೨೦. ಪಟಿಗ್ಗಹಣವಿನಿಚ್ಛಯಕಥಾ

೧೦೪. ಖಾದನೀಯಾದಿಪಟಿಗ್ಗಾಹೋತಿ ಅಜ್ಝೋಹರಿತಬ್ಬಸ್ಸ ಯಸ್ಸ ಕಸ್ಸಚಿ ಖಾದನೀಯಸ್ಸ ವಾ ಭೋಜನೀಯಸ್ಸ ವಾ ಪಟಿಗ್ಗಹಣಂ. ತತ್ರಾಯಂ ವಿನಿಚ್ಛಯೋ – ಪಞ್ಚಹಿ ಅಙ್ಗೇಹಿ ಪಟಿಗ್ಗಹಣಂ ರುಹತಿ, ಥಾಮಮಜ್ಝಿಮಸ್ಸ ಪುರಿಸಸ್ಸ ಉಚ್ಚಾರಣಮತ್ತಂ ಹೋತಿ, ಹತ್ಥಪಾಸೋ ಪಞ್ಞಾಯತಿ, ಅಭಿಹಾರೋ ಪಞ್ಞಾಯತಿ, ದೇವೋ ವಾ ಮನುಸ್ಸೋ ವಾ ತಿರಚ್ಛಾನಗತೋ ವಾ ಕಾಯೇನ ಕಾಯಪಟಿಬದ್ಧೇನ ನಿಸ್ಸಗ್ಗಿಯೇನ ವಾ ದೇತಿ, ತಞ್ಚೇ ಭಿಕ್ಖು ಕಾಯೇನ ವಾ ಕಾಯಪಟಿಬದ್ಧೇನ ವಾ ಪಟಿಗ್ಗಣ್ಹಾತಿ. ಏವಂ ಪಞ್ಚಹಙ್ಗೇಹಿ ಪಟಿಗ್ಗಹಣಂ ರುಹತಿ.

ತತ್ಥ ಠಿತನಿಸಿನ್ನನಿಪನ್ನಾನಂ ವಸೇನ ಏವಂ ಹತ್ಥಪಾಸೋ ವೇದಿತಬ್ಬೋ – ಸಚೇ ಭಿಕ್ಖು ನಿಸಿನ್ನೋ ಹೋತಿ, ಆಸನಸ್ಸ ಪಚ್ಛಿಮನ್ತತೋ ಪಟ್ಠಾಯ, ಸಚೇ ಠಿತೋ, ಪಣ್ಹಿಅನ್ತತೋ ಪಟ್ಠಾಯ, ಸಚೇ ನಿಪನ್ನೋ, ಯೇನ ಪಸ್ಸೇನ ನಿಪನ್ನೋ, ತಸ್ಸ ಪಾರಿಮನ್ತತೋ ಪಟ್ಠಾಯ, ದಾಯಕಸ್ಸ ನಿಸಿನ್ನಸ್ಸ ವಾ ಠಿತಸ್ಸ ವಾ ನಿಪನ್ನಸ್ಸ ವಾ ಠಪೇತ್ವಾ ಪಸಾರಿತಹತ್ಥಂ ಯಂ ಆಸನ್ನತರಂ ಅಙ್ಗಂ, ತಸ್ಸ ಓರಿಮನ್ತೇನ ಪರಿಚ್ಛಿನ್ದಿತ್ವಾ ಅಡ್ಢತೇಯ್ಯಹತ್ಥೋ ಹತ್ಥಪಾಸೋ ನಾಮ.

ಸಚೇ ಪನ ದಾಯಕಪಟಿಗ್ಗಾಹಕೇಸು ಏಕೋ ಆಕಾಸೇ ಹೋತಿ, ಏಕೋ ಭೂಮಿಯಂ, ಭೂಮಟ್ಠಸ್ಸ ಚ ಸೀಸೇನ, ಆಕಾಸಟ್ಠಸ್ಸ ಚ ಠಪೇತ್ವಾ ದಾತುಂ ವಾ ಗಹೇತುಂ ವಾ ಪಸಾರಿತಹತ್ಥಂ ಯಂ ಆಸನ್ನತರಂ ಅಙ್ಗಂ, ತಸ್ಸ ಓರಿಮನ್ತೇನ ಹತ್ಥಪಾಸಪಮಾಣಂ ಪರಿಚ್ಛಿನ್ದಿತಬ್ಬಂ. ಸಚೇಪಿ ಏಕೋ ಕೂಪೇ ಹೋತಿ, ಏಕೋ ಕೂಪತಟೇ, ಏಕೋ ವಾ ಪನ ರುಕ್ಖೇ, ಏಕೋ ಪಥವಿಯಂ, ವುತ್ತನಯೇನೇವ ಹತ್ಥಪಾಸಪಮಾಣಂ ಪರಿಚ್ಛಿನ್ದಿತಬ್ಬಂ. ಏವರೂಪೇ ಹತ್ಥಪಾಸೇ ಠತ್ವಾ ಸಚೇಪಿ ಪಕ್ಖೀ ಮುಖತುಣ್ಡಕೇನ ವಾ ಹತ್ಥೀ ವಾ ಸೋಣ್ಡಾಯ ಗಹೇತ್ವಾ ಪುಪ್ಫಂ ವಾ ಫಲಂ ವಾ ದೇತಿ, ಪಟಿಗ್ಗಹಣಂ ರುಹತಿ. ಸಚೇ ಪನ ಅಡ್ಢಟ್ಠಮರತನಸ್ಸಪಿ ಹತ್ಥಿನೋ ಖನ್ಧೇ ನಿಸಿನ್ನೋ ತೇನ ಸೋಣ್ಡಾಯ ದೀಯಮಾನಂ ಗಣ್ಹಾತಿ, ವಟ್ಟತಿಯೇವ. ಹತ್ಥಾದೀಸು ಯೇನ ಕೇನಚಿ ಸರೀರಾವಯವೇನ ಅನ್ತಮಸೋ ಪಾದಙ್ಗುಲಿಯಾಪಿ ದೀಯಮಾನಂ ಕಾಯೇನ ದಿನ್ನಂ ನಾಮ ಹೋತಿ. ಪಟಿಗ್ಗಹಣೇಪಿ ಏಸೇವ ನಯೋ. ಯೇನ ಕೇನಚಿ ಹಿ ಸರೀರಾವಯವೇನ ಗಹಿತಂ ಕಾಯೇನ ಗಹಿತಮೇವ ಹೋತಿ. ಸಚೇಪಿ ನತ್ಥುಕರಣಿಯಂ ದೀಯಮಾನಂ ನಾಸಾಪುಟೇನ ಅಕಲ್ಲಕೋ ವಾ ಮುಖೇನ ಪಟಿಗ್ಗಣ್ಹಾತಿ, ಆಭೋಗಮೇವ ಹೇತ್ಥ ಪಮಾಣಂ.

೧೦೫. ಕಟಚ್ಛುಆದೀಸು ಪನ ಯೇನ ಕೇನಚಿ ಉಪಕರಣೇನ ದಿನ್ನಂ ಕಾಯಪಟಿಬದ್ಧೇನ ದಿನ್ನಂ ನಾಮ ಹೋತಿ. ಪಟಿಗ್ಗಹಣೇಪಿ ಏಸೇವ ನಯೋ. ಯೇನ ಕೇನಚಿ ಹಿ ಸರೀರಸಮ್ಬದ್ಧೇನ ಪತ್ತಥಾಲಕಾದಿನಾ ಗಹಿತಂ ಕಾಯಪಟಿಬದ್ಧೇನ ಗಹಿತಮೇವ ಹೋತಿ. ಕಾಯತೋ ಪನ ಕಾಯಪಟಿಬದ್ಧತೋ ಚ ಮೋಚೇತ್ವಾ ಹತ್ಥಪಾಸೇ ಠಿತಸ್ಸ ಕಾಯೇ ವಾ ಕಾಯಪಟಿಬದ್ಧೇ ವಾ ಪಾತಿಯಮಾನಮ್ಪಿ ನಿಸ್ಸಗ್ಗಿಯೇನ ಪಯೋಗೇನ ದಿನ್ನಂ ನಾಮ ಹೋತಿ. ಏಕೋ ಬಹೂನಿ ಭತ್ತಬ್ಯಞ್ಜನಭಾಜನಾನಿ ಸೀಸೇ ಕತ್ವಾ ಭಿಕ್ಖುಸ್ಸ ಸನ್ತಿಕಂ ಆಗನ್ತ್ವಾ ಠಿತಕೋವ ‘‘ಗಣ್ಹಥಾ’’ತಿ ವದತಿ, ನ ತಾವ ಅಭಿಹಾರೋ ಪಞ್ಞಾಯತಿ, ತಸ್ಮಾ ನ ಗಹೇತಬ್ಬಂ. ಸಚೇ ಪನ ಈಸಕಮ್ಪಿ ಓನಮತಿ, ಭಿಕ್ಖುನಾ ಹತ್ಥಂ ಪಸಾರೇತ್ವಾ ಹೇಟ್ಠಿಮಭಾಜನಂ ಏಕದೇಸೇನಪಿ ಸಮ್ಪಟಿಚ್ಛಿತಬ್ಬಂ. ಏತ್ತಾವತಾ ಸಬ್ಬಭಾಜನಾನಿ ಪಟಿಗ್ಗಹಿತಾನಿ ಹೋನ್ತಿ. ತತೋ ಪಟ್ಠಾಯ ಓರೋಪೇತ್ವಾ ಉಗ್ಘಾಟೇತ್ವಾ ವಾ ಯಂ ಇಚ್ಛತಿ, ತಂ ಗಹೇತುಂ ವಟ್ಟತಿ. ಭತ್ತಪಚ್ಛಿಆದಿಮ್ಹಿ ಪನ ಏಕಭಾಜನೇ ವತ್ತಬ್ಬಮೇವ ನತ್ಥಿ.

