಿಬಹುಲಾ (ಸೀ.)] ವಿಹರನ್ತಿ ತೇಸಮ್ಪಿ ಏಕಜ್ಝಂ ಸೇನಾಸನಂ ಪಞ್ಞಪೇತಿ – ಇಮಾಯಪಿಮೇ ಆಯಸ್ಮನ್ತೋ ರತಿಯಾ ಅಚ್ಛಿಸ್ಸನ್ತೀತಿ. ಯೇಪಿ ತೇ ಭಿಕ್ಖೂ ವಿಕಾಲೇ ಆಗಚ್ಛನ್ತಿ ತೇಸಮ್ಪಿ ತೇಜೋಧಾತುಂ ಸಮಾಪಜ್ಜಿತ್ವಾ ತೇನೇವ ಆಲೋಕೇನ ಸೇನಾಸನಂ ಪಞ್ಞಪೇತಿ; ಅಪಿಸು ಭಿಕ್ಖೂ ಸಞ್ಚಿಚ್ಚ ವಿಕಾಲೇ ಆಗಚ್ಛನ್ತಿ – ಮಯಂ ಆಯಸ್ಮತೋ ದಬ್ಬಸ್ಸ ಮಲ್ಲಪುತ್ತಸ್ಸ ಇದ್ಧಿಪಾಟಿಹಾರಿಯಂ ಪಸ್ಸಿಸ್ಸಾಮಾತಿ.

ತೇ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಉಪಸಙ್ಕಮಿತ್ವಾ ಏವಂ ವದನ್ತಿ – ‘‘ಅಮ್ಹಾಕಂ, ಆವುಸೋ ದಬ್ಬ, ಸೇನಾಸನಂ ಪಞ್ಞಪೇಹೀ’’ತಿ. ತೇ ಆಯಸ್ಮಾ ದಬ್ಬೋ ಮಲ್ಲಪುತ್ತೋ ಏವಂ ವದೇತಿ – ‘‘ಕತ್ಥ ಆಯಸ್ಮನ್ತಾ ಇಚ್ಛನ್ತಿ ಕತ್ಥ ಪಞ್ಞಪೇಮೀ’’ತಿ? ತೇ ಸಞ್ಚಿಚ್ಚ ದೂರೇ ಅಪದಿಸನ್ತಿ – ‘‘ಅಮ್ಹಾಕಂ, ಆವುಸೋ ದಬ್ಬ, ಗಿಜ್ಝಕೂಟೇ ಪಬ್ಬತೇ ಸೇನಾಸನಂ ಪಞ್ಞಪೇಹಿ. ಅಮ್ಹಾಕಂ, ಆವುಸೋ, ಚೋರಪಪಾತೇ ಸೇನಾಸನಂ ಪಞ್ಞಪೇಹಿ. ಅಮ್ಹಾಕಂ, ಆವುಸೋ, ಇಸಿಗಿಲಿಪಸ್ಸೇ ಕಾಳಸಿಲಾಯಂ ಸೇನಾಸನಂ ಪಞ್ಞಪೇಹಿ. ಅಮ್ಹಾಕಂ, ಆವುಸೋ, ವೇಭಾರಪಸ್ಸೇ ಸತ್ತಪಣ್ಣಿಗುಹಾಯಂ ಸೇನಾಸನಂ ಪಞ್ಞಪೇಹಿ. ಅಮ್ಹಾಕಂ, ಆವುಸೋ, ಸೀತವನೇ ಸಪ್ಪಸೋಣ್ಡಿಕಪಬ್ಭಾರೇ ಸೇನಾಸನಂ ಪಞ್ಞಪೇಹಿ. ಅಮ್ಹಾಕಂ, ಆವುಸೋ, ಗೋತಮಕಕನ್ದರಾಯಂ [ಗೋಮಟಕನ್ದರಾಯಂ (ಸ್ಯಾ. ಕಂ.)] ಸೇನಾಸನಂ ಪಞ್ಞಪೇಹಿ. ಅಮ್ಹಾಕಂ, ಆವುಸೋ, ತಿನ್ದುಕಕನ್ದರಾಯಂ ಸೇನಾಸನಂ ಪಞ್ಞಪೇಹಿ. ಅಮ್ಹಾಕಂ, ಆವುಸೋ, ತಪೋದಕನ್ದರಾಯಂ [ಕಪೋತಕನ್ದರಾಯಂ (ಕ.)] ಸೇನಾಸನಂ ಪಞ್ಞಪೇಹಿ. ಅಮ್ಹಾಕಂ, ಆವುಸೋ, ತಪೋದಾರಾಮೇ ಸೇನಾಸನಂ ಪಞ್ಞಪೇಹಿ. ಅಮ್ಹಾಕಂ, ಆವುಸೋ, ಜೀವಕಮ್ಬವನೇ ಸೇನಾಸನಂ ಪಞ್ಞಪೇಹಿ. ಅಮ್ಹಾಕಂ, ಆವುಸೋ, ಮದ್ದಕುಚ್ಛಿಮ್ಹಿ ಮಿಗದಾಯೇ ಸೇನಾಸನಂ ಪಞ್ಞಪೇಹೀ’’ತಿ.

