೨. ವಜ್ಜಪಟಿಚ್ಛಾದಿಕಸಿಕ್ಖಾಪದವಣ್ಣನಾ

೬೬೬. ದುತಿಯೇ ಪುರಿಮೇನಾತಿಆದಿ ಸುನ್ದರೀನನ್ದಾಯ ವಜ್ಜಪಟಿಚ್ಛಾದನೇ ಪಞ್ಞತ್ತತಂ ಸನ್ಧಾಯ ವುತ್ತಂ. ‘‘ಅಟ್ಠನ್ನ’’ನ್ತಿ ವುತ್ತತ್ತಾ ವಜ್ಜಪಟಿಚ್ಛಾದನಸ್ಸಾಪಿ ಪಟಿಚ್ಛಾದನೇ ಪಾರಾಜಿಕಮೇವಾತಿ ದಟ್ಠಬ್ಬಂ. ‘‘ಧುರಂ ನಿಕ್ಖಿತ್ತಮತ್ತೇ’’ತಿ ವುತ್ತತ್ತಾ ಪಣ್ಣತ್ತಿಂ ಅಜಾನನ್ತಿಯಾಪಿ ‘‘ಇದಂ ವಜ್ಜಂ ನ ಪಕಾಸೇಸ್ಸಾಮೀ’’ತಿ ಛನ್ದೇನ ಧುರಂ ನಿಕ್ಖೇಪಕ್ಖಣೇ ಪಾರಾಜಿಕನ್ತಿ ದಟ್ಠಬ್ಬಂ. ತಂ ಪನ ಪಟಿಚ್ಛಾದನಂ ಯಸ್ಮಾ ‘‘ಪೇಸಲಾ ಞತ್ವಾ ಗರಹಿಸ್ಸನ್ತೀ’’ತಿ ಭಯೇನೇವ ಹೋತಿ, ಭಯಞ್ಚ ಕೋಧಚಿತ್ತಸಮ್ಪಯುತ್ತಂ, ತಸ್ಮಾ ಇದಂ ‘‘ದುಕ್ಖವೇದನ’’ನ್ತಿ ವುತ್ತಂ. ಯಂ ಪನ ಸಾರತ್ಥದೀಪನಿಯಂ (ಸಾರತ್ಥ. ಟೀ. ಪಾರಾಜಿಕಕಣ್ಡ ೩.೬೬೬) ‘‘ಕಿಞ್ಚಾಪಿ ವಜ್ಜಪಟಿಚ್ಛಾದನಂ ಪೇಮವಸೇನ ಹೋತಿ, ತಥಾಪಿ ಸಿಕ್ಖಾಪದವೀತಿಕ್ಕಮಚಿತ್ತಂ ದೋಮನಸ್ಸಿತಮೇವ ಹೋತೀ’’ತಿ ಏವಂ ಪಣ್ಣತ್ತಿವೀತಿಕ್ಕಮಚಿತ್ತೇನೇವ ಛಾದನಂ ದೋಮನಸ್ಸತ್ತೇ ಕಾರಣಂ ವುತ್ತಂ, ತಂ ಅಕಾರಣಂ ಪಣ್ಣತ್ತಿವಿಜಾನನಂ ವಿನಾಪಿ ಆಪಜ್ಜಿತಬ್ಬತೋವ.

ವಜ್ಜಪಟಿಚ್ಛಾದಿಕಸಿಕ್ಖಾಪದವಣ್ಣನಾ ನಿಟ್ಠಿತಾ.

೬೬೯. ತತಿಯಂ ಉತ್ತಾನಮೇವ.