೫. ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಕಮ್ಮಂ

೪೬. ತೇನ ಸಮಯೇನ ಬುದ್ಧೋ ಭಗವಾ ಕೋಸಮ್ಬಿಯಂ ವಿಹರತಿ ಘೋಸಿತಾರಾಮೇ. ತೇನ ಖೋ ಪನ ಸಮಯೇನ ಆಯಸ್ಮಾ ಛನ್ನೋ ಆಪತ್ತಿಂ ಆಪಜ್ಜಿತ್ವಾ ನ ಇಚ್ಛತಿ ಆಪತ್ತಿಂ ಪಸ್ಸಿತುಂ. ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಆಯಸ್ಮಾ ಛನ್ನೋ ಆಪತ್ತಿಂ ಆಪಜ್ಜಿತ್ವಾ ನ ಇಚ್ಛಿಸ್ಸತಿ ಆಪತ್ತಿಂ ಪಸ್ಸಿತು’’ನ್ತಿ. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ.

ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಭಿಕ್ಖೂ ಪಟಿಪುಚ್ಛಿ – ‘‘ಸಚ್ಚಂ ಕಿರ, ಭಿಕ್ಖವೇ, ಛನ್ನೋ ಭಿಕ್ಖು ಆಪತ್ತಿಂ ಆಪಜ್ಜಿತ್ವಾ ನ ಇಚ್ಛತಿ ಆಪತ್ತಿಂ ಪಸ್ಸಿತು’’ನ್ತಿ? ‘‘ಸಚ್ಚಂ ಭಗವಾ’’ತಿ. ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ…ಪೇ… ಕಥಞ್ಹಿ ನಾಮ ಸೋ, ಭಿಕ್ಖವೇ, ಮೋಘಪುರಿಸೋ ಆಪತ್ತಿಂ ಆಪಜ್ಜಿತ್ವಾ ನ ಇಚ್ಛಿಸ್ಸತಿ ಆಪತ್ತಿಂ ಪಸ್ಸಿತುಂ? ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ…ಪೇ… ವಿಗರಹಿತ್ವಾ…ಪೇ… ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ತೇನ ಹಿ, ಭಿಕ್ಖವೇ, ಸಙ್ಘೋ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೋತು – ಅಸಮ್ಭೋಗಂ ಸಙ್ಘೇನ. ಏವಞ್ಚ ಪನ, ಭಿಕ್ಖವೇ, ಕಾತಬ್ಬಂ – ಪಠಮಂ ಛನ್ನೋ ಭಿಕ್ಖು ಚೋದೇತಬ್ಬೋ, ಚೋದೇತ್ವಾ ಸಾರೇತಬ್ಬೋ, ಸಾರೇತ್ವಾ ಆಪತ್ತಿಂ ಆರೋಪೇತಬ್ಬೋ, ಆಪತ್ತಿಂ ಆರೋಪೇತ್ವಾ ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

೪೭. ‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಛನ್ನೋ ಭಿಕ್ಖು ಆಪತ್ತಿಂ ಆಪಜ್ಜಿತ್ವಾ ನ ಇಚ್ಛತಿ ಆಪತ್ತಿಂ ಪಸ್ಸಿತುಂ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೇಯ್ಯ – ಅಸಮ್ಭೋಗಂ ಸಙ್ಘೇನ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಛನ್ನೋ ಭಿಕ್ಖು ಆಪತ್ತಿಂ ಆಪಜ್ಜಿತ್ವಾ ನ ಇಚ್ಛತಿ ಆಪತ್ತಿಂ ಪಸ್ಸಿತುಂ. ಸಙ್ಘೋ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೋತಿ – ಅಸಮ್ಭೋಗಂ ಸಙ್ಘೇನ. ಯಸ್ಸಾಯಸ್ಮತೋ ಖಮತಿ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಸ್ಸ ಕಮ್ಮಸ್ಸ ಕರಣಂ – ಅಸಮ್ಭೋಗಂ ಸಙ್ಘೇನ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ… ತತಿಯಮ್ಪಿ ಏತಮತ್ಥಂ ವದಾಮಿ – ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಛನ್ನೋ ಭಿಕ್ಖು ಆಪತ್ತಿಂ ಆಪಜ್ಜಿತ್ವಾ ನ ಇಚ್ಛತಿ ಆಪತ್ತಿಂ ಪಸ್ಸಿತುಂ. ಸಙ್ಘೋ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೋತಿ – ಅಸಮ್ಭೋಗಂ ಸಙ್ಘೇನ. ಯಸ್ಸಾಯಸ್ಮತೋ ಖಮತಿ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಸ್ಸ ಕಮ್ಮಸ್ಸ ಕರಣಂ – ಅಸಮ್ಭೋಗಂ ಸಙ್ಘೇನ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಕತಂ ಸಙ್ಘೇನ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ – ಅಸಮ್ಭೋಗಂ ಸಙ್ಘೇನ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀತಿ.

‘‘ಆವಾಸಪರಮ್ಪರಞ್ಚ, ಭಿಕ್ಖವೇ, ಸಂಸಥ – ‘ಛನ್ನೋ ಭಿಕ್ಖು ಸಙ್ಘೇನ ಆಪತ್ತಿಯಾ [ಛನ್ನೋ ಭಿಕ್ಖು ಆಪತ್ತಿಯಾ (ಸೀ. ಕ.)] ಅದಸ್ಸನೇ ಉಕ್ಖೇಪನೀಯಕಮ್ಮಕತೋ – ಅಸಮ್ಭೋಗಂ ಸಙ್ಘೇನಾ’ತಿ.

