೧೧. ಏಕಾದಸಮನಯೋ ಸಙ್ಗಹಿತೇನಸಮ್ಪಯುತ್ತವಿಪ್ಪಯುತ್ತಪದವಣ್ಣನಾ

೪೦೯. ತೇತಿ ಸಙ್ಖಾರಕ್ಖನ್ಧಧಮ್ಮಾ. ಸೇಸೇಹೀತಿ ಅವಸಿಟ್ಠೇಹಿ ವೇದನಾಸಞ್ಞಾವಿಞ್ಞಾಣಕ್ಖನ್ಧೇಹಿ. ‘‘ಏತೇನ ಸಹ ಸಮ್ಬನ್ಧೋ’’ತಿ ಇಮಿನಾ ಪದಾನಂ ಸಮ್ಬನ್ಧದಸ್ಸನಮುಖೇನ ‘‘ಸಮುದಯಸಚ್ಚೇನ ಯೇ ಧಮ್ಮಾ ಸಮ್ಪಯುತ್ತಾ’’ತಿ ಪಾಳಿಯಾ ಅತ್ಥವಿವರಣಂ ಪಾಕಟತರಂ ಕತ್ವಾ ಕೇಹಿಚೀತಿಪದಸ್ಸತ್ಥಂ ಕಾತುಂ ‘‘ಕೇಹಿಚೀತಿ ಏತಸ್ಸ ಪನಾ’’ತಿಆದಿಮಾಹ. ಅತ್ಥಂ ದಸ್ಸೇತುಂ ಆಹಾತಿ ಸಮ್ಬನ್ಧೋ. ವಿಸೇಸೇತ್ವಾತಿ ಏತ್ಥ ತೇಸಂ ಧಮ್ಮಾನಂ ತಣ್ಹಾವಜ್ಜಾನಂ ಸಙ್ಖಾರಕ್ಖನ್ಧಧಮ್ಮಾಯತನಧಮ್ಮಧಾತುಪರಿಯಾಪನ್ನತಾಕಿತ್ತನಂ ವಿಸೇಸನಂ ದಟ್ಠಬ್ಬಂ, ಯತೋ ತೇ ಸಮುದಯಸಚ್ಚೇನ ಖನ್ಧಾದಿಸಙ್ಗಹೇನ ಸಙ್ಗಹಿತಾತಿ ವುತ್ತಾ. ಸಯಂ ಅತ್ತನಾ ಸಮ್ಪಯುತ್ತೋ ನ ಹೋತೀತಿ ವುತ್ತಂ ‘‘ಅತ್ತವಜ್ಜೇಹೀ’’ತಿ. ತೇನ ವುತ್ತಂ ‘‘ಚಿತ್ತಂ ನ ವತ್ತಬ್ಬಂ ಚಿತ್ತೇನ ಸಮ್ಪಯುತ್ತನ್ತಿಪಿ, ಚಿತ್ತೇನ ವಿಪ್ಪಯುತ್ತನ್ತಿಪೀ’’ತಿ. ಸಮ್ಪಯೋಗಾರಹೇಹೀತಿ ವಿಸೇಸನಂ ಸುಖುಮರೂಪಂ ನಿಬ್ಬಾನನ್ತಿ ದ್ವೇ ಸನ್ಧಾಯ ಕತಂ, ನ ತಣ್ಹಾದಿಕೇ.

ಏಕಾದಸಮನಯಸಙ್ಗಹಿತೇನಸಮ್ಪಯುತ್ತವಿಪ್ಪಯುತ್ತಪದವಣ್ಣನಾ ನಿಟ್ಠಿತಾ.