೩. ಚತ್ತಾಲೀಸಕಂ

೧೬೦. ತೇನ ಖೋ ಪನ ಸಮಯೇನ ಅಞ್ಞತರೋ ಭಿಕ್ಖು ಪರಿವಸನ್ತೋ ವಿಬ್ಭಮಿ. ಸೋ ಪುನ ಪಚ್ಚಾಗನ್ತ್ವಾ ಭಿಕ್ಖೂ ಉಪಸಮ್ಪದಂ ಯಾಚಿ. ಭಗವತೋ ಏತಮತ್ಥಂ ಆರೋಚೇಸುಂ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ಪರಿವಸನ್ತೋ ವಿಬ್ಭಮತಿ. ವಿಬ್ಭನ್ತಕಸ್ಸ, ಭಿಕ್ಖವೇ, ಪರಿವಾಸೋ ನ ರುಹತಿ. ಸೋ ಚೇ ಪುನ ಉಪಸಮ್ಪಜ್ಜತಿ, ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪರಿವುತ್ಥೋ ಸುಪರಿವುತ್ಥೋ, ಅವಸೇಸೋ ಪರಿವಸಿತಬ್ಬೋ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ಪರಿವಸನ್ತೋ ಸಾಮಣೇರೋ ಹೋತಿ. ಸಾಮಣೇರಸ್ಸ, ಭಿಕ್ಖವೇ, ಪರಿವಾಸೋ ನ ರುಹತಿ. ಸೋ ಚೇ ಪುನ ಉಪಸಮ್ಪಜ್ಜತಿ, ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪರಿವುತ್ಥೋ ಸುಪರಿವುತ್ಥೋ, ಅವಸೇಸೋ ಪರಿವಸಿತಬ್ಬೋ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ಪರಿವಸನ್ತೋ ಉಮ್ಮತ್ತಕೋ ಹೋತಿ. ಉಮ್ಮತ್ತಕಸ್ಸ, ಭಿಕ್ಖವೇ, ಪರಿವಾಸೋ ನ ರುಹತಿ. ಸೋ ಚೇ ಪುನ ಅನುಮ್ಮತ್ತಕೋ ಹೋತಿ, ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪರಿವುತ್ಥೋ ಸುಪರಿವುತ್ಥೋ, ಅವಸೇಸೋ ಪರಿವಸಿತಬ್ಬೋ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ಪರಿವಸನ್ತೋ ಖಿತ್ತಚಿತ್ತೋ ಹೋತಿ. ಖಿತ್ತಚಿತ್ತಸ್ಸ, ಭಿಕ್ಖವೇ, ಪರಿವಾಸೋ ನ ರುಹತಿ. ಸೋ ಚೇ ಪುನ ಅಖಿತ್ತಚಿತ್ತೋ ಹೋತಿ, ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪುರಿವುತ್ಥೋ ಸುಪರಿವುತ್ಥೋ, ಅವಸೇಸೋ ಪರಿವಸಿತಬ್ಬೋ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ಪರಿವಸನ್ತೋ ವೇದನಾಟ್ಟೋ ಹೋತಿ. ವೇದನಾಟ್ಟಸ್ಸ, ಭಿಕ್ಖವೇ, ಪರಿವಾಸೋ ನ ರುಹತಿ. ಸೋ ಚೇ ಪುನ ಅವೇದನಾಟ್ಟೋ ಹೋತಿ, ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪರಿವುತ್ಥೋ ಸುಪರಿವುತ್ಥೋ, ಅವಸೇಸೋ ಪರಿವಸಿತಬ್ಬೋ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ಪರಿವಸನ್ತೋ, ಆಪತ್ತಿಯಾ ಅದಸ್ಸನೇ, ಉಕ್ಖಿಪಿಯ್ಯತಿ [ಉಕ್ಖಿಪಿಯತಿ (ಸ್ಯಾ.), ಉಕ್ಖಿಪೀಯತಿ (ಕ.)]. ಉಕ್ಖಿತ್ತಕಸ್ಸ, ಭಿಕ್ಖವೇ, ಪರಿವಾಸೋ ನ ರುಹತಿ. ಸೋ ಚೇ ಪುನ ಓಸಾರಿಯ್ಯತಿ [ಓಸಾರಿಯತಿ (ಸ್ಯಾ.), ಓಸಾರೀಯತಿ (ಕ.)], ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪರಿವುತ್ಥೋ ಸುಪರಿವುತ್ಥೋ, ಅವಸೇಸೋ ಪರಿವಸಿತಬ್ಬೋ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ಪರಿವಸನ್ತೋ, ಆಪತ್ತಿಯಾ ಅಪ್ಪಟಿಕಮ್ಮೇ, ಉಕ್ಖಿಪಿಯ್ಯತಿ. ಉಕ್ಖಿತ್ತಕಸ್ಸ, ಭಿಕ್ಖವೇ, ಪರಿವಾಸೋ ನ ರುಹತಿ. ಸೋ ಚೇ ಪುನ ಓಸಾರಿಯ್ಯತಿ, ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪರಿವುತ್ಥೋ ಸುಪರಿವುತ್ಥೋ, ಅವಸೇಸೋ ಪರಿವಸಿತಬ್ಬೋ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ಪರಿವಸನ್ತೋ, ಪಾಪಿಕಾಯ ದಿಟ್ಠಿಯಾ, ಅಪ್ಪಟಿನಿಸ್ಸಗ್ಗೇ, ಉಕ್ಖಿಪಿಯ್ಯತಿ. ಉಕ್ಖಿತ್ತಕಸ್ಸ, ಭಿಕ್ಖವೇ, ಪರಿವಾಸೋ ನ ರುಹತಿ. ಸೋ ಚೇ ಪುನ ಓಸಾರಿಯ್ಯತಿ, ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪರಿವುತ್ಥೋ ಸುಪರಿವುತ್ಥೋ, ಅವಸೇಸೋ ಪರಿವಸಿತಬ್ಬೋ.