ಕಾಜೇನ ಭತ್ತಂ ಹರನ್ತೋಪಿ ಸಚೇ ಕಾಜಂ ಓನಮೇತ್ವಾ ದೇತಿ, ವಟ್ಟತಿ. ತಿಂಸಹತ್ಥೋ ವೇಣು ಹೋತಿ, ಏಕಸ್ಮಿಂ ಅನ್ತೇ ಗುಳಕುಮ್ಭೋ ಬದ್ಧೋ, ಏಕಸ್ಮಿಂ ಸಪ್ಪಿಕುಮ್ಭೋ, ತಞ್ಚೇ ಪಟಿಗ್ಗಣ್ಹಾತಿ, ಸಬ್ಬಂ ಪಟಿಗ್ಗಹಿತಮೇವ. ಉಚ್ಛುಯನ್ತದೋಣಿತೋ ಪಗ್ಘರನ್ತಮೇವ ‘‘ರಸಂ ಗಣ್ಹಥಾ’’ತಿ ವದತಿ, ಅಭಿಹಾರೋ ನ ಪಞ್ಞಾಯತೀತಿ ನ ಗಹೇತಬ್ಬೋ. ಸಚೇ ಪನ ಕಸಟಂ ಛಡ್ಡೇತ್ವಾ ಹತ್ಥೇನ ಉಸ್ಸಿಞ್ಚಿತ್ವಾ ದೇತಿ, ವಟ್ಟತಿ. ಬಹೂ ಪತ್ತಾ ಮಞ್ಚೇ ವಾ ಪೀಠೇ ವಾ ಕಟಸಾರೇ ವಾ ದೋಣಿಯಂ ವಾ ಫಲಕೇ ವಾ ಠಪಿತಾ ಹೋನ್ತಿ, ಯತ್ಥ ಠಿತಸ್ಸ ದಾಯಕೋ ಹತ್ಥಪಾಸೇ ಹೋತಿ, ತತ್ಥ ಠತ್ವಾ ಪಟಿಗ್ಗಹಣಸಞ್ಞಾಯ ಮಞ್ಚಾದೀನಿ ಅಙ್ಗುಲಿಯಾಪಿ ಫುಸಿತ್ವಾ ಠಿತೇನ ವಾ ನಿಸಿನ್ನೇನ ವಾ ನಿಪನ್ನೇನ ವಾ ಯಂ ತೇಸು ಪತ್ತೇಸು ದೀಯತಿ, ತಂ ಸಬ್ಬಂ ಪಟಿಗ್ಗಹಿತಂ ಹೋತಿ. ಸಚೇಪಿ ‘‘ಪಟಿಗ್ಗಹೇಸ್ಸಾಮೀ’’ತಿ ಮಞ್ಚಾದೀನಿ ಅಭಿರುಹಿತ್ವಾ ನಿಸೀದತಿ, ವಟ್ಟತಿಯೇವ.

ಪಥವಿಯಂ ಪನ ಸಚೇಪಿ ಕುಚ್ಛಿಯಾ ಕುಚ್ಛಿಂ ಆಹಚ್ಚ ಠಿತಾ ಹೋನ್ತಿ, ಯಂ ಯಂ ಅಙ್ಗುಲಿಯಾ ವಾ ಸೂಚಿಯಾ ವಾ ಫುಸಿತ್ವಾ ನಿಸಿನ್ನೋ ಹೋತಿ, ತತ್ಥ ತತ್ಥ ದೀಯಮಾನಮೇವ ಪಟಿಗ್ಗಹಿತಂ ಹೋತಿ. ಯತ್ಥ ಕತ್ಥಚಿ ಮಹಾಕಟಸಾರಹತ್ಥತ್ಥರಣಾದೀಸು ಠಪಿತಪತ್ತೇ ಪಟಿಗ್ಗಹಣಂ ನ ರುಹತೀತಿ ವುತ್ತಂ, ತಂ ಹತ್ಥಪಾಸಾತಿಕ್ಕಮಂ ಸನ್ಧಾಯ ವುತ್ತನ್ತಿ ವೇದಿತಬ್ಬಂ, ಹತ್ಥಪಾಸೇ ಪನ ಸತಿ ಯತ್ಥ ಕತ್ಥಚಿ ವಟ್ಟತಿ ಅಞ್ಞತ್ರ ತತ್ಥಜಾತಕಾ. ತತ್ಥಜಾತಕೇ ಪನ ಪದುಮಿನಿಪಣ್ಣೇ ವಾ ಕಿಂಸುಕಪಣ್ಣಾದಿಮ್ಹಿ ವಾ ನ ವಟ್ಟತಿ. ನ ಹಿ ತಂ ಕಾಯಪಟಿಬದ್ಧಸಙ್ಖ್ಯಂ ಗಚ್ಛತಿ. ಯಥಾ ಚ ತತ್ಥಜಾತಕೇ, ಏವಂ ಖಾಣುಕೇ ಬನ್ಧಿತ್ವಾ ಠಪಿತಮಞ್ಚಾದಿಮ್ಹಿ ಅಸಂಹಾರಿಮೇ ಫಲಕೇ ವಾ ಪಾಸಾಣೇ ವಾ ನ ರುಹತಿಯೇವ. ತೇಪಿ ಹಿ ತತ್ಥಜಾತಕಸಙ್ಖ್ಯುಪಗಾ ಹೋನ್ತಿ. ಭೂಮಿಯಂ ಅತ್ಥತೇಸು ಸುಖುಮೇಸು ತಿನ್ತಿಣಿಕಾದಿಪಣ್ಣೇಸು ಪಟಿಗ್ಗಹಣಂ ನ ರುಹತಿ. ನ ಹಿ ತಾನಿ ಸನ್ಧಾರೇತುಂ ಸಮತ್ಥಾನೀತಿ. ಮಹನ್ತೇಸು ಪನ ಪದುಮಿನಿಪಣ್ಣಾದೀಸು ರುಹತಿ. ಸಚೇ ಹತ್ಥಪಾಸಂ ಅತಿಕ್ಕಮ್ಮಠಿತೋ ದೀಘದಣ್ಡಕೇನ ಉಳುಙ್ಕೇನ ದೇತಿ, ‘‘ಆಗನ್ತ್ವಾ ದೇಹೀ’’ತಿ ವತ್ತಬ್ಬೋ. ವಚನಂ ಅಸುತ್ವಾ ವಾ ಅನಾದಿಯಿತ್ವಾ ವಾ ಪತ್ತೇ ಆಕಿರತಿಯೇವ, ಪುನ ಪಟಿಗ್ಗಹೇತಬ್ಬಂ. ದೂರೇ ಠತ್ವಾ ಭತ್ತಪಿಣ್ಡಂ ಖಿಪನ್ತೇಪಿ ಏಸೇವ ನಯೋ.

೧೦೬. ಸಚೇ ಪತ್ತಥವಿಕತೋ ನೀಹರಿಯಮಾನೇ ಪತ್ತೇ ರಜನಚುಣ್ಣಾನಿ ಹೋನ್ತಿ, ಸತಿ ಉದಕೇ ಧೋವಿತಬ್ಬೋ, ಅಸತಿ ರಜನಚುಣ್ಣಂ ಪುಞ್ಛಿತ್ವಾ ಪಟಿಗ್ಗಹೇತ್ವಾ ವಾ ಪಿಣ್ಡಾಯ ಚರಿತಬ್ಬಂ. ಸಚೇ ಪಿಣ್ಡಾಯ ಚರನ್ತಸ್ಸ ಪತ್ತೇ ರಜಂ ಪತತಿ, ಪಟಿಗ್ಗಹೇತ್ವಾ ಭಿಕ್ಖಾ ಗಣ್ಹಿತಬ್ಬಾ, ಅಪ್ಪಟಿಗ್ಗಹೇತ್ವಾ ಗಣ್ಹತೋ ವಿನಯದುಕ್ಕಟಂ, ತಂ ಪನ ಪುನ ಪಟಿಗ್ಗಹೇತ್ವಾ ಭುಞ್ಜತೋ ಅನಾಪತ್ತಿ. ಸಚೇ ಪನ ‘‘ಪಟಿಗ್ಗಹೇತ್ವಾ ದೇಥಾ’’ತಿ ವುತ್ತೇ ವಚನಂ ಅಸುತ್ವಾ ವಾ ಅನಾದಿಯಿತ್ವಾ ವಾ ಭಿಕ್ಖಂ ದೇನ್ತಿಯೇವ, ವಿನಯದುಕ್ಕಟಂ ನತ್ಥಿ, ಪುನ ಪಟಿಗ್ಗಹೇತ್ವಾ ಅಞ್ಞಾ ಭಿಕ್ಖಾ ಗಹೇತಬ್ಬಾ. ಸಚೇ ಮಹಾವಾತೋ ತತೋ ತತೋ ರಜಂ ಪಾತೇತಿ, ನ ಸಕ್ಕಾ ಹೋತಿ ಭಿಕ್ಖಂ ಗಹೇತುಂ, ‘‘ಅನುಪಸಮ್ಪನ್ನಸ್ಸ ದಸ್ಸಾಮೀ’’ತಿ ಸುದ್ಧಚಿತ್ತೇನ ಆಭೋಗಂ ಕತ್ವಾ ಗಣ್ಹಿತುಂ ವಟ್ಟತಿ. ಏವಂ ಪಿಣ್ಡಾಯ ಚರಿತ್ವಾ ವಿಹಾರಂ ವಾ ಆಸನಸಾಲಂ ವಾ ಗನ್ತ್ವಾ ತಂ ಅನುಪಸಮ್ಪನ್ನಸ್ಸ ದತ್ವಾ ಪುನ ತೇನ ದಿನ್ನಂ ವಾ ತಸ್ಸ ವಿಸ್ಸಾಸೇನ ವಾ ಪಟಿಗ್ಗಹೇತ್ವಾ ಭುಞ್ಜಿತುಂ ವಟ್ಟತಿ. ಸಚೇ ಭಿಕ್ಖಾಚಾರೇ ಸರಜಂ ಪತ್ತಂ ಭಿಕ್ಖುಸ್ಸ ದೇತಿ, ಸೋ ವತ್ತಬ್ಬೋ ‘‘ಇಮಂ ಪಟಿಗ್ಗಹೇತ್ವಾ ಭಿಕ್ಖಂ ವಾ ಗಣ್ಹೇಯ್ಯಾಸಿ ಪರಿಭುಞ್ಜೇಯ್ಯಾಸಿ ವಾ’’ತಿ, ತೇನ ತಥಾ ಕಾತಬ್ಬಂ. ಸಚೇ ರಜಂ ಉಪರಿ ಉಪ್ಪಿಲವತಿ, ಕಞ್ಜಿಕಂ ಪವಾಹೇತ್ವಾ ಸೇಸಂ ಭುಞ್ಜಿತಬ್ಬಂ. ಸಚೇ ಅನ್ತೋಪವಿಟ್ಠಂ ಹೋತಿ, ಪಟಿಗ್ಗಹೇತಬ್ಬಂ. ಅನುಪಸಮ್ಪನ್ನೇ ಅಸತಿ ಹತ್ಥತೋ ಅಮೋಚೇನ್ತೇನೇವ ಯತ್ಥ ಅನುಪಸಮ್ಪನ್ನೋ ಅತ್ಥಿ, ತತ್ಥ ನೇತ್ವಾ ಪಟಿಗ್ಗಹೇತಬ್ಬಂ. ಸುಕ್ಖಭತ್ತೇ ಪತಿತರಜಂ ಅಪನೇತ್ವಾ ಭುಞ್ಜಿತುಂ ವಟ್ಟತಿ. ಸಚೇ ಅತಿಸುಖುಮಂ ಹೋತಿ, ಉಪರಿ ಭತ್ತೇನ ಸದ್ಧಿಂ ಅಪನೇತಬ್ಬಂ, ಪಟಿಗ್ಗಹೇತ್ವಾ ವಾ ಭುಞ್ಜಿತಬ್ಬಂ. ಯಾಗುಂ ವಾ ಸೂಪಂ ವಾ ಪುರತೋ ಠಪೇತ್ವಾ ಆಲುಳೇನ್ತಾನಂ ಭಾಜನತೋ ಫುಸಿತಾನಿ ಉಗ್ಗನ್ತ್ವಾ ಪತ್ತೇ ಪತನ್ತಿ, ಪತ್ತೋ ಪಟಿಗ್ಗಹೇತಬ್ಬೋ.