ತೇಸಂ ಆಯಸ್ಮಾ ದಬ್ಬೋ ಮಲ್ಲಪುತ್ತೋ ತೇಜೋಧಾತುಂ ಸಮಾಪಜ್ಜಿತ್ವಾ ಅಙ್ಗುಲಿಯಾ ಜಲಮಾನಾಯ ಪುರತೋ ಪುರತೋ ಗಚ್ಛತಿ. ತೇಪಿ ತೇನೇವ ಆಲೋಕೇನ ಆಯಸ್ಮತೋ ದಬ್ಬಸ್ಸ ಮಲ್ಲಪುತ್ತಸ್ಸ ಪಿಟ್ಠಿತೋ ಪಿಟ್ಠಿತೋ ಗಚ್ಛನ್ತಿ. ತೇಸಂ ಆಯಸ್ಮಾ ದಬ್ಬೋ ಮಲ್ಲಪುತ್ತೋ ಏವಂ ಸೇನಾಸನಂ ಪಞ್ಞಪೇತಿ – ಅಯಂ ಮಞ್ಚೋ, ಇದಂ ಪೀಠಂ, ಅಯಂ ಭಿಸಿ, ಇದಂ ಬಿಬ್ಬೋಹನಂ [ಬಿಮ್ಬೋಹನಂ (ಸೀ. ಸ್ಯಾ. ಕಂ.)], ಇದಂ ವಚ್ಚಟ್ಠಾನಂ, ಇದಂ ಪಸ್ಸಾವಟ್ಠಾನಂ, ಇದಂ ಪಾನೀಯಂ, ಇದಂ ಪರಿಭೋಜನೀಯಂ, ಅಯಂ ಕತ್ತರದಣ್ಡೋ, ಇದಂ ಸಙ್ಘಸ್ಸ ಕತಿಕಸಣ್ಠಾನಂ, ಇಮಂ ಕಾಲಂ ಪವಿಸಿತಬ್ಬಂ, ಇಮಂ ಕಾಲಂ ನಿಕ್ಖಮಿತಬ್ಬನ್ತಿ. ತೇಸಂ ಆಯಸ್ಮಾ ದಬ್ಬೋ ಮಲ್ಲಪುತ್ತೋ ಏವಂ ಸೇನಾಸನಂ ಪಞ್ಞಪೇತ್ವಾ ಪುನದೇವ ವೇಳುವನಂ ಪಚ್ಚಾಗಚ್ಛತಿ.

೧೯೨. ತೇನ ಖೋ ಪನ ಸಮಯೇನ ಮೇತ್ತಿಯಭೂಮಜಕಾ [ಮೇತ್ತಿಯಭುಮ್ಮಜಕಾ (ಸೀ. ಸ್ಯಾ. ಕಂ.)] ಭಿಕ್ಖೂ ನವಕಾ ಚೇವ ಹೋನ್ತಿ ಅಪ್ಪಪುಞ್ಞಾ ಚ. ಯಾನಿ ಸಙ್ಘಸ್ಸ ಲಾಮಕಾನಿ ಸೇನಾಸನಾನಿ ತಾನಿ ತೇಸಂ ಪಾಪುಣನ್ತಿ ಲಾಮಕಾನಿ ಚ ಭತ್ತಾನಿ. ತೇನ ಖೋ ಪನ ಸಮಯೇನ ರಾಜಗಹೇ ಮನುಸ್ಸಾ ಇಚ್ಛನ್ತಿ ಥೇರಾನಂ ಭಿಕ್ಖೂನಂ ಅಭಿಸಙ್ಖಾರಿಕಂ ಪಿಣ್ಡಪಾತಂ ದಾತುಂ – ಸಪ್ಪಿಮ್ಪಿ, ತೇಲಮ್ಪಿ, ಉತ್ತರಿಭಙ್ಗಮ್ಪಿ. ಮೇತ್ತಿಯಭೂಮಜಕಾನಂ ಪನ ಭಿಕ್ಖೂನಂ ಪಾಕತಿಕಂ ದೇನ್ತಿ – ಯಥಾರನ್ಧಂ [ಯಥಾರದ್ಧಂ (ಸ್ಯಾ.)] ಕಣಾಜಕಂ ಬಿಲಙ್ಗದುತಿಯಂ. ತೇ ಪಚ್ಛಾಭತ್ತಂ ಪಿಣ್ಡಪಾತಪ್ಪಟಿಕ್ಕನ್ತಾ ಥೇರೇ ಭಿಕ್ಖೂ ಪುಚ್ಛನ್ತಿ – ‘‘ತುಮ್ಹಾಕಂ, ಆವುಸೋ, ಭತ್ತಗ್ಗೇ ಕಿಂ ಅಹೋಸಿ, ತುಮ್ಹಾಕಂ ಕಿಂ ಅಹೋಸೀ’’ತಿ [ಕಿಂ ನಾಹೋಸಿ (ಸ್ಯಾ. ಕಂ.)]? ಏಕಚ್ಚೇ ಥೇರಾ ಏವಂ ವದನ್ತಿ – ‘‘ಅಮ್ಹಾಕಂ, ಆವುಸೋ, ಸಪ್ಪಿ ಅಹೋಸಿ, ತೇಲಂ ಅಹೋಸಿ, ಉತ್ತರಿಭಙ್ಗಂ ಅಹೋಸೀ’’ತಿ. ಮೇತ್ತಿಯಭೂಮಜಕಾ ಪನ ಭಿಕ್ಖೂ ಏವಂ ವದನ್ತಿ – ‘‘ಅಮ್ಹಾಕಂ, ಆವುಸೋ, ನ ಕಿಞ್ಚಿ ಅಹೋಸಿ – ಪಾಕತಿಕಂ ಯಥಾರನ್ಧಂ ಕಣಾಜಕಂ ಬಿಲಙ್ಗದುತಿಯ’’ನ್ತಿ.

