೧೦. ಭಿಕ್ಖುನಿಕ್ಖನ್ಧಕೋ

ಮಹಾಪಜಾಪತಿಗೋತಮೀವತ್ಥುಕಥಾವಣ್ಣನಾ

೪೦೩. ಭಿಕ್ಖುನಿಕ್ಖನ್ಧಕೇ ‘‘ಮಾತುಗಾಮಸ್ಸ ಪಬ್ಬಜಿತತ್ತಾ’’ತಿ ಇದಂ ಪಞ್ಚವಸ್ಸಸತತೋ ಉದ್ಧಂ ಸದ್ಧಮ್ಮಸ್ಸ ಅಪ್ಪವತ್ತನಕಾರಣದಸ್ಸನಂ. ಸುಕ್ಖವಿಪಸ್ಸಕಖೀಣಾಸವವಸೇನ ವಸ್ಸಸಹಸ್ಸನ್ತಿಆದಿ ಖನ್ಧಕಭಾಣಕಾನಂ ಮತಂ ಗಹೇತ್ವಾ ವುತ್ತಂ. ದೀಘನಿಕಾಯಟ್ಠಕಥಾಯಂ ಪನ ‘‘ಪಟಿಸಮ್ಭಿದಾಪ್ಪತ್ತೇಹಿ ವಸ್ಸಸಹಸ್ಸಂ ಅಟ್ಠಾಸಿ, ಛಳಭಿಞ್ಞೇಹಿ ವಸ್ಸಸಹಸ್ಸಂ, ತೇವಿಜ್ಜೇಹಿ ವಸ್ಸಸಹಸ್ಸಂ, ಸುಕ್ಖವಿಪಸ್ಸಕೇಹಿ ವಸ್ಸಸಹಸ್ಸಂ, ಪಾತಿಮೋಕ್ಖೇಹಿ ವಸ್ಸಸಹಸ್ಸಂ ಅಟ್ಠಾಸೀ’’ತಿ (ದೀ. ನಿ. ಅಟ್ಠ. ೩.೧೬೧) ವುತ್ತಂ. ಅಙ್ಗುತ್ತರ (ಅ. ನಿ. ಅಟ್ಠ. ೩.೮.೫೧) -ಸಂಯುತ್ತಟ್ಠಕಥಾಸುಪಿ (ಸಂ. ನಿ. ಅಟ್ಠ. ೨.೨.೧೫೬) ಅಞ್ಞಥಾವ ವುತ್ತಂ, ತಂ ಸಬ್ಬಂ ಅಞ್ಞಮಞ್ಞವಿರುದ್ಧಮ್ಪಿ ತಂತಂಭಾಣಕಾನಂ ಮತೇನ ಲಿಖಿತಸೀಹಳಟ್ಠಕಥಾಸು ಆಗತನಯಮೇವ ಗಹೇತ್ವಾ ಆಚರಿಯೇನ ಲಿಖಿತಂ ಈದಿಸೇ ಕಥಾವಿರೋಧೇ ಸಾಸನಪರಿಹಾನಿಯಾ ಅಭಾವತೋ, ಸೋಧನುಪಾಯಾಭಾವಾ ಚ. ಪರಮತ್ಥವಿರೋಧೋ ಏವ ಹಿ ಸುತ್ತಾದಿನಯೇನ ಸೋಧನೀಯೋ, ನ ಕಥಾಮಗ್ಗವಿರೋಧೋತಿ.

ಮಹಾಪಜಾಪತಿಗೋತಮೀವತ್ಥುಕಥಾವಣ್ಣನಾ ನಿಟ್ಠಿತಾ.

ಭಿಕ್ಖುನೀಉಪಸಮ್ಪದಾನುಜಾನನಕಥಾವಣ್ಣನಾ

೪೦೪-೮. ಪಾಳಿಯಂ ಯದಗ್ಗೇನಾತಿ ಯಸ್ಮಿಂ ದಿವಸೇ. ತದಾತಿ ತಸ್ಮಿಂಯೇವ ದಿವಸೇ. ವಿಮಾನೇತ್ವಾತಿ ಅವಮಾನಂ ಕತ್ವಾ.