೧೦೭. ಉಳುಙ್ಕೇನ ಆಹರಿತ್ವಾ ದೇನ್ತಾನಂ ಪಠಮತರಂ ಉಳುಙ್ಕತೋ ಥೇವಾ ಪತ್ತೇ ಪತನ್ತಿ, ಸುಪತಿತಾ, ಅಭಿಹಟತ್ತಾ ದೋಸೋ ನತ್ಥಿ. ಸಚೇಪಿ ಚರುಕೇನ ಭತ್ತೇ ಆಕಿರಿಯಮಾನೇ ಚರುಕತೋ ಮಸಿ ವಾ ಛಾರಿಕಾ ವಾ ಪತತಿ, ಅಭಿಹಟತ್ತಾ ನೇವತ್ಥಿ ದೋಸೋ. ಅನನ್ತರಸ್ಸ ಭಿಕ್ಖುನೋ ದೀಯಮಾನಂ ಪತ್ತತೋ ಉಪ್ಪತಿತ್ವಾ ಇತರಸ್ಸ ಪತ್ತೇ ಪತತಿ, ಸುಪತಿತಂ. ಪಟಿಗ್ಗಹಿತಮೇವ ಹಿ ತಂ ಹೋತಿ. ಸಚೇ ಜಜ್ಝರಿಸಾಖಾದಿಂ ಫಾಲೇತ್ವಾ ಏಕಸ್ಸ ಭಿಕ್ಖುನೋ ದೇನ್ತಾನಂ ಸಾಖತೋ ಫುಸಿತಾನಿ ಅಞ್ಞಸ್ಸ ಪತ್ತೇ ಪತನ್ತಿ, ಪತ್ತೋ ಪಟಿಗ್ಗಹೇತಬ್ಬೋ, ಯಸ್ಸ ಪತ್ತಸ್ಸ ಉಪರಿ ಫಾಲೇನ್ತಿ, ತಸ್ಸ ಪತ್ತೇ ಪತಿತೇಸು ದಾತುಕಾಮತಾಯ ಅಭಿಹಟತ್ತಾ ದೋಸೋ ನತ್ಥಿ. ಪಾಯಾಸಸ್ಸ ಪೂರೇತ್ವಾ ಪತ್ತಂ ದೇನ್ತಿ, ಉಣ್ಹತ್ತಾ ಹೇಟ್ಠಾ ಗಹೇತುಂ ನ ಸಕ್ಕೋತಿ, ಮುಖವಟ್ಟಿಯಾಪಿ ಗಹೇತುಂ ವಟ್ಟತಿ. ಸಚೇ ತಥಾಪಿ ನ ಸಕ್ಕೋತಿ, ಆಧಾರಕೇನ ಗಹೇತಬ್ಬೋ. ಆಸನಸಾಲಾಯ ಪತ್ತಂ ಗಹೇತ್ವಾ ನಿಸಿನ್ನೋ ಭಿಕ್ಖು ನಿದ್ದಂ ಓಕ್ಕನ್ತೋ ಹೋತಿ, ನೇವ ಆಹರಿಯಮಾನಂ, ನ ದೀಯಮಾನಂ ಜಾನಾತಿ, ಅಪ್ಪಟಿಗ್ಗಹಿತಂ ಹೋತಿ. ಸಚೇ ಪನ ಆಭೋಗಂ ಕತ್ವಾ ನಿಸಿನ್ನೋ ಹೋತಿ, ವಟ್ಟತಿ. ಸಚೇಪಿ ಸೋ ಹತ್ಥೇನ ಆಧಾರಕಂ ಮುಞ್ಚಿತ್ವಾ ಪಾದೇನ ಪೇಲ್ಲೇತ್ವಾ ನಿದ್ದಾಯತಿ, ವಟ್ಟತಿಯೇವ. ಪಾದೇನ ಆಧಾರಕಂ ಅಕ್ಕಮಿತ್ವಾ ಪಟಿಗ್ಗಣ್ಹನ್ತಸ್ಸ ಪನ ಜಾಗರನ್ತಸ್ಸಪಿ ಅನಾದರಪಟಿಗ್ಗಹಣಂ ಹೋತಿ, ತಸ್ಮಾ ನ ಕತ್ತಬ್ಬಂ. ಕೇಚಿ ‘‘ಏವಂ ಆಧಾರಕೇನ ಪಟಿಗ್ಗಹಣಂ ಕಾಯಪಟಿಬದ್ಧಪಟಿಬದ್ಧೇನ ಪಟಿಗ್ಗಹಣಂ ನಾಮ ಹೋತಿ, ತಸ್ಮಾ ನ ವಟ್ಟತೀ’’ತಿ ವದನ್ತಿ, ತಂ ವಚನಮತ್ತಮೇವ, ಅತ್ಥತೋ ಪನ ಸಬ್ಬಮ್ಪೇತಂ ಕಾಯಪಟಿಬದ್ಧಮೇವ ಹೋತಿ. ಕಾಯಸಂಸಗ್ಗೇಪಿ ಚೇಸ ನಯೋ ದಸ್ಸಿತೋ. ಯಮ್ಪಿ ಭಿಕ್ಖುಸ್ಸ ದೀಯಮಾನಂ ಪತತಿ, ತಮ್ಪಿ ಸಾಮಂ ಗಹೇತ್ವಾ ಪರಿಭುಞ್ಜಿತುಂ ವಟ್ಟತಿ.

ತತ್ರಿದಂ ಸುತ್ತಂ –

‘‘ಅನುಜಾನಾಮಿ, ಭಿಕ್ಖವೇ, ಯಂ ದೀಯಮಾನಂ ಪತತಿ, ತಂ ಸಾಮಂ ಗಹೇತ್ವಾ ಪರಿಭುಞ್ಜಿತುಂ, ಪರಿಚ್ಚತ್ತಂ ತಂ, ಭಿಕ್ಖವೇ, ದಾಯಕೇಹೀ’’ತಿ (ಚೂಳವ. ೨೭೩).

ಇದಞ್ಚ ಪನ ಸುತ್ತಂ ನೇಯ್ಯತ್ಥಂ, ತಸ್ಮಾ ಏವಮೇತ್ಥ ಅಧಿಪ್ಪಾಯೋ ವೇದಿತಬ್ಬೋ – ಯಂ ದೀಯಮಾನಂ ದಾಯಕಸ್ಸ ಹತ್ಥತೋ ಪರಿಗಳಿತ್ವಾ ಸುದ್ಧಾಯ ವಾ ಭೂಮಿಯಾ ಪದುಮಿನಿಪಣ್ಣೇ ವಾ ವತ್ಥಕಟಸಾರಕಾದೀಸು ವಾ ಪತತಿ, ತಂ ಸಾಮಂ ಗಹೇತ್ವಾ ಪರಿಭುಞ್ಜಿತುಂ ವಟ್ಟತಿ. ಯಂ ಪನ ಸರಜಾಯ ಭೂಮಿಯಂ ಪತತಿ, ತಂ ರಜಂ ಪುಞ್ಛಿತ್ವಾ ವಾ ಧೋವಿತ್ವಾ ವಾ ಪಟಿಗ್ಗಹೇತ್ವಾ ವಾ ಪರಿಭುಞ್ಜಿತಬ್ಬಂ. ಸಚೇ ಪವಟ್ಟನ್ತಂ ಅಞ್ಞಸ್ಸ ಭಿಕ್ಖುನೋ ಸನ್ತಿಕಂ ಗಚ್ಛತಿ, ತೇನ ಆಹರಾಪೇತುಮ್ಪಿ ವಟ್ಟತಿ. ಸಚೇ ತಂ ಭಿಕ್ಖುಂ ವದತಿ ‘‘ತ್ವಂಯೇವ ಖಾದಾ’’ತಿ, ತಸ್ಸಪಿ ಖಾದಿತುಂ ವಟ್ಟತಿ, ಅನಾಣತ್ತೇನ ಪನ ತೇನ ನ ಗಹೇತಬ್ಬಂ. ‘‘ಅನಾಣತ್ತೇನಪಿ ಇತರಸ್ಸ ದಸ್ಸಾಮೀತಿ ಗಹೇತುಂ ವಟ್ಟತೀ’’ತಿ ಕುರುನ್ದಿಯಂ ವುತ್ತಂ. ಕಸ್ಮಾ ಪನೇತಂ ಇತರಸ್ಸ ಭಿಕ್ಖುನೋ ಗಹೇತುಂ ನ ವಟ್ಟತೀತಿ? ಭಗವತಾ ಅನನುಞ್ಞಾತತ್ತಾ. ಭಗವತಾ ಹಿ ‘‘ಸಾಮಂ ಗಹೇತ್ವಾ ಪರಿಭುಞ್ಜಿತು’’ನ್ತಿ ವದನ್ತೇನ ಯಸ್ಸೇವ ತಂ ದೀಯಮಾನಂ ಪತತಿ, ತಸ್ಸ ಅಪ್ಪಟಿಗ್ಗಹಿತಕಮ್ಪಿ ತಂ ಗಹೇತ್ವಾ ಪರಿಭೋಗೋ ಅನುಞ್ಞಾತೋ. ‘‘ಪರಿಚ್ಚತ್ತಂ ತಂ, ಭಿಕ್ಖವೇ, ದಾಯಕೇಹೀ’’ತಿ ವಚನೇನ ಪನೇತ್ಥ ಪರಸನ್ತಕಭಾವೋ ದೀಪಿತೋ, ತಸ್ಮಾ ಅಞ್ಞಸ್ಸ ಸಾಮಂ ಗಹೇತ್ವಾ ಪರಿಭುಞ್ಜಿತುಂ ನ ವಟ್ಟತಿ, ತಸ್ಸ ಪನ ಆಣತ್ತಿಯಾ ವಟ್ಟತೀತಿ ಅಯಂ ಕಿರೇತ್ಥ ಅಧಿಪ್ಪಾಯೋ. ಯಸ್ಮಾ ಚ ಏತಂ ಅಪ್ಪಟಿಗ್ಗಹಿತಕತ್ತಾ ಅನುಞ್ಞಾತಂ, ತಸ್ಮಾ ಯಥಾಠಿತಂಯೇವ ಅನಾಮಸಿತ್ವಾ ಕೇನಚಿ ಪಿದಹಿತ್ವಾ ಠಪಿತಂ ದುತಿಯದಿವಸೇಪಿ ಪರಿಭುಞ್ಜಿತುಂ ವಟ್ಟತಿ, ಸನ್ನಿಧಿಪಚ್ಚಯಾ ಅನಾಪತ್ತಿ, ಪಟಿಗ್ಗಹೇತ್ವಾ ಪನ ಪರಿಭುಞ್ಜಿತಬ್ಬಂ. ತಂ ದಿವಸಂಯೇವ ಹಿ ತಸ್ಸ ಸಾಮಂ ಗಹೇತ್ವಾ ಪರಿಭೋಗೋ ಅನುಞ್ಞಾತೋ, ನ ತತೋ ಪರನ್ತಿ ಅಯಮ್ಪಿ ಕಿರೇತ್ಥ ಅಧಿಪ್ಪಾಯೋ.