ತೇನ ಖೋ ಪನ ಸಮಯೇನ ಕಲ್ಯಾಣಭತ್ತಿಕೋ ಗಹಪತಿ ಸಙ್ಘಸ್ಸ ಚತುಕ್ಕಭತ್ತಂ ದೇತಿ ನಿಚ್ಚಭತ್ತಂ. ಸೋ ಭತ್ತಗ್ಗೇ ಸಪುತ್ತದಾರೋ ಉಪತಿಟ್ಠಿತ್ವಾ ಪರಿವಿಸತಿ – ಅಞ್ಞೇ ಓದನೇನ ಪುಚ್ಛನ್ತಿ, ಅಞ್ಞೇ ಸೂಪೇನ ಪುಚ್ಛನ್ತಿ, ಅಞ್ಞೇ ತೇಲೇನ ಪುಚ್ಛನ್ತಿ, ಅಞ್ಞೇ ಉತ್ತರಿಭಙ್ಗೇನ ಪುಚ್ಛನ್ತಿ. ತೇನ ಖೋ ಪನ ಸಮಯೇನ ಕಲ್ಯಾಣಭತ್ತಿಕಸ್ಸ ಗಹಪತಿನೋ ಭತ್ತಂ ಸ್ವಾತನಾಯ ಮೇತ್ತಿಯಭೂಮಜಕಾನಂ ಭಿಕ್ಖೂನಂ ಉದ್ದಿಟ್ಠಂ ಹೋತಿ. ಅಥ ಖೋ ಕಲ್ಯಾಣಭತ್ತಿಕೋ ಗಹಪತಿ ಆರಾಮಂ ಅಗಮಾಸಿ ಕೇನಚಿದೇವ ಕರಣೀಯೇನ. ಸೋ ಯೇನಾಯಸ್ಮಾ ದಬ್ಬೋ ಮಲ್ಲಪುತ್ತೋ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ. ಏಕಮನ್ತಂ ನಿಸಿನ್ನಂ ಖೋ ಕಲ್ಯಾಣಭತ್ತಿಕಂ ಗಹಪತಿಂ ಆಯಸ್ಮಾ ದಬ್ಬೋ ಮಲ್ಲಪುತ್ತೋ ಧಮ್ಮಿಯಾ ಕಥಾಯ ಸನ್ದಸ್ಸೇಸಿ ಸಮಾದಪೇಸಿ ಸಮುತ್ತೇಜೇಸಿ ಸಮ್ಪಹಂಸೇಸಿ. ಅಥ ಖೋ ಕಲ್ಯಾಣಭತ್ತಿಕೋ ಗಹಪತಿ ಆಯಸ್ಮತಾ ದಬ್ಬೇನ ಮಲ್ಲಪುತ್ತೇನ ಧಮ್ಮಿಯಾ ಕಥಾಯ ಸನ್ದಸ್ಸಿತೋ ಸಮಾದಪಿತೋ ಸಮುತ್ತೇಜಿತೋ ಸಮ್ಪಹಂಸಿತೋ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಏತದವೋಚ – ‘‘ಕಸ್ಸ, ಭನ್ತೇ, ಅಮ್ಹಾಕಂ ಘರೇ ಸ್ವಾತನಾಯ ಭತ್ತಂ ಉದ್ದಿಟ್ಠ’’ನ್ತಿ? ‘‘ಮೇತ್ತಿಯಭೂಮಜಕಾನಂ ಖೋ, ಗಹಪತಿ, ಭಿಕ್ಖೂನಂ ತುಮ್ಹಾಕಂ ಘರೇ ಸ್ವಾತನಾಯ ಭತ್ತಂ ಉದ್ದಿಟ್ಠ’’ನ್ತಿ. ಅಥ ಖೋ ಕಲ್ಯಾಣಭತ್ತಿಕೋ ಗಹಪತಿ ಅನತ್ತಮನೋ ಅಹೋಸಿ. ಕಥಞ್ಹಿ ನಾಮ ಪಾಪಭಿಕ್ಖೂ ಅಮ್ಹಾಕಂ ಘರೇ ಭುಞ್ಜಿಸ್ಸನ್ತೀತಿ ಘರಂ ಗನ್ತ್ವಾ ದಾಸಿಂ ಆಣಾಪೇಸಿ – ‘‘ಯೇ, ಜೇ, ಸ್ವೇ ಭತ್ತಿಕಾ ಆಗಚ್ಛನ್ತಿ ತೇ ಕೋಟ್ಠಕೇ ಆಸನಂ ಪಞ್ಞಪೇತ್ವಾ ಕಣಾಜಕೇನ ಬಿಲಙ್ಗದುತಿಯೇನ ಪರಿವಿಸಾ’’ತಿ. ‘‘ಏವಂ ಅಯ್ಯಾ’’ತಿ ಖೋ ಸಾ ದಾಸೀ ಕಲ್ಯಾಣಭತ್ತಿಕಸ್ಸ ಗಹಪತಿನೋ ಪಚ್ಚಸ್ಸೋಸಿ.

