೮. ದ್ವೇಭಿಕ್ಖುವಾರಏಕಾದಸಕಂ

೧೮೧. ‘‘ದ್ವೇ ಭಿಕ್ಖೂ ಸಙ್ಘಾದಿಸೇಸಂ ಆಪನ್ನಾ ಹೋನ್ತಿ. ತೇ ಸಙ್ಘಾದಿಸೇಸೇ ಸಙ್ಘಾದಿಸೇಸದಿಟ್ಠಿನೋ ಹೋನ್ತಿ. ಏಕೋ ಛಾದೇತಿ, ಏಕೋ ನಚ್ಛಾದೇತಿ. ಯೋ ಛಾದೇತಿ ಸೋ ದುಕ್ಕಟಂ ದೇಸಾಪೇತಬ್ಬೋ. ಯಥಾಪಟಿಚ್ಛನ್ನೇ [ಯಥಾಪಟಿಚ್ಛನ್ನಾನಂ (ಸೀ.)] ಚಸ್ಸ ಪರಿವಾಸಂ ದತ್ವಾ ಉಭಿನ್ನಮ್ಪಿ ಮಾನತ್ತಂ ದಾತಬ್ಬಂ.

‘‘ದ್ವೇ ಭಿಕ್ಖೂ ಸಙ್ಘಾದಿಸೇಸಂ ಆಪನ್ನಾ ಹೋನ್ತಿ. ತೇ ಸಙ್ಘಾದಿಸೇಸೇ ವೇಮತಿಕಾ ಹೋನ್ತಿ. ಏಕೋ ಛಾದೇತಿ, ಏಕೋ ನಚ್ಛಾದೇತಿ. ಯೋ ಛಾದೇತಿ ಸೋ ದುಕ್ಕಟಂ ದೇಸಾಪೇತಬ್ಬೋ. ಯಥಾಪಟಿಚ್ಛನ್ನೇ ಚಸ್ಸ ಪರಿವಾಸಂ ದತ್ವಾ ಉಭಿನ್ನಮ್ಪಿ ಮಾನತ್ತಂ ದಾತಬ್ಬಂ.

‘‘ದ್ವೇ ಭಿಕ್ಖೂ ಸಙ್ಘಾದಿಸೇಸಂ ಆಪನ್ನಾ ಹೋನ್ತಿ. ತೇ ಸಙ್ಘಾದಿಸೇಸೇ ಮಿಸ್ಸಕದಿಟ್ಠಿನೋ ಹೋನ್ತಿ. ಏಕೋ ಛಾದೇತಿ, ಏಕೋ ನಚ್ಛಾದೇತಿ. ಯೋ ಛಾದೇತಿ ಸೋ ದುಕ್ಕಟಂ ದೇಸಾಪೇತಬ್ಬೋ. ಯಥಾಪಟಿಚ್ಛನ್ನೇ ಚಸ್ಸ ಪರಿವಾಸಂ ದತ್ವಾ ಉಭಿನ್ನಮ್ಪಿ ಮಾನತ್ತಂ ದಾತಬ್ಬಂ.

‘‘ದ್ವೇ ಭಿಕ್ಖೂ ಮಿಸ್ಸಕಂ ಆಪನ್ನಾ ಹೋನ್ತಿ. ತೇ ಮಿಸ್ಸಕೇ ಸಙ್ಘಾದಿಸೇಸದಿಟ್ಠಿನೋ ಹೋನ್ತಿ. ಏಕೋ ಛಾದೇತಿ, ಏಕೋ ನಚ್ಛಾದೇತಿ. ಯೋ ಛಾದೇತಿ ಸೋ ದುಕ್ಕಟಂ ದೇಸಾಪೇತಬ್ಬೋ. ಯಥಾಪಟಿಚ್ಛನ್ನೇ ಚಸ್ಸ ಪರಿವಾಸಂ ದತ್ವಾ ಉಭಿನ್ನಮ್ಪಿ ಮಾನತ್ತಂ ದಾತಬ್ಬಂ.

