೯. ಚಮ್ಪೇಯ್ಯಕ್ಖನ್ಧಕೋ

ಕಸ್ಸಪಗೋತ್ತಭಿಕ್ಖುವತ್ಥುಕಥಾದಿವಣ್ಣನಾ

೩೮೦. ಚಮ್ಪೇಯ್ಯಕ್ಖನ್ಧಕೇ ತನ್ತಿಬದ್ಧೋತಿ ತನ್ತಿ ವುಚ್ಚತಿ ಬ್ಯಾಪಾರೋ, ತತ್ಥ ಬದ್ಧೋ, ಉಸ್ಸುಕ್ಕಂ ಆಪನ್ನೋತಿ ಅತ್ಥೋ. ತೇನಾಹ ‘‘ತಸ್ಮಿಂ ಆವಾಸೇ’’ತಿಆದಿ.

೩೮೭-೮. ಹಾಪನಂ ವಾ ಅಞ್ಞಥಾ ಕರಣಂ ವಾ ನತ್ಥೀತಿ ಞತ್ತಿಕಮ್ಮಸ್ಸ ಞತ್ತಿಯಾ ಏಕತ್ತಾ ಹಾಪನಂ ನ ಸಮ್ಭವತಿ, ತಸ್ಸಾ ಏಕತ್ತಾ ಏವ ಪಚ್ಛಾ ಞತ್ತಿಠಪನವಸೇನ, ದ್ವಿಕ್ಖತ್ತುಂ ಠಪನವಸೇನ ಚ ಅಞ್ಞಥಾ ಕರಣಂ ನತ್ಥಿ. ಪರತೋತಿ ಪರಿವಾರೇ. ತನ್ತಿ ಪಬ್ಬಾಜನೀಯಕಮ್ಮಂ, ತಸ್ಸಾತಿ ಅತ್ಥೋ.

ಕಸ್ಸಪಗೋತ್ತಭಿಕ್ಖುವತ್ಥುಕಥಾದಿವಣ್ಣನಾ ನಿಟ್ಠಿತಾ.

ದ್ವೇನಿಸ್ಸರಣಾದಿಕಥಾವಣ್ಣನಾ

೩೯೫. ಏಸಾತಿ ‘‘ಬಾಲೋ’’ತಿಆದಿನಾ ನಿದ್ದಿಟ್ಠಪುಗ್ಗಲೋ, ಅಪ್ಪತ್ತೋತಿ ಸಮ್ಬನ್ಧೋ. ತತ್ಥ ಕಾರಣಮಾಹ ‘‘ಯಸ್ಮಾ’’ತಿಆದಿ. ತತ್ಥ ಆವೇಣಿಕೇನ ಲಕ್ಖಣೇನಾತಿ ಪಬ್ಬಾಜನೀಯಕಮ್ಮಸ್ಸ ನಿಮಿತ್ತಭಾವೇನ ಪಾಳಿಯಂ ವುತ್ತತ್ತಾ ಅಸಾಧಾರಣಭೂತೇನ ಕುಲದೂಸಕಭಾವೇನ. ಯದಿ ಹೇಸ ತಂ ಕಮ್ಮಂ ಅಪ್ಪತ್ತೋ, ಕಥಂ ಪನ ಸುನಿಸ್ಸಾರಿತೋತಿ ಆಹ ‘‘ಯಸ್ಮಾ ಪನಸ್ಸ ಆಕಙ್ಖಮಾನೋ ಸಙ್ಘೋ ಪಬ್ಬಾಜನೀಯಕಮ್ಮಂ ಕರೇಯ್ಯಾತಿ ವುತ್ತಂ, ತಸ್ಮಾ ಸುನಿಸ್ಸಾರಿತೋ’’ತಿ. ತತ್ಥ ವುತ್ತನ್ತಿ ಕಮ್ಮಕ್ಖನ್ಧಕೇ (ಚೂಳವ. ೨೭) ವುತ್ತಂ.