ಅಥ ಖೋ ಮೇತ್ತಿಯಭೂಮಜಕಾ ಭಿಕ್ಖೂ – ಹಿಯ್ಯೋ ಖೋ, ಆವುಸೋ, ಅಮ್ಹಾಕಂ ಕಲ್ಯಾಣಭತ್ತಿಕಸ್ಸ ಗಹಪತಿನೋ ಭತ್ತಂ ಉದ್ದಿಟ್ಠಂ; ಸ್ವೇ ಅಮ್ಹೇ ಕಲ್ಯಾಣಭತ್ತಿಕೋ ಗಹಪತಿ ಸಪುತ್ತದಾರೋ ಉಪತಿಟ್ಠಿತ್ವಾ ಪರಿವಿಸಿಸ್ಸತಿ; ಅಞ್ಞೇ ಓದನೇನ ಪುಚ್ಛಿಸ್ಸನ್ತಿ, ಅಞ್ಞೇ ಸೂಪೇನ ಪುಚ್ಛಿಸ್ಸನ್ತಿ, ಅಞ್ಞೇ ತೇಲೇನ ಪುಚ್ಛಿಸ್ಸನ್ತಿ, ಅಞ್ಞೇ ಉತ್ತರಿಭಙ್ಗೇನ ಪುಚ್ಛಿಸ್ಸನ್ತೀತಿ. ತೇ ತೇನೇವ ಸೋಮನಸ್ಸೇನ ನ ಚಿತ್ತರೂಪಂ ರತ್ತಿಯಾ ಸುಪಿಂಸು. ಅಥ ಖೋ ಮೇತ್ತಿಯಭೂಮಜಕಾ ಭಿಕ್ಖೂ ಪುಬ್ಬಣ್ಹಸಮಯಂ ನಿವಾಸೇತ್ವಾ ಪತ್ತಚೀವರಮಾದಾಯ ಯೇನ ಕಲ್ಯಾಣಭತ್ತಿಕಸ್ಸ ಗಹಪತಿನೋ ನಿವೇಸನಂ ತೇನುಪಸಙ್ಕಮಿಂಸು. ಅದ್ದಸಾ ಖೋ ಸಾ ದಾಸೀ ಮೇತ್ತಿಯಭೂಮಜಕೇ ಭಿಕ್ಖೂ ದೂರತೋವ ಆಗಚ್ಛನ್ತೇ; ದಿಸ್ವಾನ ಕೋಟ್ಠಕೇ ಆಸನಂ ಪಞ್ಞಾಪೇತ್ವಾ ಮೇತ್ತಿಯಭೂಮಜಕೇ ಭಿಕ್ಖೂ ಏತದವೋಚ – ‘‘ನಿಸೀದಥ, ಭನ್ತೇ’’ತಿ. ಅಥ ಖೋ ಮೇತ್ತಿಯಭೂಮಜಕಾನಂ ಭಿಕ್ಖೂನಂ ಏತದಹೋಸಿ – ‘‘ನಿಸ್ಸಂಸಯಂ ಖೋ ನ ತಾವ ಭತ್ತಂ ಸಿದ್ಧಂ ಭವಿಸ್ಸತಿ ಯಥಾ ಮಯಂ ಕೋಟ್ಠಕೇ ನಿಸೀದಾಪಿಯಾಮಾ’’ತಿ [ನಿಸೀದಾಪೇಯ್ಯಾಮಾತಿ (ಕ.)]. ಅಥ ಖೋ ಸಾ ದಾಸೀ ಕಣಾಜಕೇನ [ಕಾಣಾಜಕೇನ (ಸ್ಯಾ. ಕಂ.)] ಬಿಲಙ್ಗದುತಿಯೇನ ಉಪಗಞ್ಛಿ – ಭುಞ್ಜಥ, ಭನ್ತೇತಿ. ‘‘ಮಯಂ ಖೋ, ಭಗಿನಿ, ನಿಚ್ಚಭತ್ತಿಕಾ’’ತಿ. ‘‘ಜಾನಾಮಿ ಅಯ್ಯಾ ನಿಚ್ಚಭತ್ತಿಕಾತಿ. ಅಪಿ ಚಾಹಂ ಹಿಯ್ಯೋವ ಗಹಪತಿನಾ ಆಣತ್ತಾ – ‘ಯೇ, ಜೇ, ಸ್ವೇ ಭತ್ತಿಕಾ ಆಗಚ್ಛನ್ತಿ, ತೇ ಕೋಟ್ಠಕೇ ಆಸನಂ ಪಞ್ಞಾಪೇತ್ವಾ ಕಣಾಜಕೇನ ಬಿಲಙ್ಗದುತಿಯೇನ ಪರಿವಿಸಾ’ತಿ. ಭುಞ್ಜಥ, ಭನ್ತೇ’’ತಿ. ಅಥ ಖೋ ಮೇತ್ತಿಯಭೂಮಜಕಾ ಭಿಕ್ಖೂ – ಹಿಯ್ಯೋ ಖೋ, ಆವುಸೋ, ಕಲ್ಯಾಣಭತ್ತಿಕೋ ಗಹಪತಿ ಆರಾಮಂ ಅಗಮಾಸಿ ದಬ್ಬಸ್ಸ ಮಲ್ಲಪುತ್ತಸ್ಸ ಸನ್ತಿಕೇ. ನಿಸ್ಸಂಸಯಂ ಖೋ ಮಯಂ ದಬ್ಬೇನ ಮಲ್ಲಪುತ್ತೇನ ಗಹಪತಿನೋ ಅನ್ತರೇ ಪರಿಭಿನ್ನಾತಿ [ಸನ್ತಿಕೇ ಪರಿಭಿನ್ನಾತಿ (ಸ್ಯಾ. ಕಂ.)]