೧೬೧. ‘‘ಇಧ ಪನ, ಭಿಕ್ಖವೇ, ಭಿಕ್ಖು ಮೂಲಾಯಪಟಿಕಸ್ಸನಾರಹೋ ವಿಬ್ಭಮತಿ. ವಿಬ್ಭನ್ತಕಸ್ಸ, ಭಿಕ್ಖವೇ, ಮೂಲಾಯಪಟಿಕಸ್ಸನಾ ನ ರುಹತಿ. ಸೋ ಚೇ ಪುನ ಉಪಸಮ್ಪಜ್ಜತಿ, ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪರಿವುತ್ಥೋ ಸುಪರಿವುತ್ಥೋ. ಸೋ ಭಿಕ್ಖು ಮೂಲಾಯ ಪಟಿಕಸ್ಸಿತಬ್ಬೋ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ಮೂಲಾಯಪಟಿಕಸ್ಸನಾರಹೋ ಸಾಮಣೇರೋ ಹೋತಿ…ಪೇ… ಉಮ್ಮತ್ತಕೋ ಹೋತಿ…ಪೇ… ಖಿತ್ತಚಿತ್ತೋ ಹೋತಿ…ಪೇ… ವೇದನಾಟ್ಟೋ ಹೋತಿ…ಪೇ… ಆಪತ್ತಿಯಾ ಅದಸ್ಸನೇ ಉಕ್ಖಿಪಿಯ್ಯತಿ…ಪೇ… ಆಪತ್ತಿಯಾ ಅಪ್ಪಟಿಕಮ್ಮೇ ಉಕ್ಖಿಪಿಯ್ಯತಿ…ಪೇ… ಪಾಪಿಕಾಯ ದಿಟ್ಠಿಯಾ, ಅಪ್ಪಟಿನಿಸ್ಸಗ್ಗೇ, ಉಕ್ಖಿಪಿಯ್ಯತಿ. ಉಕ್ಖಿತ್ತಕಸ್ಸ, ಭಿಕ್ಖವೇ, ಮೂಲಾಯಪಟಿಕಸ್ಸನಾ ನ ರುಹತಿ. ಸೋ ಚೇ ಪುನ ಓಸಾರಿಯ್ಯತಿ, ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪರಿವುತ್ಥೋ ಸುಪರಿವುತ್ಥೋ. ಸೋ ಭಿಕ್ಖು ಮೂಲಾಯ ಪಟಿಕಸ್ಸಿತಬ್ಬೋ.