ಅಧಮ್ಮಕಮ್ಮದ್ವಾದಸಕಂ

೪೮. ‘‘ತೀಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಂ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಅಧಮ್ಮಕಮ್ಮಞ್ಚ ಹೋತಿ, ಅವಿನಯಕಮ್ಮಞ್ಚ, ದುವೂಪಸನ್ತಞ್ಚ. ಅಸಮ್ಮುಖಾ ಕತಂ ಹೋತಿ, ಅಪ್ಪಟಿಪುಚ್ಛಾ ಕತಂ ಹೋತಿ, ಅಪ್ಪಟಿಞ್ಞಾಯ ಕತಂ ಹೋತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಂ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಅಧಮ್ಮಕಮ್ಮಞ್ಚ ಹೋತಿ, ಅವಿನಯಕಮ್ಮಞ್ಚ, ದುವೂಪಸನ್ತಞ್ಚ.

‘‘ಅಪರೇಹಿಪಿ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಂ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಅಧಮ್ಮಕಮ್ಮಞ್ಚ ಹೋತಿ, ಅವಿನಯಕಮ್ಮಞ್ಚ, ದುವೂಪಸನ್ತಞ್ಚ. ಅನಾಪತ್ತಿಯಾ ಕತಂ ಹೋತಿ, ಅದೇಸನಾಗಾಮಿನಿಯಾ ಆಪತ್ತಿಯಾ ಕತಂ ಹೋತಿ, ದೇಸಿತಾಯ ಆಪತ್ತಿಯಾ ಕತಂ ಹೋತಿ…ಪೇ… ಅಚೋದೇತ್ವಾ ಕತಂ ಹೋತಿ, ಅಸಾರೇತ್ವಾ ಕತಂ ಹೋತಿ, ಆಪತ್ತಿಂ ಅನಾರೋಪೇತ್ವಾ ಕತಂ ಹೋತಿ…ಪೇ… ಅಸಮ್ಮುಖಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ಅಪ್ಪಟಿಪುಚ್ಛಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ಅಪ್ಪಟಿಞ್ಞಾಯ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ಅನಾಪತ್ತಿಯಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ಅದೇಸನಾಗಾಮಿನಿಯಾ ಆಪತ್ತಿಯಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ದೇಸಿತಾಯ ಆಪತ್ತಿಯಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ಅಚೋದೇತ್ವಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ಅಸಾರೇತ್ವಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ…ಪೇ… ಆಪತ್ತಿಂ ಅನಾರೋಪೇತ್ವಾ ಕತಂ ಹೋತಿ, ಅಧಮ್ಮೇನ ಕತಂ ಹೋತಿ, ವಗ್ಗೇನ ಕತಂ ಹೋತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಂ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಅಧಮ್ಮಕಮ್ಮಞ್ಚ ಹೋತಿ, ಅವಿನಯಕಮ್ಮಞ್ಚ, ದುವೂಪಸನ್ತಞ್ಚ.

ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಕಮ್ಮೇ ಅಧಮ್ಮಕಮ್ಮದ್ವಾದಸಕಂ ನಿಟ್ಠಿತಂ.

ಧಮ್ಮಕಮ್ಮದ್ವಾದಸಕಂ

೪೯. ‘‘ತೀಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಂ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಧಮ್ಮಕಮ್ಮಞ್ಚ ಹೋತಿ, ವಿನಯಕಮ್ಮಞ್ಚ, ಸುವೂಪಸನ್ತಞ್ಚ. ಸಮ್ಮುಖಾ ಕತಂ ಹೋತಿ, ಪಟಿಪುಚ್ಛಾ ಕತಂ ಹೋತಿ, ಪಟಿಞ್ಞಾಯ ಕತಂ ಹೋತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಂ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಧಮ್ಮಕಮ್ಮಞ್ಚ ಹೋತಿ, ವಿನಯಕಮ್ಮಞ್ಚ, ಸುವೂಪಸನ್ತಞ್ಚ.

‘‘ಅಪರೇಹಿಪಿ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಂ…ಪೇ…. ಆಪತ್ತಿಯಾ ಕತಂ ಹೋತಿ, ದೇಸನಾಗಾಮಿನಿಯಾ ಆಪತ್ತಿಯಾ ಕತಂ ಹೋತಿ, ಅದೇಸಿತಾಯ ಆಪತ್ತಿಯಾ ಕತಂ ಹೋತಿ…ಪೇ… ಚೋದೇತ್ವಾ ಕತಂ ಹೋತಿ, ಸಾರೇತ್ವಾ ಕತಂ ಹೋತಿ, ಆಪತ್ತಿಂ ಆರೋಪೇತ್ವಾ ಕತಂ ಹೋತಿ…ಪೇ… ಸಮ್ಮುಖಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ಪಟಿಪುಚ್ಛಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ಪಟಿಞ್ಞಾಯ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ಆಪತ್ತಿಯಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ದೇಸನಾಗಾಮಿನಿಯಾ ಆಪತ್ತಿಯಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ಅದೇಸಿತಾಯ ಆಪತ್ತಿಯಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ಚೋದೇತ್ವಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ಸಾರೇತ್ವಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ…ಪೇ… ಆಪತ್ತಿಂ ಆರೋಪೇತ್ವಾ ಕತಂ ಹೋತಿ, ಧಮ್ಮೇನ ಕತಂ ಹೋತಿ, ಸಮಗ್ಗೇನ ಕತಂ ಹೋತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಂ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಧಮ್ಮಕಮ್ಮಞ್ಚ ಹೋತಿ, ವಿನಯಕಮ್ಮಞ್ಚ, ಸುವೂಪಸನ್ತಞ್ಚ.

ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಕಮ್ಮೇ ಧಮ್ಮಕಮ್ಮದ್ವಾದಸಕಂ ನಿಟ್ಠಿತಂ.

ಆಕಙ್ಖಮಾನಛಕ್ಕಂ

೫೦. [ಪರಿ. ೩೨೩] ‘‘ತೀಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೇಯ್ಯ. ಭಣ್ಡನಕಾರಕೋ ಹೋತಿ ಕಲಹಕಾರಕೋ ವಿವಾದಕಾರಕೋ ಭಸ್ಸಕಾರಕೋ ಸಙ್ಘೇ ಅಧಿಕರಣಕಾರಕೋ; ಬಾಲೋ ಹೋತಿ ಅಬ್ಯತ್ತೋ ಆಪತ್ತಿಬಹುಲೋ ಅನಪದಾನೋ; ಗಿಹಿಸಂಸಟ್ಠೋ ವಿಹರತಿ ಅನನುಲೋಮಿಕೇಹಿ ಗಿಹಿಸಂಸಗ್ಗೇಹಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೇಯ್ಯ.

‘‘ಅಪರೇಹಿಪಿ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೇಯ್ಯ. ಅಧಿಸೀಲೇ ಸೀಲವಿಪನ್ನೋ ಹೋತಿ, ಅಜ್ಝಾಚಾರೇ ಆಚಾರವಿಪನ್ನೋ ಹೋತಿ, ಅತಿದಿಟ್ಠಿಯಾ ದಿಟ್ಠಿವಿಪನ್ನೋ ಹೋತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೇಯ್ಯ.

‘‘ಅಪರೇಹಿಪಿ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೇಯ್ಯ. ಬುದ್ಧಸ್ಸ ಅವಣ್ಣಂ ಭಾಸತಿ, ಧಮ್ಮಸ್ಸ ಅವಣ್ಣಂ ಭಾಸತಿ, ಸಙ್ಘಸ್ಸ ಅವಣ್ಣಂ ಭಾಸತಿ – ಇಮೇಹಿ ಖೋ, ಭಿಕ್ಖವೇ, ತೀಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಕಙ್ಖಮಾನೋ ಸಙ್ಘೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೇಯ್ಯ.

‘‘ತಿಣ್ಣಂ, ಭಿಕ್ಖವೇ, ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೇಯ್ಯ. ಏಕೋ ಭಣ್ಡನಕಾರಕೋ ಹೋತಿ ಕಲಹಕಾರಕೋ ವಿವಾದಕಾರಕೋ ಭಸ್ಸಕಾರಕೋ ಸಙ್ಘೇ ಅಧಿಕರಣಕಾರಕೋ; ಏಕೋ ಬಾಲೋ ಹೋತಿ ಅಬ್ಯತ್ತೋ ಆಪತ್ತಿಬಹುಲೋ ಅನಪದಾನೋ; ಏಕೋ ಗಿಹಿಸಂಸಟ್ಠೋ ವಿಹರತಿ ಅನನುಲೋಮಿಕೇಹಿ ಗಿಹಿಸಂಸಗ್ಗೇಹಿ – ಇಮೇಸಂ ಖೋ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೇಯ್ಯ.

‘‘ಅಪರೇಸಮ್ಪಿ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೇಯ್ಯ. ಏಕೋ ಅಧಿಸೀಲೇ ಸೀಲವಿಪನ್ನೋ ಹೋತಿ, ಏಕೋ ಅಜ್ಝಾಚಾರೇ ಆಚಾರವಿಪನ್ನೋ ಹೋತಿ, ಏಕೋ ಅತಿದಿಟ್ಠಿಯಾ ದಿಟ್ಠಿವಿಪನ್ನೋ ಹೋತಿ – ಇಮೇಸಂ ಖೋ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೇಯ್ಯ.

‘‘ಅಪರೇಸಮ್ಪಿ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೇಯ್ಯ. ಏಕೋ ಬುದ್ಧಸ್ಸ ಅವಣ್ಣಂ ಭಾಸತಿ, ಏಕೋ ಧಮ್ಮಸ್ಸ ಅವಣ್ಣಂ ಭಾಸತಿ, ಏಕೋ ಸಙ್ಘಸ್ಸ ಅವಣ್ಣಂ ಭಾಸತಿ – ಇಮೇಸಂ ಖೋ, ಭಿಕ್ಖವೇ, ತಿಣ್ಣಂ ಭಿಕ್ಖೂನಂ, ಆಕಙ್ಖಮಾನೋ ಸಙ್ಘೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕರೇಯ್ಯ.

ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಕಮ್ಮೇ

ಆಕಙ್ಖಮಾನಛಕ್ಕಂ ನಿಟ್ಠಿತಂ.

ತೇಚತ್ತಾಲೀಸವತ್ತಂ

೫೧. ‘‘ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಕಮ್ಮಕತೇನ, ಭಿಕ್ಖವೇ, ಭಿಕ್ಖುನಾ ಸಮ್ಮಾ ವತ್ತಿತಬ್ಬಂ. ತತ್ರಾಯಂ ಸಮ್ಮಾವತ್ತನಾ – ನ ಉಪಸಮ್ಪಾದೇತಬ್ಬಂ, ನ ನಿಸ್ಸಯೋ ದಾತಬ್ಬೋ, ನ ಸಾಮಣೇರೋ ಉಪಟ್ಠಾಪೇತಬ್ಬೋ, ನ ಭಿಕ್ಖುನೋವಾದಕಸಮ್ಮುತಿ ಸಾದಿತಬ್ಬಾ, ಸಮ್ಮತೇನಪಿ ಭಿಕ್ಖುನಿಯೋ ನ ಓವದಿತಬ್ಬಾ. ಯಾಯ ಆಪತ್ತಿಯಾ ಸಙ್ಘೇನ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕತಂ ಹೋತಿ ಸಾ ಆಪತ್ತಿ ನ ಆಪಜ್ಜಿತಬ್ಬಾ, ಅಞ್ಞಾ ವಾ ತಾದಿಸಿಕಾ, ತತೋ ವಾ ಪಾಪಿಟ್ಠತರಾ; ಕಮ್ಮಂ ನ ಗರಹಿತಬ್ಬಂ, ಕಮ್ಮಿಕಾ ನ ಗರಹಿತಬ್ಬಾ. ನ ಪಕತತ್ತಸ್ಸ ಭಿಕ್ಖುನೋ ಅಭಿವಾದನಂ, ಪಚ್ಚುಟ್ಠಾನಂ, ಅಞ್ಜಲಿಕಮ್ಮಂ, ಸಾಮೀಚಿಕಮ್ಮಂ, ಆಸನಾಭಿಹಾರೋ, ಸೇಯ್ಯಾಭಿಹಾರೋ, ಪಾದೋದಕಂ, ಪಾದಪೀಠಂ ಪಾದಕಥಲಿಕಂ, ಪತ್ತಚೀವರಪ್ಪಟಿಗ್ಗಹಣಂ, ನಹಾನೇ ಪಿಟ್ಠಿಪರಿಕಮ್ಮಂ ಸಾದಿತಬ್ಬಂ. ನ ಪಕತತ್ತೋ ಭಿಕ್ಖು ಸೀಲವಿಪತ್ತಿಯಾ ಅನುದ್ಧಂಸೇತಬ್ಬೋ, ನ ಆಚಾರವಿಪತ್ತಿಯಾ ಅನುದ್ಧಂಸೇತಬ್ಬೋ, ನ ದಿಟ್ಠಿವಿಪತ್ತಿಯಾ ಅನುದ್ಧಂಸೇತಬ್ಬೋ, ನ ಆಜೀವವಿಪತ್ತಿಯಾ ಅನುದ್ಧಂಸೇತಬ್ಬೋ, ನ ಭಿಕ್ಖು ಭಿಕ್ಖೂಹಿ ಭೇದೇತಬ್ಬೋ [ನ ಭಿಕ್ಖೂ ಭಿಕ್ಖೂಹಿ ಭೇದೇತಬ್ಬಾ (ಸ್ಯಾ.)], ನ ಗಿಹಿದ್ಧಜೋ ಧಾರೇತಬ್ಬೋ, ನ ತಿತ್ಥಿಯದ್ಧಜೋ ಧಾರೇತಬ್ಬೋ, ನ ತಿತ್ಥಿಯಾ ಸೇವಿತಬ್ಬಾ; ಭಿಕ್ಖೂ ಸೇವಿತಬ್ಬಾ, ಭಿಕ್ಖುಸಿಕ್ಖಾಯ ಸಿಕ್ಖಿತಬ್ಬಂ [ಭಿಕ್ಖುಸಿಕ್ಖಾ ಸಿಕ್ಖಿತಬ್ಬಾ (ಸ್ಯಾ.)]. ನ ಪಕತತ್ತೇನ ಭಿಕ್ಖುನಾ ಸದ್ಧಿಂ ಏಕಚ್ಛನ್ನೇ ಆವಾಸೇ ವತ್ಥಬ್ಬಂ, ನ ಏಕಚ್ಛನ್ನೇ ಅನಾವಾಸೇ ವತ್ಥಬ್ಬಂ, ನ ಏಕಚ್ಛನ್ನೇ ಆವಾಸೇ ವಾ ಅನಾವಾಸೇ ವಾ ವತ್ಥಬ್ಬಂ, ಪಕತತ್ತಂ ಭಿಕ್ಖುಂ ದಿಸ್ವಾ ಆಸನಾ ವುಟ್ಠಾತಬ್ಬಂ, ನ ಪಕತತ್ತೋ ಭಿಕ್ಖು ಆಸಾದೇತಬ್ಬೋ ಅನ್ತೋ ವಾ ಬಹಿ ವಾ. ನ ಪಕತತ್ತಸ್ಸ ಭಿಕ್ಖುನೋ ಉಪೋಸಥೋ ಠಪೇತಬ್ಬೋ, ನ ಪವಾರಣಾ ಠಪೇತಬ್ಬಾ, ನ ಸವಚನೀಯಂ ಕಾತಬ್ಬಂ, ನ ಅನುವಾದೋ ಪಟ್ಠಪೇತಬ್ಬೋ, ನ ಓಕಾಸೋ ಕಾರೇತಬ್ಬೋ, ನ ಚೋದೇತಬ್ಬೋ, ನ ಸಾರೇತಬ್ಬೋ, ನ ಭಿಕ್ಖೂಹಿ ಸಮ್ಪಯೋಜೇತಬ್ಬ’’ನ್ತಿ.

ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಕಮ್ಮೇ

ತೇಚತ್ತಾಲೀಸವತ್ತಂ ನಿಟ್ಠಿತಂ.

೫೨. ಅಥ ಖೋ ಸಙ್ಘೋ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಅಕಾಸಿ – ಅಸಮ್ಭೋಗಂ ಸಙ್ಘೇನ. ಸೋ ಸಙ್ಘೇನ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಕತೋ ತಮ್ಹಾ ಆವಾಸಾ ಅಞ್ಞಂ ಆವಾಸಂ ಅಗಮಾಸಿ. ತತ್ಥ ಭಿಕ್ಖೂ ನೇವ ಅಭಿವಾದೇಸುಂ, ನ ಪಚ್ಚುಟ್ಠೇಸುಂ, ನ ಅಞ್ಜಲಿಕಮ್ಮಂ ನ ಸಾಮೀಚಿಕಮ್ಮಂ ಅಕಂಸು, ನ ಸಕ್ಕರಿಂಸು, ನ ಗರು ಕರಿಂಸು [ನ ಗರುಕರಿಂಸು (ಕ.)], ನ ಮಾನೇಸುಂ, ನ ಪೂಜೇಸುಂ. ಸೋ ಭಿಕ್ಖೂಹಿ ಅಸಕ್ಕರಿಯಮಾನೋ ಅಗರುಕರಿಯಮಾನೋ ಅಮಾನಿಯಮಾನೋ ಅಪೂಜಿಯಮಾನೋ ಅಸಕ್ಕಾರಪಕತೋ ತಮ್ಹಾಪಿ ಆವಾಸಾ ಅಞ್ಞಂ ಆವಾಸಂ ಅಗಮಾಸಿ. ತತ್ಥಪಿ ಭಿಕ್ಖೂ ನೇವ ಅಭಿವಾದೇಸುಂ, ನ ಪಚ್ಚುಟ್ಠೇಸುಂ, ನ ಅಞ್ಜಲಿಕಮ್ಮಂ ನ ಸಾಮೀಚಿಕಮ್ಮಂ ಅಕಂಸು, ನ ಸಕ್ಕರಿಂಸು, ನ ಗರುಂ ಕರಿಂಸು, ನ ಮಾನೇಸುಂ, ನ ಪೂಜೇಸುಂ. ಸೋ ಭಿಕ್ಖೂಹಿ ಅಸಕ್ಕರಿಯಮಾನೋ ಅಗರುಕರಿಯಮಾನೋ ಅಮಾನಿಯಮಾನೋ ಅಪೂಜಿಯಮಾನೋ ಅಸಕ್ಕಾರಪಕತೋ ತಮ್ಹಾಪಿ ಆವಾಸಾ ಅಞ್ಞಂ ಆವಾಸಂ ಅಗಮಾಸಿ. ತತ್ಥಪಿ ಭಿಕ್ಖೂ ನೇವ ಅಭಿವಾದೇಸುಂ, ನ ಪಚ್ಚುಟ್ಠೇಸುಂ, ನ ಅಞ್ಜಲಿಕಮ್ಮಂ ನ ಸಾಮೀಚಿಕಮ್ಮಂ ಅಕಂಸು, ನ ಸಕ್ಕರಿಂಸು, ನ ಗರುಂ ಕರಿಂಸು, ನ ಮಾನೇಸುಂ, ನ ಪೂಜೇಸುಂ. ಸೋ ಭಿಕ್ಖೂಹಿ ಅಸಕ್ಕರಿಯಮಾನೋ ಅಗರುಕರಿಯಮಾನೋ ಅಮಾನಿಯಮಾನೋ ಅಪೂಜಿಯಮಾನೋ ಅಸಕ್ಕಾರಪಕತೋ ಪುನದೇವ ಕೋಸಮ್ಬಿಂ ಪಚ್ಚಾಗಞ್ಛಿ. ಸೋ ಸಮ್ಮಾ ವತ್ತತಿ, ಲೋಮಂ ಪಾತೇತಿ, ನೇತ್ಥಾರಂ ವತ್ತತಿ, ಭಿಕ್ಖೂ ಉಪಸಙ್ಕಮಿತ್ವಾ ಏವಂ ವದೇತಿ – ‘‘ಅಹಂ, ಆವುಸೋ, ಸಙ್ಘೇನ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಕತೋ ಸಮ್ಮಾ ವತ್ತಾಮಿ, ಲೋಮಂ ಪಾತೇಮಿ, ನೇತ್ಥಾರಂ ವತ್ತಾಮಿ. ಕಥಂ ನು ಖೋ ಮಯಾ ಪಟಿಪಜ್ಜಿತಬ್ಬ’’ನ್ತಿ? ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ…ಪೇ…. ‘‘ತೇನ ಹಿ, ಭಿಕ್ಖವೇ, ಸಙ್ಘೋ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತು.

