೧೦. ಭಣ್ಡಪಟಿಸಾಮನವಿನಿಚ್ಛಯಕಥಾ

೫೩. ಭಣ್ಡಸ್ಸ ಪಟಿಸಾಮನನ್ತಿ ಪರೇಸಂ ಭಣ್ಡಸ್ಸ ಗೋಪನಂ. ಪರೇಸಞ್ಹಿ (ಪಾಚಿ. ಅಟ್ಠ. ೫೦೬) ಕಪ್ಪಿಯವತ್ಥು ವಾ ಹೋತು ಅಕಪ್ಪಿಯವತ್ಥು ವಾ, ಅನ್ತಮಸೋ ಮಾತು ಕಣ್ಣಪಿಳನ್ಧನಂ ಕಾಲಪಣ್ಣಮ್ಪಿ ಗಿಹಿಸನ್ತಕಂ ಭಣ್ಡಾಗಾರಿಕಸೀಸೇನ ಪಟಿಸಾಮೇನ್ತಸ್ಸ ಪಾಚಿತ್ತಿಯಂ. ಸಚೇ ಪನ ಮಾತಾಪಿತೂನಂ ಸನ್ತಕಂ ಅವಸ್ಸಂ ಪಟಿಸಾಮೇತಬ್ಬಂ ಕಪ್ಪಿಯಭಣ್ಡಂ ಹೋತಿ, ಅತ್ತನೋ ಅತ್ಥಾಯ ಗಹೇತ್ವಾ ಪಟಿಸಾಮೇತಬ್ಬಂ. ‘‘ಇದಂ ಪಟಿಸಾಮೇತ್ವಾ ದೇಹೀ’’ತಿ ಪನ ವುತ್ತೇ ‘‘ನ ವಟ್ಟತೀ’’ತಿ ಪಟಿಕ್ಖಿಪಿತಬ್ಬಂ. ಸಚೇ ‘‘ಪಟಿಸಾಮೇಹೀ’’ತಿ ಪಾತೇತ್ವಾ ಗಚ್ಛನ್ತಿ, ಪಲಿಬೋಧೋ ನಾಮ ಹೋತಿ, ಪಟಿಸಾಮೇತುಂ ವಟ್ಟತಿ. ವಿಹಾರೇ ಕಮ್ಮಂ ಕರೋನ್ತಾ ವಡ್ಢಕೀಆದಯೋ ವಾ ರಾಜವಲ್ಲಭಾ ವಾ ‘‘ಅತ್ತನೋ ಉಪಕರಣಭಣ್ಡಂ ವಾ ಸಯನಭಣ್ಡಂ ವಾ ಪಟಿಸಾಮೇತ್ವಾ ದೇಥಾ’’ತಿ ವದನ್ತಿ, ಛನ್ದೇನಪಿ ಭಯೇನಪಿ ನ ಕಾತಬ್ಬಮೇವ, ಗುತ್ತಟ್ಠಾನಂ ಪನ ದಸ್ಸೇತುಂ ವಟ್ಟತಿ, ಬಲಕ್ಕಾರೇನ ಪಾತೇತ್ವಾ ಗತೇಸು ಚ ಪಟಿಸಾಮೇತುಂ.

ಸಚೇ (ಪಾರಾ. ಅಟ್ಠ. ೧.೧೧೧) ಅತ್ತನೋ ಹತ್ಥೇ ಪಟಿಸಾಮನತ್ಥಾಯ ಠಪಿತಂ ಭಣ್ಡಂ ಸಾಮಿಕೇನ ‘‘ದೇಹಿ ಮೇ ಭಣ್ಡ’’ನ್ತಿ ಯಾಚಿತೋ ಅದಾತುಕಾಮೋ ‘‘ನಾಹಂ ಗಣ್ಹಾಮೀ’’ತಿ ಭಣತಿ, ಸಮ್ಪಜಾನಮುಸಾವಾದೇಪಿ ಅದಿನ್ನಾದಾನಸ್ಸ ಪಯೋಗತ್ತಾ ದುಕ್ಕಟಂ. ‘‘ಕಿಂ ತುಮ್ಹೇ ಭಣಥ, ನೇವಿದಂ ಮಯ್ಹಂ ಅನುರೂಪಂ, ನ ತುಮ್ಹಾಕ’’ನ್ತಿಆದೀನಿ ವದನ್ತಸ್ಸಪಿ ದುಕ್ಕಟಮೇವ. ‘‘ರಹೋ ಮಯಾ ಏತಸ್ಸ ಹತ್ಥೇ ಠಪಿತಂ, ನ ಅಞ್ಞೋ ಕೋಚಿ ಜಾನಾತಿ, ದಸ್ಸತಿ ನು ಖೋ ಮೇ, ನೋ’’ತಿ ಸಾಮಿಕೋ ವಿಮತಿಂ ಉಪ್ಪಾದೇತಿ, ಭಿಕ್ಖುಸ್ಸ ಥುಲ್ಲಚ್ಚಯಂ. ತಸ್ಸ ಫರುಸಾದಿಭಾವಂ ದಿಸ್ವಾ ಸಾಮಿಕೋ ‘‘ನ ಮಯ್ಹಂ ದಸ್ಸತೀ’’ತಿ ಧುರಂ ನಿಕ್ಖಿಪತಿ, ತತ್ರ ಸಚಾಯಂ ಭಿಕ್ಖು ‘‘ಕಿಲಮೇತ್ವಾ ನಂ ದಸ್ಸಾಮೀ’’ತಿ ದಾನೇ ಸಉಸ್ಸಾಹೋ, ರಕ್ಖತಿ ತಾವ. ಸಚೇಪಿ ಸೋ ದಾನೇ ನಿರುಸ್ಸಾಹೋ, ಭಣ್ಡಸಾಮಿಕೋ ಪನ ಗಹಣೇ ಸಉಸ್ಸಾಹೋ, ರಕ್ಖತಿಯೇವ. ಯದಿ ಪನ ತಸ್ಮಿಂ ದಾನೇ ನಿರುಸ್ಸಾಹೋ ಭಣ್ಡಸಾಮಿಕೋ ‘‘ನ ಮಯ್ಹಂ ದಸ್ಸತೀ’’ತಿ ಧುರಂ ನಿಕ್ಖಿಪತಿ, ಏವಂ ಉಭಿನ್ನಂ ಧುರನಿಕ್ಖೇಪೇನ ಭಿಕ್ಖುನೋ ಪಾರಾಜಿಕಂ. ಯದಿಪಿ ಮುಖೇನ ‘‘ದಸ್ಸಾಮೀ’’ತಿ ವದತಿ, ಚಿತ್ತೇನ ಪನ ಅದಾತುಕಾಮೋ, ಏವಮ್ಪಿ ಸಾಮಿಕಸ್ಸ ಧುರನಿಕ್ಖೇಪೇ ಪಾರಾಜಿಕಂ. ತಂ ಪನ ಸಙ್ಗೋಪನತ್ಥಾಯ ಅತ್ತನೋ ಹತ್ಥೇ ಪರೇಹಿ ಠಪಿತಂ ಭಣ್ಡಂ ಅಗುತ್ತದೇಸತೋ ಠಾನಾ ಚಾವೇತ್ವಾ ಗುತ್ತಟ್ಠಾನೇ ಠಪನತ್ಥಾಯ ಹರತೋ ಅನಾಪತ್ತಿ. ಥೇಯ್ಯಚಿತ್ತೇನಪಿ ಠಾನಾ ಚಾವೇನ್ತಸ್ಸ ಅವಹಾರೋ ನತ್ಥಿ. ಕಸ್ಮಾ? ಅತ್ತನೋ ಹತ್ಥೇ ನಿಕ್ಖಿತ್ತತ್ತಾ, ಭಣ್ಡದೇಯ್ಯಂ ಪನ ಹೋತಿ. ಥೇಯ್ಯಚಿತ್ತೇನ ಪರಿಭುಞ್ಜತೋಪಿ ಏಸೇವ ನಯೋ.

೫೪. ಪಞ್ಚನ್ನಂ ಸಹಧಮ್ಮಿಕಾನಂ ಸನ್ತಕಂ ಪನ ಯಂ ಕಿಞ್ಚಿ ಪರಿಕ್ಖಾರಂ ಪಟಿಸಾಮೇತುಂ ವಟ್ಟತಿ. ಸಚೇ ಆಗನ್ತುಕೋ ಭಿಕ್ಖು ಆವಾಸಿಕಾನಂ ಚೀವರಕಮ್ಮಂ ಕರೋನ್ತಾನಂ ಸಮೀಪೇ ಪತ್ತಚೀವರಂ ಠಪೇತ್ವಾ ‘‘ಏತೇ ಸಙ್ಗೋಪೇಸ್ಸನ್ತೀ’’ತಿ ಮಞ್ಞಮಾನೋ ನಹಾಯಿತುಂ ವಾ ಅಞ್ಞತ್ರ ವಾ ಗಚ್ಛತಿ, ಸಚೇ ತಂ ಆವಾಸಿಕಾ ಸಙ್ಗೋಪೇನ್ತಿ, ಇಚ್ಚೇತಂ ಕುಸಲಂ. ನೋ ಚೇ, ನಟ್ಠೇ ಗೀವಾ ನ ಹೋತಿ. ಸಚೇಪಿ ಸೋ ‘‘ಇದಂ, ಭನ್ತೇ, ಠಪೇಥಾ’’ತಿ ವತ್ವಾ ಗಚ್ಛತಿ, ಇತರೇ ಚ ಕಿಚ್ಚಪಸುತತ್ತಾ ನ ಜಾನನ್ತಿ, ಏಸೇವ ನಯೋ. ಅಥಾಪಿ ತೇ ‘‘ಇದಂ, ಭನ್ತೇ, ಠಪೇಥಾ’’ತಿ ವುತ್ತಾ ‘‘ಮಯಂ ಬ್ಯಾವಟಾ’’ತಿ ಪಟಿಕ್ಖಿಪನ್ತಿ, ಇತರೋ ಚ ‘‘ಅವಸ್ಸಂ ಠಪೇಸ್ಸನ್ತೀ’’ತಿ ಅನಾದಿಯಿತ್ವಾ ಗಚ್ಛತಿ, ಏಸೇವ ನಯೋ. ಸಚೇ ಪನ ತೇ ತೇನ ಯಾಚಿತಾ ವಾ ಅಯಾಚಿತಾ ವಾ ‘‘ಮಯಂ ಠಪೇಸ್ಸಾಮ, ತ್ವಂ ಗಚ್ಛಾ’’ತಿ ವದನ್ತಿ, ತಂ ಸಙ್ಗೋಪಿತಬ್ಬಂ. ನೋ ಚೇ ಸಙ್ಗೋಪೇನ್ತಿ, ನಟ್ಠೇ ಗೀವಾ. ಕಸ್ಮಾ? ಸಮ್ಪಟಿಚ್ಛಿತತ್ತಾ.