೧೦೮. ಇದಾನಿ ಅಬ್ಬೋಹಾರಿಕನಯೋ ವುಚ್ಚತಿ. ಭುಞ್ಜನ್ತಾನಞ್ಹಿ ದನ್ತಾ ಖೀಯನ್ತಿ, ನಖಾ ಖೀಯನ್ತಿ, ಪತ್ತಸ್ಸ ವಣ್ಣೋ ಖೀಯತಿ, ಸಬ್ಬಂ ಅಬ್ಬೋಹಾರಿಕಂ. ಸತ್ಥಕೇನ ಉಚ್ಛುಆದೀಸು ಫಾಲಿತೇಸು ಮಲಂ ಪಞ್ಞಾಯತಿ, ಏತಂ ನವಸಮುಟ್ಠಿತಂ ನಾಮ, ಪಟಿಗ್ಗಹೇತ್ವಾ ಪರಿಭುಞ್ಜಿತಬ್ಬಂ. ಸತ್ಥಕಂ ಧೋವಿತ್ವಾ ಫಾಲಿತೇಸು ಮಲಂ ನ ಪಞ್ಞಾಯತಿ, ಲೋಹಗನ್ಧಮತ್ತಂ ಹೋತಿ, ತಂ ಅಬ್ಬೋಹಾರಿಕಂ. ಯಮ್ಪಿ ಸತ್ಥಕಂ ಗಹೇತ್ವಾ ಪರಿಹರನ್ತಿ, ತೇನ ಫಾಲಿತೇಪಿ ಏಸೇವ ನಯೋ. ನ ಹಿ ತಂ ಪರಿಭೋಗತ್ಥಾಯ ಪರಿಹರನ್ತೀತಿ. ಮೂಲಭೇಸಜ್ಜಾದೀನಿ ಪಿಸನ್ತಾನಂ ವಾ ಕೋಟ್ಟೇನ್ತಾನಂ ವಾ ನಿಸದನಿಸದಪೋತಕಉದುಕ್ಖಲಮುಸಲಾದೀನಿ ಖೀಯನ್ತಿ, ಪರಿಹರಣಕವಾಸಿಂ ತಾಪೇತ್ವಾ ಭೇಸಜ್ಜತ್ಥಾಯ ತಕ್ಕೇ ವಾ ಖೀರೇ ವಾ ಪಕ್ಖಿಪನ್ತಿ, ತತ್ಥ ನೀಲಿಕಾ ಪಞ್ಞಾಯತಿ, ಸತ್ಥಕೇ ವುತ್ತಸದಿಸೋವ ವಿನಿಚ್ಛಯೋ. ಆಮಕತಕ್ಕಾದೀಸು ಪನ ಸಯಂ ನ ಪಕ್ಖಿಪಿತಬ್ಬಾ, ಪಕ್ಖಿಪತಿ ಚೇ, ಸಾಮಂಪಾಕತೋ ನ ಮುಚ್ಚತಿ. ದೇವೇ ವಸ್ಸನ್ತೇ ಪಿಣ್ಡಾಯ ಚರನ್ತಸ್ಸ ಸರೀರತೋ ವಾ ಚೀವರತೋ ವಾ ಕಿಲಿಟ್ಠಉದಕಂ ಪತ್ತೇ ಪತತಿ, ಪಟಿಗ್ಗಹೇತಬ್ಬಂ. ರುಕ್ಖಮೂಲಾದೀಸು ಭುಞ್ಜನ್ತಸ್ಸ ಪತಿತೇಪಿ ಏಸೇವ ನಯೋ. ಸಚೇ ಪನ ಸತ್ತಾಹಂ ವಸ್ಸನ್ತೇ ದೇವೇ ಸುದ್ಧಂ ಉದಕಂ ಹೋತಿ, ಅಬ್ಭೋಕಾಸತೋ ವಾ ಪತತಿ, ವಟ್ಟತಿ.

೧೦೯. ಸಾಮಣೇರಸ್ಸ ಓದನಂ ದೇನ್ತೇನ ತಸ್ಸ ಪತ್ತಗತಂ ಅಚ್ಛುಪನ್ತೇನೇವ ದಾತಬ್ಬೋ, ಪತ್ತೋ ವಾಸ್ಸ ಪಟಿಗ್ಗಹೇತಬ್ಬೋ. ಅಪ್ಪಟಿಗ್ಗಹಿತೇ ಓದನಂ ಛುಪಿತ್ವಾ ಪುನ ಅತ್ತನೋ ಪತ್ತೇ ಓದನಂ ಗಣ್ಹನ್ತಸ್ಸ ಉಗ್ಗಹಿತಕೋ ಹೋತಿ. ಸಚೇ ಪನ ದಾತುಕಾಮೋ ಹುತ್ವಾ ‘‘ಆಹರ, ಸಾಮಣೇರ, ಪತ್ತಂ, ಓದನಂ ಗಣ್ಹಾಹೀ’’ತಿ ವದತಿ, ಇತರೋ ‘‘ಅಲಂ ಮಯ್ಹ’’ನ್ತಿ ಪಟಿಕ್ಖಿಪತಿ, ಪುನ ‘‘ತವೇತಂ ಮಯಾ ಪರಿಚ್ಚತ್ತ’’ನ್ತಿ ಚ ವುತ್ತೇ ‘‘ನ ಮಯ್ಹಂ ಏತೇನತ್ಥೋ’’ತಿ ವದತಿ, ಸತಕ್ಖತ್ತುಮ್ಪಿ ಪರಿಚ್ಚಜತು, ಯಾವ ಅತ್ತನೋ ಹತ್ಥಗತಂ, ತಾವ ಪಟಿಗ್ಗಹಿತಮೇವ ಹೋತಿ. ಸಚೇ ಪನ ಆಧಾರಕೇ ಠಿತಂ ನಿರಪೇಕ್ಖೋ ‘‘ಗಣ್ಹಾಹೀ’’ತಿ ವದತಿ, ಪುನ ಪಟಿಗ್ಗಹೇತಬ್ಬಂ. ಸಾಪೇಕ್ಖೋ ಆಧಾರಕೇ ಪತ್ತಂ ಠಪೇತ್ವಾ ‘‘ಏತ್ತೋ ಪೂವಂ ವಾ ಭತ್ತಂ ವಾ ಗಣ್ಹಾಹೀ’’ತಿ ಸಾಮಣೇರಂ ವದತಿ, ಸಾಮಣೇರೋ ಹತ್ಥಂ ಧೋವಿತ್ವಾ ಸಚೇಪಿ ಸತಕ್ಖತ್ತುಂ ಗಹೇತ್ವಾ ಅತ್ತನೋ ಪತ್ತಗತಂ ಅಫುಸನ್ತೋವ ಅತ್ತನೋ ಪತ್ತೇ ಪಕ್ಖಿಪತಿ, ಪುನ ಪಟಿಗ್ಗಹಣಕಿಚ್ಚಂ ನತ್ಥಿ. ಯದಿ ಪನ ಅತ್ತನೋ ಪತ್ತಗತಂ ಫುಸಿತ್ವಾ ತತೋ ಗಣ್ಹಾತಿ, ಸಾಮಣೇರಸನ್ತಕೇನ ಸಂಸಟ್ಠಂ ಹೋತಿ, ಪುನ ಪಟಿಗ್ಗಹೇತಬ್ಬಂ. ಕೇಚಿ ಪನ ‘‘ಸಚೇಪಿ ಗಯ್ಹಮಾನಂ ಛಿಜ್ಜಿತ್ವಾ ತತ್ಥ ಪತತಿ, ಪುನ ಪಟಿಗ್ಗಹೇತಬ್ಬ’’ನ್ತಿ ವದನ್ತಿ. ತಂ ‘‘ಏಕಂ ಭತ್ತಪಿಣ್ಡಂ ಗಣ್ಹ, ಏಕಂ ಪೂವಂ ಗಣ್ಹ, ಇಮಸ್ಸ ಗುಳಪಿಣ್ಡಸ್ಸ ಏತ್ತಕಂ ಪದೇಸಂ ಗಣ್ಹಾ’’ತಿ ಏವಂ ಪರಿಚ್ಛಿನ್ದಿತ್ವಾ ವುತ್ತೇ ವೇದಿತಬ್ಬಂ, ಇಧ ಪನ ಪರಿಚ್ಛೇದೋ ನತ್ಥಿ, ತಸ್ಮಾ ಯಂ ಸಾಮಣೇರಸ್ಸ ಪತ್ತೇ ಪತತಿ, ತದೇವ ಪಟಿಗ್ಗಹಣಂ ವಿಜಹತಿ, ಹತ್ಥಗತಂ ಪನ ಯಾವ ಸಾಮಣೇರೋ ವಾ ‘‘ಅಲ’’ನ್ತಿ ನ ಓರಮತಿ, ಭಿಕ್ಖು ವಾ ನ ವಾರೇತಿ, ತಾವ ಭಿಕ್ಖುಸ್ಸೇವ ಸನ್ತಕಂ, ತಸ್ಮಾ ಪಟಿಗ್ಗಹಣಂ ನ ವಿಜಹತಿ. ಸಚೇ ಅತ್ತನೋ ವಾ ಭಿಕ್ಖೂನಂ ವಾ ಯಾಗುಪಚನಕಭಾಜನೇ ಕೇಸಞ್ಚಿ ಅತ್ಥಾಯ ಭತ್ತಂ ಪಕ್ಖಿಪತಿ, ‘‘ಸಾಮಣೇರ, ಭಾಜನಸ್ಸ ಉಪರಿ ಹತ್ಥಂ ಕರೋಹೀ’’ತಿ ವತ್ವಾ ತಸ್ಸ ಹತ್ಥೇ ಪಕ್ಖಿಪಿತಬ್ಬಂ. ತಸ್ಸ ಹತ್ಥತೋ ಭಾಜನೇ ಪತಿತಞ್ಹಿ ದುತಿಯದಿವಸೇ ಭಾಜನಸ್ಸ ಅಕಪ್ಪಿಯಭಾವಂ ನ ಕರೋತಿ ಪರಿಚ್ಚತ್ತತ್ತಾ. ಸಚೇ ಏವಂ ಅಕತ್ವಾ ಪಕ್ಖಿಪತಿ, ಪತ್ತಮಿವ ಭಾಜನಂ ನಿರಾಮಿಸಂ ಕತ್ವಾ ಪರಿಭುಞ್ಜಿತಬ್ಬಂ.