ನಪ್ಪಟಿಪ್ಪಸ್ಸಮ್ಭೇತಬ್ಬ-ತೇಚತ್ತಾಲೀಸಕಂ

೫೩. ‘‘ಪಞ್ಚಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ. ಉಪಸಮ್ಪಾದೇತಿ, ನಿಸ್ಸಯಂ ದೇತಿ, ಸಾಮಣೇರಂ ಉಪಟ್ಠಾಪೇತಿ, ಭಿಕ್ಖುನೋವಾದಕಸಮ್ಮುತಿಂ ಸಾದಿಯತಿ, ಸಮ್ಮತೋಪಿ ಭಿಕ್ಖುನಿಯೋ ಓವದತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ.

[ಪರಿ. ೪೨೦] ‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ. ಯಾಯ ಆಪತ್ತಿಯಾ ಸಙ್ಘೇನ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಕತಂ ಹೋತಿ ತಂ ಆಪತ್ತಿಂ ಆಪಜ್ಜತಿ, ಅಞ್ಞಂ ವಾ ತಾದಿಸಿಕಂ, ತತೋ ವಾ ಪಾಪಿಟ್ಠತರಂ; ಕಮ್ಮಂ ಗರಹತಿ, ಕಮ್ಮಿಕೇ ಗರಹತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ. ಪಕತತ್ತಸ್ಸ ಭಿಕ್ಖುನೋ ಅಭಿವಾದನಂ, ಪಚ್ಚುಟ್ಠಾನಂ, ಅಞ್ಜಲಿಕಮ್ಮಂ, ಸಾಮೀಚಿಕಮ್ಮಂ, ಆಸನಾಭಿಹಾರಂ ಸಾದಿಯತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ. ಪಕತತ್ತಸ್ಸ ಭಿಕ್ಖುನೋ ಸೇಯ್ಯಾಭಿಹಾರಂ, ಪಾದೋದಕಂ ಪಾದಪೀಠಂ, ಪಾದಕಥಲಿಕಂ, ಪತ್ತಚೀವರಪ್ಪಟಿಗ್ಗಹಣಂ, ನಹಾನೇ ಪಿಟ್ಠಿಪರಿಕಮ್ಮಂ ಸಾದಿಯತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ. ಪಕತತ್ತಂ ಭಿಕ್ಖುಂ ಸೀಲವಿಪತ್ತಿಯಾ ಅನುದ್ಧಂಸೇತಿ, ಆಚಾರವಿಪತ್ತಿಯಾ ಅನುದ್ಧಂಸೇತಿ, ದಿಟ್ಠಿವಿಪತ್ತಿಯಾ ಅನುದ್ಧಂಸೇತಿ, ಆಜೀವವಿಪತ್ತಿಯಾ ಅನುದ್ಧಂಸೇತಿ, ಭಿಕ್ಖುಂ [ಭಿಕ್ಖೂ (ಸೀ. ಸ್ಯಾ.)] ಭಿಕ್ಖೂಹಿ ಭೇದೇತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ. ಗಿಹಿದ್ಧಜಂ ಧಾರೇತಿ, ತಿತ್ಥಿಯದ್ಧಜಂ ಧಾರೇತಿ, ತಿತ್ಥಿಯೇ ಸೇವತಿ; ಭಿಕ್ಖೂ ನ ಸೇವತಿ, ಭಿಕ್ಖುಸಿಕ್ಖಾಯ ನ ಸಿಕ್ಖತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ. ಪಕತತ್ತೇನ ಭಿಕ್ಖುನಾ ಸದ್ಧಿಂ ಏಕಚ್ಛನ್ನೇ ಆವಾಸೇ ವಸತಿ, ಏಕಚ್ಛನ್ನೇ ಅನಾವಾಸೇ ವಸತಿ, ಏಕಚ್ಛನ್ನೇ ಆವಾಸೇ ವಾ ಅನಾವಾಸೇ ವಾ ವಸತಿ; ಪಕತತ್ತಂ ಭಿಕ್ಖುಂ ದಿಸ್ವಾ ಆಸನಾ ನ ವುಟ್ಠಾತಿ; ಪಕತತ್ತಂ ಭಿಕ್ಖುಂ ಆಸಾದೇತಿ ಅನ್ತೋ ವಾ ಬಹಿ ವಾ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಟ್ಠಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ. ಪಕತತ್ತಸ್ಸ ಭಿಕ್ಖುನೋ ಉಪೋಸಥಂ ಠಪೇತಿ, ಪವಾರಣಂ ಠಪೇತಿ, ಸವಚನೀಯಂ ಕರೋತಿ, ಅನುವಾದಂ ಪಟ್ಠಪೇತಿ, ಓಕಾಸಂ ಕಾರೇತಿ, ಚೋದೇತಿ, ಸಾರೇತಿ, ಭಿಕ್ಖೂಹಿ ಸಮ್ಪಯೋಜೇತಿ – ಇಮೇಹಿ ಖೋ, ಭಿಕ್ಖವೇ, ಅಟ್ಠಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ನಪ್ಪಟಿಪ್ಪಸ್ಸಮ್ಭೇತಬ್ಬಂ.

ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಕಮ್ಮೇ

ನಪ್ಪಟಿಪ್ಪಸ್ಸಮ್ಭೇತಬ್ಬ-ತೇಚತ್ತಾಲೀಸಕಂ ನಿಟ್ಠಿತಂ.

ಪಟಿಪ್ಪಸ್ಸಮ್ಭೇತಬ್ಬ-ತೇಚತ್ತಾಲೀಸಕಂ

೫೪. ‘‘ಪಞ್ಚಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ. ನ ಉಪಸಮ್ಪಾದೇತಿ, ನ ನಿಸ್ಸಯಂ ದೇತಿ, ನ ಸಾಮಣೇರಂ ಉಪಟ್ಠಾಪೇತಿ, ನ ಭಿಕ್ಖುನೋವಾದಕಸಮ್ಮುತಿಂ ಸಾದಿಯತಿ, ಸಮ್ಮತೋಪಿ ಭಿಕ್ಖುನಿಯೋ ನ ಓವದತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ. ಯಾಯ ಆಪತ್ತಿಯಾ ಸಙ್ಘೇನ ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಕಮ್ಮಂ ಕತಂ ಹೋತಿ ತಂ ಆಪತ್ತಿಂ ನ ಆಪಜ್ಜತಿ, ಅಞ್ಞಂ ವಾ ತಾದಿಸಿಕಂ, ತತೋ ವಾ ಪಾಪಿಟ್ಠತರಂ; ಕಮ್ಮಂ ನ ಗರಹತಿ, ಕಮ್ಮಿಕೇ ನ ಗರಹತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ. ನ ಪಕತತ್ತಸ್ಸ ಭಿಕ್ಖುನೋ ಅಭಿವಾದನಂ, ಪಚ್ಚುಟ್ಠಾನಂ, ಅಞ್ಜಲಿಕಮ್ಮಂ, ಸಾಮೀಚಿಕಮ್ಮಂ, ಆಸನಾಭಿಹಾರಂ ಸಾದಿಯತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ. ನ ಪಕತತ್ತಸ್ಸ ಭಿಕ್ಖುನೋ ಸೇಯ್ಯಾಭಿಹಾರಂ, ಪಾದೋದಕಂ ಪಾದಪೀಠಂ, ಪಾದಕಥಲಿಕಂ, ಪತ್ತಚೀವರಪ್ಪಟಿಗ್ಗಹಣಂ, ನಹಾನೇ ಪಿಟ್ಠಿಪರಿಕಮ್ಮಂ ಸಾದಿಯತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ. ನ ಪಕತತ್ತಂ ಭಿಕ್ಖುಂ ಸೀಲವಿಪತ್ತಿಯಾ ಅನುದ್ಧಂಸೇತಿ, ನ ಆಚಾರವಿಪತ್ತಿಯಾ ಅನುದ್ಧಂಸೇತಿ, ನ ದಿಟ್ಠಿವಿಪತ್ತಿಯಾ ಅನುದ್ಧಂಸೇತಿ, ನ ಆಜೀವವಿಪತ್ತಿಯಾ ಅನುದ್ಧಂಸೇತಿ, ನ ಭಿಕ್ಖುಂ ಭಿಕ್ಖೂಹಿ ಭೇದೇತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ. ನ ಗಿಹಿದ್ಧಜಂ ಧಾರೇತಿ, ನ ತಿತ್ಥಿಯದ್ಧಜಂ ಧಾರೇತಿ, ನ ತಿತ್ಥಿಯೇ ಸೇವತಿ, ಭಿಕ್ಖೂ ಸೇವತಿ, ಭಿಕ್ಖುಸಿಕ್ಖಾಯ ಸಿಕ್ಖತಿ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಪರೇಹಿಪಿ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ. ನ ಪಕತತ್ತೇನ ಭಿಕ್ಖುನಾ ಸದ್ಧಿಂ ಏಕಚ್ಛನ್ನೇ ಆವಾಸೇ ವಸತಿ, ನ ಏಕಚ್ಛನ್ನೇ ಅನಾವಾಸೇ ವಸತಿ, ನ ಏಕಚ್ಛನ್ನೇ ಆವಾಸೇ ವಾ ಅನಾವಾಸೇ ವಾ ವಸತಿ, ಪಕತತ್ತಂ ಭಿಕ್ಖುಂ ದಿಸ್ವಾ ಆಸನಾ ವುಟ್ಠಾತಿ, ನ ಪಕತತ್ತಂ ಭಿಕ್ಖುಂ ಆಸಾದೇತಿ ಅನ್ತೋ ವಾ ಬಹಿ ವಾ – ಇಮೇಹಿ ಖೋ, ಭಿಕ್ಖವೇ, ಪಞ್ಚಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ.