ಯೋ ಭಿಕ್ಖು ಭಣ್ಡಾಗಾರಿಕೋ ಹುತ್ವಾ ಪಚ್ಚೂಸಸಮಯೇ ಏವ ಭಿಕ್ಖೂನಂ ಪತ್ತಚೀವರಾನಿ ಹೇಟ್ಠಾಪಾಸಾದಂ ಓರೋಪೇತ್ವಾ ದ್ವಾರಂ ಅಪಿದಹಿತ್ವಾ ತೇಸಮ್ಪಿ ಅನಾರೋಚೇತ್ವಾವ ದೂರೇ ಭಿಕ್ಖಾಚಾರಂ ಗಚ್ಛತಿ, ತಾನಿ ಚೇ ಚೋರಾ ಹರನ್ತಿ, ತಸ್ಸೇವ ಗೀವಾ. ಯೋ ಪನ ಭಿಕ್ಖು ಭಿಕ್ಖೂಹಿ ‘‘ಓರೋಪೇಥ, ಭನ್ತೇ, ಪತ್ತಚೀವರಾನಿ, ಕಾಲೋ ಸಲಾಕಗ್ಗಹಣಸ್ಸಾ’’ತಿ ವುತ್ತೋ ‘‘ಸಮಾಗತಾತ್ಥಾ’’ತಿ ಪುಚ್ಛಿತ್ವಾ ‘‘ಆಮ ಸಮಾಗತಾಮ್ಹಾ’’ತಿ ವುತ್ತೇ ಪತ್ತಚೀವರಾನಿ ನೀಹರಿತ್ವಾ ನಿಕ್ಖಿಪಿತ್ವಾ ಭಣ್ಡಾಗಾರದ್ವಾರಂ ಬನ್ಧಿತ್ವಾ ‘‘ತುಮ್ಹೇ ಪತ್ತಚೀವರಾನಿ ಗಹೇತ್ವಾ ಹೇಟ್ಠಾಪಾಸಾದದ್ವಾರಂ ಪಟಿಜಗ್ಗಿತ್ವಾ ಗಚ್ಛೇಯ್ಯಾಥಾ’’ತಿ ವತ್ವಾ ಗಚ್ಛತಿ. ತತ್ರ ಚೇಕೋ ಅಲಸಜಾತಿಕೋ ಭಿಕ್ಖು ಭಿಕ್ಖೂಸು ಗತೇಸು ಪಚ್ಛಾ ಅಕ್ಖೀನಿ ಪುಞ್ಛನ್ತೋ ಉಟ್ಠಹಿತ್ವಾ ಉದಕಟ್ಠಾನಂ ಮುಖಧೋವನತ್ಥಂ ಗಚ್ಛತಿ, ತಂ ಖಣಂ ದಿಸ್ವಾ ಚೋರಾ ತಸ್ಸ ಪತ್ತಚೀವರಂ ಹರನ್ತಿ, ಸುಹಟಂ, ಭಣ್ಡಾಗಾರಿಕಸ್ಸ ಗೀವಾ ನ ಹೋತಿ.