೧೧೦. ದಾಯಕಾ ಯಾಗುಕುಟಂ ಠಪೇತ್ವಾ ಗತಾ, ತಂ ದಹರಸಾಮಣೇರೋ ಪಟಿಗ್ಗಣ್ಹಾಪೇತುಂ ನ ಸಕ್ಕೋತಿ, ಭಿಕ್ಖು ಪತ್ತಂ ಉಪನಾಮೇತಿ, ಸಾಮಣೇರೋ ಕುಟಸ್ಸ ಗೀವಂ ಪತ್ತಸ್ಸ ಮುಖವಟ್ಟಿಯಂ ಠಪೇತ್ವಾ ಆವಜ್ಜೇತಿ, ಪತ್ತಗತಾ ಯಾಗು ಪಟಿಗ್ಗಹಿತಾವ ಹೋತಿ. ಅಥ ವಾ ಭಿಕ್ಖು ಭೂಮಿಯಂ ಹತ್ಥಂ ಠಪೇತಿ, ಸಾಮಣೇರೋ ಪವಟ್ಟೇತ್ವಾ ಹತ್ಥಂ ಆರೋಪೇತಿ, ವಟ್ಟತಿ. ಪೂವಪಚ್ಛಿಭತ್ತಪಚ್ಛಿಉಚ್ಛುಭಾರಾದೀಸುಪಿ ಏಸೇವ ನಯೋ. ಸಚೇ ಪಟಿಗ್ಗಹಣೂಪಗಂ ಭಾರಂ ದ್ವೇ ತಯೋ ಸಾಮಣೇರಾ ದೇನ್ತಿ, ಏಕೇನ ವಾ ಬಲವತಾ ಉಕ್ಖಿತ್ತಂ ದ್ವೇ ತಯೋ ಭಿಕ್ಖೂ ಗಣ್ಹನ್ತಿ, ವಟ್ಟತಿ. ಮಞ್ಚಸ್ಸ ವಾ ಪೀಠಸ್ಸ ವಾ ಪಾದೇ ತೇಲಘಟಂ ವಾ ಫಾಣಿತಘಟಂ ವಾ ಲಗ್ಗೇನ್ತಿ, ಭಿಕ್ಖುಸ್ಸ ಮಞ್ಚೇಪಿ ಪೀಠೇಪಿ ನಿಸೀದಿತುಂ ವಟ್ಟತಿ, ಉಗ್ಗಹಿತಕಂ ನಾಮ ನ ಹೋತಿ.

ನಾಗದನ್ತಕೇ ವಾ ಅಙ್ಕುಸಕೇ ವಾ ದ್ವೇ ತೇಲಘಟಾ ಲಗ್ಗಿತಾ ಹೋನ್ತಿ ಉಪರಿ ಪಟಿಗ್ಗಹಿತಕೋ, ಹೇಟ್ಠಾ ಅಪ್ಪಟಿಗ್ಗಹಿತಕೋ. ಉಪರಿಮಂ ಗಹೇತುಂ ವಟ್ಟತಿ, ಹೇಟ್ಠಾ ಪಟಿಗ್ಗಹಿತಕೋ, ಉಪರಿ ಅಪ್ಪಟಿಗ್ಗಹಿತಕೋ, ಉಪರಿಮಂ ಗಹೇತ್ವಾ ಇತರಂ ಗಣ್ಹತೋ ಉಪರಿಮೋ ಉಗ್ಗಹಿತಕೋ ಹೋತಿ. ಹೇಟ್ಠಾಮಞ್ಚೇ ಅಪ್ಪಟಿಗ್ಗಹಿತಕಂ ತೇಲಥಾಲಕಂ ಹೋತಿ, ತಞ್ಚೇ ಸಮ್ಮಜ್ಜನ್ತೋ ಸಮ್ಮುಞ್ಜನಿಯಾ ಘಟ್ಟೇತಿ, ಉಗ್ಗಹಿತಕಂ ನ ಹೋತಿ, ‘‘ಪಟಿಗ್ಗಹಿತಕಂ ಗಣ್ಹಿಸ್ಸಾಮೀ’’ತಿ ಅಪ್ಪಟಿಗ್ಗಹಿತಕಂ ಗಹೇತ್ವಾ ಞತ್ವಾ ಪುನ ಠಪೇತಿ, ಉಗ್ಗಹಿತಕಂ ನ ಹೋತಿ, ಬಹಿ ನೀಹರಿತ್ವಾ ಸಞ್ಜಾನಾತಿ, ಬಹಿ ಅಟ್ಠಪೇತ್ವಾ ಹರಿತ್ವಾ ತತ್ಥೇವ ಠಪೇತಬ್ಬಂ, ನತ್ಥಿ ದೋಸೋ. ಸಚೇ ಪನ ಪುಬ್ಬೇ ವಿವರಿತ್ವಾ ಠಪಿತಂ, ನ ಪಿದಹಿತಬ್ಬಂ. ಯಥಾ ಪುಬ್ಬೇ ಠಿತಂ, ತಥೇವ ಠಪೇತಬ್ಬಂ. ಸಚೇ ಬಹಿ ಠಪೇತಿ, ಪುನ ನ ಛುಪಿತಬ್ಬಂ.

೧೧೧. ಪಟಿಗ್ಗಹಿತಕೇ ತೇಲಾದಿಮ್ಹಿ ಕಣ್ಣಿಕಾ ಉಟ್ಠೇತಿ, ಸಿಙ್ಗಿವೇರಾದಿಮ್ಹಿ ಘನಚುಣ್ಣಂ, ತಂಸಮುಟ್ಠಾನಮೇವ ನಾಮ ತಂ, ಪುನ ಪಟಿಗ್ಗಹಣಕಿಚ್ಚಂ ನತ್ಥಿ. ತಾಲಂ ವಾ ನಾಳಿಕೇರಂ ವಾ ಆರುಳ್ಹೋ ಯೋತ್ತೇನ ಫಲಪಿಣ್ಡಿಂ ಓತಾರೇತ್ವಾ ಉಪರಿ ಠಿತೋವ ‘‘ಗಣ್ಹಥಾ’’ತಿ ವದತಿ, ನ ಗಹೇತಬ್ಬಂ. ಸಚೇ ಅಞ್ಞೋ ಭೂಮಿಯಂ ಠಿತೋ ಯೋತ್ತಪಾಸಕೇ ಗಹೇತ್ವಾ ಉಕ್ಖಿಪಿತ್ವಾ ದೇತಿ, ವಟ್ಟತಿ. ಸಫಲಂ ಮಹಾಸಾಖಂ ಕಪ್ಪಿಯಂ ಕಾರೇತ್ವಾ ಪಟಿಗ್ಗಣ್ಹಾತಿ, ಫಲಾನಿ ಪಟಿಗ್ಗಹಿತಾನೇವ ಹೋನ್ತಿ, ಯಥಾಸುಖಂ ಪರಿಭುಞ್ಜಿತುಂ ವಟ್ಟತಿ. ಅನ್ತೋವತಿಯಂ ಠತ್ವಾ ವತಿಂ ಛಿನ್ದಿತ್ವಾ ಉಚ್ಛುಂ ವಾ ತಿಮ್ಬರೂಸಕಂ ವಾ ದೇನ್ತಿ, ಹತ್ಥಪಾಸೇ ಸತಿ ವಟ್ಟತಿ. ದಣ್ಡಕೇಸು ಅಪಹರಿತ್ವಾ ನಿಗ್ಗತಂ ಗಣ್ಹನ್ತಸ್ಸ ವಟ್ಟತಿ, ಪಹರಿತ್ವಾ ನಿಗ್ಗತೇ ಅಟ್ಠಕಥಾಸು ದೋಸೋ ನ ದಸ್ಸಿತೋ. ಮಯಂ ಪನ ‘‘ಯಂ ಠಾನಂ ಪಹಟಂ, ತತೋ ಸಯಂಪತಿತಮಿವ ಹೋತೀ’’ತಿ ತಕ್ಕಯಾಮ, ತಮ್ಪಿ ಠತ್ವಾ ಗಚ್ಛನ್ತೇ ಯುಜ್ಜತಿ ಸುಙ್ಕಘಾತತೋ ಪವಟ್ಟೇತ್ವಾ ಬಹಿಪತಿತಭಣ್ಡಂ ವಿಯ. ವತಿಂ ವಾ ಪಾಕಾರಂ ವಾ ಲಙ್ಘಾಪೇತ್ವಾ ದೇನ್ತಿ, ಸಚೇ ಪನ ಅಪುಥುಲೋ ಪಾಕಾರೋ, ಅನ್ತೋಪಾಕಾರೇ ಬಹಿಪಾಕಾರೇ ಚ ಠಿತಸ್ಸ ಹತ್ಥಪಾಸೋ ಪಹೋತಿ, ಹತ್ಥಸತಮ್ಪಿ ಉದ್ಧಂ ಗನ್ತ್ವಾ ಸಮ್ಪತ್ತಂ ಗಹೇತುಂ ವಟ್ಟತಿ.