‘‘ಅಟ್ಠಹಿ, ಭಿಕ್ಖವೇ, ಅಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ. ನ ಪಕತತ್ತಸ್ಸ ಭಿಕ್ಖುನೋ ಉಪೋಸಥಂ ಠಪೇತಿ, ನ ಪವಾರಣಂ ಠಪೇತಿ, ನ ಸವಚನೀಯಂ ಕರೋತಿ, ನ ಅನುವಾದಂ ಪಟ್ಠಪೇತಿ, ನ ಓಕಾಸಂ ಕಾರೇತಿ, ನ ಚೋದೇತಿ, ನ ಸಾರೇತಿ, ನ ಭಿಕ್ಖೂಹಿ ಸಮ್ಪಯೋಜೇತಿ – ಇಮೇಹಿ ಖೋ, ಭಿಕ್ಖವೇ, ಅಟ್ಠಹಙ್ಗೇಹಿ ಸಮನ್ನಾಗತಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಬ್ಬಂ.

ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಕಮ್ಮೇ

ಪಟಿಪ್ಪಸ್ಸಮ್ಭೇತಬ್ಬತೇಚತ್ತಾಲೀಸಕಂ ನಿಟ್ಠಿತಂ.

೫೫. ‘‘ಏವಞ್ಚ ಪನ, ಭಿಕ್ಖವೇ, ಪಟಿಪ್ಪಸ್ಸಮ್ಭೇತಬ್ಬಂ. ತೇನ, ಭಿಕ್ಖವೇ, ಛನ್ನೇನ ಭಿಕ್ಖುನಾ ಸಙ್ಘಂ ಉಪಸಙ್ಕಮಿತ್ವಾ ಏಕಂಸಂ ಉತ್ತರಾಸಙ್ಗಂ ಕರಿತ್ವಾ ವುಡ್ಢಾನಂ ಭಿಕ್ಖೂನಂ ಪಾದೇ ವನ್ದಿತ್ವಾ ಉಕ್ಕುಟಿಕಂ ನಿಸೀದಿತ್ವಾ ಅಞ್ಜಲಿಂ ಪಗ್ಗಹೇತ್ವಾ ಏವಮಸ್ಸ ವಚನೀಯೋ – ‘ಅಹಂ, ಭನ್ತೇ, ಸಙ್ಘೇನ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಕತೋ ಸಮ್ಮಾ ವತ್ತಾಮಿ, ಲೋಮಂ ಪಾತೇಮಿ, ನೇತ್ಥಾರಂ ವತ್ತಾಮಿ, ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿಂ ಯಾಚಾಮೀ’ತಿ. ದುತಿಯಮ್ಪಿ ಯಾಚಿತಬ್ಬಾ. ತತಿಯಮ್ಪಿ ಯಾಚಿತಬ್ಬಾ. ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಛನ್ನೋ ಭಿಕ್ಖು ಸಙ್ಘೇನ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಕತೋ ಸಮ್ಮಾ ವತ್ತತಿ, ಲೋಮಂ ಪಾತೇತಿ, ನೇತ್ಥಾರಂ ವತ್ತತಿ, ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿಂ ಯಾಚತಿ. ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇಯ್ಯ. ಏಸಾ ಞತ್ತಿ.

‘‘ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಛನ್ನೋ ಭಿಕ್ಖು ಸಙ್ಘೇನ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಕತೋ ಸಮ್ಮಾ ವತ್ತತಿ, ಲೋಮಂ ಪಾತೇತಿ, ನೇತ್ಥಾರಂ ವತ್ತತಿ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿಂ ಯಾಚತಿ. ಸಙ್ಘೋ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಿ. ಯಸ್ಸಾಯಸ್ಮತೋ ಖಮತಿ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ದುತಿಯಮ್ಪಿ ಏತಮತ್ಥಂ ವದಾಮಿ…ಪೇ… ತತಿಯಮ್ಪಿ ಏತಮತ್ಥಂ ವದಾಮಿ – ಸುಣಾತು ಮೇ, ಭನ್ತೇ, ಸಙ್ಘೋ. ಅಯಂ ಛನ್ನೋ ಭಿಕ್ಖು ಸಙ್ಘೇನ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಕತೋ ಸಮ್ಮಾ ವತ್ತತಿ, ಲೋಮಂ ಪಾತೇತಿ, ನೇತ್ಥಾರಂ ವತ್ತತಿ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿಂ ಯಾಚತಿ. ಸಙ್ಘೋ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ ಪಟಿಪ್ಪಸ್ಸಮ್ಭೇತಿ. ಯಸ್ಸಾಯಸ್ಮತೋ ಖಮತಿ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಸ್ಸ ಕಮ್ಮಸ್ಸ ಪಟಿಪ್ಪಸ್ಸದ್ಧಿ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ.

‘‘ಪಟಿಪ್ಪಸ್ಸದ್ಧಂ ಸಙ್ಘೇನ ಛನ್ನಸ್ಸ ಭಿಕ್ಖುನೋ, ಆಪತ್ತಿಯಾ ಅದಸ್ಸನೇ, ಉಕ್ಖೇಪನೀಯಕಮ್ಮಂ. ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ.

ಆಪತ್ತಿಯಾ ಅದಸ್ಸನೇ ಉಕ್ಖೇಪನೀಯಕಮ್ಮಂ ನಿಟ್ಠಿತಂ ಪಞ್ಚಮಂ.