ಸಚೇಪಿ ಕೋಚಿ ಭಣ್ಡಾಗಾರಿಕಸ್ಸ ಅನಾರೋಚೇತ್ವಾವ ಭಣ್ಡಾಗಾರೇ ಅತ್ತನೋ ಪರಿಕ್ಖಾರಂ ಠಪೇತಿ, ತಸ್ಮಿಮ್ಪಿ ನಟ್ಠೇ ಭಣ್ಡಾಗಾರಿಕಸ್ಸ ಗೀವಾ ನ ಹೋತಿ. ಸಚೇ ಪನ ಭಣ್ಡಾಗಾರಿಕೋ ತಂ ದಿಸ್ವಾ ‘‘ಅಟ್ಠಾನೇ ಠಪಿತ’’ನ್ತಿ ಗಹೇತ್ವಾ ಠಪೇತಿ, ನಟ್ಠೇ ತಸ್ಸೇವ ಗೀವಾ. ಸಚೇಪಿ ಠಪಿತಭಿಕ್ಖುನಾ ‘‘ಮಯಾ, ಭನ್ತೇ, ಈದಿಸೋ ನಾಮ ಪರಿಕ್ಖಾರೋ ಠಪಿತೋ, ಉಪಧಾರೇಯ್ಯಾಥಾ’’ತಿ ವುತ್ತೋ ‘‘ಸಾಧೂ’’ತಿ ಸಮ್ಪಟಿಚ್ಛತಿ, ದುನ್ನಿಕ್ಖಿತ್ತಂ ವಾ ಮಞ್ಞಮಾನೋ ಅಞ್ಞಸ್ಮಿಂ ಠಾನೇ ಠಪೇತಿ, ನಟ್ಠೇ ತಸ್ಸೇವ ಗೀವಾ. ‘‘ನಾಹಂ ಜಾನಾಮೀ’’ತಿ ಪಟಿಕ್ಖಿಪನ್ತಸ್ಸ ಪನ ನತ್ಥಿ ಗೀವಾ. ಯೋಪಿ ತಸ್ಸ ಪಸ್ಸನ್ತಸ್ಸೇವ ಠಪೇತಿ, ಭಣ್ಡಾಗಾರಿಕಞ್ಚ ನ ಸಮ್ಪಟಿಚ್ಛಾಪೇತಿ, ನಟ್ಠಂ ಸುನಟ್ಠಮೇವ. ಸಚೇ ಪನ ನಂ ಭಣ್ಡಾಗಾರಿಕೋ ಅಞ್ಞತ್ರ ಠಪೇತಿ, ನಟ್ಠೇ ಗೀವಾ. ಸಚೇ ಭಣ್ಡಾಗಾರಂ ಸುಗುತ್ತಂ, ಸಬ್ಬೋ ಸಙ್ಘಸ್ಸ ಚೇತಿಯಸ್ಸ ಚ ಪರಿಕ್ಖಾರೋ ತತ್ಥೇವ ಠಪೀಯತಿ, ಭಣ್ಡಾಗಾರಿಕೋ ಚ ಬಾಲೋ ಅಬ್ಯತ್ತೋ ದ್ವಾರಂ ವಿವರಿತ್ವಾ ಧಮ್ಮಕಥಂ ವಾ ಸೋತುಂ ಅಞ್ಞಂ ವಾ ಕಿಞ್ಚಿ ಕಾತುಂ ಕತ್ಥಚಿ ಗಚ್ಛತಿ, ತಂ ಖಣಂ ದಿಸ್ವಾ ಯತ್ತಕಂ ಚೋರಾ ಹರನ್ತಿ, ಸಬ್ಬಂ ತಸ್ಸ ಗೀವಾ. ಭಣ್ಡಾಗಾರತೋ ನಿಕ್ಖಮಿತ್ವಾ ಬಹಿ ಚಙ್ಕಮನ್ತಸ್ಸ ವಾ ದ್ವಾರಂ ವಿವರಿತ್ವಾ ಸರೀರಂ ಉತುಂ ಗಾಹಾಪೇನ್ತಸ್ಸ ವಾ ತತ್ಥೇವ ಸಮಣಧಮ್ಮಾನುಯೋಗೇನ ನಿಸಿನ್ನಸ್ಸ ವಾ ತತ್ಥೇವ ನಿಸೀದಿತ್ವಾ ಕೇನಚಿ ಕಮ್ಮೇನ ಬ್ಯಾವಟಸ್ಸ ವಾ ಉಚ್ಚಾರಪಸ್ಸಾವಪೀಳಿತಸ್ಸಪಿ ಸತೋ ತತ್ಥೇವ ಉಪಚಾರೇ ವಿಜ್ಜಮಾನೇ ಬಹಿ ಗಚ್ಛತೋ ವಾ ಅಞ್ಞೇನ ವಾ ಕೇನಚಿ ಆಕಾರೇನ ಪಮತ್ತಸ್ಸ ಸತೋ ದ್ವಾರಂ ವಿವರಿತ್ವಾ ವಾ ವಿವಟಮೇವ ಪವಿಸಿತ್ವಾ ವಾ ಸನ್ಧಿಂ ಛಿನ್ದಿತ್ವಾ ವಾ ಯತ್ತಕಂ ತಸ್ಸ ಪಮಾದಪಚ್ಚಯಾ ಚೋರಾ ಹರನ್ತಿ, ಸಬ್ಬಂ ತಸ್ಸೇವ ಗೀವಾ. ‘‘ಉಣ್ಹಸಮಯೇ ಪನ ವಾತಪಾನಂ ವಿವರಿತ್ವಾ ನಿಪಜ್ಜಿತುಂ ವಟ್ಟತೀ’’ತಿ ವದನ್ತಿ. ಉಚ್ಚಾರಪೀಳಿತಸ್ಸ ಪನ ತಸ್ಮಿಂ ಉಪಚಾರೇ ಅಸತಿ ಅಞ್ಞತ್ಥ ಗಚ್ಛನ್ತಸ್ಸ ಗಿಲಾನಪಕ್ಖೇ ಠಿತತ್ತಾ ಅವಿಸಯೋ, ತಸ್ಮಾ ಗೀವಾ ನ ಹೋತಿ.