೪೧೦-೧. ಆಪತ್ತಿಗಾಮಿನಿಯೋತಿ ಆಪತ್ತಿಂ ಆಪನ್ನಾಯೋ. ಕಮ್ಮವಿಭಙ್ಗೇತಿ ಪರಿವಾರೇ ಕಮ್ಮವಿಭಙ್ಗೇ (ಪರಿ. ೪೮೨ ಆದಯೋ).

೪೧೩-೫. ಪಾಳಿಯಂ ದ್ವೇ ತಿಸ್ಸೋ ಭಿಕ್ಖುನಿಯೋತಿ ದ್ವೀಹಿ ತೀಹಿ ಭಿಕ್ಖುನೀಹಿ. ನ ಆರೋಚೇನ್ತೀತಿ ಪಾತಿಮೋಕ್ಖುದ್ದೇಸಕಸ್ಸ ನ ಆರೋಚೇನ್ತಿ.

೪೧೬. ದುಸ್ಸವೇಣಿಯಾತಿ ಅನೇಕದುಸ್ಸಪಟ್ಟೇ ಏಕತೋ ಕತ್ವಾ ಕತವೇಣಿಯಾ.

೪೧೭. ವಿಸೇಸಕನ್ತಿ ಪತ್ತಲೇಖಾದಿವಣ್ಣವಿಸೇಸಂ. ಪಕಿಣನ್ತೀತಿ ವಿಕ್ಕಿಣನ್ತಿ. ನಮನಕನ್ತಿ ಪಾಸುಕಟ್ಠಿನಮನಕಬನ್ಧನಂ.

೪೨೨-೫. ಸಂವೇಲ್ಲಿಯನ್ತಿ ಕಚ್ಛಂ ಬನ್ಧಿತ್ವಾ ನಿವಾಸನಂ. ತಯೋ ನಿಸ್ಸಯೇತಿ ರುಕ್ಖಮೂಲಸೇನಾಸನಸ್ಸ ತಾಸಂ ಅಲಬ್ಭನತೋ ವುತ್ತಂ.

೪೨೬-೮. ಅಟ್ಠೇವ ಭಿಕ್ಖುನಿಯೋ ಯಥಾವುಡ್ಢಂ ಪಟಿಬಾಹನ್ತೀತಿ ಅಟ್ಠ ಭಿಕ್ಖುನಿಯೋ ವುಡ್ಢಪಟಿಪಾಟಿಯಾವ ಗಣ್ಹನ್ತಿಯೋ ಆಗತಪಟಿಪಾಟಿಂ ಪಟಿಬಾಹನ್ತಿ, ನಾಞ್ಞಾತಿ ಅತ್ಥೋ. ಅನುವಾದಂ ಪಟ್ಠಪೇನ್ತೀತಿ ಇಸ್ಸರಿಯಂ ಪವತ್ತೇನ್ತೀತಿ ಅತ್ಥಂ ವದನ್ತಿ.

೪೩೦. ಭಿಕ್ಖುದೂತೇನಾತಿ ಭಿಕ್ಖುನಾ ದೂತಭೂತೇನ. ಸಿಕ್ಖಮಾನದೂತೇನಾತಿ ಸಿಕ್ಖಮಾನಾಯ ದೂತಾಯ.

೪೩೧. ನ ಸಮ್ಮತೀತಿ ನಪ್ಪಹೋತಿ. ನವಕಮ್ಮನ್ತಿ ‘‘ನವಕಮ್ಮಂ ಕತ್ವಾ ವಸತೂ’’ತಿ ಅಪಲೋಕೇತ್ವಾ ಸಙ್ಘಿಕಭೂಮಿಯಾ ಓಕಾಸದಾನಂ.

೪೩೨-೬. ಸನ್ನಿಸಿನ್ನಗಬ್ಭಾತಿ ದುವಿಞ್ಞೇಯ್ಯಗಬ್ಭಾ. ಮಹಿಲಾತಿತ್ಥೇತಿ ಇತ್ಥೀನಂ ಸಾಧಾರಣತಿತ್ಥೇ.

ಭಿಕ್ಖುನೀಉಪಸಮ್ಪದಾನುಜಾನನಕಥಾವಣ್ಣನಾ ನಿಟ್ಠಿತಾ.

ಭಿಕ್ಖುನಿಕ್ಖನ್ಧಕವಣ್ಣನಾನಯೋ ನಿಟ್ಠಿತೋ.