೧೬೨. ‘‘ಇಧ ಪನ, ಭಿಕ್ಖವೇ, ಭಿಕ್ಖು ಮಾನತ್ತಾರಹೋ ವಿಬ್ಭಮತಿ. ವಿಬ್ಭನ್ತಕಸ್ಸ, ಭಿಕ್ಖವೇ, ಮಾನತ್ತದಾನಂ ನ ರುಹತಿ. ಸೋ ಚೇ ಪುನ ಉಪಸಮ್ಪಜ್ಜತಿ, ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪರಿವುತ್ಥೋ ಸುಪರಿವುತ್ಥೋ. ತಸ್ಸ ಭಿಕ್ಖುನೋ ಮಾನತ್ತಂ ದಾತಬ್ಬಂ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ಮಾನತ್ತಾರಹೋ ಸಾಮಣೇರೋ ಹೋತಿ…ಪೇ… ಉಮ್ಮತ್ತಕೋ ಹೋತಿ…ಪೇ… ಖಿತ್ತಚಿತ್ತೋ ಹೋತಿ…ಪೇ… ವೇದನಾಟ್ಟೋ ಹೋತಿ…ಪೇ… ಆಪತ್ತಿಯಾ ಅದಸ್ಸನೇ, ಉಕ್ಖಿಪಿಯ್ಯತಿ…ಪೇ… ಆಪತ್ತಿಯಾ ಅಪ್ಪಟಿಕಮ್ಮೇ, ಉಕ್ಖಿಪಿಯ್ಯತಿ…ಪೇ… ಪಾಪಿಕಾಯ ದಿಟ್ಠಿಯಾ, ಅಪ್ಪಟಿನಿಸ್ಸಗ್ಗೇ, ಉಕ್ಖಿಪಿಯ್ಯತಿ. ಉಕ್ಖಿತ್ತಕಸ್ಸ, ಭಿಕ್ಖವೇ, ಮಾನತ್ತದಾನಂ ನ ರುಹತಿ. ಸೋ ಚೇ ಪುನ ಓಸಾರಿಯ್ಯತಿ, ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪರಿವುತ್ಥೋ ಸುಪರಿವುತ್ಥೋ. ತಸ್ಸ ಭಿಕ್ಖುನೋ ಮಾನತ್ತಂ ದಾತಬ್ಬಂ.

೧೬೩. ‘‘ಇಧ ಪನ, ಭಿಕ್ಖವೇ, ಭಿಕ್ಖು ಮಾನತ್ತಂ ಚರನ್ತೋ ವಿಬ್ಭಮತಿ. ವಿಬ್ಭನ್ತಕಸ್ಸ, ಭಿಕ್ಖವೇ, ಮಾನತ್ತಚರಿಯಾ ನ ರುಹತಿ. ಸೋ ಚೇ ಪುನ ಉಪಸಮ್ಪಜ್ಜತಿ ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪರಿವುತ್ಥೋ ಸುಪರಿವುತ್ಥೋ; ಯಂ ಮಾನತ್ತಂ ದಿನ್ನಂ ಸುದಿನ್ನಂ, ಯಂ ಮಾನತ್ತಂ ಚಿಣ್ಣಂ ಸುಚಿಣ್ಣಂ, ಅವಸೇಸಂ ಚರಿತಬ್ಬಂ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ಮಾನತ್ತಂ ಚರನ್ತೋ ಸಾಮಣೇರೋ ಹೋತಿ…ಪೇ… ಉಮ್ಮತ್ತಕೋ ಹೋತಿ…ಪೇ… ಖಿತ್ತಚಿತ್ತೋ ಹೋತಿ…ಪೇ… ವೇದನಾಟ್ಟೋ ಹೋತಿ…ಪೇ… ಆಪತ್ತಿಯಾ ಅದಸ್ಸನೇ, ಉಕ್ಖಿಪಿಯ್ಯತಿ…ಪೇ… ಆಪತ್ತಿಯಾ ಅಪ್ಪಟಿಕಮ್ಮೇ, ಉಕ್ಖಿಪಿಯ್ಯತಿ…ಪೇ… ಪಾಪಿಕಾಯ ದಿಟ್ಠಿಯಾ, ಅಪ್ಪಟಿನಿಸ್ಸಗ್ಗೇ, ಉಕ್ಖಿಪಿಯ್ಯತಿ. ಉಕ್ಖಿತ್ತಕಸ್ಸ, ಭಿಕ್ಖವೇ, ಮಾನತ್ತಚರಿಯಾ ನ ರುಹತಿ. ಸೋ ಚೇ ಪುನ ಓಸಾರಿಯ್ಯತಿ, ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪುರಿವುತ್ಥೋ ಸುಪರಿವುತ್ಥೋ; ಯಂ ಮಾನತ್ತಂ ದಿನ್ನಂ ಸುದಿನ್ನಂ, ಯಂ ಮಾನತ್ತಂ ಚಿಣ್ಣಂ ಸುಚಿಣ್ಣಂ, ಅವಸೇಸಂ ಚರಿತಬ್ಬಂ.