. ತೇ ತೇನೇವ ದೋಮನಸ್ಸೇನ ನ ಚಿತ್ತರೂಪಂ ಭುಞ್ಜಿಂಸು. ಅಥ ಖೋ ಮೇತ್ತಿಯಭೂಮಜಕಾ ಭಿಕ್ಖೂ ಪಚ್ಛಾಭತ್ತಂ ಪಿಣ್ಡಪಾತಪ್ಪಟಿಕ್ಕನ್ತಾ ಆರಾಮಂ ಗನ್ತ್ವಾ ಪತ್ತಚೀವರಂ ಪಟಿಸಾಮೇತ್ವಾ ಬಹಾರಾಮಕೋಟ್ಠಕೇ ಸಙ್ಘಾಟಿಪಲ್ಲತ್ಥಿಕಾಯ ನಿಸೀದಿಂಸು ತುಣ್ಹೀಭೂತಾ ಮಙ್ಕುಭೂತಾ ಪತ್ತಕ್ಖನ್ಧಾ ಅಧೋಮುಖಾ ಪಜ್ಝಾಯನ್ತಾ ಅಪ್ಪಟಿಭಾನಾ.

ಅಥ ಖೋ ಮೇತ್ತಿಯಾ ಭಿಕ್ಖುನೀ ಯೇನ ಮೇತ್ತಿಯಭೂಮಜಕಾ ಭಿಕ್ಖೂ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಮೇತ್ತಿಯಭೂಮಜಕೇ ಭಿಕ್ಖೂ ಏತದವೋಚ – ‘‘ವನ್ದಾಮಿ ಅಯ್ಯಾ’’ತಿ. ಏವಂ ವುತ್ತೇ ಮೇತ್ತಿಯಭೂಮಜಕಾ ಭಿಕ್ಖೂ ನಾಲಪಿಂಸು. ದುತಿಯಮ್ಪಿ ಖೋ…ಪೇ… ತತಿಯಮ್ಪಿ ಖೋ ಮೇತ್ತಿಯಾ ಭಿಕ್ಖುನೀ ಮೇತ್ತಿಯಭೂಮಜಕೇ ಭಿಕ್ಖೂ ಏತದವೋಚ – ‘‘ವನ್ದಾಮಿ ಅಯ್ಯಾ’’ತಿ. ತತಿಯಮ್ಪಿ ಖೋ ಮೇತ್ತಿಯಭೂಮಜಕಾ ಭಿಕ್ಖೂ ನಾಲಪಿಂಸು. ‘‘ಕ್ಯಾಹಂ ಅಯ್ಯಾನಂ ಅಪರಜ್ಝಾಮಿ? ಕಿಸ್ಸ ಮಂ ಅಯ್ಯಾ ನಾಲಪನ್ತೀ’’ತಿ? ‘‘ತಥಾ ಹಿ ಪನ ತ್ವಂ, ಭಗಿನಿ, ಅಮ್ಹೇ ದಬ್ಬೇನ ಮಲ್ಲಪುತ್ತೇನ ವಿಹೇಠಿಯಮಾನೇ ಅಜ್ಝುಪೇಕ್ಖಸೀ’’ತಿ? ‘‘ಕ್ಯಾಹಂ, ಅಯ್ಯಾ, ಕರೋಮೀ’’ತಿ? ‘‘ಸಚೇ ಖೋ ತ್ವಂ, ಭಗಿನಿ, ಇಚ್ಛೇಯ್ಯಾಸಿ, ಅಜ್ಜೇವ ಭಗವಾ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ನಾಸಾಪೇಯ್ಯಾ’’ತಿ. ‘‘ಕ್ಯಾಹಂ, ಅಯ್ಯಾ, ಕರೋಮಿ? ಕಿಂ ಮಯಾ ಸಕ್ಕಾ ಕಾತು’’ನ್ತಿ? ‘‘ಏಹಿ ತ್ವಂ, ಭಗಿನಿ, ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವನ್ತಂ ಏವಂ ವದೇಹಿ – ‘ಇದಂ, ಭನ್ತೇ, ನಚ್ಛನ್ನಂ ನಪ್ಪತಿರೂಪಂ, ಯಾಯಂ, ಭನ್ತೇ, ದಿಸಾ ಅಭಯಾ ಅನೀತಿಕಾ ಅನುಪದ್ದವಾ ಸಾಯಂ ದಿಸಾ ಸಭಯಾ ಸಈತಿಕಾ ಸಉಪದ್ದವಾ; ಯತೋ ನಿವಾತಂ ತತೋ ಸವಾತಂ [ತತೋ ಪವಾತಂ (ಸೀ. ಸ್ಯಾ. ಕಂ.)]; ಉದಕಂ ಮಞ್ಞೇ ಆದಿತ್ತಂ; ಅಯ್ಯೇನಮ್ಹಿ ದಬ್ಬೇನ ಮಲ್ಲಪುತ್ತೇನ ದೂಸಿತಾ’’’ತಿ. ‘‘ಏವಂ ಅಯ್ಯಾ’’ತಿ ಖೋ ಮೇತ್ತಿಯಾ ಭಿಕ್ಖುನೀ ಮೇತ್ತಿಯಭೂಮಜಕಾನಂ ಭಿಕ್ಖೂನಂ ಪಟಿಸ್ಸುತ್ವಾ [ಪಟಿಸ್ಸುಣಿತ್ವಾ (ಸ್ಯಾ. ಕಂ.)] ಯೇನ ಭಗವಾ ತೇನುಪಸಙ್ಕಮಿ, ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ಅಟ್ಠಾಸಿ. ಏಕಮನ್ತಂ ಠಿತಾ ಖೋ ಮೇತ್ತಿಯಾ [ಸಾ ಮೇತ್ತಿಯಾ (ಸ್ಯಾ. ಕ.)] ಭಿಕ್ಖುನೀ ಭಗವನ್ತಂ ಏತದವೋಚ – ‘‘ಇದಂ, ಭನ್ತೇ, ನಚ್ಛನ್ನಂ ನಪ್ಪತಿರೂಪಂ, ಯಾಯಂ, ಭನ್ತೇ, ದಿಸಾ ಅಭಯಾ ಅನೀತಿಕಾ ಅನುಪದ್ದವಾ ಸಾಯಂ ದಿಸಾ ಸಭಯಾ ಸಈತಿಕಾ ಸಉಪದ್ದವಾ; ಯತೋ ನಿವಾತಂ ತತೋ ಸವಾತಂ; ಉದಕಂ ಮಞ್ಞೇ ಆದಿತ್ತಂ; ಅಯ್ಯೇನಮ್ಹಿ ದಬ್ಬೇನ ಮಲ್ಲಪುತ್ತೇನ ದೂಸಿತಾ’’ತಿ.

೧೯೩. ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಪಟಿಪುಚ್ಛಿ – ‘‘ಸರಸಿ ತ್ವಂ, ದಬ್ಬ, ಏವರೂಪಂ ಕತ್ತಾ ಯಥಾಯಂ ಭಿಕ್ಖುನೀ ಆಹಾ’’ತಿ? ‘‘ಯಥಾ ಮಂ, ಭನ್ತೇ, ಭಗವಾ ಜಾನಾತೀ’’ತಿ. ದುತಿಯಮ್ಪಿ ಖೋ ಭಗವಾ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಏತದವೋಚ – ‘‘ಸರಸಿ ತ್ವಂ, ದಬ್ಬ, ಏವರೂಪಂ ಕತ್ತಾ ಯಥಾಯಂ ಭಿಕ್ಖುನೀ ಆಹಾ’’ತಿ? ‘‘ಯಥಾ ಮಂ, ಭನ್ತೇ, ಭಗವಾ ಜಾನಾತೀ’’ತಿ. ತತಿಯಮ್ಪಿ ಖೋ ಭಗವಾ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಏತದವೋಚ – ‘‘ಸರಸಿ ತ್ವಂ, ದಬ್ಬ, ಏವರೂಪಂ ಕತ್ತಾ ಯಥಾಯಂ ಭಿಕ್ಖುನೀ ಆಹಾ’’ತಿ? ‘‘ಯಥಾ ಮಂ, ಭನ್ತೇ, ಭಗವಾ ಜಾನಾತೀ’’ತಿ. ‘‘ನ ಖೋ, ದಬ್ಬ, ದಬ್ಬಾ ಏವಂ ನಿಬ್ಬೇಠೇನ್ತಿ. ಸಚೇ ತಯಾ ಕತಂ ಕತನ್ತಿ ವದೇಹಿ. ಸಚೇ ಅಕತಂ ಅಕತನ್ತಿ ವದೇಹೀ’’ತಿ. ‘‘ಯತೋಹಂ, ಭನ್ತೇ, ಜಾತೋ ನಾಭಿಜಾನಾಮಿ ಸುಪಿನನ್ತೇನಪಿ ಮೇಥುನಂ ಧಮ್ಮಂ ಪಟಿಸೇವಿತಾ, ಪಗೇವ ಜಾಗರೋ’’ತಿ. ಅಥ ಖೋ ಭಗವಾ ಭಿಕ್ಖೂ ಆಮನ್ತೇಸಿ – ‘‘ತೇನ ಹಿ, ಭಿಕ್ಖವೇ, ಮೇತ್ತಿಯಂ ಭಿಕ್ಖುನಿಂ ನಾಸೇಥ. ಇಮೇ ಚ ಭಿಕ್ಖೂ ಅನುಯುಞ್ಜಥಾ’’ತಿ. ಇದಂ ವತ್ವಾ ಭಗವಾ ಉಟ್ಠಾಯಾಸನಾ ವಿಹಾರಂ ಪಾವಿಸಿ.