ಭಿಕ್ಖು ಗಿಲಾನಂ ಸಾಮಣೇರಂ ಖನ್ಧೇನ ವಹತಿ, ಸೋ ಫಲಾಫಲಂ ದಿಸ್ವಾ ಗಹೇತ್ವಾ ಖನ್ಧೇ ನಿಸಿನ್ನೋವ ದೇತಿ, ವಟ್ಟತಿ. ಅಪರೋ ಭಿಕ್ಖುಂ ವಹನ್ತೋ ಖನ್ಧೇ ನಿಸಿನ್ನಸ್ಸ ಭಿಕ್ಖುನೋ ದೇತಿ, ವಟ್ಟತಿಯೇವ. ಭಿಕ್ಖು ಫಲಿನಿಂ ಸಾಖಂ ಛಾಯತ್ಥಾಯ ಗಹೇತ್ವಾ ಗಚ್ಛತಿ, ಫಲಾನಿ ಖಾದಿತುಂ ಚಿತ್ತೇ ಉಪ್ಪನ್ನೇ ಪಟಿಗ್ಗಹಾಪೇತ್ವಾ ಖಾದಿತುಂ ವಟ್ಟತಿ. ಮಚ್ಛಿಕವಾರಣತ್ಥಂ ಕಪ್ಪಿಯಂ ಕಾರೇತ್ವಾ ಪಟಿಗ್ಗಣ್ಹಾತಿ, ಖಾದಿತುಕಾಮೋ ಚೇ ಹೋತಿ, ಮೂಲಪಟಿಗ್ಗಹಣಮೇವ ವಟ್ಟತಿ, ಖಾದನ್ತಸ್ಸ ನತ್ಥಿ ದೋಸೋ. ಭಿಕ್ಖು ಪಟಿಗ್ಗಹಣಾರಹಂ ಭಣ್ಡಂ ಮನುಸ್ಸಾನಂ ಯಾನೇ ಠಪೇತ್ವಾ ಮಗ್ಗಂ ಗಚ್ಛತಿ, ಯಾನಂ ಕದ್ದಮೇ ಲಗ್ಗತಿ, ದಹರೋ ಚಕ್ಕಂ ಗಹೇತ್ವಾ ಉಕ್ಖಿಪತಿ, ವಟ್ಟತಿ, ಉಗ್ಗಹಿತಕಂ ನಾಮ ನ ಹೋತಿ. ನಾವಾಯ ಠಪೇತ್ವಾ ನಾವಂ ಅರಿತ್ತೇನ ವಾ ಪಾಜೇತಿ, ಹತ್ಥೇನ ವಾ ಕಡ್ಢತಿ, ವಟ್ಟತಿ. ಉಳುಮ್ಪೇಪಿ ಏಸೇವ ನಯೋ. ಚಾಟಿಯಂ ವಾ ಕುಣ್ಡಕೇ ವಾ ಠಪೇತ್ವಾಪಿ ತಂ ಅನುಪಸಮ್ಪನ್ನೇನ ಗಾಹಾಪೇತ್ವಾ ಅನುಪಸಮ್ಪನ್ನಂ ಬಾಹಾಯಂ ಗಹೇತ್ವಾ ತರಿತುಂ ವಟ್ಟತಿ. ತಸ್ಮಿಮ್ಪಿ ಅಸತಿ ಅನುಪಸಮ್ಪನ್ನಂ ಗಾಹಾಪೇತ್ವಾ ತಂ ಬಾಹಾಯಂ ಗಹೇತ್ವಾ ತರಿತುಂ ವಟ್ಟತಿ.

ಉಪಾಸಕಾ ಗಮಿಕಭಿಕ್ಖೂನಂ ಪಾಥೇಯ್ಯತಣ್ಡುಲೇ ದೇನ್ತಿ, ಸಾಮಣೇರಾ ಭಿಕ್ಖೂನಂ ತಣ್ಡುಲೇ ಗಹೇತ್ವಾ ಅತ್ತನೋ ತಣ್ಡುಲೇ ಗಹೇತುಂ ನ ಸಕ್ಕೋನ್ತಿ, ಭಿಕ್ಖೂ ತೇಸಂ ತಣ್ಡುಲೇ ಗಣ್ಹನ್ತಿ, ಸಾಮಣೇರಾ ಅತ್ತನಾ ಗಹಿತತಣ್ಡುಲೇಸು ಖೀಣೇಸು ಇತರೇಹಿ ತಣ್ಡುಲೇಹಿ ಯಾಗುಂ ಪಚಿತ್ವಾ ಸಬ್ಬೇಸಂ ಪತ್ತಾನಿ ಪಟಿಪಾಟಿಯಾ ಠಪೇತ್ವಾ ಯಾಗುಂ ಆಕಿರನ್ತಿ, ಪಣ್ಡಿತೋ ಸಾಮಣೇರೋ ಅತ್ತನೋ ಪತ್ತಂ ಗಹೇತ್ವಾ ಥೇರಸ್ಸ ದೇತಿ, ಥೇರಸ್ಸ ಪತ್ತಂ ದುತಿಯತ್ಥೇರಸ್ಸಾತಿ ಏವಂ ಸಬ್ಬಾನಿಪಿ ಪರಿವತ್ತೇತಿ, ಸಬ್ಬೇಹಿ ಸಾಮಣೇರಸ್ಸ ಸನ್ತಕಂ ಭುತ್ತಂ ಹೋತಿ, ವಟ್ಟತಿ. ಸಚೇಪಿ ಸಾಮಣೇರೋ ಅಪಣ್ಡಿತೋ ಹೋತಿ, ಅತ್ತನೋ ಪತ್ತೇ ಯಾಗುಂ ಸಯಮೇವ ಪಾತುಂ ಆರಭತಿ, ‘‘ಆವುಸೋ, ತುಯ್ಹಂ ಯಾಗುಂ ಮಯ್ಹಂ ದೇಹೀ’’ತಿ ಥೇರೇಹಿ ಪಟಿಪಾಟಿಯಾ ಯಾಚಿತ್ವಾಪಿ ಪಿವಿತುಂ ವಟ್ಟತಿ, ಸಬ್ಬೇಹಿ ಸಾಮಣೇರಸ್ಸ ಸನ್ತಕಮೇವ ಭುತ್ತಂ ಹೋತಿ, ನೇವ ಉಗ್ಗಹಿತಪಚ್ಚಯಾ, ನ ಸನ್ನಿಧಿಪಚ್ಚಯಾ ವಜ್ಜಂ ಫುಸನ್ತಿ. ಏತ್ಥ ಪನ ಮಾತಾಪಿತೂನಂ ತೇಲಾದೀನಿ, ಛಾಯಾದೀನಂ ಅತ್ಥಾಯ ಸಾಖಾದೀನಿ ಚ ಹರನ್ತಾನಂ ಇಮೇಸಞ್ಚ ವಿಸೇಸೋ ನ ದಿಸ್ಸತಿ, ತಸ್ಮಾ ಕಾರಣಂ ಉಪಪರಿಕ್ಖಿತಬ್ಬಂ.

೧೧೨. ಸಾಮಣೇರೋ ಭತ್ತಂ ಪಚಿತುಕಾಮೋ ತಣ್ಡುಲೇ ಧೋವಿತ್ವಾ ನಿಚ್ಚಾಲೇತುಂ ನ ಸಕ್ಕೋತಿ, ಭಿಕ್ಖುನಾ ತಣ್ಡುಲೇ ಚ ಭಾಜನಞ್ಚ ಪಟಿಗ್ಗಹೇತ್ವಾ ತಣ್ಡುಲೇ ಧೋವಿತ್ವಾ ನಿಚ್ಚಾಲೇತ್ವಾ ಭಾಜನಂ ಉದ್ಧನಂ ಆರೋಪೇತಬ್ಬಂ, ಅಗ್ಗಿ ನ ಕಾತಬ್ಬೋ, ಪಕ್ಕಕಾಲೇ ವಿವರಿತ್ವಾ ಪಕ್ಕಭಾವೋ ಜಾನಿತಬ್ಬೋ. ಸಚೇ ದುಪ್ಪಕ್ಕಂ ಹೋತಿ, ಪಾಕತ್ಥಾಯ ಪಿದಹಿತುಂ ನ ವಟ್ಟತಿ, ರಜಸ್ಸ ವಾ ಛಾರಿಕಾಯ ವಾ ಅಪತನತ್ಥಾಯ ವಟ್ಟತಿ, ಪಕ್ಕಕಾಲೇ ಓರೋಪಿತುಂ ಭುಞ್ಜಿತುಮ್ಪಿ ವಟ್ಟತಿ, ಪುನ ಪಟಿಗ್ಗಹಣಕಿಚ್ಚಂ ನತ್ಥಿ. ಸಾಮಣೇರೋ ಪಟಿಬಲೋ ಪಚಿತುಂ, ಖಣೋ ಪನಸ್ಸ ನತ್ಥಿ ಕತ್ಥಚಿ ಗನ್ತುಕಾಮೋ, ಭಿಕ್ಖುನಾ ಸತಣ್ಡುಲೋದಕಂ ಭಾಜನಂ ಪಟಿಗ್ಗಹೇತ್ವಾ ಉದ್ಧನಂ ಆರೋಪೇತ್ವಾ ‘‘ಅಗ್ಗಿಂ ಜಾಲೇತ್ವಾ ಗಚ್ಛಾ’’ತಿ ವತ್ತಬ್ಬೋ. ತತೋ ಪರಂ ಪುರಿಮನಯೇನೇವ ಸಬ್ಬಂ ಕಾತುಂ ವಟ್ಟತಿ. ಭಿಕ್ಖು ಯಾಗುಅತ್ಥಾಯ ಸುದ್ಧಭಾಜನಂ ಆರೋಪೇತ್ವಾ ಉದಕಂ ತಾಪೇತಿ, ವಟ್ಟತಿ. ತತ್ತೇ ಉದಕೇ ಸಾಮಣೇರೋ ತಣ್ಡುಲೇ ಪಕ್ಖಿಪತಿ, ತತೋ ಪಟ್ಠಾಯ ಭಿಕ್ಖುನಾ ಅಗ್ಗಿ ನ ಕಾತಬ್ಬೋ, ಪಕ್ಕಯಾಗುಂ ಪಟಿಗ್ಗಹೇತ್ವಾ ಪಾತುಂ ವಟ್ಟತಿ. ಸಾಮಣೇರೋ ಯಾಗುಂ ಪಚತಿ, ಹತ್ಥಕುಕ್ಕುಚ್ಚಕೋ ಭಿಕ್ಖು ಕೀಳನ್ತೋ ಭಾಜನಂ ಆಮಸತಿ, ಪಿಧಾನಂ ಆಮಸತಿ, ಉಗ್ಗತಂ ಫೇಣಂ ಛಿನ್ದಿತ್ವಾ ಪಹರತಿ, ತಸ್ಸೇವ ಪಾತುಂ ನ ವಟ್ಟತಿ, ದುರುಪಚಿಣ್ಣಂ ನಾಮ ಹೋತಿ. ಸಚೇ ಪನ ದಬ್ಬಿಂ ವಾ ಉಳುಙ್ಕಂ ವಾ ಗಹೇತ್ವಾ ಅನುಕ್ಖಿಪನ್ತೋ ಆಲೋಳೇತಿ, ಸಬ್ಬೇಸಂ ನ ವಟ್ಟತಿ, ಸಾಮಂಪಾಕಞ್ಚೇವ ಹೋತಿ ದುರುಪಚಿಣ್ಣಞ್ಚ. ಸಚೇ ಉಕ್ಖಿಪತಿ, ಉಗ್ಗಹಿತಕಮ್ಪಿ ಹೋತಿ.