೧೬೪. ‘‘ಇಧ ಪನ, ಭಿಕ್ಖವೇ, ಭಿಕ್ಖು ಅಬ್ಭಾನಾರಹೋ ವಿಬ್ಭಮತಿ. ವಿಬ್ಭನ್ತಕಸ್ಸ, ಭಿಕ್ಖವೇ, ಅಬ್ಭಾನಂ ನ ರುಹತಿ. ಸೋ ಚೇ ಪುನ ಉಪಸಮ್ಪಜ್ಜತಿ, ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪರಿವುತ್ಥೋ ಸುಪರಿವುತ್ಥೋ; ಯಂ ಮಾನತ್ತಂ ದಿನ್ನಂ ಸುದಿನ್ನಂ, ಯಂ ಮಾನತ್ತಂ ಚಿಣ್ಣಂ ಸುಚಿಣ್ಣಂ. ಸೋ ಭಿಕ್ಖು ಅಬ್ಭೇತಬ್ಬೋ.

‘‘ಇಧ ಪನ, ಭಿಕ್ಖವೇ, ಭಿಕ್ಖು ಅಬ್ಭಾನಾರಹೋ ಸಾಮಣೇರೋ ಹೋತಿ…ಪೇ… ಉಮ್ಮತ್ತಕೋ ಹೋತಿ…ಪೇ…

ಖಿತ್ತಚಿತ್ತೋ ಹೋತಿ…ಪೇ… ವೇದನಾಟ್ಟೋ ಹೋತಿ…ಪೇ… ಆಪತ್ತಿಯಾ ಅದಸ್ಸನೇ, ಉಕ್ಖಿಪಿಯ್ಯತಿ…ಪೇ… ಆಪತ್ತಿಯಾ ಅಪ್ಪಟಿಕಮ್ಮೇ, ಉಕ್ಖಿಪಿಯ್ಯತಿ…ಪೇ… ಪಾಪಿಕಾಯ ದಿಟ್ಠಿಯಾ, ಅಪ್ಪಟಿನಿಸ್ಸಗ್ಗೇ, ಉಕ್ಖಿಪಿಯ್ಯತಿ. ಉಕ್ಖಿತ್ತಕಸ್ಸ, ಭಿಕ್ಖವೇ, ಅಬ್ಭಾನಂ ನ ರುಹತಿ. ಸೋ ಚೇ ಪುನ ಓಸಾರಿಯ್ಯತಿ, ತಸ್ಸ ತದೇವ ಪುರಿಮಂ ಪರಿವಾಸದಾನಂ. ಯೋ ಪರಿವಾಸೋ ದಿನ್ನೋ ಸುದಿನ್ನೋ, ಯೋ ಪರಿವುತ್ಥೋ ಸುಪರಿವುತ್ಥೋ; ಯಂ ಮಾನತ್ತಂ ದಿನ್ನಂ ಸುದಿನ್ನಂ, ಯಂ ಮಾನತ್ತಂ ಚಿಣ್ಣಂ ಸುಚಿಣ್ಣಂ. ಸೋ ಭಿಕ್ಖು ಅಬ್ಭೇತಬ್ಬೋ.

ಚತ್ತಾಲೀಸಕಂ ಸಮತ್ತಂ.