ಅಥ ಖೋ ತೇ ಭಿಕ್ಖೂ ಮೇತ್ತಿಯಂ ಭಿಕ್ಖುನಿಂ ನಾಸೇಸುಂ. ಅಥ ಖೋ ಮೇತ್ತಿಯಭೂಮಜಕಾ ಭಿಕ್ಖೂ ತೇ ಭಿಕ್ಖೂ ಏತದವೋಚುಂ – ‘‘ಮಾವುಸೋ, ಮೇತ್ತಿಯಂ ಭಿಕ್ಖುನಿಂ ನಾಸೇಥ, ನ ಸಾ ಕಿಞ್ಚಿ ಅಪರಜ್ಝತಿ; ಅಮ್ಹೇಹಿ ಸಾ ಉಸ್ಸಾಹಿತಾ ಕುಪಿತೇಹಿ ಅನತ್ತಮನೇಹಿ ಚಾವನಾಧಿಪ್ಪಾಯೇಹೀ’’ತಿ. ‘‘ಕಿಂ ಪನ ತುಮ್ಹೇ, ಆವುಸೋ, ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಮೂಲಿಕಾಯ ಸೀಲವಿಪತ್ತಿಯಾ ಅನುದ್ಧಂಸೇಥಾ’’ತಿ? ‘‘ಏವಮಾವುಸೋ’’ತಿ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಮೇತ್ತಿಯಭೂಮಜಕಾ ಭಿಕ್ಖೂ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಮೂಲಿಕಾಯ ಸೀಲವಿಪತ್ತಿಯಾ ಅನುದ್ಧಂಸೇಸ್ಸನ್ತೀ’’ತಿ! ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ …ಪೇ… ‘‘ಸಚ್ಚಂ ಕಿರ, ಭಿಕ್ಖವೇ, ಮೇತ್ತಿಯಭೂಮಜಕಾ ಭಿಕ್ಖೂ ದಬ್ಬಂ ಮಲ್ಲಪುತ್ತಂ ಅಮೂಲಿಕಾಯ ಸೀಲವಿಪತ್ತಿಯಾ ಅನುದ್ಧಂಸೇನ್ತೀ’’ತಿ? ‘‘ಸಚ್ಚಂ ಭಗವಾ’’ತಿ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ –

‘‘ತೇನ ಹಿ, ಭಿಕ್ಖವೇ, ಸಙ್ಘೋ ದಬ್ಬಸ್ಸ ಮಲ್ಲಪುತ್ತಸ್ಸ ಸತಿವೇಪುಲ್ಲಪ್ಪತ್ತಸ್ಸ ಸತಿವಿನಯಂ ದೇತು. ಏವಞ್ಚ ಪನ, ಭಿಕ್ಖವೇ, ದಾತಬ್ಬೋ – ‘‘ತೇನ, ಭಿಕ್ಖವೇ, ದಬ್ಬೇನ ಮಲ್ಲಪುತ್ತೇನ ಸಙ್ಘಂ ಉಪಸಙ್ಕಮಿತ್ವಾ, ಏಕಂಸಂ ಉತ್ತರಾಸಙ್ಗಂ ಕರಿತ್ವಾ, ವುಡ್ಢಾನಂ ಭಿಕ್ಖೂನಂ ಪಾದೇ ವನ್ದಿತ್ವಾ, ಉಕ್ಕುಟಿಕಂ ನಿಸೀದಿತ್ವಾ, ಅಞ್ಜಲಿಂ ಪಗ್ಗಹೇತ್ವಾ, ಏವಮಸ್ಸ ವಚನೀಯೋ – ‘ಇಮೇ ಮಂ, ಭನ್ತೇ, ಮೇತ್ತಿಯಭೂಮಜಕಾ ಭಿಕ್ಖೂ ಅಮೂಲಿಕಾಯ ಸೀಲವಿಪತ್ತಿಯಾ ಅನುದ್ಧಂಸೇನ್ತಿ. ಸೋಹಂ, ಭನ್ತೇ, ಸತಿವೇಪುಲ್ಲಪ್ಪತ್ತೋ ಸಙ್ಘಂ ಸತಿವಿನಯಂ ಯಾಚಾಮೀ’ತಿ. ದುತಿಯಮ್ಪಿ ಯಾಚಿತಬ್ಬೋ. ತತಿಯಮ್ಪಿ ಯಾಚಿತಬ್ಬೋ – ‘ಇಮೇ ಮಂ, ಭನ್ತೇ ಮೇತ್ತಿಯಭೂಮಜಕಾ ಭಿಕ್ಖೂ ಅಮೂಲಿಕಾಯ ಸೀಲವಿಪತ್ತಿಯಾ ಅನುದ್ಧಂಸೇನ್ತಿ. ಸೋಹಂ [ಸೋಹಂ ಭನ್ತೇ (ಕ.)] ಸತಿವೇಪುಲ್ಲಪ್ಪತ್ತೋ ತತಿಯಮ್ಪಿ, ಭನ್ತೇ, ಸಙ್ಘಂ ಸತಿವಿನಯಂ ಯಾಚಾಮೀ’ತಿ. ‘‘ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