‘‘ದ್ವೇ ಭಿಕ್ಖೂ ಮಿಸ್ಸಕಂ ಆಪನ್ನಾ ಹೋನ್ತಿ. ತೇ ಮಿಸ್ಸಕೇ ಮಿಸ್ಸಕದಿಟ್ಠಿನೋ ಹೋನ್ತಿ. ಏಕೋ ಛಾದೇತಿ, ಏಕೋ ನಚ್ಛಾದೇತಿ. ಯೋ ಛಾದೇತಿ ಸೋ ದುಕ್ಕಟಂ ದೇಸಾಪೇತಬ್ಬೋ. ಯಥಾಪಟಿಚ್ಛನ್ನೇ ಚಸ್ಸ ಪರಿವಾಸಂ ದತ್ವಾ ಉಭಿನ್ನಮ್ಪಿ ಮಾನತ್ತಂ ದಾತಬ್ಬಂ.

‘‘ದ್ವೇ ಭಿಕ್ಖೂ ಸುದ್ಧಕಂ ಆಪನ್ನಾ ಹೋನ್ತಿ. ತೇ ಸುದ್ಧಕೇ ಸಙ್ಘಾದಿಸೇಸದಿಟ್ಠಿನೋ ಹೋನ್ತಿ. ಏಕೋ ಛಾದೇತಿ, ಏಕೋ ನಚ್ಛಾದೇತಿ. ಯೋ ಛಾದೇತಿ ಸೋ ದುಕ್ಕಟಂ ದೇಸಾಪೇತಬ್ಬೋ. ಉಭೋಪಿ ಯಥಾಧಮ್ಮಂ ಕಾರಾಪೇತಬ್ಬಾ.

‘‘ದ್ವೇ ಭಿಕ್ಖೂ ಸುದ್ಧಕಂ ಆಪನ್ನಾ ಹೋನ್ತಿ. ತೇ ಸುದ್ಧಕೇ ಸುದ್ಧಕದಿಟ್ಠಿನೋ ಹೋನ್ತಿ. ಏಕೋ ಛಾದೇತಿ, ಏಕೋ ನಚ್ಛಾದೇತಿ. ಯೋ ಛಾದೇತಿ ಸೋ ದುಕ್ಕಟಂ ದೇಸಾಪೇತಬ್ಬೋ. ಉಭೋಪಿ ಯಥಾಧಮ್ಮಂ ಕಾರಾಪೇತಬ್ಬಾ.

‘‘ದ್ವೇ ಭಿಕ್ಖೂ ಸಙ್ಘಾದಿಸೇಸಂ ಆಪನ್ನಾ ಹೋನ್ತಿ. ತೇ ಸಙ್ಘಾದಿಸೇಸೇ ಸಙ್ಘಾದಿಸೇಸದಿಟ್ಠಿನೋ ಹೋನ್ತಿ. ಏಕಸ್ಸ ಹೋತಿ ಆರೋಚೇಸ್ಸಾಮೀತಿ, ಏಕಸ್ಸ ಹೋತಿ ನ ಆರೋಚೇಸ್ಸಾಮೀತಿ. ಸೋ ಪಠಮಮ್ಪಿ ಯಾಮಂ ಛಾದೇತಿ, ದುತಿಯಮ್ಪಿ ಯಾಮಂ ಛಾದೇತಿ, ತತಿಯಮ್ಪಿ ಯಾಮಂ ಛಾದೇತಿ – ಉಟ್ಠಿತೇ ಅರುಣೇ ಛನ್ನಾ ಹೋತಿ ಆಪತ್ತಿ. ಯೋ ಛಾದೇತಿ ಸೋ ದುಕ್ಕಟಂ ದೇಸಾಪೇತಬ್ಬೋ. ಯಥಾಪಟಿಚ್ಛನ್ನೇ ಚಸ್ಸ ಪರಿವಾಸಂ ದತ್ವಾ ಉಭಿನ್ನಮ್ಪಿ ಮಾನತ್ತಂ ದಾತಬ್ಬಂ.

