೫. ಚಿತ್ತಾಗಾರವಗ್ಗವಣ್ಣನಾ

೯೭೮. ಚಿತ್ತಾಗಾರವಗ್ಗಸ್ಸ ಪಠಮೇ ಕೀಳನಉಪವನನ್ತಿ ಅನ್ತೋನಗರೇ ಠಿತಂ ಸನ್ಧಾಯ ವುತ್ತಂ, ಕೀಳನುಯ್ಯಾನನ್ತಿ ಬಹಿನಗರೇ ಠಿತಂ ಸನ್ಧಾಯ. ಪಾಟೇಕ್ಕಾ ಆಪತ್ತಿಯೋತಿ ಗೀವಾಯ ಪರಿವಟ್ಟನಪ್ಪಯೋಗಗಣನಾಯ ಆಪತ್ತಿಯೋ, ನ ಉಮ್ಮೀಲನಗಣನಾಯ. ‘‘ಅಜ್ಝಾರಾಮೇ ರಾಜಾಗಾರಾದೀನಿ ಕರೋನ್ತಿ, ತಾನಿ ಪಸ್ಸನ್ತಿಯಾ ಅನಾಪತ್ತೀ’’ತಿ ವಚನತೋ ‘‘ಅನ್ತೋಆರಾಮೇ ತತ್ಥ ತತ್ಥ ಗನ್ತ್ವಾ ನಚ್ಚಾದೀನಿ ಪಸ್ಸಿತುಂ ಲಭತೀ’’ತಿಪಿ ಸಿದ್ಧಂ.

೯೮೨. ದುತಿಯಾದೀನಿ ಉತ್ತಾನತ್ಥಾನೇವ.

೧೦೧೫. ನವಮೇ ಹತ್ಥಿಆದೀಸು ಸಿಪ್ಪ-ಸದ್ದೋ ಪಚ್ಚೇಕಂ ಯೋಜೇತಬ್ಬೋ, ತಥಾ ಆಥಬ್ಬಣಾದೀಸು ಮನ್ತ-ಸದ್ದೋ. ತತ್ಥ ಆಥಬ್ಬಣಮನ್ತೋ ನಾಮ ಆಥಬ್ಬಣವೇದವಿಹಿತೋ ಪರೂಪಘಾತಕರೋ ಮನ್ತೋ, ಖೀಲನಮನ್ತೋ ನಾಮ ದಾರುಸಾರಖೀಲಂ ಮನ್ತೇತ್ವಾ ಪಥವಿಯಂ ಪವೇಸೇತ್ವಾ ಮಾರಣಮನ್ತೋ, ಅಗದಪ್ಪಯೋಗೋ ವಿಸಯೋಜನಂ. ನಾಗಮಣ್ಡಲನ್ತಿ ಸಪ್ಪಾನಂ ಪವೇಸನಿವಾರಣತ್ಥಂ ಮಣ್ಡಲಬದ್ಧಮನ್ತೋ.

೧೦೧೮. ದಸಮಂ ಉತ್ತಾನತ್ಥಮೇವ.

ಚಿತ್ತಾಗಾರವಗ್ಗವಣ್ಣನಾ ನಿಟ್ಠಿತಾ.

೧೦೨೧. ಆರಾಮವಗ್ಗೇ ಸಬ್ಬಂ ಉತ್ತಾನತ್ಥಮೇವ.

೧೦೬೭. ಗಬ್ಭಿನಿವಗ್ಗೇಪಿ ಸಬ್ಬಂ ಸುವಿಞ್ಞೇಯ್ಯಮೇವ.