೧೯೪. ಸುಣಾತು ಮೇ, ಭನ್ತೇ, ಸಙ್ಘೋ. ಇಮೇ ಮೇತ್ತಿಯಭೂಮಜಕಾ ಭಿಕ್ಖೂ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಮೂಲಿಕಾಯ ಸೀಲವಿಪತ್ತಿಯಾ ಅನುದ್ಧಂಸೇನ್ತಿ. ಆಯಸ್ಮಾ ದಬ್ಬೋ ಮಲ್ಲಪುತ್ತೋ ಸತಿವೇಪುಲ್ಲಪ್ಪತ್ತೋ ಸಙ್ಘಂ ಸತಿವಿನಯಂ ಯಾಚತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಆಯಸ್ಮತೋ ದಬ್ಬಸ್ಸ ಮಲ್ಲಪುತ್ತಸ್ಸ ಸತಿವೇಪುಲ್ಲಪ್ಪತ್ತಸ್ಸ ಸತಿವಿನಯಂ ದದೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಇಮೇ ಮೇತ್ತಿಯಭೂಮಜಕಾ ಭಿಕ್ಖೂ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಮೂಲಿಕಾಯ ಸೀಲವಿಪತ್ತಿಯಾ ಅನುದ್ಧಂಸೇನ್ತಿ. ಆಯಸ್ಮಾ ದಬ್ಬೋ ಮಲ್ಲಪುತ್ತೋ ಸತಿವೇಪುಲ್ಲಪ್ಪತ್ತೋ ಸಙ್ಘಂ ಸತಿವಿನಯಂ ಯಾಚತಿ. ಸಙ್ಘೋ ಆಯಸ್ಮತೋ ದಬ್ಬಸ್ಸ ಮಲ್ಲಪುತ್ತಸ್ಸ ಸತಿವೇಪುಲ್ಲಪ್ಪತ್ತಸ್ಸ ಸತಿವಿನಯಂ ದೇತಿ. ಯಸ್ಸಾಯಸ್ಮತೋ ಖಮತಿ ಆಯಸ್ಮತೋ ದಬ್ಬಸ್ಸ ಮಲ್ಲಪುತ್ತಸ್ಸ ಸತಿವೇಪುಲ್ಲಪ್ಪತ್ತಸ್ಸ ಸತಿವಿನಯಸ್ಸ ದಾನಂ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ… ತತಿಯಮ್ಪಿ ಏತಮತ್ಥಂ ವದಾಮಿ – ಸುಣಾತು ಮೇ, ಭನ್ತೇ, ಸಙ್ಘೋ. ಇಮೇ ಮೇತ್ತಿಯಭೂಮಜಕಾ ಭಿಕ್ಖೂ ಆಯಸ್ಮನ್ತಂ ದಬ್ಬಂ ಮಲ್ಲಪುತ್ತಂ ಅಮೂಲಿಕಾಯ ಸೀಲವಿಪತ್ತಿಯಾ ಅನುದ್ಧಂಸೇನ್ತಿ. ಆಯಸ್ಮಾ ದಬ್ಬೋ ಮಲ್ಲಪುತ್ತೋ ಸತಿವೇಪುಲ್ಲಪ್ಪತ್ತೋ ಸಙ್ಘಂ ಸತಿವಿನಯಂ ಯಾಚತಿ. ಸಙ್ಘೋ ಆಯಸ್ಮತೋ ದಬ್ಬಸ್ಸ ಮಲ್ಲಪುತ್ತಸ್ಸ ಸತಿವೇಪುಲ್ಲಪ್ಪತ್ತಸ್ಸ ಸತಿವಿನಯಂ ದೇತಿ. ಯಸ್ಸಾಯಸ್ಮತೋ ಖಮತಿ ಆಯಸ್ಮತೋ ದಬ್ಬಸ್ಸ ಮಲ್ಲಪುತ್ತಸ್ಸ ಸತಿವೇಪುಲ್ಲಪ್ಪತ್ತಸ್ಸ ಸತಿವಿನಯಸ್ಸ ದಾನಂ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ದಿನ್ನೋ ಸಙ್ಘೇನ ಆಯಸ್ಮತೋ ದಬ್ಬಸ್ಸ ಮಲ್ಲಪುತ್ತಸ್ಸ ಸತಿವೇಪುಲ್ಲಪ್ಪತ್ತಸ್ಸ ಸತಿವಿನಯೋ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

೧೯೫. ‘‘ಪಞ್ಚಿಮಾನಿ, ಭಿಕ್ಖವೇ, ಧಮ್ಮಿಕಾನಿ ಸತಿವಿನಯಸ್ಸ ದಾನಾನಿ. ಸುದ್ಧೋ ಹೋತಿ ಭಿಕ್ಖು ಅನಾಪತ್ತಿಕೋ, ಅನುವದನ್ತಿ ಚ ನಂ, ಯಾಚತಿ ಚ, ತಸ್ಸ ಸಙ್ಘೋ ಸತಿವಿನಯಂ ದೇತಿ ಧಮ್ಮೇನ ಸಮಗ್ಗೇನ – ಇಮಾನಿ ಖೋ, ಭಿಕ್ಖವೇ, ಪಞ್ಚ ಧಮ್ಮಿಕಾನಿ ಸತಿವಿನಯಸ್ಸ ದಾನಾನೀ’’ತಿ.