೧೧೩. ಭಿಕ್ಖುನಾ ಪಿಣ್ಡಾಯ ಚರಿತ್ವಾ ಆಧಾರಕೇ ಪತ್ತೋ ಠಪಿತೋ ಹೋತಿ. ತತ್ರ ಚೇ ಅಞ್ಞೋ ಲೋಲಭಿಕ್ಖು ಕೀಳನ್ತೋ ಪತ್ತಂ ಆಮಸತಿ, ಪತ್ತಪಿಧಾನಂ ಆಮಸತಿ, ತಸ್ಸೇವ ತತೋ ಲದ್ಧಭತ್ತಂ ನ ವಟ್ಟತಿ. ಸಚೇ ನ ಪತ್ತಂ ಉಕ್ಖಿಪಿತ್ವಾ ಠಪೇತಿ, ಸಬ್ಬೇಸಂ ನ ವಟ್ಟತಿ. ತತ್ಥಜಾತಕಫಲಿನಿಸಾಖಾಯ ವಾ ವಲ್ಲಿಯಾ ವಾ ಗಹೇತ್ವಾ ಚಾಲೇತಿ, ತಸ್ಸೇವ ತತೋ ಲದ್ಧಫಲಂ ನ ವಟ್ಟತಿ, ದುರುಪಚಿಣ್ಣದುಕ್ಕಟಞ್ಚ ಆಪಜ್ಜತಿ. ‘‘ಫಲರುಕ್ಖಂ ಪನ ಅಪಸ್ಸಯಿತುಂ ವಾ ತತ್ಥ ಕಣ್ಟಕಂ ವಾ ಬನ್ಧಿತುಂ ವಟ್ಟತಿ, ದುರುಪಚಿಣ್ಣಂ ನ ಹೋತೀ’’ತಿ ಮಹಾಪಚ್ಚರಿಯಂ ವುತ್ತಂ. ಅರಞ್ಞೇ ಪತಿತಂ ಪನ ಅಮ್ಬಫಲಾದಿಂ ದಿಸ್ವಾ ‘‘ಸಾಮಣೇರಸ್ಸ ದಸ್ಸಾಮೀ’’ತಿ ಆಹರಿತ್ವಾ ದಾತುಂ ವಟ್ಟತಿ. ಸೀಹವಿಘಾಸಾದಿಂ ದಿಸ್ವಾಪಿ ‘‘ಸಾಮಣೇರಸ್ಸ ದಸ್ಸಾಮೀ’’ತಿ ಪಟಿಗ್ಗಹೇತ್ವಾ ವಾ ಅಪ್ಪಟಿಗ್ಗಹೇತ್ವಾ ವಾ ಆಹರಿತ್ವಾ ದಾತುಂ ವಟ್ಟತಿ. ಸಚೇ ಪನ ಸಕ್ಕೋತಿ ವಿತಕ್ಕಂ ಸೋಧೇತುಂ, ತತೋ ಲದ್ಧಂ ಖಾದಿತುಮ್ಪಿ ವಟ್ಟತಿ, ನೇವ ಆಮಕಮಂಸಪಟಿಗ್ಗಹಣಪಚ್ಚಯಾ, ನ ಉಗ್ಗಹಿತಕಪಚ್ಚಯಾ ವಜ್ಜಂ ಫುಸತಿ. ಮಾತಾಪಿತೂನಂ ಅತ್ಥಾಯ ತೇಲಾದೀನಿ ಗಹೇತ್ವಾ ಗಚ್ಛತೋ ಅನ್ತರಾಮಗ್ಗೇ ಬ್ಯಾಧಿ ಉಪ್ಪಜ್ಜತಿ, ತತೋ ಯಂ ಇಚ್ಛತಿ, ತಂ ಪಟಿಗ್ಗಹೇತ್ವಾ ಪರಿಭುಞ್ಜಿತುಂ ವಟ್ಟತಿ. ಸಚೇ ಪನ ಮೂಲೇಪಿ ಪಟಿಗ್ಗಹಿತಂ ಹೋತಿ, ಪುನ ಪಟಿಗ್ಗಹಣಕಿಚ್ಚಂ ನತ್ಥಿ. ಮಾತಾಪಿತೂನಂ ತಣ್ಡುಲೇ ಆಹರಿತ್ವಾ ದೇತಿ, ತೇ ತತೋಯೇವ ಯಾಗುಆದೀನಿ ಸಮ್ಪಾದೇತ್ವಾ ತಸ್ಸ ದೇನ್ತಿ, ವಟ್ಟತಿ, ಸನ್ನಿಧಿಪಚ್ಚಯಾ ಉಗ್ಗಹಿತಪಚ್ಚಯಾ ವಾ ದೋಸೋ ನತ್ಥಿ.

೧೧೪. ಭಿಕ್ಖು ಪಿದಹಿತ್ವಾ ಉದಕಂ ತಾಪೇತಿ, ಯಾವ ಪರಿಕ್ಖಯಾ ಪರಿಭುಞ್ಜಿತುಂ ವಟ್ಟತಿ. ಸಚೇ ಪನೇತ್ಥ ಛಾರಿಕಾ ಪತತಿ, ಪಟಿಗ್ಗಹೇತಬ್ಬಂ. ದೀಘಸಣ್ಡಾಸೇನ ಥಾಲಕಂ ಗಹೇತ್ವಾ ತೇಲಂ ಪಚನ್ತಸ್ಸ ಛಾರಿಕಾ ಪತತಿ, ಹತ್ಥೇನ ಅಮುಞ್ಚನ್ತೇನೇವ ಪಚಿತ್ವಾ ಓತಾರೇತ್ವಾ ಪಟಿಗ್ಗಹೇತಬ್ಬಂ. ಸಚೇ ಅಙ್ಗಾರಾಪಿ ದಾರೂನಿಪಿ ಪಟಿಗ್ಗಹೇತ್ವಾ ಠಪಿತಾನಿ, ಮೂಲಪಟಿಗ್ಗಹಣಮೇವ ವಟ್ಟತಿ. ಭಿಕ್ಖು ಉಚ್ಛುಂ ಖಾದತಿ, ಸಾಮಣೇರೋ ‘‘ಮಯ್ಹಮ್ಪಿ ದೇಥಾ’’ತಿ ವದತಿ, ‘‘ಇತೋ ಛಿನ್ದಿತ್ವಾ ಗಣ್ಹಾ’’ತಿ ವುತ್ತೋ ಗಣ್ಹಾತಿ, ಅವಸೇಸೇ ಪುನ ಪಟಿಗ್ಗಹಣಕಿಚ್ಚಂ ನತ್ಥಿ. ಗುಳಪಿಣ್ಡಂ ಖಾದನ್ತಸ್ಸಪಿ ಏಸೇವ ನಯೋ. ವುತ್ತೋಕಾಸತೋ ಛಿನ್ದಿತ್ವಾ ಗಹಿತಾವಸೇಸಞ್ಹಿ ಅಜಹಿತಪಟಿಗ್ಗಹಣಮೇವ ಹೋತಿ. ಭಿಕ್ಖು ಗುಳಂ ಭಾಜೇನ್ತೋ ಪಟಿಗ್ಗಹೇತ್ವಾ ಕೋಟ್ಠಾಸೇ ಕರೋತಿ, ಭಿಕ್ಖೂಪಿ ಸಾಮಣೇರಾಪಿ ಆಗನ್ತ್ವಾ ಏಕಗ್ಗಹಣೇನೇವ ಏಕಮೇಕಂ ಕೋಟ್ಠಾಸಂ ಗಣ್ಹನ್ತಿ, ಗಹಿತಾವಸೇಸಂ ಪಟಿಗ್ಗಹಿತಮೇವ ಹೋತಿ. ಸಚೇ ಲೋಲಸಾಮಣೇರೋ ಗಣ್ಹಿತ್ವಾ ಗಣ್ಹಿತ್ವಾ ಪುನ ಠಪೇತಿ, ತಸ್ಸ ಗಹಿತಾವಸೇಸಂ ಅಪ್ಪಟಿಗ್ಗಹಿತಕಮೇವ ಹೋತಿ.

ಭಿಕ್ಖು ಧೂಮವಟ್ಟಿಂ ಪಟಿಗ್ಗಹೇತ್ವಾ ಧೂಮಂ ಪಿವತಿ, ಮುಖಞ್ಚ ಕಣ್ಠೋ ಚ ಮನೋಸಿಲಾಯ ಲಿತ್ತೋ ವಿಯ ಹೋತಿ, ಯಾವಕಾಲಿಕಂ ಭುಞ್ಜಿತುಂ ವಟ್ಟತಿ, ಯಾವಕಾಲಿಕೇನ ಯಾವಜೀವಿಕಸಂಸಗ್ಗೇ ದೋಸೋ ನತ್ಥಿ. ಪತ್ತಂ ವಾ ರಜನಂ ವಾ ಪಚನ್ತಸ್ಸ ಕಣ್ಣನಾಸಚ್ಛಿದ್ದೇಹಿ ಧೂಮೋ ಪವಿಸತಿ, ಬ್ಯಾಧಿಪಚ್ಚಯಾ ಪುಪ್ಫಂ ವಾ ಫಲಂ ವಾ ಉಪಸಿಙ್ಘತಿ, ಅಬ್ಬೋಹಾರಿಕತ್ತಾ ವಟ್ಟತಿ. ಭತ್ತುಗ್ಗಾರೋ ತಾಲುಂ ಆಹಚ್ಚ ಅನ್ತೋಯೇವ ಪವಿಸತಿ, ಅವಿಸಯತ್ತಾ ವಟ್ಟತಿ, ಮುಖಂ ಪವಿಟ್ಠಂ ಪನ ಅಜ್ಝೋಹರತೋ ವಿಕಾಲೇ ಆಪತ್ತಿ. ದನ್ತನ್ತರೇ ಲಗ್ಗಸ್ಸ ಆಮಿಸಸ್ಸ ರಸೋ ಪವಿಸತಿ, ಆಪತ್ತಿಯೇವ. ಸಚೇ ಸುಖುಮಂ ಆಮಿಸಂ ಹೋತಿ, ರಸೋ ನ ಪಞ್ಞಾಯತಿ, ಅಬ್ಬೋಹಾರಿಕಪಕ್ಖಂ ಭಜತಿ. ಉಪಕಟ್ಠೇ ಕಾಲೇ ನಿರುದಕಟ್ಠಾನೇ ಭತ್ತಂ ಭುಞ್ಜಿತ್ವಾ ಕಕ್ಖಾರೇತ್ವಾ ದ್ವೇ ತಯೋ ಖೇಳಪಿಣ್ಡೇ ಪಾತೇತ್ವಾ ಉದಕಟ್ಠಾನಂ ಗನ್ತ್ವಾ ಮುಖಂ ವಿಕ್ಖಾಲೇತಬ್ಬಂ. ಪಟಿಗ್ಗಹೇತ್ವಾ ಠಪಿತಸಿಙ್ಗಿವೇರಾದೀನಂ ಅಙ್ಕುರಾ ನಿಕ್ಖಮನ್ತಿ, ಪುನ ಪಟಿಗ್ಗಹಣಕಿಚ್ಚಂ ನತ್ಥಿ. ಲೋಣೇ ಅಸತಿ ಸಮುದ್ದೋದಕೇನ ಲೋಣಕಿಚ್ಚಂ ಕಾತುಂ ವಟ್ಟತಿ, ಪಟಿಗ್ಗಹೇತ್ವಾ ಠಪಿತಲೋಣೋದಕಂ ಲೋಣಂ ಹೋತಿ, ಲೋಣಂ ವಾ ಉದಕಂ ಹೋತಿ, ರಸೋ ವಾ ಫಾಣಿತಂ ಹೋತಿ, ಫಾಣಿತಂ ವಾ ರಸೋ ಹೋತಿ, ಮೂಲಪಟಿಗ್ಗಹಣಮೇವ ವಟ್ಟತಿ.