ಏತ್ಥ ಪನ ಕುಲದೂಸಕಕಮ್ಮಂ ಕತ್ವಾ ಪಬ್ಬಾಜನೀಯಕಮ್ಮಕತಸ್ಸ ತೇರಸಕಕಣ್ಡಕಟ್ಠಕಥಾಯಂ ‘‘ಯಸ್ಮಿಂ ವಿಹಾರೇ ವಸನ್ತೇನ ಯಸ್ಮಿಂ ಗಾಮೇ ಕುಲದೂಸಕಕಮ್ಮಂ ಕತಂ ಹೋತಿ, ತಸ್ಮಿಂ ವಿಹಾರೇ ವಾ ತಸ್ಮಿಂ ಗಾಮೇ ವಾ ನ ವಸಿತಬ್ಬ’’ನ್ತಿಆದಿನಾ (ಪಾರಾ. ಅಟ್ಠ. ೨.೪೩೩) ಯಾ ಸಮ್ಮಾವತ್ತನಾ ವುತ್ತಾ, ಸಾ ಇತರೇನಾಪಿ ಪೂರೇತಬ್ಬಾ. ಯಂ ಪನ ಪಟಿಪ್ಪಸ್ಸದ್ಧಕಮ್ಮಸ್ಸ ಕುಲದೂಸಕಸ್ಸ ತತ್ಥೇವ ಅಟ್ಠಕಥಾಯಂ ‘‘ಯೇಸು ಕುಲೇಸು ಕುಲದೂಸಕಕಮ್ಮಂ ಕತಂ, ತತೋ ಪಚ್ಚಯಾ ನ ಗಹೇತಬ್ಬಾ’’ತಿಆದಿ ವುತ್ತಂ, ತಂ ನ ಪೂರೇತಬ್ಬಂ ಕುಲಸಙ್ಗಹಸ್ಸ ಅಕತತ್ತಾ. ಏವಂ ಸೇಸಕಮ್ಮೇಸುಪಿ. ಯದಿ ಏವಂ ‘‘ತಜ್ಜನೀಯಕಮ್ಮಾರಹಸ್ಸ ನಿಯಸಕಮ್ಮಂ ಕರೋತಿ…ಪೇ… ಏವಂ ಖೋ, ಉಪಾಲಿ, ಅಧಮ್ಮಕಮ್ಮಂ ಹೋತೀ’’ತಿಆದಿವಚನಂ (ಮಹಾವ. ೪೦೨) ವಿರುಜ್ಝತೀತಿ? ನ ವಿರುಜ್ಝತಿ ಸಙ್ಘಸನ್ನಿಟ್ಠಾನವಸೇನ ತಜ್ಜನೀಯಾದಿಕಮ್ಮಾರಹತ್ತಸ್ಸ ಸಿಜ್ಝನತೋ. ಯಸ್ಸ ಹಿ ಸಙ್ಘೋ ‘‘ತಜ್ಜನೀಯಕಮ್ಮಂ ಕರೋಮಾ’’ತಿ ಸನ್ನಿಟ್ಠಾನಂ ಕತ್ವಾ ಕಮ್ಮವಾಚಂ ಸಾವೇನ್ತೋ ಪಬ್ಬಾಜನೀಯಕಮ್ಮವಾಚಂ ಸಾವೇತಿ, ತಸ್ಸ ಕಮ್ಮಂ ಅಧಮ್ಮಕಮ್ಮಂ ಹೋತಿ. ಸಚೇ ಪನ ‘‘ತಸ್ಸೇವ ಪಬ್ಬಾಜನೀಯಕಮ್ಮಮೇವ ಕರೋಮಾ’’ತಿ ಸನ್ನಿಟ್ಠಾನಂ ಕತ್ವಾ ತದೇವ ಕರೋತಿ, ತಸ್ಸ ತಂ ಕಮ್ಮಂ ಧಮ್ಮಕಮ್ಮನ್ತಿ ವೇದಿತಬ್ಬಂ.

ಏವಮಿಧ ‘‘ನಿಸ್ಸಾರಣ’’ನ್ತಿ ಅಧಿಪ್ಪೇತಸ್ಸ ಪಬ್ಬಾಜನೀಯಕಮ್ಮಸ್ಸ ವಸೇನ ಅತ್ಥಂ ದಸ್ಸೇತ್ವಾ ಇದಾನಿ ತದಞ್ಞೇಸಂ ತಜ್ಜನೀಯಾದೀನಂ ವಸೇನ ನಿಸ್ಸಾರಣೇ ಅಧಿಪ್ಪೇತೇ ‘‘ಅಪ್ಪತ್ತೋ ನಿಸ್ಸಾರಣ’’ನ್ತಿ ಇಮಸ್ಸ ಪಟಿಪಕ್ಖವಸೇನ ಸಮ್ಪತ್ತೋ ನಿಸ್ಸಾರಣಂ, ‘‘ತಞ್ಚೇ ಸಙ್ಘೋ ನಿಸ್ಸಾರೇತಿ. ಸುನಿಸ್ಸಾರಿತೋ’’ತಿ ಅತ್ಥಸಮ್ಭವಂ ದಸ್ಸೇತುಂ ಪುನ ‘‘ತಞ್ಚೇ ಸಙ್ಘೋ ನಿಸ್ಸಾರೇತೀತಿ ಸಚೇ ಸಙ್ಘೋ’’ತಿಆದಿ ವುತ್ತಂ. ತತ್ಥ ತತ್ಥಾತಿ ತಜ್ಜನೀಯಾದಿಕಮ್ಮವಿಸಯೇ, ಏಕೇನಾಪಿ ಅಙ್ಗೇನ ನಿಸ್ಸಾರಣಾ ಅನುಞ್ಞಾತಾತಿ ಯೋಜನಾ. ಪಾಳಿಯಂ ಅಪ್ಪತ್ತೋ ನಿಸ್ಸಾರಣನ್ತಿ ಏತ್ಥ ಆಪನ್ನೋ ಆವೇಣಿಕವಸೇನ ತಜ್ಜನೀಯಾದಿಸಙ್ಖಾತಂ ನಿಸ್ಸಾರಣಂ ಪತ್ತೋತಿ ಅತ್ಥೋ ಗಹೇತಬ್ಬೋ.

ದ್ವೇನಿಸ್ಸರಣಾದಿಕಥಾವಣ್ಣನಾ ನಿಟ್ಠಿತಾ.

ಚಮ್ಪೇಯ್ಯಕ್ಖನ್ಧಕವಣ್ಣನಾನಯೋ ನಿಟ್ಠಿತೋ.