೫೫. ಯೋ ಪನ ಅನ್ತೋ ಉಣ್ಹಪೀಳಿತೋ ದ್ವಾರಂ ಸುಗುತ್ತಂ ಕತ್ವಾ ಬಹಿ ನಿಕ್ಖಮತಿ, ಚೋರಾ ತಂ ಗಹೇತ್ವಾ ‘‘ದ್ವಾರಂ ವಿವರಾ’’ತಿ ವದನ್ತಿ, ಯಾವತತಿಯಂ ನ ವಿವರಿತಬ್ಬಂ. ಯದಿ ಪನ ತೇ ಚೋರಾ ‘‘ಸಚೇ ನ ವಿವರಸಿ, ತಞ್ಚ ಮಾರೇಸ್ಸಾಮ, ದ್ವಾರಞ್ಚ ಭಿನ್ದಿತ್ವಾ ಪರಿಕ್ಖಾರಂ ಹರಿಸ್ಸಾಮಾ’’ತಿ ಫರಸುಆದೀನಿ ಉಕ್ಖಿಪನ್ತಿ, ‘‘ಮಯಿ ಚ ಮತೇ ಸಙ್ಘಸ್ಸ ಚ ಸೇನಾಸನೇ ವಿನಟ್ಠೇ ಗುಣೋ ನತ್ಥೀ’’ತಿ ವಿವರಿತುಂ ವಟ್ಟತಿ. ಇಧಾಪಿ ‘‘ಅವಿಸಯತ್ತಾ ಗೀವಾ ನತ್ಥೀ’’ತಿ ವದನ್ತಿ. ಸಚೇ ಕೋಚಿ ಆಗನ್ತುಕೋ ಕುಞ್ಚಿಕಂ ವಾ ದೇತಿ, ದ್ವಾರಂ ವಾ ವಿವರತಿ, ಯತ್ತಕಂ ಚೋರಾ ಹರನ್ತಿ, ಸಬ್ಬಂ ತಸ್ಸ ಗೀವಾ. ಸಙ್ಘೇನ ಭಣ್ಡಾಗಾರಂ ಗುತ್ತತ್ಥಾಯ ಸೂಚಿಯನ್ತಕಞ್ಚ ಕುಞ್ಚಿಕಮುದ್ದಿಕಾ ಚ ಯೋಜೇತ್ವಾ ದಿನ್ನಾ ಹೋತಿ, ಭಣ್ಡಾಗಾರಿಕೋ ಘಟಿಕಮತ್ತಂ ದತ್ವಾ ನಿಪಜ್ಜತಿ, ಚೋರಾ ವಿವರಿತ್ವಾ ಪರಿಕ್ಖಾರಂ ಹರನ್ತಿ, ತಸ್ಸೇವ ಗೀವಾ. ಸೂಚಿಯನ್ತಕಞ್ಚ ಕುಞ್ಚಿಕಮುದ್ದಿಕಞ್ಚ ಯೋಜೇತ್ವಾ ನಿಪನ್ನಂ ಪನೇತಂ ಸಚೇ ಚೋರಾ ಆಗನ್ತ್ವಾ ‘‘ದ್ವಾರಂ ವಿವರಾಹೀ’’ತಿ ವದನ್ತಿ, ತತ್ಥ ಪುರಿಮನಯೇನೇವ ಪಟಿಪಜ್ಜಿತಬ್ಬಂ. ಏವಂ ಸುಗುತ್ತಂ ಕತ್ವಾ ನಿಪನ್ನೇ ಪನ ಸಚೇ ಭಿತ್ತಿಂ ವಾ ಛದನಂ ವಾ ಭಿನ್ದಿತ್ವಾ ಉಮಙ್ಗೇನ ವಾ ಪವಿಸಿತ್ವಾ ಹರನ್ತಿ, ನ ತಸ್ಸ ಗೀವಾ.

ಸಚೇ ಭಣ್ಡಾಗಾರೇ ಅಞ್ಞೇಪಿ ಥೇರಾ ವಸನ್ತಿ, ವಿವಟೇ ದ್ವಾರೇ ಅತ್ತನೋ ಅತ್ತನೋ ಪರಿಕ್ಖಾರಂ ಗಹೇತ್ವಾ ಗಚ್ಛನ್ತಿ, ಭಣ್ಡಾಗಾರಿಕೋ ತೇಸು ಗತೇಸು ದ್ವಾರಂ ನ ಜಗ್ಗತಿ, ಸಚೇ ತತ್ಥ ಕಿಞ್ಚಿ ಅವಹರೀಯತಿ, ಭಣ್ಡಾಗಾರಿಕಸ್ಸ ಇಸ್ಸರವತಾಯ ಭಣ್ಡಾಗಾರಿಕಸ್ಸೇವ ಗೀವಾ, ಥೇರೇಹಿ ಪನ ಸಹಾಯೇಹಿ ಭವಿತಬ್ಬಂ. ಅಯಞ್ಹಿ ಸಾಮೀಚಿ. ಯದಿ ಭಣ್ಡಾಗಾರಿಕೋ ‘‘ತುಮ್ಹೇ ಬಹಿ ಠತ್ವಾ ತುಮ್ಹಾಕಂ ಪರಿಕ್ಖಾರಂ ಗಣ್ಹಥ, ಮಾ ಪವಿಸಿತ್ಥಾ’’ತಿ ವದತಿ, ತೇಸಞ್ಚ ಏಕೋ ಲೋಲಮಹಾಥೇರೋ ಸಾಮಣೇರೇಹಿ ಚೇವ ಉಪಟ್ಠಾಕೇಹಿ ಚ ಸದ್ಧಿಂ ಭಣ್ಡಾಗಾರಂ ಪವಿಸಿತ್ವಾ ನಿಸೀದತಿ ಚೇವ ನಿಪಜ್ಜತಿ ಚ, ಯತ್ತಕಂ ಭಣ್ಡಂ ನಸ್ಸತಿ, ಸಬ್ಬಂ ತಸ್ಸ ಗೀವಾ, ಭಣ್ಡಾಗಾರಿಕೇನ ಪನ ಅವಸೇಸಥೇರೇಹಿ ಚ ಸಹಾಯೇಹಿ ಭವಿತಬ್ಬಂ. ಅಥ ಭಣ್ಡಾಗಾರಿಕೋವ ಲೋಲಸಾಮಣೇರೇ ಚ ಉಪಟ್ಠಾಕೇ ಚ ಗಹೇತ್ವಾ ಭಣ್ಡಾಗಾರೇ ನಿಸೀದತಿ ಚೇವ ನಿಪಜ್ಜತಿ ಚ, ಯತ್ತಕಂ ನಸ್ಸತಿ, ಸಬ್ಬಂ ತಸ್ಸೇವ ಗೀವಾ. ತಸ್ಮಾ ಭಣ್ಡಾಗಾರಿಕೇನೇವ ತತ್ಥ ವಸಿತಬ್ಬಂ, ಅವಸೇಸೇಹಿ ಅಪ್ಪೇವ ರುಕ್ಖಮೂಲೇ ವಸಿತಬ್ಬಂ, ನ ಚ ಭಣ್ಡಾಗಾರೇತಿ.

೫೬. ಯೇ ಪನ ಅತ್ತನೋ ಅತ್ತನೋ ಸಭಾಗಭಿಕ್ಖೂನಂ ವಸನಗಬ್ಭೇಸು ಪರಿಕ್ಖಾರಂ ಠಪೇನ್ತಿ, ಪರಿಕ್ಖಾರೇ ನಟ್ಠೇ ಯೇಹಿ ಠಪಿತೋ, ತೇಸಂಯೇವ ಗೀವಾ, ಇತರೇಹಿ ಪನ ಸಹಾಯೇಹಿ ಭವಿತಬ್ಬಂ. ಯದಿ ಪನ ಸಙ್ಘೋ ಭಣ್ಡಾಗಾರಿಕಸ್ಸ ವಿಹಾರೇಯೇವ ಯಾಗುಭತ್ತಂ ದಾಪೇತಿ, ಸೋ ಚ ಭಿಕ್ಖಾಚಾರತ್ಥಾಯ ಗಾಮಂ ಗಚ್ಛತಿ, ನಟ್ಠಂ ತಸ್ಸೇವ ಗೀವಾ. ಭಿಕ್ಖಾಚಾರಂ ಪವಿಸನ್ತೇಹಿ ಅತಿರೇಕಚೀವರಂ ರಕ್ಖಣತ್ಥಾಯ ಠಪಿತವಿಹಾರವಾರಿಕಸ್ಸಪಿ ಯಾಗುಭತ್ತಂ ವಾ ನಿವಾಪಂ ವಾ ಲಭಮಾನಸ್ಸೇವ ಭಿಕ್ಖಾಚಾರಂ ಗಚ್ಛತೋ ಯಂ ತತ್ಥ ನಸ್ಸತಿ, ಸಬ್ಬಂ ಗೀವಾ. ನ ಕೇವಲಞ್ಚ ಏತ್ತಕಮೇವ, ಭಣ್ಡಾಗಾರಿಕಸ್ಸ ವಿಯ ಯಂ ತಸ್ಸ ಪಮಾದಪಚ್ಚಯಾ ನಸ್ಸತಿ, ಸಬ್ಬಂ ಗೀವಾ.