‘‘ದ್ವೇ ಭಿಕ್ಖೂ ಸಙ್ಘಾದಿಸೇಸಂ ಆಪನ್ನಾ ಹೋನ್ತಿ. ತೇ ಸಙ್ಘಾದಿಸೇಸೇ ಸಙ್ಘಾದಿಸೇಸದಿಟ್ಠಿನೋ ಹೋನ್ತಿ. ತೇ ಗಚ್ಛನ್ತಿ ಆರೋಚೇಸ್ಸಾಮಾತಿ. ಏಕಸ್ಸ ಅನ್ತರಾಮಗ್ಗೇ ಮಕ್ಖಧಮ್ಮೋ ಉಪ್ಪಜ್ಜತಿ ನ ಆರೋಚೇಸ್ಸಾಮೀತಿ. ಸೋ ಪಠಮಮ್ಪಿ ಯಾಮಂ ಛಾದೇತಿ, ದುತಿಯಮ್ಪಿ ಯಾಮಂ ಛಾದೇತಿ, ತತಿಯಮ್ಪಿ ಯಾಮಂ ಛಾದೇತಿ – ಉಟ್ಠಿತೇ ಅರುಣೇ ಛನ್ನಾ ಹೋತಿ ಆಪತ್ತಿ. ಯೋ ಛಾದೇತಿ ಸೋ ದುಕ್ಕಟಂ ದೇಸಾಪೇತಬ್ಬೋ. ಯಥಾಪಟಿಚ್ಛನ್ನೇ ಚಸ್ಸ ಪರಿವಾಸಂ ದತ್ವಾ ಉಭಿನ್ನಮ್ಪಿ ಮಾನತ್ತಂ ದಾತಬ್ಬಂ.

‘‘ದ್ವೇ ಭಿಕ್ಖೂ ಸಙ್ಘಾದಿಸೇಸಂ ಆಪನ್ನಾ ಹೋನ್ತಿ. ತೇ ಸಙ್ಘಾದಿಸೇಸೇ ಸಙ್ಘಾದಿಸೇಸದಿಟ್ಠಿನೋ ಹೋನ್ತಿ. ತೇ ಉಮ್ಮತ್ತಕಾ ಹೋನ್ತಿ. ತೇ ಪಚ್ಛಾ ಅನುಮ್ಮತ್ತಕಾ ಹುತ್ವಾ ಏಕೋ ಛಾದೇತಿ, ಏಕೋ ನಚ್ಛಾದೇತಿ. ಯೋ ಛಾದೇತಿ ಸೋ ದುಕ್ಕಟಂ ದೇಸಾಪೇತಬ್ಬೋ. ಯಥಾಪಟಿಚ್ಛನ್ನೇ ಚಸ್ಸ ಪರಿವಾಸಂ ದತ್ವಾ ಉಭಿನ್ನಮ್ಪಿ ಮಾನತ್ತಂ ದಾತಬ್ಬಂ.

‘‘ದ್ವೇ ಭಿಕ್ಖೂ ಸಙ್ಘಾದಿಸೇಸಂ ಆಪನ್ನಾ ಹೋನ್ತಿ. ತೇ ಪಾತಿಮೋಕ್ಖೇ ಉದ್ದಿಸ್ಸಮಾನೇ ಏವಂ ವದನ್ತಿ – ‘ಇದಾನೇವ ಖೋ ಮಯಂ ಜಾನಾಮ – ಅಯಮ್ಪಿ ಕಿರ ಧಮ್ಮೋ ಸುತ್ತಾಗತೋ ಸುತ್ತಪರಿಯಾಪನ್ನೋ ಅನ್ವದ್ಧಮಾಸಂ ಉದ್ದೇಸಂ ಆಗಚ್ಛತೀ’ತಿ. ತೇ ಸಙ್ಘಾದಿಸೇಸೇ ಸಙ್ಘಾದಿಸೇಸದಿಟ್ಠಿನೋ ಹೋನ್ತಿ. ಏಕೋ ಛಾದೇತಿ, ಏಕೋ ನಚ್ಛಾದೇತಿ. ಯೋ ಛಾದೇತಿ ಸೋ ದುಕ್ಕಟಂ ದೇಸಾಪೇತಬ್ಬೋ. ಯಥಾಪಟಿಚ್ಛನ್ನೇ ಚಸ್ಸ ಪರಿವಾಸಂ ದತ್ವಾ ಉಭಿನ್ನಮ್ಪಿ ಮಾನತ್ತಂ ದಾತಬ್ಬಂ.

ದ್ವೇಭಿಕ್ಖುವಾರಏಕಾದಸಕಂ ನಿಟ್ಠಿತಂ.