ಹಿಮಕರಕಾ ಉದಕಗತಿಕಾ ಏವ. ಪಾರಿಹಾರಿಕೇನ ಕತಕಟ್ಠಿನಾ ಉದಕಂ ಪಸಾದೇನ್ತಿ, ತಂ ಅಬ್ಬೋಹಾರಿಕಂ, ಆಮಿಸೇನ ಸದ್ಧಿಂ ವಟ್ಟತಿ. ಆಮಿಸಗತಿಕೇಹಿ ಕಪಿತ್ಥಫಲಾದೀಹಿ ಪಸಾದಿತಂ ಪುರೇಭತ್ತಮೇವ ವಟ್ಟತಿ. ಪೋಕ್ಖರಣೀಆದೀಸು ಉದಕಂ ಬಹಲಂ ಹೋತಿ, ವಟ್ಟತಿ. ಸಚೇ ಪನ ಮುಖೇ ಹತ್ಥೇ ಚ ಲಗ್ಗತಿ, ನ ವಟ್ಟತಿ, ಪಟಿಗ್ಗಹೇತ್ವಾ ಪರಿಭುಞ್ಜಿತಬ್ಬಂ. ಖೇತ್ತೇಸು ಕಸಿತಟ್ಠಾನೇ ಬಹಲಂ ಉದಕಂ ಹೋತಿ, ಪಟಿಗ್ಗಹೇತಬ್ಬಂ. ಸಚೇ ಸನ್ದಿತ್ವಾ ಕನ್ದರಾದೀನಿ ಪವಿಸಿತ್ವಾ ನದಿಂ ಪೂರೇತಿ, ವಟ್ಟತಿ. ಕಕುಧಸೋಬ್ಭಾದಯೋ ಹೋನ್ತಿ ರುಕ್ಖತೋ ಪತಿತೇಹಿ ಪುಪ್ಫೇಹಿ ಸಞ್ಛನ್ನೋದಕಾ. ಸಚೇ ಪುಪ್ಫರಸೋ ನ ಪಞ್ಞಾಯತಿ, ಪಟಿಗ್ಗಹಣಕಿಚ್ಚಂ ನತ್ಥಿ. ಪರಿತ್ತಂ ಉದಕಂ ಹೋತಿ, ರಸೋ ಪಞ್ಞಾಯತಿ, ಪಟಿಗ್ಗಹೇತಬ್ಬಂ. ಪಬ್ಬತಕನ್ದರಾದೀಸು ಕಾಳವಣ್ಣಪಣ್ಣಚ್ಛನ್ನಉದಕೇಪಿ ಏಸೇವ ನಯೋ.

ಪಾನೀಯಘಟೇ ಸರೇಣುಕಾನಿ ವಾ ಸವಣ್ಟಖೀರಾನಿ ವಾ ಪುಪ್ಫಾನಿ ಪಕ್ಖಿತ್ತಾನಿ ಹೋನ್ತಿ, ಪಟಿಗ್ಗಹೇತಬ್ಬಂ, ಪುಪ್ಫಾನಿ ವಾ ಪಟಿಗ್ಗಹೇತ್ವಾ ಪಕ್ಖಿಪಿತಬ್ಬಾನಿ. ಪಾಟಲಿಮಲ್ಲಿಕಾ ಪಕ್ಖಿತ್ತಾ ಹೋನ್ತಿ, ವಾಸಮತ್ತಂ ತಿಟ್ಠತಿ, ತಂ ಅಬ್ಬೋಹಾರಿಕಂ. ದುಭಿಯದಿವಸೇಪಿ ಆಮಿಸೇನ ಸದ್ಧಿಂ ವಟ್ಟತಿ. ಭಿಕ್ಖುನಾ ಠಪಿತಪುಪ್ಫವಾಸಿತಕಪಾನೀಯತೋ ಸಾಮಣೇರೋ ಪಾನೀಯಂ ಗಹೇತ್ವಾ ಪೀತಾವಸೇಸಕಂ ತತ್ಥೇವ ಆಕಿರತಿ, ಪಟಿಗ್ಗಹೇತಬ್ಬಂ. ಪದುಮಸರಾದೀಸು ಉದಕಂ ಸನ್ಥರಿತ್ವಾ ಠಿತಂ ಪುಪ್ಫರೇಣುಂ ಘಟೇನ ವಿಕ್ಖಮ್ಭೇತ್ವಾ ಉದಕಂ ಗಹೇತುಂ ವಟ್ಟತಿ. ಕಪ್ಪಿಯಂ ಕಾರಾಪೇತ್ವಾ ಪಟಿಗ್ಗಹೇತ್ವಾ ಠಪಿತಂ ದನ್ತಕಟ್ಠಂ ಹೋತಿ, ಸಚೇ ತಸ್ಸ ರಸಂ ಪಿವಿತುಕಾಮೋ, ಮೂಲಪಟಿಗ್ಗಹಣಮೇವ ವಟ್ಟತಿ, ಅಪ್ಪಟಿಗ್ಗಹೇತ್ವಾ ಠಪಿತಂ ಪಟಿಗ್ಗಹೇತಬ್ಬಂ. ಅಜಾನನ್ತಸ್ಸ ರಸೇ ಪವಿಟ್ಠೇಪಿ ಆಪತ್ತಿಯೇವ. ಅಚಿತ್ತಕಞ್ಹಿ ಇದಂ ಸಿಕ್ಖಾಪದಂ.

೧೧೫. ಮಹಾಭೂತೇಸು ಕಿಂ ವಟ್ಟತಿ, ಕಿಂ ನ ವಟ್ಟತೀತಿ? ಖೀರಂ ತಾವ ವಟ್ಟತಿ, ಕಪ್ಪಿಯಮಂಸಖೀರಂ ವಾ ಹೋತು ಅಕಪ್ಪಿಯಮಂಸಖೀರಂ ವಾ, ಪಿವನ್ತಸ್ಸ ಅನಾಪತ್ತಿ. ಅಸ್ಸು ಖೇಳೋ ಸಿಙ್ಘಾಣಿಕಾ ಮುತ್ತಂ ಕರೀಸಂ ಸೇಮ್ಹಂ ದನ್ತಮಲಂ ಅಕ್ಖಿಗೂಥಕೋ ಕಣ್ಣಗೂಥಕೋ ಸರೀರೇ ಉಟ್ಠಿತಲೋಣನ್ತಿ ಇದಂ ಸಬ್ಬಂ ವಟ್ಟತಿ. ಯಂ ಪನೇತ್ಥ ಠಾನತೋ ಚವಿತ್ವಾ ಪತ್ತೇ ವಾ ಹತ್ಥೇ ವಾ ಪತತಿ, ತಂ ಪಟಿಗ್ಗಹೇತಬ್ಬಂ, ಅಙ್ಗಲಗ್ಗಂ ಪಟಿಗ್ಗಹಿತಕಮೇವ. ಉಣ್ಹಪಾಯಾಸಂ ಭುಞ್ಜನ್ತಸ್ಸ ಸೇದೋ ಅಙ್ಗುಲಿಅನುಸಾರೇನ ಏಕಾಬದ್ಧೋವ ಹುತ್ವಾ ಪಾಯಾಸೇ ಸನ್ತಿಟ್ಠತಿ, ಪಿಣ್ಡಾಯ ವಾ ಚರನ್ತಸ್ಸ ಹತ್ಥತೋ ಪತ್ತಸ್ಸ ಮುಖವಟ್ಟಿತೋ ವಾ ಪತ್ತತಲಂ ಓರೋಹತಿ, ಏತ್ಥ ಪಟಿಗ್ಗಹಣಕಿಚ್ಚಂ ನತ್ಥಿ, ಝಾಮಮಹಾಭೂತೇ ಇದಂ ನಾಮ ನ ವಟ್ಟತೀತಿ ನತ್ಥಿ, ದುಜ್ಝಾಪಿತಂ ಪನ ನ ವಟ್ಟತಿ. ಸುಜ್ಝಾಪಿತಂ ಪನ ಮನುಸ್ಸಟ್ಠಿಮ್ಪಿ ಚುಣ್ಣಂ ಕತ್ವಾ ಲೇಹೇ ಉಪನೇತುಂ ವಟ್ಟತಿ. ಚತ್ತಾರಿ ಮಹಾವಿಕಟಾನಿ ಅಸತಿ ಕಪ್ಪಿಯಕಾರಕೇ ಸಾಮಂ ಗಹೇತ್ವಾ ಪರಿಭುಞ್ಜಿತುಂ ವಟ್ಟನ್ತಿ. ಏತ್ಥ ಚ ದುಬ್ಬಚೋಪಿ ಅಸಮತ್ಥೋಪಿ ಕಪ್ಪಿಯಕಾರಕೋ ಅಸನ್ತಪಕ್ಖೇಯೇವ ತಿಟ್ಠತಿ. ಛಾರಿಕಾಯ ಅಸತಿ ಸುಕ್ಖದಾರುಂ ಝಾಪೇತ್ವಾ ಛಾರಿಕಾ ಗಹೇತಬ್ಬಾ. ಸುಕ್ಖದಾರುಮ್ಹಿ ಅಸತಿ ಅಲ್ಲದಾರುಂ ರುಕ್ಖತೋ ಛಿನ್ದಿತ್ವಾಪಿ ಕಾತುಂ ವಟ್ಟತಿ. ಇದಂ ಪನ ಚತುಬ್ಬಿಧಮ್ಪಿ ಮಹಾವಿಕಟಂ ಕಾಲೋದಿಸ್ಸಂ ನಾಮ, ಸಪ್ಪದಟ್ಠಕ್ಖಣೇಯೇವ ವಟ್ಟತಿ.

ಇತಿ ಪಾಳಿಮುತ್ತಕವಿನಯವಿನಿಚ್ಛಯಸಙ್ಗಹೇ

ಪಟಿಗ್ಗಹಣವಿನಿಚ್ಛಯಕಥಾ ಸಮತ್ತಾ.