ಸಚೇ ವಿಹಾರೋ ಮಹಾ ಹೋತಿ, ಅಞ್ಞಂ ಪದೇಸಂ ರಕ್ಖಿತುಂ ಗಚ್ಛನ್ತಸ್ಸ ಅಞ್ಞಸ್ಮಿಂ ಪದೇಸೇ ನಿಕ್ಖಿತ್ತಂ ಹರನ್ತಿ, ಅವಿಸಯತ್ತಾ ಗೀವಾ ನ ಹೋತಿ. ಈದಿಸೇ ಪನ ವಿಹಾರೇ ವೇಮಜ್ಝೇ ಸಬ್ಬೇಸಂ ಓಸರಣಟ್ಠಾನೇ ಪರಿಕ್ಖಾರೇ ಠಪೇತ್ವಾ ನಿಸೀದಿತಬ್ಬಂ, ವಿಹಾರವಾರಿಕಾ ವಾ ದ್ವೇ ತಯೋ ಠಪೇತಬ್ಬಾ. ಸಚೇ ತೇಸಮ್ಪಿ ಅಪ್ಪಮತ್ತಾನಂ ಇತೋ ಚಿತೋ ಚ ರಕ್ಖತಂಯೇವ ಕಿಞ್ಚಿ ನಸ್ಸತಿ, ಗೀವಾ ನ ಹೋತಿ. ವಿಹಾರವಾರಿಕೇ ಬನ್ಧಿತ್ವಾ ಹರಿತಭಣ್ಡಮ್ಪಿ ಚೋರಾನಂ ಪಟಿಪಥಂ ಗತೇಸು ಅಞ್ಞೇನ ಮಗ್ಗೇನ ಹರಿತಭಣ್ಡಮ್ಪಿ ನ ತೇಸಂ ಗೀವಾ. ಸಚೇ ವಿಹಾರವಾರಿಕಾನಂ ವಿಹಾರೇ ದಾತಬ್ಬಂ ಯಾಗುಭತ್ತಂ ವಾ ನಿವಾಪೋ ವಾ ನ ಹೋತಿ, ತೇಹಿ ಪತ್ತಬ್ಬಲಾಭತೋ ಅತಿರೇಕಾ ದ್ವೇ ತಿಸ್ಸೋ ಯಾಗುಸಲಾಕಾ ತೇಸಂ ಪಹೋನಕಭತ್ತಸಲಾಕಾ ಚ ಠಪೇತುಂ ವಟ್ಟತಿ, ನಿಬದ್ಧಂ ಕತ್ವಾ ಪನ ನ ಠಪೇತಬ್ಬಾ. ಮನುಸ್ಸಾ ಹಿ ವಿಪ್ಪಟಿಸಾರಿನೋ ಹೋನ್ತಿ ‘‘ವಿಹಾರವಾರಿಕಾಯೇವ ಅಮ್ಹಾಕಂ ಭತ್ತಂ ಭುಞ್ಜನ್ತೀ’’ತಿ, ತಸ್ಮಾ ಪರಿವತ್ತೇತ್ವಾ ಪರಿವತ್ತೇತ್ವಾ ಠಪೇತಬ್ಬಾ. ಸಚೇ ತೇಸಂ ಸಭಾಗಾ ಸಲಾಕಭತ್ತಾದೀನಿ ಆಹರಿತ್ವಾ ದೇನ್ತಿ, ಇಚ್ಚೇತಂ ಕುಸಲಂ. ನೋ ಚೇ ದೇನ್ತಿ, ವಾರಂ ಗಾಹಾಪೇತ್ವಾ ನೀಹರಾಪೇತಬ್ಬಾನಿ. ಸಚೇ ವಿಹಾರವಾರಿಕೋ ದ್ವೇ ತಿಸ್ಸೋ ಯಾಗುಸಲಾಕಾ ಚ ಚತ್ತಾರಿ ಪಞ್ಚ ಸಲಾಕಭತ್ತಾನಿ ಚ ಲಭಮಾನೋ ಭಿಕ್ಖಾಚಾರಂ ಗಚ್ಛತಿ, ಭಣ್ಡಾಗಾರಿಕಸ್ಸ ವಿಯ ಸಬ್ಬಂ ನಟ್ಠಂ ಗೀವಾ ಹೋತಿ. ಸಚೇ ಸಙ್ಘಸ್ಸ ವಿಹಾರಪಾಲಾನಂ ದಾತಬ್ಬಂ ಭತ್ತಂ ವಾ ನಿವಾಪೋ ವಾ ನತ್ಥಿ, ಭಿಕ್ಖೂ ವಿಹಾರವಾರಂ ಗಹೇತ್ವಾ ಅತ್ತನೋ ಅತ್ತನೋ ನಿಸ್ಸಿತಕೇ ವಿಹಾರಂ ಜಗ್ಗಾಪೇನ್ತಿ, ಸಮ್ಪತ್ತವಾರಂ ಅಗ್ಗಹೇತುಂ ನ ಲಭತಿ. ಯಥಾ ಅಞ್ಞೇ ಭಿಕ್ಖೂ ಕರೋನ್ತಿ, ತಥೇವ ಕಾತಬ್ಬಂ. ಭಿಕ್ಖೂಹಿ ಪನ ಅಸಹಾಯಸ್ಸ ವಾ ಅದುತಿಯಸ್ಸ ವಾ ಯಸ್ಸ ಸಭಾಗೋ ಭಿಕ್ಖು ಭತ್ತಂ ಆನೇತ್ವಾ ದಾತಾ ನತ್ಥಿ, ಏವರೂಪಸ್ಸ ವಾರೋ ನ ಪಾಪೇತಬ್ಬೋ.

ಯಮ್ಪಿ ಪಾಕವಟ್ಟತ್ಥಾಯ ವಿಹಾರೇ ಠಪೇನ್ತಿ, ತಂ ಗಹೇತ್ವಾ ಉಪಜೀವನ್ತೇನ ಠಾತಬ್ಬಂ. ಯೋ ತಂ ನ ಉಪಜೀವತಿ, ಸೋ ವಾರಂ ನ ಗಾಹಾಪೇತಬ್ಬೋ. ಫಲಾಫಲತ್ಥಾಯಪಿ ವಿಹಾರೇ ಭಿಕ್ಖುಂ ಠಪೇನ್ತಿ, ಜಗ್ಗಿತ್ವಾ ಗೋಪೇತ್ವಾ ಫಲವಾರೇನ ಭಾಜೇತ್ವಾ ಖಾದನ್ತಿ. ಯೋ ತಾನಿ ಖಾದತಿ, ತೇನ ಠಾತಬ್ಬಂ, ಅನುಪಜೀವನ್ತೋ ನ ಗಾಹಾಪೇತಬ್ಬೋ. ಸೇನಾಸನಮಞ್ಚಪೀಠಪಚ್ಚತ್ಥರಣರಕ್ಖಣತ್ಥಾಯಪಿ ಠಪೇನ್ತಿ, ಆವಾಸೇ ವಸನ್ತೇನ ಠಾತಬ್ಬಂ, ಅಬ್ಭೋಕಾಸಿಕೋ ಪನ ರುಕ್ಖಮೂಲಿಕೋ ವಾ ನ ಗಾಹಾಪೇತಬ್ಬೋ. ಏಕೋ ನವಕೋ ಹೋತಿ, ಬಹುಸ್ಸುತೋ ಪನ ಬಹೂನಂ ಧಮ್ಮಂ ವಾಚೇತಿ, ಪರಿಪುಚ್ಛಂ ದೇತಿ, ಪಾಳಿಂ ವಣ್ಣೇತಿ, ಧಮ್ಮಕಥಂ ಕಥೇತಿ, ಸಙ್ಘಸ್ಸ ಭಾರಂ ನಿತ್ಥರತಿ, ಅಯಂ ಲಾಭಂ ಪರಿಭುಞ್ಜನ್ತೋಪಿ ಆವಾಸೇ ವಸನ್ತೋಪಿ ವಾರಂ ನ ಗಾಹಾಪೇತಬ್ಬೋ. ‘‘ಪುರಿಸವಿಸೇಸೋ ನಾಮ ಞಾತಬ್ಬೋ’’ತಿ ವದನ್ತಿ. ಉಪೋಸಥಾಗಾರಪಟಿಮಾಘರಜಗ್ಗನಕಸ್ಸ ಪನ ದಿಗುಣಂ ಯಾಗುಭತ್ತಂ, ದೇವಸಿಕಂ ತಣ್ಡುಲನಾಳಿ, ಸಂವಚ್ಛರೇ ತಿಚೀವರಂ ದಸವೀಸಗ್ಘನಕಂ ಕಪ್ಪಿಯಭಣ್ಡಞ್ಚ ದಾತಬ್ಬಂ. ಸಚೇ ಪನ ತಸ್ಸ ತಂ ಲಭಮಾನಸ್ಸೇವ ಪಮಾದೇನ ತತ್ಥ ಕಿಞ್ಚಿ ನಸ್ಸತಿ, ಸಬ್ಬಂ ಗೀವಾ. ಬನ್ಧಿತ್ವಾ ಬಲಕ್ಕಾರೇನ ಅಚ್ಛಿನ್ನಂ, ನ ಗೀವಾ. ತತ್ಥ ಚೇತಿಯಸ್ಸ ವಾ ಸಙ್ಘಸ್ಸ ವಾ ಸನ್ತಕೇನ ಚೇತಿಯಸ್ಸ ಸನ್ತಕಂ ರಕ್ಖಾಪೇತುಂ ವಟ್ಟತಿ, ಚೇತಿಯಸ್ಸ ಸನ್ತಕೇನ ಸಙ್ಘಸ್ಸ ಸನ್ತಕಂ ರಕ್ಖಾಪೇತುಂ ನ ವಟ್ಟತಿ. ಯಂ ಪನ ಚೇತಿಯಸ್ಸ ಸನ್ತಕೇನ ಸದ್ಧಿಂ ಸಙ್ಘಸ್ಸ ಸನ್ತಕಂ ಠಪಿತಂ ಹೋತಿ, ತಂ ಚೇತಿಯಸನ್ತಕೇ ರಕ್ಖಾಪಿತೇ ರಕ್ಖಿತಮೇವ ಹೋತೀತಿ ಏವಂ ವಟ್ಟತಿ. ಪಕ್ಖವಾರೇನ ಉಪೋಸಥಾಗಾರಾದೀನಿ ರಕ್ಖತೋಪಿ ಪಮಾದವಸೇನ ನಟ್ಠಂ ಗೀವಾಯೇವಾತಿ.

ಇತಿ ಪಾಳಿಮುತ್ತಕವಿನಯವಿನಿಚ್ಛಯಸಙ್ಗಹೇ

ಭಣ್ಡಪಟಿಸಾಮನವಿನಿಚ್ಛಯಕಥಾ ಸಮತ್ತಾ.